CONCLÚIDÍ ÓN GCOMHAIRLE

maidir le Tuarascáil Speisialta Uimh. 24/2022 ó Chúirt Iniúchóirí na hEorpa

dar teideal “Gníomhaíochtaí r-Rialtais spriocdhírithe ar ghnólachtaí – Gníomhaíochtaí an Choimisiúin curtha chun feidhme, ach tá éagsúlachtaí fós ann maidir le fáil ar r-sheirbhísí ar fud an Aontais.”

(2023/C 114/02)

TÁ COMHAIRLE AN AONTAIS EORPAIGH,

Á MHEABHRÚ DI: a conclúidí maidir le feabhas a chur ar an scrúdú a dhéantar ar thuarascálacha speisialta arna ndréachtú ag Cúirt Iniúchóirí na hEorpa i gcomhthéacs an nós imeachta um urscaoileadh (1);

TUGANN SÍ DÁ hAIRE Tuarascáil Speisialta Uimh. 24/2022 ó Chúirt Iniúchóirí na hEorpa dar teideal: e-Government actions targeting businesses - Commission’s actions implemented, but availability of e-services still varies across the EU [gníomhaíochtaí r-Rialtais atá dírithe ar ghnólachtaí - gníomhaíochtaí an Choimisiúin curtha chun feidhme, ach tá éagsúlacht fós ann ar fud an Aontais maidir le fáil ar ríomhsheirbhísí];

TUGANN SÍ DÁ hAIRE na conclúidí agus na moltaí atá sa Tuarascáil Speisialta;

MEABHRAÍTEAR DI a “Conclúidí maidir le Plean Gníomhaíochta don r-Rialtas 2016-2020: dlús a chur le hathrú digiteach rialtais” (2) lena n-iarrtar spriocanna sonracha, réalaíocha agus intomhaiste sa Phlean Gníomhaíochta agus comhleanúnachas idir na gníomhaíochtaí agus na hionstraimí airgeadais lena mbaineann a d’fhéadfadh cabhrú leis na Ballstáit chun an claochlú digiteach a bhaint amach;

AITHNÍONN SÍ an méid seo a leanas go háirithe:

MEABHRAÍTEAR DI an comhar maith atá idir an Coimisiún Eorpach agus na Ballstáit, i gcomhréir le prionsabal na coimhdeachta, maidir le r-Rialtas a chur chun cinn ar leibhéal an Aontais agus ar an leibhéal náisiúnta le breis is 10 mbliana anuas, go háirithe trí na Pleananna Gníomhaíochta don r-Rialtas, darb aidhm riaracháin phoiblí a athrú trí úsáid a bhaint as teicneolaíocht dhigiteach;

IS DÍOL SÁSAIMH DI gur ghlac an Coimisiún le moltaí uile na Tuarascála Speisialta;

MEABHRAÍTEAR DI gur tharraing paindéim COVID-19 aird ar a thábhachtaí atá seirbhísí poiblí digiteacha atá idir-inoibritheach agus athléimneach;

IS DÍOL SÁSAIMH DI gur ghlac an Chomhairle, an Pharlaimint agus an Coimisiún an Cinneadh lena mbunaítear Clár Beartais 2030 “Conair i dtreo na Deacáide Digití”;

IARANN SÍ ar na Ballstáit a dtreochláir agus a gconairí náisiúnta a fhorbairt chun an sprioc a bhaint amach gur cheart príomhsheirbhísí poiblí, mar a shainítear iad sa Chlár Beartais don Deacáid Dhigiteach a bheith ar fáil ar líne faoi 2030;

MEABHRAÍTEAR DI tar éis don Choimisiún an dara tuarascáil maidir le “Staid na Deacáide Digití” a fhoilsiú agus í a fhoilsiú gach dara bliain ina dhiaidh sin, go dtíolacfaidh na Ballstáit lena mbaineann coigeartuithe ar a dtreochláir náisiúnta ina mbeidh beartais, bearta agus gníomhaíochtaí a bhfuil sé ar intinn acu iad a dhéanamh chun na spriocanna digiteacha a bhaint amach;

IARRANN SÍ ar an gComhairle agus ar Pharlaimint na hEorpa an Gníomh um Eoraip Idir-inoibritheach (3) lena leagtar síos bearta chun ardleibhéal idir-inoibritheachta san earnáil phoiblí a bhaint amach ar fud an Aontais agus an Togra le haghaidh Rialachán lena mbunaítear creat le haghaidh na Céannachta Digití Eorpaí (4) a ghlacadh go pras;

IARRANN SÍ ar an gCoimisiún comhleanúnachas a áirithiú idir na gníomhaíochtaí is gá agus na hionstraimí airgeadais ábhartha a d’fhéadfadh cabhrú leis na Ballstáit claochlú digiteach a seirbhísí poiblí a bhaint amach;

IARRANN SÍ ar an gCoimisiún straitéis chuimsitheach a fhorbairt chun seirbhísí r-Rialtais a chur chun cinn go héifeachtach a bheidh dírithe ar ghnólachtaí ar fud an Aontais;

IARRANN SÍ ar na Ballstáit agus ar an gCoimisiún aird a thabhairt ar chonclúidí agus moltaí na Tuarascála Speisialta agus molann sí dóibh scrúdú cúramach a dhéanamh ar na moltaí sin.

(1)  7515/00 + COR 1.

(2)  11801/16.

(3)  14973/22.

(4)  9471/21.