(1)

I mí Iúil 2014, thug an Coimisiún faoi deara gur ghlac an Ungáir Acht XXII 2014 maidir le cáin fógraíochta (1) (‘an tAcht maidir le cáin fógraíochta’ anseo feasta) ar ar a bhonn a gearradh cáin ar an láimhdeachas ó ghníomhaíochtaí fógraíochta (‘an cháin fógraíochta’ anseo feasta). Le litreacha dar dáta an 13 Lúnasa 2014 agus an 1 Nollaig 2014, chuir an Coimisiún iarrataí ar fhaisnéis chuig údaráis na hUngáire, iarrataí a d’fhreagair na húdaráis le litreacha dar dáta an 2 Deireadh Fómhair 2014 agus an 16 Nollaig 2014.

(2)

Le litir dar dáta an 2 Feabhra 2015, chuir an Coimisiún údaráis na hUngáire ar an eolas go raibh sé beartaithe aige cinneadh maidir le hurghaire fionraí a eisiúint i gcomhréir le hAirteagal 11(1) de Rialachán (CE) Uimh. 659/1999 ón gComhairle (2). Le litir dar dáta an 17 Feabhra 2015, chuir údaráis na hUngáire a mbarúlacha isteach maidir leis an litir sin.

(3)

Le cinneadh dar dáta an 12 Márta 2015, thionscain an Coimisiún an nós imeachta a leagtar síos in Airteagal 108(2) CFAE (‘an Cinneadh Tosaigh’ anseo feasta) agus d’eisigh sé urghaire fionraí i gcomhréir le hAirteagal 11(1) de Rialachán (CE) Uimh. 659/1999 i leith an bhirt i gceist.

(4)

Foilsíodh an Cinneadh Tosaigh agus an urghaire fionraí in Iris Oifigiúil an Aontais Eorpaigh (3). D’iarr an Coimisiún ar pháirtithe leasmhara a mbarúlacha a chur isteach maidir leis an mbeart sin.

(5)

Fuair an Coimisiún barúlacha ó thrí pháirtí leasmhara agus chuir sé ar aghaidh chuig údaráis na hUngáire iad, agus tugadh deis do na húdaráis freagra a thabhairt.

(6)

An 21 Aibreán 2015 chuir údaráis na hUngáire dréacht-togra chuig an gCoimisiún le haghaidh leasú ar an Acht maidir le cáin fógraíochta. An 8 Bealtaine 2015 d’iarr an Coimisiún faisnéis ón Ungáir maidir leis an leasú beartaithe sin.

(7)

An 4 Meitheamh 2015 leasaigh an Ungáir an tAcht maidir le cáin fógraíochta. An 5 Iúil 2015 tháinig an leasú sin i bhfeidhm.

(8)

Le litir dar dáta an 6 Iúil 2015, sholáthair an Ungáir barúlacha maidir leis an gCinneadh Tosaigh agus maidir le barúlacha na bpáirtithe leasmhara, chomh maith le soiléirithe ar an leasú ar an Acht maidir le cáin fógraíochta.

(9)

An 4 Samhain 2016, leis an gcinneadh uaidh i ndáil leis an mbeart a chuir an Ungáir chun feidhme maidir leis an gcánachas ar láimhdeachas ón bhfógraíocht (4) (an ‘Cinneadh Críochnaitheach’), dhún an Coimisiún an nós imeachta imscrúdaithe foirmiúil trí theacht ar an gconclúid gur chabhair neamhdhleathach agus neamhréireach a bhí sa bheart agus d’ordaigh sé an chabhair a aisghabháil.

(10)

An 16 Nollaig 2016 chuir údaráis na hUngáire seirbhísí an Choimisiúin ar an eolas go raibh sé beartaithe acu Acht a ghlacadh lena gcuirfí deireadh leis an gcáin fógraíochta agus lena gcuirfí cáin nua ina hionad le haghaidh na todhchaí, i gcomhréir le haithris 96 den Chinneadh Críochnaitheach.

(11)

Le hiarratas arna thaisceadh i gClárlann na Cúirte Ginearálta an 16 Eanáir 2017, thug an Ungáir caingean le haghaidh neamhniú in aghaidh an Chinnidh Chríochnaithigh (Cás T-20/17).

(12)

An 16 Nollaig 2016, an 26 Eanáir 2017 agus an 17 Feabhra 2017, mhalartaigh seirbhísí an Choimisiúin agus an Ungáir comhfhreagras le chéile, rud as ar eascair glao comhdhála an 27 Feabhra 2017 chun plé a dhéanamh maidir le deireadh na cánach fógraíochta.

(13)

An 15 Bealtaine 2017 chuir an Ungáir deireadh leis an gcáin fógraíochta go cúlghabhálach i leith na tréimhse suas go dtí an 30 Meitheamh 2017, agus chuir sí cáin fógraíochta nua ina hionad (féach aithris 23 thíos). Tháinig an leasú sin ar an Acht maidir le cáin fógraíochta i bhfeidhm an 1 Iúil 2017 (5).

(14)

Le breithiúnas dar dáta an 27 Meitheamh 2019 i gcás T-20/17 an Ungáir v an Coimisiún (6), rinne an Chúirt Ghinearálta an Cinneadh Críochnaitheach a neamhniú, tar éis teacht ar an gconclúid di nár chruthaigh an Coimisiún gurbh ann do Státchabhair de réir bhrí Airteagal 107(1) CFAE.

(15)

An 23 Iúil 2019 leasaigh an Ungáir an tAcht maidir le cáin fógraíochta a thuilleadh tríd an gcáin a chur ar fionraí go dtí mí na Nollag 2022 (7).

(16)

An 6 Lúnasa 2019 thaisc an Coimisiún achomharc in aghaidh bhreithiúnas na Cúirte Ginearálta. Le breithiúnas an 16 Márta 2021 i gcás C-596/19 P (8), rinne an Chúirt Bhreithiúnais achomharc an Choimisiúin a dhíbhe agus sheas sí le breithiúnas na Cúirte Ginearálta.

(17)

Tar éis don Chúirt Ghinearálta an Cinneadh Críochnaitheach a neamhniú mar a dheimhnigh an Chúirt Bhreithiúnais, tá an nós imeachta imscrúdaithe foirmiúil fós ar oscailt agus ní mór é a dhúnadh le cinneadh.

(18)

Is í an cháin fógraíochta a tugadh isteach san Ungáir leis an Acht maidir le cáin fógraíochta agus a tháinig i bhfeidhm an 18 Iúil 2014, le leasuithe breise an 4 Iúil 2014 agus an 18 Samhain 2014 (‘an tAcht’ anseo feasta), an beart a ndéantar measúnú air sa Chinneadh Tosaigh.

(19)

Bhí struchtúr géar forchéimnitheach ar an gcáin, agus bhí na rátaí idir 0 % i gcás cuideachtaí le láimhdeachas íseal ón bhfógraíocht agus 50 % i gcás cuideachtaí le láimhdeachas ard ón bhfógraíocht, mar a leanas (‘leagan 2014’):

(20)

Tar éis ghlacadh an Chinnidh Tosaigh, leasaigh an Ungáir an tAcht maidir le cáin fógraíochta le hAcht LXII 2015 an 4 Meitheamh 2015, agus chuir sí córas dé-ráta in ionad an scála forchéimnitheach ina raibh sé ráta cánach mar a leanas (‘leagan 2015’ anseo feasta):

(21)

I mí na Samhna 2016 dhún an Coimisiún an nós imeachta imscrúdaithe foirmiúil tríd an gCinneadh Críochnaitheach diúltach a ghlacadh.

(22)

Leis an gCinneadh Críochnaitheach rinneadh measúnú ar leaganacha 2014 agus 2015 na cánach fógraíochta araon. Mheas an Coimisiún go raibh leagan 2015 bunaithe ar an bprionsabal céanna forchéimnitheachta agus go raibh an éifeacht chéanna aige agus a bhí ag leagan 2014 na cánach i dtaobh buntáiste a thabhairt do ghnóthais bheaga i gcomparáid le gnóthais mhóra.

(23)

Tar éis ghlacadh an Chinnidh Chríochnaithigh, in 2017, mhodhnaigh an Ungáir an cháin fógraíochta trí leasú breise a dhéanamh ar an Acht maidir le cáin fógraíochta (11). Leis an dlí leasaitheach rinneadh an méid seo a leanas:

(24)

A mhéid a bhaineann leis an gcáin a bhí i bhfeidhm agus a íocadh cheana féin ó tháinig an tAcht maidir le cáin fógraíochta i bhfeidhm, le hAcht XLVII 2017 foráladh mar a leanas maidir leis na blianta cánach suas go dtí an 30 Meitheamh 2017:

(25)

Sna forálacha de Chód Cánach na hUngáire a bhí i bhfeidhm nuair a tháinig Acht XLVII 2017 i bhfeidhm (14), sainmhínítear ‘ró-íocaíocht’ mar an cás ina bhfuil ‘méid is mó ag an gcáiníocóir ina chuntas cánach ná an oibleagáid atá aige an cháin a íoc’.

(26)

Dá bhrí sin, nuair a bhí an cháin fógraíochta íoctha ag an gcáiníocóir, bhí sé d’éifeacht ag na forálacha dá dtagraítear in aithrisí 24 agus 25 gur tháinig creidmheas cánach chun cinn i gcuntas an cháiníocóra.

(27)

Sa Chód Cánach leagtar amach bealaí éagsúla inar féidir leis na cáiníocóirí úsáid a bhaint as an gcreidmheas cánach a eascraíonn as ró-íocaíocht.

(28)

Sa chéad áit, féadfaidh an cáiníocóir a iarraidh go n-úsáidfear an ró-íocaíocht chun dliteanais chánach de chatagóir eile a chumhdach (15). Sa dara háit, féadfaidh an cáiníocóir aisíocaíocht ar an ró-íocaíocht a iarraidh, ar choinníoll nach bhfuil fiachas cánach aige agus go bhfuil a oibleagáidí maidir le tuairisceán cánach comhlíonta aige (16). Sa tríú háit, féadfaidh an ró-íocaíocht fanacht leis na húdaráis chánach chun dliteanais chánach sa chatagóir chánach chéanna a chumhdach (17).

(29)

Dá bhrí sin, le glacadh Acht XLVII 2017 áirithíodh go gcealófaí fiach dlite na cánach fógraíochta ina iomláine i leith na tréimhse ó 2014 go dtí an 30 Meitheamh 2017, agus go n-aisíocfaí an cháin fógraíochta a íocadh i rith na tréimhse sin do na cáiníocóirí nó go n-úsáidfí é chun dliteanais chánach eile na gcáiníocóirí sin a chumhdach.

(30)

Ar deireadh, tugann an Coimisiún faoi deara gur admhaigh an Chúirt Bhreithiúnais, ina breithiúnas i gcás C-596/19 P (18), gur aisghaireadh an beart cánach i gceist (19) go cúlghabhálach le hAcht XLVII 2017.

(31)

I bhfianaise an mhéid thuas, is é conclúid an Choimisiúin, mar gheall ar dheireadh a bheith curtha go cúlghabhálach leis an gcáin fógraíochta faoi réir an nós imeachta imscrúdaithe foirmiúil a rinne an Ungáir agus, dá réir sin, an fiachas cánach ábhartha a bheith curtha ar ceal agus an cháin a íocadh a bheith aisíoctha, nach mbaineann an nós imeachta imscrúdaithe foirmiúil le hábhar a thuilleadh.