—

ag féachaint don iarraidh ar tharscaoileadh dhíolúine Michał Dworczyk, a chuir Ard-Ionchúisitheoir Phoblacht na Polainne ar aghaidh an 29 Lúnasa 2024, lena dtarchuireadh iarraidh arna cur isteach ag Oifig Ionchúisitheoir Poiblí Réigiúnach Vársá i ndáil leis na himeachtaí coiriúla atá le tabhairt i gcoinne Michał Dworczyk, agus a cuireadh in iúl i suí iomlánach an 16 Meán Fómhair 2024,

—

tar éis di éisteacht a thabhairt do Michał Dworczyk an 13 Feabhra 2025 agus ag féachaint don doiciméad a thíolaic sé i gcomhréir le hAirteagal 9(6) dá Rialacha Nós Imeachta,

—

ag féachaint don fhaisnéis bhreise a chuir Ionchúisitheoir Poiblí Réigiúnach Vársá ar fáil an 28 Márta agus an 8 Bealtaine 2025,

—

ag féachaint d’Airteagail 8 agus 9 de Phrótacal Uimh. 7 ar Phribhléidí agus Díolúintí an Aontais Eorpaigh agus d’Airteagal 6(2) d’Ionstraim an 20 Meán Fómhair 1976 maidir le toghadh chomhaltaí Pharlaimint na hEorpa trí vótáil chomhchoiteann dhíreach,

—

ag féachaint do bhreithiúnais Chúirt Bhreithiúnais an Aontais Eorpaigh an 21 Deireadh Fómhair 2008, an 19 Márta 2010, an 6 Meán Fómhair 2011, an 17 Eanáir 2013, an 19 Nollaig 2019 agus an 5 Iúil 2023  (1),

—

ag féachaint d’Airteagail 105(2) agus (5) de Bhunreacht Phoblacht na Polainne:

—

ag féachaint do Riail 5(2), do Riail 6(1) agus do Riail 9 dá Rialacha Nós Imeachta,

—

ag féachaint don tuarascáil ón gCoiste um Ghnóthaí Dlíthiúla (A10-0178/2025),

A.

de bhrí gur sheol Ard-Ionchúisitheoir Phoblacht na Polainne, i litir dar dáta an 29 Lúnasa 2024, iarraidh ar tharscaoileadh dhíolúine Michał Dworczyk, arna tíolacadh ag Oifig an Ionchúisitheora Poiblí Réigiúnach Vársá, i ndáil le sáruithe líomhnaithe faoi Airteagal 231(1) agus Airteagal 239(1) i gcomhar le hAirteagal 11(2) de Chód Coiriúil na Polainne;

B.

de bhrí gur thuairiscigh Michał Dworczyk don Ghníomhaireacht Slándála Inmheánaí an 8 Meitheamh 2021 gur bhain daoine anaithnide mí-úsáid as sonraí rochtana ar a ríomhphost agus, tar éis an tuairiscithe sin, gur chuir Oifig an Ionchúisitheora Poiblí Réigiúnach Vársá tús le himscrúdú an 10 Meitheamh 2021, i ndiaidh ionsaí fioscaireachta, maidir le mí-úsáid sonraí rochtana ríomhphoist a bhain le Michał Dworczyk, a bhí an tráth sin ina Cheann Cabinet Uachtarán Chomhairle Airí na Polainne;

C.

de bhrí, le linn an imscrúdaithe sin, gur líomhnaigh Oifig Ionchúisitheoir Poiblí Réigiúnach Vársá gur sháraigh Michał Dworczyk, idir an 19 Nollaig 2017 agus an 8 Meitheamh 2021, a chumhachtaí mar Cheann Cabinet Uachtarán Chomhairle na nAirí nó gur mhainnigh sé a dhualgais a chomhlíonadh, agus de bhrí gur chinn oifig an ionchúisitheora chéanna an 13 Meitheamh 2022 imeachtaí coiriúla ar leithligh a thionscnamh maidir le húsáid a bhosca poist phríobháidigh i bhfeidhmiú a dhualgas oifigiúil, cuid den chomhfhreagras ríomhphoist gairmiúil atá ina bhosca ríomhphoist príobháideach a bhaint, tar éis é a bheith curtha ar fáil go poiblí go raibh rochtain ag daoine aonair anaithnide ar an mbosca ríomhphoist sin agus doiciméid rúnaicmithe a choinneáil ina bhosca poist príobháideach, rud a bhain an bonn de leas an phobail agus a chuir bac ar imscrúdú coiriúil arna dhéanamh ag Oifig Ionchúisitheora Poiblí Réigiúnach Vársá; de bhrí gur cuireadh síneadh leis an imscrúdú ar an nós imeachta ar leithligh sin go minic chun na céimeanna nós imeachta a chur i gcrích, inter alia, maidir le hanailís a dhéanamh ar inneachar ríomhphost ó bhosca ríomhphoist príobháideach Michał Dworczyk agus maidir le finnéithe agus amhrastach a chur faoi agallamh, dar dáta an 22 Bealtaine 2024; de bhrí, ós rud é go bhfuil Michał Dworczyk ina Chomhalta de Sejm na Polainne ón 13 Samhain 2023, gur cuireadh iarraidh ar údarú chun imeachtaí coiriúla a thionscnamh ina choinne faoi bhráid an Sejm an 6 Meitheamh 2024 sular eisíodh ordú chun é a dhíotáil, agus de bhrí gur dúnadh na himeachtaí tar éis na hiarrata sin i bhfianaise dhul in éag an tsainordaithe mar Chomhalta de Sejm de Michał Dworczyk, a toghadh mar Fheisire de Pharlaimint na hEorpa;

D.

de bhrí, le linn na n-imscrúduithe sin, gur líomhnaíodh, idir an 1 Márta 2017 agus an 18 Nollaig 2017 gur mhainnigh Michał Dworczyk mar Státrúnaí san Aireacht Cosanta Náisiúnta agus ón 19 Nollaig 2017 go dtí an 8 Meitheamh 2021 mar Aire, mar chomhalta de Chomhairle na nAirí agus mar Cheann Cabinet Uachtarán Chomhairle na nAirí na hoibleagáidí a chomhlíonadh a leagtar síos, inter alia, le dlí an 5 Lúnasa 2010 maidir le faisnéis rúnaicmithe a chosaint, a mhéid a d’úsáid sé bosca ríomhphoist príobháideach neamhdheimhnithe agus neamhshlán chun comhfhreagras a mhalartú le linn dó a dhualgais oifigiúla a dhéanamh, comhfhreagras ina bhfuil, inter alia, faisnéis rúnaicmithe, saincheisteanna cosanta agus slándála Stáit, saincheisteanna seirbhísí speisialta, saincheisteanna slándála faisnéise, etc., agus ar an gcaoi sin dochar a dhéanamh don leas ginearálta; de bhrí gur sárú de bhun Airteagal 231(1) de Chód Coiriúil na Polainne iad a ghníomhaíochtaí líomhnaithe;

E.

de bhrí go líomhnaítear, sa tréimhse ón 8 go dtí an 22 Meitheamh 2021, gur chuir Michał Dworczyk bac ar imeachtaí coiriúla ina dhiaidh sin trí threoir a thabhairt do thríú duine faisnéis áirithe a bhaint go buan dá bhosca poist príobháideach, agus ar an gcaoi sin fianaise a scriosadh; de bhrí gurb ionann a ghníomhaíocht líomhnaithe agus cion de bhun Airteagal 239(1) i gcomhar le hAirteagal 11(2) de Chód Coiriúil na Polainne;

F.

de bhrí gur toghadh Michał Dworczyk chuig Parlaimint na hEorpa i dtoghcháin Eorpacha mhí an Mheithimh 2024; de bhrí nach raibh sé ina Fheisire de Pharlaimint na hEorpa tráth na sáruithe líomhnaithe, ná tráth thionscnamh an imscrúdaithe choiriúil, lena n-áirítear na himeachtaí coiriúla ar leithligh, maidir leis na sáruithe líomhnaithe;

G.

de bhrí nach bhfuil baint ag na sáruithe líomhnaithe agus an iarraidh ar tharscaoileadh a dhíolúine a eascraíonn astu leis na tuairimí a thug Michał Dworczyk ná leis na vótaí a chaith sé i gcomhlíonadh a dhualgas de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh;

H.

de bhrí go sonraítear i bhfomhír 1(a) d’Airteagal 9 de Phrótacal Uimh. 7 ar Phribhléidí agus Díolúintí an Aontais Eorpaigh go bhfuil ag Feisirí Pharlaimint na hEorpa, i gcríoch a stáit féin, na díolúintí a thugtar d’fheisirí pharlaimint na tíre sin;

I.

de bhrí, i gcomhréir le hAirteagal 105(2) agus (5) de Bhunreacht na Polainne, ón lá a fógraíodh torthaí na dtoghchán go dtí an lá a rachaidh a shainordú nó a sainordú in éag, nach gcuirfear Teachta faoi réir cuntasacht choiriúil gan toiliú Sejm Phoblacht na Polainne agus nach gcoinneofar ná nach ngabhfar é nó í gan toiliú an Sejm, ach amháin i gcásanna inar gabhadh é nó í agus cion á dhéanamh aige nó aici agus inar gá é nó í a choinneáil chun conair cheart na n-imeachtaí a áirithiú;

J.

de bhrí gurb é is cuspóir do dhíolúine pharlaiminteach ná Parlaimint na hEorpa agus a Feisirí a chosaint ar imeachtaí dlíthiúla a bhaineann le gníomhaíochtaí a dhéantar agus dualgais pharlaiminteacha á gcomhlíonadh agus nach féidir a scaradh ó na dualgais sin;

K.

de bhrí, i gcomhréir le Riail 5(2) dá Rialacha Nós Imeachta, nach pribhléid phearsanta í díolúine pharlaiminteach don Fheisire, ach gur ráthaíocht í ar neamhspleáchas na Parlaiminte ina hiomláine agus a Feisirí;

L.

de bhrí nár aimsigh an Pharlaimint, sa chás seo, aon fhianaise ar fumus persecutionis, is é sin, na gnéithe fíorasacha a thugann le fios go bhféadfadh sé gurb é rún an nós imeachta dlíthiúil atá i gceist ná dochar a dhéanamh do ghníomhaíocht pholaitiúil ina cháil mar Fheisire de Pharlaimint na hEorpa;

M.

de bhrí nach féidir le Parlaimint na hEorpa ról cúirte a ghlacadh, agus de bhrí nach féidir, i nós imeachta um dhíolúine a tharscaoileadh, Feisire a mheas mar chúisí (2);

1.

ag cinneadh dhíolúine Michał Dworczyk a tharscaoileadh

2.

á threorú dá hUachtarán an cinneadh seo agus tuarascáil a coiste fhreagraigh a chur ar aghaidh láithreach chuig údarás inniúil Phoblacht na Polainne agus chuig Michał Dworczyk.