(1)

Le Rialachán Cur Chun Feidhme (AE) Uimh. 94/2014 ón gCoimisiún (2), formheasadh iaidín mar shubstaint ghníomhach lena úsáid i dtáirgí bithicídeacha de chineálacha táirgí 1, 3, 4 agus 22 faoi réir na gcoinníollacha a leagtar amach san Iarscríbhinn a ghabhann leis an Rialachán sin.

(2)

An formheas maidir le hiaidín a úsáid i dtáirgí bithicídeacha de chineálacha táirgí 1, 3, 4 agus 22 (‘an formheas’), rachaidh sé in éag an 31 Lúnasa 2025. An 28 Feabhra 2024 cuireadh iarratas isteach, i gcomhréir le hAirteagal 13(1) de Rialachán (AE) Uimh. 528/2012, ar athnuachan a dhéanamh ar an bhformheas maidir le hiaidín le haghaidh chineál táirge 3 (‘an t-iarratas’), ach níor cuireadh aon iarratas isteach ar athnuachan a dhéanamh ar an bhformheas maidir le hiaidín le haghaidh chineálacha táirgí 1, 4 agus 22.

(3)

An 19 Aibreán 2024 chuir údarás inniúil meastóireachta na Sualainne an Coimisiún ar an eolas gur chinn sé, de bhun Airteagal 14(1) de Rialachán (AE) Uimh. 528/2012, gur ghá meastóireacht iomlán a dhéanamh ar an iarratas. De bhun Airteagal 8(1) den Rialachán sin, tá an t-údarás inniúil meastóireachta le meastóireacht iomlán a dhéanamh ar an iarratas laistigh de 365 lá tar éis a bhailíochtaithe.

(4)

Féadfaidh an t-údarás inniúil meastóireachta, de réir mar is iomchuí, é a chur de cheangal ar an iarratasóir sonraí leordhóthanacha a sholáthar chun an mheastóireacht a dhéanamh, i gcomhréir le hAirteagal 8(2) de Rialachán (AE) Uimh. 528/2012. Sa chás sin, cuirtear an tréimhse 365 lá ar fionraí ar feadh tréimhse nach faide ná 180 lá ar an iomlán ach amháin má tá údar maith le fionraí níos faide mar gheall ar chineál na sonraí a iarrtar nó mar gheall ar imthosca eisceachtúla.

(5)

Laistigh de 270 lá tar éis don Ghníomhaireacht Eorpach Ceimiceán moladh a fháil ón údarás inniúil meastóireachta, déanfaidh sí tuairim maidir le hathnuachan ar fhormheas na substainte gníomhaí a ullmhú agus a chur faoi bhráid an Choimisiúin, i gcomhréir le hAirteagal 14(3) de Rialachán (AE) Uimh. 528/2012.

(6)

Dá réir sin, ar chúiseanna nach bhfuil neart ag an iarratasóir orthu, is dócha go rachaidh an formheas in éag sula ndéanfar cinneadh maidir lena athnuachan. Dá bhrí sin, is iomchuí dáta éaga an fhormheasa maidir le húsáid i dtáirgí bithicídeacha de chineál táirge 3 a chur ar atráth go ceann tréimhse leordhóthanach chun gur féidir scrúdú a dhéanamh ar an iarratas. Agus na teorainneacha ama á gcur san áireamh chun go ndéanfaidh an t-údarás inniúil meastóireachta an mheastóireacht, chun go n-ullmhóidh an Ghníomhaireacht an tuairim uaithi agus chun go gcuirfidh sí isteach í, agus an t-am a thógfaidh sé don Choimisiún cinneadh a dhéanamh an ndéanfar athnuachan ar an bhformheas, ba cheart an dáta éaga maidir le húsáid i dtáirgí bithicídeacha de chineál táirge 3 a chur ar atráth go dtí an 29 Feabhra 2028.

(7)

Tar éis dáta éaga an fhormheasa a chur ar atráth, beidh iaidín formheasta go fóill lena úsáid i dtáirgí bithicídeacha de chineál táirge 3 faoi réir na gcoinníollacha a leagtar amach san Iarscríbhinn a ghabhann le Rialachán Cur Chun Feidhme (AE) Uimh. 94/2014,