(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le húdarú ullmhóide arb é atá inti ion-1,4-béite-mhannanáis arna táirgeadh le Thermothelomyces thermophilus DSM 33149. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóide arb é atá inti ion-1,4-béite-mhannanáis arna táirgeadh le Thermothelomyces thermophilus DSM 33149 mar bhreiseán beathaithe le haghaidh sicíní agus turcaithe lena ramhrú, mionspeicis éanlaithe clóis lena ramhrú agus éin ornáideacha, agus iarrtar ann go n-aicmeofaí an breiseán sin sa chatagóir ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 1 Feabhra 2023 (2) go bhfuil an ullmhóid ion-1,4-béite-mhannanáis arna táirgeadh le Thermothelomyces thermophilus DSM 33149 sábháilte don chomhshaol agus go bhféadfadh sí a bheith éifeachtúil i sicíní lena ramhrú, turcaithe lena ramhrú, mionspeicis éanlaithe clóis lena ramhrú agus éin ornáideacha ar leibhéal úsáide 800 TMU/kg. Tar éis don Údarás measúnú a dhéanamh ar na sonraí a chuir an t-iarratasóir isteach le déanaí, tháinig an tÚdarás ar an gconclúid sa tuairim uaidh an 30 Eanáir 2024 (3) go bhfuil an ullmhóid ion-1,4-béite-mhannanáise arna táirgeadh le Thermothelomyces thermophilus DSM 33149 sábháilte don spriocspeiceas ar an leibhéal úsáide atá beartaithe, agus don tomhaltóir. Tháinig an tÚdarás ar an gconclúid freisin nach greannaitheoir súl ná craicinn í an ullmhóid ion-1,4-béite-mhannanáise arna táirgeadh le Thermothelomyces thermophilus DSM 33149. I bhfianaise nádúr próitéineach na substainte gníomhaí, ba cheart an breiseán a mheas mar íogróir riospráide. Ní raibh an tÚdarás in ann teacht ar chonclúid maidir le hacmhainneacht an bhreiseáin a bheith ina íogróir craicinn. Níor mheas sé go bhfuil gá le ceanglais shonracha maidir le faireachán iarmhargaidh. D’fhíoraigh an tÚdarás freisin an tuarascáil ar an modh anailíse ar an mbreiseán beathaithe i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann an ullmhóid ion-1,4-béite-mhannanáise arna táirgeadh le Thermothelomyces thermophilus DSM 33149 na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh gach speicis éanlaithe clóis lena ramhrú agus le haghaidh éin ornáideacha. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Tá na bearta dá bhforáiltear sa Rialachán seo gicomhréir leis an tuairim ón mBuanchoiste um Plandaí, Ainmhithe, Bia agus Beatha,