This document is an excerpt from the EUR-Lex website
Document 52025PC0447
Recommendation for a COUNCIL DECISION authorising the opening of negotiations on a framework agreement between the European Union and the United States of America on the exchange of information for security screenings and identity verifications relating to border procedures and applications for visa
Moladh le haghaidh CINNEADH ÓN gCOMHAIRLE lena n údaraítear tús a chur leis an gcaibidlíocht maidir le creat chomhaontú idir an tAontas Eorpach agus Stáit Aontaithe Mheiriceá i ndáil le malartú faisnéise le haghaidh scagadh slándála agus fíorú céannachta a bhaineann le nósanna imeachta teorann agus iarratais ar víosaí
Moladh le haghaidh CINNEADH ÓN gCOMHAIRLE lena n údaraítear tús a chur leis an gcaibidlíocht maidir le creat chomhaontú idir an tAontas Eorpach agus Stáit Aontaithe Mheiriceá i ndáil le malartú faisnéise le haghaidh scagadh slándála agus fíorú céannachta a bhaineann le nósanna imeachta teorann agus iarratais ar víosaí
COM/2025/447 final
AN COIMISIÚN EORPACH
An Bhruiséil,23.7.2025
COM(2025) 447 final
Moladh le haghaidh
CINNEADH ÓN gCOMHAIRLE
lena n‑údaraítear tús a chur leis an gcaibidlíocht maidir le creat‑chomhaontú idir an tAontas Eorpach agus Stáit Aontaithe Mheiriceá i ndáil le malartú faisnéise le haghaidh scagadh slándála agus fíorú céannachta a bhaineann le nósanna imeachta teorann agus iarratais ar víosaí
MEABHRÁN MÍNIÚCHÁIN
1.COMHTHÉACS AN TOGRA
•Forais agus cuspóirí an togra
In 2022, thug Stáit Aontaithe Mheiriceá (SAM) ceanglas nua isteach do gach tír a ligeadh isteach i gClár Tarscaoilte Víosa na Stát Aontaithe nó ar mian leo dul isteach ann. Leis an gclár sin cuirtear ar a gcumas do shaoránaigh de na tíortha rannpháirteacha taisteal chuig na Stáit Aontaithe gan víosa ar feadh 90 lá ar a mhéad chun críoch turasóireachta nó gnó. Is éard atá i gceist leis an gceanglas nua sin tabhairt i gcrích ‘Comhpháirtíochta um Shlándáil Teorann Feabhsaithe’ (CSTF) le Roinn Dúiche na Stát Aontaithe (DHS) mar choinníoll maidir le cead isteach sa Chlár Tarscaoilte Víosa agus rannpháirtíocht bhreise inti, mar chomhpháirt den cheanglas atá ann cheana maidir le malartú faisnéise faoi thaistealaithe.
Tá comhpháirtíochtaí an Chláir Tarscaoilte Víosa ar thús cadhnaíochta i gcomhar idirnáisiúnta na Stát Aontaithe maidir le slándáil teorann agus inimirce. Ar cheann de na cuspóirí atá acu tá malartuithe láidre déthaobhacha faisnéise a bhunú chun a chur ar a gcumas do na húdaráis céannacht taistealaithe ó thíortha comhpháirtíochta a fhíordheimhniú go héifeachtach agus a chinneadh an bagairt iad do shlándáil na Stát Aontaithe.
Mar chuid dá gcomhpháirtíochtaí de chuid an Chláir Tarscaoilte Víosa, thug na Stáit Aontaithe comhaontuithe déthaobhacha i gcrích le Ballstáit den Aontas Eorpach, ar nós na Comhaontuithe maidir le Comhar a Fheabhsú chun an Choireacht Thromchúiseach a Chosc agus a Chomhrac (Comhaontuithe CTCC). Leis na comhaontuithe sin bunaíodh malartú faisnéise, lena n‑áirítear sonraí bithmhéadracha, maidir le daoine aonair a bhfuil amhras fúthu nó ar ciontaíodh iad i gcionta sceimhlitheoireachta nó i gcoireacht thromchúiseach.
Faoi CSTF, tá sé beartaithe ag na Stáit Aontaithe malartú faisnéise a bhunú maidir leis an méid seo a leanas:
·taistealaithe chuig na Stáit Aontaithe a bhféadfadh nasc a bheith acu leis an tír chomhpháirtíochta de chuid an Chláir Tarscaoilte Víosa;
·iarratasóirí ar shochair inimirce nó ar chosaint dhaonnúil sna Stáit Aontaithe;
·daoine aonair a dtagann forfheidhmiú dlí Roinn Dúiche na Stát Aontaithe orthu i gcomhthéacs teorann agus inimirce sna Stáit Aontaithe.
Bhainfeadh malartuithe den sórt sin le faisnéis, lena n‑áirítear sonraí bithmhéadracha, a stóráiltear i mbunachair sonraí náisiúnta de chuid na mBallstát.
Tá coinne leis go dtabharfar comhaontuithe CSTF i gcrích faoin 31 Nollaig 2026. Tar éis an sprioc-ama sin, déanfaidh Roinn Dúiche na Stát Aontaithe measúnú ar chomhlíontacht gach tíre le ceanglas CSTF le linn meastóireachtaí le haghaidh rannpháirtíocht tosaigh agus leanúnach sa Chlár Tarscaoilte Víosa.
I bhfianaise an naisc le hinniúlacht eisiach an Aontais maidir leis an gcomhbheartas víosaí, an 12 Meitheamh 2024, dheimhnigh Buanionadaithe de chuid na mBallstát i gCoiste de Chomhairle an Aontais Eorpaigh (Coreper) go dtacaíonn na Ballstáit go leathan le creat comhchoiteann AE-SAM maidir le malartú faisnéise i gcomhthéacs CSTF. D’iarr siad freisin ar an gCoimisiún togra a chur ar aghaidh le haghaidh sainordú chun creat den sórt sin a chaibidliú thar ceann an Aontais.
Is é is cuspóir don mholadh atá beartaithe na treoracha caibidlíochta a sholáthar don Choimisiún chun creat‑chomhaontú a chaibidliú lena leagfar amach an struchtúr dlíthiúil agus na coinníollacha maidir le malartú faisnéise idir údaráis inniúla na mBallstát den Aontas agus de na Stáit Aontaithe, ar ar a mbonn a gcumhachtófaí na Ballstáit comhaontuithe déthaobhacha a bhunú le haghaidh malartú faisnéise leis na Stáit Aontaithe óna gcórais náisiúnta teicneolaíochta faisnéise (TF).
Ar cheann de phríomhchuspóirí an chreat‑chomhaontaithe tá an chómhalartacht sa mhalartú faisnéise leis na Stáit Aontaithe, rud a chuideodh freisin le cosaint agus slándáil teorann an Aontais ina iomláine a fheabhsú.
Raon feidhme an mhalartaithe faisnéise — catagóirí agus cineál na sonraí, cineál na ndaoine, agus cineál na gcionta — bunófar é le linn na caibidlíochta chun malartú cothrom cómhalartach faisnéise a áirithiú. Ar a laghad, ba cheart é a bheith d’aidhm ag an gcaibidlíocht leibhéal leordhóthanach malartaithe faisnéise a shocrú, leibhéal nár cheart a bheith níos mó ná an leibhéal faisnéise a chomhroinneann na Ballstáit eatarthu féin.
Ar bhonn an chreata le haghaidh malartú faisnéise a shocraítear sa chreat‑chomhaontú, bheadh na Ballstáit in ann socruithe déthaobhacha a chaibidliú agus a thabhairt i gcrích lena ndéanfaí an malartú faisnéise leis na Stáit Aontaithe a oibríochtú.
Leis na socruithe déthaobhacha sin, sholáthrófaí mionsonraí maidir le malartú faisnéise le húdaráis inniúla na Stát Aontaithe agus ceanglais dhlíthiúla náisiúnta, bunú bunachar sonraí náisiúnta, agus ceanglais nó teorainneacha teicniúla eile á gcur san áireamh.
Leis an gcreat‑chomhaontú, leagfaí síos coimircí chun comhsheasmhacht le hacmhainneachtaí na mBallstát a áirithiú, rud a chuireann leis an mbunú bunachar sonraí náisiúnta atá ann cheana.
Bheadh feidhm ag an gcreat‑chomhaontú maidir leis na Ballstáit sin a bhfuil stádas saor ó víosa acu leis na Stáit Aontaithe nó ar mian leo dul isteach sa Chlár Tarscaoilte Víosa. Bheadh na Ballstáit in ann malartú faisnéise a stadadh dá bhforáiltear sa chreat‑chomhaontú i gcas ina n‑athródh a stádas sa Chlár Tarscaoilte Víosa.
Maidir le hinniúlacht an Aontais comhaontú idirnáisiúnta a thabhairt i gcrích
Comhbheartas víosaí an Aontais
Tá comhbheartas víosaí forbartha ag an Aontas le haghaidh gearrfhanachtaí (suas le 90 lá in aon tréimhse 180 lá) ar bhonn Rialachán 2018/1806 (dá ngairtear an ‘Rialachán Víosaí’ anseo feasta) 1 . Liostaítear sa Rialachán Víosaí na tríú tíortha a mbeidh ar a náisiúnaigh víosaí a bheith ina seilbh acu ar thrasnú teorainneacha seachtracha dóibh agus lena liostaítear na tríú tíortha a mbeidh a náisiúnaigh díolmhaithe ón gceanglas sin. Faoi láthair, tá stádas gan víosa ag náisiúnaigh de na Stáit Aontaithe i limistéar Schengen. San am céanna, tá an comhaontú maidir le tarscaoileadh víosa agus an comhaontú um eisiúint víosaí a éascú tugtha i gcrích ag an Aontas le roinnt tríú tíortha 2 .
Tá prionsabal na cómhalartachta ar cheann de bhunchlocha bheartas víosaí an Aontais le tríú tíortha. Is éard a chiallaíonn cómhalartacht, i gcás ina bhfuil rochtain gan víosa tugtha ag an Aontas do shaoránaigh tríú tír chun cuairt a thabhairt ar limistéar Schengen, go bhfuil súil aige go ndéanfaidh an tríú tír cómhalartú trí chead a thabhairt do shaoránaigh den Aontas taisteal chuig an tríú tír sin gan gá le víosa chomh maith. Tá sé d’aidhm ag an Aontas cómhalartacht iomlán víosaí le tríú tíortha a bhfuil a náisiúnaigh díolmhaithe ón gceanglas víosa dul isteach i limistéar Schengen. Go deimhin, tá cómhalartacht iomlán bainte amach le gach tríú tír gan víosa, seachas na Stáit Aontaithe. Cé is moite den Bhulgáir, den Chipir agus den Rómáin, tá na Ballstáit uile rannpháirteach i gClár Tarscaoilte Víosaí na Stát Aontaithe. Cómhalartacht iomlán a bhaint amach leis na Stáit Aontaithe, is cuspóir polaitiúil fós é atá á shaothrú go gníomhach ag an Aontas.
Leis an gcreat‑chomhaontú atá beartaithe, d’áiritheofaí cur chuige comhsheasmhach do na Ballstáit uile atá rannpháirteach sa Chlár Tarscaoilte Víosa i ndáil le ceanglas CSTF, lena n‑áirítear na coimircí cosanta sonraí is gá agus is iomchuí le haghaidh malartú faisnéise den sórt sin.
Faoi Airteagal 3(2) den Chonradh ar Fheidhmiú an Aontais Eorpaigh (CFAE), tá an inniúlacht eisiach ag an Aontas comhaontú idirnáisiúnta a thabhairt i gcrích a mhéid a d’fhéadfadh a thabhairt i gcrích difear a dhéanamh do rialacha comhchoiteanna nó a raon feidhme a athrú.
Is faoi inniúlacht eisiach an Aontais a thagann eisiúint víosaí agus an sásra chun cómhalartacht víosaí a chinneadh. Is amhlaidh atá freisin i gcás rialacha cosanta sonraí an Aontais.
Dá réir sin, tagann tabhairt i gcrích creat‑chomhaontaithe leis na Stáit Aontaithe maidir leis an malartú faisnéise mar a leagtar amach i gceanglais Chlár Tarscaoilte Víosaí na Stát Aontaithe, mar atá do na Ballstáit chun malartú faisnéise CSTF a bhunú, faoi raon feidhme inniúlacht eisiach an Aontais.
Creat cosanta sonraí an Aontais
Tá an malartú faisnéise atá beartaithe faoi CSTF éagsúil leis an malartú faoi chomhaontuithe CTCC atá bunaithe. I gcás inarb é an cuspóir atá le malartú faisnéise faoi chomhaontú CTCC an sceimhlitheoireacht agus an choireacht thromchúiseach a chomhrac, d’fhéadfadh sé go mbeadh an cuspóir leis an malartú faisnéise faoi CSTF níos leithne toisc go mbaineann sé freisin le réimsí an bhainistithe teorainneacha agus an bheartais víosaí.
Is le Rialachán (AE) 2016/679 3 (‘RGCS’) a rialaítear próiseáil sonraí pearsanta a dhéanann na Ballstáit, cé is moite de phróiseáil sonraí a dhéanann údaráis forfheidhmithe dlí choiriúil chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú a chumhdaítear le Treoir (AE) 2016/680 4 . Tá coinníollacha dochta maidir le sonraí pearsanta a aistriú chuig tríú tíortha i gCaibidil V de RGCS agus i dTreoir (AE) 2016/680. Ní mór an t‑aistriú sin a bheith bunaithe ar ionstraim aistrithe, ar nós cinneadh leordhóthanachta leis an tríú tír sin, ionstraim lena n‑áirithítear coimircí iomchuí (e.g. comhaontú idirnáisiúnta) nó, faoi Threoir (AE) 2016/680, measúnú ón údarás inniúil forfheidhmithe dlí go n‑áirithítear coimircí den sórt sin sa tríú tír, nó, in éagmais an mhéid thuas, ceann de na forais reachtúla le haghaidh aistrithe sonraí (nó maoluithe) atá ar fáil i gcásanna sonracha, seachas chun sonraí pearsanta a chomhroinnt go córasach.
Maidir le haistrithe sonraí idir údaráis forfheidhmithe dlí choiriúil chun cionta coiriúla a chosc, a imscrúdú, a bhrath nó a ionchúiseamh, lena n‑áirítear an sceimhlitheoireacht, déantar foráil i ‘Scáth‑Chomhaontú’ AE-SAM maidir le comhaontú idirnáisiúnta lena n‑áirithítear coimircí iomchuí de réir bhrí Airteagal 37(1)(a) de Threoir (AE) 2016/680 5 .
I bhfianaise raon feidhme agus chuspóir níos leithne an mhalartaithe faisnéise atá beartaithe le CSTF, agus a mhéid a bheadh baint ag údaráis seachas údaráis forfheidhmithe dlí choiriúil leis an aistriú, níl an ‘Scáth‑Chomhaontú’ AE-SAM infheidhme go hiomlán maidir le gach cineál aistrithe atá beartaithe ag na Stáit Aontaithe faoi CSTF, rud a threisíonn an gá atá le gníomhaíocht ón Aontas chun comhaontú idirnáisiúnta breise a thabhairt i gcrích.
Shaineofaí sa chreat‑chomhaontú na catagóirí sonraí pearsanta a d’fhéadfaí a chomhroinnt agus na cuspóirí sonracha ar chucu a d’fhéadfaí iad a chomhroinnt, agus leibhéal na cómhalartachta á chur san áireamh go háirithe.
Ba cheart forálacha maidir le haistriú ar aghaidh sonraí pearsanta a bheith sa chreat‑chomhaontú.
Maidir leis an gcaidreamh le socruithe déthaobhacha de chuid na mBallstát atá ann cheana nó a bheidh ann amach anseo
Cé go dtagann tabhairt i gcrích an chreat‑chomhaontaithe sin leis na Stáit Aontaithe faoi inniúlacht eisiach an Aontais, bheadh clásal sa chreat‑chomhaontú lena n‑údarófaí do na Ballstáit comhaontuithe nó socruithe déthaobhacha forlíontacha a thabhairt i gcrích.
A mhéid a bhaineann le comhaontuithe nó socruithe déthaobhacha atá tugtha i gcrích cheana féin ag na Ballstáit leis na Stáit Aontaithe roimh theacht i bhfeidhm an chreat‑chomhaontaithe seo, d’fhéadfaí a áireamh sa chreat‑chomhaontú na coinníollacha faoina leanfadh na comhaontuithe nó na socruithe sin de bheith infheidhme, go háirithe a mhéid a bhaineann leis na comhaontuithe nó socruithe déthaobhacha atá tugtha i gcrích ag na Ballstáit nach cuid den Chlár Tarscaoilte Víosa iad go fóill.
Leis an togra seo le haghaidh moladh ón gComhairle, molann an Coimisiún don Chomhairle an méid seo a leanas a dhéanamh:
(a)cinneadh a ghlacadh lena n‑údarófar don Choimisiún tús a chur leis an gcaibidlíocht maidir le creat‑chomhaontú idir an tAontas agus Stáit Aontaithe Mheiriceá,
(b)an Coimisiún a ainmniú mar idirbheartaí an Aontais ar an gcreat‑chomhaontú,
(c)treoracha don Idirbheartaí a leagan amach, agus
(d)coiste speisialta nach mór an chaibidlíocht a dhéanamh i gcomhairle leis a ainmniú.
2.BUNÚS DLÍ, RIACHTANAS AGUS COMHRÉIREACHT
Is iad Airteagal 16(2), Airteagal 77(2) agus Airteagal 218(3) agus Airteagal 218(4) den Chonradh ar Fheidhmiú an Aontais Eorpaigh (CFAE) an bunús dlí atá leis an moladh seo.
Tá an tAontas inniúil chun an creat‑chomhaontú sin a thabhairt i gcrích leis na Stáit Aontaithe maidir le malartú faisnéise i ndáil le trasnú na dteorainneacha seachtracha idir an tAontas agus na Stáit Aontaithe, lena n‑áirítear maidir le nósanna imeachta teorann agus iarratais ar víosaí.
Leis an gcreat‑chomhaontú, ba cheart leibhéal leordhóthanach malartaithe faisnéise a shocrú idir an tAontas agus na Stáit Aontaithe, rud nár cheart dul thar leibhéal na comhroinnte faisnéise i measc na mBallstát i gcomhthéacs déthaobhach nó i gcomhthéacs an Aontais, faoi réir phrionsabail na comhréireachta agus an riachtanais freisin.
Ba cheart na coinníollacha lena spreagtar cuardach ar thaistealaí a shonrú sa chreat‑chomhaontú. Leis na coinníollacha sin ba cheart cosc a chur ar cheisteanna faoi dhaoine i ngach cás, gan aon amhras roimhe sin. Ba cheart gnáthchuardach córasach maidir le gach duine atá ag taisteal idir an tAontas agus na Stáit Aontaithe a eisiamh.
Tá an creat‑chomhaontú leis na Stáit Aontaithe riachtanach chun cuspóir an chomhbheartais víosaí a áirithiú maidir le cómhalartacht víosaí agus cur i bhfeidhm chreat cosanta sonraí an Aontais. Dá bhrí sin, tá na treoracha caibidlíochta atá i gceangal leis an moladh seo chun tús a chur le caibidlíocht leis na Stáit Aontaithe maidir le creat‑chomhaontú bunaithe ar cheanglais chreat dlíthiúil an Aontais is infheidhme maidir le cosaint sonraí (mar atá Rialachán (AE) 2016/679 agus Treoir (AE) 2016/680).
Ní théann an creat‑chomhaontú atá beartaithe thar a bhfuil riachtanach chun na cuspóirí atá i gceist a bhaint amach ós rud é nach féidir leis na Ballstáit iad sin a bhaint amach astu féin.
•An rogha ionstraime
Foráiltear le hAirteagal 218(3) CFAE go gcuirfidh an Coimisiún nó Ardionadaí an Aontais do Ghnóthaí Eachtracha agus don Bheartas Slándála moltaí faoi bhráid na Comhairle, a ghlacfaidh cinneadh lena n‑údarófar tús a chur le caibidlíocht. I bhfianaise ábhar an chomhaontaithe atá beartaithe, is faoin gCoimisiún atá sé moladh a thíolacadh chuige sin.
3.TORTHAÍ AR MHEASTÓIREACHTAÍ EX POST, AR CHOMHAIRLIÚCHÁIN LEIS NA PÁIRTITHE LEASMHARA AGUS AR MHEASÚNUITHE TIONCHAIR
[Ós rud é gur comhaontú nua a bheidh ann, ní fhéadfaí aon mheastóireacht ná seiceálacha oiriúnachta a dhéanamh ar na hionstraimí atá ann cheana. Ní gá aon mheasúnú tionchair a dhéanamh chun an creat‑chomhaontú seo a chaibidliú.]
4.PLEANANNA CUR CHUN FEIDHME AGUS SOCRUITHE FAIREACHÁIN, MEASTÓIREACHTA AGUS TUAIRISCITHE
Áiritheoidh an Coimisiún go ndéanfar faireachán cuí ar chur chun feidhme an chreat‑chomhaontaithe.
5.EILIMINTÍ EILE
•Rogha an idirbheartaí
Ós rud é go gcumhdaítear go heisiach ábhair eile seachas an Comhbheartas Eachtrach agus Slándála leis an gcomhaontú atá beartaithe, ní mór an Coimisiún a ainmniú mar an t‑idirbheartaí de bhun Airteagal 218(3) CFAE.
Moladh le haghaidh
CINNEADH ÓN gCOMHAIRLE
lena n‑údaraítear tús a chur leis an gcaibidlíocht maidir le creat‑chomhaontú idir an tAontas Eorpach agus Stáit Aontaithe Mheiriceá i ndáil le malartú faisnéise le haghaidh scagadh slándála agus fíorú céannachta a bhaineann le nósanna imeachta teorann agus iarratais ar víosaí
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 16(2), Airteagal 77(2) agus Airteagal 218(3) agus Airteagal 218(4) de,
Ag féachaint don mholadh ón gCoimisiún Eorpach,
De bharr an mhéid seo a leanas:
(1)Tá ceanglas nua tugtha isteach ag Stáit Aontaithe Mheiriceá maidir le cead isteach i gClár Tarscaoilte Víosa na Stát Aontaithe, clár a chuireann ar a gcumas do shaoránaigh de na tíortha rannpháirteacha taisteal chuig na Stáit Aontaithe gan víosa ar feadh 90 lá ar a mhéad chun críche turasóireachta nó gnó. Baineann an ceanglas nua le tabhairt i gcrích ‘Comhpháirtíocht um Shlándáil Teorann Feabhsaithe’ (CSTF) le Roinn Slándála Dúiche na Stát Aontaithe. Tá gá le creat comhchoiteann le haghaidh malartú faisnéise i gcomhthéacs CSTF. Dá bhrí sin, ba cheart tús a chur leis an gcaibidlíocht d’fhonn creat‑chomhaontú a thabhairt i gcrích idir an tAontas agus Stáit Aontaithe Mheiriceá i ndáil le malartú faisnéise le haghaidh scagadh agus fíorú céannachta taistealaithe áirithe a thrasnaíonn teorainneacha seachtracha de chuid na mBallstát.
(2)Leis an gcreat‑chomhaontú ba cheart cearta bunúsacha a urramú, agus na prionsabail a aithnítear sa Chairt um Chearta Bunúsacha an Aontais a chomhlíonadh, go háirithe an ceart chun saoirse agus slándála a aithnítear le hAirteagal 6 den Chairt, an ceart chun saoil phríobháidigh agus saoil teaghlaigh mar a aithnítear in Airteagal 7 den Chairt, an ceart go gcosnófar sonraí pearsanta mar a aithnítear in Airteagal 8 den Chairt, agus an ceart chun leighis éifeachtaigh agus chun trialach cothroime mar a aithnítear in Airteagal 47 den Chairt. Ba cheart an creat‑chomhaontú a chur i bhfeidhm i gcomhréir leis na cearta agus na prionsabail sin agus aird chuí á tabhairt ar phrionsabal na comhréireachta i gcomhréir le hAirteagal 52(1) den Chairt.
(3)Chuathas i gcomhairle leis an Maoirseoir Eorpach ar Chosaint Sonraí, i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle, agus thug sé tuairim uaidh an [XX].
(4)Leis an gcreat‑chomhaontú ba cheart a bheith in ann comhaontuithe déthaobhacha a thabhairt i gcrích idir Stáit Aontaithe Mheiriceá agus na Ballstáit maidir le hábhair a chumhdaítear leis, ar choinníoll go bhfuil forálacha na socruithe déthaobhacha sin comhoiriúnach le forálacha an chreat‑chomhaontaithe agus le dlí an Aontais.
(5)Ba cheart an Coimisiún a ainmniú mar idirbheartaí an Aontais.
(6)I gcomhréir le hAirteagail 1 agus 2 de Phrótacal Uimh. 22 maidir le Seasamh na Danmhairge, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, níl an Danmhairg rannpháirteach i nglacadh an Mholta seo agus níl sí faoi cheangal aige ná faoi réir a chur i bhfeidhm.
(7)Is é atá sa Mholadh seo forbairt ar fhorálacha acquis Schengen nach bhfuil Éire rannpháirteach iontu, i gcomhréir le Cinneadh 2002/192/CE (8) ón gComhairle; dá bhrí sin, níl Éire rannpháirteach i nglacadh an Mholta seo agus níl sí faoi cheangal aige ná faoi réir a chur i bhfeidhm.
TAR ÉIS AN CINNEADH SEO A GHLACADH:
Airteagal 1
Dá bhrí sin, údaraítear don Choimisiún caibidlíocht a dhéanamh, thar ceann an Aontais, maidir le creat‑chomhaontú idir an tAontas agus Stáit Aontaithe Mheiriceá i ndáil le malartú faisnéise le haghaidh scagadh slándála agus fíorú céannachta a bhaineann le nósanna imeachta teorann agus iarratais ar víosaí.
Airteagal 2
Leagtar amach na treoracha caibidlíochta san Iarscríbhinn.
Airteagal 3
Ba cheart an chaibidlíocht a dhéanamh i gcomhairle le [ainm an choiste speisialta le cur isteach ag an gComhairle].
Airteagal 4
Is chuig an gCoimisiún a dhírítear an Cinneadh seo.
Arna dhéanamh sa Bhruiséil
Thar ceann na Comhairle
An tUachtarán
AN COIMISIÚN EORPACH
An Bhruiséil,23.7.2025
COM(2025) 447 final
IARSCRÍBHINN
a ghabhann leis an
Moladh le haghaidh Cinneadh ón gComhairle
lena n−údaraítear tús a chur leis an gcaibidlíocht maidir le creat−chomhaontú idir an tAontas Eorpach agus Stáit Aontaithe Mheiriceá i ndáil le malartú faisnéise le haghaidh scagadh slándála agus fíorú céannachta a bhaineann le nósanna imeachta teorann agus iarratais ar víosaí
IARSCRÍBHINN
TREORACHA MAIDIR LE CREAT‑CHOMHAONTÚ A CHAIBIDLIÚ IDIR
an tAontas agus Stáit Aontaithe Mheiriceá i ndáil le malartú faisnéise le haghaidh scagadh slándála agus fíorú céannachta a bhaineann le nósanna imeachta teorann agus iarratais ar víosaí
Le linn na caibidlíochta ba cheart é a bheith d’aidhm ag an gCoimisiún na cuspóirí a leagtar amach thíos go mionsonraithe bhaint amach.
I. CUSPÓIR AGUS RAON FEIDHME AN CHREAT‑CHOMHAONTAITHE
1.Is é is cuspóir don chreat‑chomhaontú foráil a dhéanamh maidir le struchtúr dlíthiúil le haghaidh mhalartú déthaobhach faisnéise na mBallstát idir a n‑údaráis inniúla agus údaráis inniúla Stáit Aontaithe Mheiriceá (SAM) i gcomhthéacs Chomhpháirtíocht na Stát Aontaithe um Shlándáil Teorann Feabhsaithe (CSTF).
2.Sa chreat‑chomhaontú ba cheart rialacha soiléire beachta a sholáthar maidir le malartú faisnéise idir na Ballstáit agus na Stáit Aontaithe i ndáil le taistealaithe a thrasnaíonn a dteorainneacha seachtracha chun tacú leis an scagadh agus fíorú céannachta taistealaithe is gá chun a chinneadh an mbeadh aon riosca ag gabháil leis an tslándáil phoiblí nó leis an ord poiblí, agus chun tacú leis na húdaráis inniúla coireanna agus cionta sceimhlitheoireachta a chosc, a bhrath, a imscrúdú agus a ionchúiseamh.
3.Tá sé de chuspóir ag an gcreat‑chomhaontú an bunús dlí agus na coinníollacha a sholáthar maidir le sonraí pearsanta a aistriú agus a mhalartú idir údaráis inniúla na mBallstát agus na Stát Aontaithe. Go háirithe, ba cheart rialacha agus nósanna imeachta soiléire a sholáthar sa chreat‑chomhaontú chun cuardach ar thaistealaí a ghníomhachtú, chun cosc a chur ar phróiseáil chórasach, ghinearálaithe agus neamh‑spriocdhírithe sonraí i gcás gach taistealaí.
4.Ba cheart sainmhínithe ar phríomhthéarmaí a bheith sa chreat‑chomhaontú, go háirithe sainmhíniú ar shonraí pearsanta.
5.Ba cheart an malartú faisnéise faoin gcreat‑chomhaontú seo a bheith bunaithe ar phrionsabal na cómhalartachta.
6.Ba cheart an malartú faisnéise faoin gcreat‑chomhaontú a bheith bunaithe ar mhalartú na faisnéise céannachta a chuimsítear sa dhoiciméad taistil, agus ar mhéarloirg taistealaí. I gcás inarb ábhartha agus faoi choimircí iomchuí, ba cheart do na Páirtithe a bheith in ann faisnéis fhorlíontach atá ábhartha don duine i gceist a mhalartú freisin.
7.Ba cheart a chuimsiú sa mhalartú faisnéise faoin gcreat‑chomhaontú náisiúnaigh tríú tír i ndáil le trasnú teorainneacha seachtracha na mBallstát agus na Stát Aontaithe, agus i gcomhthéacs coireanna agus cionta sceimhlitheoireachta a chosc, a bhrath, a imscrúdú agus a ionchúiseamh.
8.Féadfar a áireamh sa mhalartú faisnéise malartuithe maidir le saoránaigh agus a mbaill teaghlaigh, mar aon le buanchónaitheoirí, i gcásanna ina mbeadh fíorghá le malartú faisnéise den sórt sin agus ina mbeadh sé comhréireach chun coireanna agus cionta sceimhlitheoireachta a chosc, a bhrath, a imscrúdú agus a ionchúiseamh agus a mhéid atá malartú faisnéise den sórt sin cómhalartach.
‑II. ÁBHAR AN CHREATCHOMHAONTAITHE
SAINCHEISTEANNA SONRACHA
9.Ba cheart sainmhínithe ar phríomhthéarmaí a bhunú leis an gcreat‑chomhaontú, lena n‑áirítear sainmhíniú ar shonraí pearsanta a chomhlíonann na sainmhínithe i Rialacháin (AE) 2016/679 agus 2018/1725 1 , agus i dTreoir (AE) 2016/680 2 ;
10.Ba cheart a shainaithint sa chreat‑chomhaontú na cineálacha bunachair sonraí agus cineál(acha) sonraí a thagann faoi raon feidhme na sonraí a mbeidh faoi réir rochtana i gcomhthéacs CSTF.
11.Sa chreat‑chomhaontú ba cheart a leagan amach go soiléir agus go beacht na coimircí agus na rialuithe a bhfuil gá leo maidir le sonraí pearsanta agus cearta agus saoirsí bunúsacha daoine aonair a chosaint, gan beann ar a náisiúntacht nó a n‑áit cónaithe, nuair a mhalartófar sonraí pearsanta leis na Stáit Aontaithe i gcomhthéacs CSTF. Beidh feidhm ag an méid seo a leanas, go háirithe:
(a)Ba cheart do na Páirtithe cuspóirí na próiseála sonraí i gcomhthéacs an chreat‑chomhaontaithe a leagan amach go soiléir agus go beacht. Ba cheart aon phróiseáil ar shonraí pearsanta a bheith teoranta don mhéid is gá agus is comhréireach i gcásanna aonair chun rioscaí don tslándáil phoiblí nó don ord poiblí a shainaithint, agus chun rannchuidiú le cionta coiriúla agus sceimhlitheoireachta a chosc, a bhrath, a imscrúdú agus a ionchúiseamh.
(b)Na sonraí pearsanta a aistreoidh na Ballstáit chuig na Stáit Aontaithe, ba cheart iad a phróiseáil go cóir, ar bhonn dlisteanach agus chun na gcríoch dár aistríodh iad, agus chun na gcríoch sin amháin. Ba cheart toirmeasc a chur ar aon phróiseáil sonraí breise atá ar neamhréir leis an gcuspóir tosaigh (teorannú de réir cuspóra). Ba cheart iarscríbhinn a bheith ag gabháil leis an gComhaontú ina mbeadh liosta uileghabhálach de na húdaráis inniúla sna Stáit Aontaithe a bhféadfaidh na Ballstáit sonraí pearsanta a aistriú chucu chomh maith le tuairisc ghairid ar a n‑inniúlachtaí.
(c)Ba cheart sonraí pearsanta aistrithe a bheith leordhóthanach, ábhartha agus teoranta don mhéid is gá chun na críche a ndearnadh iad a aistriú. Ba cheart iad a bheith cruinn agus ba cheart iad a choinneáil cothrom le dáta. Níor cheart iad a choinneáil ar feadh tréimhse níos faide ná mar is gá chun na críche dár aistríodh iad ach, in aon chás, ba cheart rialacha maidir le stóráil, lena n‑áirítear teorannú stórála, athbhreithniú, ceartú agus scriosadh sonraí pearsanta a leagan síos sa chreat‑chomhaontú. Go háirithe, ba cheart leis an gcreat‑chomhaontú coinneáil sonraí pearsanta taistealaithe, tar éis dóibh imeacht ón dlínse, a theorannú go sonraí pearsanta taistealaithe i ndáil le taistealaithe a bhfuil fianaise oibiachtúil ann ina leith óna bhféadfaí a thuiscint go bhfuil riosca leanúnach ann don tslándáil phoiblí nó don ord poiblí agus gur gá sonraí a choinneáil chun rannchuidiú le coireanna agus cionta sceimhlitheoireachta a chosc, a bhrath, a imscrúdú agus a ionchúiseamh.
(d)Sa chreat‑chomhaontú ba cheart a shonrú na critéir ar ar a mbonn a léireofar iontaofacht na foinse agus cruinneas na sonraí.
(e)Sonraí pearsanta lena nochtar bunadh ciníoch nó eitneach, tuairimí polaitiúla, creideamh reiligiúnach nó fealsúnach, ballraíocht i gceardchumann, sonraí géiniteacha, sonraí bithmhéadracha chun duine nádúrtha a shainaithint go huathúil, agus sonraí a bhaineann leis an tsláinte agus sonraí a bhaineann le saol gnéis nó gnéaschlaonadh duine nádúrtha, ní cheadófar aistriú na sonraí sin ach amháin i gcás ina bhfuil géarghá leis agus má tá sé réasúnta agus comhréireach i gcásanna aonair chun cionta coiriúla agus sceimhlitheoireachta a chosc nó a chomhrac dá dtagraítear sa chreat‑chomhaontú, agus faoi réir coimircí lena dtugtar aghaidh ar na rioscaí sonracha a ghabhann leis na sonraí sin a phróiseáil. Ba cheart coimircí sonracha a bheith sa chreat‑chomhaontú lena rialaítear aistriú sonraí pearsanta maidir le mionaoisigh agus maidir le híospartaigh cionta coiriúla, finnéithe nó daoine eile ar féidir leo faisnéis a sholáthar maidir le cionta coiriúla.
(f)Ba cheart a leagan síos sa chreat‑chomhaontú rialacha maidir leis an bhfaisnéis atá le cur ar fáil do dhaoine aonair agus ba cheart a áirithiú ann cearta infhorfheidhmithe daoine aonair a ndéantar a sonraí pearsanta a phróiseáil, i bhfoirm rialacha maidir leis an gceart chun faisnéise, an ceart chun rochtana, an ceart go ndéanfaí ceartúchán agus an ceart go ndéanfaí léirscriosadh, lena n‑áirítear na forais shonracha lena bhféadfaí aon srianadh riachtanach agus comhréireach ar na cearta sin a cheadú. Leis an gcreat‑chomhaontú ba cheart a áirithiú freisin ceart in‑fhorfheidhmithe chun dea-riaracháin agus ceart in‑fhorfheidhmithe chun leighis bhreithiúnaigh d’aon duine a bpróiseáilfear a chuid sonraí faoin gcreat‑chomhaontú, agus ba cheart leigheasanna éifeachtacha a ráthú.
(g)Ba cheart a leagan amach sa chreat‑chomhaontú rialacha maidir le taifid a choinneáil chun críoch logála agus doiciméadaithe chomh maith leis na rialacha maidir le faisnéis atá le cur ar fáil do dhaoine aonair.
(h)Ba cheart foráil a dhéanamh sa chreat‑chomhaontú maidir le coimircí i ndáil le próiseáil uathoibríoch sonraí pearsanta, lena n‑áirítear próifíliú, agus ba cheart toirmeasc a chur ar chinntí atá bunaithe ar phróiseáil uathoibrithe sonraí pearsanta amháin gan rannpháirtíocht an duine ann.
(i)Ba cheart a áireamh sa chreat‑chomhaontú an oibleagáid slándáil sonraí pearsanta a áirithiú trí bhearta teicniúla agus eagraíochtúla iomchuí, lena n‑áirítear gan cead a thabhairt ach amháin do dhaoine údaraithe rochtain a bheith acu ar shonraí pearsanta. Ba cheart a chuimsiú ann freisin an oibleagáid fógra a thabhairt do na húdaráis inniúla agus, nuair is gá agus is féidir, ábhair sonraí, i gcás sárú ar shonraí pearsanta lena ndéantar difear do shonraí a aistreofar faoin gcreat‑chomhaontú. Ba cheart a chuimsiú sa chreat‑chomhaontú freisin an oibleagáid bearta a chur chun feidhme maidir le cosaint sonraí mar réamhshocrú agus trí dhearadh, chun prionsabail cosanta sonraí a chur chun feidhme ar bhealach éifeachtach.
(j)Aistrithe ar aghaidh sonraí pearsanta ó údaráis inniúla na Stát Aontaithe chuig údaráis eile sna Stáit Aontaithe, níor cheart iad a cheadú ach amháin chun críocha an chreat‑chomhaontaithe, ba cheart iad a bheith faoi réir na gcoinníollacha iomchuí, lena n‑áirítear údarú sainráite sholáthraí na faisnéise, agus níor cheart iad a cheadú ach amháin i ndáil le húdaráis a áirithíonn leibhéal cosanta atá comhionann leis an leibhéal a áirithítear faoin gcreat‑chomhaontú, ach amháin má tá gá leis an aistriú ar aghaidh chun garbhagairt thromchúiseach ar an tslándáil phoiblí a chosc agus a imscrúdú nó chun leasanna ríthábhachtacha aon duine nádúrtha a chosc. Ba cheart aistrithe ar aghaidh sonraí pearsanta chuig tríú tíortha nó chuig eagraíochtaí idirnáisiúnta a thoirmisc.
(k)Leis an gcreat‑chomhaontú ba cheart córas formhaoirseachta a áirithiú maidir le comhlacht neamhspleách amháin nó níos mó atá freagrach as cosaint sonraí sna Stáit Aontaithe ag a bhfuil cumhachtaí éifeachtacha imscrúdaithe agus idirghabhála sonraí pearsanta a úsáid. Go háirithe, ba cheart cumhachtaí a bheith ag an gcomhlacht nó na comhlachtaí gearáin a éisteacht ó dhaoine aonair maidir le húsáid a gcuid sonraí pearsanta. Leis an gcreat‑chomhaontú ba cheart foráil a dhéanamh maidir le dualgas comhair idir na comhlachtaí formhaoirseachta sin, de pháirt, agus na húdaráis mhaoirseachta ábhartha de chuid an Aontais, den pháirt eile.
creat le haghaidh malartú faisnéise
12.Ba cheart a leagan amach sa chreat‑chomhaontú na coinníollacha ginearálta, na critéir, bunachair sonraí agus catagóirí sonraí faoi raon feidhme an mhalartaithe faisnéise idir údaráis inniúla na mBallstát agus na Stát Aontaithe mar chuid de shocruithe déthaobhacha. Ba cheart deimhniú faisnéise céannachta nó méarlorg, agus faisnéis bhreise a bhaineann leis an duine atá faoin gcuardach a bheith i gceist leis an malartú faisnéise sin, agus ba cheart é a bheith teoranta don mhéid atá fíor-riachtanach agus comhréireach chun an toradh is gá a bhaint amach.
13.Faoin gcreat‑chomhaontú, ba cheart do na Páirtithe a áirithiú go n‑urramófaí teorainneacha teicniúla na bPáirtithe maidir le malartú faisnéise.
14.Ba cheart a leagan amach sa chreat‑chomhaontú na hiarmhairtí a bhaineann le ballraíocht ón gClár Tarscaoilte Víosa a chur ar fionraí, nó le teorannú bhailíocht ESTA, maidir le malartú faisnéise faoin gcreat‑chomhaontú.
15.Leis an gcreat‑chomhaontú ba cheart foráil a dhéanamh maidir le samhail freagartha cuardaigh srathaithe, samhail lena ndéantar idirdhealú idir faisnéis a aisghabhtar go huathoibríoch nuair a dhéantar cuardach agus faisnéis bhreise nach bhféadfaí a chomhroinnt leis an bPáirtí iarrthach ach amháin ar údarú sainráite an Pháirtí sin a fháil.
16.Ba cheart clásal a bheith sa chreat‑chomhaontú lena n‑údaraítear do na Ballstáit comhaontuithe nó socruithe déthaobhacha a thabhairt i gcrích chun an malartú faisnéise faoi CSTF a chur chun feidhme mar cheanglas faoin gClár Tarscaoilte Víosaí. Ba cheart na heilimintí atá le bheith sna comhaontuithe nó socruithe déthaobhacha lena ndéantar an malartú faisnéise a oibríochtú a shonrú sa chreat‑chomhaontú, mar aon leis na coinníollacha nós imeachta agus substaintiúla a bhfuil na comhaontuithe nó na socruithe déthaobhacha le comhlíonadh.
17.Ba cheart a leagan amach sa chreat‑chomhaontú na himthosca faoina bhféadfadh na Ballstáit na comhaontuithe nó socruithe déthaobhacha a tugadh i gcrích leis na Stáit Aontaithe roimh theacht i bhfeidhm an chreat‑chomhaontaithe a choinneáil ar bun.
forálacha institiúideacha
18.Ba cheart comhlacht rialachais a bhunú leis an gcreat‑chomhaontú a bheadh freagrach as cur chun feidhme agus feidhmiú an chomhaontaithe a bhainistiú agus a mhaoirsiú, agus as éascú a dhéanamh ar réiteach díospóidí.
19.Ba cheart foráil a dhéanamh sa chreat‑chomhaontú maidir le sásra éifeachtach um réiteach díospóidí i ndáil lena léirmhíniú agus lena chur i bhfeidhm chun a áirithiú go gcomhlíonfaidh na Páirtithe na rialacha arna gcomhaontú go frithpháirteach.
20.Ba cheart forálacha a bheith sa chreat‑chomhaontú maidir le faireachán agus meastóireacht thréimhsiúil ar an gcreat‑chomhaontú.
21.Ba cheart foráil a bheith sa chreat‑chomhaontú maidir le teacht i bhfeidhm agus bailíocht an chomhaontaithe agus foráil lena bhféadfaidh Páirtí é a fhoirceannadh nó a chur ar fionraí, go háirithe i gcás nach n‑áirithíonn na Stáit Aontaithe go héifeachtach a thuilleadh an leibhéal cosanta do chearta agus saoirsí bunúsacha a cheanglaítear faoin gcreat‑chomhaontú. I gcás foirceanta nó fionraí, ba cheart a shonrú sa chreat‑chomhaontú freisin an bhféadfar leanúint de phróiseáil a dhéanamh ar shonraí pearsanta a thagann faoina raon feidhme agus a aistríodh sula ndearnadh é a chur ar fionraí nó a fhoirceannadh. Má cheadaítear don phróiseáil sonraí pearsanta dul ar aghaidh, is i gcomhréir le forálacha an chreat‑chomhaontaithe is infheidhme tráth na fionraí nó an fhoirceanta ba cheart í a dhéanamh ar aon chuma.
22.Féadfar clásal lena dtugtar aghaidh ar a chur i bhfeidhm críochach a chuimsiú sa chreat‑chomhaontú, más gá.
23.Sa chreat‑chomhaontú, ba cheart foráil a dhéanamh maidir le sásra trína ndéanfar forbairtí ábhartha ar dhlí an Aontais amach anseo a léiriú, i gcás inar gá, trí bhíthin oiriúnuithe ar an gcreat‑chomhaontú. Ba cheart foráil a chuimsiú sa chreat‑chomhaontú freisin trína ndéanfadh an tAontas an creat‑chomhaontú a fhoirceannadh i gcás nach ndéanfaí na hoiriúnuithe sin.
24.Ba cheart foráil a dhéanamh sa chreat‑chomhaontú maidir le sásra chun meastóireacht a dhéanamh ar a chur chun feidhme.
25.Ba cheart comhúdarás a bheith ag an gcreat‑chomhaontú i dteangacha oifigiúla uile an Aontais agus ba cheart clásal teanga a bheith ann chun na críche sin.