(1)

Is galar tógálach veicteoir-iompartha é ionfhabhtú le víreas ghalar an chraicinn chnapánaigh a bhíonn ar bhó-ainmhithe. D’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach freisin ar ghluaiseacht choinsíneachtaí na n-ainmhithe sin agus ar tháirgí na n-ainmhithe sin laistigh den Aontas, agus ar onnmhairí go tríú tíortha.

(2)

I gcás ráig d’ionfhabhtú le víreas ghalar an chraicinn chnapánaigh i mbó-ainmhithe, tá riosca tromchúiseach ann go leathfadh an galar sin go bunaíochtaí eile bó-ainmhithe go háirithe mar gheall ar a mhodh tarchurtha trí veicteoirí.

(3)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le galair liostaithe áirithe a chosc agus a rialú dá dtagraítear in Airteagal 9(1), pointí (a), (b) agus (c), de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil le hAirteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar de chatagóir A, lena n-áirítear ionfhabhtú le víreas ghalar an chraicinn chnapánaigh agus maidir le bearta áirithe a bheidh le cur i bhfeidhm ann. Ina theannta sin, foráiltear le hAirteagal 21(1) den Rialachán Tarmligthe sin go gcuimseoidh an crios srianta ar a laghad crios cosanta, crios faireachais, agus, más gá, criosanna srianta breise timpeall ar na criosanna cosanta agus faireachais nó cóngarach dóibh.

(4)

Chuir an Fhrainc an Coimisiún ar an eolas faoin staid reatha ina críoch a mhéid a bhaineann le hionfhabhtú bó-ainmhithe le víreas ghalar an chraicinn chnapánaigh, tar éis ráig den ghalar sin i mbó-ainmhithe ar coimeád i mbardas Chambéry, i roinn Savoie, i réigiún Auvergne-Rhône-Alpes, ráig a tuairiscíodh an 30 Meitheamh 2025. Tar éis an tuairiscithe sin, tuairiscíodh gur bhunaigh an Fhrainc crios srianta de réir bhrí Rialachán Tarmligthe (AE) 2020/687; lena gcuimsítear crios cosanta agus crios faireachais, ina gcuirtear i bhfeidhm freisin na bearta rialaithe galar dá bhforáiltear i Rialachán Tarmligthe (AE) 2020/687.

(5)

Chun leathadh ionfhabhtú le víreas ghalar an chraicinn chnapánaigh a rialú, agus aon suaitheadh nach bhfuil gá leis ar thrádáil laistigh den Aontas a chosc agus bacainní gan údar ar thrádáil ag tríú tíortha a sheachaint, is gá an crios srianta i dtaca le hionfhabhtú le víreas ghalar an chraicinn chnapánaigh, ar crios é lena gcuimsítear crios cosanta amháin agus crios faireachais ar a laghad, a shainaithint go tapa ar leibhéal an Aontais.

(6)

Méid an chreasa cosanta agus an chreasa faireachais agus fad tréimhse na mbeart atá le cur i bhfeidhm laistigh de na criosanna sin, tá siad bunaithe ar na critéir a leagtar síos in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687 freisin. Ar na critéir a chuirtear i bhfeidhm maidir le rogha mhéid an chreasa cosanta agus an chreasa faireachais, chomh maith le fad tréimhse na mbeart atá le cur i bhfeidhm laistigh de na criosanna sin, áirítear breithniú ar an staid eipidéimeolaíoch a mhéid a bhaineann le hionfhabhtú le víreas ghalar an chraicinn chnapánaigh sna limistéir atá buailte ag an ngalar sin, agus ní hamháin sin ach ar thosca eipidéimeolaíocha eile lena n-áirítear paraiméadair gheografacha agus an riosca atá ann maidir le leathadh breise an ghalair. Cuireadh san áireamh freisin caighdeáin idirnáisiúnta an Chóid um Shláinte na nAinmhithe Talún ón Eagraíocht Dhomhanda um Shláinte Ainmhithe agus fad tréimhse na mbeart dá bhforáiltear sa Chinneadh seo á chinneadh (4).

(7)

Dá réir sin, ba cheart na limistéir a shainaithnítear mar chrios cosanta agus mar chrios faireachais sa Fhrainc a leagan amach san Iarscríbhinn a ghabhann leis an gCinneadh seo, agus ba cheart fad tréimhse an réigiúnaithe sin a shuí i ndlí an Aontais.

(8)

I bhfianaise phráinn na staide eipidéimeolaíche san Aontas a mhéid a bhaineann le hionfhabhtú le víreas ghalar an chraicinn chnapánaigh agus an ghá cosc a chur ar leathadh an ghalair sin ó na bunaíochtaí atá buailte sa Fhrainc go codanna eile den Bhallstát sin nó go Ballstáit eile, ba cheart feidhm a bheith ag na bearta a leagtar síos sa Chinneadh Cur Chun Feidhme seo a luaithe is féidir.

(9)

Dá réir sin, go dtí go bhfaighfear tuairim ón mBuanchoiste um Plandaí, Ainmhithe, Bia agus Beatha, ba cheart an crios cosanta agus an crios faireachais sa Fhrainc a bhunú láithreach agus a liostú san Iarscríbhinn a ghabhann leis an gCinneadh seo, agus ba cheart fad an chriosúcháin sin a shocrú.

(10)

Agus aird á tabhairt ar an staid eipidéimeolaíoch atá ann faoi láthair san Aontas a mhéid a bhaineann le hionfhabhtú le víreas ghalar an chraicinn chnapánaigh, ba cheart feidhm a bheith ag an gCinneadh seo go dtí an 14 Lúnasa 2025.

(11)

Tá an Cinneadh seo le hathbhreithniú ag an gcéad chruinniú eile den Bhuanchoiste um Plandaí, Ainmhithe, Bia agus Beatha,

(a)

go mbunóidh údaráis inniúla an Bhallstáit sin láithreach crios srianta ina bhfuil crios cosanta agus crios faireachais i gcomhréir le hAirteagal 21 de Rialachán Tarmligthe (AE) 2020/687 agus faoi na coinníollacha a leagtar síos san Airteagal sin;

(b)

go gcuimseofar leis an gcrios cosanta agus an crios faireachais dá dtagraítear i bpointe (a) ar a laghad na limistéir a liostaítear san Iarscríbhinn a ghabhann leis an gCinneadh seo;

(c)

maidir leis na bearta is gá a chur i bhfeidhm sa chrios cosanta agus sa chrios faireachais, go cuirfear i bhfeidhm iad ar a laghad go dtí na dátaí a liostaítear san Iarscríbhinn a ghabhann leis an gCinneadh seo.