1)

An gcuimsítear faoi raon feidhme Threoir 2014/42, (1) go háirithe Airteagal 4 de, agus faoi raon feidhme Chinneadh Réime 2005/212, (2) go háirithe Airteagal 2 de, reachtaíocht náisiúnta ar dá réir a dtugann cúirt náisiúnta breith maidir le fáltais ón gcoireacht a choigistiú in imeachtaí ar leithligh a bhaineann le maoin a fuarthas go mídhleathach, atá scartha ó na príomhimeachtaí coiriúla, sula gcruthaítear go ndearnadh cion coiriúil agus sula gciontaítear aon duine i leith an chiona sin, agus lena bhforáiltear freisin do choigistiú atá bunaithe ar ábhar a fuarthas ó chomhad an cháis choiriúil?

2)

I gcás go dtugtar freagra dearfach ar an gcéad cheist, an gcaithfear a mheas go bhfuil an reachtaíocht maidir le rochtain ar ábhar i gcomhad an cháis in imeachtaí a bhaineann le maoin a fuarthas go mídhleathach i gcomhréir leis an gceart chun triail chóir a fháil a leagtar síos in Airteagal 47 den Chairt agus in Airteagal 8(1) de Threoir 2014/42?

3)

An gcaithfear prionsabal thosaíocht dhlí an Aontais a léiriú sa chaoi go gcoisctear leis ar chúirt bhunreachtúil Ballstáit, a bhfuil caingean os a comhair maidir le bunreachtúlacht reachtaíochta náisiúnta arna dearbhú a bheith ar neamhréir le dlí an Aontais, a rialú go bhfuil feidhm ag prionsabal na deimhneachta dlíthiúla agus nach mór éifeachtaí dlí na reachtaíochta sin a choinneáil ar mhaithe leis an tréimhse ina raibh sí i bhfeidhm?