This document is an excerpt from the EUR-Lex website
Document 52020PC0706
Proposal for a COUNCIL DECISION on the position to be adopted, on behalf of the European Union, within the EEA Joint Committee concerning an amendment to Annex IV (Energy) to the EEA Agreement [32016R1719 - Guideline on forward capacity allocation "FCA"]
Togra le haghaidh CINNEADH ÓN gCOMHAIRLE maidir leis an seasamh atá le glacadh, thar ceann an Aontais Eorpaigh, laistigh de Chomhchoiste LEE i ndáil le leasú ar Iarscríbhinn IV (Fuinneamh) a ghabhann le Comhaontú LEE [32016R1719 - Treoirlíne maidir le leithdháileadh acmhainne fadtréimhseach “FCA”]
Togra le haghaidh CINNEADH ÓN gCOMHAIRLE maidir leis an seasamh atá le glacadh, thar ceann an Aontais Eorpaigh, laistigh de Chomhchoiste LEE i ndáil le leasú ar Iarscríbhinn IV (Fuinneamh) a ghabhann le Comhaontú LEE [32016R1719 - Treoirlíne maidir le leithdháileadh acmhainne fadtréimhseach “FCA”]
COM/2020/706 final
AN COIMISIÚN EORPACH
An Bhruiséil,12.11.2020
COM(2020) 706 final
2020/0316(NLE)
Togra le haghaidh
CINNEADH ÓN gCOMHAIRLE
maidir leis an seasamh atá le glacadh, thar ceann an Aontais Eorpaigh, laistigh de Chomhchoiste LEE i ndáil le leasú ar Iarscríbhinn IV (Fuinneamh) a ghabhann le Comhaontú LEE
[32016R1719 - Treoirlíne maidir le leithdháileadh acmhainne fadtréimhseach “FCA”]
(Téacs atá ábhartha maidir le LEE)
MEABHRÁN MÍNIÚCHÁIN
1.COMHTHÉACS AN TOGRA
•Forais agus cuspóirí an togra
Is é is aidhm don Dréachtchinneadh ó Chomhchoiste LEE (atá i gceangal leis an gCinneadh ón gComhairle atá beartaithe) Iarscríbhinn IV (Fuinneamh) a ghabhann le Comhaontú LEE a leasú chun Rialachán (AE) 2016/1719 ón gCoimisiún an 26 Meán Fómhair 2016 lena mbunaítear treoirlíne maidir le leithdháileadh acmhainne fadtréimhseach 1 a ionchorprú i gComhaontú LEE.
Le cóid agus treoirlínte an ghréasáin leictreachais, rudaí a leagadh síos ar bhonn an 3ú Pacáiste Fuinnimh, leagtar amach rialacha teicniúla chun trádáil laistigh de mhargadh inmheánach leictreachais an Aontais Eorpaigh a éascú. Tá margadh fuinnimh inmheánach idirnasctha agus lánfheidhmiúil ríthábhachtach maidir leis na cuspóirí a bhaineann le slándáil an tsoláthair, le hiomaíochas a mhéadú agus lena áirithiú go bhféadfaidh gach tomhaltóir fuinneamh a cheannach ar phraghsanna inacmhainne. Bunaíodh idirnaisc leictreachais suntasacha idir an Iorua, mar Stát de chuid CSTE agus LEE, agus Ballstáit an Aontais Eorpaigh. Tá sé ríthábhachtach, dá bhrí sin go leathnaítear na rialacha teicniúla is infheidhme ar thrádáil laistigh de mhargadh inmheánach leictreachais an Aontais Eorpaigh chun LEE a chumhdach chun aonchineálacht dhlíthiúil mar bhonn le trádáil leictreachais a áirithiú.
Le Rialachán (AE) 2016/1719 ón gCoimisiún leagtar síos rialacha maidir le leithdháileadh acmhainneachta thar chriosanna tairisceana i réamh‑mhargaí. Leis an Rialachán sin bunaítear modheolaíocht choiteann chun acmhainneacht fhadtéarmach thar chriosanna tairisceana a chinneadh agus bunaítear ardán aonair ar leibhéal na hEorpa chun cearta a thairiscint maidir le tarchur leictreachais mar aon leis an deis na cearta sin a thabhairt ar ais agus iad a aistriú idir rannpháirtithe sa mhargadh. Tá feidhm aige maidir le gach oibreoir córais tarchurtha, cé is moite díobh siúd atá ar oileáin nach bhfuil nasctha le córas eile.
Leis na hoiriúnaithe atá le fáil sa dréacht den Chinneadh ó Chomhchoiste LEE atá i gceangal, téitear thar an méid ar féidir a mheas mar oiriúnuithe teicniúla de réir Rialachán Uimh. 2894/94 ón gComhairle. Is í an Chomhairle, dá bhrí sin, a bhunóidh seasamh an Aontais.
•Comhsheasmhacht le forálacha beartais atá sa réimse beartais cheana
Leis an Dréachtchinneadh ó Chomhchoiste LEE atá i gceangal, leathnaítear beartais de chuid an Aontais Eorpaigh chun na Stáit de chuid CSTE agus LEE (an Iorua, an Íoslainn agus Lichtinstéin) a chumhdach.
•Comhsheasmhacht le beartais eile de chuid an Aontais
Is i gcomhréir le cuspóirí agus prionsabail Chomhaontú LEE a dhéantar leathnú acquis an Aontais Eorpaigh chun Stáit CSTE LEE a chumhdach, tríd an acquis a ionchorprú i gComhaontú LEE, agus is é is aidhm dó sin Limistéar Eorpach Eacnamaíoch dinimiciúil aonchineálach a bhunú, atá bunaithe ar rialacha coiteanna agus ar choinníollacha comhionannais san iomaíocht.
2.BUNÚS DLÍ, COIMHDEACHT AGUS COMHRÉIREACHT
•Bunús dlí
Tá an reachtaíocht atá le hionchorprú i gComhaontú LEE bunaithe ar Airteagal 194 den Chonradh ar Fheidhmiú an Aontais Eorpaigh.
In Airteagal 1(3) de Rialachán (CE) Uimh. 2894/94 ón gComhairle 2 a bhaineann le socruithe le haghaidh chur chun feidhme Chomhaontú LEE, foráiltear gurb í an Chomhairle a chinneann, ar thogra ón gCoimisiún, an seasamh atá le glacadh thar ceann an Aontais maidir le Cinntí den chineál sin.
•Coimhdeacht (maidir le hinniúlacht neamheisiach)
Comhlíonann an togra prionsabal na coimhdeachta ar an gcúis seo a leanas:
Is é is cuspóir don togra seo aonchineálacht an Mhargaidh Inmheánaigh a áirithiú agus ós rud é nach féidir leis na Ballstáit féin an cuspóir sin a ghnóthú go leordhóthanach, is fearr, de bharr na n‑éifeachtaí, é a ghnóthú ar leibhéal an Aontais.
•Comhréireacht
I gcomhréir le prionsabal na comhréireachta, ní théann an togra seo thar a bhfuil riachtanach chun a chuspóir a ghnóthú.
•An rogha ionstraime
I gcomhréir le hAirteagal 98 de Chomhaontú LEE, is é an cinneadh ó Chomhchoiste LEE an ionstraim a roghnaíodh. Áiritheoidh Comhchoiste LEE cur chun feidhme agus oibriú éifeachtach Chomhaontú LEE. Chuige sin, glacfaidh sé cinntí sna cásanna dá bhforáiltear i gComhaontú LEE.
3.TORTHAÍ Ó MHEASTÓIREACHTAÍ EX POST, Ó CHOMHAIRLIÚCHÁIN LEIS NA PÁIRTITHE LEASMHARA AGUS Ó MHEASÚNUITHE TIONCHAIR
•Meastóireachtaí ex post/seiceálacha oiriúnachta ar an reachtaíocht atá ann cheana
Neamhbhainteach.
4.IMPLEACHTAÍ BUISÉADACHA
Níltear ag súil le haon impleachtaí buiséadacha de bharr ionchorprú an Rialacháin thuasluaite i gComhaontú LEE.
5.EILIMINTÍ EILE
•Míniúchán mionsonraithe ar fhorálacha sonracha an togra
Oiriúnú (a) – níl feidhm acu i ndáil leis an Íoslainn agus le Lichtinstéin
Toisc nach bhfuil córas tarchurtha na hÍoslainne nasctha le córais tarchurtha eile, níor cheart, dá bhrí sin, feidhm a bheith ag Rialachán (AE) 2016/1719 ón gCoimisiún maidir leis an Íoslainn.
Níor cheart feidhm a bheith ag Rialachán (AE) 2016/1719 ón gCoimisiún maidir le Lichtinstéin, óir de bharr a laghad agus líon teoranta na dtomhaltóirí leictreachais, níl gréasán tarchurtha leictreachais dá chuid féin ag Lichtinstéin.
Oiriúnú (b) agus aithris (6) – faisnéis íogair faoin gcóras leictreachais
I Rialachán (AE) 2016/1719 ón gCoimisiún, tá forálacha lena leagtar amach oibleagáidí chun faisnéis a chur ar fáil do Líonra Eorpach d'Oibreoirí Córais Tarchurtha Leictreachais (ENTSO-E) agus don Ghníomhaireacht um Chomhar idir Rialálaithe Fuinnimh (ACER). Is féidir le hOibreoirí Córais Tarchurtha agus Rialtóirí faoi seach faisnéis den sórt sin a mhalartú agus an fhaisnéis sin a chosaint a bhuí le hOiriúnú (b).
Oiriúnú (c) agus aithris (7) – tagairt do chearta rannpháirtíochta Oibreoirí Córais Tarchurtha na hIorua, Oibreoir Ainmnithe Margaidh Leictreachais agus an tÚdarás Rialála Náisiúnta ó thaobh téarmaí, coinníollacha agus modheolaíochtaí a fhorbairt agus iad a fhormheas
Leis an oiriúnú agus an aithris dá dtagraítear thuas, déantar oiriúnú ar fhorálacha ábhartha d'Airteagal 4 de Rialachán (AE) 2016/1719 ón gCoimisiún maidir le cearta rannpháirtíochta eintiteas ábhartha i bhforbairt agus i bhformheas téarmaí, coinníollacha agus modheolaíochtaí chun an Iorua a chur san áireamh.
2020/0316 (NLE)
Togra le haghaidh
CINNEADH ÓN gCOMHAIRLE
maidir leis an seasamh atá le glacadh, thar ceann an Aontais Eorpaigh, laistigh de Chomhchoiste LEE i ndáil le leasú ar Iarscríbhinn IV (Fuinneamh) a ghabhann le Comhaontú LEE
[32016R1719 - Treoirlíne maidir le leithdháileadh acmhainne fadtréimhseach “FCA”]
(Téacs atá ábhartha maidir le LEE)
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 194 i gcomhar le hAirteagal 218(9) de,
Ag féachaint don Rialachán ón gComhairle (CE) Uimh. 2894/94 an 28 Samhain 1994 a bhaineann le socruithe le haghaidh chur chun feidhme an Chomhaontaithe ar an Limistéar Eorpach Eacnamaíoch 3 , agus go háirithe Airteagal 1(3) de,
Ag féachaint don togra ón gCoimisiún Eorpach,
De bharr an mhéid seo a leanas:
(1)Tháinig an Comhaontú ar an Limistéar Eorpach Eacnamaíoch 4 ('Comhaontú LEE') i bhfeidhm an 1 Eanáir 1994.
(2)De bhun Airteagal 98 de Chomhaontú LEE, féadfaidh Comhchoiste LEE a chinneadh Iarscríbhinn IV a ghabhann le Comhaontú LEE, inter alia, a leasú.
(3)Tá Rialachán (AE) 2016/1719 ón gCoimisiún an 26 Meán Fómhair 2016 lena mbunaítear treoirlíne maidir le leithdháileadh acmhainne fadtréimhseach 5 le hionchorprú i gComhaontú LEE.
(4)Ba cheart Iarscríbhinn IV a ghabhann le Comhaontú LEE a leasú dá réir sin.
(5)Ba cheart, dá bhrí sin, seasamh an Aontais laistigh de Chomhchoiste LEE a bheith bunaithe ar an dréachtchinneadh atá i gceangal,
TAR ÉIS AN CINNEADH SEO A GHLACADH:
Airteagal 1
Maidir leis an seasamh atá le glacadh, thar ceann an Aontais, laistigh de Chomhchoiste LEE i ndáil leis an leasú atá beartaithe ar Iarscríbhinn IV (Fuinneamh) a ghabhann le Comhaontú LEE, bunófar an seasamh sin ar na dréachtchinntí ó Chomhchoiste LEE atá ceangailte leis an gCinneadh seo.
Airteagal 2
Tiocfaidh an Cinneadh seo i bhfeidhm ar dháta a ghlactha.
Arna dhéanamh sa Bhruiséil,
Thar ceann na Comhairle
An tUachtarán
AN COIMISIÚN EORPACH
An Bhruiséil,12.11.2020
COM(2020) 706 final
IARSCRÍBHINN
a ghabhann leis an
Togra le haghaidh Cinneadh ón gComhairle
maidir leis an seasamh atá le glacadh, thar ceann an Aontais Eorpaigh, laistigh de Chomhchoiste LEE i ndáil le leasú ar Iarscríbhinn IV (Fuinneamh) a ghabhann le Comhaontú LEE
[32016R1719 - Treoirlíne maidir le leithdháileadh acmhainne fadtréimhseach “FCA”]
IARSCRÍBHINN
CINNEADH Ó CHOMHCHOISTE LEE
Uimh. […]
an […]
lena leasaítear Iarscríbhinn IV (Fuinneamh) a ghabhann le Comhaontú LEE
TÁ COMHCHOISTE LEE,
Ag féachaint don Chomhaontú ar an Limistéar Eorpach Eacnamaíoch (“Comhaontú LEE”), agus go háirithe Airteagal 98 de,
De bharr an mhéid seo a leanas:
(1)Tá Rialachán (AE) 2016/1719 ón gCoimisiún an 26 Meán Fómhair 2016 lena mbunaítear treoirlíne maidir le leithdháileadh acmhainne fadtréimhseach 1 le hionchorprú i gComhaontú LEE.
(2)Níl feidhm ag Rialachán (AE) 2016/1719 ón gCoimisiún maidir le córais tarchurtha ar oileáin nach bhfuil nasctha le córais tarchurtha eile trí idirnaisc.
(3)Toisc nach bhfuil córas tarchurtha na hÍoslainne nasctha le córas tarchurtha eile, níor cheart feidhm a bheith ag Rialachán (AE) 2016/1719 ón gCoimisiún maidir leis an Íoslainn.
(4)Níl gréasán tarchurtha leictreachais dá chuid féin ag Lichtinstéin de bharr a laghad agus líon teoranta na dtomhaltóirí leictreachais. Níor cheart, dá bhrí sin, feidhm a bheith ag Rialachán (AE) 2016/1719 ón gCoimisiún maidir le Lichtinstéin.
(5)Le tagairtí d'Oibreoirí Córais Tarchurtha, Oibreoirí Ainmnithe Margaidh Leictreachais, údaráis rialála agus páirtithe leasmhara, ba cheart a thuiscint go gcuimsítear an tOibreoir Córais Tarchurtha, Oibreoirí Ainmnithe Margaidh Leictreachais, údaráis rialála agus páirtithe leasmhara a dhéanann ionadaíocht ar an Iorua.
(6)Nuair atáthar ag forbairt téarmaí, coinníollacha agus modheolaíochtaí go gcomhpháirteach de bhun Rialachán (AE) Uimh. 2016/1719 ón gCoimisiún, tá sé ríthábhachtach go gcuirtear isteach an fhaisnéis riachtanach ar fad gan mhoill. Le dlúthchomhar idir Oibreoirí Córais Tarchurtha agus rialtóirí, ba cheart a áirithiú go gcosnaítear go héifeachtach faisnéis íogair i bpróiseas forbartha téarmaí, coinníollacha agus modheolaíochtaí, is é sin faisnéis amhail faisnéis mhionsonraithe faoi fhostáisiúin leictreachais, suíomh beacht tarchuir faoi thalamh, faisnéis faoi chórais rialúcháin agus faoi anailís leochaileachta mhionsonraithe ar féidir úsáid a bhaint aisti chun críocha na sabaitéireachta. Chun cur chun feidhme éifeachtach an Rialacháin seo a áirithiú, ba cheart an leibhéal céanna comhair maidir le malartú faisnéise agus cosaint faisnéise íogaire a bhunú i gcomhar leis an Iorua.
(7)Tá ionchur ó na príomhpháirtithe leasmhara i bhforbairt téarmaí, coinníollacha agus modheolaíochtaí do réigiúin nó do LEE ina iomláine, a d'fhéadfadh teacht chun a bheith ceangailteach trí fhormheas rialála, ríthábhachtach le haghaidh creat rialála trasteorann éifeachtach. Ba cheart, dá bhrí sin, d'Oibreoirí Córais Tarchurtha agus páirtithe leasmhara eile a bheith rannpháirteach sna próisis chun téarmaí, coinníollacha agus modheolaíochtaí a fhorbairt mar a leagtar amach i bhforálacha éagsúla an Rialacháin seo. Ba cheart d'Oibreoirí Córais Tarchurtha agus Oibreoirí Ainmnithe Margaidh Leictreachais de chuid na hIorua a bheith rannpháirteach i gcinnteoireacht na bpáirtithe leasmhara ar bhealach atá cosúil le hOibreoirí Chóras Tarchurtha agus le hOibreoirí Ainmnithe Margaidh Leictreachais a dhéanann ionadaíocht ar Bhallstát an Aontais Eorpaigh.
(8)Maidir le tograí réigiúnacha nó tograí uile-AE, i gcás ina n‑éilítear cinneadh ó níos mó ná údarás rialála amháin chun tograí ó Oibreoirí Córais Tarchurtha a fhormheas, ba cheart d'údaráis rialála comhairliúchán agus dlúthchomhar a dhéanamh le chéile chun teacht ar chomhaontú sula nglacfaidh na húdaráis rialála cinneadh. Ba cheart d'údarás rialála na hIorua a bheith páirteach sa chomhar sin.
(9)De bharr gur glacadh an Rialachán seo ar bhonn Rialachán (CE) Uimh. 714/2009 ó Pharlaimint na hEorpa agus ón gComhairle an 13 Iúil 2009 maidir le coinníollacha le haghaidh rochtain ar an ngréasán do mhalartú trasteorann leictreachais agus lena n‑aisghairtear Rialachán (CE) Uimh. 1228/2003 2 , agus maidir leis na téacsanna oiriúnúcháin a ullmhaíodh agus a glacadh faoi Chinneadh Uimh. 93/2017 ó Chomhchoiste LEE an 5 Bealtaine 2017 3 maidir le cur chun feidhme Rialachán Uimh. 714/2009, go háirithe forálacha in Airteagal 1 (1) agus (5) de, lena bhforáiltear maidir le hoiriúnuithe a bhaineann le ról na Gníomhaireachta um Chomhar idir Rialálaithe Fuinnimh i gcomhthéacs LEE, tá na téacsanna sin ábhartha le haghaidh chur i bhfeidhm an Rialacháin in LEE, go háirithe Airteagal 4 (8) agus (10).
(10)Ba cheart Iarscríbhinn IV a ghabhann le Comhaontú LEE a leasú dá réir sin,
TAR ÉIS AN CINNEADH SEO A GHLACADH:
Airteagal 1
Cuirtear an méid seo a leanas isteach i ndiaidh phointe 49 (Rialachán (AE) 2015/1222 ón gCoimisiún) d'Iarscríbhinn IV a ghabhann le Comhaontú LEE:
‘50. 32016 R 1719: Rialachán (AE) 2016/1719 ón gCoimisiún an 26 Meán Fómhair 2016 lena mbunaítear treoirlíne maidir le leithdháileadh acmhainne fadtréimhseach (IO L 259, 27.9.2016, lch. 42).
Léifear forálacha an Rialacháin, chun críocha an Chomhaontaithe sin, leis na hoiriúnuithe seo a leanas:
(a)Ní bheidh feidhm ag an Rialachán seo maidir leis an Íoslainn agus le Lichtinstéin.
(b)Cuirfear an méid seo a leanas le hAirteagal 7:
“Féadfaidh comhaontuithe idir Oibreoirí Córais Tarchurtha agus/nó Rialtóirí a áirithiú go gcosnaítear faisnéis rúnda agus íogair go héifeachtach agus go gcuidítear lena chinntiú go gcuirtear isteach gan mhoill an fhaisnéis ar fad is gá chun téarmaí, coinníollacha agus modheolaíochtaí coiteanna a fhorbairt”.
(c)In Airteagal 4:
(i) Tuigfear le gach tagairt do “dhaonra an Aontais” in Airteagal 4(2)(b), do “dhaonra an réigiúin lena mbaineann” agus do “dhaonra na mBallstát rannpháirteach” in Airteagal 4(3)(b), go bhfuil daonra na hIorua san áireamh agus cinneadh á dhéanamh ar baineadh amach tairseach an daonra ábhartha le haghaidh tromlach cáilithe a bhaint amach.
(ii) Léifear gach tagairt do “réigiúin ina bhfuil níos mó ná cúig Bhallstát” agus do “réigiúin ina bhfuil cúig Bhallstát nó níos lú” in Airteagal 4(3) mar “réigiúin ina bhfuil níos mó ná ceithre Bhallstát de chuid an Aontais agus an Iorua” nó mar “réigiúin ina bhfuil ceithre Bhallstát de chuid an Aontais agus an Iorua nó níos lú”.
Airteagal 2
Is téacsanna barántúla iad téacsanna Rialachán (AE) 2016/1719 san Íoslainnis agus san Ioruais, atá le foilsiú i bhForlíonadh LEE d'Iris Oifigiúil an Aontais Eorpaigh.
Airteagal 3
Tiocfaidh an Cinneadh seo i bhfeidhm an […], nó ar an lá tar éis an fhógra dheireanaigh chuig Comhchoiste LEE faoi Airteagal 103(1) de Chomhaontú LEE 4*, cibé acu dáta is déanaí.
Airteagal 4
Foilseofar an Cinneadh seo i Roinn LEE, agus i bhForlíonadh LEE, d'Iris Oifigiúil an Aontais Eorpaigh.
Arna dhéanamh sa Bhruiséil, […].
Thar ceann Chomhchoiste LEE
An tUachtarán
[…]
Rúnaithe
Chomhchoiste LEE
[…]