(1)

Le Rialachán (CE) Uimh. 715/2007 rialaítear cineálcheadú mótarfheithiclí maidir lena n-astaíochtaí. Na forálacha teicniúla sonracha is gá chun an Rialachán sin a chur chun feidhme, leagtar amach i Rialachán (AE) 2017/1151 ón gCoimisiún (2) iad.

(2)

Tar éis theacht i bhfeidhm Rialachán (AE) 2024/1257 ó Pharlaimint na hEorpa agus ón gComhairle (3), agus chun cur chun feidhme a éascú agus cleachtais choiteanna agus chomhchuibhithe a áirithiú ar leibhéal na n-údarás náisiúnta a mhéid a bhaineann le feithiclí nua a chlárú, ba cheart dátaí deiridh clárúcháin fheithiclí Euro 6 a léiriú i Rialachán (AE) 2017/1151.

(3)

Ar an gcaoi chéanna, is gá modheolaíocht an Nós Imeachta Tástála Comhchuibhithe Domhanda d’Fheithiclí Saothair Éadroim a leagtar síos i Rialachán (AE) 2017/1151 a ailíniú le Rialachán Uimh. 154 ó na Náisiúin Aontaithe (4)maidir le feithiclí a ritheann ar hidrigin, go háirithe maidir le hastaíochtaí CO2 a thomhas.

(4)

Chun comhsheasmhacht agus ailíniú le caighdeáin chomhchuibhithe dhomhanda a áirithiú, is gá na forálacha reatha a leasú i gcomhréir le Rialachán Uimh. 154 ó na Náisiúin Aontaithe. Go sonrach, chun tástáil a dhéanamh ar chomhréireacht na feithicle maidir le hastaíochtaí galaithe agus diagnóisic ar bord, ba cheart forlámhas a bheith ag an tagairt do Rialachán Uimh. 154 ó na Náisiúin Aontaithe le haghaidh na tástála astaíochtaí galaithe (tástáil Chineál 4) agus na gcóras diagnóisice ar bord, agus ba cheart na ceanglais maidir le comhréireacht táirgeachta a leagtar amach i bpointe 4.6 agus 4.7 d’Iarscríbhinn I a ghabhann le Rialachán (AE) 2017/1151 a scriosadh. Dá bhrí sin, ba cheart Iarscríbhinní I agus IIIA a ghabhann le Rialachán (AE) 2017/1151 a leasú dá réir.

(5)

Chun comhsheasmhacht agus ailíniú le caighdeáin chomhchuibhithe dhomhanda a áirithiú, is gá na forálacha reatha a leasú i gcomhréir le Rialachán Uimh. 168 ó na Náisiúin Aontaithe (5). Ba cheart Foscríbhinn 1 d’Iarscríbhinn IIIA a ghabhann le Rialachán (AE) 2017/1151 a athbhreithniú chun a áirithiú go gcloíonn tagairtí do ‘chóras iniompartha chun astaíochtaí a thomhas’ leis na ceanglais a leagtar amach in Iarscríbhinn 4 a ghabhann le Rialachán Uimh. 168 ó na Náisiúin Aontaithe. Ina theannta sin, ba cheart Foscríbhinn 7 a thabhairt cothrom le dáta chun ríomhanna ceartaithe féithithe a léiriú de réir mhír 5.0 d’Iarscríbhinn 7 a ghabhann le Rialachán Uimh. 168 ó na Náisiúin Aontaithe agus an mhodha ríofa ina n-úsáidtear sreabhadh aermhaise agus cóimheas idir aer agus breosla de réir mhír 7.3 d’Iarscríbhinn 7 a ghabhann le Rialachán Uimh. 168 ó na Náisiúin Aontaithe.

(6)

Chun infheidhmeacht thomhas cumhachta gléasraí cumhachta leictreacha a shoiléiriú, is iomchuí a leagan síos gur cheart an ghlanchumhacht innill agus an t-uasmhéid 30 nóiméad cumhachta araon a chinneadh nuair atá na gléasraí cumhachta leictreacha sin comhdhéanta de rialaitheoirí agus mótair, a úsáidtear mar an t-aon mhodh tiomána ar feadh cuid den am (feithiclí hibrideacha).

(7)

Chun soiléireacht a sholáthar agus chun ailíniú le Rialacháin Uimh. 154 agus Uimh. 168 ó na Náisiúin Aontaithe, is gá roinnt earráidí a braitheadh i bhfoirm tagairtí coiteanna míchearta a cheartú agus a áirithiú go ndéantar Airteagal 2 chomh maith le hIarscríbhinní I agus IIIA a ghabhann le Rialachán (AE) 2017/1151 a ailíniú leis na Rialacháin sin ó na Náisiúin Aontaithe.

(8)

Dá bhrí sin, ba cheart Rialachán (AE) 2017/1151 a leasú agus a cheartú dá réir.

(9)

Tá na bearta dá bhforáiltear sa Rialachán seo i gcomhréir le tuairim an Choiste Theicniúil – Mótarfheithiclí,