AN COIMISIÚN EORPACH
An Bhruiséil,15.10.2026
COM(2026) 550 final
2026/0315(NLE)
Togra le haghaidh
CINNEADH ÓN gCOMHAIRLE
maidir leis an seasamh atá le glacadh thar ceann an Aontais Eorpaigh sa Choiste Speisialaithe um Chomhordú Slándála Sóisialta arna bhunú leis an gComhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile, a mhéid a bhaineann le glacadh cinnidh chun Iarscríbhinn SSC-7 a ghabhann leis an bPrótacal maidir le Comhordú Slándála Sóisialta a leasú
MEABHRÁN MÍNIÚCHÁIN
1.Ábhar an togra
Tá an Coimisiún ag moladh go leagfaidh an Chomhairle síos an seasamh atá le glacadh thar ceann an Aontais Eorpaigh sa Choiste Speisialaithe um Chomhordú Slándála Sóisialta arna bhunú leis an gComhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (‘an Comhaontú Trádála agus Comhair’), faoi ghlacadh cinnidh ón gCoiste Speisialaithe sin chun leasú a dhéanamh ar Iarscríbhinn SSC-7 a ghabhann leis an bPrótacal maidir le Comhordú Slándála Sóisialta a ghabhann leis an gComhaontú Trádála agus Comhair (an ‘Prótacal’).
2.Comhthéacs an togra
2.1.An Comhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt , agus Ríocht Aontaithe na Breataine Móire agus Thuaisceart Éireann, den pháirt eile
Leis an gComhaontú Trádála agus Comhair, leagtar síos an bunús le haghaidh caidreamh leathan idir an tAontas Eorpach agus an Ríocht Aontaithe agus tá forálacha ann maidir le comhordú córas slándála sóisialta idir an tAontas Eorpach agus an Ríocht Aontaithe. Tháinig sé i bhfeidhm an 1 Bealtaine 2021 tar éis é a bheith á chur i bhfeidhm go sealadach ó bhí an 1 Eanáir 2021 ann.
2.2.An Coiste Speisialaithe um Chomhordú Slándála Sóisialta
Bunaíodh an Coiste Speisialaithe um Chomhordú Slándála Sóisialta (‘an Coiste Speisialaithe’) faoi Airteagal 8(1)(p) den Chomhaontú Trádála agus Comhair. In Iarscríbhinn 1 a ghabhann leis an gComhaontú Trádála agus Comhair, leagtar síos rialacha nós imeachta na gCoistí Speisialaithe. Leagtar síos cúraimí an Choiste Speisialaithe in Airteagal 8(4) den Chomhaontú agus airítear leo:
·Faireachán a dhéanamh ar chur chun feidhme an Chomhaontaithe agus a áirithiú go gcuirfear chun feidhme mar is ceart é,
·Cinntí agus moltaí a ghlacadh, lena n‑áirítear leasuithe ar an gComhaontú sna cásanna dá bhforáiltear ann,
·Saincheisteanna teicniúla a phlé a thiocfadh as cur chun feidhme an Chomhaontaithe.
I gcomhréir le hAirteagal 8(5) den Chomhaontú Trádála agus Comhair, bíonn ionadaithe ón Aontas agus ón Ríocht Aontaithe sa Choiste Speisialaithe. De bhun Airteagal 10(2) den Chomhaontú Trádála agus Comhair, glacann sé cinntí agus déanann sé moltaí de chomhthoil.
2.3.Gníomh beartaithe an Choiste Speisialaithe um Chomhordú Slándála Sóisialta
De bhun Airteagal SSC.68 den Phrótacal, féadfaidh an Coiste Speisialaithe na hIarscríbhinní agus na Foscríbhinní a ghabhann leis an bPrótacal a leasú. Tá an Coiste Speisialaithe le cinneadh a ghlacadh maidir le leasú a dhéanamh ar Iarscríbhinn SSC-7 a ghabhann leis an bPrótacal (‘an gníomh atá beartaithe’).
Is é is cuspóir don ghníomh atá beartaithe Iarscríbhinn SSC-7 a leasú chun Airteagal nua SSCI.17a a thabhairt isteach, chun an deis a thabhairt do na Ballstáit agus don Ríocht Aontaithe comhaontuithe a thabhairt i gcrích chun maolú a dhéanamh, i dtacar teoranta cúinsí réamhshainithe i gcásanna aonair agus sna cásanna sin amháin agus chun leas na ndaoine lena mbaineann, ar na rialacha maidir leis an reachtaíocht is infheidhme de bhun an Phrótacail. Ní leasaítear eilimintí bunriachtanacha an Phrótacail leis an ngníomh atá beartaithe.
Beidh an gníomh atá beartaithe ina cheangal ar na Páirtithe i gcomhréir le hAirteagal 10(1) den Chomhaontú Trádála agus Comhair, ina bhforáiltear an méid seo a leanas: ‘Na cinntí a ghlacfaidh an Chomhairle Comhpháirtíochta, nó, de réir mar a bheidh, Coiste, beidh siad ina gceangal ar na Páirtithe agus ar na comhlachtaí uile arna mbunú faoin gComhaontú seo agus faoi aon chomhaontú forlíontach, lena n‑áirítear an binse eadrána dá dtagraítear i dTeideal I de Chuid 6. […]”. I gcomhréir le Riail 9(3) d’Iarscríbhinn 1 maidir le Rialacha nós imeachta na Comhairle Comhpháirtíochta agus na gCoistí, sonrófar sna cinntí a ghlacfaidh an Coiste Speisialaithe an dáta a thiocfaidh siad i bhfeidhm.
3.An seasamh atá le glacadh thar ceann an Aontais
3.1.
Iarscríbhinn SSC-7 a ghabhann leis an bPrótacal maidir le comhordú slándála sóisialta
In Iarscríbhinn SSC-7 (‘An Chuid Cur Chun Feidhme’) a ghabhann leis an Prótacal maidir le Comhordú Slándála Sóisialta, leagtar síos an nós imeachta chun an Prótacal a chur chun feidhme. Moltar Iarscríbhinn SSC-7 a ghabhann leis an bPrótacal maidir le Comhordú Slándála Sóisialta a leasú chun Airteagal nua a thabhairt isteach a bhaineann le deis a thabhairt do na Ballstáit agus don Ríocht Aontaithe comhaontuithe a thabhairt i gcrích chun maolú a dhéanamh (‘comhaontuithe maolaithe’), i dtacar teoranta cúinsí réamhshainithe i gcásanna aonair sonracha agus sna cásanna sin amháin agus chun leas na ndaoine lena mbaineann, ar na rialacha maidir leis an reachtaíocht is infheidhme de bhun an Phrótacail.. Tá an fhéidearthacht maidir leis na comhaontuithe maolaithe sin le tabhairt isteach le haghaidh tacar teoranta cúinsí réamhshainithe amháin, is iad sin:
–Chun an uastréimhse dí-astaithe a leagtar síos leis an bPrótacal a shárú suas le 12 mhí i gceann de na cásanna seo a leanas: in imthosca eisceachtúla nárbh fhéidir a thuar ag tús an dí-astaithe; chun athrú ar an reachtaíocht is infheidhme a sheachaint a mbeadh éifeachtaí díobhálacha aige ar chearta pinsin an duine lena mbaineann; nó i gcás aistrithe ionchorparáide bainisteoirí agus speisialtóirí de réir bhrí Airteagal 141 den Chomhaontú Trádála agus Comhair.
–Chun athrú ar an reachtaíocht is infheidhme a sheachaint i gcás ina mbeadh éifeachtaí díobhálacha aige mar gheall ar staid sláinte an duine lena mbaineann nó duine dá theaghlach.
–I gcás ina mbeadh torthaí aimhrialta, éagóracha nó éigearta ann do staid aonair an duine lena mbaineann mar thoradh ar Airteagail SSC.10 go SSC.12 den Phrótacal a chur i bhfeidhm.
–Chun staideanna a thabhairt chun rialtachta, maidir le staid aonair an duine lena mbaineann, i gcás inar cinneadh an reachtaíocht is infheidhme go mícheart agus ina ndéanfadh athruithe cúlghabhálacha ar an reachtaíocht is infheidhme dochar don duine nó don chatagóir daoine lena mbaineann.
4.Bunús dlí
4.1.Bunús dlí don nós imeachta
Is comhlacht é an Coiste Speisialaithe a bunaíodh le comhaontú, is é sin an Comhaontú Trádála agus Comhair.
Tá éifeachtaí dlíthiúla ag an ngníomh a n‑iarrtar ar an gCoiste Speisialaithe é a ghlacadh, toisc go mbeidh éifeachtaí dlíthiúla aige ar an Aontas faoin gComhaontú Trádála agus Comhair. Beidh an gníomh atá beartaithe ina cheangal ar an Aontas agus ar an Ríocht Aontaithe i gcomhréir le hAirteagal 10 den Chomhaontú Trádála agus Comhair.
Leis an gníomh atá beartaithe, ní dhéantar creat institiúideach an Chomhaontaithe a fhorlíonadh ná a leasú.
Dá bhrí sin, is é Airteagal 218(9) CFAE is bunús dlí nós imeachta don chinneadh atá beartaithe.
4.2.Bunús dlí substainteach
Baineann príomhchuspóir agus ábhar an ghnímh atá beartaithe le leasú a dhéanamh ar Iarscríbhinn SSC-7 a ghabhann leis an Prótacal maidir le Comhordú Slándála Sóisialta chun an deis a thabhairt do na Ballstáit agus don Ríocht Aontaithe comhaontuithe a thabhairt i gcrích chun maolú a dhéanamh, i dtacar teoranta cúinsí réamhshainithe i gcásanna aonair sonracha agus sna cásanna sin amháin agus chun leas na ndaoine lena mbaineann, ar na rialacha maidir leis an reachtaíocht is infheidhme de bhun an Phrótacail.
Leis an ngníomh atá beartaithe saothraítear cuspóirí i réimse an chomhordaithe slándála sóisialta.
Dá bhrí sin, is é Airteagal 48 CFAE bunús dlí substainteach an chinnidh atá beartaithe.
4.3.Conclúid
Is é an bunús dlí ba cheart a bheith leis an gcinneadh atá beartaithe Airteagal 48 CFAE i gcomhar le hAirteagal 218(9) CFAE.
5.Foilsiú an ghnímh atá beartaithe
Ós rud é, leis an gcinneadh ón gCoiste Speisialaithe, go ndéanfar leasú ar Iarscríbhinn SSC-7 a ghabhann leis an bPrótacal maidir le Comhordú Slándála Sóisialta a ghabhann leis an gComhaontú Trádála agus Comhair, is iomchuí é a fhoilsiú in Iris Oifigiúil an Aontais Eorpaigh tar éis a ghlactha.
2026/0315 (NLE)
Togra le haghaidh
CINNEADH ÓN gCOMHAIRLE
maidir leis an seasamh atá le glacadh thar ceann an Aontais Eorpaigh sa Choiste Speisialaithe um Chomhordú Slándála Sóisialta arna bhunú leis an gComhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile, a mhéid a bhaineann le glacadh cinnidh chun Iarscríbhinn SSC-7 a ghabhann leis an bPrótacal maidir le Comhordú Slándála Sóisialta a leasú
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 48, i gcomhar le hAirteagal 218(9) de,
Ag féachaint don togra ón gCoimisiún Eorpach,
De bharr an mhéid seo a leanas:
(1)An Comhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (‘an Comhaontú Trádála agus Comhair’), thug an tAontas i gcrích é trí bhíthin Chinneadh (AE) 2021/689 ón gComhairle.
(2)De bhun Airteagal 778(1) den Chomhaontú Trádála agus Comhair, is cuid dhílis den Chomhaontú sin na Prótacail agus na hIarscríbhinní a ghabhann leis. I gcomhréir le hAirteagal 783(3) den Chomhaontú Trádála agus Comhair, ón dáta ónar cuireadh an Comhaontú sin i bhfeidhm go sealadach ar aghaidh, tá tagairtí do dháta a theacht i bhfeidhm le tuiscint mar thagairtí don dáta ónar cuireadh i bhfeidhm go sealadach é.
(3)Le hAirteagal 8(4)(c) den Chomhaontú Trádála agus Comhair, cumhachtaítear don Choiste Speisialaithe um Chomhordú Slándála Sóisialta (an ‘Coiste Speisialaithe’) cinntí, lena n‑áirítear leasuithe, agus moltaí a ghlacadh i leith na n‑ábhar uile i gcás ina bhforáiltear amhlaidh sa Chomhaontú sin. De bhun Airteagal SSC.68 den Phrótacal maidir le Comhordú Slándála Sóisialta a ghabhann leis an gComhaontú Trádála agus Comhair (an ‘Prótacal’), féadfaidh an Coiste Speisialaithe leasú a dhéanamh ar na hIarscríbhinní agus ar na Foscríbhinní a ghabhann leis an bPrótacal. I gcomhréir le hAirteagal 10(1) den Chomhaontú Trádála agus Comhair, tá na cinntí a ghlacann an Coiste Speisialaithe ina gceangal ar na Páirtithe.
(4)Tá sé beartaithe ag an gCoiste Speisialaithe cinneadh a ghlacadh de bhun Airteagal SSC.68 den Phrótacal chun Iarscríbhinn SSC-7 a ghabhann leis an bPrótacal a leasú chun an deis a thabhairt do na Ballstáit agus don Ríocht Aontaithe comhaontuithe a thabhairt i gcrích chun maolú a dhéanamh, i dtacar teoranta cúinsí réamhshainithe i gcásanna aonair sonracha agus sna cásanna sin amháin agus chun leas na ndaoine lena mbaineann, ar na rialacha maidir leis an reachtaíocht is infheidhme de bhun an Phrótacail. Má ghlactar an cinneadh atá beartaithe ón gCoiste Speisialaithe, beidh éifeachtaí dlíthiúla aige ar an Aontas.
(5)Is iomchuí, dá bhrí sin, an seasamh atá le glacadh sa Choiste Speisialaithe maidir leis an leasú ar Iarscríbhinn SSC-7 a ghabhann leis an bPrótacal a leagan síos.
TAR ÉIS AN CINNEADH SEO A GHLACADH:
Airteagal 1
An seasamh atá le glacadh thar ceann an Aontais sa Choiste Speisialaithe um Chomhordú Slándála Sóisialta arna bhunú le hAirteagal 8(1)(p) den Chomhaontú Trádála agus Comhair (an ‘Coiste Speisialaithe’), bunófar é ar an dréachtchinneadh ón gCoiste Speisialaithe atá i gceangal leis an gCinneadh seo.
Airteagal 2
Féadfar teacht ar chomhaontú maidir le mionathruithe teicniúla ar an seasamh a leagtar amach sa dréachtchinneadh ón gCoiste Speisialaithe atá i gceangal leis an gCinneadh seo gan cinneadh eile ón gComhairle.
Airteagal 3
Tiocfaidh an Cinneadh seo i bhfeidhm ar dháta a ghlactha.
Arna dhéanamh sa Bhruiséil,
