(1)

In Airteagal 6(1) de Rialachán (AE) Uimh. 952/2013, ceanglaítear gur trí úsáid a bhaint as teicnící leictreonacha próiseála sonraí a dhéanfar na malartuithe go léir ar fhaisnéis idir údaráis chustaim agus idir oibreoirí eacnamaíocha agus údaráis chustaim, agus an stóráil a éilítear i dtaca le faisnéis den sórt sin faoin reachtaíocht chustaim.

(2)

Déantar foráil in Airteagal 6(4) de Rialachán (AE) Uimh. 952/2013 maidir le cinntí a ghlacadh i gcásanna eisceachtúla lena gceadaítear do Bhallstát amháin nó do roinnt Ballstát maolú ó úsáid teicnící próiseála sonraí leictreonacha chun faisnéis a mhalartú agus a stóráil, má tá bonn cirt leis an maolú sin de bharr staid shonrach an Bhallstáit a bhfuil sé á iarraidh aige agus má dheonaítear é ar feadh tréimhse shonrach ama.

(3)

Le Cinneadh Cur Chun Feidhme (AE) 2019/2151 ón gCoimisiún (2) bunaítear an clár oibre maidir leis na córais leictreonacha dá bhforáiltear i gCód Custaim an Aontais a fhorbairt agus a imscaradh (“an clár oibre”). Liostaítear sa chlár oibre na córais leictreonacha atá le forbairt agus na dátaí óna meastar go mbeidh na córais sin oibríochtúil. Sonraítear sa chlár oibre cur chun feidhme agus dátaí imscartha an Chórais Rialaithe Allmhairí 2 (“ICS2”) i gcomhréir le hAirteagal 6(1), Airteagail 16, 46, 47 agus 127 go 132 de Rialachán (AE) Uimh. 952/2013.

(4)

I gcomhréir leis an gclár oibre, bhí na Ballstáit le bheith réidh ón 15 Márta 2021 chun scaoileadh 1 de ICS2 a imscaradh d’fhonn dearbhuithe iontrála achomair a bhailiú ó oibreoirí poist agus meariompróirí le haghaidh earraí a iompraítear d’aer, agus bhí siad chun an deis a thabhairt d’oibreoirí eacnamaíocha nascadh leis an gcóras agus dearbhuithe iontrála achomair a thaisceadh tríd an gcóras sin a úsáid faoin 1 Deireadh Fómhair 2021.

(5)

I gcomhréir le hAirteagal 127 de Rialachán (AE) Uimh. 952/2013 agus le hAirteagal 183(1), pointe (c) de Rialachán Cur Chun Feidhme (AE) 2015/2447 ón gCoimisiún (3), ón 1 Deireadh Fómhair 2021 ní mór d’oibreoirí poist atá bunaithe san Aontas dearbhuithe iontrála achomair a thaisceadh agus na sonraí is gá a sholáthar d’údaráis chustaim na mBallstát lena mbaineann a úsáideann ICS2.

(6)

Níl an t-oibreoir poist san Ungáir réidh go teicniúil fós, áfach, chun na ceanglais sin a chomhlíonadh. De dheasca imthoisc eisceachtúil arbh é ba chúis léi nach raibh an conraitheoir roghnaithe in ann an réiteach leictreonach ba ghá a fhorbairt, ní raibh oibreoir poist na hUngáire in ann ceangal a bhunú le ICS2 laistigh de sprioc-am an 1 Deireadh Fómhair 2021. Chinn an t-oibreoir poist conraitheoir eile a úsáid chun an nasc a fhorbairt agus tá an obair theicniúil fós ar siúl. Dá bhrí sin, níl an t-oibreoir poist fós in ann sonraí dearbhaithe iontrála achomair a chur in iúl don chóras trí úsáid a bhaint as teicnící próiseála sonraí leictreonacha.

(7)

Mar gheall ar an imthoisc eisceachtúil ba chúis le heaspa ullmhachta teicniúla oibreoir poist na hUngáire, tá údar maith leis an iarraidh maolú a fháil i gcomhréir le Rialachán (AE) Uimh. 952/2013 a chuir údarás custaim na hUngáire isteach an 21 Nollaig 2021. Dá bhrí sin, leis an maolú sin ba cheart a cheadú go sealadach don Ungáir modhanna eile seachas na teicnící próiseála sonraí leictreonacha a úsáid chun faisnéis i ndáil le hearraí i gcoinsíneachtaí poist a mhalartú agus a stóráil a bhfuil sé d’oibleagáid ar an oibreoir poist sin dearbhú iontrála achomair a thaisceadh ina leith.

(8)

Agus an Cinneadh seo á chur chun feidhme, tabharfaidh údarás custaim na hUngáire fógra don Choimisiún maidir le nasc a oibreora poist ainmnithe le ICS2.

(9)

Ba cheart fad an mhaolaithe a bheith bunaithe ar staid forbartha an chórais náisiúnta poist, rud lena gcumasaítear cumarsáid leictreonach sonraí ICS2 le haghaidh coinsíneachtaí poist a dhéanamh leis an riarachán custaim agus ar an amlíne lena thabhairt chun críche.

(10)

Ós rud é gur tháinig an oibleagáid i bhfeidhm maidir le sonraí dearbhaithe iontrála achomair a chur isteach go leictreonach le haghaidh na gcoinsíneachtaí poist uile an 1 Deireadh Fómhair 2021, ba cheart feidhm a bheith ag an gCinneadh seo ón dáta sin,