(1)

Le Rialachán (CE) Uimh. 1831/2003 déantar foráil maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú agus a athnuachan.

(2)

Le Rialachán Cur Chun Feidhme (AE) Uimh. 1061/2013 ón gCoimisiún údaraíodh ullmhóid arb é a bhí inti Enterococcus lactis NCIMB 10415 (a sainaithníodh go tacsanomaíoch roimhe seo mar Enterococcus lactis NCIMB 10415) ar feadh tréimhse 10 mbliana mar bhreiseán beathaithe le haghaidh cat agus madraí (2).

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh iarratas isteach chun údarú na hullmhóide Enterococcus lactis NCIMB 10415 a athnuachan lena húsáid i mbeatha le haghaidh cat agus madraí, iarratas agus iarradh ann go n-aicmeofaí an breiseán sa chatagóir ‘breiseáin zóiteicniúla’ agus sna feidhmghrúpaí ‘cobhsaitheoirí fhlóra na stéige’ le haghaidh cat, agus ‘breiseáin zóiteicniúla eile’ le haghaidh madraí. Bhí na sonraí agus na doiciméid a cheanglaítear faoi Airteagal 14(2) de Rialachán (CE) Uimh. 1831/2003 ag gabháil leis an iarratas sin.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 30 Eanáir 2024 (3) gur chuir an t-iarratasóir fianaise ar fáil go bhfuil an ullmhóid arb é atá inti Enterococcus lactis NCIMB 10415 fós sábháilte do chait agus do mhadraí faoi na coinníollacha úsáide a údaraítear faoi láthair. Ina theannta sin tháinig sé ar an gconclúid nár léiríodh go raibh an breiseán ina ghreannaitheoir craicinn agus súl, ach gur cheart a mheas gur íogróir riospóraide é, cé nárbh fhéidir teacht ar chonclúid i dtaobh íograithe craicinn. Chuir an tÚdarás in iúl freisin nach raibh gá le measúnú a dhéanamh ar éifeachtúlacht na hullmhóide Enterococcus lactis NCIMB 10415 i gcomhthéacs athnuachan an údaraithe ós rud é nach n-áirítear san iarratas ar athnuachan togra maidir leis na coinníollacha an údaraithe bhunaidh a mbeadh tionchar aige ar éifeachtúlacht an bhreiseáin. Níor mheas an tÚdarás go raibh gá le ceanglais shonracha maidir le faireachán iarmhargaidh.

(5)

Mheas an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí ar ar thángthas sa mheasúnú roimhe seo maidir leis an mbreiseán céanna a mhéid a bhaineann leis an modh anailíse bailí agus infheidhme maidir leis an iarratas atá ann faoi láthair. Dá bhrí sin, i gcomhréir le hAirteagal 5(4), pointe (a), de Rialachán (CE) Uimh. 378/2005 ón gCoimisiún (4), níl gá le tuarascáil mheastóireachta ón tSaotharlann Tagartha.

(6)

I bhfianaise an mhéid thuas, measann an Coimisiún go gcomhlíonann an ullmhóid Enterococcus lactis NCIMB 10415 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú an bhreiseáin sin a athnuachan. Ar chúiseanna rialaithe, is iomchuí uimhir aitheantais shonrach a leithdháileadh don ullmhóid sin le haghaidh cat agus madraí ionas go bhféadfar idirdhealú a dhéanamh idir an ullmhóid sin agus foirmeacha eile den ullmhóid sin arna n-údarú le Rialachán Cur Chun Feidhme (AE) 2024/1161 ón gCoimisiún (5) le haghaidh speicis eile. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc. Ba cheart na bearta cosanta sin a bheith gan dochar do cheanglais eile sábháilteachta oibrithe faoi dhlí an Aontais.

(7)

Mar thoradh ar údarú na hullmhóide Enterococcus lactis NCIMB 10415 a athnuachan mar bhreiseán beathaithe le haghaidh cat agus madraí, ba cheart Rialachán Cur Chun Feidhme (AE) Uimh. 1061/2013 a aisghairm.

(8)

Ós rud é nach bhfuil gá leis na modhnuithe ar na coinníollacha maidir le húdarú na hullmhóide Enterococcus lactis NCIMB 10415 mar bhreiseán beathaithe le haghaidh cat agus madraí a chur i bhfeidhm láithreach ar chúiseanna sábháilteachta, is iomchuí foráil a dhéanamh maidir le hidirthréimhse do na páirtithe leasmhara chun iad féin a ullmhú chun na ceanglais nua a eascraíonn as athnuachan an údaraithe a chomhlíonadh.

(9)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,