52013PC0250

MEABHRÁN MÍNIÚCHÁIN

1.           COMHTHÉACS AN TOGRA

Is Páirtí Conarthach é an tAontas sa Choinbhinsiún Idirnáisiúnta um Thuinníní Atlantacha a Chaomhnú ("an Coinbhinsiún" anseo feasta). Is é an tuinnín gorm an speiceas is tábhachtaí ag an gCoimisiún Idirnáisiúnta um Thuinníní Atlantacha a Chaomhnú ("ICCAT" anseo feasta) agus is é an t-aon speiceas faoi láthair atá faoi réir plean téarnaimh ilbhliantúil.  Baineann an trasuí seo le forálacha criticiúla sa phlean téarnaimh a pléadh go forleathan agus a glacadh ag Cruinniú Bliantúil ICCAT i Samhain 2012 faoi Mholadh 12 ‑ 03.

Ag a 16ú Cruinniú Speisialta in 2008, ghlac ICCAT, arna bhunú ag an gCoinbhinsiún, Moladh 08-05 chun plean téarnaimh nua do thuinníní gorma san Atlantach Thoir agus sa Mheánmhuir a bhunú, a chuirfí in ionad an iarphlean téarnaimh a glacadh in 2006. In oirchill theacht in éifeacht Mholadh 08-05, glacadh Rialachán (CE) Uimh. 302/2009 ón gComhairle[1].

Ag a 17ú Cruinniú Speisialta in 2010, ghlac ICCAT Moladh 10-04 lena leasaítear an plean téarnaimh ilbhliantúil do thuinníní gorma. Chun an stoc a athbhunú, foráiltear le Moladh 10‑04 go ndéanfaí an ghabháil iomlán is incheadaithe a laghdú tuilleadh, go neartófaí na bearta chun an cumas iascaireachta a laghdú agus go dtreiseofaí na bearta rialaithe, go háirithe maidir leis na hoibríochtaí aistrithe agus maidir le cur i gcaighean tuinníní, agus foráiltear go dtabharfadh an Buanchoiste um Thaighde agus um Staidreamh (SCRS) comhairle bhreise in 2012 maidir le láithreacha sceite a aithint agus tearmainn a chruthú.

Ag a Chruinniú Speisialta in 2012, ghlac ICCAT Moladh 12-03 lena leasaítear an plean téarnaimh ilbhliantúil do thuinníní gorma. D'fhonn na séasúir iascaireachta a chur in oiriúint ar bhonn níos fearr do ghníomhaíochtaí an chabhlaigh, le Moladh 12‑03 déantar foráil maidir le modhnú ar na séasúir iascaireachta ''oscailte'' atá éagsúil leis na séasúir iascaireachta ''dhúnta'' a leagtar amach in Airteagal 7 de Rialachán (CE) Uimh. 302/2009 ón gComhairle arna leasú ag Airteagal 1(6) de Rialachán (AE) Uimh. 500/2012[2]. Ina theannta sin, tá modhnú déanta ar na dátaí is féidir le soithí peas-saighneoireachta, báid bhaoite agus báid trálála iascaireacht a dhéanamh. Ar deireadh, ionas nach mbeadh aon neamhchinnteacht ann i leith na dtrealamh nach bhfuil faoi réir aon rialacha sonracha maidir leis an séasúr iascaireachta, ba ghá foráil a áireamh a thabharfadh cead go sainráiteach do gach trealamh eile iascaireacht a dhéanamh ó cheann ceann na bliana.

Bhí roinnt agóidí ó Pháirtithe Conarthacha in ICCAT, áfach, i gcoinne an mholta sin, rud a chuir moill lena theacht i bhfeidhm, nach dtarlóidh anois go Lúnasa 2013 de réir cosúlachta. Bhain na hagóidí sin le leithdháileadh na TACanna, áfach, agus ní leis na séasúir iascaireachta. Ina theannta sin, ag cruinniú idirsheisiúnach a reáchtáladh le déanaí in Sevilla (18-20 Feabhra 2013), chuir roinnt Páirtithe Conarthacha in ICCAT in iúl go raibh sé ar intinn acu forálacha Mholadh 12-03 a chur chun feidhme, lena n‑áirítear an séasúr nua iascaireachta i gcomhair soithí peas-saighneoireachta (an 26 Bealtaine go dtí an 24 Meitheamh), mar atá leagtha síos i mír 22 den Mholadh.

Maidir le séasúr iascaireachta 2013, le Rialachán (AE) Uimh. 40/2013 ón gComhairle[3] lena socraítear do 2013 na deiseanna iascaireachta a bheidh ar fáil in uiscí an AE agus, do shoithí an AE, in uiscí nach bhfuil san AE maidir le stoic áirithe éisc agus grúpaí stoic éisc atá faoi réir caibidlíochta agus comhaontuithe idirnáisiúnta, tá sé socraithe cheana féin ag an gComhairle go mairfidh an séasúr do shoithí peas-saighneoireachta ón 26 Bealtaine 2013 go dtí an 24 Meitheamh 2013, chun go leor ama le haghaidh pleanála a thabhairt do Bhallstáit. Sa Rialachán sin díríodh ar shéasúr iascaireachta do na soithí peas-saighneoireachta amháin mar gheall ar thráth na bliana i gceist agus mar gheall ar a thábhachtaí atá an trealamh sin de dheasca a chumais níos mó gabhála agus mar gheall ar iarchásanna neamh-chomhlíonta.

Chun caomhnú éifeachtach stoc na dtuinníní gorma a áirithiú trína áirithiú go gcloítear leis na séasúir iascaireachta nua sin agus trí ghníomhaíochtaí forghníomhaithe a éascú, agus chun deimhneacht dhlíthiúil a sholáthar i leith na séasúr iascaireachta i gceist, ní foláir an fhoráil maidir le séasúir iascaireachta a mhodhnú i Rialachán (CE) Uimh. 302/2009 ón gComhairle go dtí go gcuirfear Moladh 12‑03 chun feidhme ar bhonn cuimsitheach agus go dtiocfaidh sé i bhfeidhm.

Mar gheall ar na cúiseanna sin agus chun deis a thabhairt do Bhallstáit a bpleananna iascaireachta, cumais agus iniúchta atá ceangailte leis na séasúir iascaireachta a shainiú mar aon lena n-oibleagáidí tuairiscithe a chomhlíonadh, ní foláir an fhoráil sin a mhodhnú a luaithe agus is féidir agus na modhnuithe sin a chur i bhfeidhm le héifeacht chúlghabhálach ón 1 Eanáir 2013.

Ba chóir mar sin Rialachán (CE) Uimh. 302/2009 a leasú dá réir.

2.           TORTHAÍ AN CHOMHAIRLIÚCHÁIN LEIS NA PÁIRTITHE LEASMHARA AGUS MEASÚNUITHE TIONCHAIR

Chuathas i gcomhairle le Ballstáit lena mbaineann an cineál iascaireachta seo (CY, ES, FR, EL, IT, MT agus PT) ag an nGrúpa Stiúrtha don Chomhphlean Imscartha maidir le tuinníní gorma a reáchtáladh i gCeannáras na Gníomhaireachta Eorpaí um Rialú ar Iascach in Vigo an 11 Nollaig 2012, áit ar pléadh an gá a bhí le dátaí an tséasúir iascaireachta a shoiléiriú. D'aontaigh siad uile na dátaí a shocrú mar a leagadh síos i míreanna 21 go 26 de Mholadh 12‑03 ó ICCAT lena leasaítear an moladh ó ICCAT chun plean téarnaimh ilbhliantúil do thuinníní gorma san Atlantach Thoir agus sa Mheánmhuir a chur ar bun.

3.           EILIMINTÍ DLÍ AN TOGRA

Tá sé mar aidhm ag an Togra moladh a thrasuí isteach i ndlí an AE ar moladh é a glacadh faoi chuimsiú ICCAT trí leasú ar Rialachán (CE) Uimh. 302/2009 ón gComhairle maidir leis na séasúir iascaireachta do threalaimh ar thóir tuinníní gorma. Is gá sin toisc raon feidhme teoranta an togra d'fhonn a áirithiú go nglacfar go mear an Rialachán sula dtosaíonn séasúr iascaireachta 2013.

2013/0133 (COD)

Togra le haghaidh

RIALACHÁIN Ó PHARLAIMINT NA hEORPA AGUS ÓN gCOMHAIRLE

lena leasaítear Rialachán (CE) Uimh. 302/2009 ón gComhairle maidir le plean téarnaimh ilbhliantúil do thuinníní gorma san Atlantach Thoir agus sa Mheánmhuir

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 43 (2) de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na parlaimintí náisiúnta,

Ag féachaint don tuairim ó Choiste Eacnamaíoch agus Sóisialta na hEorpa[4],

Ag gníomhú dóibh i gcomhréir leis an ngnáthnós imeachta reachtach,

De bharr an méid seo a leanas:

(1)       Is Páirtí é an tAontas sa Choinbhinsiún Idirnáisiúnta um Thuinníní Atlantacha a Chaomhnú ("an Coinbhinsiún" anseo feasta).

(2)       Ag a 16ú Cruinniú Speisialta in 2008, ghlac an Coimisiún Idirnáisiúnta um Thuinníní Atlantacha a Chaomhnú ("ICCAT" anseo feasta), arna bhunú ag an gCoinbhinsiún, Moladh 08-05 chun plean téarnaimh nua do thuinníní gorma san Atlantach Thoir agus sa Mheánmhuir a bhunú, a chuirfí in ionad an iarphlean téarnaimh a glacadh in 2006. Glacadh Rialachán (CE) Uimh. 302/2009[5] chun na bearta idirnáisiúnta caomhnaithe sin a chur chun feidhme ar leibhéal an Aontais.

(3)       Ag a 17ú Cruinniú Speisialta in 2010, ghlac ICCAT Moladh 10-04 lena leasaítear an plean téarnaimh ilbhliantúil do thuinníní gorma. Leasaíodh Rialachán (CE) Uimh. 302/2009 le Rialachán (AE) Uimh. 500/2012[6] chun na bearta idirnáisiúnta caomhnaithe leasaithe sin a chur chun feidhme ar leibhéal an Aontais.

(4)       Ag a 18ú Cruinniú Speisialta in 2012, ghlac ICCAT Moladh 12-03 lena leasaítear tuilleadh an plean téarnaimh ilbhliantúil do thuinníní gorma. Chun na séasúir iascaireachta a chur in oiriúint níos fearr do ghníomhaíochtaí na gcabhlach, foráiltear do mhodhnú ar na séasúir iascaireachta i Moladh 12-03, agus sainítear anois iad mar shéasúir oscailte, seachas séasúir dhúnta mar a sainíodh iad sna Moltaí roimhe sin ó ICCAT. Ina theannta sin, tá modhnú déanta ar na dátaí is féidir le soithí peas‑saighneoireachta, báid bhaoite agus báid trálála iascaireacht a dhéanamh. Ar deireadh, ionas nach mbeadh aon neamhchinnteacht ann i leith na dtrealamh nach bhfuil faoi réir aon rialacha sonracha maidir le séasúir iascaireachta, ba ghá foráil a áireamh a thabharfadh cead go sainráiteach do gach trealamh eile iascaireacht a dhéanamh ó cheann ceann na bliana.

(5)       Chun caomhnú éifeachtach stoc na dtuinníní gorma a áirithiú, chun deimhneacht dhlíthiúil a sholáthar i leith na séasúr iascaireachta i gceist, agus ar deireadh chun deis a thabhairt do Bhallstáit a bpleananna iascaireachta, cumais agus iniúchta a shainiú mar aon lena n-oibleagáidí tuairiscithe a chomhlíonadh, ní foláir na forálacha maidir le séasúir iascaireachta a mhodhnú i Rialachán (CE) Uimh. 302/2009 ón gComhairle a luaithe agus is féidir agus na modhnuithe sin a chur chun feidhme ó thús 2013 amach go dtí go dtiocfaidh Moladh 12‑03 ó  ICCAT i bhfeidhm agus go dtí go gcuirfear chun feidhme é ar bhonn cuimsitheach.

TAR ÉIS AN RIALACHÁN SEO A GHLACADH:

Airteagal 1

Cuirtear an méid seo a leanas in ionad Airteagal 7 de Rialachán (CE) Uimh. 302/2009:

"Airteagal 7

Séasúir iascaireachta

1.           Tabharfar cead do shoithí gábhála spiléireachta peiligeacha mórscála atá níos faide ná 24 m tuinníní gorma a iascach san Atlantach Thoir agus sa Mheánmhuir le linn na tréimhse ón 1 Eanáir go dtí an 31 Bealtaine, cé is moite den limistéar siar ó 10°I agus ó thuaidh ó 42°T, áit ina gceadófar iascaireacht den sórt sin ón 1 Lúnasa go dtí an 31 Eanáir.

2.           Ceadófar peas-saighneoireacht tuinníní gorma san Atlantach Thoir agus sa Mheánmhuir le linn na tréimhse  ón  26 Bealtaine go dtí an 24 Meitheamh.

3.           Ceadófar do bháid bhaoite agus do bháid trálála tuinníní gorma a iascach san Atlantach Thoir agus sa Mheánmhuir le linn na tréimhse ón 1 Iúil go dtí an 31 Deireadh Fómhair.

4.           Ceadófar do thrálaeir pheiligeacha tuinníní gorma a iascach san Atlantach Thoir le linn na tréimhse ón 16 Meitheamh go dtí an 14 Deireadh Fómhair.

5.           Ceadófar iascaireacht tuinníní gorma san Atlantach Thoir agus sa Mheánmhuir mar chaitheamh aimsire nó mar spórt le linn na tréimhse ón 16 Meitheamh go dtí an 14 Deireadh Fómhair.

6.           Ceadófar do threalaimh eile, seachas iadsan atá luaite cheana i míreanna 1 go 5, peas‑saighneoireacht tuinníní gorma a dhéanamh ó cheann ceann na bliana.''

Airteagal 2

Tiocfaidh an Rialachán seo i bhfeidhm an tríú lá tar éis lá a fhoilsithe in Iris Oifigiúil an Aontais Eorpaigh. Beidh feidhm aige ón 1 Eanáir 2013.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil,

Thar ceann Pharlaimint na hEorpa              An tUachtarán

An tUachtarán                                               An tUachtarán

[1]               IO L 96, 15.04.2009.

[2]               IO L 157, 16.06.2012.

[3]               IO L 23, 25.01.2013.

[4]               IO C , […], Lch. […].

[5]               IO L 96, 15.04.2009.

[6]               IO L 157, 16.06.2012.