1.

á mheabhrú go mbraitheann oiriúnacht agus cumas an Aontais chun dul i ngleic le dúshláin an 21ú haois thar ceann a shaoránach go mór ar a chumas díospóireachtaí daonlathacha sláintiúla a choimeád agus a chothú agus athléimneacht agus sláine a chuid toghchán agus próiseas daonlathach a áirithiú ag an am céanna; á chur i bhfáth nach féidir talamh slán a dhéanamh díobh sin agus nach mór iad a neartú agus a chosaint trí chreat beartais comhleanúnach; á chur in iúl go bhfuil sí suite de go bhfuil an obair sin i bhfad ó bheith críochnaithe agus nach mór iarrachtaí beartais a threisiú chun rannpháirtíocht i dtoghcháin a spreagadh agus chun roinnt maorlathais a bhaint den Aontas agus é a dhéanamh níos daonlathaí agus níos éifeachtaí ina chinnteoireacht;

2.

á chur in iúl gur geal léi an líon measartha ard daoine a chaith vóta sna 10ú toghcháin do Pharlaimint na hEorpa, líon ar tháinig méadú beag air, le ráta rannpháirtíochta comhiomlán de 50,74 %, i gcomparáid le toghcháin 2019; á chur in iúl go bhfuil sí suite de go léiríonn na figiúirí sin rannpháirtíocht phoiblí níos láidre sa tionscadal Eorpach agus an tábhacht mhéadaitheach atá ag an bParlaimint agus a tionchar ar shaol laethúil na saoránach; á chur in iúl gur cúis imní di mar sin féin na rátaí rannpháirtíochta atá éagsúil go forleathan i measc na mBallstát agus go bhfuil sé fós de rún daingean aici iarrachtaí beartais a neartú chun an bhearna a dhúnadh agus an líon daoine a chaitheann vóta a mhéadú i measc na ngrúpaí uile ar fud an Aontais;

3.

ag moladh na n-iarrachtaí atá déanta ag na hinstitiúidí Eorpacha agus Aontas Craolacháin na hEorpa chun infheictheacht na n-iarrthóirí ar fud na mór-roinne sna toghcháin Eorpacha a mhéadú, lena n-áirítear trí shraith díospóireachtaí uile-Eorpacha ardphróifíle, príomhiarrthóirí ó na teaghlaigh pholaitiúla éagsúla a thabhairt le chéile agus trí na díospóireachtaí arb é is aidhm dóibh daoine a spreagadh chun vótála, lena n-ardaítear feasacht i measc dhaoine óga na hEorpa; á chur in iúl gur geal léi tionchar dearfach a straitéise cumarsáide institiúidí féin, lena ndearnadh iarracht feasacht a ardú faoi na toghcháin trí bhéim a leagan ar a dtábhacht tríd an mana ‘Bain úsáid as do vóta, nó déanfaidh daoine eile cinneadh ar do shon’; á chur in iúl go gcreideann sí go bhfuil feabhas tagtha ar an gcomhar i measc institiúidí agus le húdaráis toghcháin na mBallstát d’fhonn an líon daoine a chaitheann vóta a mhéadú agus go ngeallann sí iarrachtaí comhordaithe sa réimse sin a fheabhsú; á iarraidh go ndéanfaí tuilleadh infheistíocht shubstaintiúil chun clúdach na bhfeachtas agus na gcraoltaí sin a leathnú le haghaidh thoghcháin 2029; ag cur i bhfios go láidir an róil thábhachtaigh dhearfaigh atá ag Oifigí Idirchaidrimh Pharlaimint na hEorpa sna toghcháin Eorpacha;

4.

á chur i bhfios go láidir go dteastaíonn aistriú cultúrtha ar bhonn straitéise fadtéarmaí agus acmhainní leordhóthanacha chun feasacht agus saoránacht Eorpach a neartú, i ndlúthchomhar leis an tsochaí shibhialta agus le páirtithe leasmhara sochaíocha chun ‘pobal daonlathach’ Eorpach agus spás daonlathach comhroinnte a chruthú; á chur in iúl gur oth léi gur ró-mhinic a ghlactar cur chuige atá bunaithe ar bheartais náisiúnta amháin i bhfeachtais a reáchtáiltear sna Ballstáit do na toghcháin Eorpacha, fiú nuair a thugtar aghaidh sna feachtais sin ar shaincheisteanna Eorpacha coiteanna; ag iarraidh ar pháirtithe polaitiúla náisiúnta agus iarrthóirí sna toghcháin Eorpacha chomh maith le heagraíochtaí meán náisiúnta saoránaigh a chur ar an eolas go leormhaith agus go fíreannach faoi rialachas ar leibhéal an Aontais, lena n-áirítear faoi na páirtithe polaitiúla Eorpacha agus grúpaí polaitiúla Pharlaimint na hEorpa a bhfuil páirtithe náisiúnta cleamhnaithe leo; ag spreagadh páirtithe náisiúnta chun an comhar lena gcomhghleacaithe Eorpacha a threisiú maidir leis sin agus feabhas a chur ar a n-infheictheacht Eorpach; ag glacadh uirthi féin timpeallacht rialála chumasúcháin a chruthú chuige seo;

5.

á chur i bhfáth nach mór tuilleadh oibre a dhéanamh chun rannpháirtíocht grúpaí faoi ghannionadaíocht a mhéadú sna toghcháin Eorpacha; á chur in iúl gur cúis imní di an laghdú ar an líon daoine a chaith vóta i measc daoine óga agus á ghlacadh uirthi féin dlús a chur le hiarrachtaí beartais chun for-rochtain feachtais toghcháin don phríomhdhéimeagrafach sin a mhéadú; á thabhairt dá haire go bhfuil rannpháirtíocht daoine óga i dtodhchaí an Aontais ríthábhachtach; ag spreagadh na mBallstát chun creataí tiomnaithe beartais lena dtabharfar aghaidh ar shaoráidí vótála agus iarrthóirí araon, lena n-áirítear trí fheachtais shonracha faisnéise, agus trí mhodhanna malartacha vótála amhail vóta poist agus seachvótáil; á aithint gur gá leanúint de dhul chun cinn a dhéanamh i dtreo próiseas toghcháin níos cuimsithí chun a áirithiú go bhfuil deis chomhionann ag gach saoránach páirt a ghlacadh sa phróiseas daonlathach; á thabhairt dá haire nach mbaineann ach cúpla Feisire de Pharlaimint na hEorpa le mionlaigh náisiúnta agus eitneacha a aithnítear go hoifigiúil mar mhionlaigh sna Ballstáit i gcomhréir lena gcreatlach bunreachtúil nó dlíthiúil agus ionstraimí ábhartha Chomhairle na hEorpa; á chur i bhfios go láidir gur dualgas é an troid i gcoinne an chiníochais, an idirdhealaithe agus an eisiaimh a eascraíonn ó luachanna bunúsacha an Aontais agus ó Chairt um Chearta Bunúsacha an Aontais; ag iarraidh ar na Ballstáit agus ar pháirtithe polaitiúla náisiúnta bearta réamhghníomhacha agus comhréireacha a ghlacadh chun cuimsiú agus ionadaíocht éifeachtach na mionlach sin, lena n-áirítear pobail Romacha, sna toghcháin Eorpacha a chothú, agus lánurraim á tabhairt d’orduithe bunreachtúla náisiúnta;

6.

á thabhairt chun suntais go bhféadfadh sé nach raibh na toghcháin chuig an bParlaimint cothrom san Ungáir; á chur i bhfáth sa chomhthéacs seo gur aimsíodh i dTuarascáil Chríochnaitheach Mhisean Breathnóireachta Toghcháin Oifig ESCE um Institiúidí Daonlathacha agus um Chearta an Duine (ODIHR) (14) do na toghcháin pharlaiminteacha agus don reifreann san Ungáir an 3 Aibreán 2022‘easpa cothroime iomaíochta’; á chur i bhfáth gur faoi Rialtas na hUngáire atá sé a áirithiú go gcomhlíonfadh an tír dlí an Aontais agus na luachanna a chumhdaítear in Airteagal 2 CAE arís agus á chur in iúl gurb oth léi go mór gur chuir an easpa gníomhaíocht chinntitheach ón Aontas le cliseadh an daonlathais, an smachta reachta agus na gceart bunúsach san Ungáir, rud a fhágann go bhfuil réimeas hibrideach d’uathlathas toghchánach ann sa tír, de réir na n-innéacsanna ábhartha; á chur in iúl gur cúis bhuartha di roinnt iarrataí ón Ionchúisitheoir Imscrúdaitheach Lárnach Ungárach díolúine Feisirí Eorpacha a bhaint;

7.

ag athdhearbhú an dearcaidh atá aici le fada an lá go bhfuil gá le tuilleadh athchóirithe agus oiriúnuithe ar chreat toghcháin an Aontais chun toghcháin atá níos daonlathaí, níos athléimní, níos cuimsithí agus fíor-Eorpach a dhéanamh de na toghcháin Eorpacha; ag tabhairt aird ar roinnt tionscnamh beartais atá ar feitheamh ina leith sin agus á iarraidh arís ar Chomhairle an Aontais Eorpaigh agus ar an gComhairle Eorpach comhoibriú go cuiditheach leis an bParlaimint chun réitigh bheartais a aimsiú a fheidhmíonn chun leasa shaoránaigh na hEorpa;

8.

á chur in iúl go bhfuil sí suite de nach mór an creat rialála do na toghcháin Eorpacha a athbhreithniú agus a nuachóiriú chun lorg toghcháin na saoránach a mhéadú agus chun an ilroinnt rialála i measc na 27 mBallstát a laghdú, lena n-áirítear trí lá vótála coiteann amháin chomh maith le haois íosta vótála aonfhoirmeach; á mheabhrú go meastar go dtabharfaidh Cinneadh (AE, Euratom) 2018/994 ón gComhairle céimeanna dearfacha suntasacha sa chiall seo, mar a dhéanfadh roinnt aighneachtaí ón togra atá ar feitheamh an 3 Bealtaine 2022 le haghaidh dlí nua toghcháin; ag athdhearbhú a hiarraidh ar an gComhairle dul i dteagmháil go cuiditheach leis an bParlaimint chun go bhféadfar formheas pras a fháil; á mheabhrú go bhfuil athbhreithniú 2018 daingnithe ag 26 de na 27 mBallstát cheana féin agus ag glacadh uirthi féin meastóireacht chriticiúil a dhéanamh ar an gcúis ar cuireadh moill ar a chur chun feidhme i mBallstáit éagsúla;

9.

á chur in iúl gur oth léi nár ghlac an Chomhairle in am do thoghcháin 2024 rialacha nua molta maidir leis an gceart chun vótáil agus chun seasamh mar iarrthóir i dtoghcháin do Pharlaimint na hEorpa do ‘shaoránaigh shoghluaiste’; á chur i bhfios go gcuirtear bac fós ar lánfheidhmiú na gceart toghcháin a dheonaítear leis na Conarthaí do shaoránaigh shoghluaiste i dtoghcháin do Pharlaimint na hEorpa mar gheall ar bhacainní ar rannpháirtíocht dhaonlathach nach bhfuil údar leo, lena n-áirítear easpa feasachta maidir leis na coinníollacha agus na rialacha is infheidhme; á aithint go dtabharfaí aghaidh ar chuid de na bacainní sin leis an dréacht-treoir ón gComhairle atá ar feitheamh; á chur in iúl gur oth léi, mar sin féin, nach ndeachaigh an Chomhairle, cé go bhfuil Airteagal 22(2) CFAE á chomhlíonadh go foirmiúil aici, i ngleic ar aon bhealach fiúntach le substaint na tuairime ón bParlaimint; ag athdhearbhú, go háirithe, a moltaí chun clárú ar rolla toghthóirí a chumasú a luaithe a chláraíonn vótálaithe a n-áit chónaithe agus chun ceanglais teanga agus faisnéise d’údaráis áitiúla a neartú, chomh maith le feidhmiú an chirt chun vótáil ag grúpaí vótálaithe faoi ghannionadaíocht a éascú agus chun feachtais múscailte feasachta ag na Ballstáit a fheabhsú le rannpháirtíocht ghníomhach na sochaí sibhialta; ag iarraidh ar na Ballstáit a áirithiú gur féidir lena saoránaigh atá ina gcónaí thar lear páirt a ghlacadh i dtoghcháin Eorpacha, lena n-áirítear trí sheirbhísí consalachta a neartú agus vótáil poist a chumasú; á chur i bhfáth a thábhachtaí atá sé do na Ballstáit uile rochtain gan bhac ar stáisiúin vótála a áirithiú do dhaoine scothaosta agus do dhaoine faoi mhíchumas;

10.

ag tacú go láidir le hiarrachtaí páirtithe polaitiúla cur chun feidhme phróiseas an phríomhiarrthóra (Spitzenkandidaten) a fhorbairt a thuilleadh chun nasc a bhunú idir an toghchán, comhdhéanamh na Parlaiminte, agus ainmniúchán Uachtarán an Choimisiúin Eorpaigh chun ceapadh fheidhmeannas an Aontais a dhéanamh níos trédhearcaí do shaoránaigh; á chur i bhfios go láidir gur chuir an próiseas seo ar chumas na saoránach tionchar éifeachtach a imirt ar ainmniúchán Uachtarán an Choimisiúin, rud a léiríonn céim shuntasach chun cinn, le ról díreach do shaoránaigh; ag moladh na bpáirtithe polaitiúla Eorpacha as ucht a n-iarrthóirí a ainmniú i bhfad roimh an toghchán; á thabhairt dá haire gur éirigh go maith leis an bpróiseas sin an uair seo toisc gur rith Uachtarán an Choimisiúin, cé nach raibh sí intofa go díreach trí bhallóid, mar phríomhiarrthóir don ghrúpa polaitíochta a fuair an líon is mó vótaí; á chur i bhfios go méadófaí cuntasacht agus dlisteanacht dhaonlathach Uachtarán an Choimisiúin dá ndéanfaí é a thoghadh trí na toghcháin Eorpacha; á chur in iúl go bhfuil sí suite fós, mar sin féin, go bhfuil roinnt príomhthosca ratha – amhail forbairt agus comhdhlúthú leanúnach an réimse dhaonlathaigh Eorpaigh – in easnamh go fóill, rud a chuireann cosc ar acmhainneacht an phróisis pholaitiúil neamhfhoirmiúil neamhrialaithe sin a bhaint amach ina hiomláine;

11.

ag cur béim ar an ról tábhachtach atá ag páirtithe polaitiúla Eorpacha i dtaobh cur leis an díospóireacht ar shaincheisteanna beartais phoiblí Eorpaigh agus maidir le feasacht pholaitiúil Eorpach a fhoirmiú; á chur in iúl go gcreideann sí gur féidir leis na páirtithe sin cur i gcoinne scaipeadh na bréagaisnéise agus na mífhaisnéise roimh na toghcháin, rud a bhfuil géarghá leis; á chur in iúl gur geal léi an comhaontú ar thángthas air maidir le hathmhúnlú Rialachán (AE, Euratom) Uimh. 1141/2014 maidir le reacht agus cistiú páirtithe polaitiúla Eorpacha agus fondúireachtaí polaitiúla Eorpacha, rud a dhúnann na bearnaí atá fágtha, a thugann soiléireacht dhlíthiúil agus a chuidíonn le páirtithe polaitiúla Eorpacha a scaoileadh saor agus a chumhachtaíonn iad an ról a thugtar dóibh leis na Conarthaí a ghlacadh, lena n-áirítear trína n-infheictheacht sna Ballstáit a threisiú le linn an fheachtais toghcháin agus i gcur chun cinn na bpríomhiarrthóirí;

12.

ag iarraidh ar na Ballstáit toirmeasc a chur chun feidhme ar thabhartais eachtracha, lena n-áirítear ranníocaíochtaí nó sochair chomhchineáil agus airgid thirim araon, agus teorainn a chur ar thabhartais do pháirtithe polaitiúla agus d’iarrthóirí; á mheas nach mór é a bheith d’oibleagáid ar ghníomhaithe polaitiúla ar tairgeadh dóibh agus/nó a ghlac le ranníocaíocht airgeadais nó chomhchineáil ó ghníomhaí eachtrach í a thuairisciú do na húdaráis inniúla agus ba cheart an fhaisnéis sin a thuairisciú, dá réir sin, ar leibhéal an Aontais chun lamháil d’fhaireachán uile-Aontais;

13.

á chur i bhfáth gur gá ról agus infheictheacht fondúireachtaí polaitiúla Eorpacha i réimse daonlathach na hEorpa a neartú; á mheabhrú go bhfuil ról lárnach ag na fondúireachtaí seo i bhforbairt díospóireachta polaitiúla, taighde beartais agus oideachais shibhialta thar theorainneacha, agus ar an gcaoi sin ag cur le tuairim phoiblí fhíor-Eorpach a fhoirmiú; á iarraidh go soláthrófar uirlisí agus acmhainní leordhóthanacha chun go mbeidh siad in ann tacú le páirtithe polaitiúla Eorpacha ina n-iarrachtaí chun saoránaigh a mhealladh, luachanna Eorpacha a chur chun cinn agus páirt fhóinteach a ghlacadh i bhfeachtais toghcháin amach anseo; á mheabhrú gur cheart don tuarascáil atá le teacht ón gCoimisiún maidir le cur i bhfeidhm Rialachán (AE, Euratom) Uimh. 1141/2014 maidir le reacht agus cistiú páirtithe polaitiúla Eorpacha agus fondúireachtaí polaitiúla Eorpacha (athmhúnlú ar feitheamh) aird ar leith a thabhairt ar na rialacha lena rialaítear maoiniú fondúireachtaí polaitiúla Eorpacha agus leasuithe ar an Rialachán a mholadh más gá;

14.

á chur i bhfios go láidir nach mór tuilleadh obair institiúideach a dhéanamh chun an tionchar atá ag vótálaithe Eorpacha ar rialachas an Aontais a neartú; ag cur i bhfios, i dtaca leis sin, an nós imeachta maidir le Conarthaí a athrú atá ar feitheamh, ar nós imeachta é a tionscnaíodh i ndiaidh na Comhdhála ar Thodhchaí na hEorpa; ag tabhairt chun suntais an togra uaithi chun róil na Comhairle agus na Parlaiminte a aisiompú maidir le hainmniú agus deimhniú Uachtarán an Choimisiúin chun torthaí na dtoghchán Eorpach a léiriú ar bhealach níos cruinne; ag tabhairt chun suntais an togra uaithi freisin chun an ceart maidir le tionscnamh reachtach a dheonú don Pharlaimint, rud a chruthódh, dá gcuirfí chun feidhme é, nasc díreach idir na vótaí a chaithfidh saoránaigh ar son ionadaithe parlaiminte agus an t-aschur beartais ar leibhéal an Aontais; ag tabhairt chun suntais an togra uaithi freisin chun ceart fiosrúcháin Pharlaimint na hEorpa a nuachóiriú chun rialú daonlathach ar fheidhmeannas an Aontais a neartú; ag iarraidh ar an gComhairle Eorpach na Conarthaí a chomhlíonadh agus vótáil a dhéanamh ar an gcoinbhinsiún a thionól gan moill mhíchuí chun na tograí sin a phlé;

15.

á chur i bhfios go láidir a thábhachtaí atá sé an nasc idir saincheisteanna áitiúla, réigiúnacha, náisiúnta agus Eorpacha a neartú; á chur in iúl gur geal léi, i ndáil leis sin, rannpháirtíocht ghníomhach agus dhearfach cheannairí áitiúla agus réigiúnacha i dtopaicí agus i ndíospóireachtaí Eorpacha, go háirithe sa tréimhse réamhthoghcháin, lena n-áirítear trí obair Choiste na Réigiún agus a líonraí agus a fheachtais;

16.

á mheabhrú gurb é an leibhéal is gaire do na saoránaigh is éifeachtaí chun reitric fhrithdhaonlathach a chomhrac, lena n-áirítear trí rannpháirtíocht ghníomhach cheannairí áitiúla agus réigiúnacha; i ndáil leis sin, go háirithe i réigiúin ina bhfuil marbhántacht eacnamaíoch ag tarlú agus ina bhfuil neamhionannais fhadtéarmacha ag méadú tacaíochta do pháirtithe Eoraisceipteacha, ag cur i bhfios go láidir an ról dearfach atá ag beartas comhtháthaithe an Aontais, nach mór dó tosaíocht a thabhairt do bhunriachtanais réigiúnacha, lena n-áirithítear nach bhfágtar aon duine ar lár;

17.

á chur in iúl gur cúis mhór bhuartha di líon méadaitheach na mbagairtí inmheánacha agus seachtracha atá ag creimeadh an daonlathais Eorpaigh; á cháineadh go ndeachaigh roinnt iarrthóirí, lena n-áirítear na hiarrthóirí sin ó pháirtithe rialaithe i roinnt Ballstát, i mbun feachtais go hoscailte ar bhonn insintí bréagacha agus le hurraíocht ón gcoigríoch faoin Aontas agus iad ag treisiú meon frith-Aontais;

18.

ag athdhearbhú an imní dhomhain atá ann le fada an lá faoi chlaonadh leanúnach an chur isteach mhailísigh i bpróisis dhaonlathacha Eorpacha, lena n-áirítear bréagaisnéis; á chur in iúl gur cúis mhór bhuartha di go bhfuil rialtais roinnt Ballstát ag cur go gníomhach le scaipeadh na bréagaisnéise; ag cáineadh, go háirithe, na bhfeachtas bréagaisnéise ar líne dár thug gníomhaithe stáit agus neamhstáit ón Rúis agus gníomhaithe eile nach de chuid an Aontais iad, ar feachtais iad ar tugadh fúthu chun polarú agus mímhuinín a chothú i measc thoghthóirí na hEorpa; á thabhairt dá haire go dtarlaíonn cur isteach eachtrach roimh thoghcháin agus go mbíonn sé i mbarr a réime sa tréimhse réamhthoghcháin; ag cáineadh roinnt Feisirí de Pharlaimint na hEorpa a chuaigh i dteagmháil go toilteanach leis an ardán meán darb ainm ‘Voice of Europe’ , atá faoi réir imscrúdú coiriúil, chun insintí a bhí urraithe ag an gCreimil faoin gcogadh foghach san Úcráin a chur chun cinn;

19.

ag athdhearbhú a hiarrata ar an gCoimisiún agus ar na Ballstáit dlús a chur le hiarrachtaí chun cur isteach eachtrach agus bréagaisnéis a chomhrac trí straitéis il-leibhéil, chomhordaithe agus thrasearnála, dá dtabharfaí tacaíocht le hacmhainní airgeadais leordhóthanacha, chun beartais oiriúnacha fadbhreathnaitheachta agus athléimneachta agus uirlisí díspreagtha a chur ar fáil don Aontas agus dá Bhallstáit; i ndáil leis sin, ag iarraidh ar an gCoimisiún, ar an tSeirbhís Eorpach Gníomhaíochta Seachtraí, agus ar na Ballstáit freagairt straitéiseach an Aontais ar bhréagaisnéis agus ar ionramháil agus cur isteach eachtrach ar fhaisnéis a atreisiú a thuilleadh, agus ag tabhairt aird ar iarrachtaí beartais iomadúla an Aontais a rinneadh le blianta beaga anuas, lena n-áirítear an Gníomh um Sheirbhísí Digiteacha, an Cód Cleachtais neartaithe maidir le Bréagaisnéis agus na tionscnaimh faoin bPlean Gníomhaíochta um an Daonlathas; á aithint, agus é ina chúis imní di, go bhfuil tionchar díréireach ag ardáin ar líne ar dhioscúrsa poiblí; ag tabhairt dá haire, agus é ina chúis imní di, tuairiscí ar chinntí a rinne ardáin áirithe ar chúiseanna polaitiúla a d’fhéadfadh an tsaoirse chun tuairimí a nochtadh agus an t-iolrachas daonlathach a chur i mbaol;

20.

á chur i bhfios go láidir a thábhachtaí atá timpeallacht chothrom agus shaor do na meáin sna Ballstáit mar phríomhcholún den daonlathas Eorpach, go háirithe i dtimthriallta toghcháin; á aithint, cé go bhfuil an tAontas ina cheannaire domhanda i saoirse na meán agus gur glacadh an Gníomh Eorpach um Shaoirse na Meán in 2024 agus gur tháinig an treoir frith-SLAPP i bhfeidhm (15), go bhfuil gá le saoirse na meán san Aontas a neartú a thuilleadh mar gheall ar an mbrú inmheánach agus seachtrach atá ag méadú ar thimpeallacht meán an Aontais, lena n-áirítear sa tréimhse roimh na toghcháin Eorpacha; á mheabhrú gur tháinig méadú in 2024 ar ionsaithe ar iriseoirí i mBallstáit áirithe;

21.

ag cáineadh gach cineáil foréigin pholaitiúil sna téarmaí is láidre; á chur in iúl gur cúis mhór imní di sraith teagmhas a tharla sa tréimhse roimh thoghcháin 2024; ag spreagadh an Choimisiúin agus na mBallstát chun tosaíocht a thabhairt do chosc an fhoréigin pholaitiúil trí dhlíthe, creataí agus beartais a neartú lena gcosnaítear polaiteoirí, iarrthóirí polaitiúla, gníomhaithe, iriseoirí agus saoránaigh ar fhoréigean agus ar chiapadh le linn na tréimhse toghcháin; á chur i bhfios go láidir a thábhachtaí atá cur chuige cuimsitheach lena n-áirítear cosc, cosaint agus oideachas chun minicíocht an fhoréigin pholaitiúil a laghdú, go háirithe trí fheasacht a chur chun cinn ar chontúirtí an fhoréigin pholaitiúil agus trí chultúr na caoinfhulaingthe agus urraim do thuairimí polaitiúla éagsúla a chothú; á thabhairt chun suntais nach dtosaíonn calaois toghcháin ar lá an toghcháin, ach le díchóimeáil an smachta reachta, phrionsabail dhaonlathacha, saoirse an phreasa, saoirse cainte, agus le scaipeadh na bréagaisnéise agus na bolscaireachta eachtraí; á thabhairt dá haire, agus é ina chúis imní di, go bhféadfadh dúshláin chórasacha tionchar a imirt ar an méid a chloítear go comhsheasmhach le saorthoghcháin chóra ar fud na mBallstát uile;

22.

á chur in iúl gur cúis mhór imní di teacht chun cinn agus rath toghcháin páirtithe frithchórais atá go hoscailte i gcoinne an Aontais le linn thoghcháin 2024; á chur i bhfios go mbíonn radacú an dioscúrsa pholaitiúil agus tuilleadh polaraíochta sa Pharlaimint mar thoradh ar an aistriú seo, agus ina theannta sin, go soláthraíonn sé ardán níos leithne chun bréagaisnéis agus bolscaireacht eachtrach a scaipeadh; ag cáineadh aon chineál reitrice polaitiúla lena gcothaítear fuathchaint, idirdhealú, seineafóibe nó foréigean, agus ag tathant ar na gníomhaithe polaitiúla uile dul i mbun idirphlé cuiditheach, bunaithe ar fhíricí lena n-urramaítear luachanna daonlathacha, cearta an duine agus an smacht reachta; á ghlacadh uirthi féin feidhmiú an Aontais a athchóiriú agus a fheabhsú a thuilleadh chun ionchais na saoránach a bhaint amach ar bhealach níos fearr; ag iarraidh ar gach gníomhaí ábhartha cumarsáid níos réamhghníomhaí a dhéanamh maidir le rannchuidiú dearfach an Aontais le saol laethúil agus slándáil shaoránaigh uile na hEorpa trína bheartais;

23.

á chur in iúl go bhfuil sí tiomanta do mheastóireacht a dhéanamh ar na creataí seo trína Coiste Speisialta um an Sciath Eorpach don Daonlathas, a bhfuil sainordú aige, a fuarthas ón suí iomlánach, chun aghaidh a thabhairt ar chur isteach i bpróisis agus i mbeartais dhaonlathacha, agus bearta a chur chun feidhme chun cothroime agus sláine toghchán a chaomhnú chomh maith le beartais a chuireann le próisis dhaonlathacha an Aontais; á thabhairt chun suntais go bhfeidhmíonn an coiste mar uirlis ríthábhachtach chun cur isteach mailíseach a chosc trí lúbanna ar lár, bearnaí agus forluí féideartha a bhféadfaí teacht i dtír orthu a shainaithint; á iarraidh ar an gCoimisiún i gcomhthreo na creataí rialála sin a fhorfheidhmiú ina n-iomláine agus gan moill mhíchuí, go háirithe i gcás na n-ardán sin a leanann de neamhaird a thabhairt go hoscailte ar údaráis rialála an Aontais;

24.

ag aithint na tábhachta a bhaineann le cibearshlándáil agus cibearbhonneagar chun sláine na dtoghchán Eorpach a chosaint; ag tabhairt rabhaidh in aghaidh na rioscaí féideartha a bhaineann le hoibríochtaí tionchair IS-chumasaithe;

25.

á chur i bhfios go mbíonn tionchar indíreach ag torthaí toghchán náisiúnta ar chomhdhéanamh institiúidí Eorpacha freisin, e.g. trí ainmniúchán Coimisinéirí ainmnithe nó rannpháirtíocht thromlaigh pholaitiúla náisiúnta reatha i gcruinnithe na Comhairle; ag cur béim, sa chomhthéacs seo, ar a thábhachtaí atá cineál daonlathach na dtoghchán ginearálta i ngach Ballstát;

26.

ag teacht ar an gconclúid nach féidir le daonlathas Eorpach dul chun cinn ach amháin má neartaítear agus má chosnaítear próisis dhaonlathacha agus toghcháin Eorpacha; i ndáil leis sin, á chur i bhfios go láidir a thábhachtaí atá sé saorthoghcháin chóra a chur chun cinn agus a sláine a chosaint ar bhagairtí inmheánacha agus seachtracha ar dhaonlathas an Aontais; á thabhairt dá haire, agus é ina chúis imní di, nach ndéantar seiceáil ar scaipeadh na bréagaisnéise agus ar thionchar roinnt ardán meán sóisialta; á chur i bhfios go láidir a thábhachtaí atá sé an creat dlíthiúil iomlán atá i bhfeidhm faoi láthair a fhorfheidhmiú chun sláine an phróisis toghcháin ar fad a chosaint;

°

° °

27.

á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.