Dan id-dokument hu mislut mis-sit web tal-EUR-Lex
Dokument 52021BP1657
Resolution (EU) 2021/1657 of the European Parliament of 29 April 2021 with observations forming an integral part of the decision on discharge in respect of the implementation of the budget of the European Union Agency for the Operational Management of Large-Scale IT Systems in the Area of Freedom, Security and Justice (eu-LISA) for the financial year 2019
Riżoluzzjoni (UE) 2021/1657 tal-Parlament Ewropew tad-29 ta’ April 2021 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Aġenzija Ewropea għat-Tmexxija Operattiva tas-Sistemi tal-IT Fuq Skala Kbira fl-Ispazju ta’ Libertà, Sigurtà u Ġustizzja (eu-LISA) għas-sena finanzjarja 2019
Riżoluzzjoni (UE) 2021/1657 tal-Parlament Ewropew tad-29 ta’ April 2021 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Aġenzija Ewropea għat-Tmexxija Operattiva tas-Sistemi tal-IT Fuq Skala Kbira fl-Ispazju ta’ Libertà, Sigurtà u Ġustizzja (eu-LISA) għas-sena finanzjarja 2019
IO L 340, 24.9.2021, p. 444–448
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
24.9.2021 |
MT |
Il-Ġurnal Uffiċjali tal-Unjoni Ewropea |
L 340/444 |
RIŻOLUZZJONI (UE) 2021/1657 TAL-PARLAMENT EWROPEW
tad-29 ta’ April 2021
li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Aġenzija Ewropea għat-Tmexxija Operattiva tas-Sistemi tal-IT Fuq Skala Kbira fl-Ispazju ta’ Libertà, Sigurtà u Ġustizzja (eu-LISA) għas-sena finanzjarja 2019
IL-PARLAMENT EWROPEW,
— |
wara li kkunsidra d-deċiżjoni tiegħu dwar il-kwittanza għall-implimentazzjoni tal-baġit tal-Aġenzija tal-Unjoni Ewropea għat-Tmexxija Operattiva ta' Sistemi tal-IT fuq Skala Kbira fl-Ispazju ta' Libertà, Sigurtà u Ġustizzja (eu-LISA) għas-sena finanzjarja 2019, |
— |
wara li kkunsidra l-Artikolu 100 u l-Anness V tar-Regoli ta' Proċedura tiegħu, |
— |
wara li kkunsidra l-opinjoni tal-Kumitat għal-Libertajiet Ċivili, il-Ġustizzja u l-Intern, |
— |
wara li kkunsidra r-rapport tal-Kumitat għall-Kontroll tal-Baġit (A9-0098/2021), |
A. |
billi, skont id-dikjarazzjoni tad-dħul u l-infiq tagħha (1), il-baġit finali tal-Aġenzija tal-Unjoni Ewropea għat-Tmexxija Operattiva ta' Sistemi tal-IT fuq Skala Kbira- fl-Ispazju ta' Libertà, Sigurtà u Ġustizzja (eu-LISA) ("l-Aġenzija") għas-sena finanzjarja 2019 kien ta' EUR 288 403 000, li jirrappreżenta żieda sinifikanti ta' 40,23 % meta mqabbel mal-2018; billi ż-żieda kienet relatata mal-ammont riportat mill-2018 u żieda fl-ammont ta' xogħol u ta' persunal; billi l-baġit tal-Aġenzija huwa kważi esklużivament derivat mill-baġit tal-Unjoni; |
B. |
billi l-Qorti tal-Awdituri ("il-Qorti"), fir-rapport tagħha dwar il-kontijiet annwali tal-Aġenzija għas-sena finanzjarja 2019 ("ir-rapport tal-Qorti"), issostni li għandha fil-pussess tagħha aċċertament raġonevoli li l-kontijiet annwali tal-Aġenzija huma affidabbli u li t-tranżazzjonijiet ta' bażi huma legali u regolari; |
Ġestjoni baġitarja u finanzjarja
1. |
Jesprimi dispjaċir għall-fatt li l-isforzi ta' monitoraġġ baġitarju matul is-sena finanzjarja 2019 irriżultaw f'rata ta' implimentazzjoni tal-baġit ta' 44,51 %, li tirrappreżenta tnaqqis ta' 30,67 % meta mqabbla mal-2018; josserva li r-rata baxxa ta' implimentazzjoni kienet ikkawżata minn nuqqas ta' allinjament bejn l-ippjanar baġitarju għal kompiti ġodda kif ippreżentat fid-dikjarazzjonijiet finanzjarji leġiżlattivi rispettivi mħejjija mill-Kummissjoni u d-data vera tad-dħul fis-seħħ tal-atti legali rilevanti jew it-tlestija ta' atti sussegwenti, kif ukoll l-adozzjoni u d-dħul fis-seħħ tardivi ta' ċerti atti legali; jinnota li minħabba r-rata baxxa ta' implimentazzjoni tal-baġit, l-Aġenzija raddet lura EUR 66 miljun lill-Kummissjoni f'approprjazzjonijiet ta' pagament, inklużi EUR 23 miljun li ma kinux mitluba meta ġie stabbilit il-baġit, u rriportat EUR 159 miljun f'approprjazzjonijiet ta' impenn li kienu awtorizzati mill-bord tat-tmexxija; jinnota li dan iqajjem dubji dwar is-suppożizzjonijiet tal-ippjanar fid-dikjarazzjonijiet finanzjarji leġiżlattivi mħejjija mill-Kummissjoni; jinnota li l-inkorporazzjoni ta' ammont sinifikanti ta' riżorsi fil-baġit għall-implimentazzjoni tal-leġiżlazzjoni li għadha ma ġietx adottata tirrappreżenta riskju serju għall-użu effiċjenti tal-approprjazzjonijiet, b'mod partikolari għal dawk l-approprjazzjonijiet li ma ġewx mitluba mill-Aġenzija nnifisha; jinnota li l-problema tal-implimentazzjoni tal-baġit ġiet irrappurtata mill-Qorti anke fis-sena finanzjarja 2018; jinnota li skont it-tweġiba tal-Aġenzija, ir-riskji assoċjati mal-inkorporazzjoni tar-riżorsi fil-baġit tal-Aġenzija għal leġiżlazzjoni li tkun għadha ma ġietx adottata huma rrappurtati b'mod sistematiku lill-bord tat-tmexxija; jistieden lill-Aġenzija biex flimkien mal-Kummissjoni, ittejjeb l-allinjament tal-ippjanar baġitarju mal-kalendarju tal-atti legali; jistieden lill-Kummissjoni tinvolvi lill-Aġenzija fit-tħejjija tad-dikjarazzjonijiet finanzjarji leġiżlattivi rispettivi fl-aktar stadju bikri possibbli; jinnota, barra minn hekk, li r-rata ta' eżekuzzjoni tal-approprjazzjonijiet ta' pagament kienet 92,28 %, li tirrappreżenta tnaqqis ta' 1,80 % meta mqabbla mal-2018; |
2. |
Jinnota, rigward is-segwitu għall-kumment tal-awtorità ta' kwittanza magħmul fis-sena preċedenti dwar il-ftehim biex jinbnew il-kwartieri ġodda tal-Aġenzija fi Strasburgu, li l-Aġenzija rreġistrat dikjarazzjonijiet ta' difiża mal-Qorti tal-Prim'Istanza ta' Strasburgu fil-15 ta' Mejju 2018 u fil-15 ta' Frar 2019 u li t-taħditiet bil-għan li tintlaħaq soluzzjoni barra mill-qrati reġgħu bdew f'April 2019; jinnota li bejn Diċembru 2019 u April 2020 sar it-tieni skambju ta' atti proċedurali fiż-żewġ każijiet fil-Qorti Amministrattiva ta' Strasburgu (talba finanzjarja u talba ta' trasferiment ġudizzjarju), u li fl-20 ta' Mejju 2020, il-Qorti Amministrattiva kkonfermat li l-fażi ta' qabel il-proċess kienet għaddiet għaż-żewġ każijiet; jinnota li s-seduti ta' smigħ għaż-żewġ kawżi saru fit-23 ta' Lulju 2020 u li l-Qorti Amministrattiva ċaħdet għalkollox iż-żewġ talbiet; jinnota li fit-22 ta' Settembru 2020, l-applikant ippreżenta żewġ appelli quddiem il-Qorti Amministrattiva tal-Appell ta' Nancy; jinnota li l-iskadenza biex l-Aġenzija tippreżenta d-dikjarazzjonijiet ta' difiża quddiem il-Qorti Amministrattiva tal-Appell ta' Nancy kienet l-10 ta' Frar 2021; jistieden lill-Aġenzija tinforma lill-awtorità ta' kwittanza hekk kif jinħarġu s-sentenzi tal-Qorti Amministrattiva tal-Appell ta' Nancy; |
Prestazzjoni
3. |
Jilqa' l-fatt li l-Aġenzija tuża ċerti għodod bħall-indikaturi ewlenin tal-prestazzjoni biex tivvaluta l-valur miżjud ipprovdut mill-attivitajiet tagħha biex ittejjeb il-ġestjoni tal-baġit tagħha, bħall-għadd ta' nuqqasijiet kritiċi identifikati matul it-testijiet tas-sigurtà, il-perċentwal tar-riskji għas-sigurtà identifikati ttrattati mill-kontrolli tas-sigurtà assigurati u l-proporzjon tal-attivitajiet identifikati fil-programm ta' ħidma annwali mwettaq jew li jkun qed jiġi skedat; |
4. |
Ifakkar lill-Aġenzija dwar il-ħtieġa li b'mod regolari twettaq rieżami u aġġornament tas-sistema ta' kejl tal-prestazzjoni u tal-indikaturi ewlenin tal-prestazzjoni tagħha biex tiżgura l-kontribut effiċjenti tal-Aġenzija għall-politiki tal-Unjoni u l-għarfien espert tagħha fil-livell tal-Unjoni; iħeġġeġ lill-Aġenzija tanalizza bir-reqqa l-eżiti tal-kejl tal-prestazzjoni tagħha u tuża dan l-analiżi biex ittejjeb l-istrateġija u l-ippjanar tal-attività tagħha; |
5. |
Jisħaq li l-Aġenzija tal-Unjoni toffri kontribut importanti għal Ewropa aktar sikura billi tiżgura l-ogħla livelli ta' sigurtà tal-informazzjoni u protezzjoni tad-data għall-informazzjoni li tiġi fdata lilha, tipprovdi servizzi ta' kwalità għolja u tgħin biex il-kapaċitajiet teknoloġiċi tal-Istati Membri jiġu allinjati mal-ħtiġijiet tagħhom; jiġbed l-attenzjoni għall-ħtieġa li jittieħdu l-miżuri kollha meħtieġa biex jiġi evitat kwalunkwe riskju għall-informazzjoni pproċessata; ifakkar li l-kapaċità tal-Aġenzija kemm li ttejjeb sistemi ta' informazzjoni eżistenti kif ukoll li tiżviluppa oħrajn ġodda ġiet imsaħħa bil-mandat il-ġdid tagħha li daħal fis-seħħ f'Diċembru 2018; ifakkar li l-2019 kienet l-ewwel sena sħiħa wara d-dħul fis-seħħ tar-Regolament (UE) 2018/1726 (2) u jilqa' l-isforzi li saru mill-Aġenzija biex tadatta ruħha għal dawn ir-regoli l-ġodda; |
6. |
Jinnota b'apprezzament li l-Aġenzija għandha l-għan li tiżgura l-kosteffiċjenza u l-ekonomija ta' skala permezz tal-aggruppament tar-riżorsi ma' aġenziji oħra u permezz tagħhom bil-parteċipazzjoni f'sejħiet għall-offerti interistituzzjonali u arranġamenti kuntrattwali ma' fornituri oħra tas-servizzi biex jitnaqqsu l-ispejjeż amministrattivi u biex tiġi evitata d-duplikazzjoni ta' servizzi orizzontali; iħeġġeġ lill-Aġenzija tespandi l-parteċipazzjoni tagħha f'kollaborazzjoni interistituzzjonali anke fl-oqsma taċ-ċibersigurtà jew tat-tranżizzjoni ekoloġika; jinnota li l-Aġenzija qed taħdem mill-qrib mal-aġenziji fil-qasam tal-ġustizzja u l-affarijiet interni u li l-arranġamenti ta' ħidma u l-pjanijiet ta' kooperazzjoni huma fis-seħħ mal-Uffiċċju Ewropew ta' Appoġġ fil-qasam tal-Ażil, mal-Aġenzija tal-Unjoni Ewropea għall-Kooperazzjoni fil-Ġustizzja Kriminali, l-Aġenzija tal-Unjoni Ewropea għall-Infurzar tal-Liġi u Kooperazzjoni, l-Aġenzija tal-Unjoni Ewropea għat-Taħriġ fl-Infurzar tal-Liġi, l-Aġenzija tal-Unjoni Ewropea għad-Drittijiet Fundamentali, l-Aġenzija tal-Unjoni Ewropea għaċ-Ċibersigurtà u l-Aġenzija Ewropea għall-Gwardja tal-Fruntiera u tal-Kosta; iħeġġeġ u jitlob lill-Aġenzija biex b'mod attiv tkompli tfittex kooperazzjoni u skambju tal-aħjar prattiki akbar u usa' ma' aġenziji oħra tal-Unjoni bil-għan li ttejjeb l-effiċjenza, b'mod partikolari fir-rigward tar-riżorsi umani, il-ġestjoni tal-bini, is-servizzi tal-IT u s-sigurtà; |
7. |
Jinnota, fid-dawl tal-osservazzjonijiet u tal-kummenti li saru mill-awtorità ta' kwittanza bħala parti mill-kwittanza tal-2018, li l-Aġenzija tiġġestixxi tliet sistemi tal-IT fuq skala kbira li huma separati u mhux integrati, u li l-iskedi ta' żmien u l-limitazzjonijiet ta' żvilupp differenti li jirriżultaw mill-oqfsa legali separati li jirregolaw dawn is-sistemi wasslu biex is-sistemi tal-IT kellhom jinbnew b'mod separat u mhux integrat; jinnota li l-Aġenzija varat is-sejħa għall-offerti ta' qafas tal-inġinerija trasversali li għandha l-għan li żżid b'mod sinifikanti l-effiċjenza u l-ekonomiji ta' skala u tirrifletti aktar mill-qrib l-istruttura organizzattiva l-ġdida tad-dipartiment tal-operazzjonijiet, u jistieden lill-Aġenzija tirrapporta lill-awtorità ta' kwittanza dwar il-progress li jkun sar; |
8. |
Jinnota li fl-2019, l-Aġenzija varat programm ta' trasformazzjoni korporattiva li ngħata l-isem "eu-LISA 2.0" bil-għan li tallinja l-organizzazzjoni tal-Aġenzija mal-mandat u r-responsabbiltajiet il-ġodda tagħha filwaqt li tiżgura li l-proġett ta' riorganizzazzjoni jkun miftuħ, trasparenti u jinvolvi lill-persunal tal-Aġenzija; jinnota li l-Aġenzija kkonkludiet bidla fl-istruttura organizzattiva tagħha fl-1 ta' Settembru 2019 u li ġew imfassla u implimentati strutturi organizzattivi matriċi kompletament ġodda għad-dipartiment tal-operazzjonijiet u għad-dipartiment tat-tmexxija korporattiva; |
9. |
Jilqa' l-istruttura organizzattiva ġdida stabbilita mill-Aġenzija, li ssaħħaħ il-kapaċitajiet meħtieġa għall-ippjanar operazzjonali u l-akkwist sottostanti, inkluż l-għoti ta' input legali u tekniku; jitlob, madankollu, li jsiru aktar sforzi biex tiġi żgurata l-konformità mar-regoli ta' akkwist u li jkun hemm kontrolli interni u rappurtar aktar preċiżi; |
10. |
Jilqa' l-progress li sar fir-rigward tar-rakkomandazzjonijiet tal-Qorti mis-snin preċedenti u l-fatt li l-Aġenzija ilha mill-2019 tippubblika avviżi ta' postijiet tax-xogħol vakanti fuq is-sit web tal-Uffiċċju Ewropew għas-Selezzjoni tal-Persunal; |
Politika dwar il-persunal
11. |
Jinnota bi tħassib li, fil-31 ta' Diċembru 2019, it-tabella tal-persunal kienet implimentata biss fil-livell ta' 89,53 %, b'154 aġent temporanju maħtura mill-172 aġent temporanju awtorizzati skont il-baġit tal-Unjoni (imqabbla ma' 136 post tax-xogħol awtorizzati fl-2018); jinnota li, barra minn hekk, 61 aġent kuntrattwali u 8 esperti nazzjonali sekondati ħadmu għall-Aġenzija fl-2019; |
12. |
Jinnota bi tħassib in-nuqqas ta' bilanċ bejn il-ġeneri rrappurtat fl-2019 fost il-maniġers superjuri, il-bord tat-tmexxija (50 raġel u 8 nisa) u l-persunal; jistieden lill-Aġenzija żżid l-isforz tagħha biex tikseb bilanċ bejn il-ġeneri fil-livelli kollha; jitlob lill-Kummissjoni u lill-Istati Membri jqisu l-importanza li jiġi żgurat bilanċ bejn il-ġeneri meta jinnominaw lill-membri tagħhom għall-bord tat-tmexxija tal-Aġenzija; |
13. |
Iħeġġeġ lill-Aġenzija timmira li tiżviluppa qafas ta' politika fit-tul dwar ir-riżorsi umani li jindirizza l-bilanċ bejn ix-xogħol u l-ħajja privata, il-gwida tul il-ħajja u l-iżvilupp tal-karriera, il-bilanċ bejn il-ġeneri, it-telexogħol, il-bilanċ ġeografiku kif ukoll ir-reklutaġġ u l-integrazzjoni ta' persuni b'diżabilità; |
14. |
Jinnota li, skont ir-rapport tal-Qorti, l-awditu tal-proċeduri ta' reklutaġġ wera li l-valutazzjoni tal-applikazzjonijiet skont il-kriterji ta' eliġibbiltà mhux dejjem kienet rigoruża biżżejjed, u f'każ wieħed wassal għat-trattament inugwali tal-kandidati; jinnota mir-risposta tal-Aġenzija li tirrikonoxxi l-osservazzjoni u timpenja ruħha li tiżgura li l-applikanti kollha jiġu ttrattati b'mod ugwali; |
15. |
Jinnota li l-ammont ta' xogħol tal-Aġenzija żdied b'mod sinifikanti matul is-snin u li l-għadd limitat ta' persunal għadu waħda mill-isfidi ewlenin għall-Aġenzija, kemm minn perspettiva ta' żmien qasir kif ukoll minn dik fit-tul; jinnota li l-Aġenzija stenniet li l-għadd ta' persunal jiżdied għal aktar minn 300 sa tmiem l-2020; jirrikonoxxi li ż-żieda fil-persunal hija soġġetta għal approvazzjoni mill-Parlament u mill-Kunsill, u li l-Aġenzija qed tipprova timmitiga l-impatt ta' dan l-għadd limitat ta' persunal permezz ta' riprijoritizzazzjoni tal-kompiti u reklutaġġ rapidu; jirrimarka li l-prattika attwali li l-persunal meħtieġ għall-implimentazzjoni ta' att legali jiġi rreklutat biss ladarba tali att legali jkun fis-seħħ tiddependi mill-persunal eżistenti għat-twettiq tal-miżuri ta' tħejjija għall-implimentazzjoni ta' tali att legali u tpoġġi piż żejjed fuq il-kapaċità tat-tim ewlieni tal-Aġenzija, u għaldaqstant jeżisti r-riskju li tolqot il-prestazzjoni tal-kompiti ta' kuljum tal-Aġenzija; jistieden lill-Kummissjoni tippermetti l-antiċipazzjoni ta' wħud mill-kuntratti tal-membri tal-persunal previsti fi proposta għal att legali sabiex l-Aġenzija tkun tista' tħejji ruħha b'mod effiċjenti għall-implimentazzjoni ta' tali att legali; |
16. |
Jinnota d-diffikultajiet li tħabbat wiċċha magħhom l-Aġenzija fir-reklutaġġ ta' persunal kwalifikat u ż-żamma ta' tali persunal għal perjodu itwal ta' żmien; jenfasizza r-rwol importanti li għandha f'din il-kwistjoni d-deċiżjoni annwali dwar il-koeffiċjent ta' korrezzjoni applikabbli għar-remunerazzjoni u l-pensjonijiet ta' uffiċjali u aġenti oħra tal-Unjoni; jissottolinja li l-koeffiċjenti ta' korrezzjoni jvarjaw b'mod sinifikanti minn Stat Membru għall-ieħor, li għandu impatt serju fuq kemm l-aġenziji li jinsabu fi Stati Membri b'koeffiċjenti ta' korrezzjoni aktar baxxi huma kapaċi jirreklutaw u jżommu l-persunal u l-għarfien espert; jistieden lill-Kummissjoni tikkunsidra l-possibbiltà li tistabbilixxi koeffiċjenti ta' korrezzjoni differenti bbażati fuq valutazzjoni reġjonali aktar milli nazzjonali; jenfasizza li l-kwartieri ġenerali tal-aġenziji li jinsabu fi Stati Membri b'koeffiċjenti ta' korrezzjoni aktar baxxi normalment jinsabu fi bliet kapitali fejn l-ispejjeż għall-għajxien u s-sussistenza huma wisq ogħla milli f'partijiet oħra tal-pajjiżi; |
17. |
Jinnota li fid-dawl tal-iskala u l-kumplessità tal-operazzjonijiet tagħha, l-Aġenzija ma tistax tevita li tuża kuntratturi privati u li l-Aġenzija tagħmel użu mis-servizzi ta' 96 fornitur estern tas-servizzi, apparti l-membri tal-persunal tal-kumpaniji kkuntrattati biex jappoġġaw lill-Aġenzija fit-tmexxija operattiva tas-sistemi eżistenti jew fl-iżvilupp ta' sistema ġodda; jinnota li fl-2019, l-Aġenzija talbet l-approvazzjoni għal aktar membri tal-persunal (17-il aġent kuntrattwali) iżda li l-Kummissjoni ma tatx tali approvazzjoni; jinnota li d-dipendenza minn kuntratturi privati tista' titnaqqas biss permezz ta' żieda sostanzjali ulterjuri tal-persunal fi ħdan l-Aġenzija lil hinn miċ-ċifri tat-tabella tal-persunal preżenti tagħha; |
18. |
Jinnota li l-Aġenzija adottat politika dwar il-ħarsien tad-dinjità tal-persuni u l-prevenzjoni tal-fastidju; jinnota li wara talba minn membru tal-persunal f'Ottubru 2018, l-Aġenzija fetħet inkjesta amministrattiva fl-2019 li tlestiet f'Settembru 2019 b'miżura dixxiplinarja; jirrikonxxi li nħareġ ilment kontra dik il-miżura dixxiplinarja u li l-Aġenzija wieġbet fit-3 ta' Awwissu 2020; jinnota li l-membru tal-persunal ikkonċernat ressaq kawża quddiem il-Qorti Ġenerali; jistieden lill-Aġenzija tirrapporta lill-awtorità ta' kwittanza sa Ġunju 2021 dwar il-progress li jkun sar u, jekk ikun applikabbli, dwar il-miżuri korrettivi meħuda wara deċiżjoni finali tal-Qorti Ġenerali; jinnota li abbażi tad-data mill-konsulenti kunfidenzjali, kien hemm disa' każijiet ta' fastidju rrappurtati matul l-2019 iżda l-ebda wieħed mill-każijiet ma wassal biex il-membri tal-persunal fittxew appoġġ permezz ta' proċeduri formali jew informali; |
Akkwist
19. |
Jinnota li skont ir-rapport tal-Qorti, pagament ta' EUR 284 000 relatat mal-forniment ta' "manutenzjoni korrettiva tal-funzjonament tajjeb tas-Sistema ta' Informazzjoni ta' Schengen' taħt kuntratt qafas (il-"kuntratt MWS") kien jirreferi għal perjodu ta' żmien mhux kopert mit-tul ta' żmien tal-kuntratt MWS, u b'riżultat ta' dan, ma kienx konformi mad-dispożizzjonijiet kuntrattwali; jinnota li skont it-tweġiba tal-Aġenzija, dik il-kostatazzjoni tittratta l-estensjoni tal-manutenzjoni korrettiva tas-Sistema ta' Informazzjoni ta' Schengen għal raġunijiet operattivi inevitabbli li diġà kienet inkluża f'rapport dwar il-kontijiet tal-Aġenzija għas-sena 2018, u li ma setgħetx tittieħed azzjoni korrettiva; |
20. |
Jinnota, fir-rigward tas-segwitu tal-kostatazzjonijiet tal-Qorti għas-sena preċedenti li l-formula ta' evalwazzjoni stipulata fl-ispeċifikazzjonijiet tal-offerta għall-kuntratt MWS kienet differenti minn dik ikkomunikata fid-dokument ta' mistoqsija u tweġiba għall-offerenti u li l-Aġenzija għandha ssaħħaħ il-kontrolli interni relatati mal-akkwist; jinnota li skont is-segwitu tal-Aġenzija, il-valutazzjoni expost ma tintużax bħala funzjoni fi ħdan il-proċess ta' akkwist minħabba n-nuqqas ta' riżorsi umani allokati iżda li l-Aġenzija ħadet passi bl-għan li jiġi mitigat ir-riskju enfasizzat fl-osservazzjoni permezz tat-tisħiħ tal-kapaċitajiet tal-ġestjoni tal-kuntratti u tal-bejjiegħa u r-riassenjament tal-persunal responsabbli għat-tħejjija u l-evalwazzjoni tal-offerta għal rwoli operattivi oħra; |
21. |
Jinnota, fir-rigward tas-segwitu tal-kostatazzjonijiet tal-Qorti għas-sena preċedenti, li l-Aġenzija żiedet il-prezzijiet ta' kuntratt qafas mingħajr ma emendatu u estendiet kuntratt speċifiku wieħed wara l-iskadenza tal-kuntratt qafas; jinnota li l-Aġenzija ħadet passi bil-għan li ssaħħaħ il-ġestjoni tal-kuntratti u tal-bejjiegħa; |
Prevenzjoni u ġestjoni tal-kunflitti ta' interess, etika u trasparenza
22. |
Jirrikonoxxi l-miżuri eżistenti u l-isforzi kontinwi tal-Aġenzija biex tiżgura t-trasparenza, il-prevenzjoni u l-ġestjoni tal-kunflitti ta' interess, u l-iżvelar ta' informazzjoni protetta; jinnota li l-Aġenzija għandha fis-seħħ regoli dwar il-prevenzjoni u l-ġestjoni tal-kunflitti ta' interess għall-membri tal-persunal; jinnota li fl-2019, l-Aġenzija organizzat sessjoni waħda ta' taħriġ dwar l-etika u l-integrità b'enfasi fuq l-iżvelar ta' informazzjoni protetta u l-frodi mogħtija minn rappreżentant tal-Uffiċju Ewropew Kontra l-Frodi (OLAF), żewġ sessjonijiet ta' taħriġ dwar l-etika u l-kodiċi ta' kondotta li koprew il-prevenzjoni tal-fastidju u l-iżvelar ta' informazzjoni protetta bl-involviment tal-counsellors kunfidenzjali tal-Aġenzija, u tliet sessjonijiet ta' taħriġ dwar il-ġestjoni tal-kunflitti ta' interess; jinnota li fl-2019 ġew sottomessi 106 dikjarazzjonijiet ta' interess minn membri tal-persunal maħtura bħala aġenti jew verifikaturi fiċ-ċirkwiti operattivi u finanzjarji u minn persuni ġodda, li 21 minnhom iddikjaraw interess, u li fil-każ ta' membru wieħed tal-persunal, ġie rakkomandat li ma jipparteċipax f'diversi azzjonijiet biex jikkonforma mar-regoli li jipprevjenu l-kunflitti ta' interess; jinnota li f'Ġunju 2020, il-bord tat-tmexxija kien mistenni jadotta regoli ġodda dwar il-kunflitti ta' interess li japplikaw għall-membri kollha tal-persunal tal-Aġenzija, inkluż il-maniġment superjuri tagħha; jistieden lill-Aġenzija tirrapporta lill-awtorità ta' kwittanza sa Ġunju 2021 dwar il-progress li jkun sar; |
23. |
Jenfasizza l-fatt li l-qafas etiku attwali li japplika għall-istituzzjonijiet u l-aġenziji tal-Unjoni jbati minn żvantaġġi konsiderevoli minħabba l-frammentazzjoni tiegħu u n-nuqqas ta' koordinament bejn id-dispożizzjonijiet eżistenti; jenfasizza li dawn il-kwistjonijiet għandhom jiġu indirizzati billi jiġi stabbilit qafas etiku komuni, li jiżgura l-applikazzjoni ta' standards etiċi għoljin mill-istituzzjonijiet u l-aġenziji kollha tal-Unjoni; |
24. |
Jissottolinja li ċerti uffiċjali jimlew dikjarazzjonijiet ta' nuqqas ta' kunflitti ta' interess u jipprovdu awtovalutazzjonijiet fir-rigward tar-rispett tal-istandards etiċi; jenfasizza, madankollu, li tali awtodikjarazzjonijiet u awtovalutazzjonijiet mhumiex biżżejjed u li għalhekk huwa meħtieġ skrutinju addizzjonali; |
25. |
Jinnota li, skont ir-risposta tal-Aġenzija, ma hemm l-ebda obbligu legali li s-CVs tal-membri tal-bord tat-tmexxija tagħha jiġu ppubblikati; jenfasizza, f'dak ir-rigward, li l-aġenziji tal-Unjoni għandhom jagħtu l-eżempju f'termini ta' trasparenza, u jistieden lill-membri tal-bord tat-tmexxija jippubblikaw is-CVs tagħhom fuq is-sit web tal-Aġenzija; jinnota li l-Aġenzija se tkompli tħeġġeġ lir-rappreżentanti tal-bord tat-tmexxija biex jipprovdu s-CVs tagħhom sabiex tiżdied it-trasparenza; jistieden lill-Aġenzija tirrapporta lill-awtorità ta' kwittanza sa Ġunju 2021 dwar il-progress li jkun sar; |
Kontrolli interni
26. |
Jinnota li s-servizz tal-awditjar intern, b'riżultat tal-awditu dwar ir-Reklutaġġ tal-Persunal, il-Ġestjoni u l-Ikkuntrattar tal-Fornituri ta' Servizzi Strutturali (SSPs) u l-Etika Organizzattiva", li sar fl-2019, ikkonkluda żewġ kwistjonijiet "importanti ħafna"; jinnota li l-Aġenzija se tistabbilixxi pjan ta' azzjoni li jindirizza r-rakkomandazzjonijiet; jistieden lill-Aġenzija tirrapporta lura lill-awtorità ta' kwittanza dwar l-implimentazzjoni tar-rakkomandazzjonijiet tal-awditjar; |
27. |
Jinnota, fid-dawl tal-kummenti u l-osservazzjonijiet mill-awtorità ta' kwittanza relatati ma' rakkomandazzjonijiet tal-awditjar li għadhom miftuħa li fi tmiem l-2019 ir-rata ta' implimentazzjoni tar-rakkomandazzjonijiet tal-awditjar kienet ta' 62 % (ġew implimentati 21 minn 34 rakkomandazzjoni); jinnota li b'kollox 32 rakkomandazzjoni kienu miftuħa fi tmiem l-2019, u minnhom, l-ebda waħda ma kienet "kritika"; jinnota li fl-2020, l-Aġenzija ħadet azzjonijiet sodi u urġenti bil-għan li tindirizza r-rakkomandazzjonijiet posposti, inkluż l-iffissar ta' dati ġodda għat-twettiq tal-miri; jistieden lill-Aġenzija tirrapporta lill-awtorità ta' kwittanza sa Ġunju 2021 dwar l-implimentazzjoni tar-rakkomandazzjonijiet tal-awditjar; |
28. |
Jinnota li l-Aġenzija adottat u użat il-qafas ta' kontroll intern rivedut kmieni fl-2019; |
29. |
Jisħaq fuq l-importanza li tiżdied id-diġitalizzazzjoni tal-Aġenzija f'termini ta' proċeduri ta' operazzjonijiet u ġestjoni interni; jisħaq fuq il-ħtieġa li l-Aġenzija tkompli tkun proattiva f'dan ir-rigward sabiex jiġi evitat akkost ta' kollox distakk diġitali bejn l-aġenziji; jiġbed l-attenzjoni, madankollu, għall-ħtieġa li jittieħdu l-miżuri ta' sigurtà kollha meħtieġa biex jiġi evitat kwalunkwe riskju għas-sigurtà online tal-informazzjoni pproċessata mill-Aġenzija; |
30. |
Jinnota l-isforzi li saru biex jiżdiedu ċ-ċibersigurtà u l-protezzjoni tad-data tal-Aġenzija; |
Kummenti oħra
31. |
Jinnota li b'antiċipazzjoni tal-ħruġ tar-Renju Unit mill-Unjoni, l-Aġenzija għamlet it-tħejjijiet kollha meħtieġa biex twettaq l-iskonnessjoni tar-Renju Unit u t-tħassir possibbli tad-data tar-Renju Unit mis-Sistema ta' Informazzjoni ta' Schengen u mill-Bażi tad-Data Ewropea tad-Dattiloskopija tal-Ażil kif u meta jkun meħtieġ mill-qafas legali; jinnota li l-Aġenzija għamlet it-tħejjijiet meħtieġa għall-applikazzjoni tad-dispożizzjonijiet tal-Ftehim dwar il-ħruġ tar-Renju Unit tal-Gran Brittanja u l-Irlanda ta' Fuq mill-Unjoni Ewropea u mill-Komunità Ewropea tal-Enerġija Atomika (3) u l-linji gwida rispettivi tal-Kummissjoni rigward il-parteċipazzjoni tar-Renju Unit fil-korpi ta' governanza tal-Aġenzija, il-ġestjoni tar-riżorsi umani, ir-rapporti tal-istatistika u kwistjonijiet rilevanti oħra; |
32. |
Jilqa' l-preżenza attiva online tal-Aġenzija fl-2019; iħeġġeġ lill-Aġenzija tkompli tippromwovi l-ħidma, ir-riċerka u l-attivitajiet tagħha biex iżżid il-viżibbiltà pubblika tagħha; |
33. |
Jirreferi, rigward kummenti oħrajn ta' natura orizzontali li jakkumpanjaw id-deċiżjoni tiegħu dwar il-kwittanza, għar-riżoluzzjoni tiegħu tad-29 ta’ April 2021 (4) dwar il-prestazzjoni, il-ġestjoni finanzjarja u l-kontroll tal-aġenziji. |
(1) ĠU C 107, 31.3.2020, p. 172.
(2) Ir-Regolament (UE) 2018/1726 tal-Parlament Ewropew u tal-Kunsill tal-14 ta' Novembru 2018 dwar l-Aġenzija tal-Unjoni Ewropea għat-Tmexxija Operattiva ta' Sistemi tal-IT fuq Skala Kbira fl-Ispazju ta' Libertà, Sigurtà u Ġustizzja (eu-LISA), u li jemenda r-Regolament (KE) Nru 1987/2006 u d-Deċiżjoni tal-Kunsill 2007/533/ĠAI u li jħassar ir-Regolament (UE) Nru 1077/2011 (ĠU L 295, 21.11.2018, p. 99).
(4) Testi adottati, P9_TA(2021)0215.