(1)

Le Rialachán (CE) Uimh. 178/2002, bunaíodh an tÚdarás Eorpach um Shábháilteacht Bia (EFSA), a bhfuil Bord Bainistíochta mar cheann dá chomhlachtaí.

(2)

Ceanglaítear le Rialachán (CE) Uimh. 178/2002 go n-áirítear ar Bhord Bainistíochta EFSA ceathrar comhaltaí agus ceathrar comhaltaí malartacha a mbeidh ceart vótála acu agus a dhéanfaidh ionadaíocht do leasanna na sochaí sibhialta agus an bhiashlabhra, eadhon comhalta amháin agus comhalta malartach amháin ó eagraíochtaí tomhaltóirí, comhalta amháin agus comhalta malartach amháin ó eagraíochtaí comhshaoil neamhrialtasacha, comhalta amháin agus comhalta malartach amháin ó eagraíochtaí feirmeoirí, agus comhalta amháin agus comhalta malartach amháin ó eagraíochtaí tionsclaíochta.

(3)

Tá an Chomhairle i gcomhairle le Parlaimint na hEorpa ar bhonn liosta arna tharraingt suas ag an gCoimisiún agus a seoladh chuig an gComhairle, leis na comhaltaí agus na comhaltaí malartacha a dhéanann ionadaíocht do leasanna na sochaí sibhialta agus an bhiashlabhra a cheapadh. Téarma oifige 4 bliana a bheidh acu agus ní fhéadfar é a athnuachan ach aon uair amháin eile.

(4)

I gcomhréir le Cinneadh ón gComhairle an 2 Meitheamh 2022 (2), rachaidh téarma oifige na gcomhaltaí agus na gcomhaltaí malartacha a cheapfar chun ionadaíocht a dhéanamh ar leasanna na sochaí sibhialta agus an bhiashlabhra de bhun an Chinnidh sin in éag an 30 Meitheamh 2026.

(5)

Ba cheart, dá bhrí sin, na comhaltaí agus na comhaltaí malartacha a dhéanann ionadaíocht do leasanna na sochaí sibhialta agus an bhiashlabhra a cheapadh do théarma oifige nua 4 bliana, ón 1 Iúil 2026 go dtí an 30 Meitheamh 2030.

(6)

Ceanglaítear le Rialachán (CE) Uimh. 178/2002 go ndéantar comhaltaí agus comhaltaí malartacha Bord Bainistíochta EFSA a ainmniú agus a cheapadh ar bhonn a dtaithí agus a saineolais ábhartha, leathain i réimse reachtaíocht agus bheartas an bhiashlabhra, lena n-áirítear measúnú riosca, agus áiritheofar san am céanna go mbeidh saineolas ábhartha ann laistigh de Bhord Bainistíochta EFSA in ábhair bhainistíochta, riaracháin, airgeadais agus dhlíthiúla.

(7)

Tarraingíodh suas an liosta a thíolaic an Coimisiún d’fhonn ceathrar comhaltaí agus ceathrar comhaltaí malartacha de Bhord Bainistíochta EFSA a dhéanann ionadaíocht do leasanna na sochaí sibhialta agus an bhiashlabhra a cheapadh, ar bhonn na doiciméadachta a sholáthair an Coimisiún agus i bhfianaise na dtuairimí a chuir Parlaimint na hEorpa in iúl. Le ceapadh na gcomhaltaí agus na gcomhaltaí malartacha sin, daingnítear a thuilleadh, laistigh de Bhord Bainistíochta EFSA, na caighdeáin is airde inniúlachta agus an raon is leithne taithí ábhartha atá ar fáil, atá ríthábhachtach chun an neamhspleáchas, ardcháilíocht eolaíoch, trédhearcacht agus éifeachtúlacht a áirithiú,