(1)

Foráiltear le Rialachán (AE) 2016/429 nach mór do choinsíneachtaí d’ainmhithe, de tháirgí geirmeacha agus de tháirgí de bhunadh ainmhíoch a theacht ó thríú tír nó ó chríoch, nó ó chrios nó ó dheighleog de thríú tír nó de chríoch, a liostaítear i gcomhréir le hAirteagal 230(1) den Rialachán sin chun teacht isteach san Aontas.

(2)

Le Rialachán Tarmligthe (AE) 2020/692 ón gCoimisiún (2) leagtar síos na ceanglais sláinte ainmhithe nach mór do choinsíneachtaí de speicis agus catagóirí áirithe d’ainmhithe, de tháirgí geirmeacha agus de tháirgí de bhunadh ainmhíoch a chomhlíonadh chun teacht isteach san Aontas ó thríú tíortha nó ó chríocha nó ó chriosanna de thríú tír nó de chríoch, nó ó dheighleoga de thríú tír nó de chríoch i gcás ainmhithe uisceacha.

(3)

Le Rialachán Cur Chun Feidhme (AE) 2021/404 ón gCoimisiún (3) leagtar síos na liostaí de thríú tíortha, de chríocha nó criosanna de thríú tír nó de chríoch, óna gceadaítear na coinsíneachtaí speiceas agus na catagóirí ainmhithe, táirgí geirmeacha agus táirgí de bhunadh ainmhíoch a thagann faoi raon feidhme Rialachán Tarmligthe (AE) 2020/692 a theacht isteach san Aontas. Déantar na liostaí sin agus rialacha ginearálta áirithe maidir leis na liostaí sin a leagan amach in Iarscríbhinní I go XXII a ghabhann leis an Rialachán Cur Chun Feidhme sin.

(4)

Go háirithe, le hIarscríbhinn V, XIV, agus XV a ghabhann le Rialachán Cur Chun Feidhme (AE) 2021/404 leagtar amach na liostaí de thríú tíortha nó de chríocha nó de chriosanna de thríú tír nó de chríoch atá údaraithe i dtaca le coinsíneachtaí d’éanlaith chlóis agus de tháirgí geirmeacha ó éanlaith chlóis, d’fheoil úr ó éanlaith chlóis agus de tháirgí feola ó éanlaith chlóis a theacht isteach san Aontas.

(5)

An 11 Feabhra 2025, thug an Bhoisnia agus an Heirseagaivéin fógra don Choimisiún faoi ráig den fhliú éanúil ardphataigineach (HPAI). Tá an ráig sin ann i mbardas Rogatica in Republika Srpska sa Bhoisnia agus sa Heirseagaivéin agus deimhníodh í an 10 Feabhra 2025 le hanailís saotharlainne (ISP-CT).

(6)

Sna liostaí de thríú tíortha nó de chríocha, nó de criosanna de thríú tír nó de chríoch a leagtar amach i Roinn B de Chuid 1 d’Iarscríbhinn XIV agus i Roinn A de Chuid 1 d’Iarscríbhinn XV a ghabhann leis an Rialachán Cur Chun Feidhme (AE) 2021/404, sonraítear go n-údaraítear coinsíneachtaí ón mBoisnia agus ón Heirseagaivéin d’fheoil úr agus táirgí feola ó éanlaith chlóis a theacht isteach san Aontas. Ina theannta sin, le Roinn A de Chuid 1 d’Iarscríbhinn XV a ghabhann le Rialachán (AE) 2021/404 sonraítear faoi láthair nach gá aon chóireáil maolaithe riosca a dhéanamh i gcás táirgí feola ó éanlaith chlóis chun teacht isteach san Aontas ón mBoisnia agus ón Heirseagaivéin.

(7)

Mar gheall ar an riosca go dtabharfaí an fliú éanúil ardphataigineach isteach san Aontas, riosca atá nasctha le coinsíneachtaí d’fheoil úr ó éanlaith chlóis agus de tháirgí feola ó éanlaith chlóis ón mBoisnia agus ón Heirseagaivéin nach ndearnadh cóireáil maolaithe riosca orthu, is gá stádas sláinte ainmhithe an Aontais a chosaint. Dá thoradh sin, agus in éagmais ráthaíochtaí lena gceadaítear réigiúnú an tríú tír sin, níor cheart teacht isteach coinsíneachtaí d’fheoil úr éanlaithe clóis ón mBoisnia agus ón Heirseagaivéin san Aontas a údarú a thuilleadh agus ba cheart cóireáil maolaithe riosca D a éileamh, i gcomhréir le hIarscríbhinn XXVI a ghabhann le Rialachán Tarmligthe (AE) 2020/692, chun coinsíneachtaí de tháirgí feola ó éanlaith chlóis ón tríú tír sin a theacht isteach san Aontas.

(8)

Dá bhrí sin, na hiontrálacha a bhaineann leis an mBoisnia agus an Heirseagaivéin i liostaí de thríú tíortha, nó de chríocha, nó de chriosanna de thríú tír nó de chríoch a leagtar amach sna táblaí i Roinn B de Chuid 1 d’Iarscríbhinn XIV agus sa tábla i Roinn A de Chuid 1 d’Iarscríbhinn XV a ghabhann le Rialachán Cur Chun Feidhme (AE) 2021/404, ba cheart iad a leasú chun an staid eipidéimeolaíoch reatha sa tríú tír sin a chur san áireamh.

(9)

Ina theannta sin, thug an Ríocht Aontaithe fógra don Choimisiún faoi cheithre ráig den fhliú éanúil ardphataigineach in éanlaith chlóis atá ann i gcontaetha Corn na Breataine, agus Yorkshire, Sasana, ráigeanna a deimhníodh idir an 7 Feabhra 2025 agus an 9 Feabhra 2025, faoi seach, le hanailís saotharlainne (ISP-CT).

(10)

Thairis sin, thug na Stáit Aontaithe fógra don Choimisiún faoi 35 ráig den fhliú éanúil ardphataigineach in éanlaith chlóis i stáit California (3), Maryland (1), Missouri (6), North Carolina (2) agus Ohio (23), ráigeanna a deimhníodh idir an 27 Eanáir 2025 agus an 5 Feabhra 2025 le hanailís saotharlainne (ISP-CT).

(11)

Tar éis na ráigeanna sin den fhliú éanúil ardphataigineach a tharla le déanaí sa Ríocht Aontaithe agus sna Stáit Aontaithe, bhunaigh údaráis tréidliachta na tríú tíortha sin criosanna srianta de 10 km ar a laghad timpeall ar na bunaíochtaí a bhí buailte agus chuir siad beartas díothaithe chun feidhme chun láithreacht an fhliú éanúil ardphataiginigh a rialú agus chun leathadh an ghalair sin a theorannú.

(12)

Tá faisnéis curtha faoi bhráid an Choimisiúin ag an Ríocht Aontaithe agus ag na Stáit Aontaithe maidir leis an staid eipidéimeolaíoch ar a gcríocha agus maidir leis na bearta atá déanta acu chun leathadh breise an fhliú éanúil ardphataiginigh a chosc tar éis na ráigeanna sin a tharla le déanaí.

(13)

Rinne an Coimisiún meastóireacht ar an bhfaisnéis sin. I bhfianaise na staide sláinte ainmhithe sna limistéir atá faoi shrianta arna mbunú ag údaráis tréidliachta na Ríochta Aontaithe agus na Stát Aontaithe, measann an Coimisiún gur cheart teacht isteach coinsíneachtaí d’éanlaith chlóis agus táirgí geirmeacha ó éanlaith chlóis, agus d’fheoil úr ó éanlaith chlóis agus ó éin ghéim ó na limistéir sin lena mbaineann na ráigeanna a tharla le déanaí a chur ar fionraí san Aontas, chun stádas sláinte ainmhithe an Aontais a chosaint.

(14)

Ina theannta sin, sholáthair an Ríocht Aontaithe faisnéis nuashonraithe don Choimisiún maidir leis an staid eipidéimeolaíoch ar a gcríoch a mhéid a bhaineann leis an bhfliú éanúil ardphataigineach ba chúis le teacht isteach táirgí áirithe san Aontas a chur ar fionraí, mar a leagtar amach in Iarscríbhinní V agus XIV a ghabhann le Rialachán Cur Chun Feidhme (AE) 2021/404.

(15)

An 10 Feabhra 2025 agus an 13 Feabhra 2025, chuir an Ríocht Aontaithe faisnéis nuashonraithe isteach maidir leis an staid sláinte ainmhithe agus na bearta atá déanta aici i ndáil le trí ráig den fhliú éanúil ardphataigineach in éanlaith chlóis i gcontae Yorkshire, Sasana, agus ráig den fhliú éanúil ardphataigineach in éanlaith chlóis i gcontae Angus, Albain, ráigeanna a deimhníodh idir an 10 Nollaig 2024 agus an 10 Eanáir 2025, le hanailís saotharlainne (ISP-CT).

(16)

Tar éis na ráigeanna sin den fhliú éanúil ardphataigineach, chuir an Ríocht Aontaithe an Coimisiún ar an eolas go bhfuil beartas díothaithe curtha chun feidhme aici chun leathadh an ghalair sin a rialú agus chun teorainn a chur leis, agus tá na bearta glantacháin agus díghalraithe is gá curtha i gcrích aici freisin tar éis an beartas díothaithe maidir leis na bunaíochtaí éanlaithe clóis ionfhabhtaithe a chur chun feidhme ar a gcríoch.

(17)

Rinne an Coimisiún meastóireacht ar an bhfaisnéis a chuir an Ríocht Aontaithe isteach agus measann sé go bhfuil ráthaíochtaí iomchuí tugtha aici nach bagairt do shláinte ainmhithe ná don tsláinte phoiblí laistigh den Aontas a thuilleadh í an staid sláinte ainmhithe ba chúis le teacht isteach coinsíneachtaí de tháirgí áirithe san Aontas ó na criosanna lena mbaineann a chur ar fionraí mar a leagtar amach in Iarscríbhinní V agus XIV a ghabhann le Rialachán Cur Chun Feidhme (AE) 2021/404, agus, dá bhrí sin, maidir le teacht isteach na gcoinsíneachtaí sin san Aontas ó na criosanna lena mbaineann sa Ríocht Aontaithe óna raibh a dteacht isteach san Aontas curtha ar fionraí, ba cheart é a athúdarú.

(18)

Dá bhrí sin, ba cheart Iarscríbhinní V agus XIV a ghabhann le Rialachán Cur Chun Feidhme (AE) 2021/404 a leasú chun na ráigeanna nua den fhliú éanúil ardphataigineach sa Ríocht Aontaithe agus sna Stáit Aontaithe agus na ráigeanna réitithe den fhliú éanúil ardphataigineach sa Ríocht Aontaithe a chur san áireamh.

(19)

Agus na ráigeanna den fhliú éanúil ardphataigineach atá ann sa Bhoisnia agus sa Heirseagaivéin, sa Ríocht Aontaithe agus sna Stáit Aontaithe á gcur san áireamh agus chun cur isteach neamhriachtanach ar thrádáil leis an Ríocht Aontaithe a sheachaint, ba cheart éifeacht a bheith leis na leasuithe atá le déanamh ar Iarscríbhinní V, XIV agus XV a ghabhann le Rialachán Cur Chun Feidhme (AE) 2021/404 leis an Rialachán seo mar ábhar práinne.

(20)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,