(1)

Is sócmhainn straitéiseach iad sonraí, ar rudaí iad atá riachtanach don nuálaíocht agus chun gur féidir teicneolaíochtaí nua a úsáid, go háirithe an intleacht shaorga;

(2)

Cuireann eagraíochtaí poiblí cuid dá sonraí poiblí ar fáil go córasach i bhfoirm sonraí oscailte chun trédhearcacht agus cuntasacht a chur chun cinn, chun saoránaigh a chumhachtú agus chun seirbhísí poiblí a fheabhsú tríd an nuálaíocht a chothú;

(3)

Chun tacú leis an gcleachtas sin, glacadh Treoir (AE) 2019/1024 ó Pharlaimint na hEorpa agus ón gComhairle (1);

(4)

I rún uaithi an 25 Márta 2021 maidir le straitéis Eorpach i ndáil le sonraí (2), d’iarr Parlaimint na hEorpa go mbeadh bearta ann chun sreabhadh sonraí níos mó a cheadú idir an earnáil phoiblí agus gnólachtaí, agus laistigh de gach ceann acu;

(5)

Ghlac an Coimisiún Eorpach, Comhairle an Aontais Eorpaigh agus an Chúirt Iniúchóirí bearta lena gcuirtear oscailteacht a gcuid sonraí ar bhonn foirmiúil; in 2011, ghlac an Coimisiún Eorpach Cinneadh 2011/833/AE (3), arb é is aidhm dó athúsáid níos leithne faisnéise poiblí a éascú. Ag leanúint shampla an Choimisiúin Eorpaigh, ghlac Comhairle an Aontais Eorpaigh Cinneadh (AE) 2017/1842 (4) agus ghlac an Chúirt Iniúchóirí Cinneadh Uimh. 6-2019 (5), maidir le beartas sonraí oscailte agus beartais athúsáide doiciméad;

(6)

D’aithin na parlaimintí náisiúnta freisin gur gá feabhas a chur ar inrochtaineacht a gcuid sonraí poiblí. In 2022, rinne an tAontas Idirpharlaiminteach staidéar sonraí oscailte agus d’fhoilsigh sé liosta (6) de na seomraí tionóil parlaiminteacha ar fud an domhain a chuireann sonraí oscailte ar fáil faoi láthair ar thairseacha tiomnaithe nó ar shuíomhanna gréasáin tiomnaithe;

(7)

Ó thaobh na Parlaiminte de, Is ionann a cuid sonraí poiblí a dhéanamh chomh hinaimsithe agus chomh hidir-inoibritheach agus is féidir agus a cuid gealltanas i leith oscailteachta agus cuntasachta a chorprú; comhlánaíonn sé na cinntí a rinneadh chun ionracas, neamhspleáchas agus cuntasacht na hinstitiúide a neartú. Má chuirtear sonraí oscailte ar fáil, is bealach é sin freisin chun nuálaíocht seirbhísí do na Feisirí a spreagadh, chun feabhas a chur ar chinnteoireacht shonraíbhunaithe na Parlaiminte agus chun a fhor-rochtain le saoránaigh a neartú;

(a)

‘oscailteacht theicniúil’: cuirtear sonraí agus na meiteashonraí a ghabhann leo ar fáil i bhformáidí oscailte meaisín-inléite;

(b)

‘oscailteacht dhlíthiúil’: tá na sonraí faoi réir ceadúnas oscailte;

(c)

‘oscailteacht phraiticiúil’: tá na sonraí inaimsithe go héasca, cothrom le dáta agus inrochtana go díreach;

(d)

‘oscailteacht shóisialta’: chun feabhas a chur ar cháilíocht na sonraí agus ar infhaighteacht, déantar aiseolas na n-úsáideoirí a bhailiú agus a mheas agus sonraí á gcur ar fáil.