(1)

Tá ról lárnach ag ceanglais tuairiscithe chun faireachán cuí ar an reachtaíocht agus forfheidhmiú ceart na reachtaíochta a áirithiú. Tá sé tábhachtach, mar sin féin, na ceanglais sin a chuíchóiriú chun a áirithiú go gcomhlíonfaidh siad an cuspóir dár beartaíodh iad agus chun an t-ualach riaracháin a theorannú.

(2)

Le Rialachán Cur Chun Feidhme (AE) 2017/1185 (2) ón gCoimisiún, leagtar síos na rialacha maidir le cur i bhfeidhm Rialachán (AE) Uimh. 1308/2013 a mhéid a bhaineann leis na hoibleagáidí ar na Ballstáit fógra a thabhairt don Choimisiún faoi fhaisnéis agus doiciméid ábhartha. Sa Rialachán Cur Chun Feidhme sin tá roinnt ceanglas tuairiscithe i réimse thrédhearcacht na margaí talmhaíochta agus bia, ar cheart iad a shimpliú dá bhrí sin, i gcomhréir leis an Teachtaireacht ón gCoimisiún maidir le ‘hIomaíochas fadtéarmach an Aontais: níos faide ar aghaidh ná 2030’ (3).

(3)

Tá sé fíor-riachtanach cáilíocht na sonraí a bhailítear agus a scaiptear a áirithiú chun faireachán a dhéanamh ar thrédhearcacht leormhaith an mhargaidh agus chun an trédhearcacht sin a áirithiú. Dá bhrí sin, tá sé d’oibleagáid ar na Ballstáit fógra a thabhairt don Choimisiún faoi na sonraí is gá chun na haidhmeanna sin a shaothrú.

(4)

Cé gur freagracht na mBallstát é fós na bearta is gá a dhéanamh chun a áirithiú go bhfuil an fhaisnéis a dtugtar fógra fúithi don Choimisiún ábhartha maidir leis an margadh lena mbaineann, agus go bhfuil sí cruinn iomlán, tá an Coimisiún le húsáid a bhaint as a shaineolas earnála chun a chinneadh céard iad na sonraí atá le foilsiú agus cén fhoirm agus leibhéal comhiomlánaithe a bhfuil siad le foilsiú.

(5)

Leasaíodh Rialachán Cur Chun Feidhme (AE) 2017/1185 le Rialachán Cur Chun Feidhme (AE) 2019/1746 ón gCoimisiún (4) lenar tugadh isteach oibleagáidí nua ar na Ballstáit maidir le fógra a thabhairt, chun feabhas a chur ar bhailiú na sonraí staidrimh is gá chun anailís a dhéanamh ar shásraí socraithe praghsanna feadh shlabhra an tsoláthair talmhaíochta agus bia, chun cabhrú le hoibreoirí eacnamaíocha agus le húdaráis phoiblí roghanna níos eolasaí a dhéanamh.

(6)

Tar éis ionradh na Rúise ar an Úcráin an 24 Feabhra 2022, leasaíodh Rialachán Cur Chun Feidhme (AE) 2017/1185 le Rialachán Cur Chun Feidhme (AE) 2022/791 ón gCoimisiún (5) lenar tugadh isteach oibleagáidí nua ar na Ballstáit a mhéid a bhaineann le fógra a thabhairt faoi leibhéil na stoc gránach, olashíolta agus ríse, lena n-áirítear fógra faoi tháirgeadh agus leibhéil na stoc síolta deimhnithe.

(7)

Tar éis breis agus 3 bliana de chur i bhfeidhm Rialachán Cur Chun Feidhme (AE) 2017/1185 arna leasú le Rialachán Cur Chun Feidhme (AE) 2019/1746 agus bliain go leith de chur i bhfeidhm Rialachán Cur Chun Feidhme (AE) 2017/1185 arna leasú le Rialachán Cur Chun Feidhme (AE) 2022/791, dealraíonn sé gur gá forálacha áirithe de Rialachán Cur Chun Feidhme (AE) 2017/1185 a shoiléiriú nó a oiriúnú chun feabhas a chur ar cháilíocht na sonraí a bhailítear agus ar éifeachtúlacht an phróisis bailithe sonraí.

(8)

Dá bhfoilseofaí figiúirí táirgthe siúcra an Aontais ar leibhéal na mBallstát le haghaidh gach Ballstáit, lena n-áirítear na Ballstáit ina bhfuil níos lú ná trí oibreoir eacnamaíocha, mhéadófaí trédhearcacht an mhargaidh trí rochtain a thabhairt d’fheirmeoirí, lena n-áirítear táirgeoirí biatas, ar an bhfaisnéis is gá dóibh chun comharthaí margaidh a léirmhíniú ar bhealach níos fearr agus chun déileáil le luaineacht mhéadaithe sa mhargadh. Laghdódh sé neamhshiméadrachtaí faisnéise freisin agus chuirfeadh sé feabhas ar staid na bhfeirmeoirí sin i gcomhthéacs na caibidlíochta a bhíonn acu le táirgeoirí siúcra maidir le conarthaí seachadta. Chun aon riosca a sheachaint i dtéarmaí rúndacht na sonraí agus i dtéarmaí saofa iomaíochta, go háirithe an riosca claonpháirteachais idir oibreoirí eacnamaíocha, ba cheart na sonraí táirgthe a fhoilsiú tar éis na cinntí ábhartha a dhéanamh maidir le leibhéil táirgthe don bhliain mhargaíochta dár gcionn.

(9)

Ba cheart soiléiriú a dhéanamh ar na sprioc-amanna le haghaidh na mBallstát fógra a thabhairt faoi na modheolaíochtaí a úsáidtear chun an fhaisnéis a sholáthraítear a chinneadh.

(10)

Léiríodh go bhfuil sé deacair do líon mór Ballstát praghsanna ceannaithe miondíola a bhailiú. Cé go bhfuil an fhaisnéis fós ábhartha, go háirithe i gcomhthéacs na n-agóidí a rinne feirmeoirí le déanaí agus an phlé maidir le staid na bhfeirmeoirí i slabhra an tsoláthair bia a neartú, ba cheart fógraí míosúla a bheith leordhóthanach chun faireachán a dhéanamh ar phraghsanna. Ba cheart, dá bhrí sin, na fógraí seachtainiúla atá sainordaithe le haghaidh táirgí áirithe a athrú go fógraí míosúla, agus ar an gcaoi sin déanfar tréimhsiúlacht na bhfógraí a chomhchuibhiú le haghaidh na bpraghsanna ceannaithe miondíola uile. Na Ballstáit ar mian leo faisnéis bhreise a chur ar fáil i bhfoirm praghsanna ceannaithe seachtainiúla, ba cheart cead a bheith acu déanamh amhlaidh.

(11)

Ní áirithítear inchomparáideacht leordhóthanach sonraí, agus déantar dochar do luach na faisnéise a dtugtar fógra fúithi maidir le torthaí agus glasraí, de thairbhe ailíniú neamh-leordhóthanach leis na ceanglais tuairiscithe a leagtar síos i Rialachán Tarmligthe (AE) 2017/891 ón gCoimisiún (6) agus idir modheolaíochtaí a chuireann na Ballstáit bhfeidhm. Is gá, dá bhrí sin, soiléireacht na sonraí atá le soláthar feadh an tslabhra soláthair ar fad a fheabhsú chun feabhas a chur ar thrédhearcacht an mhargaidh agus chun an tuairisciú ar phraghsanna torthaí agus glasraí a thabhairt chun críche suas go deireadh an tslabhra soláthair, lena n-áirítear an ceanglas fógra a thabhairt faoi na praghsanna ag praghsanna miondíola. Chun teorainn a chur leis an ualach riaracháin ar na Ballstáit, ba cheart minicíocht na bhfógraí faoi phraghsanna ceannaigh agus díola miondíola a theorannú d’uair amháin sa mhí.

(12)

Mar gheall ar an tábhacht a bhaineann le prátaí margaidh ar mhargadh an Aontais agus ós rud é gur cuid thábhachtach den aiste bia iad, ba cheart prátaí margaidh a chur isteach freisin mar tháirge nua ar cheart fógra a thabhairt faoi phraghsanna ina leith. Tá chuid thábhachtach de tháirgeadh foriomlán torthaí agus glasraí ceaptha lena bpróiseáil. Tá sé ríthábhachtach faisnéis atá cothrom le dáta a fháil maidir leis an gcainníocht a tháirgtear atá ceaptha lena tomhailt chun trédhearcacht an mhargaidh a áirithiú mar gheall ar thionchar na cainníochta a tháirgtear ar na cainníochtaí agus ar na praghsanna atá ar fáil. Dá bhrí sin, is gá an fhaisnéis táirgthe sin a chur leis na fógraí is gá.

(13)

Ionas gur féidir meánphraghas ceannaithe ualaithe le haghaidh siúcra a fhoilsiú ar leibhéal an Aontais, tá gá le faisnéis a bheith ag gabháil leis na praghsanna ceannaigh le haghaidh siúcra a dtugtar fógra fúthu don Choimisiún faoi phointe 3 d’Iarscríbhinn II a ghabhann le Rialachán Cur Chun Feidhme (AE) 2017/1185, ar faisnéis í faoi na cainníochtaí siúcra a cheannaíonn na cineálacha éagsúla oibreoirí eacnamaíocha a chomhfhreagraíonn do na praghsanna ceannaigh sin.

(14)

Ba cheart earnáil na cnáibe tairbhiú den leibhéal céanna trédhearcachta sa mhargadh agus atá in earnálacha barr snáithín eile, mar atá na hearnálacha lín agus cadáis. Ionas go maolaítear an t-ualach oibre a chomhfhreagraíonn do na fógraí nua le haghaidh earnáil na cnáibe, ba cheart an fógra míosúil maidir leis na meánphraghsanna díreach ón monarcha ar líon a bheith bliantúil.

(15)

Mar gheall ar ábharthacht táirgí fíniúna áirithe don mhargadh seachas na táirgí sin dá dtagraítear i bpointe (1) de Chuid II d’Iarscríbhinn VII a ghabhann le Rialachán (AE) Uimh. 1308/2013, is gá na táirgí fíniúna atá faoi réir faireachán ar phraghsanna agus fógra ina leith a leathnú chun ‘fíonta súilíneacha’ áirithe a chumhdach freisin, dá dtagraítear i bpointí (4), (5) agus (6) den Chuid II sin. Thairis sin, le leathnú méadaitheach ar an limistéar fíonghoirt faoi fheirmeoireacht orgánach san Aontas, i gcomhréir leis an uaillmhian agus na spriocanna a socraíodh don táirgeadh orgánach san Aontas, ar 13 % é den limistéar iomlán fíonghort in 2020, agus leis an tábhacht mhéadaitheach a bhaineann le táirgí orgánacha do tháirgeoirí agus do thomhaltóirí, éilítear go ndéanfaidh na Ballstáit táirgthe faireachán ar phraghsanna fíonta orgánacha ionadaíocha agus go dtabharfaidh siad fógra fúthu.

(16)

I bhfianaise shainiúlachtaí mhargadh na ríse, ba cheart athbhreithniú a dhéanamh ar na ceanglais maidir le fógra a thabhairt. I bhformhór na mBallstát, fágann méid beag earnáil na ríse i gcásanna áirithe go bhfuil an bailiú sonraí ró-anásta. Chun an t-ualach ar pháirtithe leasmhara agus ar oifigí staidrimh na mBallstát a laghdú, is gá, dá bhrí sin, fógraí a theorannú do na leibhéil iomlána mhíosúla stoic le haghaidh rís ‘Japonica’ agus ‘Indica’, gan difríochtaí a dhéanamh ar bhonn cóid AC. Ina theannta sin, níor cheart é a bheith riachtanach a thuilleadh difríocht a dhéanamh idir rís allmhairithe agus rís a tháirgtear ar bhonn intíre.

(17)

Leis an tréimhse fógra le haghaidh síolstoic dheimhnithe gabhtar sonraí nuair a bhíonn na stoic sin ar a n-uasleibhéal, tar éis a mbuainte agus roimh an síolchur. Le linn na tréimhse sin, is iad na sonraí sin is ábhartha agus is iomláine, ina dtugtar faisnéis shoiléir maidir le hinfhaighteacht síolta deimhnithe chun measúnú a dhéanamh ar stádas shlándáil bia an Aontais. Ní bhaineann saincheist le tréimhse fógra mhí Feabhra ina leith sin. Mar sin féin, le sprioc-am tuairiscithe lár na bliana féilire, ba cheart na héagsúlachtaí sna dátaí síolchuir agus buainte idir na Ballstáit agus na barra a léiriú, éagsúlachtaí a d’fhéadfadh a bheith mór thart ar an tréimhse sin. Chun a áirithiú go bhfuil na sonraí ábhartha, cruinn agus iomlán, ba cheart do na Ballstáit, dá bhrí sin, fógra a thabhairt faoi na síolstoic dheimhnithe i lár na bliana féilire a luaithe is féidir tar éis dheireadh na buainte, agus sula gcuirfear tús leis an síolchur i gcás gach bairr. Ba cheart do na Ballstáit, mar chuid dá bhfógraí faoin modheolaíocht a úsáidtear chun an fhaisnéis a chuirtear ar fáil a chinneadh, an dáta tuairiscithe a bhfuil coinne leis i gcás na síolstoc deimhnithe lár bliana sin a chur in iúl don Choimisiún, i gcás gach bairr. Níor cheart an dáta tuairiscithe a bheith níos déanaí ná mí Mheán Fómhair gach bliain.

(18)

Ba cheart inneachar an fhógra maidir leis na stoic siúcra agus iseaglúcóis a shoiléiriú a thuilleadh chun a léiriú gur gá na cainníochtaí allmhairithe a ionchorprú.

(19)

Tuairiscíonn na Ballstáit sonraí maidir le táirgeadh fíona agus faisnéis eile faoin margadh, lena n-áirítear stoic, go bliantúil faoi láthair. Tá an táirgeadh agus na stoic a dtugtar fógra fúthu bunaithe ar na dearbhuithe ó tháirgeoirí agus ó oibreoirí eile dá dtagraítear in Airteagail 31 agus 32 de Rialachán Tarmligthe (AE) 2018/273 ón gCoimisiún (7) agus ar na rialacha sonracha a leagtar síos i Rialachán Cur Chun Feidhme (AE) 2018/274 ón gCoimisiún (8). Cé go bhfuil an mhinicíocht bhliantúil sin oiriúnach chun faireachán a dhéanamh ar tháirgeadh, ní leor faireachán a dhéanamh ar fhorbairt leibhéal na stoc, rud a imríonn tionchar mór ar staid an mhargaidh feadh na bliana margaíochta. Le miondealú fógra níos mionsonraithe ar an táirgeadh agus ar na stoic de réir dathanna agus cineálacha fíona, d’éascófaí measúnú ar staideanna margaidh éagsúla ar leibhéal an Aontais, rud a d’éascódh breithniú ar bheart beartais a bheadh oiriúnach do riachtanais ar leith.

(20)

Dá bhrí sin, ba cheart Rialachán Cur Chun Feidhme (AE) 2017/1185 a leasú dá réir.

(21)

Is iomchuí foráil a dhéanamh maidir le dáta cur i bhfeidhm an Rialacháin seo lena dtabharfaí an fhéidearthacht do na Ballstáit oiriúnú do na ceanglais nua um thuairisciú. Chun na críche sin, ba cheart feidhm a bheith ag modhnuithe ar na hoibleagáidí atá ann faoi láthair maidir le fógra a thabhairt ó 3 mhí tar éis theacht i bhfeidhm an Rialacháin seo. Maidir le hoibleagáidí nua i dtaca le fógra a thabhairt, ba cheart an dáta cur i bhfeidhm a bheith ag brath ar a chasta atá sé do na Ballstáit an mhodheolaíocht agus na socruithe iomchuí maidir le bailiú sonraí a fhorbairt. Ba cheart feidhm a bheith ag oibleagáidí nua maidir le fógra a thabhairt faoi phraghsanna miondíola prátaí margaidh agus torthaí agus glasraí ó 6 mhí tar éis theacht i bhfeidhm an Rialacháin seo. Ba cheart feidhm a bheith ag oibleagáidí nua maidir le fógra a thabhairt faoi phraghsanna cnáibe ón 1 Deireadh Fómhair 2025. Ba cheart feidhm a bheith ag oibleagáidí nua maidir le fógra a thabhairt faoi chainníochtaí torthaí agus glasraí a tháirgtear lena gcaitheamh agus iad úr ón 1 Márta 2026. Ba cheart feidhm a bheith ag an gcóras fógartha modhnaithe maidir le táirgeadh fíona agus staid an mhargaidh ón 1 Iúil 2025, agus ba cheart feidhm a bheith ag an gcóras nua fógraí maidir le praghsanna fíona ón 1 Deireadh Fómhair 2025.

(22)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Chomheagrú na Margaí Talmhaíochta,

(1)

in Airteagal 4, cuirtear an mhír 5 seo a leanas leis:

(2)

Leasaítear Airteagal 9 mar a leanas:

(3)

Leasaítear Iarscríbhinní I, II agus III, i gcomhréir leis an Iarscríbhinn a ghabhann leis an Rialachán seo.

(a)

beidh feidhm ag an oibleagáid fógra a thabhairt faoi phrátaí margaidh dá dtagraítear i bpointe 5(a) d’Iarscríbhinn I agus ag an oibleagáid fógra a thabhairt faoi phraghsanna miondíola dá dtagraítear i bpointe 8(e) d’Iarscríbhinn II ón 18 Márta 2025;

(b)

beidh feidhm ag an oibleagáid fógra a thabhairt faoi phraghsanna fíona dá dtagraítear i bpointe 6 d’Iarscríbhinn II agus ag an oibleagáid fógra a thabhairt faoi phraghsanna cnáibe dá dtagraítear i bpointe 3(i) d’Iarscríbhinn III ón 1 Deireadh Fómhair 2025;

(c)

beidh feidhm ag an oibleagáid fógra a thabhairt faoi tháirgeadh fíona agus staid an mhargaidh dá dtagraítear i bpointe 7 d’Iarscríbhinn III ón 1 Iúil 2025;

(d)

beidh feidhm ag an oibleagáid fógra a thabhairt faoi chainníochtaí torthaí agus glasraí a tháirgtear lena dtomhailt agus iad úr dá dtagraítear i bpointe 7a d’Iarscríbhinn III ón 1 Márta 2026.