1.

Maidir le hAirteagal 2(1) de Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (an Rialachán Ginearálta maidir le Cosaint Sonraí), agus Airteagal 9(1) de Threoir (AE) 2016/680 ó Pharlaimint na hEorpa agus ón gComhairle an 27 Aibreán 2016 i ndáil le cosaint daoine nádúrtha maidir le próiseáil sonraí pearsanta ag údaráis inniúla chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú, agus saorghluaiseacht sonraí den sórt sin, agus lena n-aisghairtear Cinneadh Réime 2008/977/CGB ón gComhairle,

ní mór léiriú a dhéanamh mar seo a leanas:

tá feidhm ag an Rialachán sin maidir leis an ngníomhaíocht a dhéanann stiúrthóireacht údaráis phoiblí, arb é atá inti sonraí a bhaineann lena cháil mar dhuine faoi dhrochamhras in imscrúdú coiriúil a stóráil i gcomhad pearsanra duine dá hoifigigh. Ní bhaineann sé le hábhar i ndáil leis sin go bhfuair an stiúrthóireacht sin na sonraí sin trí stiúrthóireacht eile ar leis an údarás poiblí céanna í, agus an stiúrthóireacht sin a raibh sé de chumhacht aici imscrúdú den chineál sin a dhéanamh.

2.

Maidir le hAirteagal 17(3)(b) de Rialachán 2016/679, arna léamh i gcomhar le pointe (c) den chéad fhomhír d’Airteagal 6(1) agus Airteagal 6(3) de, agus i bhfianaise Airteagal 52(1) den Chairt um Chearta Bunúsacha an Aontais Eorpaigh,

ní mór léiriú a dhéanamh mar seo a leanas:

féadfar a mheas go bhfuil údar le sonraí pearsanta a bhaineann lena cháil mar dhuine faoi dhrochamhras in imscrúdú coiriúil a cuireadh ar fionraí a stóráil i gcomhad pearsanra oifigigh póilíneachta, chun a ghairm bheatha a bhainistiú agus chun faireachán a dhéanamh ar chomhlíonadh an oifigigh sin ar na rialacha a bhaineann lena dhualgais, ar choinníoll go bhfuil an bunús dlí sin soiléir agus beacht, go bhfuil a chur i bhfeidhm intuartha do na hábhair sonraí agus go gcomhlíonann an oibleagáid sin cuspóir leasa phoiblí agus go bhfuil sí comhréireach leis an gcuspóir sin.

3.

Maidir le hAirteagal 1 de Threoir 2000/78/CE ón gComhairle an 27 Samhain 2000 lena mbunaítear creat ginearálta ar son na córa comhionainne maidir leis an bhfostaíocht agus leis an obair,

ní mór léiriú a dhéanamh mar seo a leanas:

níl feidhm ag an Treoir sin i gcás ina ndiúltaíonn údarás poiblí, a bhfuil stiúrthóireacht amháin aige atá freagrach as imscrúduithe coiriúla a dhéanamh ar oifigigh atá fostaithe ag an údarás sin, diúltú, ina cháil mar fhostóir, duine dá oifigigh a chur chun cinn ar an bhforas amháin go raibh sé ina cháil mar dhuine faoi dhrochamhras in imscrúdú den sórt sin a cuireadh ar fionraí ar deireadh, i gcás nár cúisíodh an t-oifigeach sin i leith an chiona lena mbaineann agus nár tionscnaíodh imeachtaí ina choinne.