(1)

Le Treoir 2008/127/CE ón gCoimisiún (2), cuimsíodh aigéad peileargónach mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

Maidir leis na substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí aigéad peileargónach, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 1 Nollaig 2026.

(4)

Cuireadh iarratas faoi bhráid na Gréige, an Ballstát is rapóirtéir, agus faoi bhráid na hOstaire, an Ballstát is comhrapóirtéir, chun formheas na substainte gníomhaí aigéad peileargónach a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) agus laistigh den tréimhse ama dá bhforáiltear san Airteagal sin.

(5)

Chuir na hiarratasóirí na sainchomhaid fhorlíontacha faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’). Mheas an Ballstát is rapóirtéir an t-iarratas a bheith inghlactha.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 5 Bealtaine 2020. Ina dhréacht-tuarascáil maidir le measúnú ar athnuachan, mhol an Ballstát is rapóirtéir go ndéanfaí an formheas ar aigéad peileargónach a athnuachan.

(7)

Chuir an tÚdarás an sainchomhad achomair forlíontach ar fáil don phobal. Sheol an tÚdarás an dréacht-tuarascáil maidir le measúnú ar athnuachan chuig na hiarratasóirí agus na Ballstáit freisin chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

Chuir an tÚdarás an chonclúid uaidh (6) in iúl don Choimisiún an 29 Iúil 2021 agus an chonclúid nuashonraithe uaidh (7) an 16 Aibreán 2025, ar dá réir, agus na critéir formheasa a leagtar síos in Iarscríbhinn II a ghabhann le Rialachán (CE) Uimh. 1107/2009 á gcur san áireamh, is féidir coinne a bheith leis go gcomhlíonfaidh táirgí cosanta plandaí ina bhfuil aigéad peileargónach na critéir formheasa dá bhforáiltear in Airteagal 4 de Rialachán (CE) Uimh. 1107/2009. Shainaithin an tÚdarás rioscaí i ndáil le screamhuisce, orgánaigh uisceacha, artrapóid nach spriocartrapóid iad lena n-áirítear beacha agus orgánaigh ithreach i gcás roinnt úsáidí ionadaíocha a ndearnadh meastóireacht orthu ach ní i gcás gach úsáide ionadaíche, ach níor shainaithin sé aon phríomhréimse imní.

(9)

Chuir an Coimisiún tuarascáil athnuachana agus dréacht den Rialachán seo faoi bhráid an Bhuanchoiste um Plandaí, Ainmhithe, Bia agus Beatha an 13 Deireadh Fómhair 2022 agus an 25 Eanáir 2023, faoi seach.

(10)

D’iarr an Coimisiún ar na hiarratasóirí a mbarúlacha a chur isteach maidir le conclúid an Údaráis agus, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, maidir leis an tuarascáil athnuachana. Chuir na hiarratasóirí a mbarúlacha isteach, barúlacha a scrúdaíodh go cúramach agus a cuireadh san áireamh.

(11)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach aigéad peileargónach, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(12)

Cé go bhfuil an measúnú riosca maidir le formheas na substainte gníomhaí aigéad peileargónach a athnuachan bunaithe ar líon teoranta úsáidí ionadaíocha, níl srian ar na húsáidí lena bhféadfar táirgí cosanta plandaí a bhfuil aigéad peileargónach iontu a údarú mar gheall air sin.

(13)

Dá bhrí sin, is iomchuí formheas aigéid pheileargónaigh a athnuachan.

(14)

I gcomhréir le hAirteagal 14(1) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch agus theicniúil reatha agus thoradh an mheasúnaithe riosca, is gá a cheangal ar na Ballstáit, agus táirgí cosanta plandaí ina bhfuil aigéad peileargónach á n-údarú acu, aird ar leith a thabhairt ar chosaint screamhuisce, orgánach uisceach, artrapóid nach spriocartrapóid iad, lena n-áirítear beacha agus orgánaigh ithreach, lena n-áirítear trí bhearta maolaithe a fhorchur más iomchuí, agus na dálaí agrai-éiceolaíocha áitiúla agus na módúlachtaí maidir le húsáid na dtáirgí cosanta plandaí á gcur san áireamh.

(15)

Liostaíodh aigéad peileargónach san Iarscríbhinn a ghabhann le Rialachán Cur Chun Feidhme (AE) Uimh. 540/2011 san iontráil chéanna le roinnt aigéad sailleach eile. Tar éis athnuachan an fhormheasa ar aigéad peileargónach, ba cheart an iontráil sin a mhodhnú chun aigéad peileargónach a bhaint, ar cheart é a liostú faoi iontráil shonrach.

(16)

Ba cheart Rialachán Cur Chun Feidhme (AE) Uimh. 540/2011 a leasú dá réir.

(17)

Le Rialachán Cur Chun Feidhme (AE) 2024/2221 ón gCoimisiún (8) cuireadh síneadh le dáta éaga aigéid peileargónaigh go dtí an 1 Nollaig 2026 chun go bhféadfaí an próiseas athnuachana a chur i gcrích sula rachadh tréimhse formheasa na substainte gníomhaí sin in éag. Ós rud é go ndearnadh cinneadh maidir leis an athnuachan roimh dhul in éag na tréimhse formheasa sin ar cuireadh síneadh léi, áfach, ba cheart feidhm a bheith ag an Rialachán seo tráth is luaithe ná an dáta sin.

(18)

Tá na bearta dá bhforáiltear sa Rialachán seo i gcomhréir leis an tuairimón mBuanchoiste um Plandaí, Ainmhithe, Bia agus Beatha,