MEABHRÁN MÍNIÚCHÁIN

1. COMHTHÉACS AN TOGRA

Forais agus cuspóirí an togra

Tá méadú ag teacht ar thaiscéalaíocht agus táirgeadh ola agus gáis amach ón gcósta, agus i dtimpeallachtaí lena mbaineann tréithe casta geografacha agus geolaíocha, amhail uiscí doimhne. I bhfianaise scála agus saintréithe na dtionóiscí[1] agus na 'neastionóiscí'[2] ola agus gáis atá tarlaithe amach ón gcósta le déanaí ar fud na cruinne agus san Aontas freisin, ní mór beart a dhéanamh. Nochtann na tionóiscí sin an éagothromaíocht idir ríchastacht na n‑oibríochtaí agus na heasnaimh atá ar na cleachtais bainistíochta riosca atá ann faoi láthair. Tuairiscítear éagothromaíochtaí móra idir cuideachtaí éagsúla maidir lena bhfeidhmíocht agus a ndearcadh i leith sabháilteachta. Thairis sin, aibhsíonn na tionóiscí sin na dúshláin atá ag rialtóirí agus maoirseoireacht leormhaith ar ghníomhaíochtaí amach ón gcósta á háirithiú, agus easpa trédhearcachta agus comhroinnte sonraí maidir le feidhmíocht sabháilteachta an tionscail easchósta.

San Eoraip, táirgtear formhór an ola agus an gháis amach ón gcósta. Dá dtarlódh mórthionóisc i gceann ar bith de na gléasraí amach ó chósta na hEorpa is dealraitheach go mbeadh caillteanas ábhar, díobháil don chomhshaol, don gheilleagar, do phobail áitiúla agus don tsochaí i gceist, agus d'fhéadfaí beo agus sláinte na n-oibrithe a bheith i mbaol freisin. Is gá an baol go dtarlódh mórthionóisc in uiscí an Aontais a laghdú.

De réir na staidéar, na gcomhlairliúchán le geallsealbhóirí agus na n-anailísí riosca a rinneadh ó 2010 i leith is iad seo a leanas na príomhfhadhbanna atá ag an Aontas:

1. Tá riosca suntasach ann go bhféadfadh mórthionóisc ola nó gáis tarlú in uiscí an Aontais agus de dheasca na reachtaíochta ilroinnte agus éagsúlacht na gcleachtas rialála agus chleachtais an tionscail ní féidir rioscaí a laghdú mar is cóir ar fud an Aontais.

2. Faoin creat rialála agus faoi na socruithe oibriúcháin atá ann faoi láthair ní áirithítear práinnfhreagairt shár‑éifeachtach i gcás tionóiscí cibé áit a dtarlóidh siad in uiscí an Aontais, agus níl se go hiomlán soiléir cé air a bheadh an dliteanas maidir leis an nglanadh agus na damáistí gnásúla.

Dá bhrí sin, is iad cuspóirí ginearálta an togra seo (i) an riosca go dtarlóidh mórthionóisc in uiscí an Aontais a laghdú, agus (ii) na hiarmhairtí a laghdú i gcás ina dtarlóidh tionóisc den sórt sin.

An comhthéacs ginearálta i gcomhair tionscnaimh rialaithigh

Spreag an tubaiste i Murascail Mheicisceo an Coimisiún anuraidh chun anailís bhearna a dhéanamh ar chleachtais easchósta agus ar an gcreat reachtach san Aontas agus ansin chun Teachtaireacht a fhoilsiú: "Aghaidh a thabhairt ar dhúshlán na sabháilteachta i ngníomhaíochtaí ola agus gáis amach ón gcósta"[3] (arna glacadh i mí Meán Fómhair 2010). Céadléiriú a bhí ann ar roinnt de na réimsí ina bhfuil gníomhaíocht de dhíth san Aontas.

Tá cuid mhaith éagothroime agus ilroinnte i measc dhlíthe agus chleachtais na mBallstát maidir le gníomhaíochtaí amach ón gcósta (e.g. ceadúnú, forálacha dliteannais, caighdeáin sabháilteachta trealaimh, trédhearcacht don phobal agus comhroinnt faisnéise). Is léiriú é an méid sin nach ann ach ar éigin d'ionstraimí dlí idirnáisiúnta agus go bhfuil bearnaí i ndlí ábhartha an Aontais.

Cé go bhfuil córais rialála ag roinnt Ballstát a mheastar a bheith den chéad scoth, d'fhéadfaidís ar fad feabhsú. Tá sé den tábhacht feabhas a chur ar rialú rioscaí mórghuaise i dtionscal an ola agus an gháis amach ón gcósta go dtí go mbeidh ardchaighdeáin chomhsheasmhacha i bhfeidhm ar fud an Aontais.

Bunaithe ar anailís mhinicíochta ar fheidhmíocht an tionscail san Eoraip go dtí seo agus ar na costais dhoiciméadaithe a bhain le tionóiscí a tharla cheana, meastar go mbíonn idir EUR 205 milliún agus EUR 915 milliún i gceist ar an meán in aghaidh na bliana le caillteanas agus damáiste de dheasca tionóiscí ola agus gáis amach ón gcósta san Aontas. Úsáidtear an raon sin mar bhonn eimpíreach i gcomhair an riosca thagartha sa mheasúnú tionchair.

Meastar go mbeidh an tairbhe a fhaibhreoidh chuig an Aontas agus chuig na Ballstáit cuid mhaith níos mó ná na costais a bheidh ag baint le caighdeáin níos airde a thabhairt isteach. Is é an tionscal a sheasfaidh an chuid is mó d'aon chostais bhreise, agus is é an tionscal a bhainfidh tairbhe as laghdú riosca. Léiríonn an taithí atá faighte, áfach, gur gá reachtaíocht stóinsithe agus dliteanas follasach chun cultúr an tionscail a athrú sa chaoi go mbainfear amach an laghdú riosca a theastaíonn ón Rialachán seo.

As na cuspóirí ginearálta thuasluaite is féidir ceithre chuspóir shonracha a shnoí:

1. A áirithiú go mbainfear úsáid chomhsheasmhach as dea‑chleachtais i gcomhair rialú mórghuaiseacha ag oibríochtaí de chuid an tionscail ola agus gáis amach ón gcósta a d'fhéadfadh cur isteach ar uiscí nó ar chóstaí an Aontais;

2. Dea‑chleachtais rialála a chur chun feidhme i ngach dlínse san Eoraip ina ndéantar gníomhaíochtaí ola agus gáis;

3. An tAontas a ullmhú níos fearr agus a chumas déileáil le héigeandálaí a d'fhéadfadh cur isteach ar shaoránaigh, ar gheilleagar nó ar chomhshaol an Aontais a neartú;

4. Na forálacha atá ag an Aontais maidir le dliteanas agus cúiteamh a fheabhsú agus a shoiléiriú.

Ceapadh bearta praiticiúla bunaithe ar thaighde an Choimisiúin agus ar chomhairliúchán le geallsealbhóirí. Ina theannta sin, sainaithníodh roghanna beartais ina ngrúpáiltear na bearta i dteanglaim éagsúla agus ina n-úsáidtear modhanna éagsúla cur chun feidhme. Tá tuairisc ar na roghanna beartais sin i gCaibidil 2.

Forálacha dhlí an Aontais atá ann cheana i réimse an togra

Níl aon reachtaíocht ag an Aontas a bhaineann le hearnáil an ola agus an gháis amach ón gcósta go sonrach; is ann, áfach, do acquis leathan an Aontais atá infheidhme maidir leis an earnáil easchósta, cé gur minic nach mbíonn sé infheidhme ach i bpáirt. Comhlánann an togra seo na hionstraimí seo a leanas, go príomha, de chuid reachtaíocht an Aontais:

i.             Dliteanas comhshaoil: Leis an Treoir maidir le Dliteanas Comhshaoil (TDC) 2004/35/CE díríodh ar cheist an dliteanais i gcás damáistí don chomhshaol, damáistí arb í earnáil an ola agus an gháis easchósta is cúis leo san áireamh. Tá dliteanas dian ar an oibreoir i mbun gníomhaíochtaí a dhéanann díobháil shuntasach chomhshaoil do speicis atá faoi chosaint, do ghnáthóga nádúrtha nó uisce an díobháil sin a chosc agus a leigheas agus na costais a sheasamh ina n-iomláine. Faoi láthair ní infheidhme TDC ach feadh an chósta agus i bhfarraigí críochacha i ndáil le díobháil don uisce, is é aidhm an togra seo a infheidhmeacht chríochach a shíneadh chun na huiscí mara ar fad faoi dhlínse na mBallstát a chumhdach.

ii.            Measúnú Tionchair ar an gComhshaol: Le Treoir 85/337/CEE[4], arna leasú le Treoracha 97/11/CE[5], 2003/35/CE[6] agus 2009/31/CE[7], maidir le measúnú ar éifeachtaí tionscadal poiblí agus príobháideach áirithe ar an gcomhshaol, comhchuibhíodh na prionsabail lena ndéantar measúnú ar thionchar tionscadal ar an gcomhshaol trí íoscheanglais ghinearálta a thabhairt isteach. Ina theannta sin, tá Coinbhinsiún Espoo, faoi chuimsiú Choimisiún Eacnamaíochta na Náisiún Aontaithe don Eoraip, maidir le measúnú tionchair ar an gcomhshaol i gcomhthéacs trasteorann, ar cuid de acquis an chomhshaoil é, ábhartha i ndáil le measúnú ar thionscadail is dealraitheach go mbeidh éifeachtaí trasteorann acu. Tá sé roghnach é a chur i bhfeidhm le haghaidh oibríochtaí druileála áirithe, áfach.

iii.           Dlí dramhaíola: Treoir 2008/98/CE maidir le dramhaíl (Treoir Réime Dramhaíola). Tá an Treoir sin go hiomlán infheidhme maidir le sceitheadh ola, mar a dhearbhaigh Cúirt Bhreithiúnais an Aontais Eorpaigh. Da bhrí sin, tá ola a sceitear ó ghléasra amach ón gcósta cumhdaithe faoi shainmhíniú an AE ar dhramhaíl, agus ar an ábhar sin is ar údar an truaillithe atá an oibleagáid é a ghlanadh.

iv.           Sláinte agus sábháilteacht oibrithe san obair: - Is é Treoir 92/91/CEE (lena gcomhlántar Treoir Réime 89/391/CEE) an ionstraim is ábhartha i reachtaíocht an Aontais maidir le hoibrithe agus an comhshaol amach ón gcósta a chosaint. Leis an togra seo, treisítear an córas a chuir Treoir 92/91/CEE i bhfeidhm d'fhonn a áireamh, inter alia, measúnú comhshaoil, ceanglas an measúnú riosca a chur faoi bhráid an rialtóra lena thoiliú a fháil, scéim fógraí a bhunú i gcomhair oibríochtaí tobair agus ceanglas maidir le fíorú neamhspleách eilimintí atá criticiúil do rialú riosca.

v.            Mórghuaiseacha: Níl feidhm ag Treoir Seveso 96/82/CE maidir leis an earnáil easchósta, ach samplaí dea‑chleachtais i gcomhair an togra seo a bhí i roinnt dá heilimintí. Téann an togra seo níos faide ná Treoir Seveso áfach, go háirithe toisc go gceanglaítear ann toiliú an rialtóra i gcomhair measúnú riosca, fíorú níos láidre ar acmhainn theicniúil agus airgeadais ag céim an cheadúnaithe nó forálacha maidir le éalú na n‑oibrithe agus lena dtarrtháil.

v.            Údaruithe a dheonú i gcomhair sirtheoireachta, taiscéalaíochta agus táirgthe hidreacarbón: Is é Treoir 94/22/CE an príomhchreat dlí faoina ndeonaítear ceadúnais i gcomhair taiscéalaíochta agus táirgthe. Ní athróidh an togra seo an Treoir ann féin ach neartaíonn sé oibleagáidí na n‑údarás ábhartha le linn phróiseas an cheadúnaithe chun feabhas a chur ar an measúnú ar acmhainn theicniúil agus airgeadais na n‑iarrthóirí.

vi.           Práinnfhreagairt: Tugtar isteach leis an togra ceanglais nua maidir le práinnfhreagairt na mBallstát agus an tionscail a chomhlánadh leis na hacmhainneachtaí atá ag an Aontas cheana, laistigh agus lasmuigh den Aontas araon. Tá Sásra Cosanta Sibhialta an AE (Cinneadh 2007/779/CE ón gComhairle), an tIonad Faireacháin agus Faisnéise[8] agus an Ghníomhaireacht Eorpach um Shábháilteacht Mhuirí (EMSA)[9] ina bpríomhuirlisí ag an Aontas chun beart a dhéanamh i gcás éigeandála. Rinneadh bearta cheana chun inniúlacht EMSA a leathnú chun tionóiscí gléasraí amach ón gcósta a chumhdach (sa bhreis ar a príomhchúram mar atá an loingseoireacht mhuirí).

Comhsheasmhacht le beartais agus cuspóirí eile an Aontais

Tá an Rialachán seo comhsheasmhach leis an straitéis fuinnimh i gcomhair 2020[10], maidir le Tosaíocht 3, an eilimint a bhaineann le fuinneamh inbhuanaithe slán iomaíoch san Eoraip.

Ina theannta sin, tá an Rialachán seo comhsheasmhach le reachtaíocht agus beartas comhshaoil an Aontais agus lena ndearbhphrionsabail amhail truailliú a chosc, rialú agus an prionsabal íoc mar a thruaillítear agus prionsabal an réamhchúraim. Tá sé go hiomlán comhsheasmhach freisin leis an mbeartas muirí, go háirithe an sprioc dea‑stádas comhshaoil a bhaint amach faoi 2020 don chomhshaol muirí (an Treoir Réime um Straitéis Mhuirí).

2. TORTHAÍ AN CHOMHAIRLIÚCHÁIN LE PÁIRTITHE A BHFUIL LEAS ACU SA RIALACHÁN, AGUS MEASÚNÚ TIONCHAIR AR NA ROGHANNA BEARTAIS

Comhairliúchán le páirtithe leasmhara

Reáchtáladh comhairliúchán poiblí ar líne idir 16 Márta agus 20 Bealtaine 2011 chun a fháil amach cén dearcadh a bhí ag páirtithe leasmhara maidir leis an ngá le gníomhaíocht ón Aontas i réimsí éagsúla beartais.

Fuair an Coimisiún 64 aighneacht ar an iomlán, inar léiríodh tuairimí breis is 350 geallsealbhóirí.

Achoimre ar na freagairtí agus an tslí ar cuireadh san áireamh iad

Le linn an chomhairliúcháin léiríodh tacaíocht fhorleathan i gcomhair threisiú na mbeart lena gcosctar mórtheagmhais amach ón gcósta agus lena ndéileáiltear leo, mar sin féin, bhí éagsúlacht sna modhanna a moladh chun na críche sin. Mheas na húdaráis náisiúnta i réigiún na Mara Thuaidh nár cheart do na hathruithe a dhéanfaí ar leibhéal an Aontais amhras a chruthú i dtaobh an chur chuige rialála atá acu féin faoi láthair, mar atá socrú spriocanna mar chur chuige. Agus go deimhin, cuirtear an cur chuige sin chun cinn sa togra. Cé gur admháladh gur gá feabhsuithe go ginearálta, bhí an tionscal an‑choimeádach maidir le hathruithe rialála agus b'fhearr leis socrú spriocanna mar chur chuige agus tionscnaimh de chuid an tionscail. Ar an taobh eile, ba iad na heagraíochtaí neamhrialtasacha agus na cuideachtaí speisialaithe (e.g. cumainn aicmiúcháin) ba mhó a d'éiligh athruithe ar leibhéal an Aontais.

Is iad seo a leanas na príomhghnéithe.

Údaruithe

Ba cheart ceadúnaithe a chur faoi dhliteanas as aon damáistí arb iad is cúis leo. Measann formhór na rialtóirí náisiúnta agus an tionscal gur slán an ceadúnú agus an t-údarú a chuirtear i bhfeidhm i mBallstáit áirithe faoi láthair, ach gur cheart don Aontas comhoibriú le Ballstáit eile chun a gcaighdeáin a ardú. Creideann siad nach mór é a fhágáil faoin mBallstát lena mbaineann amháin cinneadh a dhéanamh maidir le dámhachtainí, ach go bhféadfaí faisnéis a roinnt le stáit chomharsanacha i gcás ina bhféadfadh truailliú trasteorann a bheith i gceist. Rinne cuideachtaí éagsúla moltaí eagsúla (e.g. nósanna imeachta údarúcháin a chomhchuibhiú agus a shimpliú agus rialtóirí ar leith a bheith ann i gcomhair ceadúnú agus sábháilteacht). Tá roinnt eagraíochtaí neamhrialtasacha agus saoránach i bhfabhar oibleagáide dul i gcomhairle le stát comharsanach nó toilliú an stáit sin a fháil i gcás ina bhféadfadh truailliú trasteorann a bheith i gceist.

Foráiltear san ionstraim reachtach maidir le measúnú níos láidre, agus bunaithe ar riosca, ar acmhainneacht theicniúil agus airgeadais. Tugtar isteach leis freisin, sa bhreis ar eilimint na sábháilteachta, eilimint chomhshaoil i ndáil le rialú agus cosc mórghuaiseacha.

Tionóiscí a chosc

Ní mór dúshlán an tionscail a thabhairt a dhícheall a dhéanamh chun mórtheagmhais a chosc, ach gan an baol a bheith ann go n-ísleofaí caighdeáin choiscthe tionóiscí i gcás ina bhfuil córas rialála stóinsithe ar an earnáil easchósta ag Ballstáit cheana. Maíonn lucht an tionscail go ginearálta go bhféadfar an staid a fheabhsú trí bhíthin na féinrialála agus thionscnaimh an tionscail. Measann eagraíochtaí neamhrialtasacha agus, ar mhodhanna éagsúla, roinnt rialtóirí gur cheart na rialacháin atá ann cheana a neartú agus a shíneadh chun gach oibríocht amach ón gcósta in uiscí an Aontais a chumhdach.

Comhlíonadh a fhíorú agus dliteanas i gcás damáistí

Tá sé sár-riachtanach go mbeidh ceanglais stóinsithe agus chiallmhara ann agus go gcomhlíonfar iad. Cé go maíonn lucht an tionscail go dtugann corparáidí ardtosaíocht do chomhlíonadh na gceanglas i gcónaí, feictear do go leor geallsealbhóirí gur gá cultúr sábháilteachta a bheidh níos láidre a chur i bhfeidhm san earnáil. Dírítear sa Rialachán ar chomhlíonadh agus ar chultúr iontaofa láidir sábháilteachta a bhaint amach.

Éilíonn eagraíochtaí neamhrialtasacha agus roinnt cumann aicmiúcháin cigireachtaí fisiciúla níos láidre. Bhí na rialtóirí náisiúnta agus an tionscal ina choinne sin go ginearálta ar an ábhar go bhféadfadh ganntanas acmhainní a bheith ann nó go bhféadfaí a gcobhsaíocht a bhaint de na córais atá ann anois. Thug an dá dhream sin roinnt tacaíochta freisin do cheanglais maidir le fíorúcháin tríú páirtí neamhspleácha.

Ba iad na heagraíochtaí neamhrialtasacha is mó a bhí ar son scóip an dliteanais chomhshaoil a shíneadh, ach níor ghlac na rialtóirí ná lucht an tionscail seasamh follasach... Tá an chuma ar an scéal go bhfuil an tionscal agus árachóirí i gcoinne athruithe ar nós árachais éigeantaigh gan uasteorann a chur ar dhliteanas ar leibhéal idirnáisiúnta, cé go mbeadh sé ina cheanglas daingean ag na heagraíochtaí neamhrialtasacha.

Trédhearcacht, comhroinnt faisnéise agus cleachtais úrscothacha

Mheas eagraíochtaí neamhrialtasacha, agus an tionscal agus na rialtóirí, go mbeadh an tionscal agus údaráis phoiblí in ann, a bhuí le leibhéal níos airde trédhearcachta, a léiriú go mbainistítear agus go rialaítear gníomhaíochtaí ola agus gáis amach ón gcósta go cuí. Ba cheart do na húdaráis náisiúnta ar fad obair as láimh a chéile, ag tógáil ar an eiseamláir atá tugtha ag Fóram Údaráis Easchósta na Mara Thuaidh (NSOAF) agus cruinnithe neamhfhoirmiúla ghrúpa AE-NSOAF.

Práinnfhreagairt

Is ar an oibreoir agus ar an mBallstát lena mbaineann atá an phríomhfhreagracht bearta a dhéanamh i gcás éigeandála, ach trí chomhar agus trí chomhroinnt saineolais agus sócmhainní eile is féidir feabhas a chur ar éifeachtacht agus ar éifeachtúlacht na gcumas atá ann san Eoraip chun bearta a dhéanamh i gcás sceite ola. Is féidir le EMSA páirt a ghlacadh i nglanadh má iarrann an Ballstát lena mbaineann air é trí Shásra Cosanta Sibhialta an AE.

Gníomhaíochtaí idirnáisiúnta

Ba cheart do chuideachtaí atá bunaithe san Aontas, agus táthar ag súil leis go ndeanfaidh siad amhlaidh, na beartais atá léirithe sa rialachán seo a leanúint agus gan a gcaighdeáin a ísliú agus iad ag obair lasmuigh den Aontas.

Saineolas a bhailiú agus a úsáid

Cuireadh tús i mí Aibreán 2010 leis an gcaidreamh leis na geallsealbhóirí idirnáisiúnta agus de chuid an Aontais (an tionscal easchósta, eagraíochtaí neamhrialtasacha) agus leis na Ballstáit a bhfuil ionadaíocht, rialáil agus riar na hearnála easchósta faoina gcúram, agus ba é Teachtaireacht Dheireadh Fómhair 2010 toradh na hoibre sin.

Na comhairliúchán scríofa agus i gcruinnithe le geallsealbhóirí, cuireadh leo ó shin i leith. Gan an comhairliúchán poiblí a áireamh, tháinig údaráis náisiúnta rialála/maoirseachta le chéile ocht n-uair faoi choimirce chomhpháirteach an Choimisiúin agus NSOAF. Pléadh sábháilteacht gníomhaíochtaí amach ón gcósta le linn chruinnithe mheitheal Fhóram Bheirlín maidir le breoslaí iontaise dúchasacha[11]. Ina theannta sin, reáchtáladh go leor cruinnithe le comhlachais náisiúnta agus idirnáisiúnta an tionscail, le fiontair aonair, le heagraíochtaí neamhrialtasacha agus le cuideachtaí neamhspleácha fíorúcháin agus árachóirí. Thairis sin, d'fhreastal an Coimisiún ar thionscnaimh náisiúnta (e.g. Oil Spill Prevention and Response Advisory Group na Ríochta Aontaithe) agus idirnáisiúnta (e.g. meitheal GMEP [Global Marine Environmental Protection] de chuid an G-20) go rialta. Leanadh leis na cruinnithe sin anuas go dtí an lá atá inniu ann. Ar an dóigh chéanna, chuathas i gcomhairle go leanúnach leis na seirbhísí eile de chuid an Choimisiúin (e.g. JRC) a bhfuil saineolas agus taithí atá ábhartha agus inaistrithe acu. D'fhostaigh an Coimisiún beirt saineolaithe náisiúnta ó údaráis náisiúnta sábháilteachta amach ón gcósta. Cuireadh ionchur na saineolaithe san áireamh ina iomláine agus an Rialachán seo á chur i dtoll a chéile.

Roghanna beartais agus measúnú ar an tionchar a bheadh acu

Eascraíonn roghanna beartais as na cuspóirí ginearálta agus sonracha a bhfuil tuairisc orthu i gCaibidil 1. Tá ceithre rogha beartais móide an rogha bhunlíne "dada a dhéanamh" (rogha 0) anseo thíos.

Faoi Rogha 0 choinneofaí an status quo.

Ní bhaineann aon chostas ná tionchar breise ar an mbunraon costais €205-915m leis.

Is é Rogha 1 ("leibhéal bunúsacha na Mara Thuaidh") an leibhéal bunúsach i gcomhair idirghabháil fhiúntach ón Aontas. Thabharfaí an Tuarascáil maidir le Mórghuaiseanna, atá bunaithe ar an doiciméad sláinte agus sábháilteachta a ceanglaíodh le Treoir 92/92/CE, isteach i ndlí an Aontais ach rachfaí ní b'fhaide mar cheanglófaí go mbeadh ar an rialtóir a bheith sásta léi sula gcuirfí tús le hoibríochtaí. Bheadh córas cigireachta agus pionóis ag teastáil chun tacú leis na bearta a bhfuil tuairisc orthu sa Tuarascáil maidir le Mórghuaiseanna. Chuirfí Rogha 1 chun feidhme trí bhíthin dlí nua.

Mar gheall ar Rogha 1 bheadh tuairim is €36m in aghaidh na bliana de chostais reáchtála bhreise ar an tionscal agus laghdú riosca, arna shloinneadh os coinne an chostais bhunlíne, de tuairim is €7 – 30m in aghaidh na bliana, laghdú arbh ionann é agus laghdú 3% ar an meán ar an riosca bunlíne.

Faoi Rogha 1+ ("An Mhuir Thuaidh+") rachfaí ní b'fhaide agus thabharfaí treoirlínte de chineál na reachtaíochta boige isteach maidir leis an méid seo a leanas: géarú a dhéanamh ar an mbreithniú ar acmhainneacht theicniúil iarratasóirí ar cheadúnais ola agus gáis amuigh ón gcósta; pleananna náisiúnta práinnfhreagartha a chomhfhogasú; sócmhainní práinnfhreagartha náisiúnta agus de chuid an tionscail atá comhoiriúnach a fhorbairt agus iad a chur ar fáil i dtíortha eile ina bhfuil gá leo; agus raon feidhme na bhforálacha comhshaoil ábhartha a shoiléiriú a bhaineann le dliteanas oibreoirí (e.g. infheidhmeacht na reachtaíochta dramhaíola) maidir le tionóisc ola agus gáis amach ón gcósta. Mholfadh an tAontas freisin do chuideachtaí atá bunaithe san Aontas comhaontuithe deonacha faoi chaighdeáin AE a úsáid lasmuigh d'uiscí an AE.

Le Rogha 1 + bheadh tuairim is €3m de chostais reáchtála bhreise ar Bhallstáit agus tuairim is €52m de chostais chomhlíonta ar an tionscal (sa bhreis ar chostais Rogha 1). Is é éifeacht charnach Rogha 1 agus Rogha 1+ €25 - €109m in aghaidh na bliana, éifeacht arbh ionann é agus laghdú 12 % ar an meán ar an riosca bunlíne.

Le Rogha 2 ("Dea‑chleachtais an Aontais") déantar tuilleadh forbartha ar leasuithe Rogha 1 + i bpacáiste cuimsitheach. Shainordófaí dea-chleachtais dhomhanda atá aitheanta i ndáil le rialú mórghuaiseacha, agus d'ionchorprófaí measúnú riosca comhshaoil isteach sa Tuarascáil maidir le Mórghuaiseanna. Ina theannta sin, thabharfaí dea-chleachtas rialála agus caighdeáin eagrúcháin ceangailte isteach sna socruithe i gcomhair údarás inniúla náisiúnta. Leis an measúnú riosca iomlánaíoch sin i gcomhair sábháilteachta agus an chomhshaoil, chuirfí ullmhacht chun práinne agus bainistiú na bhfardal práinnfhreagartha isteach sa reachtaíocht. Chruthófaí grúpa údarás easchósta ar leibhéal an Aontais agus neartófaí na treoracha maidir le ceadúnú agus maidir le dliteanas comhshaoil trí bhíthin rialáil.

Le Rogha 2 bheadh tuairim is €122m (seachas €52m) de chostais oibriúcháin charnacha agus tuairim is €12-18m (seachas €3m) ar Bhallstáit, móide tuairim is €18-44m de chostais riaracháin aonuaire. Bheadh tuairim is €1m i gceist leis na costais ar an gCoimisiún chun grúpa údarás easchósta an AE a bhunú agus a reáchtáil. A bhuí leis na bearta breise, ghearrfaí na costais riosca bunlíne idir €103 – 455m in aghaidh na bliana – laghdú 50 % ar an riosca bunlíne.

Le Rogha 3 ("Gníomhaireacht de chuid an AE") neartófaí tuilleadh tionchar Rogha 2 trí ghníomhaireacht de chuid an Aontais a thabhairt isteach chun na leasuithe a baineadh amach i Rogha 2 a fhorasú agus, ar an gcaoi sin, a chomhdhlúthú. Ghabhfadh sí ar láimh cigireachtaí agus imscrúduithe a dhéanamh, chomhsheasmhacht feidhmíochta a fhorghníomhú agus faireachán a dhéanamh uirthi, acmhainneacht idirghabhála a fhorbairt agus cuidiú le forbairt acmhainní i dtíortha comharsanacha nach Ballstáit den Aontas iad.

Le Rogha 3 bheadh tuairim is €35m in aghaidh na bliana de chostais reáchtála charnacha bhliantúla ar an gCoimisiún agus €18-44m i gcostais aonuaire tionscanta móide €10 milliún chun sócmhainní práinnfhreagartha riachtanacha a cheannach. Ní bheadh aon chostais bhreise ar an tionscal.

I dTábla 1 thíos déantar comparáid idir na roghanna i bhfianaise na mbeart atá beartaithe.

Uimh. || Beart || Rogha 0 || Rogha 1 || Rogha 1+ || Rogha 2 || Rogha 3

1 || Acmhainneacht theicniúil an oibreora ionchasaigh a fhíorú go grinn || 0 || 0 || T || D || Aontas

2 || Cigireachtaí rialta agus córas pionóis a bhunú || 0 || D || D || D || Aontas

3 || Measúnuithe foirmeáilte sábháilteachta a chur faoi bhráid an rialtóra lena bhformheas || 0 || D || D || D || Aontas

4 || An Tuarascáil maidir le Mórghuaiseacha a shíneadh chun go mbeadh sí ina samhail chuimsitheach do bhainistíocht riosca || 0 || 0 || 0 || D || D

5 || Cleachtais an Aontais a shíneadh go hoibríochtaí thar lear || 0 || 0 || T || T || Aontas

6 || Údarás Inniúil a bhunú || 0 || 0 || 0 || D || Aontas

7 || Ardán a bhunú le haghaidh comhphlé faoi rialáil || 0 || 0 || 0 || D || Aontas

8 || Comhroinnt chuimsitheach faisnéise agus trédhearcacht || 0 || 0 || 0 || D || D

9 || Ullmhacht chun práinnfhreagairt éifeachtach a thabhairt ar mhórthionóiscí amach ón gcósta || 0 || 0 || T || D || Aontas

10 || A áirithiú go bhfuil sócmhainní idirghabhála ar fáil agus go bhfuil siad comhoiriúnach ar bhonn trasteorann || 0 || 0 || T || D || Aontas

11 || Scóip an dliteanais chomhshaoil a shoiléiriú || 0 || 0 || T || D || D

Tábla 1

0 = ní chuirfí chun feidhme faoin rogha seo é; T = treoirlínte/reachtaíocht bhog; D = dlí; Aontas = gníomhaireacht de chuid an Aontais a bheith freagrach

Is féidir beart a chur chun feidhme trí mhodhanna éagsúla, agus is minic dá bhrí sin a bhíonn rogha le déanamh idir éifeachtacht agus praiticiúlacht. Dá thoradh sin, tá dhá shaintréith ag gach rogha beartais mar atá, ar an gcéad dul síos, an tsraith beart a choinneofaí faoin rogha sin agus, ar an dara dul síos, an modh cur chun feidhme roghnaithe i gcás gach birt faoin rogha sin.

Is é an rogha beartais dá dtugtar tosaíocht Rogha 2, i.e. leasú cuimsitheach easchósta ar fud an Aontais, trí dhlí nua, lena n‑ardófaí leibhéal na bainistíochta riosca agus ullmhacht i gcás éigeandála sa tionscal amach ón gcósta. Sa bhreis ar chomhsheasmhacht, d'áiritheodh an rogha seo tuilleadh trédhearcachta maidir le feidhmíocht an tionscail agus an rialtóra.

Leis an rogha seo d'fhéadfaí an riosca bunlíne a laghdú 50% trí fheabhas a chur ar chosc agus ar mhaolú sa chás go dtarlódh teagmhas dá ainneoin sin. Is fabhrach an laghdú riosca ó thaobh airgeadaíochta de ar an meán (tuairim is €103-455m in aghaidh na bliana) i gcomparáid leis na costais charnacha mheasta a bheadh ar an gcur chun feidhme (€134-140m in aghaidh na bliana). Tá sé níos inacmhainne ó thaobh riaracháin de agus go heacnamaíoch ós rud é nach n‑éireodh le costais reáchtála bhreise Rogha 3 (tuairim is €34m in aghaidh na bliana) laghdú comhfhreagrach ar rioscaí a chur ar fáil. Níl ach tionchar dearfach beag (12 %) agus deiseanna forghníomhaithe beaga ag Rogha 1+ agus níl tairbhí Rogha 1 leordhóthanach chun údar cuí a thabhairt maidir leis na costais – cé gur beag iad.

3. EILIMINTÍ DLÍ AN RIALACHÁIN

Is mar seo a leanas na dualgais a chruthófar leis an rialachán atá beartaithe i gcomhair oibreoirí, na mBallstát agus an Choimisiúin.

An tOibreoir

Ní mór don oibreoir a ghníomhaíochtaí a eagrú ar bhonn shamhail an dea-chleachtais; tuarascáil ar mhórghuaiseacha a ullmhú agus í a chur faoi bhráid an údaráis inniúil lena meas. Ina theannta sin, ní mór don Oibreoir fógra a chur faoi bhráid an rialtóra i gcomhair gach oibríochta tobair. I gcás tuarascálacha maidir le mórghuaiseacha agus fógraí maidir le tobair araon, ní mór fíorú neamhspleách a dhéanamh ar na heilimintí atá criticiúil i gcomhair sábháilteachta. Ullmhóidh oibreoirí pleanna práinnfhreagartha inmheánacha; cuirfidh siad idir-inoibritheacht agus comhoiriúnacht sócmhainní práinnfhreagartha chun cinn agus tuairisceoidh siad teagmhais agus faisnéis shonrach eile chuig an mBallstát ábhartha i bhformáid chaighdeánach. Gheallfadh cuideachtaí móra atá bunaithe san Aontas go léireoidís caighdeáin sábháilteachta easchósta an Aontais pé áit ina n-oibríonn siad thar sáile.

Na Ballstáit

Dhéanfadh údaráis cheadúnaithe na mBallstát measúnú ar bhealach iomchuí ar fheidhmíocht ionchasach sábháilteachta agus comhshaoil na n‑iarratasóirí (agus ar a n-acmhainneacht airgeadais déileáil le teipeanna sábháilteachta) agus damhachtainí i gcomhair ceadúnas taiscéalaíochta agus táirgthe á mbreithniú acu. Bhúnódh na Ballstáit údaráis inniúla chun sábháilteacht, cosaint an chomhshaoil agus ullmhacht i gcomhair éigeandála a mhaoirsiú agus thabharfaidís isteach caighdeáin stóinsithe i gcomhair cigireachta agus imscrúdaithe, ar caighdeáin iad a mbeadh pionóis iomchuí ar sháruithe dualgais na n-oibreoirí ag tacú leo. Cuirfidh na Ballstáit faisnéis maidir lena n‑earnálacha easchósta ar fáil mar ghnáthnós agus tuairsceoidh siad gach teagmhas mór agus gach ceacht a fhoghlaimeoidh siad chuig an gCoimisiún. D'ullmhódh na Ballstáit pleananna práinnfhreagartha seachtracha i gcomhar leis na Ballstáit chomharsanacha. Glacfar bearta chun idir-inoibritheacht shaineolais agus sócmhainní fisiciúla a áirithiú chun tacú le hidirghabháil ar leibhéal an Aontais ar fad, lena n‑áirítear idirghabháil EMSA. Ullmhóidh na Ballstáit agus an tionscal pleananna práinnfhreagartha agus tástálfaidh siad go tréimhsiúil iad.

An Coimisiún

Bunóidh an Coimisiún grúpa údarás easchósta an AE ina mbeidh ionadaithe ó na húdaráis inniúla atá freagrach as gníomhaíochtaí ola agus gáis amach ón gcósta i mBallstáit an Aontais. Leasóidh an Coimisiún an Treoir um Dhliteanas Comhshaoil (2004/35/CE) faoi chuimsiú an Rialacháin.

Bunús Dlí

Tá an dréacht-Rialachán bunaithe ar Airteagal 192 (An comhshaol) den CFAE chun críocha an comhshaol a chosaint agus ar Airteagal 194 (Fuinneamh) den CFAE chun éifeachtaí díobhálacha ar shlándáil sholáthar fuinnimh an Aontais agus ar fheidhmiú an mhargaidh inmheánaigh a laghdú.

Prionsabal na coimhdeachta

Níor breithníodh beart ón AE ach amháin i gcás inar féidir leis an cuspóir a bhaint amach ar bhealach níos éifeachtaí ná na Ballstáit nó i gcás go bhféadfar nach dtabharfaidh bearta ó na Ballstáit ina n-aonar feabhsuithe barrmhaithe.

Cuideachtaí a oibríonn i réimse idirnáisiúnta agus rigí druileála amhail Deepwater Horizon a bhogtar ó áit go háit, ní mór dóibh déileáil le córais rialála atá an-difriúil óna chéile ag brath ar an tír ina ndéantar na gníomhaíochtaí. Tugann na bearta atá déanta ag na Ballstáit le déanaí le tuiscint, go rachaidh na difríochtaí sin chun donais gan beart ón Aontas ós rud é gurb iad na tíortha sna réigiúin is forbartha atá ag pleanáil feabhsuithe den chuid is mó, fad is nach bhfuil ach dul chun cinn mall á dhéanamh le tionscnaimh idirnáisiúnta. Thairis sin, gan beart ón Aontas, fágfar againn na deacrachtaí atá ann faoi láthair maidir le comparáid a dhéanamh idir feidhmíochtaí sa tionscal agus maidir le faisnéis agus sonraí teagmhais a chomhroinnt.

Níor leor beart ó na Ballstáit ina n‑aonar chun cosaint chomhsheasmhach an chomhshaoil (lena n‑áirítear dliteanas i gcás truailliú), an leas coiteann ná gealltanas ón Aontas agus ó na Ballstáit de réir na Treorach Réime um Straitéis Mhuirí a bhaint amach.

Tá seans mór go dtarlódh teagmheas mór amach ón gcósta áit ar bith san Aontas agus go mbeadh iarmhairt mhór ag baint leis de réir na dtuarascálacha náisiúnta agus na hanailíse riosca a rinne an Coimisiún in 2011. Tá méadú ag teacht ar tháirgeadh amach ón gcósta sa Mheánmhuir, sa Mhuir Dhubh agus i Muir Bhailt fiú, ar réigiúin iad ina bhfuil níos lú taithí ag roinnt tíortha iontu maidir le oibríochtaí amach ón gcósta a rialáil. Mar sin féin, fiú sna réigiúin is forbartha (an Mhuir Thuaidh go príomha) theip ar bhearta náisiúnta caighdeáin choiteanna agus inchomparáideacht sonraí a bhaint amach.

Ar an iomlán, in ainneoin na mbeart dá bhforáiltear cheana i reachtaíocht an Aontais, i réimse na hoibre sláinte agus sábháilteachta mar shampla, mura nglacfar beart ar leibhéal an Aontais is dócha go mbainfear de na Ballstáit an modh is oiriúnaí chun na rioscaí a bhaineann le teagmhais mhóra amach ón gcósta a laghdú ar bhealach comhsheasmhach agus tráthúil.

Prionsabal na comhréireachta

Ceanglaítear in Airteagal 5 den Chonradh nach rachaidh "aon ghníomhaíocht de chuid an Chomhphobail thar a bhfuil riachtanach chun cuspóirí an Chonartha seo a bhaint amach". Chun an cothromaíocht is gá a bhaint amach idir na cuspóirí agus na modhanna atá beartaithe chun na cuspóirí sin a bhaint amach, cuirtear an méid seo a leanas san áireamh sa Rialachán seo:

i.             De réir mheastachán BP bhí níos mó ná $40 i gceist le costais thionóisc Deepwater Horizon; d'fhéadfadh costais chomh mór céanna a bheith i gceist le teagmhas inchurtha in uiscí an Aontais

ii.            Sa tionscal easchósta tarlaíonn teagmhais ar cóimhéid le teagmhas Deepwater Horizon gach deich nó fiche bliain, ráta atá ard ó thaobh na mórghuaiseacha foircneacha tionóisce de

iii.           Tá luach an-ard ar earnáil easchósta an Aontais ó thaobh geilleagair náisiúnta de (ioncam agus fostaíocht) agus ó thaobh slándála soláthair de

iv.           Tuilleann na cuideachtaí a oibríonn san earnáil easchósta ioncam sách ard

v.            Tá col glactha ag an bpobal le tuilleadh rioscaí go dtarlóidh teagmhais mhóra

Is beag an costas a bheidh ar na bearta atá beartaithe sa Rialachán seo (tuairim is €134-140m in aghaidh na bliana) i gcomparáid leis an laghdú riosca a bhainfidh siad amach (tuairim is €103-445m in aghaidh na bliana). Dá bhrí sin, tá siad beartaithe mar bhearta cumasúcháin.

Rogha na hionstraime

Moltar Rialachán chun Rogha 2 a chur chun feidhme. Is fearr sin ná Treoir de bharr a shoiléire, a chomhsheasmhachta agus an luasa lena gcuirfear chun feidhme é a bhuí leis an gcur i bhfeidhm díreach[12]. Trí ghníomhú go díreach ar an tionscal, chuirfeadh an Rialachán cothroime iomaíochta ar fáil. D'fhreastalódh sé go maith ar phleanáil éigeandála chun truailliú trasteorann a chomhrac.

Maidir leis na comhaontuithe idirnáisiúnta i ndáil le grúpaí comhairliúcháin agus saineolais an Choimisiúin, ba cheart grúpa údarás easchósta an AE a bhunú trí Chinneadh aonair ón gCoimisiún.

4. IMPLEACHT BHUISÉADACH   

Beidh impleacht bhuiséadach tuairim is €2.5m ag baint leis an togra le linn na tréimhse 2013-2016, cúiteamh as rannpháirtíocht i gcoistí san áireamh. Bainfidh cúnamh EMSA go príomha a) leis an úsáid a bhainfear as a chóras faireachais satailíte a bhíonn i mbun gníomhaíochta beag beann ar thionóiscí amach ón gcósta agus b) le húsáid soithí éigeandála a eagróidh EMSA. Gheofar na soithí éigeandála ar conradh i gcomhair teagmhais ar leith agus cumhdóidh an Stát cois cósta atá i gceist agus a d'iarr an idirghabháil na costais oibriúcháin. Le Rialachán (CE) Uimh. 2038/2006 bunaíodh creat airgeadais ilbhliantúil i gcomhair gníomhaíochtaí freagartha i gcás truailliú do na blianta 2007‑2013. Ní dhearna an Coimisiún aon fhoráil maidir leis an gcreat sin a athrú. I gconclúid: níl foráil déanta maidir le costais EMSA a mhéadú le linn na tréimhse 2007‑2013. I gcás ina dtiocfadh aon chostais bhreise chun cinn i gcomhair EMSA le linn na tréimhse 2014‑2020 ba cheart iad a chumhdach go príomha trí na hacmhainní a comhaontaíodh cheana a ath‑imscaradh.

5. FAISNÉIS BHREISE

An reachtaíocht atá ann cheana a leasú

Tá leasú ar Threoir 2004/35/CE (Dliteanas comhshaoil) san áireamh le glacadh an Rialacháin.

Tarmligeann

Déantar foráil sa Rialachán maidir le sonraí teicniúla a fhorbairt i gcomhair formáide tuairiscithe coitinne trí ghníomh tarmligthe agus maidir leis an deis iarscríbhinní teicniúla a thabhairt chun dáta trí ghníomh cur chun feidhme.

An Limistéar Eorpach Eacnamaíoch agus an Comhphobal Eorpach do Fhuinneamh

D'fhéadfadh an togra a bheith ábhartha maidir leis an LEE agus an gComhphobal Eorpach do Fhuinneamh.

2011/0309 (COD)

Togra le haghaidh

RIALACHÁIN Ó PHARLAIMINT NA hEORPA AGUS ÓN gCOMHAIRLE

maidir le sábháilteacht gníomhaíochtaí sirtheoireachta, taiscéalaíochta agus táirgthe ola agus gáis amach ón gcósta

(Téacs atá ábhartha maidir leis an LEE)

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 192 (1) de,

Ag féachaint don togra ón gCoimisiún Eorpach,

Tar éis dóibh an dréachtghníomh reachtach a chur chuig na Parlaimintí náisiúnta,

Ag féachaint don tuairim ó Choiste Eacnamaíoch agus Sóisialta na hEorpa[13],

Ag féachaint don tuairim ó Choiste na Réigiún[14],

Ag gníomhú dóibh i gcomhréir leis an ngnáthnós imeachta reachtach,

De bharr an méid seo a leanas:

(1) In Airteagal 191 den CFAE bunaíodh na cuspóirí cáilíocht an chomhshaoil a chaomhnú, a chosaint agus a fheabhsú agus cruthaíodh an oibleagáid go mbeadh gach gníomh ón Aontas tacaithe ag ardleibhéal cosanta bunaithe ar phrionsabal an réamhchúraim agus na mbeart coisctheach agus go n‑úsáidfí acmhainní nádúrtha ar bhealach stuama agus réasúnach.

(2) Is é cuspóir an Rialacháin seo minicíocht mhórthionóiscí a laghdú a bhaineann le gníomhaíochtaí ola agus gáis amach ón gcósta agus a n-iarmhairtí a laghdú, agus sa dóigh sin cosaint na muirthimpeallachta agus an gheilleagair chósta in aghaidh truailliú a mhéadú chomh maith le coinníollacha íosta a bhunú i gcomhair sirtheoireachta, taiscéalaíochta agus saothraithe shábháilte amach ón gcósta agus briseadh a d'fhéadfadh tarlú i dtáirgeadh fuinnimh dhúchasaigh an Aontais a theorannú agus feabhas a chur ar na sásraí freagartha atá ann i gcás tionóisce.

(3) Níor cheart an Rialachán seo a bheith infheidhme maidir le gléasraí agus oibríochtaí a dhéanfar amach anseo amháin, ach maidir le gléasraí atá ann cheana freisin, faoi réir socruithe idirthréimhse.

(4) De bharr na dtionóiscí a bhain do ghníomhaíochtaí ola agus gáis amach ón gcósta in 2010, go háirithe i Murascaill Mheicsiceo, spreagadh athbhreithniú ar bheartais a bhfuil sé mar aidhm leis sábháilteacht gníomhaíochtaí amach ón gcósta a áirithiú. Lainseáil an Coimisiún athbhreithniú ar shábháilteacht oibríochtaí ola agus gáis amach ón gcósta, agus thug sé a dhearcadh tosaigh, ina Theachtaireacht "Aghaidh a thabhairt ar dhúshlán na sabháilteachta i ngníomhaíochtaí ola agus gáis amach ón gcósta" an 13 Deireadh Fómhair 2010. Ghlac Parlaimint na hEorpa rúin maidir leis an ábhar an 7 Deireadh Fómhair 2010 agus an 13 Meán Fómhar 2011. Chuir airí fuinnimh na mBallstát a ndearcadh in iúl i gconclúidí na Comhairle Fuinnimh an 3 Nollaig 2010.

(5) Is suntasach na rioscaí a bhaineann le mórthionóisc ola agus gáis amach ón gcósta. Tríd an riosca go dtruailleofar uiscí muirí a laghdú, ba cheart don tionscnamh seo cur le cosaint na muirthimpeallachta agus go háirithe le dea-stádas comhshaoil a bhaint amach faoi 2020, an dáta is déanaí atá leagtha amach in Airteagal 1(1) de Threoir 2008/56/CE ó Pharlaimint na hEorpa agus ón gComhairle an 17 Meitheamh 2008 lena mbunaítear creat do ghníomhaíocht Chomhphobail i réimse an bheartais muirthimpeallachta (an Treoir Réime um Straitéis Mhuirí)[15].

(6) Cranntaca an Bheartais Mhuirí Chomhtháite is ea an Treoir Réime um Straitéis Mhuirí ina gceanglaítear dul i ngleic le tionchar carnach gach gníomhaíochta ar an muirthimpeallacht. Tá an Beartas sin ábhartha maidir le hoibríochtaí ola agus gáis amach ón gcósta mar ceanglaítear ann na hábhair imní atá i ngach earnáil eacnamaíoch a nascadh leis an aidhm ghinearálta tuiscint chuimsitheach a fháil ar na haigéin, ar na farraigí agus ar limistéir chósta, d'fhonn cur chuige oibiachtúil a fhorbairt maidir leis na farraigí lena gcuirfear san áireamh gach gné eacnamaíoch, chomhshaoil agus shóisialta trí úsáid spásphleanála muirí agus muir-eolas.

(7) Tá tionscail ola agus gáis amach ón gcósta bunaithe i roinnt réigiún de chuid an Aontais, agus tá deiseanna i gcomhair forbairtí réigiúnacha nua in uiscí an Aontais. Eilimint thábhachtach i slándáil sholáthar fuinnimh an AE is ea táirgeadh ola agus gáis amach ón gcósta.

(8) Leis an gcreat rialála ilroinnte atá ann faoi láthair a bhaineann le gníomhaíochtaí amach ón gcósta san Eoraip agus leis na cleachtais sábháilteachta atá ag an tionscal faoi láthair, ní leor mar a áirithítear go n-íoslaghdófar rioscaí ó thionóiscí amach ón gcósta ar fud an Aontais, agus go dtabharfar an fhreagairt is éifeachtaí in am tráthúil i gcás in dtarlóidh tionóisc in uiscí an Aontais. Faoi na córais dliteanais atá ann cheana, d'fhéadfadh sé nach féidir an páirtí freagrach a aithint agus/nó nach féidir leis an bpáirtí sin, nó nach bhfuil sé faoi dhliteanas, na costais uile a íoc chun an damáiste a rinne sé a leigheas.

(9) De bhun Threoir 1994/22/CE ó Pharlaimint na hEorpa agus ón gComhairle an 30 Bealtaine 1994 maidir leis na coinníollacha chun údaruithe a dheonú agus a úsáid i gcomhair sirtheoireachta, taiscéalaíochta agus táirgthe hidreacarbón féadfar gníomhaíochtaí ola agus gáis amach ón gcósta a dhéanamh faoi réir údarú a fháil. Sa chomhthéacs sin, ní mór don údarás inniúil na rioscaí teicniúla agus airgeadais a bhreithniú, agus más iomchuí, an teist freagrachta, atá ag iarratasóirí atá ag lorg ceadúnas eisiach taiscéalaíochta agus táirgthe. Is gá a áirithiú agus cumas teicniúil agus airgeadais an cheadúnaí á scrúdú go scrúdóidh na húdaráis inniúla go grinn freisin a chumas oibríochtaí sábháilte agus éifeachtach a áirithiú ar bhonn leantach agus sna dálaí ar fad is féidir a thuar.

(10) Is gá a shoiléiriú maidir le sealbhóirí údaruithe i gcomhair gníomhaíochtaí amach ón gcósta de bhun Threoir 94/22/CE go bhféadfaidís a bheith ina 'oibreoirí freagracha' laistigh de bhrí Threoir 2004/35/CE ó Pharlaimint na hEorpa agus ón gComhairle an 21 Aibreán 2004 maidir le dliteanas comhshaoil i ndáil le damáiste comhshaoil a chosc agus a leigheas[16], go bhféadfadh sé nach bhfuil siad i dteideal a bhfreagrachtaí a tharmligean ina thaobh sin chuig tríú páirtithe atá ar conradh acu.

(11) Cé go ráthaítear le húdarú ginearálta de bhun Threoir 94/22/CE go bhfuil cearta eisiach ag an gceadúnaí taiscéaladh ola agus/nó gáis a dhéanamh, nó iad a tháirgeadh, laistigh de limistéar áirithe, is gá na hoibríochtaí iarbhír a dhéantar laistigh den limistéar sin a bheith faoi réir maoirseachta rialála leanúnaí saineolaí ag na Ballstáit chun a áirithiú go bhfuil rialuithe éifeachtacha i bhfeidhm chun mórthionóiscí a chosc, agus a dtionchar ar dhaoine, ar an gcomhshaol. agus ar shlándáil an tsoláthair fuinnimh a theorannú.

(12) I gcomhréir le Treoir 85/337/CEE, mar a leasaíodh é, a bhfuil feidhm aige maidir le gníomhaíochtaí taiscéalaíochta agus saothraithe ola agus gáis, tionscadail is dealraitheach go mbeidh éifeachtaí suntasacha acu ar an gcomhshaol de bharr, inter alia, a gcineáil, a méide nó a suímh, cuirtear iad faoi réir measúnú maidir lena n‑éifeachtaí agus faoi réir ceanglais i gcomhair toiliú chun iad a fhorbairt. I gcomhréir le Treoir 85/337/CEE i gcás ina bhfuil gníomhaíocht faoi réir toilliú chun é a fhorbairt ba cheart rannpháirtíocht éifeachtach don phobal a sholáthar i gcomhréir le Coinbhinsiún Choimisiún Eacnamaíoch na Náisiún Aontaithe don Eoraip maidir le Rochtain ar Fhaisnéis, Rannpháirtíocht an Phobail i gCinnteoireacht agus Rochtain ar Cheartas i gCúrsaí Comhshaoil.

(13) Laistigh den Aontas, is ann do shamplaí cheana féin de dhea-chaighdeáin i gcleachtais rialála náisiúnta i ndáil le gníomhaíochtaí ola agus gáis amach ón gcósta. Ní chuirtear iad i bhfeidhm go comhsheasmhach ar fud an Aontais áfach, agus níl na dea-chleachtais rialála ar fad ionchorpraithe ag Ballstát ar bith ina reachtaíocht i gcomhair mórthionóiscí amach ón gcósta a chosc nó na hiarmhairtí a bhaineann leo do dhaoine agus don chomhshaol a theorannú. Ba cheart do dhea-chleachtais rialála rialáil éifeachtach a áirithiú maidir le sábháilteacht agus an comhshaol trí fheidhmeanna gaolmhara a chomhtháthú i gcomhúdarás inniúil ("an t-údarás inniúil") ar féidir leis acmhainní a fháil ó ghníomhaireacht náisiúnta amháin nó níos mó.

(14) Nuair a dheonaítear cearta don oibreoir ceadúnaithe taiscéaladh ola agus gáis a dhéanamh, nó iad a asbhaint, ba cheart don Bhallstát an chumhacht dhlíthiúil agus na hacmhainní cuí a thabhairt don údarás inniúil ionas gur féidir leis bearta forghníomhaithe a dhéanamh, lena n‑áirítear oibríochtaí a stopadh chun cosaint iomchuí a áirithiú d'oibrithe agus don chomhshaol.

(15) Éifeachtacht an údaráis inniúil i dtaobh rialuithe an cheadúnaí nó an oibreora ar mhórghuaiseacha, baineann sé go díreach le beartas rialála, córais agus saineolas an údaráis inniúil i ndáil le mórghuaiseacha. D'ainneoin chearta an oibreora cheadúnaithe taiscéaladh ola agus gáis a dhéanamh, nó iad a asbhaint, ba cheart an chumhacht a thabhairt don údarás inniúil bearta forghníomhaithe a dhéanamh, lena n‑áirítear oibríochtaí a stopadh chun cosaint iomchuí a áirithiú d'oibrithe agus don chomhshaol. Chun na feidhmeanna sin a chur i gcrích teastaíonn ón údarás inniúil go soláthróidh an Ballstát acmhainní leordhóthanacha.

(16) Chun dealú iomchuí a choinneáil idir forbairt eacnamaíoch agus rialáil chomhshaoil agus sábháilteachta ba cheart don údarás inniúil a bheith in ann a léiriú go bhfuil sé neamhspleách ó urraíocht eacnamaíoch náisiúnta.

(17) Na mórghuaiseacha casta a bhaineann leis an tionscal ola agus gáis amach ón gcósta, go háirithe maidir le sábháilteacht phróisis, srianadh sábháilte ar hidreacarbóin, sláine struchtúrach, cosc ar dhóiteán agus ar phléascadh, aslonnú, éalú agus tarrtháil agus teorannú an tionchair ar an gcomhshaol i ndiaidh mórthionóisce, teastaíonn rialáil spriocdhírithe agus saincheaptha uatha chun dul i ngleic leis na guaiseacha sonracha a bhaineann leis an earnáil ola agus gáis amach ón gcósta.

(18) Ba cheart feidhm a bheith ag an Rialachán seo gan dochar d'aon cheanglais faoi aon reachtaíocht eile de chuid an Aontais, go háirithe i réimse sláinte agus sábháilteachta oibrithe ag an obair, go háirithe Treoir 89/391/CE ón gComhairle an 12 Meitheamh 1989 maidir le bearta a thabhairt isteach chun feabhsuithe ar shábháilteacht agus ar shláinte oibrithe ag an obair a spreagadh[17] agus Treoir 92/92/CEE ón gComhairle an 3 Samhain 1992 maidir leis na híoscheanglais chun sábháilteacht agus sláinte oibrithe sna tionscail asbhainte mianraí trí dhruileáil (an t-aonú Treoir aonair déag laistigh de bhrí Airteagal 16(1) de Threoir 89/391/CEE)[18].

(19) Ní mór córas easchósta a chur i bhfeidhm ar oibríochtaí arna ndéanamh ar ghléasraí seasta agus ar ghléasraí soghluaiste araon, agus ní mór é a chur i bhfeidhm ar shaolré na ngníomhaíochtaí taiscéalaíochta agus táirgthe ó thráth a gceaptar iad go dtí an tráth a dhéantar iad a dhíchoimisiúnú agus a thréigean go buan.

(20) Na cleachtais oibriúcháin is fearr dá bhfuil ar fáil faoi láthair chun mórthionóiscí a chosc in oibríochtaí ola agus gáis amach ón gcósta, tá siad bunaithe ar thorthaí inmhianta a bhaint amach trí mheasúnú críochnaitheach a dhéanamh ar riosca agus trí chórais iontaofa bainistíochta.

(21) De réir dhea‑chleachtais oibriúcháin an Aontais ní mór d'úinéirí agus/nó d'oibreoirí gléasraí, lena n‑áirítear rigí druileála soghluaiste, beartas corparáideach éifeachtach agus socruithe oiriúnacha a bhunú chun mórthionóiscí a chosc agus chun gach cás a aithint go cuimsitheach agus go córasach, ar cás mórghuaise é a bhaineann le gníomhaíochtaí guaiseacha is féidir a dhéanamh ag an ngléasra sin. De réir na ndea-chleachtas sin ní mór freisin measúnú a dhéanamh ar na cásanna sin ó thaobh a dhealraithí atá siad, ó thaobh na n-iarmhairtí a bhainfeadh leo agus ó thaobh na rialuithe a theastaíonn uathu, laistigh de chóras bainistíochta sábháilteachta cuimsitheach. Ba cheart tuairisc fhollasach a thabhairt ar an mbeartas agus ar na socruithe sin i ndoiciméad ("an Tuarascáil ar Mhórghuaiseacha"). Ba cheart an Tuarascáil ar Mhórghuaiseacha a bheith inchomparáide agus comhlántach leis an doiciméad sábháilte agus sláinte dá dtagraítear i dTreoir 92/92/CE agus ba cheart forálacha a bheith ann freisin maidir le measúnú riosca chomhshaoil agus pleananna éigeandála. Ba cheart an Tuarascáil ar Mhórghuaiseacha a chur faoi bhráid an údaráis inniúil i gcomhair nós imeachta an toilithe.

(22) Chun éifeachtacht na rialuithe rioscaí mórthionóisce in uiscí an Aontais a choinneáil, is gá Tuarascálacha ar Mhórghuaiseacha a ullmhú maidir le haon ghné shuntasach i saolré gléasra tháirgthe, lena n-áirítear an dearadh, oibríocht, comhoibríochtaí le gléasraí eile, modhnuithe móra, agus an tréigean deiridh. Is gá an Tuarascáil ar Mhórghuaiseacha a chur faoi bhráid an údaráis inniúil sa chaoi nach bhféadfaidh leanúint leis na hoibríochtaí ach amháin má ghlacann an t-údarás inniúil leis an tuarascáil trí bhíthin nós imeachta an toilithe atá iomchuí.

(23) Níor cheart druileáil ná deisiú tobar ola agus gáis a ghabháil de láimh ach amháin le gléasraí ag a bhfuil an cumas teicniúil gach guais intuartha ag suíomh an tobair a rialú, agus ag a bhfuil Tuarascáil ar Mhórghuaseacha lenar glacadh.

(24) Chomh maith le gléasra oiriúnach a úsáid, ba cheart d'oibreoir an tobair pleananna mionsonraithe a ullmhú atá ábhartha maidir leis na himthosca agus leis na guaiseacha ar leith a bhaineann le gach oibríocht tobair agus, i gcomhréir le dea-chleachtais san Aontais, soláthar a dhéanamh do scrúdú saineolach neamhspleách ar dhearadh an tobair. Ba cheart d'oibreoir an tobair fógra a thabhairt don údarás inniúil maidir lena phleananna tráthúil go leor go bhféadfaidh an t-údarás inniúil aon bheart is gá a dhéanamh i dtaobh na hoibríochta tobair atá beartaithe.

(25) Chun sábháilteacht an deartha agus oibríochtaí sábháilte a áirithiú, ní mór don tionscal na cleachtais is fearr dá bhfuil ar fáil a leanúint mar atá siad sainithe i gcaighdeáin údarásacha agus i dteoir údarásacha, agus ní mór iad a thabhairt chun dáta de réir eolais nua agus aireagán nua agus de bhun feabhais leanúnaigh ionas go mbeidh oibreoirí agus údaráis innniúla ag obair i gcomhar a chéile chun tosaíochtaí a bhunú chun caighdeáin agus Treoir atá nua nó feabhsaithe a chrúthú i bhfianaise na táithí ó thionóisc Deepwater Horizon agus ó thionóiscí suntasacha eile amach ón gcósta, agus ba cheart dóibh ullmhú na gcaighdeán agus na treorach dá dtugtar ardtosaíocht a choimisiúnú gan mhoill.

(26) I bhfianaise a chasta atá oibríochtaí ola agus gáis amach ón gcósta, chun go gcuirfidh na hoibreoirí na dea‑chleachtais chun feidhme is gá scéim fíorúcháin neamhspleách ag tríú páirtí ar na heilimintí atá criticiúil don tsábháilteacht.

(27) Na dea-chleachtais nach mór a chur i bhfeidhm san Aontas, ní mór dóibh, i ndáil le gléasraí neamhtháirgthe soghluaiste, ceanglais Rialachán Uimh. 391/2009/CE a chomhlíonadh (Rialachán maidir le rialacha comhchoiteanna agus caighdeáin chomhchoiteanna d'eagraíochtaí cigireachta agus suirbhéireachta loinge), agus na caighdeáin choibhéiseacha arna nglacadh ag an Eagraíocht Mhuirí Idirnáisiúnta[19].

(28) Sa mheasúnú riosca sa Tuarascáil ar Mhórghuaiseacha ba cheart riosca don chomhshaol a chur san áireamh, lena n‑áirítear an tionchar a imríonn dálaí aeráide agus athrú aeráide ar athléimneacht gléasraí san fhadtéarma; agus ós rud é gur féidir le gníomhaíochtaí ola agus gáis amach ón gcósta i mBallstát amháin díobháil nach beag a dhéanamh don chomhshaol i mBallstát eile, is gá forálacha sonracha a bhúnú agus a chur i bhfeidhm i gcomhréir leis an gCoinbhinsiún maidir le measúnú ar an tionchar ar an gcomhshaol i gcomhthéacs trasteorann.

(29) Chun práinnfhreagairt éifeachtach a áirithiú, ba cheart d'oibreoirí pleananna práinnfhreagartha atá sonrach don suíomh a ullmhú bunaithe ar cásanna riosca agus guaise arna n-aithint sa Tuarascáil ar Mhórghuaiseacha, iad a chur faoi bhráid na n-údarás inniúil, agus na hacmhainní is gá a choinneáil chun na pleanna sin a chur i gcrích nuair is gá sin.

(30) Chun a áirithiú nach ndéanfar dearmad ar aon chúis ábhartha imní i dtaobh sábháilteachta, ná neamhaird di, tá sé den tábhacht modhanna leordhóthanacha a bhunú agus a spreagadh chun na hábhair imní sin a thuairisciú agus chun sceithirí a chosaint.

(31) Is deacair sonraí inchomparáide a chomhroinnt idir na Ballstáit toisc nach ann d'fhormáid choiteann sna Ballstáit ar fad chun sonraí a thuairisciú. Le formáid choiteann d'oibreoirí chun sonraí a thuairisciú chuig an mBallstát sholáthrófaí trédhearcacht maidir le sábháilteacht agus feidhmíocht chomhshaoil na n‑oibreoirí agus thabharfaí rochtain don phobal ar fhaisnéis ábhartha agus inchomparáide ón Aontas ar fad maidir le sábháilteacht ghníomhaíochtaí ola agus gáis amach ón gcósta agus chuideodh sé na ceachtanna a foghlamaíodh le linn mórthionóiscí agus neastionóiscí a scaipeadh.

(32) Chun coinníollacha aonfhoirmeacha a áirithiú maidir le comhroinnt faisnéise agus maidir le trédhearcacht a spreagadh i bhfeidhmíocht na hearnála easchósta, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle an 16 Feabhra 2011 lena leagtar síos na rialacha agus prionsabail ghinearálta a bhaineann leis na sásraí maidir le rialú ag na Ballstáit ar fheidhmiú cumhachtaí cur chun feidhme ag an gCoimisiún[20].

(33) Ba cheart an nós imeachta comhairliúcháin a úsáid chun gníomhartha cur chun feidhme ábhartha a ghlacadh d’fhonn malartú comhsheasmhach sonraí ábhartha a áirithiú ar fud an Aontais.

(34) Chun muinín an phobail a chothú in údarás agus in iomláine gníomhaíochtaí amach ón gcósta ar fud an Aontais, ba cheart do na Ballstáit tuarascálacha a sholáthar faoi ghníomhaíochtaí agus faoi theagmhais agus cuirfidh siad an Coimisiún ar an eolas faoi aon mhórthionóiscí gan mhoill, agus ba cheart don Choimisiún tuarascálacha a fhoilsiú go tréimhsiúil ar leibhéil na gníomhaíochta san AE agus ar threochtaí i bhfeidhmíocht sábháilteachta agus chomhshaoil na hearnála easchósta.

(35) Léiríonn taithí gur gá rúndacht sonraí íogaire a áirithiú chun idirphlé oscailte a chothú idir an t‑údarás inniúil agus an t‑oibreoir. Chuige sin, ba cheart idirphlé idir oibreoirí easchósta agus na Ballstáit uile a bhunú ar ionstraimí ábhartha idirnáisiúnta atá ann cheana agus ar acquis an AE maidir le rochtain ar fhaisnéis atá ábhartha ó thaobh an chomhshaoil de, faoi réir aon cheanglais sháraithigh maidir le sábháilteacht agus cosaint an chomhshaoil.

(36) Léiríonn gníomhaíochtaí Fhóram na nÚdarás easchósta sa Mhuir Thuaidh agus Fhóram na Rialtóirí Idirnáisiúnta go soiléir luach na comhpháirtíochta idir údaráis easchósta. Ba cheart comhpháirtíocht den sórt sin a bhunú go foirmeálta ar fud an Aontais chun comhpháirtíocht éifeachtúil idir ionadaithe náisiúnta agus an Coimisiún a chur chun cinn ar leibhéal na hoibre.

(37) Beidh pleanáil práinnfhreagartha agus pleanáil theagmhasach do thubaistí móra amach ón gcósta níos éifeachtaí mar gheall ar chomhar córasach pleanáilte idir na Ballstáit agus idir na Ballstáit agus an tionscal, chomh maith le trí shócmhainní comhoiriúnacha, lena n‑áirítear saineolas, a chomhroinnt. Maidir leis na socruithe sin, nuair is iomchuí ba cheart úsáid a bhaint as na hacmhainní agus as an gcúnamh atá ann cheana san Aontas, go háirithe tríd an nGníomhaireacht Eorpach um Shábháilteacht Mhuirí agus trí Mheicníocht an AE um Chosaint Shibhialta.

(38) Agus na hoibleagáidí faoin Rialachán seo á gcur chun feidhme, ba cheart a mheas go bhfuil na huiscí muirí atá cumhdaithe faoi cheannasacht nó dlínse Ballstát ina gcuid dhílis de na ceithre réigiún mhuirí atá sainaitheanta in Airteagal 4(1) de Threoir 2008/56, is iad sin Muir Bhailt, an tAigéan Atlantach Thoir Thuaidh, an Mheánmhuir agus an Mhuir Dhubh. Ar an ábhar sin, ba cheart comhordú a neartú le tríú tíortha a bhfuil ceannasacht nó dlínse acu ar uiscí sna réigiúin mhuirí sin. Áirítear coinbhinsiúin réigiúnacha farraige, a shainítear in Airteagal 3(10) de Threoir 2008/56, i gcreataí iomchuí comhair.

(39) Maidir leis an Mheánmhuir, i dteannta an Rialacháin reatha, tá na gníomhaíochtaí riachtanacha á ndéanamh d'aontachas an Aontais Eorpaigh leis an bPrótacal maidir le Cosaint na Meánmhara ar Thruailliú ó Thaiscéalaíocht agus ó Shaothrú na Scairbhe Ilchríochaí agus Ghrinneall na Farraige agus a Fho-ithreach (‘an Prótacal easchósta’) a ghabhann leis an gCoinbhinsiún maidir le Cosaint Mhuirthimpeallacht agus Réigiún Cósta na Meánmhara (‘Coinbhinsiún Barcelona’), a formheasadh le Cinneadh 77/585/CEE ón gComhairle[21].

(40) Ní mór díriú go speisialta ar na ceisteanna tromchúiseacha comhshaoil a bhaineann leis na huiscí Artacha, ar muirthimpeallacht chomharsanach é sin a bhfuil tábhacht ar leith ag baint leis don Chomhphobal, chun cosaint chomhshaol an Artaigh a áirithiú maidir le haon ghníomhaíochtaí amach ón gcósta, lena n‑áirítear taiscéalaíocht.

(41) Ba cheart pleananna práinnfhreagartha seachtracha náisiúnta a bhunú ar mheasúnuithe riosca arna ndéanamh chun an tuarascáil ar mhórghuaiseacha a ullmhú. Ba cheart na Treoracha Measúnaithe agus Mapála Riosca is déanaí maidir le bainistíocht tubaistí (Doiciméad Inmheánach Oibre an Choimisiúin SEC(2010) 1626 leagan críochnaitheach an 21.12.2010) a chur san áireamh sna pleananna práinnfhreagartha suíomhoiriúnaithe gaolmhara chun tionóiscí a shrianadh.

(42) Chun práinnfhreagairt éifeachtach a áirithiú is gá don oibreoir beart a dhéanamh láithreach agus a bheith i ndlúthchomhar le húdaráis inniúla a chomhordaíonn tabhairt isteach acmhainní breise práinnfhreagartha de réir mar a thagann forbairt ar an scéal. Is gá freisin an phráinn a imscrúdú go críochnaitheach, imscrúdú ar cheart a thosú gan mhoill lena áirithiú go gcailltear an méid is lú faisnéise agus fianaise ábhartha is féidir. Tar éis an teagmhais, ba cheart d'údaráis inniúla teacht ar thátal iomchuí agus aon bhearta is gá a dhéanamh.

(43) Chun a áirithiú go gcuirfear ceanglais an Rialacháin seo chun feidhme go héifeachtach, ba cheart smachtbhannaí éifeachtacha comhréireacha a chur i bhfeidhm.

(44) Chun na híoscheanglais atá beartaithe a chur in oiriúint do na forbairtí is deireanaí sa teicneolaíocht agus sna cleachtais ábhartha, ba cheart cumhacht a thabhairt don Choimisiún na ceanglais sna hIarscríbhinní a ghabhann leis an Rialachán seo a leasú i gcomhréir leis an nós imeachta dá dtagraítear in Airteagal 4 den Rialachán (AE) Uimh. 182/2011.

(45) Dá bhrí sin, chun mórthionóiscí a bhaineann le gníomhaíochtaí ola agus gáis amach ón gcósta a chosc agus chun iarmhairtí na ngníomhaíochtaí sin a laghdú, ba cheart an chumhacht chun gníomhartha a ghlacadh i gcomhréir le hAirteagal 4 de Rialachán (AE) Uimh. 182/2011 a tharmligean chuig an gCoimisiún i ndáil leis an sainmhíniú ar na buncheanglais íosta a bhaineann leis na hoibríochtaí sin de réir na bprionsabal a luaitear sa Rialachán seo agus go háirithe sna hIarscríbhinní. Tá sé ríthábhachtach go rachadh an Coimisiún i mbun comhairliúchán iomchuí mar chuid den obair ullmhúcháin, lena n-áirítear ar leibhéal na saineolaithe.

(46) Ba cheart don Choimisiún a áirithiú, agus gníomhartha tarmligthe á n-ullmhú agus á dtarraingt suas aige, go ndéanfar na doiciméid ábhartha a tharchur an tráth céanna, go tráthúil agus go hiomchuí chuig Parlaimint na hEorpa agus chuig an gComhairle.

(47) Cé is moite de na bearta a thugtar isteach leis an Rialachán seo, ba cheart don Choimisiún bealaí iomchuí eile a fhiosrú chun teagmhais ola agus gáis amach ón gcósta a chosc agus chun éifeachtaí na dteagmhas sin a mhaolú.

(48) Toisc nach bhféadfaidh aon ionstraimí slándála airgeadais atá ann cheana, lena n‑áirítear socruithe chun rioscaí a chomhthiomsú, freastal ar iarmhairtí féideartha uile tionóiscí foircneacha, ba cheart don Choimisiún tuilleadh anailíse agus staidéar a dhéanamh ar na bearta iomchuí chun córas dliteanais atá láidir go leor a áirithiú maidir le damáistí a bhaineann le hoibríochtaí ola agus gáis amach ón gcósta, agus chun ceanglais a áirithiú maidir le hacmhainn airgeadais, lena n‑áirítear ionstraimí slándála airgeadais leithghafa nó socruithe eile.

(49) Ar leibhéal an Aontais, is tábhachtach go gcomhlánaítear caighdeáin theicniúla le creat dlíthiúil comhfhreagrach reachtaíochta maidir le sábháilteacht táirgí a mbeidh feidhm aige maidir le gach gléasra amach ón gcósta in uiscí an Aontais, seachas maidir le gléasra táirgthe doghluaiste amháin. Ba cheart don Choimisiún, mar sin, tuilleadh anailíse a dhéanamh ar na caighdeáin sábháilteachta táirgí is infheidhme maidir le hoibríochtaí ola agus gáis amach ón gcósta.

TAR ÉIS AN RIALACHÁN SEO A GHLACADH:

Caibidil I Forálacha tosaigh

Airteagal 1 Ábhar agus raon feidhme

1. Leis an Rialachán seo bunaítear íoscheanglais don tionscal agus d'údaráis náisiúnta a bhfuil baint acu le hoibríochtaí ola agus gáis amach ón gcósta a dhéantar ar údarú a fháil de bhun Threoir 94/22/CE.

2. Tá feidhm ag an Rialachán seo maidir leis na hoibríochtaí ola agus gáis go léir amach ón gcósta a shainítear in Airteagal 2.

3. Tá feidhm ag an Rialachán seo maidir le gach gléasra gaolmhar, gléasraí fo-mhuirí agus bonneagar nasctha in uiscí na mBallstát lena n‑áirítear ina limistéir eacnamaíocha eisiacha agus ar a scairbheacha ilchríochacha laistigh de bhrí Choinbhinsiún na Náisiún Aontaithe maidir le Dlí na Farraige.

4. Is é is aidhm don Rialachán seo cur le baint amach chuspóirí Threoir 2008/56/CE ó Pharlaimint na hEorpa agus ón gComhairle lena mbunaítear creat do ghníomhaíocht Chomhphobail i réimse an bheartais muirthimpeallachta.

5. Beidh feidhm ag forálacha an Rialacháin seo gan dochar do reachtaíocht ábhartha an Aontais, go háirithe maidir le sláinte agus sábháilteacht oibrithe ag obair, agus go sonrach Treoir 89/391/CEE agus 92/92/CEE ón gComhairle.

6. Beidh feidhm ag an Rialachán seo gan dochar do Threoir 85/337/CE, Treoir 2008/1/CE ná Treoir 2003/4/CE.

Airteagal 2 Sainmhínithe

Chun críche an Rialacháin seo:

1. ciallóidh 'inghlactha': riosca mórthionóisce a dhéanamh infhulaingthe a mhéid is féidir, sa mhéid is nach dtiocfadh aon laghdú suntasach ar an riosca dá gcaithfí tuilleadh ama, acmhainní nó airgid leis;

2. ciallóidh 'glacadh': go gcuirfidh an t‑oibreoir in iúl i scríbhinn don údarás inniúil conclúidí dearfacha a scrúdú ar Thuarascáil an oibreora ar Mhórghuaiseacha de bhun cheanglais an Rialacháin seo;

3. ciallóidh 'údarú': údarú de bhun Threoir 94/22/CE;

4. ciallóidh 'comhoibríocht': oibríocht a dhéantar ar ghléasra neamhtháirgthe in éineacht le gléasra nó le gléasraí eile chun críocha a bhaineann leis an ngléasra nó leis na gléasraí eile agus a dhéanann difear ábhartha do shábháilteacht daoine nó do chosaint an chomhshaoil ar aon cheann de na gléasraí nó ar na gléasraí go léir;

5. ciallóidh 'tús oibríochtaí': an pointe ama ina bhfuil baint ag an ngléasra den chéad uair leis na hoibríochtaí dá bhfuil sé ceaptha;

6. ciallóidh 'údarás inniúil': an t‑údarás arna cheapadh de bhun an Rialacháin seo agus atá freagrach as dualgais a bhaineann lena raon feidhme;

7. ciallóidh 'bonnegar nasctha': trealamh amach ón gcósta, píblíne nó gléasra éigin eile os cionn dhromchla an uisce nó thíos faoi a úsáidtear chun ola agus gás a iompar chuig gléasra eile in aice láimhe, chuig saoráid stórála nó próiseála amach ón gcósta nó a úsáidtear chun ola a iompar chuig tancaer tointeála nó chun í a lódáil air;

8. ciallóidh 'nós imeachta an toilithe': nós imeachta lena ndéantar measúnú críochnaitheach ar an bhfaisnéis ábhartha go léir a bhaineann leis na hoibríochtaí ola agus gáis amach ón gcósta atá beartaithe ag an údarás inniúil, agus a thugann an t‑údarás inniúil i gcrích trí ghlacadh leis an tuarascáil ar mhórghuaiseacha mura ndéantar aon agóidí i gcoinne fógraí maidir le hoibríochtaí tobair nó comhoibríochtaí arna gcur isteach ag oibreoirí;

9. ciallóidh 'limistéar eisiaimh': an limistéar mórthimpeall an ghléasra arna bhunú ag an mBallstát ina dtoirmeasctar gníomhaíochtaí neamhghaolmhara;

10. ciallóidh 'ceadúnas taiscéalaíochta': údarú arna dheonú ag an mBallstát chun ola agus gás a thaiscéaladh sna strataim faoi thalamh de chuid an limistéir cheadúnaithe, ach ní údaraítear leis ola agus gás a tháirgeadh chun críocha tráchtála;

11. ciallóidh 'plean práinnfhreagartha seachtrach': straitéis áitiúil, náisiúnta nó réigiúnach chun méadú ar thionóisc a bhaineann le hoibríochtaí ola agus gáis amach ón gcósta a chosc nó chun iarmhairtí tionóisce den chineál sin a theorannú, ar straitéis í a úsáideann na hacmhainní uile atá ar fáil chomh maith leis na hacmhainní a bhfuil cur síos orthu i bpleananna práinnfhreagartha inmheánacha;

12. ciallóidh 'fíorú neamhspleách tríú páirtí': measúnú ar bhailíocht ráiteas scríofa ar leith agus daingniú go bhfuil siad bailí, arna ndéanamh ag duine nádúrtha nó dlítheanach nach bhfuil faoi rialú ná faoi thionchar údar na ráiteas;

13. ciallóidh 'tionscal': cuideachtaí príobháideacha atá bainteach go díreach le gníomhaíochtaí ola agus gáis amach ón gcósta de bhun an Rialacháin seo nó cuideachtaí príobháideacha a bhfuil dlúthbhaint ag a ngníomhaíochtaí leis na hoibríochtaí sin;

14. ciallóidh 'gléasra': gléasra táirgthe nó gléasra neamhtháirgthe;

15. ciallóidh 'plean práinnfhreagartha inmheánach': forléargas arna ullmhú ag oibreoirí de bhun cheanglais an Rialacháin seo ar na bearta a dhéantar chun méadú ar thionóisc a bhaineann le hoibríochtaí ola agus gáis amach ón gcósta laistigh de limistéar eisiaimh mórthimpeall an ghléasra a chosc nó chun iarmhairtí tionóisce den chineál sin a theorannú;

16. ciallóidh 'limistéar ceadúnaithe': an limistéar geografach atá cumhdaithe ag an údarú de bhun Threoir 94/22/CE;

17. ciallóidh 'ceadúnaí': sealbhóir an údaraithe chun oibríochtaí a dhéanamh amach ón gcósta de bhun Threoir 94/22/CE;

18. ciallóidh 'mórthionóisc': tarlú amhail dóiteán nó pléascadh, caillteanas suntasach rialaithe tobair nó éalú suntasach hidreacarbón amach sa chomhshaol, damáiste suntasach don ghléasra nó do threalamh ar an ngléasra, caillteanas sláine struchtúraí an ghléasra, agus aon teagmhas eile ina maraítear nó ina ngortaítear go dona cúigear daoine nó níos mó a oibríonn ar an ngléasra nó a oibríonn i ndáil leis an ngléasra;

19. ciallóidh 'mórghuais': cás a bhféadfadh mórthionóisc a bheith mar thoradh air;

20. ciallóidh 'gléasra neamhtháirgthe': gléasra, seachas gléasra táirgthe, a úsáidtear chun druileáil thaiscéalaíoch a dhéanamh agus mar ghléasra tacaíochta le haghaidh táirgeadh;

21. ciallóidh 'oibríochtaí ola agus gáis amach ón gcósta': na gníomhaíochtaí go léir a bhaineann le taiscéalaíocht, le táirgeadh nó le próiseáil ola agus gáis amach ón gcósta. Áirítear iompar ola agus gáis trí bhonneagar amach ón gcósta nasctha le gléasra nó le gléasra fo‑mhuirí;

22. ciallóidh 'oibreoir': oibreoir gléasra táirgthe nó úinéir gléasra neamhtháirgthe agus oibreoir an tobair i gcás oibríochta tobair. Tá an t‑oibreoir agus an ceadúnaí araon faoi réir an tsainmhínithe atá sannta dóibh in Airteagal 2(6) de Threoir 2004/35/CE;

23. ciallóidh 'oibreoir gléasra táirgthe': duine a cheapann an ceadúnaí chun príomhfheidhmeanna gléasra táirgthe a bhainistiú agus a rialú;

24. ciallóidh 'úinéir': duine a bhfuil teideal dlí aige oibríocht gléasra neamhtháirgthe a rialú;

25. ciallóidh 'táirgeadh ola agus gáis': eastóscadh ola agus gáis, chun críocha tráchtála, ó na strataim faoi thalamh sa limistéar ceadúnaithe lena n‑áirítear próiseáil ola agus gáis amach ón gcósta agus iompar na hola agus an gháis sin trí bhonneagar nasctha lena n‑áirítear trí phíopaí agus struchtúir agus trí bharra tobair ar ghrinneall na farraige agus/nó stóráil gáis i bhfoirmíochtaí fodhromchla chun an gás a shaothrú;

26. ciallóidh 'gléasra táirgthe': gléasra a úsáidtear chun ola agus gás a tháirgeadh; ;

27. ciallóidh 'ceadúnas táirgthe': údarú arna dheonú ag an mBallstát chun ola agus gás a tháirgeadh;

28. ciallóidh 'an pobal': duine nó daoine nádúrtha nó dlítheanacha agus, i gcomhréir le reachtaíocht nó le cleachtais náisiúnta, comhlachais, eagraíochtaí nó grúpaí an duine nó na ndaoine sin;

29. ciallóidh 'údarás ábhartha' (i gcomhthéacs práinnfhreagartha ar thionóisc amach ón gcósta): príomheagraíochtaí práinnfhreagartha Ballstáit, atá freagrach as práinnfhreagairt a thionscnamh ar mhórthionóisc ola agus gáis amach ón gcósta;

30. ciallóidh 'riosca': an dóchúlacht go dtarlódh teagmhas sonrach laistigh de thréimhse sonrach nó in imthosca sonraithe;

31. ciallóidh 'oiriúnach': go hiomlán iomchuí maidir le ceanglas nó cás ar leith agus bunaithe ar fhianaise oibiachtúil agus léirithe le hanailís, le comparáid le caighdeáin iomchuí nó le réitithe eile arna n‑úsáid i gcásanna inchomparáide ag údaráis eile nó sa tionscal;

32. ciallóidh 'oibríocht tobair': tobar a dhruileáil chun críocha taiscéalaíochta nó táirgthe, lena n‑áirítear oibríochtaí a fhionraí, toibreacha a dheisiú nó a mhodhnú, tréigean buan, nó aon oibríocht a bhaineann le tobar agus a bhféadfadh a bheith mar thoradh uirthi go scaoilfí sreabháin de thionóisc nó go dtarlódh mórthionóisc;

33. ciallóidh 'oibreoir tobair': an duine a cheapann an ceadúnaí chun oibríocht tobair a phleanáil agus a chur i gcrích.

Caibidil II Mórghuaiseacha a bhaineann le gníomhaíochtaí ola agus gáis amach ón gcósta a chosc

Airteagal 3 Prionsabail ghinearálta maidir le bainistíocht riosca i ngníomhaíochtaí ola agus gáis amach ón gcósta

1. Déanfaidh oibreoirí gach beart oiriúnach chun oibríochtaí ola agus gáis a chosaint ó mhórthionóiscí. Déanfaidh údaráis inniúla maoirseacht lena chinntiú go gcomhlíonann oibreoirí an oibleagáid sin.

2. Gach eintiteas a bhfuil conradh aige cúraimí sonracha a chur i gcrích ag na gléasraí lena mbaineann, áiritheoidh oibreoirí go ngníomhóidh na heintitis sin freisin i gcomhréir leis na ceanglais atá leagtha amach sa Rialachán seo, go háirithe leis na hIarscríbhinní IV agus V. Ní shaorfar oibreoirí óna bhfreagrachtaí faoin Rialachán seo toisc gurbh iad na heintitis sin nó a bpearsanra a rinne gníomhartha nó neamhghníomhartha as ar tháinig mórthionóiscí nó a chuir le mórthionóiscí.

3. Dá dtarlódh mórthionóisc mar sin féin, déanfaidh oibreoirí agus údaráis inniúla gach beart oiriúnach chun tionchar na tionóisce ar shláinte an duine agus ar an gcomhshaol a theorannú agus chun cur isteach go mór ar tháirgeadh ola agus gáis san Aontas a sheachaint.

4. Aon ghníomhaíochtaí ola agus gáis amach ón gcósta a chumhdaítear faoin Rialachán seo, déanfar iad ar bhonn measúnú córasach ar an dóchúlacht go dtarlódh teagmhais ghuaiseacha agus ar iarmhairtí na dteagmhas sin, agus ar bhonn cur chun feidhme beart rialaithe ionas go mbeidh na rioscaí mórthionóiscí do dhaoine, don chomhshaol agus do shócmhainní amach ón gcósta inghlactha.

Airteagal 4 Cúrsaí sábháilteachta atá le cur san áireamh agus údarú á thabhairt le haghaidh gníomhaíochtaí ola agus gáis amach ón gcósta de bhun Threoir 94/22/CE;

1. Agus cinneadh á dhéanamh maidir le húdarú a thabhairt le haghaidh gníomhaíochtaí ola agus gáis amach ón gcósta de bhun Threoir 94/22/CE, cuirfear san áireamh cumas na n‑iarratasóirí na ceanglais a bhaineann le gníomhaíochtaí sonracha faoi chuimsiú an údaraithe sin a chomhlíonadh de réir mar a cheanglaítear faoi fhorálacha ábhartha dlí an Aontais, go háirithe sa Rialachán seo.

2. Go sonrach, nuair a dhéantar measúnú ar acmhainn theicniúil agus airgeadais na n‑eintiteas atá ag iarraidh údarú le haghaidh gníomhaíochtaí ola agus gáis amach ón gcósta, tabharfar aird chuí ar an riosca, ar na guaiseacha agus ar aon fhaisnéis ábhartha eile a bhaineann leis an limistéar lena mbaineann agus leis an gcéim shonrach de na hoibríochtaí taiscéalaíochta agus táirgthe agus tabharfar aird chuí freisin ar acmhainn airgeadais na n‑iarratasóirí, lena n‑áirítear aon urrús airgeadais agus acmhainn na n‑iarratasóirí aon dliteanas a chlúdach a d’fhéadfadh teacht as na gníomhaíochtaí ola agus gáis amach ón gcósta i gceist, go háirithe dliteanas i gcás damáiste don chomhshaol.

3. Tabharfar ar leithligh údaraithe le haghaidh oibríochtaí ola agus gáis amach ón gcósta agus údaraithe le haghaidh oibríochtaí táirgthe.

4. Agus measúnú á dhéanamh ag údaráis cheadúnaithe de bhun Threoir 94/22/CE ar acmhainn theicniúil agus airgeadais na n‑eintiteas a dhéanann iarratas ar údarú le haghaidh gníomhaíochtaí ola agus gáis amach ón gcósta, cuirfidh na húdaráis cheadúnaithe sin san áireamh na rioscaí, na guaiseacha agus aon fhaisnéis ábhartha eile a bhaineann leis an suíomh lena mbaineann agus leis an gcéim shonrach de na hoibríochtaí taiscéalaíochta agus táirgthe.

Airteagal 5 Rannpháirtíocht an phobail i nósanna imeachta ceadúnaithe

1. Áiritheoidh na Ballstáit go dtabharfar deiseanna luatha éifeachtacha don phobal a bheith páirteach sna nósanna imeachta a bhaineann le nósanna imeachta ceadúnaithe ina ndlínse féin i gcomhréir le ceanglais Iarscríbhinn I a ghabhann leis an Rialachán seo. Is iad na nósanna imeachta atá leagtha síos in Iarscríbhinn II de Threoir 2003/35/CE a bheidh i gceist.

2. Féadfaidh na Ballstáit socruithe níos mionsonraithe a leagan síos maidir leis an bpobal a chur ar an eolas agus maidir le dul i gcomhairle leis an bpobal lena mbaineann.

3. Eagrófar rannpháirtíocht an phobail sa dóigh is go n‑áiritheofar nach gcuireann nochtadh faisnéise agus páirteachas an phobail sábháilteacht agus slándáil gléasraí ola agus gáis amach ón gcósta i mbaol ná nach gcuirtear oibríocht na ngléasraí sin i mbaol.

Airteagal 6 Toiliú le hoibríochtaí ola agus gáis amach ón gcósta laistigh de limistéir cheadúnaithe

1. Ní dhéanfar gléasraí a oibriú i limistéir cheadúnaithe ach amháin ag ceadúnaithe, nó ag eintitis atá ceaptha agus a bhfuil conradh acu chun na críche sin agus atá formheasta ag na Ballstáit.

2. Nuair a mheasann an t‑údarás inniúil nach bhfuil an duine arna cheapadh ag an gceadúnaí inniúil chun bheith ag gníomhú mar oibreoir gléasra nó mar oibreoir tobair, cuirfear é sin in iúl don cheadúnaí agus glacfaidh sé chuige féin freagrachtaí an oibreora de bhun an Rialacháin seo.

3. Ní fhéadfaidh gléasraí de bhun mhír 1 oibríochtaí a thosú ná leanúint le hoibríochtaí sula gcuirtear Tuarascáil ar Mhórghuaiseacha isteach de bhun na gcoinníollacha agus na spriocanna a shainítear in Airteagal 10 agus in Airteagal 11 agus sula nglacann an t‑údarás inniúil léi de bhun an Rialacháin seo.

4. Ní fhéadfar tabhairt faoi oibríochtaí tobair ná comhoibríochtaí ach amháin má ghlactar ar tús leis an Tuarascáil ar Mhórghuaiseacha don ghléasra de bhun mhír 3 den Airteagal seo. Ina theannta sin, ní fhéadfar oibríochtaí a thosú ná a dhéanamh mura ndéantar fógra maidir le hoibríochtaí tobair nó comhoibríochtaí de bhun na gcoinníollacha agus na spriocanna a shainítear in Airteagal 13 agus in Airteagal 14 a chur faoi bhráid an údaráis inniúil nó má dhéanann an t‑údarás inniúil agóidí i gcoinne ábhar an fhógra.

Airteagal 7 Dliteanas i leith damáiste don chomhshaol

1. Tá an ceadúnaí faoi dhliteanas damáiste don chomhshaol a chosc agus a leigheas, de bhun Threoir 2004/35/CE, ar damáiste é a tharla mar gheall ar ghníomhaíochtaí ola agus gáis amach ón gcósta a rinne an ceadúnaí nó a rinne aon eintiteas ag glacadh páirte sna hoibríochtaí ola agus gáis amach ón gcósta ar bhonn conartha leis an gceadúnaí. Beidh nós imeachta an toilithe maidir le hoibríochtaí de bhun an Rialacháin seo gan dochar do dhliteanas an cheadúnaí.

Airteagal 8 Údarás inniúil náisiúnta

1. Ceapfaidh Ballstáit a bhfuil gníomhaíochtaí ola agus gáis amach ón gcósta á ndéanamh faoina ndlínse, ceapfaidh siad údarás inniúil a bheidh freagrach as na dualgais a leagtar síos sa Rialachán seo.

2. Beidh na húdaráis inniúla arna gceapadh de bhun mhír 1 freagrach as na cúraimí seo a leanas:

(a)     measúnú a dhéanamh ar Thuarascálacha ar Mhórghuaiseacha agus glacadh leis na tuarascálacha sin, measúnú a dhéanamh ar fhógraí maidir le dearadh, agus measúnú a dhéanamh ar fhógraí maidir le hoibríochtaí tobair nó comhoibríochtaí agus ar dhoiciméid eile den chineál sin a chuirtear faoina mbráid;

(b)     cigireachtaí a dhéanamh, imscrúduithe a dhéanamh agus gníomhartha forfheidhmithe a dhéanamh;

(c)     tuarascálacha a chur ar fáil de bhun an Rialacháin seo.

3. Eagrófar an t‑údarás inniúil i gcomhréir le forálacha Airteagal 19 chun neamhspleáchas a áirithiú maidir le feidhmiú cúraimí a d’fhéadfadh teacht salach ar a chéile agus chun saineolais agus éifeachtacht ghinearálta an rialaithe ar ghníomhaíochtaí ola agus gáis amach ón gcósta a áirithiú.

4. Áiritheoidh na Ballstáit go bhfuil acmhainní leordhóthanacha ag na húdaráis inniúla chun a gcúraimí a chomhlíonadh i gcomhréir leis an Rialachán seo.

5. Déanfaidh an t‑údarás inniúil iarracht nósanna imeachta comhordaithe nó comhpháirteacha a ullmhú agus a chur chun feidhme de réir mar is gá chun na feidhmeanna de bhun an Rialacháin seo a dhéanamh agus chun na ceanglais faoi aon reachtaíocht infheidhme eile de chuid an Aontais a chomhlíonadh. I gcás ina bhfuil roinnt gníomhaireachtaí san údarás inniúil, ba cheart dóibh dúbláil ar fheidhmeanna rialála a sheachaint.

Caibidil III Ullmhú gníomhaíochtaí ola agus gáis amach ón gcósta agus déanamh na ngníomhaíochtaí sin bunaithe ar mheasúnú riosca

Airteagal 9 Coinníollacha maidir le gléasraí amach ón gcósta a oibriú

1. Faoi réir na bhforálacha idirthréimhseacha in Airteagal 39, cuirfidh oibreoir gléasra táirgthe nó gléasra neamhtháirgthe na doiciméid seo a leanas faoi bhráid an údaráis inniúil:

(a)     i gcás gléasra táirgthe beartaithe, fógra maidir le dearadh i gcomhréir le ceanglais Iarscríbhinn II, cuid 1;

(b)     Tuarascáil ar Mhórghuaiseacha leis na mionsonraí a shonraítear in Airteagal 10 nó in Airteagal 11;

(c)     plean práinnfhreagartha inmheánach de bhun Airteagal 12, arna lánpháirtiú sa Tuarascáil ar Mhórghuaiseacha;

(d)     forléargas ar bheartas coiscthe mórthionóiscí an oibreora de bhun Airteagal 18, arna lánpháirtiú sa Tuarascáil ar Mhórghuaiseacha.

2. Gheobhaidh an t‑údarás inniúil an fógra maidir le dearadh tráth nach déanaí ná 24 seachtain roimh an tráth atá beartaithe an Tuarascáil ar Mhórghuaiseacha a chur isteach maidir leis an oibríocht atá beartaithe.

3. Tabharfar fógra don údarás inniúil faoin Tuarascáil ar Mhórghuaiseacha faoi cheann sprioc-ama arna leagan amach ag an údarás inniúil agus tabharfar an fógra sin tráth nach déanaí ná 12 sheachtain roimh an tús atá beartaithe don oibríocht.

Airteagal 10 Tuarascáil ar Mhórghuaiseacha le haghaidh gléasra táirgthe

1. Beidh na mionsonraí a shonraítear i gcuid 2 agus i gcuid 5 d’Iarscríbhinn II sa Tuarascáil ar Mhórghuaiseacha le haghaidh gléasra táirgthe.

2. Féadfar Tuarascáil ar Mhórghuaiseacha le haghaidh gléasra táirgthe a ullmhú i ndáil le grúpa gléasraí faoi réir chomhaontú an údaráis inniúil.

3. I gcás ina ndéantar modhnuithe suntasacha ar an ngléasra táirgthe, nó ina bhfuil sé beartaithe an gléasra a dhíchóimeáil, déanfar an Tuarascáil ar Mhórghuaiseacha le haghaidh gléasra táirgthe a leasú i gcomhréir le cuid 6 d’Iarscríbhinn II agus cuirfear é sin faoi bhráid an údaráis inniúil.

4. I gcás ina bhfuil gá le tuilleadh faisnéise sular féidir glacadh le Tuarascáil ar Mhórghuaiseacha, iarrfaidh an t‑údarás inniúil go gcuirfear isteach tuilleadh faisnéise nó athruithe ar na doiciméid.

5. Maidir leis an Tuarascáil leasaithe ar Mhórghuaiseacha le haghaidh gléasra táirgthe de bhun mhír 3, cuirfear sin faoi bhráid an údaráis inniúil faoi cheann sprioc‑ama arna shonrú ag an údarás inniúil agus déanfar sin tráth nach déanaí ná 6 sheachtain roimh thús na n‑oibreacha atá beartaithe. Ní chuirfear tús leis na hoibreacha atá beartaithe sula nglacann an t‑údarás inniúil leis an Tuarascáil leasaithe ar Mhórghuaiseacha le haghaidh gléasra táirgthe.

6. Beidh an Tuarascáil ar Mhórghuaiseacha le haghaidh gléasra táirgthe faoi réir athbhreithnithe thréimhsiúil ag an oibreoir gach 5 bliana ar a laghad nó níos minice de réir mar a éilíonn an t‑údarás inniúil, agus tabharfar fógra don údarás inniúil faoi thorthaí an athbhreithnithe.

Airteagal 11 Tuarascáil ar Mhórghuaiseacha le haghaidh gléasra neamhtháirgthe

1. Beidh na mionsonraí a shonraítear i gcuid 3 agus i gcuid 5 d’Iarscríbhinn II sa Tuarascáil ar Mhórghuaiseacha le haghaidh gléasra neamhtháirgthe.

2. I gcás ina ndéantar modhnuithe suntasacha ar an ngléasra neamhtháirgthe, nó ina bhfuil sé beartaithe an gléasra a dhíchóimeáil, déanfar an Tuarascáil ar Mhórghuaiseacha le haghaidh gléasra neamhtháirgthe a leasú i gcomhréir le cuid 6 d’Iarscríbhinn II (cé is moite de mhír 4) agus cuirfear é sin faoi bhráid an údaráis inniúil.

3. I gcás gléasra neamhtháirgthe bhuain, déanfar Tuarascáil leasaithe ar Mhórghuaiseacha de bhun mhír 2 a chur faoi bhráid an údaráis inniúil faoi cheann sprioc‑ama arna shonrú ag an údarás inniúil agus déanfar sin tráth nach déanaí ná 2 sheachtain roimh thús na n‑oibreacha atá beartaithe. Ní chuirfear tús leis na hoibreacha atá beartaithe sula nglacann an t‑údarás inniúil leis an Tuarascáil leasaithe ar Mhórghuaiseacha le haghaidh gléasra neamhtháirgthe.

4. I gcás gléasra neamhtháirgthe shoghluaiste, déanfar Tuarascáil leasaithe ar Mhórghuaiseacha de bhun mhír 2 a chur faoi bhráid an údaráis inniúil faoi cheann sprioc‑ama arna shonrú ag an údarás inniúil agus déanfar sin tráth nach déanaí ná 2 sheachtain roimh an tráth atá beartaithe chun oibríochtaí a thosú ar an ngléasra. Ní fhéadfar an gléasra a oibriú sula nglacann an t‑údarás inniúil leis an Tuarascáil leasaithe ar Mhórghuaiseacha le haghaidh gléasra neamhtháirgthe.

5. I gcás ina bhfuil gá le tuilleadh faisnéise sular féidir glacadh le Tuarascáil ar Mhórghuaiseacha, iarrfaidh an t‑údarás inniúil go gcuirfear isteach tuilleadh faisnéise nó athruithe ar na doiciméid.

6. Beidh an Tuarascáil ar Mhórghuaiseacha le haghaidh gléasra neamhtháirgthe faoi réir athbhreithnithe thréimhsiúil ag an oibreoir gach 5 bliana ar a laghad nó níos minice de réir mar a éilíonn an t‑údarás inniúil. Tabharfar fógra don údarás inniúil faoi thorthaí an athbhreithnithe.

Airteagal 12 Pleananna práinnfhreagartha inmheánacha

1. Ullmhóidh oibreoirí pleananna práinnfhreagartha inmheánacha ag cur san áireamh na measúnuithe ar rioscaí mórthionóisce arna ndéanamh agus an tuarascáil is déanaí ar mhórghuaiseacha á hullmhú. I gcás ina ndéantar tobar a dhruileáil ó ghléasra neamhtháirgthe soghluaiste, ba cheart an measúnú riosca de bhun an fhógra maidir le hoibríochtaí tobair a ionchorprú isteach sa phlean práinnfhreagartha don ghléasra.

2. Maidir le gléasraí táirgthe agus gléasraí neamhtháirgthe, cuirfear an plean práinnfhreagartha inmheánach isteach chuig an údarás inniúil mar chuid den Tuarascáil ar Mhórghuaiseacha.

3. Maidir le gléasraí neamhtháirgthe a thugann faoi oibríochtaí tobair sa chás ina bhfuil leasú déanta ar an bplean práinnfhreagartha inmheánach mar gheall ar shuíomh an tobair, ba cheart do na gléasraí sin an t‑údarás inniúil a chur ar an eolas faoin leasú sin ar an bplean práinnfhreagartha inmheánach nuair atá an fógra maidir le hoibríochtaí tobair á chur isteach acu.

Airteagal 13 Fógra maidir le hoibríochtaí tobair

1. Tráth nach déanaí ná 21 lá roimh thús oibríochta tobair, cuirfidh oibreoir an tobair fógra chuig an údarás inniúil ina dtabharfar mionsonraí faoi dhearadh an tobair agus faoina oibriú i gcomhréir le ceanglais chuid 4 d’Iarscríbhinn II.

2. Breithneoidh an t‑údarás inniúil an fógra agus déanfaidh sé cibé beart is gá dar leis sula bhféadfar an oibríocht tobair a thosú.

3. Tabharfaidh oibreoir an tobair fógra don údarás inniúil láithreach faoi aon athrú suntasach ar mhionsonraí an fhógra maidir le hoibríochtaí tobair agus cuirfidh sé scrúdaitheoir neamhspleách an tobair ar an eolas faoi an tráth céanna de bhun Airteagal 15(3b).

Airteagal 14 Fógra maidir le comhoibríochtaí

1. Aon oibreoir gléasra a bheidh baint aige le comhoibríocht, cuirfidh sé fógra chuig an údarás inniúil ina dtabharfar mionsonraí faoin gcomhoibríocht i gcomhréir le ceanglais chuid 7 d’Iarscríbhinn II. D’fhéadfaidh oibreoirí na ngléasraí lena mbaineann teacht ar chomhaontú go n‑ullmhóidh duine acu an fógra maidir le comhoibríochtaí thar a gceann go léir. Cuirfear an fógra isteach tráth nach déanaí ná 21 lá roimh thús na gcomhoibríochtaí.

2. Breithneoidh an t‑údarás inniúil an fógra agus déanfaidh sé cibé beart is gá dar leis sula bhféadfar an chomhoibríocht a thosú.

3. Cuirfidh an t‑oibreoir a d’ullmhaigh an fógra an t‑údarás inniúil ar an eolas gan mhoill faoi aon athrú ar mhionsonraí an fhógra sin.

Airteagal 15 Fíorú neamhspleách tríú páirtí

1. Cuirfidh oibreoirí scéim ar bun maidir le fíorú neamhspleách tríú páirtí agus maidir le scrúdú neamhspleách toibreacha agus tabharfaidh siad tuairisc ar scéimeanna den chineál sin sa bheartas coiscthe mórthionóiscí arna ionchorprú isteach sa Tuarascáil ar Mhórghuaiseacha de bhun Airteagal 18.

2. Roghnú an fhíoraitheora neamhspleách tríú páirtí agus dearadh na scéimeanna maidir le fíorú neamhspleách tríú páirtí agus maidir le scrúdú neamhspleách toibreacha, comhlíonfaidh siad critéir chuid 5 d’Iarscríbhinn II.

3. Bunófar an scéim maidir le fíorú neamhspleách tríú páirtí i gcás gléasraí táirgthe agus neamhtháirgthe mar seo a leanas:

(a)     i gcás gléasraí, chun deimhniú a thabhairt go bhfuil na córais shonraithe agus na heilimintí atá criticiúil don tsábháilteacht arna sainaithint sna measúnuithe riosca agus go bhfuil córas bainistíochta sábháilteachta an ghléasra oiriúnach agus cothrom le dáta, agus go bhfuil an sceideal maidir le scrúdú agus tástáil an chórais rialaithe mórghuaiseacha oiriúnach, cothrom le dáta agus ag oibriú mar atá beartaithe;

(b)     i gcás pleananna tobair, chun deimhniú a thabhairt go bhfuil dearadh an tobair agus bearta rialaithe an tobair oiriúnach do na himthosca a bhfuil súil leo agus go mbeidh siad mar bhunús i gcónaí má athraíonn dearadh an tobair ar chúis éigin.

4. Áiritheoidh oibreoirí go bhfuil teacht ag an údarás inniúil ar thorthaí na scéime maidir le fíorú neamhspleách tríú páirtí de bhun an Airteagail seo faoi mhír 3(a), má iarrann an t‑údarás amhlaidh.

5. Áiritheoidh oibreoirí go n‑áireofar cinntí agus barúlacha an scrúdaitheora neamhspleách tobair de bhun an Airteagail seo faoi mhír 3(b), go n‑áireofar iad san fhógra maidir le hoibríochtaí tobair de bhun Airteagal 13.

6. Maidir le gléasraí táirgthe, beidh an scéim fíoraithe i bhfeidhm sula gcuirtear an Tuarascáil ar Mhórghuaiseacha isteach chuig an údarás inniúil. I gcás gléasra neamhtháirgthe, beidh an scéim i bhfeidhm sula gcuirfear tús le hoibríocht ar leith ar an ngléasra neamhtháirgthe.

7. Comhlíonfaidh gléasraí neamhtháirgthe in uiscí an Aontais ceanglais coinbhinsiún ábhartha idirnáisiúnta mar a shainítear i Rialachán 391/2009/CE ó Pharlaimint na hEorpa agus ón gComhairle an 23 Aibreán 2009[22] nó comhlíonfaidh siad caighdeáin choibhéiseacha an Chóid maidir le haonaid druileála shoghluaiste amach ón gcósta a thógáil agus a threalmhú (2009 MODU CODE). Déanfaidh eagraíocht atá aitheanta ag an Aontas i gcomhréir leis an Rialachán réamhluaite na gléasraí sin a dheimhniú.

Airteagal 16 Cumhacht chun gníomhaíocht a thoirmeasc

1. Toirmeascfaidh an t‑údarás inniúil oibriú aon ghléasra nó cur i bhfeidhm aon ghléasra nó aon choda de i gcás ina meastar go bhfuil na bearta atá beartaithe ag an oibreoir chun mórthionóiscí a chosc agus a mhaolú de bhun Airteagail 10, 11, 13 agus 14 mór-easnamhach.

2. I gcás nach gcuirtear an Tuarascáil ar Mhórghuaiseacha de bhun Airteagal 10 agus Airteagal 11 nó na fógraí de bhun Airteagal 13 agus Airteagal 14 isteach in am, féadfaidh an t‑údarás inniúil, i gcásanna eisceachtúla agus má mheasann sé nach gcuirfear isteach ar shábháilteacht agus ar chosaint an chomhshaoil, féadfaidh sé an teorainn ama a ghiorrú maidir le cur isteach na Tuarascála ar Mhórghuaiseacha nó maidir le cur isteach an fhógra.

3. Cuirfidh an t‑údarás inniúil de cheangal ar an oibreoir aon bhearta oiriúnacha comhlántacha a dhéanamh a mheasann an t‑údarás inniúil is gá chun comhréireacht a athbhunú de bhun mhír 1 d'Airteagal 3.

4. Toirmeascfaidh an t‑údarás inniúil úsáid aon ghléasra nó aon choda de ghléasra i gcás ina léirítear i dtorthaí cigireachta, in athbhreithniú tréimhsiúil ar an Tuarascáil ar Mhórghuaiseacha de bhun Airteagal 10 agus Airteagal 11 nó in athruithe ar fhógraí de bhun Airteagal 13 agus Airteagal 14 nach bhfuil ceanglais an Rialacháin seo á gcomhlíonadh nó go bhfuil sábháilteacht oibríochtaí nó gléasraí ina n‑ábhar imní.

Airteagal 17 Éifeachtaí trasteorann

1. I gcás ina measann Ballstát go bhféadfaidh éifeachtaí diúltacha suntasacha a bheith ag oibríocht tobair nó ag oibriú gléasra ar uiscí Ballstáit eile i gcás tionóisce, nó arna iarraidh sin do Bhallstát ar dóigh go ndéanfaí difear dó, déanfaidh an Ballstát a bhfuil na hoibríochtaí le déanamh laistigh dá dhlínse féin, déanfaidh sé an fhaisnéis ábhartha a chur ar aghaidh chuig an mBallstát a bhfuil difear déanta dó agus déanfaidh sé iarracht bearta coiscthe a ghlacadh chun damáiste a chosc.

2. Beidh cur i bhfeidhm mhír 1 gan dochar d’fhorálacha ábhartha eile de chuid Dlí an Aontais, go háirithe forálacha Threoir 85/337/CEE ón gComhairle an 27 Meitheamh 1985 maidir le measúnú a dhéanamh ar éifeachtaí tionscadal poiblí agus príobháideach áirithe ar an gcomhshaol[23] agus an Coinbhinsiún maidir le measúnú ar an tionchar ar an gcomhshaol i gcomhthéacs trasteorann.

Caibidil IV Dea-chleachtas do rialú mórghuaiseacha

Airteagal 18 Mórthionóiscí arna gcosc ag oibreoirí

1. Ullmhóidh oibreoirí doiciméad ina leagfar amach a mbeartas coiscthe mórthionóiscí, agus áiritheoidh siad go gcuirfear é chun feidhme agus a n‑oibríochtaí amach ón gcósta á n‑eagrú acu, lena n‑áirítear trí shocruithe iomchuí faireacháin a chur ar bun chun éifeachtacht an bheartais a dheimhniú.

2. Cuirfear an doiciméad de bhun mhír 1 isteach chuig na húdaráis inniúla mar chuid den Tuarascáil ar Mhórghuaiseacha de bhun Airteagal 10 agus Airteagal 11 nó mar fhógra maidir le hoibríochtaí tobair de bhun Airteagal 13.

3. Tabharfaidh oibreoirí tuairisc ar a bhfuil eagraithe acu chun mórghuaiseacha a rialú i gcóras bainistíochta sábháilteachta, lena n‑áirítear socruithe maidir le tuarascálacha ar mhórghuaiseacha a ullmhú agus a chur isteach, agus fógraí maidir le hoibríochtaí tobair mar is iomchuí, de bhun Airteagail 10, 11 agus 13 agus tabharfaidh siad tuairisc ar na scéimeanna maidir le fíorú neamhspleách tríú páirtí a dhéanamh ar a rialuithe mórghuaiseacha de bhun Airteagal 15 agus de bhun chuid 5 d’Iarscríbhinn II.

4. Déanfar an beartas agus an córas bainistíochta sábháilteachta a ullmhú i gcomhréir leis na ceanglais atá leagtha amach in Iarscríbhinn IV agus cuirfidh siad in iúl go soiléir gur ar an oibreoir atá an phríomhfhreagracht maidir le rialú mórghuaiseacha a éiríonn as gníomhaíochtaí an oibreora sin.

5. Rachaidh oibreoirí i gcomhairle le hionadaithe ó na Ballstáit ábhartha go tráthrialta de bhun Airteagal 27 agus bunóidh siad tosaíochtaí don tionscal maidir le caighdeáin agus treoraíocht a ullmhú agus/nó a athbhreithniú do dhea-chleachtas i rialú mórghuaiseacha tionóisce amach ón gcósta le linn dearadh agus saolré oibrithe oibríochtaí amach ón gcósta, agus leanfaidh sé ar a laghad a bhfuil leagtha amach in Iarscríbhinn IV.

6. Déanfaidh ceadúnaithe, oibreoirí agus conraitheoirí móra atá bunaithe san Aontas iarracht a n‑oibríochtaí ola agus gáis amach ón gcósta arna ndéanamh taobh amuigh den Aontas a dhéanamh i gcomhréir leis na prionsabail atá leagtha amach sa Rialachán seo.

Airteagal 19 Ceanglais ar na húdaráis inniúla

1. Déanfaidh an t‑údarás inniúil socruithe oiriúnacha lena áirithiú go mbeadh sé neamhspleách i gcás coinbhleachtaí leasa idir sábháilteacht agus cosaint an chomhshaoil a rialú, ar láimh amháin, agus feidhmeanna maidir le forbairt eacnamaíoch an Bhallstáit ar an láimh eile, go háirithe ceadúnú gníomhaíochtaí ola agus gáis amach ón gcósta, agus beartas maidir le hioncam gaolmhar agus bailiú an ioncaim sin.

2. Cuirfidh an t‑údarás inniúil in iúl go soiléir scóip a fhreagrachtaí agus a fheidhmeanna le nach nglacfaidh sé chuige féin an phríomhfhreagracht maidir le rioscaí mórghuaiseacha a rialú, de bhun Airteagal 18, mír 3.

3. Bunóidh an t‑údarás inniúil beartas maidir le measúnú críochnaitheach ar Thuarascálacha ar Mhórghuaiseacha agus ar fhógraí de bhun Airteagal 10, 11, 13 agus 14, maidir le cigireacht, maidir le himscrúdú agus maidir le forfheidhmiú ghnéithe mórghuaiseacha na n‑oibríochtaí ola agus gáis amach ón gcósta ina dhlínse féin.

4. Bunóidh an t‑údarás inniúil a nósanna imeachta eagrúcháin agus oibríochta ar na prionsabail atá leagtha amach in Iarscríbhinn III.

Airteagal 20 An creat rialála a chomhlíonadh maidir le mórthionóiscí a chosc

1. Comhlíonfaidh oibreoirí an Rialachán seo chomh maith leis na bearta arna mbunú sa Tuarascáil ar Mhórghuaiseacha le haghaidh gléasraí táirgthe agus neamhtháirgthe agus na bearta sna pleananna dá dtagraítear san fhógra maidir le hoibríochtaí tobair agus san fhógra maidir le comhoibríochtaí, de bhun Airteagail 10, 11, 13 agus 14.

2. I gcás ina gcuirtear sláinte duine i ndlúthbhaol toisc nach gcomhlíontar forálacha mhír 1 den Airteagal seo nó má tá an neamhchomhlíonadh sin ag bagairt drochthionchar suntasach láithreacha a bheith aige ar shábháilteacht agus/nó ar an gcomhshaol, cuirfidh an t‑oibreoir oibriú an ghléasra nó oibriú an choda de atá i gceist ar fionraí go gcomhlíontar na forálacha sin arís.

3. I gcás ina ndéantar na bearta dá dtagraítear i mír 2 den Airteagal seo, cuirfidh an t‑oibreoir an t‑údarás inniúil ar an eolas faoi sin gan mhoill.

4. Déanfaidh an t‑údarás inniúil pleananna bliantúla a fhorbairt chun maoirseacht éifeachtach a dhéanamh, lena n‑áirítear trí chigireachtaí, ar ghníomhaíochtaí mórghuaiseacha bunaithe ar riosca, ag cinntiú go háirithe go bhfuil na pleananna sin i gcomhréir leis na doiciméid arna gcur isteach chuig an údarás de bhun Airteagal 9. Déanfaidh an t‑údarás faireachán ar éifeachtacht a oibre féin agus déanfaidh sé aon bhearta is gá chun í sin a fheabhsú.

Airteagal 21 Tuairisciú anaithnid imnithe a bhaineann le sábháilteacht

1. Bunóidh údaráis inniúla nósanna imeachta chun tuairisciú anaithnid a cheadú i gcás imnithe faoi shábháilteacht agus/nó faoin gcomhshaol a bhaineann le hoibríochtaí ola agus gáis amach ón gcósta. Bunóidh údaráis inniúla nósanna imeachta freisin chun na tuairiscí sin a fhiosrú gan céannacht na ndaoine lena mbaineann a nochtadh.

2. Cuirfidh oibreoirí a bhfostaithe agus fostaithe fochonraitheoirí ábhartha ar an eolas faoi mhionsonraí a socruithe náisiúnta de bhun mhír 1 agus áiritheoidh siad go ndéantar tagairt do thuairisciú anaithnid i gcúrsaí oiliúna ábhartha agus i bhfógraí.

Caibidil V Trédhearcacht agus comhroinnt faisnéise

Airteagal 22 Comhroinnt faisnéise

1. Déanfaidh oibreoirí agus údaráis inniúla an fhaisnéis a bhfuil tuairisc uirthi in Iarscríbhinn VI a chomhroinnt ar a laghad.

2. Cinnfidh an Coimisiún, trí ghníomh cur chun feidhme, formáid choiteann do thuairisciú sonraí agus mionsonraí na faisnéise atá le comhroinnt. Déanfar an gníomh cur chun feidhme sin a ghlacadh i gcomhréir leis an nós imeachta comhairliúcháin dá dtagraítear in Airteagal 4 de Rialachán (AE) Uimh. 182/2011.

3. Coimeádfaidh na Ballstáit taifid atá cothrom le dáta ar na hacmhainní práinnfhreagartha atá ar fáil ag eintitis phoiblí agus eintitis phríobháideacha araon ina ndlínse. Cuirfear na taifid sin ar fáil do na Ballstáit eile nó do thríú tíortha a d’fhéadfadh difear a dhéanamh dóibh agus don Choimisiún.

Airteagal 23 Trédhearcacht

1. Cuirfear an fhaisnéis de bhun Iarscríbhinn VI ar fáil go poiblí agus ní gá é a iarraidh de bhun fhorálacha infheidhme reachtaíocht an Aontais maidir le rochtain ar fhaisnéis faoin gcomhshaol.

2. Cinnfidh an Coimisiún freisin, trí bheart cur chun feidhme, formáid choiteann foilsithe chun comparáid éasca idir sonraí thar theorainneacha a cheadú. Déanfar an gníomh cur chun feidhme sin a ghlacadh i gcomhréir leis an nós imeachta comhairliúcháin dá dtagraítear in Airteagal 4 de Rialachán (AE) Uimh. 182/2011. Cé go mbeidh rochtain ar an bhfaisnéis ag an bpobal i gcoitinne i gcónaí, forbrófar an fhormáid choiteann foilsithe le go bhféadfar comparáid iontaofa a dhéanamh idir oibríochtaí náisiúnta agus cleachtais rialála de bhun an Airteagail seo agus de bhun Airteagal 24.

3. Agus a bpleananna práinnfhreagartha náisiúnta á bhfoilsiú ag na Ballstáit de bhun Airteagal 30, áiritheoidh siad nach gcuireann an fhaisnéis atá á nochtadh sábháilteacht ná slándáil gléasraí ola agus gáis amach ón gcósta ná oibriú na ngléasraí sin i mbaol.

Airteagal 24 Tuairisciú maidir le tionchar gníomhaíochtaí ola agus gáis amach ón gcósta ar shábháilteacht agus ar an gcomhshaol

1. Ullmhóidh na Ballstáit tuarascáil bhliantúil maidir leis an méid seo a leanas:

(a)     líon, aois agus suíomh na ngléasraí ina ndlínse;

(b)     líon agus cineál na gcigireachtaí agus na n‑imscrúduithe arna ndéanamh, aon ghníomhartha forfheidhmithe, ionchúisimh arna gcinntiú;

(c)     sonraí teagmhais de bhun an chórais tuairiscithe coitinne a cheanglaítear in Airteagal 22;

(d)     aon mhórathrú ar an gcreat rialála amach ón gcósta;

(e)     feidhmíocht oibríochtaí ola agus gáis amach ón gcósta ina ndlínse ó thaobh sábháilteachta agus an chomhshaoil de.

2. Ceapfaidh na Ballstáit údarás a bheidh freagrach as faisnéis a mhalartú de bhun Airteagal 22 agus as faisnéis a fhoilsiú de bhun Airteagal 23 agus cuirfidh siad an Coimisiún ar an eolas faoi sin.

3. Gach dhá bhliain, foilseoidh an Coimisiún tuarascálacha maidir le sábháilteacht oibríochtaí amach ón gcósta ar fud an Aontais bunaithe ar an bhfaisnéis a fhaigheann sé ó na Ballstáit agus ón nGníomhaireacht Eorpach um Shábháilteacht Mhuirí. Beidh Ballstáit ábhartha de chúnamh ag an gCoimisiún agus an cúram sin á chomhlíonadh aige de bhun Airteagal 26.

Airteagal 25 Imscrúdú a dhéanamh tar éis mórthionóisce

1. Díreach tar éis mórthionóisce, cuirfidh an t‑oibreoir an t‑údarás inniúil ar an eolas faoin bhfaisnéis ábhartha, lena n‑áirítear imthosca agus iarmhairtí na tionóisce.

2. Déanfaidh na Ballstáit imscrúduithe críochnaitheacha ar mhórthionóiscí lena mbaineann mórdhamáiste (do dhaoine agus don chomhshaol) nó lena mbaineann mórchaillteanas sócmhainní. Áireofar sa tuarascáil ar an imscrúdú measúnú ar a éifeachtaí a bhí rialáil an ghléasra lena mbaineann ag an údarás inniúil sa tréimhse roimh an tionóisc agus aon mholtaí maidir le leorathruithe ar na cleachtais rialála ábhartha nuair is gá.

3. Déanfar achoimre den tuarascáil ar an imscrúdú arna hullmhú de bhun mhír 2 den Airteagal seo a chur ar fáil don Choimisiún ar thabhairt i gcrích an imscrúdaithe nó ar thabhairt i gcrích imeachtaí dlí, cibé acu is déanaí. Cuirfear leagan sonrach den tuarascáil, ina gcuirfear teorainneacha féideartha dlíthiúla san áireamh, ar fáil don phobal i gcomhréir le hAirteagal 22 agus Airteagal 23.

4. Tar éis na n‑imscrúduithe de bhun mhír 2, cuirfidh an t‑údarás inniúil chun feidhme aon mholtaí ón imscrúdú a bhfuil sé de chumhacht aige a fheidhmiú.

Airteagal 26 Rúndacht

1. Cuirfidh údaráis inniúla aon fhaisnéis a fhaightear de bhun an Rialacháin seo ar fáil d’aon duine nádúrtha nó dlítheanach a iarrann í.

2. Féadfar iarrataí ar fhaisnéis arna bhfáil ag an údarás inniúil faoin Rialachán seo a dhiúltiú i gcás ina gcomhlíontar na coinníollacha atá leagtha síos in Airteagal 4(2) de Threoir 2003/4/CE ó Pharlaimint na hEorpa agus ón gComhairle[24].

3. De bhun mhír 2, nó chun críocha rannpháirtíochta poiblí de bhun Airteagal 5, tabharfaidh an t‑oibreoir leagan den doiciméad nach bhfuil faisnéis rúnda ar bith ann don údarás inniúil agus cuirfidh sé an leagan sin ar fáil don phobal.

Caibidil IV Comhordú agus comhar

Airteagal 27 Comhar idir na Ballstáit

1. Déanfaidh na húdaráis inniúla eolas, faisnéis agus taithí a mhalartú go rialta le chéile agus rachaidh siad i mbun comhairliúcháin faoi chreat dlíthiúil ábhartha náisiúnta agus Aontais a chur i bhfeidhm le lucht tionscail, le geallsealbhóirí eile agus leis an gCoimisiún.

2. Beidh baint ag an bhfaisnéis a mhalartófar de bhun mhír 1, go háirithe, le feidhmiú na mbeart chun rioscaí a mheasúnú, tionóiscí a chosc, comhlíonadh a fhíorú agus práinnfhreagairt a bhaineann le hoibríochtaí ola agus gáis amach ón gcósta san Aontas, agus thar a theorainneacha freisin, nuair is iomchuí.

3. Ba cheart tosaíochtaí agus nósanna imeachta soiléire a bhunú chun doiciméid treoraíochta a ullmhú agus a thabhairt cothrom le dáta ar mhaithe leis na cleachtais is fearr i réimsí faoi mhír 2 a aithint agus a gcur chun feidhme a éascú.

4. Féadfaidh Ballstát tuairim a iarraidh ar Bhallstáit eile atá rannpháirteach sa mhalartú faisnéise de bhun mhír 1 maidir le haon chinneadh de chuid Ballstáit eile a d’fhéadfadh tionchar diúltach trasteorann a imirt.

Airteagal 28 Cur chuige comhordaithe maidir le sábháilteacht na réigiún cóngarach agus gníomhaíochtaí idirnáisiúnta

1. Déanfaidh an Coimisiún, i ndlúthchomhar leis na Ballstáit, comhar le tríú tíortha a dhéanann oibríochtaí ola agus gáis amach ón gcósta sna réigiúin mhuirí chéanna leis na Ballstáit lena n-áirítear, i gcás inarb iomchuí, faoi chuimsiú coinbhinsiún réigiúnach farraige, a chur chun cinn.

2. Déanfaidh an Coimisiún measúnú ar shábháilteacht oibríochtaí ola agus gáis in uiscí tríú tíortha atá cóngarach d’uiscí na mBallstát agus tacóidh sé le cur chuige comhordaithe chun taithí a mhalartú go frithpháirteach agus bearta coisctheacha agus pleananna réigiúnacha práinnfhreagartha a chur chun cinn.

3. Déanfaidh an Coimisiún ardchaighdeáin sábháilteachta le haghaidh oibríochtaí ola agus gáis amach ón gcósta ar an leibhéal idirnáisiúnta a chur chun cinn i bhfóraim chuí dhomhanda agus réigiúnacha, lena n-áirítear na fóraim sin a bhaineann le huiscí Artacha.

Caibidil VII Ullmhacht chun práinne agus práinnfhreagairt

Airteagal 29 Ceanglais le haghaidh pleananna práinnfhreagartha inmheánacha

1. Ullmhóidh an t-oibreoir pleananna práinnfhreagartha inmheánacha:

(a)     a thúsófar chun mórthionóisc thosaigh a shrianadh laistigh de ghléasra, nó laistigh den chrios eisiaimh a bhunaigh an Ballstát timpeall ar imlíne an ghléasra, nó bharr an tobair fho-mhuirí;

(b)     a chuirfear i ngníomh i gcomhréir leis an bplean práinnfhreagartha seachtrach i gcás ina scaipfeadh an tionóisc thar imlíne an ghléasra.

2. Déanfaidh an t-oibreoir an trealamh agus an saineolas a bhaineann leis an bplean a chothabháil le go mbeidh sé ar fáil i gcónaí, agus roinnfear é, de réir mar is gá, leis an mBallstát chun an plean práinnfhreagartha seachtrach a chur i bhfeidhm.

3. Déanfar an plean práinnfhreagartha inmheánach a ullmhú i gcomhréir le forálacha Iarscríbhinn V, agus tabharfar chun dáta é i gcomhréir le haon athrú ar an measúnú ar rioscaí mórghuaise i bplean an tobair nó sa Tuarascáil ar Mhórghuaiseacha, de réir mar is iomchuí. Déanfar aon nuashonruithe den sórt sin a chur in iúl don údarás atá freagrach as na pleananna práinnfhreagartha seachtracha a ullmhú don limistéar lena mbaineann.

4. Déanfar an plean práinnfhreagartha inmheánach a chomhtháthú le forálacha eile a bhaineann le cosaint agus le tarrtháil pearsanra ón ngléasra atá buailte le go gcinnteofar dea-ionchas marthanais.

5. Déanfaidh an t-oibreoir tástáil thráthrialta ar éifeachtacht na bpleananna práinnfhreagartha inmheánacha.

Airteagal 30 Pleananna práinnfhreagartha seachtracha agus ullmhacht chun práinne

1. Ullmhóidh na Ballstáit pleananna práinnfhreagartha seachtracha ina gcuimseofar na gléasraí uile ola agus gáis amach ón gcósta agus na limistéir faoina ndlíse a bhféadfaí difear a dhéanamh dóibh.

2. Déanfar pleananna práinnfhreagartha seachtracha a ullmhú i gcomhar leis na hoibreoirí ábhartha agus le creidiúnaithe, de réir mar is iomchuí, agus ailíneofar iad le pleananna práinnfhreagartha inmheánacha na ngléasraí atá suite nó beartaithe a shuíomh sa limistéar lena mbaineann. Ba cheart aon nuashonrú ar phleananna inmheánacha a chuirfidh oibreoir in iúl a chur san áireamh.

3. Déanfar pleananna práinnfhreagartha seachtracha a ullmhú i gcomhréir le forálacha Iarscríbhinn I agus Iarscríbhinn V, agus déanfar iad a chur ar fáil don Choimisiún agus don phobal i gcoitinne, de réir mar is iomchuí.

4. Déanfaidh na Ballstáit gach beart is iomchuí chun leibhéal ard comhoiriúnachta agus idir-inoibritheachta a bhaint amach i ndáil le trealamh freagartha agus saineolas idir na Ballstáit uile i réigiún geografach, agus níos faide ar shiúl nuair is iomchuí. Déanfaidh na Ballstáit an lucht tionscail a spreagadh chun uirlisí freagartha comhoiriúnacha a fhorbairt de réir mheon na míre seo.

5. Comhoibreoidh oibreoirí leis na Ballstáit chun forálacha mhír 4 den Airteagal seo a chur chun feidhme.

6. Coimeádfaidh na Ballstáit taifid atá cothrom le dáta ar na hacmhainní práinnfhreagartha atá ar fáil ag eintitis phoiblí agus eintitis phríobháideacha araon ina gcríoch nó ina ndlínse. Cuirfear na taifid sin ar fáil do na Ballstáit eile agus, ar bhonn cómhalartach, do thríú tíortha comharsanacha, agus don Choimisiún.

7. Déanfaidh na Ballstáit agus na hoibreoirí tástáil rialta ar a n-ullmhacht freagairt éifeachtach a thabhairt ar thionóiscí ola agus gáis amach ón gcósta.

Airteagal 31 Práinnfhreagairt

1. Tabharfaidh an t-oibreoir fógra láithreach do na húdaráis ábhartha i gcás mórthionóisce nó i gcás a bhfuil baol láithreach mórthionóisce ann. I gcás inar gá, cuideoidh na húdaráis ábhartha leis an oibreoir lena mbaineann d’fhonn méadú ar an mbaol nó ar an tionóisc a chosc.

2. I gcás tionóisce, déanfaidh na húdaráis ábhartha, i gcomhar leis na hoibreoirí lena mbaineann, gach beart is gá d’fhonn méadú ar an tionóisc a chosc agus na hiarmhairtí uirthi a mhaolú.

3. I gcás ina mbeidh acmhainní náisiúnta práinnfhreagartha thar a riocht de dheasca móthionóisce, féadfaidh Ballstát atá buailte cúnamh breise a iarraidh ar Bhallstáit eile agus ar an nGníomhaireacht Eorpach um Shábháilteacht Mhuirí trí Mheicníocht an Aontais um Chosaint Shibhialta a bunaíodh le Treoir 2007/779/CE ón gComhairle.

4. Le linn na práinnfhreagartha, baileoidh an Ballstát an fhaisnéis is gá chun anailís chuimsitheach a dhéanamh ar an tionóisc.

Airteagal 32 Ullmhacht chun práinne agus práinnfhreagairt trasteorann

1. I gcás ina mbeidh éifeachtaí trasteorann tionóiscí ola agus gáis amach ón gcósta intuartha, cuirfidh na Ballstáit faisnéis ar fáil don Choimisiún agus do Bhallstáit agus tríú tíortha a bhféadfaí difear a dhéanamh dóibh, ar bhonn cómhalartach, agus cuirfidh siad na rioscaí atá aitheanta cheana san áireamh le linn dóibh an plean práinnfhreagartha seachtrach a ullmhú. Déanfaidh na Ballstáit i dtrácht a bpleananna práinnfhreagartha a chomhordú chun freagairt chomhpháirteach ar thionóisc a éascú.

2. Déanfaidh na Ballstáit na bearta a bhaineann le limistéir amach ó theorainneacha an Aontais a chomhordú, d’fhonn tionchar diúlach a d’fhéadfaí a imirt ar oibríochtaí ola agus gáis amach ón gcósta a chosc.

3. Déanfaidh na Ballstáit tástáil rialta ar a n-ullmhacht freagairt éifeachtach a thabhairt ar thionóiscí i gcomhar le Ballstáit a bhféadfaí difear a dhéanamh dóibh, le Gníomhaireachtaí ábhartha AE agus le tríú tíortha. Féadfaidh an Coimisiún cuidiú le freachnamh atá dírithe ar mheicníochtaí práinne trasteorann agus Aontais a thástáil.

4. I gcás mórthionóisce, nó i gcás garbhaoil di, ar cúis í le hiarmhairtí trasteorann nó a d’fhéadfadh bheith ina cúis leo, cuirfidh an Ballstát ar faoina dhlínse a tharla an phráinn fógra gan mhoill chuig an gCoimisiún agus chuig na Ballstáit sin a bhféadfadh an phráinn difear a dhéanamh dóibh.

Caibidil VIII Forálacha críochnaitheacha

Airteagal 33 Pionóis

Bunóidh na Ballstáit pionóis is infheidhme i leith sáruithe a dhéanfaidh lucht tionscail ar fhorálacha an Rialacháin seo agus déanfaidh siad gach beart is gá lena áirithiú go gcuirfear na pionóis sin chun feidhme. Ní mór na pionóis dá bhforáiltear a bheith éifeachtach, comhréireach agus athchomhairleach.

Airteagal 34 Cumhachtaí tarmligthe an Choimisiúin

1. Beidh sé de chumhacht ag an gCoimisiún gníomhartha tarmligthe a ghlacadh i gcomhréir le hAirteagal 35 den Rialachán seo chun na ceanglais a bhaineann leis an bhforbairt is déanaí ar theicneolaíochtaí agus ar nósanna imeachta ábhartha in Iarscríbhinní I-VI a oiriúnú.

2. Féadfaidh an Coimisiún gníomhartha tarmligthe a ghlacadh freisin i gcomhréir le hAirteagal 35 den Rialachán seo d'fhonn cur i bhfeidhm cheanglais an Rialacháin seo a shoiléiriú maidir leis na nithe seo a leanas:

(a)     na mionsonraí a bheidh le cur isteach i bhFógra maidir le Dearadh nó i dTuarascáil ar Mhórghuaiseacha mar a shonraítear in Iarscríbhinn II, pointí 1, 2, 3, 6;

(b)     fógra maidir le hoibríochtaí tobair/comhoibríochtaí mar a shonraítear in Iarscríbhinn II, pointe 4 agus pointe 7;

(c)     ceanglais a bhaineann leis an bhfíorú a dhéanfaidh fíoraitheoirí neamhspleácha tríú páirtithe mar a shonraítear in Iarscríbhinn II, pointe 5 (d)    ceanglais maidir le feidhmiú agus eagrúchán na n-údarás inniúil mar a shonraítear in Iarscríbhinn III agus;

(d)     ceanglais a bhaineann le hoibreoirí a chuireann cosc ar mhórghuaiseacha mar a shonraítear in Iarscríbhinn IV.

Airteagal 35 An tarmligean a fheidhmiú

1. Tugtar rde chumhacht don Choimisiún gníomhartha tarmligthe a ghlacadh faoi réir na gcoinníollacha atá leagtha síos san Airteagal seo.

2. Is go ceann tréimhse éiginnte ama ó theacht i bhfeidhm an Rialacháin seo a thabharfar tarmligean na cumhachta dá dtagraítear in Airteagal 34 don Choimisiún.

3. Féadfaidh Parlaimint na hEorpa nó an Chomhairle tarmligean na cumhachta dá dtagraítear in Airteagal 34 a chúlghairm tráth ar bith. I gcás cinnidh maidir le cúlghairm, cuirfear deireadh le tarmligean na cumhachta atá sonraithe sa chinneadh sin. Beidh éifeacht aige ón lá tar éis fhoilsiú an chinnidh in Iris Oifigiúil an Aontais Eorpaigh nó ar dháta níos déanaí a shonrófar ann. Ní dhéanfaidh sé difear do bhailíocht aon ghnímh tharmligthe atá i bhfeidhm cheana féin.

4. A luaithe a ghlacfaidh sé gníomh tarmligthe, tabharfaidh an Coimisiún fógra do Pharlaimint na hEorpa agus don Chomhairle ina leith an tráth céanna.

5. Ní thiocfaidh gníomh tarmligthe a ghlactar de bhun Airteagal 34 i bhfeidhm ach amháin mura mbeidh aon agóid curtha in iúl ag Parlaimint na hEorpa nó ag an gComhairle laistigh de thréimhse dhá mhí ó tugadh fógra i dtaobh an ghnímh sin do Pharlaimint na hEorpa agus don Chomhairle, nó más rud é, roimh dhul in éag na tréimhse sin, go mbeidh Parlaimint na hEorpa agus an Chomhairle araon tar éis a chur in iúl don Choimisiún nach ndéanfaidh siad aon agóid ina choinne. Cuirfear dhá mhí leis an tréimhse sin ar thionscnamh ó Pharlaimint na hEorpa nó ón gComhairle.

Airteagal 36 An nós imeachta coiste

1. Beidh coiste de chúnamh ag an gCoimisiún. Bunófar an coiste de réir bhrí Rialachán (AE)Uimh.182/2011.

2. I gcás ina ndéanfar tagairt don mhír seo, beidh feidhm ag Airteagal 5 de Rialachán (AE) Uimh. 182/2011.

Airteagal 37 Leasú ar Threoir 2004/35/CE ó Pharlaimint na hEorpa agus ón gComhairle an 21 Aibreán 2004 maidir le dliteanas comhshaoil i ndáil le damáiste comhshaoil a chosc agus a leigheas[25]

1. Cuirtear an méid seo a leanas in ionad Airteagal 2(1)(b) den Treoir sin:

‘(b) damáiste uisce, is é sin aon damáiste a théann chun dochair shuntasaigh dóibh seo a leanas:

(i) stádas éiceolaíoch, ceimiceach agus/nó cainníochtúil agus/nó acmhainneacht éiceolaíoch, mar a shainítear i dTreoir 2000/60/CE, na n-uiscí lena mbaineann, cé is moite d’éifeachtaí díobhálacha i gcás ina bhfuil feidhm ag Airteagal 4(7) den Treoir sin, nó

(ii) stádas comhshaoil na n-uiscí muirí lena mbaineann, mar a shainítear i dTreoir 2008/56/CE, a mhéid is nach bhfuil aghaidh tugtha cheana féin ar ghnéithe áirithe de stádas comhshaoil na timpeallachta muirí i dTreoir 2000/60/CE;’

2. Faoi cheann bliana amháin ó theacht i bhfeidhm an Rialacháin seo, déanfaidh na Ballstáit na dlíthe, na rialacháin agus na forálacha riaracháin is gá chun an mhír thuas a chomhlíonadh a thabhairt i bhfeidhm. Cuirfidh siad an Coimisiúin ar an eolas faoi láithreach.

Airteagal 38 Forálacha eatramhacha

Déanfaidh oibreoirí gléasraí an Rialachán seo a chomhlíonadh go hiomlán faoi cheann dhá bhliain tar éis dó teacht i bhfeidhm, cé is moite de na cásanna seo a leanas:

(a)     Oibreoirí gléasraí neamhtháirgthe atá faoi chonradh ach nach bhfuil bunaithe fós ar an suíomh, déanfaidh siad an Rialachán seo a chomhlíonadh go hiomlán faoi cheann bliana amháin tar éis dó teacht i bhfeidhm, nó níos luaithe ná sin trí chomhaontú leis an údarás inniúil.

(b)     Oibreoirí na ngléasraí atá beartaithe, déanfaidh siad an Rialachán seo a chomhlíonadh go hiomlán murar comhaontaíodh a mhalairt leis an údarás inniúil, agus in aon chás tráth nach déanaí ná faoi cheann bliana amháin tar éis dó teacht i bhfeidhm.

(c)     Déanfaidh oibreoirí tobair an Rialachán seo a chomhlíonadh go hiomlán faoi cheann trí mhí tar éis dó teacht i bhfeidhm, nó níos luaithe ná sin trí chomhaontú leis an údarás inniúil.

Airteagal 39 Teacht i bhfeidhm

1. Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

2. Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an [...]

Thar ceann Pharlaimint na hEorpa              Thar ceann na Comhairle

An tUachtarán                                               An tUachtarán

IARSCRÍBHINN I Rannpháirtíocht an phobail a bhaineann le húdaruithe faoi Threoir 94/22/CE

1. Áiritheoidh na Ballstáit:

(a)     go gcuirfear an pobal ar an eolas, trí fhógraí poiblí nó trí mhodhanna eile iomchuí amhail meáin leictreonacha, más ann dóibh, faoin bpróiseas maidir le hiarratais ar cheadúnú a chur chuig na Ballstáit, agus go gcuirfear faisnéis ábhartha faoi thograí den sórt sin ar fáil don phobal lena n-áirítear, inter alia, faisnéis faoin gceart bheith rannpháirteach, agus faoi na heagraíochtaí ar cheart barúlacha nó ceisteanna a chur chucu;

(b)     go mbeidh an pobal i dteideal barúlacha agus tuairimí a chur in iúl, agus gach rogha fós ar fáil, sula ndéanfar cinntí faoi na hiarratais ar cheadúnú;

(c)     agus na cinntí sin á ndéanamh acu, go gcuirfear na torthaí ó rannpháirtíocht an phobail san áireamh go cuí;

(d)     tar éis dóibh scrúdú a dhéanamh ar na barúlacha agus ar na tuairimí a chuir an pobal in iúl, go ndéanfaidh an Ballstát iarrachtaí réasúnta an pobal a chur ar an eolas faoi na cinntí a rinneadh agus faoi na cúiseanna agus na comaoineacha ar a bhfuil na cinntí sin bunaithe, lena n-áirítear faisnéis faoi phróiseas rannpháirtíochta an phobail.

2. Cuirfear tréimhsí ama réasúnta ar fáil a thabharfaidh dóthain ama le haghaidh gach ceann de na céimeanna difriúla rannpháirtíochta atá ag an bpobal. Déanfaidh an Ballstát an pobal atá i dteideal bheith rannpháirteach chun críocha mhír 1 a shainaithint, lena n-áirítear eagraíochtaí neamhrialtasacha ábhartha a chomhlíonann aon cheanglais a fhorchuirtear faoin dlí náisiúnta, mar shampla na ceanglais sin lena gcuirtear cosaint an chomhshaoil, nó sábháilteacht amach ón gcósta, chun cinn.

IARSCRÍBHINN II Ceanglais le haghaidh doiciméad a bhaineann le nós imeachta an toilithe

1. Faisnéis a bheidh le cur isteach i bhfógra maidir le dearadh le haghaidh gléasra táirgthe

Beidh an t-eolas seo a leanas ar a laghad san Fhógra maidir le Dearadh le haghaidh gléasra táirgthe de bhun Airteagal 9:

(1)          ainm agus seoladh oibreoir an ghléasra;

(2)          tuairisc ar an bpróiseas a chuirtear i bhfeidhm maidir leis an ngíomhaíocht deartha, na caighdeáin ábhartha a úsáidtear, agus na roghanna deartha arna gcruthú ag an bpróiseas sin;

(3)          tuairisc ar an gcoincheap deartha a roghnaíodh maidir leis na cásanna mórghuaise a bhaineann leis na ngléasra áirithe sin agus lena shuíomh, agus na príomhghnéithe rialaithe riosca;

(4)          taispeánadh go laghdaíonn an coincheap na rioscaí mórghuaise go leibhéal inghlactha;

(5)          tuairisc ar an ngléasra agus ar na dálaí ag an suíomh atá beartaithe dó;

(6)          tuairisc ar na cineálacha oibríochtaí mórghuaise a bheidh le déanamh;

(7)          tuairisc ghinearálta ar an gcóras bainistíochta sábháilteachta lena ndéanfar na bearta rialaithe rioscaí mórghuaise atá beartaithe a choinneáil ag feidhmiú go cuí, lena n-áirítear an scéim um fhíorú neamhspleách a bheidh le roghnú.

2. Faisnéis a bheidh le cur isteach i dTuarascáil ar Mhórghuaiseacha le haghaidh gléasra táirgthe a oibriú

Beidh an t-eolas seo a leanas ar a laghad sa Tuarascáil ar Mhórghuaiseacha le haghaidh gléasra táirgthe de bhun Airteagal 10:

(1)          tuairisc ar an gcuntas a tugadh ar fhreagairt an údaráis inniúil ar an bhFógra maidir le Dearadh;

(2)          achoimre ar aon pháirt a ghlac aon oibrí in ullmhú na Tuarascála ar Mhórghuaiseacha;

(3)          tuairisc ar an ngléasra agus ar an mbonneagar atá nasctha leis agus ar aon déanmhais eile, lena n-áirítear toibreacha atá nasctha leis;

(4)          taispeánadh go bhfuil na mórghuaiseacha uile aitheanta, go bhfuil measúnú déanta ar a ndóchúlacht agus ar a n-iarmhairtí, agus go bhfuil a mbearta rialaithe oiriúnach le go ndéanfar na rioscaí a bhaineann le teagmhas mórghuaise do dhaoine agus don chomhshaol a laghdú go leibhéal inghlactha;

(5)          mionsonraí i dtaobh na gcineálacha oibríochtaí atá le déanamh a d’fhéadfadh mórghuaiseacha a chruthú, agus líon uasta na ndaoine ar féidir leo bheith ar an ngléasra ag an aon am amháin;

(6)          mionsonraí an ghléasra agus na socruithe lena n-áiritheofar rialú, sábháilteacht próisis, srianadh ar shubstaintí contúirteacha, cosc ar dhóiteán agus ar phléascadh, cosaint an lucht oibre ar shubstaintí contúirteacha, agus cosaint an chomhshaoil ar mhórtheagmhas guaise atá ar tí tosú (i gcomhréir leis an bplean práinnfhreagartha inmheánach de bhun Iarscríbhinn V);

(7)          mionsonraí na socruithe maidir le daoine a chosaint ar mhórghuaiseacha agus iad ar an ardán, agus lena n-áiritheofar aslonnú agus tarrtháil shábháilte na n-oibrithe agus cothabháil córas rialaithe chun damáiste don ghléasra agus don chomhshaol a chosc i gcás ina n-aslonnaítear an pearsanra iomlán;

(8)          cóid, caighdeáin agus treoraíocht ábhartha a úsáidtear agus an gléasra á thógáil agus á choimisiúnú;

(9)          faisnéis faoin gcóras bainistíochta sábháilteachta is infheidhme maidir le hoibríochtaí, le cothabháil, le modhnuithe agus le scéimeanna um fhíorú, lena n-áirítear príomhshrianta oibríochtúla an ghléasra a bheidh le rialú ag an gcóras bainistíochta;

(10)        faisnéis a bhaineann leis an scéim um fhíorú de bhun chuid 5(2) den Iarscríbhinn seo;

(11)        aon mhionsonraí ábhartha eile, mar shampla i gcás ina n-oibríonn dhá ghléasra nó níos mó le chéile ar shlí a imríonn tionchar ar an mórghuais a d’fhéadfadh tarlú i gceann de na gléasraí nó sna gléasraí uile sin;

(12)        an fhaisnéis ábhartha a bhaineann leis na ceanglais faoin rialachán seo ach a fuarthas de bhun reachtaíochta eile is infheidhme de chuid an Aontais, go háirithe Treoir 92/91/CE agus Treoir 85/337/CEE;

(13)        tuairisc ar na gnéithe sin den timpeallacht ar dócha é go ndéanfar difear suntasach dóibh, measúnú ar na hiarmhairtí comhshaoil ionchasacha atá aitheanta, go háirithe scaoileadh truailleán sa chomhshaol, agus tuairisc ar na bearta teicniúla agus neamhtheicniúla atá beartaithe chun iad a chosc, a laghdú nó a fhritháireamh, lena n-áirítear faireachán.

3. Faisnéis a bheidh le cur isteach i dTuarascáil ar Mhórghuaiseacha le haghaidh gléasra neamhtháirgthe

Beidh an t-eolas seo a leanas ar a laghad sa Tuarascáil ar Mhórghuaiseacha le haghaidh gléasra neamhtháirgthe de bhun Airteagal 11:

(1)          ainm agus seoladh oibreoir an ghléasra;

(2)          achoimre ar aon pháirt a ghlac aon oibrí in ullmhú na Tuarascála ar Mhórghuaiseacha;

(3)          tuairisc ar an ngléasra agus, i gcás gléasra shoghluaiste, mionsonraí na modhanna aistrithe idir suíomhanna, agus a chórais suite;

(4)          mionsonraí i dtaobh na gcineálacha oibríochtaí a bhfuil an gléasra in ann a dhéanamh agus a d’fhéadfadh mórghuaiseacha a chruthú, agus líon uasta na ndaoine ar féidir leo bheith ar an ngléasra ag an aon am amháin;

(5)          taispeánadh go bhfuil na mórghuaiseacha uile aitheanta, go bhfuil measúnú déanta ar a ndóchúlacht agus ar a n-iarmhairtí, agus go bhfuil a mbearta rialaithe oiriúnach le go ndéanfar na rioscaí a bhaineann le teagmhas mórghuaise do dhaoine agus don chomhshaol a laghdú go leibhéal inghlactha;

(6)          mionsonraí an ghléasra agus na socruithe lena n-áiritheofar rialú, sábháilteacht próisis, srianadh ar shubstaintí contúirteacha, cosc ar dhóiteán agus ar phléascadh, cosaint an lucht oibre ar shubstaintí contúirteacha, agus cosaint an chomhshaoil ar mhórtheagmhas guaise atá ar tí tosú (i gcomhréir leis an bplean práinnfhreagartha inmheánach de bhun Iarscríbhinn V);

(7)          mionsonraí na socruithe maidir le daoine a chosaint ar mhórghuaiseacha agus iad ar an ardán, agus lena n-áiritheofar aslonnú agus tarrtháil shábháilte na n-oibrithe agus cothabháil córas rialaithe chun damáiste don ghléasra agus don chomhshaol a chosc i gcás ina n-aslonnaítear an pearsanra iomlán;

(8)          cóid, caighdeáin agus treoraíocht ábhartha a úsáidtear agus an gléasra á thógáil agus á choimisiúnú;

(9)          taispeánadh go bhfuil na mórghuaiseacha uile aitheanta le haghaidh na ngníomhaíochtaí uile atá an gléasra in ann a dhéanamh, agus go ndéanfar na rioscaí a bhaineann le teagmhas mórghuaise do dhaoine agus don chomhshaol a laghdú go leibhéal inghlactha;

(10)        mionsonraí na srianta comhshaoil, meitéareolaíocha agus grinnill ar oibríochtaí sábháilte, agus na socruithe maidir le rioscaí ó chontúirtí grinnill agus muirí, amhail píblínte agus trealamh feistithe gléasraí eile, a aithint;

(11)        faisnéis faoin gcóras bainistíochta sábháilteachta is infheidhme maidir le hoibríochtaí, le cothabháil agus le modhnuithe;

(12)        faisnéis a bhaineann leis an scéim um fhíorú de bhun chuid 5(2) den Iarscríbhinn seo;

(13)        aon mhionsonraí ábhartha eile, mar shampla i gcás ina n-oibríonn dhá ghléasra nó níos mó le chéile ar shlí a imríonn tionchar ar an mórghuais a d’fhéadfadh tarlú i gceann de na gléasraí nó sna gléasraí uile sin;

(14)        tuairisc ar na gnéithe sin den timpeallacht ar dócha é go ndéanfar difear suntasach dóibh, measúnú ar na hiarmhairtí comhshaoil ionchasacha atá aitheanta, go háirithe scaoileadh truailleán sa chomhshaol, agus tuairisc ar na bearta teicniúla agus neamhtheicniúla atá beartaithe chun iad a chosc, a laghdú nó a fhritháireamh, lena n-áirítear faireachán.

4. Faisnéis a bheidh le cur i bhfógra maidir le hoibríochtaí tobair

Beidh an t-eolas seo a leanas ar a laghad san fhógra maidir le hoibríochtaí tobair de bhun Airteagal 13:

(1)          ainm agus seoladh oibreoir an tobair;

(2)          ainm an ghléasra le húsáid agus ainm an úinéara;

(3)          mionsonraí lena dtugtar an tobar le fios agus aon nasc le toibreacha nó le forbairtí eile;

(4)          faisnéis faoi chlár oibre an tobair, lena n-áirítear an tréimhse ina n-oibreofar é, fíorú bacainní ar chaillteanas rialaithe ar an tobar, agus an stádas atá beartaithe don tobar nuair a bheidh deireadh leis an oibríocht;

(5)          aon mhionsonraí a bhaineann le trealamh sábháilteachta a bheidh le himlonnú nach bhfuil tuairisc déanta air sa tuarascáil reatha ar mhórghuaiseacha maidir leis an ngléasra;

(6)          measúnú riosca ina dtabharfar tuairisc orthu seo a leanas:

(a)     na contúirtí áirithe a bhaineann le hoibríocht an tobair;

(b)     na contúirtí fodhromchla;

(c)     aon ghníomhaíochtaí dromchla nó fo-mhuirí a d’fhéadfadh mórghuais a chruthú i gcomhthráth;

(d)     bearta oiriúnacha rialaithe;

(7)          mionsonraí i dtaobh dhearadh an tobair, lena n-áirítear bacainní ar chaillteanas rialaithe ar an tobar (trealamh, sreabháin druileála agus stroighin etc.), ar chaillteanas rialaithe treo ar chonair an tobair, agus srianta ar oibríocht shábháilte i gcomhréir leis an measúnú riosca;

(8)          mionsonraí i dtaobh chumraíocht an tobair nuair a bheidh deireadh leis na hoibríochtaí – i.e. tréigean buan nó seladach, nó é a bheith críochnaithe le húsáid arís amach anseo;

(9)          i gcás tobair reatha, faisnéis ábhartha faoina stair, agus faoin riocht ina bhfuil sé;

(10)        i gcás modhnaithe ar fhógra maidir le hoibríochtaí tobair a cuireadh isteach cheana, dóthain mionsonraí chun go bhféadfar an fógra a thabhairt cothrom le dáta;

(11)        i gcás ina ndéanfar oibríochtaí tobair le gléasra neamhtháirgthe, beidh an fhaisnéis bhreise seo a leanas le cur isteach:

(a)     mionsonraí i dtaobh na ndálaí meitéareolaíocha, muirí agus grinnill ag an suíomh, lena n-áirítear aon bhac fisiceach ar nós píblínte;

(b)     mionsonraí i dtaobh na ndálaí comhshaoil a cuireadh san áireamh sa phlean práinnfhreagartha inmheánach a bhaineann leis an ngléasra;

(c)     mionsonraí i dtaobh na soláthairtí le haghaidh práinnfhreagartha, lena n-áirítear i gcás mórthionóisce sa chomhshaol, nach bhfuil tuairisc orthu sa tuarascáil ar mhórghuaiseacha, agus;

(d)     tuairisc ar an gcaoi a ndéanfar córas bainistíochta oibreoir an tobair agus córas bainistíochta úinéir an ghléasra a chomhordú lena áirithiú go ndéanfar mórghuaiseacha a rialú go héifeachtach i gcónaí.

(12)        ráiteas maidir le scrúdú neamhspleách an tobair de bhun chuid 5(1) den Iarscríbhinn seo;

(2)          an fhaisnéis ábhartha a bhaineann leis na ceanglais faoin rialachán seo ach a fuarthas de bhun reachtaíochta eile is infheidhme de chuid an Aontais, go háirithe Treoir 92/91/CE agus Treoir 85/337/CEE.

5. Ceanglais a bhaineann le scéim um fhíorú

1. Comhlíonfaidh an tríú páirtí neamhspleách na ceanglais seo a leanas maidir lena neamhspleáchas ó oibreoir an ghléasra, nó ó oibreoir an tobair:

(a) ní cheanglaítear lena ról aon ghné a mheas más gné é d'eilimint atá criticiúil don tsábháilteacht nó de ghléasra sonrach a raibh baint aige leis roimhe sin nó gné a chuirfeadh a oibiachtúlacht i gcontúirt;

(b) tá sé neamhspleách a dhóthain ar chóras bainistíochta a bhfuil, nó a raibh, freagracht air as aon ghné de chomhpháirt den scéim um fhíorú neamhspleách nó den scrúdú neamhspleách ar an tobar, sa chaoi is go gcuirfidh sé a fheidhmeanna i gcrích go hoibiachtúil sa scéim.

2. Comhlíonfaidh an tríú páirtí neamhspleách na ceanglais seo a leanas maidir lena inniúlacht:

(a) inniúlacht theicniúil, lena n-áirítear dóthain líon foirne atá cáilithe go cuí agus a bhfuil an taithí chuí acu;

(b) na cúraimí a bheith leithdháilte go cuí ag an oibreoir ar fhoireann cháilithe a chuirfidh i gcrích iad;

(c) socruithe oiriúnacha don sreabhadh faisnéise idir an t-oibreoir agus an tríú páirtí neamhspleách;

(d) dóthain údaráis a bheith tugtha ag an oibreoir don tríú páirtí neamhspleách le go mbeidh sé in ann a fheidhmeanna a fheidhmiú go cuí.

3. Chun críocha mhír 3 d'Airteagal 13, beidh an méid seo a leanas ar áireamh in athrú suntasach ar fhógra maidir le hoibríochtaí tobair:

(a)     aon athrú a d’fhéadfadh cuspóir dhearadh bunaidh phlean an tobair a shárú, go háirithe maidir le rialú ar an tobar agus bacainní eile ar shreabhadh, agus a bhfíorú;

(b)     aon athrú ábhartha ar an ngléasra nó ar an trealamh, nó ar chóras bainistíochta nó ar oibreoir an tobair a fógraíodh de bhun chuid 4 d’Iarscríbhinn II;

(c)     aon athrú ar an measúnú riosca, lena n-áirítear i gcás athrú i ngeall ar dhálaí le linn oibríochtaí tobair.

Ba cheart athruithe suntasacha a chur faoi bhráid scrúdaitheoir neamhspleách an tobair le go bhfíorófar iad tuilleadh, agus ba cheart na torthaí ón bhfíorú breise a chur in iúl don údarás inniúil.

4. I gcás fógra maidir le hoibríochtaí tobair, ba cheart ráiteas ó scrúdaitheoir neamhspleách an tobair a chur leis ag rá go bhfuil an measúnú riosca a bhaineann le dearadh an tobair agus leis na bacainní ar chaillteanas rialaithe air oiriúnach do na dálaí agus do na himthosca uile a bhfuil súil leo.

5. I gcás oibríochta gléasra, beidh an méid seo a leanas ar áireamh sa Tuarascáil ar Mhórghuaiseacha:

(a)     ráiteas ón bhfíoraitheoir neamhspleách tríú páirtí go bhfuil nó go mbeidh taifead cuí ann ar eilimintí atá criticiúil don tsábháilteacht agus scéim cothabhála na n-eilimintí sin mar atá sonraithe sa tuarascáil ar mhórghuaiseacha;

(b)     tuairisc ar an scéim um fhíorú, lena n-áirítear roghnú na bhfíoraitheoirí neamhspleácha tríú páirtithe, modhanna an fhíoraithe go mbeidh dea-riocht i gcónaí ar na heilimintí atá criticiúil don tsábháilteacht agus ar aon ghléasra sonrach sa scéim;

(c)     áireofar ar na modhanna dá dtagraítear i bhfomhír 5(b) scrúdú agus tástáil, de réir mar is cuí, ar na heilimintí atá criticiúil don tsábháilteacht arna ndéanamh ag daoine atá neamhspleách agus inniúil, fíorú an dearaidh, caighdeán, deimhniú nó córas eile lena n-áiritheofar go gcomhlíontar na heilimintí atá criticiúil don tsábháilteacht, an obair idir lámha a scrúdú, aon neamhchomhlíonadh a thuairisciú, agus bearta ceartaitheacha arna ndéanamh ag an oibreoir.

6. Faisnéis a bheidh le cur isteach maidir le mórathrú ar ghléasra, lena náirítear gléasra buan a bhaint

I gcás ina mbeidh mórathruithe le déanamh ar ghléasra, beidh an fhaisnéis seo a leanas ar a laghad san fhaisnéis a chuirfear chuig údarás inniúil de bhun Airteagal 10 agus Airteagal 11:

1. ainm agus seoladh oibreoir an ghléasra;

2. achoimre ar aon pháirt a ghlac aon oibrí in ullmhú na Tuarascála leasaithe ar Mhórghuaiseacha;

3. i gcás mórathraithe, dóthain mionsonraí chun go bhféadfar an tseanTuarascáil ar Mhórghuaiseacha agus plean práinnfhreagartha inmheánach an ghléasra a ghabhann léi a thabhairt cothrom le dáta agus lena thaispeáint go bhfuil na rioscaí mórghuaise laghdaithe go dtí leibhéal inghlactha;

4. i gcás ina gcuirtear deireadh le gléasra táirgthe buan a úsáid:

(a)     modhanna chun na substaintí contúirteacha go léir a aonaránú agus, i gcás toibreacha atá nasctha le gléasra, séalú buan na dtoibreacha ón ngléasra agus ón timpeallacht;

(b)     tuairisc ar na rioscaí mórghuaise a bhaineann le díchur an ghléasra, an daonra iomlán neamhchosanta, agus na bearta rialaithe riosca;

(c)     socruithe práinnfhreagartha chun aslonnú agus tarrtháil shábháilte an phearsanra a áirithiú agus chun mórthionóisc sa chomhshaol a chosc.

7. Faisnéis a bheidh le cur i bhfógra maidir le comhoibríochtaí

Beidh an t-eolas seo a leanas ar a laghad san Fhógra maidir le comhoibríochtaí de bhun Airteagal 14:

(1)          ainm agus seoladh an oibreora atá ag ullmhú an fhógra;

(2)          i gcás ina bhfuil oibreoirí eile páirteach sna comhoibríochtaí, a n-ainmneacha agus a seoltaí, lena n-áirítear dearbhú go n-aontaíonn siad le hinneachar an fhógra;

(3)          tuairisc ar an gcaoi a ndéanfar córais bhainistíochta na ngléasraí atá rannpháirteach sa chomhoibríocht a chomhordú lena áirithiú go ndéanfar an baol ó mhórthionóisc a laghdú;

(4)          mionsonraí i dtaobh aon trealaimh a bheidh le húsáid i ndáil leis an gcomhoibríocht ach nach bhfuil tuairisc tugtha air sa Tuarascáil reatha ar Mhórghuaiseacha maidir le haon cheann de na gléasraí atá páirteach sna comhoibríochtaí;

(5)          achoimre ar an measúnú riosca a rinne na hoibreoirí uile atá rannpháirteach sna comhoibríochtaí, lena n-áireofar:

(a)     tuairisc ar aon ghníomhaíochtaí le linn na comhoibríochta a bhféadfadh guaiseacha a bheith ag baint leo agus a d’fhéadfadh a bheith ina gcúis le mórthionóisc ar ghléasra nó i ndáil le gléasra;

(b)     tuairisc ar aon bhearta rialaithe riosca a tugadh isteach de thoradh an mheasúnaithe riosca.

(6)          tuairisc ar an gcomhoibríocht agus ar an gclár oibre, lena n-áireofar na dátaí a bhfuil súil go dtosóidh agus go gcríochnóidh an chomhoibríocht agus cóip de chomhaontú idir na hoibreoirí atá rannpháirteach sna comhoibríochtaí.

IARSCRÍBHINN III Forálacha a fheidhmeoidh údaráis inniúla chun oibríochtaí a bhaineann le mórghuaiseacha a rialáil

1. Tabharfaidh na Ballstáit aghaidh ar na critéir íosta seo a leanas le linn dóibh údarás inniúil a cheapadh a bheidh freagrach as na feidhmeanna rialála sa rialachán seo maidir le sábháilteacht agus cosaint an chomhshaoil:

(a)     socruithe eagrúcháin lenar féidir na dualgais ar fad sa rialachán seo a chomhlíonadh go héifeachtach, lena n-áirítear socruithe maidir le sábháilteacht agus cosaint an chomhshaoil a rialáil ar shlí chothromasach;

(b)     ráiteas beartais ina dtugtar aghaidh ar aidhm na maoirseoireachta agus aidhm an fhorfheidhmithe, agus ar an tslí a mbainfidh an t-údarás inniúil trédhearcacht, comhsheasmhacht, comhréireacht agus oibiachtúlacht amach agus é ag déanamh rialála ar ghníomhaíochtaí ola agus gáis amach ón gcósta. Ba cheart don údarás inniúil deighilt shoiléir idir freagrachtaí an rialtóra agus freagrachtaí an oibreora a chur in iúl don phobal; tá príomhfhreagracht ar an oibreoir as rioscaí a rialáil, agus príomhfhreagracht ar an rialtóir as a fhíorú go bhfuil bearta oiriúnacha a bheadh éifeachtach chun rioscaí mórghuaise a rialáil i bhfeidhm ag an oibreoir;

(c)     ráiteas straitéise ina dtugtar tuairisc ar fheidhmeanna an údaráis inniúil, na tosaíochtaí gníomhaíochta atá aige (mar shampla dearadh agus oibriú gléasraí, bainistíocht sláine agus ullmhacht chun práinne agus práinnfhreagairt) agus an dóigh a bhfuil sé eagraithe;

(d)     nósanna imeachta oibriúcháin a thugann tuairisc ar an tslí a ndéanfaidh an t-údarás inniúil cigireacht agus forfheidhmiú ar dhualgais oibreoirí faoin rialachán seo, lena n-áirítear an tslí a ndéanfaidh sé tuarascálacha ar mhórghuaiseacha a láimhseáil, a mheasúnú agus a ghlacadh, an tslí a ndéanfaidh sé fógraí maidir le hoibríochtaí tobair a láimhseáil agus an tslí a gcinnfear na heatraimh idir cigireachtaí ar bhearta rialaithe rioscaí mórghuaise (lena n-áirítear an comhshaol) maidir le gléasra nó gníomhaíocht áirithe;

(e)     nósanna imeachta chun feidhmeanna an údaráis inniúil faoin rialachán seo a chomhlíonadh, gan dochar do fhreagrachtaí eile, mar shampla oibríochtaí ola agus gáis amach ón gcósta, agus socruithe de bhun Threoir 92/91/CE;

(f)      i gcás ina bhfuil dhá ghníomhaireacht nó níos mó san údarás inniúil, comhaontú foirmiúil lena mbunaítear na meicníochtaí a theastaíonn do chomhoibríocht an údaráis inniúil, lena n-áirítear maoirseoireacht, faireachán agus athbhreithnithe an lucht bainistíochta sinsearaí, comhphleanáil agus cigireachtaí, deighilt freagrachtaí maidir le tuarascálacha ar mhórghuaiseacha, comhchigireacht, cumarsáid inmheánach agus tuairisciú seachtrach a láimhseáil.

2. Ba cheart do na Ballstáit na forálacha riachtanacha le go dtiocfaidh na socruithe thuas i bhfeidhm a bhunú , lena n-áirítear:

(a)     go bhfuil dóthain saineolaithe ar fáil go hinmheánach, nó trí shocrú seachtrach, chun cigireacht agus iniúchadh a dhéanamh ar ghníomhaíochtaí, bearta forfheidhmithe a dhéanamh, agus tuarascálacha ar mhórghuaiseacha agus fógraí a láimhseáil;

(b)     i gcás ina mbraitear ar fhoinsí seachtracha saineolais, go bhfuil dóthain treoraíochta agus maoirseoireachta i scríbhinn ar fáil le go mbeidh cur chuige comhsheasmhach ann agus lena áirithiú go mbeidh lánfhreagracht faoin rialachán seo i gcónaí ar an údarás inniúil a ceapadh de réir dlí;

(c)     go bhfuil na hacmhainní cuí ann chun go mbeidh oiliúint, cumarsáid, rochtain ar theicneolaíocht, taisteal agus cothú bunúsach ag foireann an údaráis inniúil ina bhfeidhmeanna rialála, agus le gur féidir comhar gníomhach a bheith ann idir údaráis inniúla de bhun Airteagal 27;

(d)     i gcás inarb iomchuí, a cheangal ar oibreoirí agus/nó ar úinéirí gléasraí an t-údarás inniúil a shlánú le haghaidh chostas na bhfeidhmeanna a chomhlíontar de bhun an rialacháin seo;

(e)     taighde a dhéanamh nó a thionscnamh de bhun fheidhmeanna an údaráis inniúil faoin rialachán seo;

(f)      le go mbeidh an t-údarás inniúil in ann tuarascálacha a dhéanamh.

3. Ar na nósanna imeachta maidir leis an Tuarascáil ar Mhórghuaseacha agus fógraí, pleananna práinnfhreagartha inmheánacha agus doiciméid ábhartha eile a mheasúnú beidh:

(e) anailís chainníochtúil ar mheasúnú riosca;

(f) measúnú ar thuiscint an oibreora do na mionsonraí ábhartha a bhaineann le suíomh na n-oibríochtaí;

(g) measúnú ar na caighdeáin theicniúla agus eagraíochtúla a úsáideadh;

(h) measúnú ar na réitigh innealtóireachta;

(i) measúnú ar na socruithe a rinne an t-oibreoir chun athruithe ar phleananna oibriúcháin a bhainistiú;

(j) comparáid idir na réitigh a úsáideadh agus na réitigh a úsáideadh i gcásanna eile inchomparáide;

(k) measúnú ar chomhsheasmhacht na bpleananna práinnfhreagartha leis na rioscaí a aithníodh;

(l) measúnú ar na socruithe a rinne an t-oibreoir chun oibríochtaí a stopadh i gcás garbhaoil;

(m) measúnú ar infhaighteacht an trealaimh phráinnfhreagartha agus leordhóthanacht na nósanna imeachta chun é a úsáid go héifeachtach.

4. Ba cheart do na húdaráis inniúla bheith neamhspleách ar aon eagraíocht rialtais maidir le hurraíocht tionscail, nó le ceadúnú nó bailiúchán ioncaim. Níor cheart don údarás inniúil aon seasamh polaitiúil a ghlacadh maidir leis an earnáil ola agus gáis.

IARSCRÍBHINN IV Forálacha a fheidhmeoidh oibreoirí chun mórthionóiscí a chosc

1. Chun críocha beartas coiscthe mórthionóiscí agus córas bainistíochta sábháilteachta an oibreora a chur chun feidhme de bhun Airteagal 18, ba cheart na nithe seo a leanas a chur san áireamh:

(a)     Ba cheart don bheartas coiscthe mórthionóiscí a bheith bunaithe i scríbhinn agus bunóidh sé na haidhmeanna agus an t-eagrúchán iomlán chun guaiseacha mórthionóisce a rialú, agus an tslí a gcuirtear na socruithe sin i bhfeidhm ar leibhéal corparáideach;

(b)     ba cheart don chóras bainistíochta sábháilteachta a bheith comhtháite i gcóras bainistíochta cuimsitheach an oibreora agus beidh struchtúr eagrúcháin, freagrachtaí, cleachtais, nósanna imeachta, próisis agus acmhainní ar áireamh ann le gur féidir an beartas um mhórghuaiseacha a chinneadh agus a chur chun feidhme.

2. Beidh na nithe seo a leanas sa chóras bainistíochta sábháilteachta, ach ní bheidh sé teoranta dóibh sin amháin:

(a)     struchtúr eagrúcháin agus róil agus freagrachtaí an phearsanra;

(b)     mórghuaiseacha a aithint agus meastóireacht orthu – a ndóchúlacht agus a n-iarmhairtí;

(c)     an tionchar ar an gcomhshaol a áireamh sna measúnuithe ar mhórghuaiseacha sa tuarascáil ar mhórghuaiseacha;

(d)     rialú ar na mórghuaiseacha le linn gnáthoibríochtaí;

(e)     athrú a bhainistiú;

(f)      ullmhacht chun práinne agus práinnfhreagairt;

(g)     an damáiste don chomhshaol a theorannú;

(h)     faireachán ar fheidhmíocht;

(i)      socruithe iniúchta agus athbhreithnithe.

3. Tabharfaidh oibreoirí aird ar leith ar an meastóireacht ar cheanglais iontaofachta agus sláine na gcóras atá criticiúil don tsábháilteacht agus bunóidh siad a gcórais chigireachta agus chothabhála ar an leibhéal sin de shláine sábháilteachta a bhaint amach.

4. Áiritheoidh oibreoirí go mbeidh substaintí contúirteacha srianta i gcónaí sna píblínte, sna soithí agus sna córais sin atá beartaithe le go mbeidh siad iata go sábháilte. Lena chois sin, áiritheoidh oibreoirí nach dtarlóidh teagmhas mórghuaise i gcás ina dteipfidh ar bhacainn ar chaillteanas iata.

5. Áiritheoidh oibreoirí go bhfuil creat oiriúnach acu chun faireachán a dhéanamh ar chomhlíonadh na bhforálacha reachtúla ábhartha uile trína ndualgais reachtúla maidir le sábháilteacht agus cosaint an chomhshaoil, i gcás mórghuaiseacha, a chorprú ina ngnáthnósanna imeachta oibriúcháin.

6. Tabharfaidh oibreoirí aird ar leith ar mheon láidir sábháilteachta a fhorbairt agus a chothabháil ina mbeidh dóchúlacht ard ann go leanfar d’oibríochtaí sábháilte, lena n-áirítear na nithe seo a leanas, cé nach bhfuil sé teoranta dóibh:

(a)     iniúchadh forleathan ar phróisis;

(b)     iompraíocht inmhianta a aithint agus a chúiteamh;

(c)     meastóireacht rialta ar inniúlachtaí agus ar spriocanna na heagraíochta;

(d)     ardchaighdeáin a chothabháil mar bhunluach corparáideach;

(e)     córais fhoirmiúla ordaithe agus rialaithe ina mbeidh páirt ag an lucht bainistíochta sinsearaí agus an lucht oibre, agus;

(f)      inniúlacht ag gach leibhéal oibríochta.

7. Comhoibreoidh lucht tionscail leis an údarás inniúil chun plean tosaíochta a bhunú agus a chur chun feidhme maidir le caighdeáin, treoraíocht agus rialacha a fhorbairt a thabharfaidh feidhm don chleachtas is fearr chun mórghuaiseacha a chosc agus iarmhairtí mórghuaiseacha a shrianadh, i gcás ina dtarlóidh siad. Ar na nithe ba cheart a mheas, tá:

(a)     sláine toibreacha, trealamh rialaithe toibreacha agus bacainní a fheabhsú agus faireachán a dhéanamh ar cé chomh héifeachtach is atá siad;

(b)     príomhshrianadh i gcórais sábháilteachta próisis a fheabhsú;

(c)     srianadh tánaisteach a chuireann bac ar mhéadú ar mórthionóisc thosaigh, lena n-áirítear pléascadh i dtobar, a fheabhsú;

(d)     cinnteoireacht iontaofa i dtimpeallachtaí ardbhrú;

(e)     gníomhaíochtaí mórghuaise a bhainistiú agus a mhaoirsiú;

(f)      inniúlacht na ndaoine a bhfuil eochairphoist acu;

(g)     measúnú riosca éifeachtach chun meastóireacht a dhéanamh ar dhálaí atá ag athrú;

(h)     measúnú iontaofachta maidir leis na córais atá criticiúil don tsábháilteacht;

(i)      príomhtháscairí feidhmíochta maidir le sláine an chórais sábháilteachta;

(j)      córais bhainistíochta sábháilteachta a chomhtháthú go héifeachtach idir oibreoirí eacnamaíocha, oibreoirí tobair, úinéirí rigí agus páirtithe eile sna comhoibríochtaí.

IARSCRÍBHINN V Ceanglais maidir le hullmhacht chun práinne agus práinnfhreagairt

1. Pleananna práinnfhreagartha inmheánacha

1. Ba cheart na nithe seo a leanas a bheith i bpleananna práinnfhreagartha inmheánacha, ach ní bheidh siad teoranta dóibh sin amháin:

(a)     ainmneacha nó freagrachtaí na ndaoine atá údaraithe chun nósanna imeachta práinnfhreagartha a thionscnamh agus an duine a stiúróidh an phráinnfhreagairt inmheánach;

(b)     ainm nó freagracht an duine atá freagrach as an gcaidreamh leis an údarás atá freagrach as an bplean práinnfhreagartha seachtrach;

(c)     maidir leis na dálaí agus na teagmhais intuartha uile a d’fhéadfadh bheith ina gcúis le mórthionóisc, mar a thuairiscítear sa tuarascáil ar mhórghuaiseacha a ngabhann an plean léi;

(d)     tuairisc ar na bearta ba cheart a dhéanamh chun na dálaí nó na teagmhais sin a rialú agus a n-iarmhairtí a theorannú don ghléasra agus don limistéar eisiaimh;

(e)     tuairisc ar an trealamh agus ar na hacmhainní atá ar fáil;

(f)      socruithe maidir leis an mbaol atá ann do dhaoine ar an ngléasra a theorannú, lena n-áirítear an tslí a ndéanfar rabhadh agus an nós imeachta a bhfuil súil go leanfaidh daoine nuair a bhfaighidh siad rabhadh;

(g)     socruithe a chomhlánfaidh na socruithe tarrthála ar a ndéantar cur síos sa tuarascáil ar mhórghuaiseacha, mar shampla mar a thuairiscítear in Iarscríbhinn II, cuid 2(7) agus cuid 3(7) chun dea-ionchas marthanais a áirithiú do dhaoine ar an ngléasra le linn mórthionóisce;

(h)     socruithe chun luathrabhadh tionóisce a thabhairt do na húdaráis atá freagrach as an bplean práinnfhreagartha seachtrach a thúsú, an cineál faisnéise ba cheart a bheith sa rabhadh tosaigh agus na socruithe maidir le faisnéis níos mionsonraithe a sholáthar de réir mar a bheidh sí ar fáil;

(i)      socruithe maidir le hoiliúint a chur ar an bhfoireann sna dualgais a bheidh orthu a chomhlíonadh agus, i gcás inarb iomchuí, é sin a chomhordú le seirbhísí seachtracha práinnfhreagartha;

(j)      socruithe maidir le práinnfhreagairt inmheánach agus práinnfhreagairt sheachtrach a chomhordú.

2. Ba cheart do na hoibreoirí fardal a ullmhú ina liostófar an trealamh atá ar fáil, úinéireacht agus suíomh an trealaimh sin, agus an chaoi a n-iompraítear é go dtí an gléasra agus an tslí a n-úsáidtear é sa ghléasra. Ba cheart go n-aithneofaí, san fhardal, bearta atá i bhfeidhm lena áirithiú go gcoimeádtar an trealamh agus na nósanna imeachta i riocht inoibrithe.

2. Pleananna práinnfhreagartha seachtracha

1. Ba cheart na nithe seo a leanas a bheith i bpleananna práinnfhreagartha seachtracha, ach ní bheidh siad teoranta dóibh sin amháin:

(a)     ainmneacha nó freagrachtaí na ndaoine atá údaraithe chun nósanna imeachta práinnfhreagartha a thionscnamh agus na ndaoine atá údaraithe an phráinnfhreagairt sheachtrach a stiúradh;

(b)     socruithe maidir le luathrabhadh tionóiscí a fháil agus na nósanna imeachta foláirimh agus éigeandála a bhaineann leis;

(c)     socruithe maidir le hacmhainní a chomhordú atá riachtanach chun an plean práinnfhreagartha seachtrach a chur chun feidhme;

(d)     socruithe maidir le cúnamh a sholáthar don phlean práinnfhreagartha inmheánach a théann i ngleic le teagmhais a tharlaíon ar an ngléasra agus sa limistéar eisiaimh timpeall air;

(e)     tuairisc mhionsonraithe ar na socruithe maidir le práinnfhreagairt lasmuigh den suíomh;

(f)      socruithe maidir le faisnéis agus comhairle oiriúnach a bhaineann leis an tionóisc a sholáthar do dhaoine agus d’eagraíochtaí a bhféadfadh an tionóisc difear a dhéanamh dóibh;

(g)     socruithe maidir le faisnéis a thabhairt do na seirbhísí éigeandála i mBallstáit eile agus sa Choimisiún i gcás mórthionóisc a bhféadfadh iarmhairtí trasteorann a bheith mar thoradh uirthi;

(h)     socruithe maidir le héifeachtaí diúltacha ar an bhfiadhúlra cósta agus amach ón gcósta a mhaolú, lena n-áirítear cásanna a dtagann ainmhithe atá smeartha le hola i dtír roimh an doirteadh ola iarbhír.

2. Ba cheart don údarás a bhfuil príomhfhreagracht air as práinnfhreagairt an méid seo a leanas a chur ar fáil:

(a)     fardal ina liostófar an trealamh atá ar fáil, úinéireacht agus suíomh an trealaimh sin, agus an chaoi a n-iompraítear é go dtí an gléasra agus an tslí a n-úsáidtear é sa ghléasra;

(b)     tuairisc ar na bearta atá i bhfeidhm lena áirithiú go gcoimeádtar an trealamh agus na nósanna imeachta i riocht inoibrithe;

(c)     fardal ina liostófar an trealamh atá faoi úinéireacht tionscail agus ar féidir é a chur ar fáil i gcás práinne;

(d)     tuairisc ar na socruithe ginearálta maidir le práinneacha ola agus gáis amach ón gcósta, lena n-áirítear inniúlachtaí agus freagrachtaí na bpáirtithe rannpháirteacha uile agus na gcomhlachtaí atá freagrach as na socruithe sin a chothabháil;

(e)     bearta lena n-áiritheofar go bhfuil an trealamh, an fhoireann agus na nósanna imeachta ullamh le dul i mbun oibre agus cothrom le dáta i gcónaí.

3. Tabharfar míniú soiléir sna pleananna práinnfhreagartha seachtracha ar ról na n-údarás ábhartha, na seirbhísí práinnfhreagartha, na gcomhordaitheoirí agus gach duine eile atá páirteach i bpráinnfhreagairt, le go n-áiritheofar comhar le linn práinne i gcónaí.

4. I gcás ina bhféadfadh Ballstát a bheith thar a riocht de dheasca mórthionóisce nó i gcás ina dtéann mórthionóisc thar theorainneacha an Bhallstáit, ba cheart go mbeadh socruithe ann lena ndéantar foráil don mhéid seo a leanas:

(a)     pleananna a chomhroinnt le Ballstáit chóngaracha agus leis an gCoimisiún;

(b)     fardail trasteorann a thiomsú de na hacmhainní práinnfhreagartha, atá faoi úinéireacht tionscail nó úinéireacht phoiblí, agus na hoiriúnuithe uile is gá a dhéanamh le go mbeidh an trealamh agus na nósanna imeachta comhoiriúnach idir tíortha cóngaracha agus Ballstáit chóngaracha;

(c)     nósanna imeachta maidir le Meicníocht an AE um Chosaint Shibhialta (arna bunú le Cinneadh 2007/779/CE ón gComhairle) a agairt;

(d)     freachnamh trasteorann den fhreachnamh práinnfhreagartha seachtrach a eagrú.

IARSCRÍBHINN VI Comhroinnt faisnéise agus trédhearcacht

1. Féadfar comparáid faisnéise a dhéanamh idir Ballstáit agus idir oibreoirí aonair trí fhormáid choiteann a úsáid do thuaisciú sonraí ar tháscairí mórghuaise agus is é an Coimisiún a fhorbróidh an fhormáid sin de bhun Airteagal 22 agus Airteagal 23.

2. Beidh an fhaisnéis agus na sonraí seo a leanas ar a laghad sna ceanglais tuairiscithe dá dtagraítear i mír 1:

(a)     faisnéis a bhaineann le scaoileadh neamhbheartaithe hidreacarbón nó substaintí contúirteachta eile, bídís adhainte nó ná bíodh;

(b)     faisnéis a bhaineann le caillteanas rialaithe ar an tobar, lena mbeadh gá trealamh rialaithe tobair a ghníomhrú, nó le teipeadh ar bhacainn tobair agus go mbeadh gá í a athsholáthar nó a dheisiú;

(c)     teipeadh ar phríomh-chomhpháirt de chóras sábháilteachta próisis an ghléasra;

(d)     caillteanas suntasach de shláine struchtúrach, nó meath cosanta ar éifeachtaí dóiteáin nó pléasctha, nó gluaiseacht neamhbheartaithe gléasra atá ar snámh;

(e)     soithí atá ar tí imbhualadh agus imbhuailtí iarbhír idir soithí agus gléasra amch ón gcósta;

(f)      tionóiscí héileacaptair, ar ghléasraí nó gar do ghléasraí amach ón gcósta nó ar an mbealach chuig gléasraí amach ón gcósta;

(g)     aon tionóisc mharfach;

(h)     aon tromghortuithe do chúigear daoine ar a lagad sa tionóisc chéanna;

(i)      aon aslonnú de phearsanra neamhriachtanach;

(j)      mórthionóisc don chomhshaol.

3. Beidh faisnéis fhíorasach agus sonraí anailíseacha maidir le hoibríochtaí ola agus gáis i gceist san fhaisnéis dá dtagraítear i mír 2 agus beidh an fhaisnéis sin gan débhrí. Beidh an fhaisnéis agus na sonraí a thabharfar den chineál gur féidir feidhmíocht oibreoirí aonair a chur i gcomparáid, ní amháin laistigh den Bhallstát ach freisin i measc an tionscail ina iomláine idir Ballstáit.

4. Is é an aidhm a bheidh le bailiú agus le tiomsú na faisnéise dá dtagraítear i mír 2 luathrabhadh a thabhairt maidir le meath (breise) ar na bacainní atá criticiúil don tsábháilteacht agus don chomhshaol, ar mhaithe le bearta ceartaitheacha réamhghníomhacha a dhéanamh. Ba cheart go léireodh an fhaisnéis, freisin, éifeachtacht fhoriomlán na mbeart agus na rialuithe a chuir oibreoirí aonair agus an tionscal ina iomláine chun feidhme, go háirithe guaiseacha mórthionóiscí agus an baol don chomhshaol a íoslaghdú.

5. D’fhonn ceanglais Airteagal 23 a chomhlíonadh, forbrófar formáid shimplithe le go bhféadfar sonraí ábhartha a fhoilsiú de bhun mhír 2 agus na Tuarascálacha de bhun Airteagal 24 a ullmhú ar shlí a bheidh sorochtana don phobal agus a éascaíonn comparáid idir na sonraí thar theorainneacha náisiúnta.

[1]               Mar shampla: Deepwater Horizon i Stáit Aontaithe Mheiriceá 2010 (11 básaithe), Montara san Astráil 2009, Usumacinta i Meicsiceo 2007 (22 básaithe)

[2]               Amhail sceitheanna ola agus gáis, teipeanna ar shabháilteacht an phróisis tháirgthe agus ar rialú an tobair dhruileála; teip de dheasca athrú neamhbhailí ar an dearadh; líon mór riaráistí i gcothabháil eilimintí atá criticiúil don sabháilteacht. Sampla de theagmhais a tharla le déanaí: Gullfaks C i mí na Bealtaine 2010, Gannet F, 2011; sa Mhuir Thuaidh an dá cheann acu

[3]               COIM(2010) 560 leagan críochnaitheach

[4]               IO L 175, 5.7. 85, lch. 40.

[5]               IO L 73, 14.3. 97, lch. 5.

[6]               IO L 156, 25.6.2003, lch. 17.

[7]               IO L 140, 5.6.2009, lch. 114.

[8]               Lárionad oibríochtúil an tSásra Cosanta Sibhialta.

[9]               Bunaíodh EMSA i ndiaidh thubaistí na dtancaer Erika (1999) agus Prestige (2002) chun a áirithiú go mbeadh ardleibhéal aonfhoirmeach agus éifeachtach sábhailteachta agus slándála ar mhuir agus go ndéanfaí truailliú ar mhuir a chosc agus go ndéanfaí bearta mar gheall air.

[10]             SEC (2010) 1346: Fuinneamh 2020, Straitéis i gcomhair fuinnimh inbhuanaithe shláin iomaíoch.

[11]             Fóram Bheirlín (i.e. Fóram maidir le breoslaí iontaise) – cruinniú bliantúil geallsealbhóirí a thionólann an Coimisiún. Idir na seisiúin iomlánacha bhliantúla, reáchtálann meithleacha cruinnithe tráthrialta chun saincheisteanna reatha a phlé.

[12]             I gcás gníomhartha dlíthiúla eile lena gcumhdaítear tionscail ardriosca/ardluacha is Treoracha a d'úsáidtí de rogha e.g. Treoir maidir le IPPC nó SEVESO II, ach i gcás earnálacha ardriosca níos cúinge, an eitlíocht shibhialta mar shampla , is minic a úsáidtear Rialacháin mar chreat dlí.

[13]             IO C, , lch. .

[14]             IO C, , lch. .

[15]             IO L 164, 25.6.2008, lch. 19.

[16]             IO L 143, 30.4.2004, lch. 56.

[17]             IO L 183, 29.6.1989, lch. 1.

[18]             IO L 348, 28.11.1992, lch. 9.

[19]             Cód maidir le tógáil agus feistiú aonad druileála easchósta soghluaiste, 2 Nollaig 2009 (Cód MODU 2009)

[20]             IO L 55, 28.2.2011, lch. 13.

[21]             IO L 240, 19.9.1977, lch. 1.

[22]             IO L 131, 28.5.2009, lch. 11.

[23]             IO L 175, 5.7.1985, lch. 40.

[24]             IO L 41, 14.2.2003, lch. 26.

[25]             IO L 154, 30.4.2004, lch. 56.