(1)

Le Cinneadh (CBES) 2021/509 (1) ón gComhairle, bunaítear an tSaoráid Eorpach Síochána (SES) chun go maoineodh Ballstáit gníomhaíochtaí an Aontais faoin gComhbheartas Eachtrach agus Slándála chun an tsíocháin a chaomhnú, coinbhleachtaí a chosc agus an tslándáil idirnáisiúnta a neartú de bhun Airteagal 21(2), pointe (c), den Chonradh. Go háirithe, de bhun Airteagal 1(2) de Chinneadh (CBES) 2021/509, tá SES le húsáid chun maoiniú a dhéanamh ar bhearta cúnaimh amhail gníomhaíochtaí chun acmhainneachtaí tríú Stáit agus eagraíochtaí réigiúnacha agus idirnáisiúnta a neartú i ndáil le cúrsaí míleata agus cosanta.

(2)

Tá dálaí slándála ag dul in olcas sna réigiúin thuaidh de 4 thír chósta i Murascaill na Guine – eadhon Gána, an Cósta Eabhair, Beinin agus Tóga – i ngeall ar an ngéarchéim sa tSaiheil láir.

(3)

I bhfianaise na timpeallachta slándála atá ag dul in olcas, is den tábhacht na fórsaí armtha a neartú chun iarrachtaí cobhsaíochta a chumasú sa Chósta Eabhair agus chun tacú leis na hiarrachtaí sin. Sa chomhthéacs sin, agus é á aithint aige go bhfuil gá le freagairt chomhtháite sa chás sin, is príomhthosaíocht de chuid an Aontais fós é an tsíocháin agus an tslándáil fhadtéarmach a áirithiú sa Chósta Eabhair.

(4)

An 3 Lúnasa 2023, ghlac an Chomhairle Cinneadh (CBES)2023/1599 (2), lenar bunaíodh Tionscnamh Slándála agus Cosanta an Aontais Eorpaigh mar thaca le tíortha na hAfraice Thiar i Murascaill na Guine, eadhon Gána agus Beinin, faoin gcomhbheartas slándála agus cosanta (CBSC) (‘an Tionscnamh’). An 25 Meán Fómhair 2023, ghlac an Chomhairle Cinneadh (CBES) 2023/2066 (3) lenar bunaíodh an Tionscnamh sa Chósta Eabhair agus i dTóga freisin. An 11 Nollaig 2023, ghlac an Chomhairle Cinneadh (CBES) 2023/2786 (4) lenar seoladh an Tionscnamh. Is é cuspóir straitéiseach an tionscnaimh cabhrú le tíortha na hAfraice Thiar i Murascaill na Guine ina bhfuil an tionscnamh bunaithe chun cumais leordhóthanacha a fhorbairt ina bhfórsaí slándála agus cosanta chun an brú ó ghrúpaí armtha sceimhlitheoireachta a shrianadh agus chun freagairt dó.

(5)

An 29 Aibreán 2024, ghlac an Chomhairle Cinneadh (CBES) 2024/1248 (5) lenar bunaíodh beart cúnaimh faoi SES chun tacú le Fórsaí Armtha an Chósta Eabhair.

(6)

I mí an Mheithimh 2025, fuair Ardionadaí an Aontais do Ghnóthaí Eachtracha agus don Bheartas Slándála iarraidh ón gCósta Eabhair go dtabharfadh an tAontas cúnamh breise d’Fhórsaí Armtha an Chósta Eabhair i ndáil le soláthar trealaimh thábhachtaigh agus seirbhísí tábhachtacha chun a gcumais oibríochtúla a neartú le teorainneacha talún a dhaingniú agus chun cur i gcoinne grúpaí armtha nach grúpaí de chuid an stáit iad a bhfuil an tír agus réigiún na hAfraice Thiar ina iomláine á ndíchobhsú acu.

(7)

Tá bearta cúnaimh le cur chun feidhme, agus na prionsabail agus na ceanglais a leagtar amach i gCinneadh (CBES) 2021/509 á gcur san áireamh, go háirithe maidir le comhlíonadh Chomhsheasamh 2008/944/CBES ón gComhairle (6), agus i gcomhréir leis na rialacha maidir leis an ioncam agus an caiteachas a mhaoinítear faoi SES.

(8)

Athdhearbhaíonn an Chomhairle go bhfuil rún daingean aici cearta an duine, saoirsí bunúsacha agus prionsabail dhaonlathacha a chosaint, a chur chun cinn agus a chomhlíonadh agus an smacht reachta agus an dea-rialachas a neartú, i gcomhréir le Cairt na Náisiún Aontaithe, le Dearbhú Uilechoiteann Chearta an Duine agus leis an dlí idirnáisiúnta, go háirithe an dlí idirnáisiúnta um chearta an duine agus an dlí daonnúil idirnáisiúnta,