(1)

Áirítear ar na bearta mionsonraithe maidir le cur chun feidhme na mbunchaighdeán comhchoiteann dá dtagraítear in Airteagal 4(3) de Rialachán (CE) Uimh. 300/2008 ó Pharlaimint na hEorpa agus ón gComhairle (2) nósanna imeachta maidir le trealamh slándála eitlíochta sibhialta a fhormheas agus a úsáid.

(2)

Ar an mbonn sin, le Rialachán Cur Chun Feidhme (AE) 2015/1998 bunaítear córas comhchuibhithe formheasa chun trealamh slándála eitlíochta sibhialta a shuiteáil chun a áirithiú go gcuirfear na bunchaighdeáin chomhchoiteanna maidir le slándáil eitlíochta chun feidhme ar an mbealach is fearr.

(3)

Le Cinneadh (AE) 2021/2147 ón gCoimisiún (3) bunaítear liosta comhdhlúite de threalamh slándála eitlíochta sibhialta formheasta ar a bhfuil an stádas marcála ‘Stampa AE’ ar threalamh a dearbhaíodh le próiseas meastóireachta comhchoiteann na Comhdhála Eorpaí um Eitlíocht Shibhialta, chun é a shuiteáil agus a úsáid ar fud an Aontais.

(4)

I gcomhréir le Rialachán Cur Chun Feidhme (AE) 2015/1998 agus go háirithe pointe 12.0.4.1 den Iarscríbhinn a ghabhann leis, nuair a fhaigheann an Coimisiún faisnéis lena léirítear nach gcomhlíonann an trealamh an caighdeán dár formheasadh é, is féidir leis an gCoimisiún stádas marcála ‘Stampa AE’ an trealaimh slándála a chur ar fionraí gan fógra a thabhairt roimh ré arna iarraidh sin do na Ballstáit nó ar a thionscnamh féin. Ní féidir trealamh slándála ar cuireadh a mharcáil ‘Stampa AE’ ar fionraí a chur in úsáid a thuilleadh agus déanfar na píosaí atá suiteáilte cheana a oibriú trí bhearta cúiteacha a chur leo, de réir mar is iomchuí.

(5)

Léirítear i bhfaisnéis theicniúil a fuair an Coimisiún, maidir le cumraíocht shonrach threalamh Córais Braite Pléascán caighdeáin C3 le haghaidh bagáiste cábáin, cumraíocht a liostaítear faoi láthair i ‘mBunachar sonraí an Aontais maidir le slándáil an tslabhra soláthair — trealamh slándála’, nach gcomhlíonann sé an fheidhmíocht is gá maidir le braiteoireacht leachtanna, aerasól agus glóthach atá sa bhagáiste. D’fhéadfaí leanúint den chumraíocht sin a oibriú i gcomhréir leis an gcoincheap le haghaidh oibríochtaí i ndáil le trealamh Córais Braite Pléascán caighdeáin C3 le haghaidh bagáiste cábáin, ach d’fhéadfaí sin a dhéanamh in éineacht le teorainn scagtha d’uastoirt coimeádán aonair leachtanna, aerasól agus glóthach nach mó ná 330 ml.

(6)

Bunachar sonraí comhdhlúite an Aontais ina liostaítear trealamh a cheadaítear a shuiteáil agus a úsáid ar fud an Aontais, ba cheart é a nuashonrú dá réir,