(1)

Le Rialachán (AE) 2016/679 leagtar amach na rialacha maidir le haistriú sonraí pearsanta ó rialaitheoirí nó ó phróiseálaithe san Aontas chuig tríú tíortha agus chuig eagraíochtaí idirnáisiúnta a mhéid a thagann na haistrithe sin faoin raon feidhme a chur i bhfeidhm. Na rialacha maidir le haistrithe sonraí idirnáisiúnta, leagtar síos i gCaibidil V (Airteagail 44 go 50) den Rialachán sin iad. Cé go bhfuil sreabhadh sonraí pearsanta chuig tíortha agus chuig eagraíochtaí idirnáisiúnta lasmuigh den Aontas agus uathu fíor-riachtanach le haghaidh leathnú na trádála trasteorann agus an chomhair idirnáisiúnta, níor cheart dochar a dhéanamh don leibhéal cosanta a thugtar do shonraí pearsanta san Aontas de dheasca aistrithe chuig tríú tíortha agus chuig eagraíochtaí idirnáisiúnta (2).

(2)

De bhun Airteagal 45(3) de Rialachán (AE) 2016/679, féadfaidh an Coimisiún a chinneadh, trí bhíthin gníomh cur chun feidhme, go n-áirithítear i dtríú tír, i gcríoch nó in earnáil shonraithe amháin nó níos mó i dtríú tír, nó in eagraíocht idirnáisiúnta go bhfuil leibhéal cosanta leordhóthanach inti. Faoin gcoinníoll sin, , féadfar sonraí pearsanta a aistriú chuig eagraíocht idirnáisiúnta gan an gá aon údarú breise a fháil, dá bhforáiltear in Airteagal 45(1) agus a leagtar amach in aithris 103 de Rialachán (AE) 2016/679.

(3)

Mar a shonraítear in Airteagal 45(2) de Rialachán (AE) 2016/679, glacadh cinnidh leordhóthanachta, ní mór é a bheith bunaithe ar anailís chuimsitheach ar chóras dlí na heagraíochta idirnáisiúnta, lena gcumhdaítear idir na rialacha is infheidhme maidir le hallmhaireoirí sonraí agus na teorannuithe agus na coimircí a mhéid a bhaineann le rochtain údarás poiblí ar shonraí pearsanta. Ina mheasúnú, ní mór don Choimisiún a chinneadh cé acu a ráthaíonn nó nach ráthaíonn an eagraíocht idirnáisiúnta atá i gceist leibhéal cosanta ‘arb coibhéiseach é go bunúsach’ agus an leibhéal a áirithítear laistigh den Aontas (3). An caighdeán ar dá réir a ndéantar an ‘coibhéis bhunúsach’ sin a mheasúnú, is é an caighdeán a leagtar amach i reachtaíocht an Aontais é, go háirithe Rialachán (AE) 2016/679, agus i gcásdlí Chúirt Bhreithiúnais an Aontais Eorpaigh freisin. (4) Tá tábhacht ag baint le ‘critéir thagartha maidir le leordhóthanacht’ an Bhoird Eorpaigh um Chosaint Sonraí i ndáil leis sin freisin chun an caighdeán sin a shoiléiriú a thuilleadh agus chun treoraíochta a chur ar fáil ina leith (5).

(4)

Mar a shoiléirigh an Chúirt Bhreithiúnais, ní féidir a cheangal ar thríú tír ná ar eagraíocht idirnáisiúnta leibhéal cosanta a áirithiú arb ionann é agus an leibhéal a ráthaítear i ndlíchóras an Aontais (6). Go sonrach, na modhanna a mbaineann an tríú tír nó an eagraíocht idirnáisiúnta i gceist leas astu chun sonraí pearsanta a chosaint, is féidir go mbeidh siad éagsúil leis na modhanna a úsáidtear san Aontas, fad a bheidh siad, sa chleachtas, éifeachtach chun leibhéal leordhóthanach cosanta a áirithiú (7). Dá bhrí sin, ní cheanglaítear leis an gcaighdeán leordhóthanachta macasamhlú pointe go pointe ar rialacha an Aontais. Ina ionad sin, is éard atá á thástáil, trí shubstaint na gceart príobháideachais agus na gcoimircí cosanta sonraí (lena n-áirítear cur chun feidhme, maoirseacht agus forfheidhmiú éifeachtach na gceart agus na gcoimircí sin) agus trí na himthosca a bhaineann le haistriú sonraí pearsanta, cé acu a sholáthraíonn nó nach soláthraíonn an córas eachtrach ina iomláine an leibhéal cosanta is gá (8).

(5)

Rinne an Coimisiún anailís ar chreat dlíthiúil agus ar chleachtas Eagraíocht Eorpach na bPaitinní. Ar bhonn na dtorthaí a leagtar amach in aithrisí 7 go 100, is é conclúid an Choimisiúin go ndéanann Eagraíocht Eorpach na bPaitinní (EEP) leibhéal leordhóthanach cosanta a áirithiú le haghaidh sonraí pearsanta a aistrítear ón Aontas chuig EEP laistigh de raon feidhme Rialachán (AE) 2016/679.

(6)

De bhun an Chinnidh seo, féadfaidh aistrithe ó rialaitheoirí agus ó phróiseálaithe san Aontas chuig Eagraíocht Eorpach na bPaitinní tarlú gan gá a bheith le haon údarú breise a fháil. Leis an gCinneadh seo, níor cheart difear a dhéanamh do chur i bhfeidhm díreach Rialachán (AE) 2016/679 maidir leis na heintitis sin i gcás ina gcomhlíonfar na coinníollacha i ndáil leis an raon feidhme críochach a leagtar síos in Airteagal 3 den Rialachán sin.

(7)

Is eagraíocht idir-rialtasach í Eagraíocht Eorpach na bPaitinní a bunaíodh an 7 Deireadh Fómhair 1977 ar bhonn an Choinbhinsiúin um an bPaitinn Eorpach (CPE). Tá suíomh na hEagraíochta in München agus tá 39 Stát chonarthacha rannpháirteach inti, mar atá Ballstáit uile an Aontais, an Íoslainn, an Iorua agus Lichtinstéin, mar aon leis an Albáin, an Mhacadóin Thuaidh, Monacó, San Mairíne, an tSeirbia, an Eilvéis, Montainéagró, an Ríocht Aontaithe agus an Tuirc (9).

(8)

Tá pearsantacht dhlítheanach ag an Eagraíocht (10) agus tá dhá orgán aici (11): Oifig Eorpach na bPaitinní (an Oifig) agus an Chomhairle Riaracháin. Is é príomhchúram EEP paitinní Eorpacha a dheonú (12) i gcomhréir le CPE, rud a dhéanann an Oifig faoi mhaoirseacht na Comhairle Riaracháin. Ionadaithe na Stát conarthach atá ar an gComhairle Riaracháin agus feidhmíonn sí cumhachtaí reachtacha thar ceann EEP. Tá sí freagrach as saincheisteanna beartais freisin agus déanann sí maoirseacht ar ghníomhaíochtaí na hOifige (13). Tá an Oifig, a fheidhmíonn mar bhrainse feidhmiúcháin EEP, faoi cheannas Uachtaráin (14) a dhéanann bainistiú ar an Oifig agus atá freagrach don Chomhairle Riaracháin (15). I measc nithe eile, déanann an tUachtarán buiséad na hOifige a ullmhú agus a chur chun feidhme, baill foirne na hOifige a cheapadh agus a mhaoirsiú, údarás araíonachta ar na baill foirne a fheidhmiú agus feidhmiú na hOifige a áirithiú, lena n-áirítear treoracha riaracháin inmheánacha a ghlacadh agus faisnéis a chur ar fáil don phobal agus féadfaidh sé aon togra maidir le leasú a dhéanamh ar an gCoinbhinsiún, rialacháin ghinearálta nó cinntí a thagann faoi inniúlacht na hOifige a chur faoi bhráid na Comhairle Riaracháin (16). Tá rannóga éagsúla san Oifig, lena n-áirítear Rannóg Fála, Rannóg Dlí, Rannóga Scrúdúcháin agus Freasúra, agus na Boird Achomhairc (comhlacht neamhspleách inmheánach ar féidir achomharc a dhéanamh os a chomhair in aghaidh cinntí arna nglacadh ag EEP i gcomhthéacs an nós imeachta um dheonú paitinne) (17).

(9)

Faigheann EEP sonraí pearsanta ó roinnt gníomhaithe éagsúla san Aontas le linn di a cuid cúraimí a chomhlíonadh. Ar bhonn leanúnach, comhdaíonn iarratasóirí paitinne iarratais ar phaitinní Eorpacha (18) ag EEP nó déanann oifigí paitinní náisiúnta sna Ballstáit iad a tharchur chuig EEP (19). Faigheann agus próiseálann EEP sonraí pearsanta freisin i gcomhthéacs na gcúraimí a chuirtear de chúram uirthi faoi Rialachán (AE) Uimh. 1257/2012 ó Pharlaimint na hEorpa agus ón gComhairle (20). Áirítear ar na cúraimí sin iarrataí ar éifeacht aonadach paitinní Eorpacha a fháil agus a scrúdú, táillí bliantúla a bhailiú agus éifeacht aonadach a chlárú. (21) Sa chomhthéacs sin, faigheann EEP iarrataí maidir le hachomhairc atá ar siúl os comhair Bhord Achomhairc na hOifige (22) ón gCúirt Aontaithe um Paitinní freisin, iarrataí a bhféadfadh na sonraí pearsanta is gá chun an cás ábhartha a shainaithint a bheith san áireamh iontu (23).

(10)

Ar an gcaoi chéanna, faigheann EEP sonraí pearsanta atá san áireamh in iarratais idirnáisiúnta ar phaitinní nuair a ghníomhaíonn sí faoin gConradh Comhair Paitinní (CCP), conradh idirnáisiúnta lena gceadaítear d’iarratasóirí paitinní a fháil a bhfuil éifeacht leo maidir le gach Stát conarthach CCP (24). Gníomhaíonn EEP mar Údarás Cuardaigh Idirnáisiúnta faoi CCP agus sa cháil sin déanann sí athbhreithniú ar inphaitinneacht aireagán a nochtar in iarratais idirnáisiúnta, rud a chabhraíonn le hiarratasóirí a chinneadh cé acu a chomhdóidh nó nach gcomhdóidh siad iarratas ar scrúdú substainteach ar an leibhéal náisiúnta/ar leibhéal an Aontais (25).

(11)

Ina theannta sin, comhoibríonn EEP go dlúth le hoifigí paitinní náisiúnta sna Ballstáit uile faoi chuimsiú ‘Líonra Eorpach na bPaitinní’, agus, sa chomhthéacs sin, malartaíonn sí sonraí pearsanta leo, mar shampla nuair a bhíonn cúrsaí oiliúna agus seirbhísí TF á soláthar chun tacú leis an gcomhar faoi CPE agus chun an comhar sin a neartú. Ar an gcaoi chéanna, tá comhaontuithe comhair déthaobhacha tugtha i gcrích aici le Ballstáit a mbíonn malartú sonraí pearsanta i gceist leo, mar shampla i gcomhthéacs meithleacha a bhunú, saineolaithe náisiúnta a thabhairt ar iasacht agus a imlonnú, etc. Comhoibríonn sí go dlúth le hOifig Maoine Intleachtúla an Aontais Eorpaigh freisin, mar shampla trí chúrsaí oiliúna comhpháirteacha agus imeachtaí múscailte feasachta a reáchtáil agus saineolaithe a thabhairt ar iasacht.

(12)

Ar deireadh, tá conarthaí ag EEP le roinnt soláthraithe seirbhíse san Aontas a ghníomhaíonn mar phróiseálaí de réir bhrí Airteagal 4, pointe (8) de Rialachán (AE) 2016/679 agus a aistríonn sonraí pearsanta chuig EEP.

(13)

Maidir leis an reachtaíocht phríomha lena rialaítear gníomhaíochtaí EEP, bunaítear an reachtaíocht sin le conradh idirnáisiúnta, is é sin CPE agus, i gcás ina ngníomhaíonn EEP faoi CCP, bunaítear í le CCP. Ar an dara leibhéal d’ordlathas na norm is infheidhme maidir le EEP, tá gníomhartha dlí arna nglacadh ag an gComhairle Riaracháin nó, a mhéid a bhaineann le CCP, ag Tionól CCP. I reachtaíocht thánaisteach EEP, áirítear Rialacháin Cur Chun Feidhme CPE agus Rialacháin Seirbhíse, mar a thugtar orthu, (lena rialáiltear gnéithe a bhaineann le baill foirne EEP, ina measc sin cearta agus oibleagáidí na mball foirne) (26). Leagtar amach an ceart go gcosnófaí sonraí pearsanta in Airteagal 1B de na Rialacháin Seirbhíse (27), airteagal ina bhfuil roinnt croífhorálacha de chreat cosanta sonraí EEP freisin, is é sin forálacha maidir le raon feidhme chur i bhfeidhm an chreata cosanta sonraí, cosaint catagóirí speisialta sonraí agus daoine aonair a bheith ag feidhmiú a gceart. Le hAirteagal 2(1) agus Airteagal 32A de na Rialacháin Seirbhíse, bunaítear sásraí um fhormhaoirseacht neamhspleách (an tOifigeach Cosanta Sonraí (OCS) agus an Bord um Chosaint Sonraí (BCS)) chun formhaoirseacht a dhéanamh ar chomhlíonadh na rialacha cosanta sonraí (28).

(14)

Tá feidhm ag na ceanglais shubstainteacha chéanna lena rialaítear cosaint sonraí pearsanta maidir leis an gComhairle Riaracháin agus an Oifig agus maidir lena ranna uile. Go sonrach, déantar próiseáil sonraí pearsanta ag an Oifig a rialáil leis na Rialacha Cur Chun Feidhme i ndáil le hAirteagail 1B agus 32A de na Rialacháin Seirbhíse le haghaidh Buanfhostaithe agus Fostaithe eile Oifig Eorpach na bPaitinní maidir le Cosaint Sonraí Pearsanta (Rialacha Cosanta Sonraí (RCS)), arna nglacadh ag an gComhairle Riaracháin (29). Tá próiseáil sonraí pearsanta ag an gComhairle Riaracháin faoi réir Rialacha Cosanta Sonraí na Comhairle Riaracháin, lena gcuirtear na RCS i bhfeidhm mutatis mutandis (30). I gcás ina dtagraítear sa Chinneadh seo do na RCS, sna tagairtí sin áirítear na ceanglais chomhfhreagracha a bhfuil feidhm acu maidir leis an gComhairle Riaracháin, a Rúnaíocht agus a coistí. Tá struchtúr agus ábhar na RCS ailínithe go dlúth le creat cosanta sonraí an Aontais (31). Go sonrach, tá roinnt mhaith cosúlachtaí idir na rialacha agus Rialachán (AE) 2018/1725 ó Pharlaimint na hEorpa agus ón gComhairle (32) lena leagtar síos ceanglais cosanta sonraí le haghaidh institiúidí agus chomhlachtaí an Aontais agus, dá bhrí sin, tá siad an-oiriúnach do struchtúr sonrach agus do ghnéithe sonracha eagraíochtaí idirnáisiúnta, agus iad ag teacht go dlúth le Rialachán (AE) 2016/679 san am céanna.

(15)

A mhéid a bhaineann le próiseáil sonraí ag an Oifig, tá ionstraimí breise eisithe ag an Uachtarán atá ceangailteach ó thaobh dlí, amhail ciorcláin, cinntí agus treoracha riaracháin inmheánacha (33). Go sonrach, comhlánaítear na RCS le Cinneadh an 13 Nollaig 2021 ón Uachtarán maidir le próiseáil sonraí pearsanta in imeachtaí um dheonú paitinne agus in imeachtaí gaolmhara (an Cinneadh maidir himeachtaí um dheonú paitinne) (34); Cinneadh an 7 Nollaig 2022 maidir le próiseáil sonraí pearsanta in imeachtaí a bhaineann le paitinní Eorpacha a bhfuil éifeacht aonadach leo (an Cinneadh maidir le paitinní aonadacha) (35); Cinneadh an 17 Samhain 2022 maidir le tíortha agus eintitis a mheastar go n-áirithíonn siad go dtugtar cosaint leordhóthanach do shonraí pearsanta; (36) Cinneadh an 2 Bealtaine 2024 lena sainaithnítear aonaid oibríochtúla na hOifige a ghníomhaíonn mar rialaitheoirí tarmligthe (37); agus Ciorclán Uimh. 420 lena gcuirtear chun feidhme Airteagal 25 de na RCS maidir le srianta ar chearta ábhar sonraí (Ciorclán 420) (38). Maidir le próiseáil sonraí i gcomhthéacs imeachtaí um dheonú paitinne go sonrach, tá sé tábhachtach a thabhairt faoi deara go bhfuil tosaíocht ag na ceanglais i ndáil le próiseáil sonraí pearsanta dá bhforáiltear go díreach in CPE agus CCP thar na RCS. Soiléirítear an t-idirghníomhú idir CPE agus CCP, de pháirt amháin, agus na RCS, den pháirt eile, sa Chinneadh maidir leis an nós imeachta um dheonú paitinne (39) agus sa Chinneadh maidir le paitinní aonadacha. In aithrisí 55 go 59 déantar measúnú ar na ceanglais shonracha cosanta sonraí a thagann go díreach ó CPE agus CCP. Tá na RCS agus a n-ionstraimí comhlántacha ceangailteach agus infhorfheidhmithe ó thaobh dlí agus féadann daoine aonair iad a agairt roimh shásraí um shásamh neamhspleách, mar a thugtar tuairisc in aithrisí 89 go 96.

(16)

Na rialacha dá bhforáiltear sna hionstraimí dlí a luaitear in aithris 15, déantar iad a oibríochtú a thuilleadh in ionstraimí arna n-eisiúint ag an Oifigeach Cosanta Sonraí (féach aithrisí 83 go 88) (40), ionstraimí a bhfuil feidhm acu maidir leis an gComhairle Riaracháin agus an Oifig agus maidir lena ranna uile freisin (41).

(17)

De bhun na RCS agus na Rialachán Seirbhíse (42), ceanglaítear ar fhostaithe uile EEP cloí leis na RCS nuair a bhíonn sonraí pearsanta á bpróiseáil acu. Déantar raon feidhme ábhartha agus pearsanta chur i bhfeidhm na RCS a chinneadh leis na téarmaí ‘sonraí pearsanta’, ‘próiseáil,’‘rialaitheoir’, ‘rialaitheoir tarmligthe’ agus ‘próiseálaí’ a shainmhínítear iontu.

(18)

Is ionann na sainmhínithe ar ‘sonraí pearsanta’ agus ‘próiseáil’ sna RCS agus na sainmhínithe atá i Rialachán (AE) 2016/679 (43). Tá feidhm ag na RCS maidir le haon phróiseáil a dhéanann EEP ar shonraí pearsanta, gan beann ar cé acu a bhaineann an phróiseáil sin le sonraí pearsanta a fhostaithe féin nó le sonraí daoine aonair eile (44). Sonraí ar cuireadh ainm bréige i bhfeidhm orthu (45), meastar gur sonraí pearsanta iad freisin. Ní chaitear le sonraí daoine éagtha ná sonraí daoine dlítheanacha, ná le faisnéis anaithnid (46), mar shonraí pearsanta faoi na RCS (47).

(19)

Tá feidhm ag na RCS maidir le próiseáil sonraí pearsanta ag EEP go hiomlán nó go páirteach trí mhodhanna uathoibrithe, agus maidir le próiseáil sonraí pearsanta, ar cuid de chóras comhdúcháin iad nó atá beartaithe a bheith ina gcuid de chóras comhdúcháin, trí mhodhanna eile seachas modhanna uathoibrithe (48).

(20)

Sainmhínítear ‘rialaitheoir’ sna RCS mar ‘eintiteas, is é sin Oifig Eorpach na bPaitinní, a chinneann críocha agus modhanna na próiseála sonraí pearsanta, mar eintiteas aonair nó i gcomhpháirt’ (49). I bprionsabal, feidhmíonn an tUachtarán mar rialaitheoir le haghaidh na n-oibríochtaí próiseála sonraí a dhéanann an Oifig (50). Is amhlaidh atá maidir leis an gComhairle Riaracháin (arb é an Cathaoirleach a ghníomhaíonn mar rialaitheoir ina cás-sa), na Boird Achomhairc ag gníomhú dóibh ina gcáil bhreithiúnach (arb é an tUachtarán a ghníomhaíonn mar rialaitheoir ina gcás-sa (51)) agus an Roghchoiste (arb é an Cathaoirleach a ghníomhaíonn mar rialaitheoir ina chás siúd (52)). Féadann an rialaitheoir an chumhacht sin a tharmligean chuig aonaid oibríochtúla a ndéanann bainisteoir ar leibhéal sinsearach ionadaíocht orthu (53). Sna cásanna sin, gníomhaíonn aonaid oibríochtúla mar ‘rialaitheoirí tarmligthe’ (54) a shainíonn críoch na hoibríochta próiseála (mar shampla cúis, réasúnaíocht agus riachtanais ghnó) agus modhanna na hoibríochta próiseála agus a áirithíonn go gcomhlíonann na hoibríochtaí próiseála uile a bhaineann le sonraí pearsanta na RCS (55). Sna cásanna sin, is é an rialaitheoir atá freagrach as an bpróiseáil sonraí pearsanta go fóill. Déantar foráil sna RCS freisin maidir le ‘rialú comhpháirteach’; sa chás sin cinneann rialaitheoir críoch agus modhanna na próiseála in éineacht le rialaitheoir amháin nó níos mó lasmuigh de EEP (56).

(21)

Is ionann an sainmhíniú ar ‘phróiseálaí’ sna RCS agus an sainmhíniú in Airteagal 4(8) de Rialachán (AE) 2016/679, is é sin duine nádúrtha nó dlítheanach, údarás poiblí, gníomhaireacht, nó aon eintiteas eile a phróiseálann sonraí pearsanta thar ceann an rialaitheora (57). Próiseálaithe a thugann ráthaíochtaí leormhaithe go gcuirfear bearta teicniúla agus eagraíochtúla iomchuí chun feidhme lena áirithiú go gcomhlíonfaidh an phróiseáil ceanglais na RCS (58), is na próiseálaithe sin a cheadaítear don rialaitheoir a úsáid agus na próiseálaithe sin amháin. Ní mór an caidreamh idir an rialaitheoir agus próiseálaí a rialú le conradh nó le gníomh dlí atá ina cheangal ar an bpróiseálaí agus a dhéanann ábhar, fad, cineál agus críoch na próiseála a leagadh amach, i measc nithe eile (59). Ní cheadaítear don phróiseálaí na sonraí a phróiseáil ach amháin ar threoracha doiciméadaithe a fháil ón rialaitheoir chuige sin. Ceanglaítear ar an bpróiseálaí cúnamh a thabhairt don rialaitheoir a oibleagáidí faoi na RCS a chomhlíonadh. Toirmisctear ar an bpróiseálaí fophróiseálaithe a fhostú gan údarú chuige sin a fháil ón rialaitheoir roimh ré (60). Tá comhaontú caighdeánach maidir le próiseáil sonraí ar fáil do rialaitheoirí tarmligthe (61). Thairis sin, más i dtríú tír atá próiseálaí lonnaithe, ní mór ceanglais na RCS i ndáil le haistrithe idirnáisiúnta a chomhlíonadh freisin nuair a chomhroinnfear sonraí pearsanta leis an bpróiseálaí sin, mar a thugtar tuairisc air sin in aithrisí 68 go 73 den Chinneadh seo (62).

(22)

Ba cheart sonraí pearsanta a phróiseáil go dleathach agus go cothrom.

(23)

Leagtar síos na prionsabail ghinearálta sin in Airteagal 4(2)(a) de na RCS ar bhealach is féidir a mheas a bheith comhionann le hAirteagal 5(1)(a) de Rialachán (AE) 2016/679.

(24)

Déantar prionsabal na dlíthiúlachta a fhorbairt a thuilleadh in Airteagal 5 de na RCS, áit a liostaítear na bunúis dlí ar a bhféadfar sonraí pearsanta a phróiseáil. Is iad na bunúis dlí sin (a) an gá atá ann cúram a dhéanamh i bhfeidhmiú ghníomhaíochtaí oifigiúla EEP (63) nó i bhfeidhmiú dlisteanach an údaráis oifigiúil atá dílsithe don rialaitheoir, lena n-áirítear an phróiseáil is gá le haghaidh bhainistiú agus fheidhmiú na hOifige (64); (b) an gá atá ann oibleagáid dhlíthiúil a bhfuil an rialaitheoir faoina réir a chomhlíonadh (mar shampla faisnéis a luaitear in iarratas ar phaitinn a fhoilsiú i gClár Eorpach na bPaitinní) (65); (c) an gá atá ann conradh a fheidhmiú ar páirtí ann an t-ábhar sonraí, sin nó bearta a dhéanamh arna iarraidh sin ag an ábhar sonraí sula ndéanfaidh sé conradh; (d) toiliú an ábhair sonraí; nó (e) an gá atá ann leasanna ríthábhachtacha an ábhair sonraí nó duine nádúrtha eile a chosaint.

(25)

Sainmhínítear toiliú sna RCS ar an mbealach céanna agus a shainmhínítear i Rialachán (AE) 2016/679, is é sin ‘aon léiriú sonrach, feasach agus gan athbhrí a thugtar faoi shaoirse ar mhianta an ábhair sonraí trína gcuireann an t-ábhar sonraí in iúl, trí ráiteas nó trí ghníomhaíocht shoiléir dhearfach, go n-aontaíonn sé nó sí le próiseáil sonraí pearsanta a bhaineann leis nó léi’ (66). Is faoin rialaitheoir atá sé a thaispeáint gur thug an t-ábhar sonraí toiliú (67). Agus measúnú á dhéanamh an faoi shaoirse a tugadh an toiliú, ba cheart a chur san áireamh an é go ndéantar comhlíonadh conartha coinníollach ar an toiliú le próiseáil sonraí pearsanta, ar próiseáil í nach bhfuil riachtanach chun an conradh sin a chomhlíonadh (68). Ní féidir breathnú ar an toiliú mar thoiliú a tugadh faoi shaoirse mura bhfuil rogha atá dílis nó saor ag an ábhar sonraí nó mura bhfuil sé nó sí in ann diúltú don toiliú a thabhairt nó é a tharraingt siar gan díobháil (69). Ina theannta sin, ionas go mbeidh an toiliú feasach, leis na RCS éilítear go mbeidh an t-ábhar sonraí ar an eolas, ar a laghad, faoi chéannacht an rialaitheora agus faoi chríocha na próiseála ar chucu atá na sonraí pearsanta beartaithe (70). Ar deireadh, tá sé de cheart ag ábhar sonraí toiliú a tharraingt siar tráth ar bith (71).

(26)

Ba cheart coimircí sonracha a bheith ann i gcás ina bhfuil ‘catagóirí speisialta’ sonraí á bpróiseáil.

(27)

Tá rialacha sonracha sna RCS a mhéid a bhaineann le próiseáil catagóirí speisialta sonraí pearsanta (72) a shainítear ar an mbealach céanna agus a shainítear faoi Rialachán (AE) 2016/679, is é sin sonraí pearsanta lena léirítear tionscnamh ciníoch nó eitneach, tuairimí polaitiúla, creideamh reiligiúnach nó fealsúnach, ballraíocht i gceardchumann, sonraí géiniteacha (73) nó sonraí bithmhéadracha (74) chun duine nádúrtha a shainaithint go huathúil agus sonraí a bhaineann leis an tsláinte (75) nó sonraí a bhaineann le saol gnéis nó le gnéaschlaonadh duine nádúrtha (76). De bhun na RCS, tá toirmeasc i bprionsabal ar chatagóirí speisialta sonraí a phróiseáil mura bhfuil feidhm ag eisceacht shonrach (77).

(28)

Tá na heisceachtaí sonracha a liostaítear in Airteagal 11(2) de na RCS cosúil leis na heisceachtaí in Airteagal 9(2) agus (3) de Rialachán (AE) 2016/679, ach tá roinnt oiriúnuithe ar an gcreat dlíthiúil ina bhfeidhmíonn EEP. Ní cheadaítear catagóirí speisialta sonraí pearsanta a phróiseáil ach amháin in imthosca sonracha teoranta (78), is é sin más rud é (1) gur thug an t-ábhar sonraí toiliú sainráite; (2) gur gá an phróiseáil a dhéanamh chun leasanna ríthábhachtacha duine aonair a chosaint (i gcás nach féidir leis an ábhar sonraí toiliú sainráite a thabhairt go fisiciúil nó go dlíthiúil); (3) gur follasach gur chuir an t-ábhar sonraí na sonraí pearsanta ar fáil go poiblí; (4) gur gá an phróiseáil a dhéanamh chun críche áirithe a bhaineann le feidhmiú ghníomhaíochtaí oifigiúla EEP, sin nó i bhfeidhmiú údaráis dhlisteanaigh atá dílsithe don rialaitheoir (79); nó (5) gur gá an phróiseáil a dhéanamh chun éilimh dhlíthiúla a bhunú, a fheidhmiú nó a chosaint.

(29)

Sa bhreis ar na catagóirí speisialta sonraí pearsanta dá dtagraítear in aithris 27, leis na RCS éilítear cosaintí sonracha freisin le haghaidh próiseáil sonraí pearsanta a bhaineann le ciontuithe coiriúla agus le cionta, is é sin le rá gan próiseáil den sórt sin a cheadú ach amháin tar éis dul i gcomhairle leis an BCS roimh ré nó i gcás ina n-éilítear an phróiseáil le hionstraim atá ceangailteach ó thaobh dlí, ar ionstraim í lena bhforáiltear maidir le coimircí iomchuí le haghaidh na gceart agus na saoirsí atá ag daoine aonair (80).

(30)

Ba cheart sonraí a bhailiú chun críche áirithe agus níor cheart iad a úsáid ina dhiaidh sin ach amháin a mhéid a bhfuil i gcomhréir le críoch na próiseála.

(31)

Áirithítear an prionsabal sin in Airteagal 4(2)(b) de na RCS, ar dá bhun nach mór sonraí pearsanta a bhailiú chun críoch sonraithe sainráite dlisteanach agus gan próiseáil bhreise a dhéanamh orthu ar bhealach atá ar neamhréir leis na críocha sin.

(32)

Fearacht Rialachán (AE) 2016/679, leis na RCS ceadaítear próiseáil bhreise a dhéanamh (gan beann ar chomhoiriúnacht chríoch na próiseála breise leis an gcríoch bhunaidh) ar bhonn thoiliú sainráite an ábhair sonraí nó ar bhonn forálacha dlí is infheidhme de chuid EEP (81). I gcás na bhforálacha dlí sin, leis na RCS éilítear nach mór an phróiseáil a bheith ina beart riachtanach comhréireach chun cuspóir a bhaineann le leas an phobail i gcoitinne a choimirciú (82).

(33)

Nuair nach mbíonn an phróiseáil bhreise bunaithe ar cheachtar den dá fhoras sin, déantar foráil sna RCS maidir leis na tosca a bheidh le cur san áireamh agus measúnú á dhéanamh ar chomhoiriúnacht chríoch na próiseála breise leis an gcríoch ar chuici a bailíodh na sonraí pearsanta ar dtús (83). Is ionann an cur chuige sin agus na tosca a liostaítear sna RCS agus na cinn a leagtar amach in Airteagal 6(4) de Rialachán (AE) 2016/679 agus in Airteagal 6 de Rialachán (AE) 2018/1725 (84).

(34)

Ba cheart sonraí pearsanta a bheith cruinn agus, i gcás inar gá, ba cheart iad a choimeád cothrom le dáta. Ba cheart iad a bheith leordhóthanach agus ábhartha, agus níor cheart iad a bheith iomarcach, i ndáil leis na críocha ar chucu a phróiseáiltear iad, agus i bprionsabal níor cheart iad a choimeád ar feadh tréimhse is faide ná mar is gá chun na gcríoch ar chucu a phróiseáiltear na sonraí pearsanta.

(35)

Leagtar síos na prionsabail sin in Airteagal 4(2)(c), (d) agus (e) de na RCS ar an mbealach céanna agus a leagtar síos i Rialachán (AE) 2016/679 iad.

(36)

Ba chóir sonraí pearsanta a phróiseáil freisin ar bhealach lena n-áirithítear slándáil na sonraí, lena n-áirítear cosaint ar phróiseáil neamhúdaraithe nó neamhdhleathach agus ar chailleadh, scrios nó damáiste de thaisme. Chun na críche sin, ba cheart d’oibreoirí gnó bearta teicniúla nó eagraíochtúla iomchuí a dhéanamh chun sonraí pearsanta a chosaint ar bhagairtí féideartha. Ba cheart measúnú a dhéanamh ar na bearta sin agus an úrscothacht agus na costais ghaolmhara á gcur san áireamh.

(37)

Cumhdaítear slándáil sonraí i gcreat dlíthiúil EEP trí phrionsabal na sláine agus na rúndachta a leagtar síos in Airteagal 4(2)(f) agus in Airteagal 33 de na RCS, ar bhealach atá beagnach comhionann leis an mbealach a leagtar síos i Rialachán (AE) 2016/679 é. Go sonrach, leis na RCS éilítear go n-áiritheofar leibhéal slándála is iomchuí don riosca trí bhíthin bearta iomchuí, idir bhearta teicniúla agus bhearta eagraíochtúla, agus aird á tabhairt ar an úrscothacht, ar chostais an chur chun feidhme agus ar chineál, raon feidhme, comhthéacs agus críocha na próiseála, mar aon le dóchúlacht agus déine aon riosca i leith na gceart agus na saoirsí atá ag daoine aonair, ar tosca iad a bhíonn éagsúil de réir an cháis.

(38)

Ina theannta sin, tá ceanglais shonracha sna RCS maidir le sárú i ndáil le sonraí a láimhseáil agus fógra a thabhairt ina leith (85). Ar an gcéad dul síos, ceanglaítear ar an rialaitheoir fógra a thabhairt don OCS faoi shárú i ndáil le sonraí gan moill mhíchuí (agus, i gcás inarb indéanta, tráth nach déanaí ná 72 uair an chloig tar éis dó a bheith ar an eolas faoi), ach amháin sa chás nach dócha go mbeadh riosca do chearta agus do shaoirsí daoine aonair ag gabháil leis an sárú (86). Ar an gcaoi chéanna, ceanglaítear ar phróiseálaí fógra a thabhairt don rialaitheoir faoi shárú gan moill mhíchuí (87). Ní mór tuairisc a thabhairt san fhógra, go háirithe, ar chineál an tsáraithe, ar na hiarmhairtí is dócha a bheidh aige agus ar na bearta atá déanta nó atá beartaithe a dhéanamh chun aghaidh a thabhairt ar an sárú (88). I gcás sárú i ndáil le sonraí ar dócha go mbeidh ardriosca do chearta agus do shaoirsí daoine aonair ag gabháil leis, ní mór don rialaitheoir an sárú i ndáil le sonraí pearsanta a chur in iúl don ábhar sonraí freisin gan mhoill (89). Sa chomhfhreagras leis an ábhar sonraí, ní mór tuairisc a thabhairt ar chineál an tsáraithe i ndáil le sonraí pearsanta agus friotal soiléir simplí á úsáid (90). Ní gá an chumarsáid sin a dhéanamh má tá bearta déanta ag an rialaitheoir i ndiaidh an tsáraithe lena n-áirithítear nach móide go dtarlódh an t-ardriosca do chearta ná do shaoirsí na n-ábhar sonraí a thuilleadh (91).

(39)

Ba cheart ábhair sonraí a chur ar an eolas faoi na príomhghnéithe a bhaineann le próiseáil a gcuid sonraí pearsanta.

(40)

I gcomhréir leis na RCS, ceanglaítear ar an rialaitheoir, tráth a fhaightear sonraí pearsanta, faisnéis a sholáthar do dhaoine aonair, go háirithe maidir lena chéannacht agus a chuid sonraí teagmhála (chomh maith le sonraí teagmhála an OCS), críoch na próiseála agus an bunús dlí atá léi, na faighteoirí nó na catagóirí faighteoirí, an fíoras go bhfuil sé beartaithe aige na sonraí a aistriú lasmuigh de EEP, mar aon leis na cearta is infheidhme agus an fhéidearthacht sásamh a fháil (92). Is amhlaidh an cás nuair a phróiseáiltear sonraí pearsanta chun críche seachas an chríoch ar chuici a bailíodh na sonraí (93). Níl feidhm ag an dá oibleagáid ach amháin sa chás nach bhfuil an fhaisnéis ag an duine aonair lena mbaineann cheana (94).

(41)

Ní mór an fhaisnéis chéanna a sholáthar do na hábhair sonraí nuair nach ndéantar sonraí pearsanta a bhailiú uathu go díreach, mar aon le faisnéis bhreise maidir le foinse na sonraí pearsanta agus na catagóirí sonraí lena mbaineann (95). Ní mór an fhaisnéis sin a sholáthar laistigh de thréimhse réasúnta tar éis na sonraí a fháil (ach laistigh de mhí amháin ar a dhéanaí), ag féachaint do na himthosca sonracha ina ndéantar na sonraí a phróiseáil (96). I gcás ina bhfuil sonraí pearsanta le húsáid chun cumarsáid a dhéanamh leis an ábhar sonraí, ba cheart an fhaisnéis chéanna a sholáthar ar a dhéanaí tráth a dhéantar an chéad chumarsáid leis an duine aonair (97). Ní mór an fhaisnéis dá dtagraítear in aithris 40 a sholáthar freisin sula ndéanfar aon phróiseáil bhreise nó, má tá nochtadh d’fhaighteoir eile beartaithe, ar a dhéanaí tráth a nochtar sonraí pearsanta do thríú páirtí (98). Níl feidhm ag an oibleagáid sin i roinnt cásanna, eadhon i gcás ina bhfuil an fhaisnéis lena mbaineann ag ábhar sonraí cheana; i gcás nach mór an fhaisnéis sin a choimeád faoi rún mar gheall ar oibleagáid rúndachta gairmiúla arna rialáil ar bhonn CPE agus/nó forálacha dlíthiúla eile is infheidhme maidir le EEP (99); i gcás ina bhfuil sé dodhéanta an fhaisnéis sin a sholáthar nó ina mbeadh iarracht dhíréireach ag baint lena soláthar, go háirithe i gcás próiseáil chun críoch cartlannaithe, chun críoch staidrimh, nó chun críoch taighde eolaíche nó stairiúla, a mhéid nach bhféadfaí cuspóirí na próiseála a bhaint amach de bharr an tsoláthair nó a mhéid a dhéanfadh sé dochar mór do bhaint amach na gcuspóirí sin; nó i gcás ina ndéantar fáil nó nochtadh na faisnéise sin a leagadh síos go sainráite i CPE nó i bhforálacha dlíthiúla eile is infheidhme lena bhforáiltear maidir le bearta iomchuí chun leasanna dlisteanacha an ábhair sonraí a chosaint (100).

(42)

Ba cheart cearta áirithe a bheith ag ábhair sonraí ar féidir iad a fhorfheidhmiú in aghaidh an rialaitheora nó an phróiseálaí, go háirithe an ceart chun rochtain a fháil ar shonraí, an ceart go ndéanfaí ceartúcháin, an ceart chun agóid a dhéanamh i gcoinne na próiseála agus an ceart go ndéanfaí sonraí a léirscriosadh. An tráth céanna, féadfaidh cearta den sórt sin a bheith faoi réir srianta, sa mhéid gur gá na srianta sin agus gur comhréireach iad chun cuspóirí tábhachtacha leas ginearálta an phobail a choimirciú.

(43)

In Airteagal 1B(4) de na Rialacháin Seirbhíse, leagtar síos an gá atá le héascú a dhéanamh ar fheidhmiú chearta an duine aonair. Chun an ceanglas sin a chur chun feidhme a thuilleadh, tugann na RCS na cearta céanna do dhaoine aonair agus na cinn a leagtar síos i Rialachán (AE) 2016/679, is é sin an ceart rochtana (Airteagal 18 de na RCS), an ceart go ndéanfaí ceartúcháin (Airteagal 19 de na RCS), an ceart go ndéanfaí léirscriosadh (Airteagal 20 de na RCS), an ceart go gcuirfí srian le próiseáil (Airteagal 21 de na RCS), an ceart chun iniomparthachta sonraí (Airteagal 22 de na RCS), an ceart chun agóid a dhéanamh (Airteagal 23 de na RCS) agus an ceart gan bheith faoi réir cinnteoireacht uathoibrithe (Airteagal 24 de na RCS).

(44)

Leagtar síos forálacha ginearálta sna RCS freisin maidir le láimhseáil iarrataí ar fheidhmiú na gceart sin ó dhaoine aonair, lena gceanglaítear ar an rialaitheoir cumarsáid a dhéanamh le hábhair sonraí, agus friotal soiléir simplí á úsáid, i bhfoirm ghonta thrédhearcach intuigthe a bhfuil rochtain éasca uirthi (i scríbhinn nó ar bhealach eile) (101). Ní mór don rialaitheoir faisnéis a sholáthar do dhaoine aonair maidir leis na bearta atá déanta mar fhreagairt ar iarraidh gan moill mhíchuí agus in aon chás laistigh de mhí amháin tar éis an iarraidh a fháil (tréimhse ar féidir síneadh 2 mhí eile a chur léi i gcás inar gá i bhfianaise chastacht agus líon na n-iarrataí) (102). I gcás inar léir go follasach go bhfuil iarrataí ón ábhar sonraí gan bhunús nó iomarcach, go háirithe toisc go bhfuil siad athráiteach, féadfaidh an rialaitheoir diúltú gníomhú de réir na hiarrata (103). Nuair nach ar iarraidh a bhíonn an rialaitheoir ag gníomhú, ní mór dó an duine aonair a chur ar an eolas faoi sin agus faisnéis a sholáthar maidir leis an bhféidearthacht sásamh a lorg (104).

(45)

Ar an gcéad dul síos, a mhéid a bhaineann leis an gceart rochtana, tugann na RCS an ceart do dhaoine aonair deimhniú a fháil ó EEP maidir le cé acu a dhéantar nó nach ndéantar sonraí pearsanta a bhaineann leo a phróiseáil agus, más amhlaidh go ndéantar, rochtain a fháil ar na sonraí pearsanta go héasca (105) agus ag eatraimh réasúnta (106). Ina theannta sin, tá sé de cheart ag daoine aonair faisnéis a fháil, go háirithe, maidir le críoch na próiseála, na catagóirí sonraí lena mbaineann, na faighteoirí a gcomhroinntear sonraí leo, agus an tréimhse a meastar go stórálfar na sonraí lena linn (107).

(46)

Ar an dara dul síos, sna RCS foráiltear go dtugann an ceart go ndéanfaí ceartúcháin, dá bhforáiltear faoi na RCS, caoi do dhaoine aonair sonraí míchruinne a cheartú nó sonraí neamhiomlána a chomhlánú (mar shampla trí ráiteas forlíontach a sholáthar) (108). A luaithe a dhéantar ceartú, ceanglaítear ar an rialaitheoir é sin a chur in iúl do gach faighteoir ar nochtadh na sonraí pearsanta dóibh (109). De bhun na RCS, tá feidhm ag an gceart go ndéanfaí ceartúcháin maidir le sonraí oibiachtúla agus fíorasacha ach níl feidhm aige maidir le ráitis shuibiachtúla (110), cé go gceadaítear do dhaoine aonair sa chás sin na sonraí atá ann cheana a chomhlánú le tuairim nó saineolas ó fhoinse eile, sin nó barúlacha a sholáthar (111).

(47)

Ar an tríú dul síos, leis na RCS déantar an ceart go ndéanfaí léirscriosadh a sholáthar do dhaoine aonair freisin (112), go háirithe más rud é (a) nach bhfuil gá le sonraí pearsanta a thuilleadh chun na críche ar chuici a phróiseáiltear iad; (b) go dtarraingíonn an t-ábhar sonraí siar a thoiliú agus nach bhfuil aon bhunús dlí eile leis an bpróiseáil; (c) go déanann an t-ábhar sonraí agóid i gcoinne na próiseála agus nach ann d’aon fhoras dlisteanach sáraitheach le haghaidh na próiseála; (d) gur próiseáladh na sonraí go neamhdhleathach; (e) nó nach mór na sonraí a léirscriosadh chun oibleagáid dhlíthiúil a chomhlíonadh ar oibleagáid í a bhfuil feidhm aici maidir leis an rialaitheoir (113). Ní mór don rialaitheoir aon léirscriosadh a chur in iúl do gach faighteoir ar comhroinneadh na sonraí leo mura rud é go bhfuil sé dodhéanta é sin a dhéanamh nó go mbeadh iarracht dhíréireach ag baint leis sin (114). Ar an gcaoi chéanna, más rud é gur chuir an rialaitheoir na sonraí pearsanta ar fáil go poiblí, ní mór dó bearta réasúnta a dhéanamh chun rialaitheoirí eile atá á bpróiseáil a chur ar an eolas gur iarr an duine aonair go ndéanfaí iad a léirscriosadh (115). Níl feidhm ag an gceart go ndéanfaí léirscriosadh maidir leis na cásanna seo a leanas inar gá na sonraí a phróiseáil (a) ar mhaithe le feidhmiú an chirt chun tuairimí a nochtadh agus faisnéis a fháil; (b) chun oibleagáid dhlíthiúil atá ar EEP a chomhlíonadh nó chun oibleagáid a chomhlíonadh a eascraíonn as dualgas EEP comhoibriú lena Stáit chonarthacha (116), sin nó chun údarás oifigiúil atá dílsithe do EEP a fheidhmiú (117); (c) ar mhaithe le comhoibriú leis na Stáit chonarthacha i réimse na sláinte poiblí (118); (d) chun críoch cartlannaithe, chun críoch staidrimh, nó chun críoch taighde eolaíche nó stairiúla (a mhéid is dócha nach bhféadfaí cuspóirí na próiseála a bhaint amach dá ndéanfaí sonraí a léirscriosadh nó go gcuirfeadh sin bac mór ar bhaint amach na gcuspóirí); nó (e) chun éilimh dhlíthiúla a bhunú, a fheidhmiú nó a chosaint (119).

(48)

Ar an gceathrú dul síos, le hAirteagal 21 de na RCS soláthraítear an ceart go gcuirfí srian le próiseáil, is é sin sonraí pearsanta a mharcáil d’fhonn srian a chur lena bpróiseáil amach anseo (lena n-áirítear bearta ríomhchlárúcháin chun rochtain ar shonraí den sórt sin a chosc go buan) (120). Is féidir an ceart sin a agairt go háirithe i gcás ina gconspóideann an duine aonair cruinneas na sonraí pearsanta (le linn na tréimhse is gá don rialaitheoir chun an cruinneas a fhíorú) nó i gcás ina bhfuil an phróiseáil neamhdhleathach, ach go gcuireann an duine aonair i gcoinne léirscriosadh na sonraí (121). I gcás ina bhfuil srian leis an bpróiseáil, ní fhéadfar sonraí pearsanta a phróiseáil, cé is moite de stóráil na sonraí, ach amháin le toiliú sainráite an duine aonair, chun éilimh dhlíthiúla a bhunú, a fheidhmiú nó a chosaint, chun cearta daoine eile a chosaint nó chun cúram a chomhlíonadh a dhéantar i bhfeidhmiú ghníomhaíochtaí oifigiúla EEP (is é sin le rá cúram atá riachtanach don obair riaracháin agus don obair theicniúil a cheanglaítear ar EEP a dhéanamh i gcomhréir le CPE) (122).

(49)

Ar an gcúigiú dul síos, leagtar amach an ceart chun agóid a dhéanamh in Airteagal 1B(4) de na Rialacháin Seirbhíse agus in Airteagal 23 de na RCS. Go sonrach, tá sé de cheart ag daoine aonair agóid a dhéanamh tráth ar bith i gcoinne próiseáil sonraí pearsanta a dhéantar chun cúram a chomhlíonadh i bhfeidhmiú ghníomhaíochtaí oifigiúla EEP nó i bhfeidhmiú dlisteanach an údaráis oifigiúil atá dílsithe don rialaitheoir (123). Ní mór daoine aonair a chur ar an eolas ar bhealach soiléir go bhfuil an ceart sin acu agus ní mór sin a dhéanamh tráth a dhéantar an chéad chumarsáid leo a dhéanaí (124). I gcás ina ndéanfaidh duine aonair agóid i gcoinne próiseáil sonraí pearsanta, leis na RCS ceanglaítear ar an rialaitheoir scor den phróiseáil mura rud é go mbíonn an rialaitheoir in ann a thaispeáint go bhfuil forais dhlisteanacha thathantacha leis an bpróiseáil a dhéanamh, ar forais iad a bhfuil sáraíocht acu ar leasanna, cearta agus saoirsí an ábhair sonraí, nó gur gá an phróiseáil a dhéanamh chun éilimh dhlíthiúla a bhunú, a fheidhmiú nó a chosaint (125).

(50)

Ar an séú dul síos, leis na RCS bunaítear an ceart chun iniomparthachta sonraí lena dtugtar an deis do dhaoine aonair a sonraí pearsanta a fháil i bhformáid struchtúrtha mheaisín-inléite a úsáidtear go coitianta, mar aon leis na sonraí sin a tharchur chuig rialaitheoir eile (126). Tá feidhm ag an gceart sin i gcás ina ndéantar an phróiseáil trí mhodhanna uathoibrithe agus go ndéantar í ar bhonn thoiliú an duine aonair nó chun conradh a chomhlíonadh, ar conradh é leis an duine aonair nó atá chun leas an duine aonair (127).

(51)

Ar deireadh, de bhun na RCS, tá sé de cheart ag duine aonair gan a bheith faoi réir cinnteoireacht uathoibrithe, is é sin cinneadh atá bunaithe ar phróiseáil uathoibrithe amháin, lena n-áirítear próifíliú, ar cinneadh é a mbíonn éifeachtaí dlíthiúla aige a bhaineann leis an duine sin nó a dhéanann difear suntasach dó ar bhealach comhchosúil (128). Leagtar amach sna RCS go bhféadfar cinnteoireacht uathoibrithe a bheith i bhfeidhm i gcás ina mbíonn sí bunaithe ar thoiliú sainráite an ábhair sonraí nó ina mbíonn gá léi chun conradh a dhéanamh nó a chomhlíonadh leis an duine aonair; sa chás sin ní mór don rialaitheoir coimircí oiriúnacha a chur chun feidhme, mar shampla tríd an gceart a sholáthar idirghabháil ó dhuine a fháil, dearcadh an duine aonair a chur in iúl, agus an cinneadh a chonspóid (129). Féadfar cinnteoireacht uathoibrithe a údarú le gníomh dlí freisin má leagtar síos bearta oiriúnacha chun cearta daoine aonair a chosaint leis an ngníomh sin (130). Má théann an rialaitheoir i mbun cinnteoireacht uathoibrithe, lena n-áirítear próifíliú, ní mór dó an duine aonair a chur ar an eolas go réamhghníomhach faoi sin mar chuid dá oibleagáidí trédhearcachta agus ní mór dó faisnéis fhónta a sholáthar faoin loighic a bheidh i gceist, chomh maith le suntasacht na próiseála sin agus na hiarmhairtí a mheastar a bheidh aici ar an ábhar sonraí (131). Ní mór an fhaisnéis chéanna a sholáthar arna iarraidh sin (132).

(52)

Fearacht Airteagal 23 de Rialachán (AE) 2016/679 agus Airteagal 25 de Rialachán (AE) 2018/1725, in Airteagal 25 de na RCS foráiltear go bhféadfaidh forálacha dlíthiúla sonracha i gcreat dlíthiúil EEP srian a chur le cur i bhfeidhm na gceart dá dtagraítear in aithrisí 43 go 51 (133) (is é sin teorainn shealadach a chur lena gcur i bhfeidhm) (134), nuair a urramaíonn an srian sin bunbhrí na gceart bunúsach (135) agus na saoirsí bunúsacha agus nuair is beart riachtanach comhréireach é i sochaí dhaonlathach chun cuspóirí sonracha a choimirciú (136). Ina theannta sin, ní mór srian a sholáthar i bhforálacha ‘soiléire beachta’ atá ceaptha chun éifeachtaí dlíthiúla a bheith acu i leith ábhair sonraí agus nach mór a ghlacadh ar leibhéal an Uachtaráin ar a laghad (137). Ní mór a leagan síos sna forálacha sin, go háirithe, críoch na próiseála, raon feidhme an tsriain, na coimircí chun mí-úsáid a chosc, na tréimhsí stórála agus na coimircí is infheidhme (138).

(53)

Faoi láthair, is é Ciorclán 420 (ionstraim atá ceangailteach ó thaobh dlí arna glacadh ag an Uachtarán) an t-aon ionstraim dlí lena bhforáiltear maidir le srianta ar chearta duine aonair. Soiléirítear inti an tslí a bhféadann an rialaitheoir srianta a chur i bhfeidhm mar aon leis na coinníollacha faoina bhféadann sé iad a chur i bhfeidhm agus leagtar síos inti, ar bhealach uileghabhálach, na cásanna sonracha ina bhféadtar srian a chur le cearta agus na cuspóirí ar lena n-aghaidh a dhéanfaí sin (139). Go sonrach, foráiltear léi go bhféadfaidh EEP srian a chur le cearta duine aonair le haghaidh cuspóirí sonracha áirithe, mar atá, sna cásanna seo a leanas: (a agus b) nuair a bhíonn imeachtaí imscrúdaithe nó araíonachta á seoladh aici i ndáil lena baill foirne (140); (c) i gcomhthéacs díospóidí inmheánacha a réiteach nó éilimh dhlíthiúla a bhunú, a fheidhmiú nó a chosaint, lena n-áirítear eadráin, chun faisnéis rúnda agus doiciméid a fhaightear ó na páirtithe, ó na hidiragraithe nó ó fhoinsí dlisteanacha eile a chaomhnú; (d) nuair a bhíonn sonraí sláinte á bpróiseáil aici i ngnáthaimh agus i gcomhaid leighis, chun cearta daoine aonair a chosaint agus chuige sin amháin, áfach (141); (e agus f) nuair a bhíonn iniúchtaí agus cigireachtaí inmheánacha á ndéanamh (is é an OCS a dhéanann na cigireachtaí); (g) chun críoch bainistithe teagmhas TF agus chun críoch tuarascálacha ar theagmhais slándála fisiciúla; agus (h) nuair a bhíonn cúnamh á thabhairt aici d’údaráis phoiblí inniúla nó á fháil aici uathu, lena n-áirítear ó Stáit chonarthacha EEP agus ó eagraíochtaí idirnáisiúnta, nó nuair a bhíonn sí ag comhoibriú leo maidir le gníomhaíochtaí a shainítear i gcomhaontuithe seirbhíse, i meabhráin tuisceana agus i gcomhaontuithe comhair ábhartha, arna iarraidh sin dóibh nó ar thionscnamh na hOifige féin (142).

(54)

Cé acu is féidir nó nach féidir srian a chur i bhfeidhm i gcás sonrach, is é an rialaitheoir a chinnfidh sin i gcásanna aonair i bhfianaise na n-imthosca ábhartha (143). Agus cinneadh á dhéanamh ag an rialaitheoir maidir le srian a chur i bhfeidhm nó gan é a chur i bhfeidhm, ní mór dó measúnú a dhéanamh ar dtús ar riachtanas agus comhréireacht an tsriain sin sa chás sonrach, le rannpháirtíocht an OCS (144). Is éard a bhíonn i gceist leis an measúnú sin na rioscaí a d’fhéadfadh a bheith ann do chearta agus do shaoirsí an ábhair sonraí a chur sa mheá, ar thaobh amháin, agus rioscaí agus saoirsí ábhar sonraí eile agus na rioscaí a bhaineann le bac a chur ar chríoch agus ar thoradh na hoibríochta próiseála ar an taobh eile (145). Ní mór srianta a dhoiciméadú, lena n-áirítear trí thaifeadadh a dhéanamh ar an measúnú ar na cearta a bhfuil srian orthu, ar an bhfad a mhairfidh na srianta agus ar na cúiseanna agus na forais atá leo (146). Ina theannta sin, fad a bheidh feidhm ag srian, ní mór bearta teicniúla agus eagraíochtúla iomchuí a bheith curtha i bhfeidhm (147). Ní fhéadfar aon srian a chur i bhfeidhm ach amháin fad is ann do na cúiseanna atá leis an srian (148). Má chuirtear srian le ceart, ní mór don rialaitheoir an duine aonair a chur ar an eolas faoi na príomhchúiseanna atá leis an srian agus faoin gceart gearán a dhéanamh (149).

(55)

I bhforálacha de chonradh bunaidh EEP (is é sin CPE), i bhforálacha de CCP, agus sna forálacha is infheidhme faoi na conarthaí sin (ar reachtaíocht phríomha iad ar fad i gcás EEP), tá ceanglais shonracha áirithe i gcomhthéacs an nós imeachta um dheonú paitinne a d’fhéadfadh tionchar a imirt ar fheidhmiú ceart áirithe faoi na RCS (150). Sa Chinneadh maidir leis an nós imeachta um dheonú paitinne, tugtar forléargas ar na ceanglais sin sa reachtaíocht phríomhúil, mínítear conas is féidir cearta na n-ábhar sonraí a fheidhmiú sa chomhthéacs céanna, agus leagtar amach go soiléir eisceachtaí a d’fhéadfadh a bheith ann (151). Maidir leis na forálacha sin a d’fhéadfadh teorainn a chur le cur i bhfeidhm ceart cosanta sonraí, le Ciorclán 420 bunaítear nach mór raon feidhme aon díolúine a shainaithint go soiléir iontu, agus ar an gcaoi sin cothromaíocht a aimsiú idir na leasanna éagsúla atá i gceist (152).

(56)

Ar an gcéad dul síos, de bhun Airteagal 127 de CPE, tá sé d’oibleagáid ar an Oifig Clár Eorpach na bPaitinní a choinneáil ar bun, áit a bhfoilsítear sonraí pearsanta áirithe atá sainithe go dlíthiúil. De réir na reachtaíochta príomha, ní mór iarratais ar phaitinn a fhoilsiú le linn an nós imeachta um dheonú paitinne, agus go ginearálta, a luaithe is féidir tar éis tréimhse 18 mí ón dáta comhdaithe a dhul in éag. Le CPE foráiltear gur féidir rochtain a fháil ar shonraí pearsanta atá san áireamh sna hiarratais sin ar phaitinn trí bhíthin iniúchadh comhad nó tríd an gClár a iniúchadh (153). Sula bhfoilsítear iarratais ar phaitinn, níl siad ar fáil lena n-iniúchadh gan toiliú sainráite an iarratasóra. Leagtar síos rialacha comhchosúla in CCP (154).

(57)

Ar an dara dul síos, an fhéidearthacht athruithe a dhéanamh ar fhaisnéis a úsáidtear i gcomhthéacs nós imeachta um dheonú paitinne, rialáiltear an fhéidearthacht sin go sonrach le CPE. (155) Tugtar faoi deara go háirithe nach ndéantar foráil le CPE ach amháin maidir leis an bhféidearthacht earráidí a cheartú i ndoiciméid arna gcomhdú le EEP (156), earráidí i gcinntí a cheartú (157), botúin aistriúcháin a cheartú (158) agus ainmniú mícheart aireagóra a cheartú (159). Dá bhrí sin, is sna cásanna sin amháin a fhéadfar ceartú a dhéanamh ar shonraí pearsanta a áirítear i ndoiciméid a úsáidtear sa nós imeachta um dheonú paitinne. Is amhlaidh atá sé maidir leis an bhféidearthacht srian a chur le próiseáil sonraí (160).

(58)

Ar an tríú dul síos, forchuireann CPE ceanglais shonracha i ndáil le coinneáil agus foilsiú doiciméad áirithe a úsáidtear sa nós imeachta um dheonú paitinne, ceanglais a bhfuil tionchar acu ar an bhféidearthacht faisnéis atá sna doiciméid sin a scriosadh, lena n-áirítear sonraí pearsanta (161). Go sonrach, ní mór iarratais fhoilsithe ar phaitinn agus faisnéis maidir le paitinn a fhoilsítear i bhFeasachán Eorpach na bPaitinní a choinneáil agus a bheith ar fáil go poiblí (162). Mar thoradh air sin, bheadh léirscriosadh sonraí pearsanta atá sna doiciméid sin in aghaidh oibleagáidí dlíthiúla bunúsacha EEP (Airteagal 129(a) CPE) agus ní fhéadfar é a dhéanamh. Ní mór do EEP comhaid eile a choimeád ar feadh na tréimhse a shonraítear in CPE, ar tréimhse cúig bliana í i bprionsabal (163). Fad a bheidh feidhm ag an tréimhse sin, ní féidir faisnéis atá sna comhaid sin a léirscriosadh (lena n-áirítear sonraí pearsanta).

(59)

Dá bhrí sin, maidir leis na srianta ar fheidhmiú na gceart a eascraíonn as na forálacha dá dtagraítear in aithrisí 55 go 58, agus raon feidhme teoranta na srianta agus na coinníollacha maidir lena gcur i bhfeidhm á gcur san áireamh go háirithe, is féidir a mheas go bhfuil siad teoranta don mhéid is gá agus is comhréireach chun feidhmiú cuí an nós imeachta um dheonú paitinne a áirithiú, mar atá riachtanach do chomhlíonadh chúraimí oifigiúla EEP ar mhaithe le leas an phobail. A mhéid nach ndéantar feidhmiú na gceart cosanta sonraí a rialáil go sonrach le CPE agus CCP, is é sin le rá i ngach cás seachas na cinn a dtugtar tuairisc orthu in aithrisí 55 go 58, tá feidhm iomlán ag ceanglais na RCS.

(60)

Maidir leis an leibhéal cosanta a thugtar do shonraí pearsanta arna n-aistriú ón Aontas chuig EEP, ní fhéadfaidh aistriú breise na sonraí sin chuig faighteoirí i dtríú tír nó in eagraíocht idirnáisiúnta eile dochar a dhéanamh don leibhéal cosanta sin.

(61)

Sna RCS déantar idirdhealú idir ‘tarchur sonraí pearsanta’ (is é sin comhroinnt sonraí ag EEP lena Stáit chonarthacha) agus ‘aistrithe sonraí pearsanta’ (comhroinnt sonraí ag EEP le haon duine nó eintiteas eile lasmuigh de EEP) (164).

(62)

Ar an gcéad dul síos, foráiltear leis na RCS go bhféadfar sonraí a tharchur chuig oifig maoine intleachtúla náisiúnta i Stát conarthach de chuid EEP (a) má tá gá leis na sonraí chun inniúlacht an fhaighteora a fheidhmiú nó chun údarás oifigiúil a fheidhmiú, agus (b) má tá gá leis an tarchur chun cúraimí oifigiúla/údarás oifigiúil EEP a fheidhmiú (165). Tarlaíonn an tarchur sin i gcomhthéacs an nós imeachta um dheonú paitinne dá bhforáiltear faoi CPE agus CCP (166).

(63)

Ar an dara dul síos, leis na RCS ceadaítear sonraí a tharchur chuig údarás poiblí i Stát conarthach de chuid EEP (167) i gcás ina bhfuil gá leis na sonraí chun cúraimí an údaráis phoiblí sin a chomhlíonadh agus i gcás ina bhfuil an tarchur comhoiriúnach le cúraimí agus feidhmiú EEP (168). Ní éilítear tarchur den sórt sin go sonrach faoi CPE ná faoi ionstraimí dlí eile lena rialaítear an nós imeachta um dheonú paitinne ach d’fhéadfadh gá a bheith leis mar sin féin chun cúraimí EEP a chomhlíonadh, mar shampla comhar EEP lena Stáit chonarthacha trí bhíthin próisis chomhairliúcháin; saineolaithe a thabhairt ar iasacht agus a imlonnú; nó faisnéis a sholáthar maidir le baill foirne EEP chun sochair shóisialta, ceanglais chánach etc. a chomhlíonadh.

(64)

Tá clásail chaighdeánacha ullmhaithe ag an OCS atá le húsáid i meabhráin tuisceana lena rialaítear an tarchur sin a dtugtar tuairisc air in aithrisí 62 agus 63, ina ndéantar, i measc nithe eile, foráil maidir le prionsabail cosanta sonraí, próiseáil bhreise a theorannú sa chaoi gur chun críoch comhoiriúnach a bhíonn an phróiseáil agus chun na gcríoch sin amháin, agus foráil maidir cearta an ábhair sonraí agus oibleagáidí i leith slándáil sonraí, sáruithe i ndáil le sonraí agus formhaoirseacht neamhspleách (169).

(65)

Sa dá chás a dtugtar tuairisc orthu in aithrisí 62 agus 63, ní mór don fhaighteoir, de bhun na RCS, fianaise a sholáthar gur gá na sonraí a tharchur chun críche áirithe a eascraíonn as na hoibleagáidí atá ar EEP comhoibriú leis an Stát conarthach nó leis na Stáit chonarthacha (170). Ní mór don rialaitheoir a bheith in ann a thaispeáint, gach uair a dhéantar tarchur, gur gá agus gur comhréireach an tarchur sin don chríoch áirithe ar chuici a dhéantar é (171). Ní mór aon tarchur sonraí a dhéanamh ar bhealach a áirithíonn go gcoinnítear ar bun an leibhéal cosanta a thugtar leis na RCS (172). De réir na treoraíochta arna heisiúint ag an OCS, ciallaíonn sin go mbeidh coimircí iomchuí i bhfeidhm, lena n-áirítear trína áirithiú nach mór na sonraí atá le comhroinnt a íoslaghdú agus a theorannú don mhéid atá leordhóthanach, ábhartha agus fíor-riachtanach chun na críche sin (173). Má bhíonn aon chúis ann lena cheapadh go bhféadfaí difear a dhéanamh do leasanna dlisteanacha an duine aonair lena mbaineann, ní mór don rialaitheoir a shuí go bhfuil sé comhréireach na sonraí pearsanta a tharchur chun na críche áirithe sin, tar éis dó na leasanna éagsúla atá i gceist a chur sa mheá. (174)

(66)

Maidir leis an dá chás sin, tá sé tábhachtach a thabhairt faoi deara freisin go bhfuil gach Stát conarthach atá rannpháirteach in EEP ina pháirtí sa Choinbhinsiún Eorpach chun Cearta an Duine agus Saoirsí Bunúsacha a Chosaint, faoi réir dhlínse na Cúirte Eorpaí um Chearta an Duine, agus ina pháirtí i gCoinbhinsiún Chomhairle na hEorpa chun Daoine Aonair a Chosaint maidir le Sonraí Pearsanta a Phróiseáil go hUathoibríoch (uimh. 108 i Sraith Chonarthaí Chomhairle na hEorpa).

(67)

Ar deireadh, leis na RCS ceadaítear sonraí a tharchur chuig próiseálaí atá lonnaithe sa Limistéar Eorpach Eacnamaíoch (LEE), ar choinníoll go n-áirithítear comhlíonadh na gceanglas a leagtar síos sna RCS maidir le próiseálaithe a fhostú (175).

(68)

Meastar gur ‘aistriú’ sonraí pearsanta é comhroinnt sonraí pearsanta le haon eintiteas lasmuigh de EEP seachas údarás poiblí nó oifig maoine intleachtúla náisiúnta i Stát conarthach de chuid EEP nó próiseálaí in LEE, faoi réir ceanglais shonracha na RCS (176). Tá feidhm ag na ceanglais sin, mar shampla, maidir le comhroinnt sonraí le próiseálaithe lasmuigh de LEE, le rialaitheoirí atá lonnaithe i Stáit chonarthacha nó lasmuigh díobh, le húdaráis phoiblí i Stáit neamhchonarthacha agus le heagraíochtaí idirnáisiúnta eile. Go ginearálta, leis na RCS éilítear nach ndéanfar dochar don leibhéal cosanta a ráthaíonn EEP do dhaoine aonair nuair a aistrítear sonraí chuig tríú páirtithe (177). De réir threoraíocht an OCS, ‘ní mór an chosaint a thugtar do na sonraí pearsanta a aistrítear sa tríú tír nó san eagraíocht idirnáisiúnta a bheith ‘coibhéiseach go bunúsach leis an gcosaint a ráthaítear sna RCS’ (178).

(69)

De bhun na RCS, féadfar sonraí pearsanta a aistriú lasmuigh de EEP ar an gcéad dul síos má áirithíonn an tír ina bhfuil an faighteoir lonnaithe, nó an eagraíocht idirnáisiúnta, leibhéal leordhóthanach cosanta agus más rud é go ndéantar an t-aistriú chun go bhféadfaidh EEP cúraimí a chur i gcrích laistigh dá hinniúlacht, agus chun na críche sin amháin (179). Glacann an tUachtarán cinneadh leordhóthanachta (180), tar éis dó dul i gcomhairle leis an OCS agus leis an BCS i gcás amhrais (181). Tá ‘critéir thagracha maidir le leordhóthanacht’ forbartha ag OCS ina leagtar amach na critéir maidir le cinntí leordhóthanachta (182). Go sonrach, ní mór foráil a dhéanamh i gcreat dlíthiúil an tríú tír nó na heagraíochta idirnáisiúnta maidir le príomhphrionsabail cosanta sonraí, cearta an ábhair sonraí, rialacha maidir le haistrithe ar aghaidh, sásraí nós imeachta agus sásraí um forfheidhmiú, agus sásamh do dhaoine aonair. Má ghlacann an tUachtarán cinneadh leordhóthanachta, féadfar an t-aistriú a dhéanamh gan coimircí breise a chur chun feidhme (183). Faoi láthair, measann EEP go ndéanann na Ballstáit, mar aon leis an Iorua, an Íoslainn, Lichtinstéin, gach tír a thairbhíonn de chinneadh leordhóthanachta ón gCoimisiún (184) agus institiúidí agus comhlachtaí an Aontais leibhéal leordhóthanach cosanta a sholáthar (185).

(70)

De bhun na RCS, in éagmais cinneadh leordhóthanachta, ní fhéadfaidh an rialaitheoir ná an próiseálaí sonraí pearsanta a aistriú chuig faighteoirí lasmuigh de EEP ach amháin má bhíonn coimircí iomchuí curtha ar fáil ag an rialaitheoir nó ag an bpróiseálaí, agus ar choinníoll go mbíonn cearta in-fhorfheidhmithe agus réitigh éifeachtacha dlí ar fáil d’ábhair sonraí (186). Is féidir coimircí iomchuí den sórt sin a áireamh i socruithe riaracháin le húdaráis phoiblí nó le heagraíochtaí idirnáisiúnta, i gclásail chonarthacha (tar éis dul i gcomhairle leis an BCS) (187) nó i sásraí deimhniúcháin (188). Tá breac-chuntas ar na forálacha atá le cur san áireamh i socruithe riaracháin forbartha ag an OCS (189). Tá comhaontú cosanta sonraí caighdeánach maidir le haistrithe chuig próiseálaithe le fáil freisin (190). De réir threoraíocht an OCS, ní mór do EEP a mheas an gcuirfí cosc ar an allmhaireoir sonraí a oibleagáidí faoi uirlis aistrithe a chomhlíonadh mar gheall ar an gcreat dlíthiúil a bhfuil sé faoina réir agus, más gá, bearta forlíontacha a chur i bhfeidhm (191). Chun an measúnú sin a dhéanamh, molann an OCS, i nótaí míniúcháin EEP maidir le tarchur agus aistriú sonraí pearsanta, treoraíocht ábhartha an Bhoird Eorpaigh um Chosaint Sonraí agus an Mhaoirseora Eorpaigh ar Chosaint Sonraí a chur san áireamh (192).

(71)

De bhun na RCS, maidir le haistrithe sonraí chuig tíortha nó eagraíochtaí a thairbhíonn de chinneadh leordhóthanachta, agus aistrithe sonraí a dhéantar ar bhonn coimircí iomchuí, ní mór do EEP riachtanas agus comhréireacht gach aistrithe chun críche na próiseála a léiriú (193). Ina theannta sin, ní mór do EEP a shuí, tar éis na leasanna éagsúla atá i gceist a chur sa mheá, go bhfuil an t-aistriú comhréireach, má bhíonn cúis ann lena chreidiúint go bhféadfaí dochar a dhéanamh do leasanna dlisteanacha na n-ábhar sonraí (194). Ina theannta sin, ní mór a áirithiú (trí bhíthin coimircí conarthacha) nach bhféadfaidh an faighteoir na sonraí a phróiseáil ná a úsáid ach chun na críche ar chuici a aistríodh iad agus chun na críche sin amháin, agus ní mór dó na sonraí a scriosadh a luaithe a bhainfear amach an chríoch sin (195).

(72)

De bhun na RCS, in éagmais cinneadh leordhóthanachta nó coimircí iomchuí, ní cheadaítear sonraí pearsanta a aistriú lasmuigh de EEP ach go heisceachtúil más rud é go bhfuil feidhm ag maolú, mar a ghairtear de, faoi choinníollacha atá comhchosúil leis na cinn i bhforálacha comhfhreagracha dhlí an Aontais maidir le cosaint sonraí (196). Is amhlaidh atá más rud é (a) gur thoiligh an t-ábhar sonraí go sainráite leis an aistriú (197); (b agus c) go ndéantar an t-aistriú ó am go chéile agus gur gá an t-aistriú a dhéanamh chun conradh a chomhlíonadh, ar conradh leis an ábhar sonraí nó conradh atá i leasanna an ábhair sonraí é (nó chun bearta réamhchonarthacha a chur chun feidhme arna iarraidh sin don ábhar sonraí) (198); (d) gur gá an t-aistriú a dhéanamh chun cúram a chomhlíonadh i bhfeidhmiú ghníomhaíochtaí oifigiúla EEP nó i bhfeidhmiú dlisteanach údaráis oifigiúil atá dílsithe don rialaitheoir (199); (e) gur gá an t-aistriú a dhéanamh go hócáideach chun éilimh dhlíthiúla a bhunú, a fheidhmiú nó a chosaint (200); (f) gur gá an t-aistriú a dhéanamh chun leasanna ríthábhachtacha duine aonair a chosaint, i gcás nach féidir leis an ábhar sonraí toiliú sainráite a thabhairt go fisiciúil nó go dlíthiúil (201); nó (g) go ndéantar an t-aistriú ó chlár arna cheapadh chun faisnéis a sholáthar don phobal, ar clár é a fhéadfaidh an pobal i gcoitinne a cheadú nó a fhéadfaidh aon duine a thaispeánann leas dlisteanach a cheadú, ar choinníoll go ndéantar na coinníollacha atá leagtha síos maidir leis an gceadú sin a chomhlíonadh sa chás áirithe (202). De réir a gcineáil, agus de réir threoraíocht an OCS, ní fhéadfar brath ar na maoluithe sin le haghaidh aistrithe rialta córasacha (203).

(73)

Ar deireadh, maidir le haistrithe catagóirí sonracha sonraí chuig tíortha nó eagraíochtaí nach dtairbhíonn de chinneadh leordhóthanachta, féadfaidh an tUachtarán na haistrithe sin a theorannú a thuilleadh ar chúiseanna tábhachtacha a bhaineann le feidhmiú dlisteanach an údaráis oifigiúil atá dílsithe don Oifig (204). Go dtí seo, níor bhain an tUachtarán úsáid as na cumhachtaí sin.

(74)

Faoi phrionsabal na cuntasachta, ceanglaítear ar eintitis a phróiseálann sonraí bearta teicniúla agus eagraíochtúla iomchuí a chur i bhfeidhm chun a n-oibleagáidí maidir le cosaint sonraí a chomhlíonadh go héifeachtach agus chun bheith in ann comhlíonadh den sórt sin a léiriú, go háirithe don údarás maoirseachta inniúil.

(75)

Le hAirteagal 4(1) de na RCS bunaítear prionsabal ginearálta na cuntasachta, lena gcuirtear in iúl go soiléir go bhfuil an rialaitheoir freagrach as comhlíonadh na RCS agus nach mór dó a bheith in ann an comhlíonadh sin a léiriú. Go sonrach, ní mór don rialaitheoir bearta iomchuí, idir bhearta teicniúla agus bhearta eagraíochtúla, a chur chun feidhme le comhlíontacht a áirithiú agus le bheith in ann an chomhlíontacht a thaispeáint, agus aird á tabhairt ar chineál, raon feidhme, comhthéacs agus críocha na próiseála, mar aon le dóchúlacht agus déine aon riosca i leith na gceart atá ag daoine aonair, ar tosca iad a bhíonn éagsúil de réir an cháis. (205) I ndáil leis sin, leis na RCS déantar prionsabail na príobháideachta trí dhearadh agus na príobháideachta mar réamhshocrú a chur chun feidhme freisin trína cheangal ar an rialaitheoir bearta a chur chun feidhme atá ceaptha chun na prionsabail cosanta sonraí a chur chun feidhme agus chun comhlíonadh na RCS a áirithiú, sin agus a áirithiú, mar réamhshocrú, nach bpróiseáiltear ach na sonraí pearsanta is gá don chríoch áirithe próiseála a bhíonn i gceist i ngach cás, agus na sonraí sin amháin (206).

(76)

Coinneoidh an rialaitheoir agus na próiseálaithe taifead de na gníomhaíochtaí próiseála ina mbeidh, i measc nithe eile, faisnéis maidir le críoch na próiseála, na catagóirí sonraí a phróiseáiltear, na catagóirí faighteoirí a nochtar sonraí dóibh, agus aon aistriú sonraí pearsanta a dhéantar. (207) Tá rochtain ag an bpobal ar na taifid sin i bprionsabal (mura rud é go bhfuil faisnéis rúnda iontu), ar taifid iad a áirítear iad i gClár Cosanta Sonraí atá ar fáil go poiblí, agus ní mór iad a chur ar fáil don BCS arna iarraidh sin dó (208). Ní mór do gach aonad oibríochtúil Oifigeach Idirchaidrimh um Chosaint Sonraí amháin ar a laghad a cheapadh freisin (le haghaidh téarma in-athnuaite, ar téarma idir bliain amháin agus trí bliana atá i gceist), nach mór dó dul faoi oiliúint éigeantach maidir le cosaint sonraí agus cúnamh a thabhairt don rialaitheoir a oibleagáidí a chomhlíonadh (209).

(77)

Ar deireadh, leis na RCS soláthraítear ionstraimí éagsúla a fhéadfaidh cúnamh a thabhairt don rialaitheoir agus do na próiseálaithe ina n-iarrachtaí ó thaobh comhlíontachta de. Mar shampla, de bhun na RCS, d’fhéadfadh comhlíonadh sásraí deimhniúcháin formheasta a bheith mar fhianaise ar chomhlíonadh oibleagáidí na RCS (210). Ina theannta sin, faoi choinníollacha áirithe, éilítear leis na RCS go ndéanfar measúnú tionchair ar chosaint sonraí nó go rachfar i gcomhairle roimh ré leis an OCS agus leis an BCS. Tá gá le measúnú tionchair ar chosaint sonraí i gcás inar dócha go mbeidh ardriosca do chearta agus do shaoirsí an duine aonair ag gabháil leis an gcineál próiseála (211). Tá gá leis sin, mar shampla, i gcás ina ndéantar meastóireacht fhairsing chórasach ar ghnéithe pearsanta a bhfuil cinntí uathoibrithe bunaithe orthu, nó i gcás ina ndéantar catagóirí speisialta sonraí a phróiseáil ar mhórscála (212). Má léirítear i measúnú tionchair go mbeadh ardriosca do chearta agus do shaoirsí daoine aonair ag gabháil leis an bpróiseáil agus nach féidir an riosca a mhaolú le bearta slándála réasúnta, ní mór don rialaitheoir dul i gcomhairle leis an BCS (213). Ní mór don BCS comhairle i scríbhinn a chur ar fáil má tá sé den tuairim go mbeadh an phróiseáil atá beartaithe ag sárú na RCS (214). Ar bhonn níos ginearálta, ceanglaítear ar an rialaitheoir dul i gcomhairle leis an OCS agus rialacha nó doiciméid oibríochtúla á n-ullmhú aige maidir le srianta ar chearta duine aonair a chur chun feidhme (215).

(78)

Chun a áirithiú go ráthaítear leibhéal leordhóthanach cosanta sonraí sa chleachtas, ba cheart údarás maoirseachta neamhspleách a bheith i bhfeidhm a mbeidh cumhachtaí curtha de chúram air chun faireachán a dhéanamh ar chomhlíonadh na rialacha cosanta sonraí agus an comhlíonadh sin a fhorfheidhmiú. Ba cheart don údarás sin gníomhú ar bhealach a bheidh go hiomlán neamhspleách agus neamhchlaonta agus a dhualgais á bhfeidhmiú aige agus a chumhachtaí á gcomhlíonadh aige.

(79)

Le creat dlíthiúil EEP, cuirtear de chúram ar dhá chomhlacht formhaoirseacht a dhéanamh ar chomhlíonadh na rialacha cosanta sonraí ag EEP: an OCS agus an BCS. Cruthaíodh an dá chomhlacht le hAirteagal 32A de na Rialacháin Seirbhíse agus sonraítear a stádas agus a gcumhachtaí a thuilleadh sna RCS (216). Comhlánaíonn a róil a chéile agus tá comhar i gceist leo, cé go bhfuil gach comhlacht neamhspleách i gcónaí maidir lena bhfeidhmeanna féin.

(80)

De bhun na Rialachán Seirbhíse, gníomhaíonn an OCS agus an BCS go hiomlán neamhspleách ar aon chur isteach inmheánach nó seachtrach agus iad ag comhlíonadh a gcúraimí agus ag feidhmiú a gcumhachtaí (217). Comhlánaítear an prionsabal sin le coimircí breise éagsúla lena ráthaítear an neamhspleáchas atá acu.

(81)

Is é an tUachtarán a cheapann an OCS (agus a ionadaithe) ar bhonn a gcáilíochtaí gairmiúla agus, go háirithe, ar bhonn an tsaineolais atá acu ar dhlí agus ar chleachtais cosanta sonraí (218). Ceaptar an OCS le haghaidh téarma in-athnuaite, ar téarma idir 3 agus 5 bliana atá i gceist. Rachfar i gcomhairle leis an BCS sula ndéanfar OCS a chur nó a bhriseadh as a ról, má bheartaítear sin a dhéanamh. (219) An réamhchomhairliúchán sin sula ndéanfar an OCS a chur nó a bhriseadh as a ról, is chun grinnscrúdú agus athbhreithniú breise a áirithiú atá sé ceaptha sa chás go mbeartaítear é a chur nó a bhriseadh as a ról. Féadfar é a bheartú an tOifigeach Cosanta Sonraí a chur nó a bhriseadh as a ról ar cheann de na cúiseanna seo a leanas (220): ní chomhlíonann an OCS a thuilleadh na coinníollacha is gá chun a ndualgais a fheidhmiú; (221) neamhinniúlacht ghairmiúil; (222) nó mar thoradh ar bhearta araíonachta (223). Leis na RCS bunaítear freisin nach bhféadtar an OCS a chur as a ról ná pionós a ghearradh air as a chúraimí a chomhlíonadh agus ní fhéadann sé aon treoir a fháil i leith chomhlíonadh na gcúraimí sin (224). Ní mór baint a bheith ag an OCS le gach saincheist a bhaineann le cosaint sonraí pearsanta agus eisíonn sé tuarascálacha bliantúla ar ghníomhaíochtaí chuig an Uachtarán agus chuig an gComhairle Riaracháin (225). Ní mór don Oifig na hacmhainní atá riachtanach le haghaidh chomhlíonadh chúraimí an OCS a sholáthar dó (226).

(82)

Is triúr saineolaithe seachtracha i réimse na cosanta sonraí atá ar an BCS, is é sin cathaoirleach agus beirt chomhaltaí eile (227), mar aon le comhalta malartach, arna gceapadh ag Uachtarán OEP le haghaidh téarma in-athnuaite 3 bliana (228). Ní mór do chomhaltaí an BCS na cáilíochtaí atá riachtanach le bheith ceaptha chuig oifig bhreithiúnach a bheith acu nó ní mór dóibh a bheith ina ngairmithe cosanta sonraí a bhfuil saineolas agus taithí chruthaithe acu i réimse an dlí um chosaint sonraí, ar saineolas é agus ar taithí í a fuarthas ar an leibhéal náisiúnta nó idirnáisiúnta. Ní fhéadfaidh siad a bheith ina bhfostaithe de chuid EEP ná a bheith fostaithe aici le 10 mbliana anuas (229). De bhun Airteagal 48(6) de na RCS, tá comhaltaí an BCS go hiomlán neamhspleách agus iad ag comhlíonadh a bhfeidhme. Go sonrach, ní fhéadfaidh comhaltaí an BCS treoracha a lorg ón Oifig ná ón gComhairle Riaracháin agus ní fhéadfaidh siad a bheith faoi cheangal ag treoracha den chineál sin. Foráiltear le Rialacha Nós Imeachta an BCS freisin nach mór dó gníomhú go neamhchlaonta agus ar shlí atá go hiomlán neamhspleách agus a chúraimí á gcomhlíonadh aige (230). Thairis sin, ní fhéadfaidh EEP comhaltaí an BCS a dhífhostú ach amháin ar chúis thromchúiseach (231). Tá oibleagáid rúndachta ar chomhaltaí an BCS (232) agus ní mór dóibh staonadh ó ghníomhú i gcás a bhfuil coinbhleacht leasa acu ina leith, go háirithe leas pearsanta (233). Ceanglaítear ar EEP tacú leis an BCS a chúraimí a chomhlíonadh trí na hacmhainní is gá a sholáthar dó, mar aon le tacaíocht dlí agus riaracháin (trí bhíthin Rúnaíochta agus trí rochtain ar shonraí pearsanta agus ar oibríochtaí próiseála a thabhairt don BCS) (234).

(83)

Áirítear an méid seo a leanas ar chúraimí an OCS: an rialaitheoir nó na próiseálaithe a chur ar an eolas faoina n-oibleagáidí agus comhairle a chur orthu dá réir; feasacht a mhúscailt i measc na mball foirne a bhfuil baint acu le hoibríochtaí próiseála agus oiliúint a chur ar fáil dóibh; a áirithiú go gcuirfear ábhair sonraí ar an eolas faoina gcearta faoi na RCS; agus faireachán a dhéanamh ar bhealach neamhspleách ar chur i bhfeidhm inmheánach agus comhlíonadh na RCS, mar aon le forálacha dlíthiúla eile de chuid EEP ar forálacha iad a bhfuil impleachtaí cosanta sonraí acu (235). Féadfaidh ábhair sonraí dul i dteagmháil leis an OCS maidir le haon saincheist a bhaineann le próiseáil a gcuid sonraí nó le feidhmiú a gceart (236), agus féadfaidh an rialaitheoir agus na próiseálaithe dul i gcomhairle leis an OCS maidir le haon ábhar a bhaineann le léirmhíniú agus cur i bhfeidhm na RCS (237).

(84)

Mar chuid de ról formhaoirseachta an OCS, tá sé de chumhacht aige iniúchtaí agus imscrúduithe cosanta sonraí a dhéanamh (238). Tionscnaíonn an OCS iniúchtaí i gcomhréir le plean iniúchóireachta bliantúla a ullmhaítear i gcomhairle leis an BCS (239). Sna hiniúchtaí, dírítear ar mheasúnú a dhéanamh ar thaifid cosanta sonraí, ar ráitis agus ar dhoiciméadacht ábhartha, mar shampla, chun fíorú a dhéanamh ar chruinneas agus iomláine na doiciméadachta ábhartha maidir le cosaint sonraí, ar chur i bhfeidhm ceart modheolaíochtaí bainistithe riosca, ar chruinneas agus tapúlacht na bhfreagairtí ar ábhair sonraí, nó ar mheasúnuithe tionchair ar chosaint sonraí a bheith á ndéanamh mar is cuí agus ar líon na measúnuithe sin (240). De réir faisnéis a fuair an Coimisiún ón OCS, rinneadh trí iniúchadh in 2023 agus ceithre iniúchadh in 2024. Féadann an OCS tús a chur le himscrúdú ar a thionscnamh féin, ar bhonn iarraidh a fhaightear ón BCS nó ó chomhlacht laistigh de EEP (an tUachtarán nó rialaitheoir tarmligthe, cuir i gcás), nó ar bhonn faisnéis a fhaightear ar shlí eile (lena n-áirítear, mar shampla, faisnéis ó thríú páirtithe agus ó dhaoine aonair) (241). Imscrúduithe a iarrann an BCS, déanann an OCS iad ar bhealach neamhspleách. Is féidir leis an BCS barúil a thabhairt agus/nó imscrúdú forlíontach a iarraidh maidir le haon saincheist a d’fhéadfadh a bheith tagtha chun cinn (242). I gcigireachtaí, dírítear ar oibríochtaí próiseála, ar ghnéithe sonracha díobh nó ar tharluithe a bhaineann leo, d’fhonn a áirithiú go gcomhlíonann an phróiseáil atá i gceist ceanglais na RCS agus go gcosnaítear cearta agus saoirsí na n-ábhar sonraí (243).

(85)

Tá rochtain ag an OCS ar an bhfaisnéis ábhartha uile, lena n-áirítear na sonraí pearsanta atá á bpróiseáil mar aon leis na hoifigí, na suiteálacha próiseála sonraí agus na hiompróirí sonraí uile (244). Ceanglaítear ar gach fostaí agus ar gach aonad oibríochtúil de chuid EEP cúnamh a thabhairt don OCS a dhualgais a chomhlíonadh, lena n-áirítear trí rochtain ar áitribh agus ar fhaisnéis ábhartha a thabhairt dó (245).

(86)

Agus iniúchadh nó imscrúdú á thabhairt i gcrích, glacann an OCS tuarascáil ina leagtar amach a thorthaí, a chonclúidí agus na bearta feabhais a mholann sé (246). D’fhéadfaí a áireamh ar na bearta sin bearta coisctheacha nó maolaitheacha chun comhlíontacht a fheabhsú, cuir i gcás, mar aon le bearta chun neamhchomhlíontacht a leigheas (mar shampla chun próiseáil a thabhairt i gcomhréir leis na RCS, chun iarrataí ó ábhair sonraí maidir le feidhmiú a gcearta a láimhseáil, chun próiseáil a chur ar fionraí nó a fhoirceannadh, etc.) (247). Ina theannta sin, d’fhéadfadh an OCS an t-údarás ceapacháin inniúil a chur ar an eolas faoi mhainneachtain fostaithe na RCS a chomhlíonadh, sin agus a mholadh go seolfaí imscrúdú riaracháin chun a chinneadh an bhfuil gá le beart araíonachta nó beart eile (248). D’fhéadfadh aon fhostaí nach gcomhlíonann na RCS, cé acu a dhéantar sin d’aon ghnó nó trí fhaillí, a bheith faoi dhliteanas smachtbhannaí araíonachta nó faoi dhliteanas birt eile de bhun na Rialachán Seirbhíse (249).

(87)

Ní mór toradh na n-iniúchtaí agus na n-imscrúduithe a chur in iúl don BCS (250). Ní mór an tuarascáil iniúchóireachta nó imscrúdúcháin a roinnt leis an BCS arna iarraidh sin. Tá cead ag an BCS barúil a thabhairt maidir le tuarascáil an OCS, lena n-áirítear maidir le torthaí an OCS i dtaobh ar tharla sárú ar na RCS nó nár tharla agus maidir le bearta feabhais atá beartaithe, agus féadfaidh sé bearta imscrúdaitheacha breise a iarraidh (251). Más rud é go dtagtar ar an gconclúid, in iniúchadh nó i gcigireacht a dhéanann an OCS, go raibh neamhchomhlíontacht ann (is é sin sárú ar na RCS), ní mór tuarascáil an OCS a chur faoi bhráid an BCS chun na conclúidí agus na bearta feabhais a mholtar inti a bhailíochtú. I gcás ina n-easaontóidh an BCS le conclúidí an OCS nó leis na bearta feabhais a mholann sé, comhroinnfidh an BCS a bharúlacha leis an OCS, lena n-áirítear chun na conclúidí atá beartaithe agus na bearta feabhais atá molta a leasú, agus ba cheart don OCS iad a chur chun feidhme dá réir. Bearta feabhais arna mbailíochtú ag an BCS, tá siad ceangailteach ar an rialaitheoir agus ar na rialaitheoirí tarmligthe agus féadann daoine aonair iad a agairt roimh na sásraí um shásamh a dtugtar tuairisc orthu in aithris 95 (252). Ní mór don OCS cur chun feidhme na mbeart feabhais a fhíorú (i bprionsabal tar éis 6 mhí ón tráth a cuireadh in iúl iad) agus tuarascáil bhliantúil a chur faoi bhráid an Uachtaráin maidir le stádas an chur chun feidhme (253).

(88)

Sa bhreis ar ról an BCS comhlíonadh na RCS a fhorfheidhmiú, áirítear ar a chúraimí eile comhairle a chur ar an Uachtarán maidir le cinntí leordhóthanachta a ghlacadh, comhairle a chur ar an rialaitheoir maidir leis an ngá atá le measúnú tionchair ar chosaint sonraí a dhéanamh agus athbhreithniú a dhéanamh ar ghearáin ó dhaoine aonair (féach aithrisí 92 go 96) (254).

(89)

Chun cosaint leordhóthanach a áirithiú agus go háirithe forfheidhmiú chearta an duine aonair, ba cheart sásamh éifeachtach a sholáthar don ábhar sonraí, lena n-áirítear cúiteamh ar son damáistí.

(90)

Le creat dlíthiúil EEP, cuirtear sásamh ar fáil do dhaoine aonair trí mheascán de bhealaí éagsúla.

(91)

Ar an gcéad dul síos, ábhair sonraí a chreideann go sáraítear a gcearta leis an bpróiseáil atá EEP a dhéanamh ar a sonraí pearsanta (is é sin go sáraíonn an phróiseáil na RCS), féadfaidh siad iarraidh ar athbhreithniú ón rialaitheoir tarmligthe a chur isteach i gcomhréir le hAirteagal 49 de na RCS. Déanfaidh an rialaitheoir tarmligthe athbhreithniú ar an ngearán agus déanfaidh sé cinneadh ina leith (255). Sula ndéanfaidh sé cinneadh, ní mór don rialaitheoir tarmligthe dul i gcomhairle leis an OCS a thugann tuairim i scríbhinn tráth nach déanaí ná 15 lá féilire tar éis dó an iarraidh ar athbhreithniú a fháil (256). Ní mór don rialaitheoir tarmligthe freagra a thabhairt don duine aonair laistigh de mhí amháin ón dáta a fhaightear an iarraidh (257). Ní mór an cinneadh a chur in iúl don duine aonair, maille le faisnéis faoin bhféidearthacht sásamh breise a fháil (258). Má mhainníonn an rialaitheoir tarmligthe aon ghníomhaíocht a dhéanamh laistigh de 3 mhí, meastar gur diúltú intuigthe don iarraidh é sin.

(92)

Ar an dara dul síos, féadfaidh daoine aonair agóid a dhéanamh i gcoinne cinnidh nó i gcoinne diúltú intuigthe d’iarraidh ar athbhreithniú ó rialaitheoir tarmligthe trí ghearán a chomhdú leis an BCS (259).

(93)

Agus gearán á scrúdú, ní mór don BCS a iarraidh ar an ábhar sonraí, ar an rialaitheoir agus, i gcás inarb infheidhme, ar an bpróiseálaí a seasamh maidir leis na héilimh agus na fíorais atá i gceist a leagan amach i scríbhinn, sin agus fianaise nó barúlacha agus argóintí a sholáthar maidir leis an bhfianaise atá ar fáil (260). Sa chomhthéacs sin, féadfaidh an BCS aon fhaisnéis a theastaíonn uaidh a iarraidh ar na páirtithe chun an gearán a láimhseáil agus féadfaidh sé, ina theannta sin, tuilleadh faisnéise a fháil tríd an OCS (261). Agus cinneadh á dhéanamh maidir leis an obair leantach is gá a dhéanamh ar ghearán, ní mór don BCS aird a thabhairt ar chineál agus tromchúis an tsáraithe líomhnaithe, líon na n-ábhar sonraí a ndéantar difear dóibh, na catagóirí sonraí atá i gceist agus fad an tsáraithe, i measc nithe eile (262). Féadfaidh an BCS a iarraidh ar na páirtithe iarracht a dhéanamh teacht ar réiteach cairdiúil agus déanann sé réiteach den sórt sin a spreagadh agus éascú ar bhonn gníomhach (263). Féadfaidh an gearánach a iarraidh ar an BCS freisin nós imeachta práinne a chur i bhfeidhm, ar chúiseanna a bhaineann le tromchúis an tsáraithe líomhnaithe nó mar gheall ar dhéine an riosca a fhorchuirtear ar chearta daoine aonair (264).

(94)

Tar éis don BCS scrúdú a dhéanamh ar ghearán, eisíonn sé tuairim réasúnaithe chuig an rialaitheoir, lena n-áireofar ráiteas fíoras, príomhargóintí na bpáirtithe, breithnithe an BCS agus na moltaí atá aige (265). I gcás nós imeachta práinne, ní mór don BCS tuairim réasúnaithe a eisiúint go foirmiúil laistigh de 2 mhí ó thaisceadh an ghearáin (266). Ina thuairim réasúnaithe, féadann an BCS aon mholadh a mheasann sé a bheith riachtanach a eisiúint, lena n-áirítear faoiseamh urghaire (mar shampla deireadh a chur le próiseáil neamhdhleathach sonraí, nó sonraí a próiseáladh go neamhdhleathach a scriosadh) agus cúiteamh as damáiste ábhartha nó neamhábhartha (267). Ní mór an tuairim réasúnaithe a chur in iúl don ábhar sonraí agus don rialaitheoir (is é sin Uachtarán na hOifige, Uachtarán na mBord Achomhairc, Cathaoirleach na Comhairle Riaracháin, nó Cathaoirleach an Roghchoiste, ag brath ar cé acu a bhaineann an gearán leis, an Oifig, na Boird Achomhairc, an Chomhairle nó an Roghchoiste). Déanfaidh an rialaitheoir an cinneadh ceangailteach deiridh ansin, tar éis tuairim réasúnaithe an BCS (268). Cuirtear an cinneadh deiridh in iúl don ábhar sonraí, don BCS, agus don OCS (269). Má chinneann an rialaitheoir gan cloí le gné amháin nó níos mó den tuairim réasúnaithe, míneoidh sé é i scríbhinn sa chinneadh (270).

(95)

Féadann ábhar sonraí nach bhfuil sásta le cinneadh an rialaitheora achomharc breise a dhéanamh ina aghaidh agus tagairt a dhéanamh do thuairim réasúnaithe an BCS san achomharc. Féadann fostaithe EEP agóid a dhéanamh in aghaidh an chinnidh os comhair Bhinse Riaracháin na hEagraíochta Idirnáisiúnta Saothair (271). Féadfaidh aon ábhar sonraí eile nach n-aontaíonn le cinneadh an rialaitheora iarraidh ar eadráin ad hoc a chur faoi bhráid an Uachtaráin laistigh de 3 mhí ón gcinneadh a fháil (272). Déantar foráil sna RCS maidir le nós imeachta sonrach atá le leanúint i gcás eadráin ad hoc (273). Go háirithe, laistigh de 3 mhí tar éis an iarraidh ón ábhar sonraí a fháil, ní mór d’Ard-Rúnaí na Buanchúirte Eadrána eadránaí amháin a cheapadh bunaithe ar na critéir a leagtar síos sna RCS (274). Ní mór don eadránaí cáilíocht dlí a bheith aige, cead a bheith aige an dlí a chleachtadh i gceann de Stáit chonarthacha EEP, a bheith in ann saineolas ábhartha ar chúrsaí cosanta sonraí a léiriú agus taithí a bheith aige ar an dlí lena rialaítear eagraíochtaí idirnáisiúnta (275). De bhreis ar na critéir sin a chomhlíonadh, ní fhéadfar daoine aonair a cheapadh a d’oibrigh do EEP ná don ábhar sonraí, nó a d’oibrigh i seirbhís EEP ná an ábhair sonraí. Foráiltear leis na RCS nach mór don eadránaí gníomhú go neamhspleách agus go neamhchlaonta (276), caitheamh go cothrom le gach páirtí agus deis a thabhairt dóibh a gcás a chur i láthair ag gach céim de na himeachtaí (277). Ní imeachtaí poiblí iad na himeachtaí eadrána (278) agus rialaítear iad le CPE, leis na RCS, lena n-áirítear aon reachtaíocht cur chun feidhme, le dlí na n-eagraíochtaí idirnáisiúnta agus le prionsabail an dlí idirnáisiúnta phoiblí. (279) Cé go bhfuil gach páirtí freagrach as a chostais agus a speansas féin i dtaca le hionadaíocht dhlíthiúil (mura gcinnfidh an t-eadránaí a mhalairt), íocann EEP táillí agus speansas an eadránaí agus an costas féideartha a bhaineann le sainchomhairle a fháil agus le finnéithe (280). Ní mór socraíocht a thabhairt i gcrích i bhfoirm dámhachtain eadrána i scríbhinn ar comhaontaíodh an fhoclaíocht atá inti, ar dámhachtain í atá críochnaitheach agus ceangailteach (281).

(96)

Aon duine aonair a ndearnadh damáiste dó mar thoradh ar shárú ar na RCS, féadfaidh sé cúiteamh a iarraidh ar EEP trí úsáid a bhaint as na nósanna imeachta a dtugtar tuairisc orthu in aithrisí 91 go 95 (282). Ní bheidh EEP faoi dhliteanas má chruthaíonn sí nach raibh sí freagrach as an gcás ba shiocair leis an damáiste.

(97)

An creat dlíthiúil faoina ndéanann EEP measúnú ar iarrataí ó údaráis phoiblí – ina Stáit chonarthacha agus i dtríú tíortha – maidir le sonraí pearsanta arna bpróiseáil ag EEP agus faoina bhfreagraíonn sé do na hiarrataí, leanann an creat sin as an bPrótacal ar Phribhléidí agus Díolúintí EEP (283), as ceanglais na RCS i ndáil le tarchur agus aistriú sonraí pearsanta, agus as an dlí idirnáisiúnta poiblí.

(98)

Ar an gcéad dul síos, maidir le próiseáil sonraí pearsanta ag EEP chun críoch a gníomhaíochtaí oifigiúla, cumhdaítear an phróiseáil sin le díolúintí na hEagraíochta. Comhlánaítear díolúintí EEP le dualgas comhair a leagtar amach in Airteagal 20 den Phrótacal ar Phribhléidí agus Díolúintí. Dá bharr sin, aon iarraidh ó údarás poiblí de chuid Stáit chonarthaigh ar shonraí arna bpróiseáil ag EEP a fháil, déanfaidh an tUachtarán measúnú uirthi i gcomhréir le hAirteagal 20(1) den Phrótacal ar Phribhléidí agus Díolúintí ina bhforáiltear go gcomhoibreoidh an Eagraíocht ‘i gcónaí le húdaráis inniúla na Stát conarthach chun riar cuí an cheartais a éascú, chun a áirithiú go n-urramófar rialacháin phóilíneachta agus rialacháin a bhaineann leis an tsláinte phoiblí nó le cigireacht saothair nó reachtaíocht náisiúnta chomhchosúil, agus chun aon mhí-úsáid de na pribhléidí, na díolúintí agus na saoráidí dá bhforáiltear sa Phrótacal seo a chosc.’ Mar eisceacht, féadfaidh an Eagraíocht an díolúine atá aici ó imeachtaí dlíthiúla agus ó fhorghníomhú a tharscaoileadh (284). Agus cinneadh á dhéanamh ag an Uachtarán maidir le hiarraidh ar chomhar, feidhmíonn sé discréid, agus smaoiníonn sé ar chomhlíontacht na hiarrata le creat dlíthiúil na hEagraíochta (285). D’fhéadfadh sé gurb é an chonclúid a bheadh ann go bhféadann an Oifig freagairt a thabhairt ar iarraidh faoin bPrótacal ar Phribhléidí agus Díolúintí agus nach bhféadfaidh sí sonraí pearsanta a nochtadh ach amháin i gcomhréir leis na ceanglais i ndáil le tarchur sonraí dá bhforáiltear sna RCS (féach aithrisí 62 go 67). De bhun na RCS, ní mór don fhaighteoir fianaise a sholáthar gur gá na sonraí a tharchur chun críche áirithe a eascraíonn as na hoibleagáidí atá ar EEP comhoibriú leis an Stát conarthach nó leis na Stáit chonarthacha (286). Ní mór don rialaitheoir a bheith in ann a thaispeáint, gach uair a dhéantar tarchur, gur gá agus gur comhréireach an tarchur sin don chríoch áirithe ar chuici a dhéantar é (287). Ní mór aon tarchur sonraí a dhéanamh ar bhealach a áirithíonn go gcoinnítear ar bun an leibhéal cosanta a thugtar leis na RCS (288). De réir na treoraíochta arna heisiúint ag an OCS, ciallaíonn sin go mbeidh coimircí iomchuí i bhfeidhm, lena n-áirítear trína áirithiú nach mór na sonraí atá le comhroinnt a íoslaghdú agus a theorannú don mhéid atá leordhóthanach, ábhartha agus fíor-riachtanach chun na críche sin (289). Má bhíonn aon chúis ann lena cheapadh go bhféadfaí difear a dhéanamh do chearta agus saoirsí an duine aonair lena mbaineann, ní mór don rialaitheoir a shuí go bhfuil sé comhréireach na sonraí pearsanta a tharchur chun na críche áirithe sin, tar éis dó na leasanna éagsúla atá i gceist a chur sa mheá. (290)

(99)

Ar an dara dul síos, níl aon ionstraim dlí ann atá infheidhme maidir le EEP agus lena rialáiltear go sonrach láimhseáil iarrataí ó údaráis phoiblí tríú tíortha (is é sin tíortha nach páirtí conarthach in EEP iad) chun sonraí arna bpróiseáil ag EEP a fháil. Dá thoradh air sin, ní fhéadtar aon nochtadh a dhéanamh mar fhreagairt ar iarraidh den sórt sin ach amháin má chomhlíontar na ceanglais i ndáil le haistrithe sonraí idirnáisiúnta faoi na RCS (mar a thugtar tuairisc orthu in aithrisí 68 go 73). Ní amhlaidh a bheadh an cás ach amháin dá mba rud é gur glacadh cinneadh leordhóthanachta maidir leis an tír ábhartha lena gcumhdófaí an t-aistriú, dá mbeadh coimircí iomchuí i bhfeidhm, nó dá mbeadh feidhm ag maolú.

(100)

Tá comhlíonadh an Phrótacail ar Phribhléidí agus Díolúintí ag an Uachtarán, lena n-áirítear an chaoi ar tugadh aghaidh ar iarrataí ar chomhar ó údaráis phoiblí, faoi réir mhaoirseacht na Comhairle Riaracháin, ach tá comhlíonadh na gceanglas i ndáil le tarchur agus aistrithe sonraí pearsanta sna RCS faoi réir fhormhaoirseacht an OCS agus an BCS, mar a thugtar tuairisc air sin in aithrisí 84 go 88. Féadann daoine aonair úsáid a bhaint as na bealaí sásaimh a dtugtar tuairisc orthu in aithrisí 90 go 96 a mhéid a bhaineann le tarchur nó aistrithe a sonraí pearsanta de shárú ar na RCS.

(101)

Measann an Coimisiún go n-áirithíonn EEP leibhéal cosanta do shonraí pearsanta arna n-aistriú ón Aontas atá coibhéiseach go bunúsach leis an leibhéal a ráthaítear le Rialachán (AE) 2016/679.

(102)

Ar bhonn thorthaí an Chinnidh seo, ba cheart a chinneadh go n-áirithíonn EEP leibhéal leordhóthanach cosanta, de réir bhrí Airteagal 45 de Rialachán (AE) 2016/679 arna léirmhíniú i bhfianaise Chairt um Chearta Bunúsacha an Aontais Eorpaigh, do shonraí pearsanta arna n-aistriú ón Aontas chuig EEP.

(103)

Ceanglaítear ar Bhallstáit agus ar a gcuid orgán na bearta is gá a ghlacadh chun gníomhartha Institiúidí an Aontais a chomhlíonadh, de bharr go dtoimhdítear na gníomhartha sin a bheith dleathach agus go mbaineann iarmhairtí dlíthiúla leo dá réir nó go dtí go dtarraingítear siar iad, go neamhnítear i gcaingean le haghaidh neamhniú iad, nó go ndearbhaítear iad a bheith neamhbhailí tar éis tarchur le haghaidh breithiúnas tosaigh nó pléadáil neamhdhleathachta.

(104)

Dá bharr sin, is ceangailteach cinneadh leordhóthanachta ón gCoimisiún arna ghlacadh de bhun Airteagal 45(3) de Rialachán (AE) 2016/679 ar orgán uile na mBallstát a ndírítear orthu é, agus is ceangailteach é ar a n-údaráis mhaoirseachta neamhspleácha freisin. Go sonrach féadfaidh aistrithe ó rialaitheoir nó próiseálaí san Aontas chuig EEP tarlú gan gá a bheith le haon údarú breise a fháil.

(105)

Ba cheart go gcuimhneofaí, de bhun Airteagal 58(5) de Rialachán (AE) 2016/679 agus mar a mhínigh an Chúirt Bhreithiúnais i gCás C-362/14 (291), i gcás ina gceistíonn údarás náisiúnta um chosaint sonraí, lena n-áirítear ar fáil gearáin dó, comhoiriúnacht cinnidh leordhóthanachta ón gCoimisiún le cearta bunúsacha an duine aonair ar phríobháideachas agus cosaint sonraí, ní mór leigheas dlí a chur ar fáil sa dlí náisiúnta di chun na hagóidí sin a thabhairt os comhair cúirt náisiúnta, a d’fhéadfaí a cheangal uirthi tarchur chun réamhrialú a dhéanamh chuig an gCúirt Bhreithiúnais.

(106)

I gcomhréir le cásdlí na Cúirte Breithiúnais, agus de bhun Airteagal 45(4) de Rialachán (AE) 2016/679, ba cheart don Choimisiún faireachán a dhéanamh ar bhonn leanúnach ar fhorbairtí ábhartha sa tríú tír nó san eagraíocht idirnáisiúnta tar éis ghlacadh cinnidh leordhóthanachta d’fhonn measúnú a dhéanamh cé acu a áirithíonn sí go fóill nó nach n-áirithíonn leibhéal cosanta arb coibhéiseach go bunúsach é. Bíonn seiceáil mar sin de dhíth, in aon chás, nuair a fhaigheann an Coimisiún faisnéis óna dtagann amhras a bhfuil bunús maith leis ina leith sin.

(107)

Dá bhrí sin, ba cheart don Choimisiún faireachán a dhéanamh ar bhonn leanúnach ar an gcás a mhéid a bhaineann le creat dlíthiúil EEP agus leis an gcleachtas maidir le próiseáil sonraí pearsanta a ndéantar measúnú air sa Chinneadh seo. Chun an próiseas sin a éascú, iarrtar ar EEP an Coimisiún a chur ar an eolas faoi fhorbairtí ábhartha a bhaineann leis an gCinneadh seo a mhéid a bhaineann le próiseáil sonraí pearsanta agus na srianta agus coimircí is infheidhme maidir le rochtain ar shonraí pearsanta ag údaráis phoiblí.

(108)

Thairis sin, le cur ar chumas an Choimisiúin a fheidhm faireacháin a dhéanamh ar bhealach éifeachtach, ba cheart go gcuirfeadh na Ballstáit an Coimisiún ar an eolas faoi aon ghníomhaíocht ábhartha a ghlacann na húdaráis náisiúnta um chosaint sonraí, go háirithe fiosruithe nó gearáin ó ábhair sonraí an Aontais maidir le haistriú sonraí pearsanta ón Aontas chuig EEP.

(109)

Agus Airteagal 45(3) de Rialachán (AE) 2016/679 á chur i bhfeidhm, agus ós rud é go bhféadfadh athrú teacht ar leibhéal na cosanta a thugtar faoi chreat dlíthiúil EEP, ba cheart don Choimisiún, tar éis an Cinneadh seo a ghlacadh, athbhreithniú tréimhsiúil a dhéanamh féachaint an bhfuil bunús fíorasach agus dlíthiúil fós leis na torthaí i ndáil le leordhóthanacht an leibhéil cosanta atá á áirithiú ag EEP. Ba cheart na meastóireachtaí sin a dhéanamh gach 4 bliana ar a laghad agus ba cheart gach gné d’fheidhmiú an Chinnidh seo a chumhdach leo, lena n-áirítear feidhmiú na sásraí ábhartha um fhormhaoirseacht agus um fhorfheidhmiú.

(110)

Chun an t-athbhreithniú a dhéanamh, ba cheart don Choimisiún bualadh le EEP, lena n-áirítear a OCS agus an BCS. Ba cheart go mbeadh rannpháirtíocht sa chruinniú sin ar oscailt d’ionadaithe chomhaltaí an Bhoird Eorpaigh um Chosaint Sonraí. Faoi chuimsiú an athbhreithnithe, ba cheart don Choimisiún a iarraidh ar EEP faisnéis chuimsitheach a sholáthar maidir le gach gné is ábhartha don toradh leordhóthanachta. Ba cheart don Choimisiún mínithe a lorg freisin maidir le haon fhaisnéis is ábhartha don Chinneadh seo atá faighte aige, lena n-áirítear faisnéis ón BCS, ó údaráis cosanta sonraí aonair, ó ghrúpaí na sochaí shibhialta, ó thuairiscí poiblí nó sna meáin, chomh maith le haon fhoinse faisnéise atá ar fáil.

(111)

Ar bhonn an athbhreithnithe, ba cheart don Choimisiún tuarascáil phoiblí a ullmhú lena cur faoi bhráid Pharlaimint na hEorpa agus na Comhairle.

(112)

I gcás ina nochtfar le faisnéis atá ar fáil, go háirithe faisnéis a eascraíonn as faireachán an Choimisiúin ar fhorbairtí a d’fhéadfadh difear a dhéanamh d’fheidhmiú an Chinnidh seo de bhun Airteagal 45(4) de Rialachán (AE) 2016/679 nó arna soláthar ag EEP nó ag údaráis na mBallstát, go bhféadfadh sé nach leordhóthanach a thuilleadh an leibhéal cosanta a thugann EEP, ba cheart don Choimisiún EEP a chur ar an eolas faoi sin agus a iarraidh go ndéanfar bearta iomchuí laistigh d’achar ama réasúnach sonraithe.

(113)

Más rud é, ar dhul in éag an achair ama shonraithe sin, nach bhfuil na bearta sin déanta ag EEP nó má theipeann air a léiriú go sásúil ar bhealach eile go bhfuil an Cinneadh seo bunaithe go fóill ar leibhéal leordhóthanach cosanta, tionscnóidh an Coimisiún an nós imeachta dá dtagraítear in Airteagal 93(2) de Rialachán (AE) 2016/679 d’fhonn an Cinneadh seo a chur ar fionraí nó a aisghairm go páirteach nó go hiomlán.

(114)

Mar mhalairt rogha, tionscnóidh an Coimisiún an nós imeachta sin d’fhonn an Cinneadh seo a leasú, go háirithe trí aistrithe sonraí a chur faoi réir coinníollacha breise, sin nó raon feidhme an toraidh leordhóthanachta a theorannú d’aistrithe sonraí dá bhfuil leibhéal leordhóthanach cosanta fós á áirithiú agus do na haistrithe sin amháin.

(115)

Ba cheart don Choimisiún freisin machnamh faoin nós imeachta a thionscnamh óna dtiocfaidh leasú, fionraí nó aisghairm an Chinnidh seo, más rud é, i gcomhthéacs an athbhreithnithe nó ar bhealach eile, go mainníonn EEP an fhaisnéis nó na soiléirithe a chur ar fáil is gá chun an leibhéal cosanta a thugtar do shonraí pearsanta arna n-aistriú ón Aontas a mheasúnú, nó maidir le comhlíontacht leis an gCinneadh seo. I dtaca leis an méid sin, ba cheart don Choimisiún a mhéid is féidir an fhaisnéis ábhartha a fháil ó fhoinsí eile a thabhairt san áireamh.

(116)

Ar mhórchúiseanna práinne a bhfuil údar cuí leo, bainfidh an Coimisiún leas as an bhféidearthacht, i gcomhréir leis an nós imeachta dá dtagraítear in Airteagal 93(3) de Rialachán (AE) 2016/679, gníomhartha cur chun feidhme arb infheidhme láithreach iad a ghlacadh lena bhfionraítear, lena n-aisghairtear nó lena leasaítear an Cinneadh.

(117)

D’fhoilsigh An Bord Eorpach um Chosaint Sonraí a thuairim (292), a tugadh san áireamh agus an Cinneadh seo á ullmhú.

(118)

Tá na bearta dá bhforáiltear sa Chinneadh seo i gcomhréir leis an tuairim ón gCoiste arna bhunú faoi Airteagal 93(1) de Rialachán (AE) 2016/679,