(1)

Le Treoir 2007/5/CE ón gCoimisiún (2) áiríodh foilpéad mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

Maidir leis na substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí foilpéad, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 15 Feabhra 2025.

(4)

Cuireadh iarratas faoi bhráid na hOstaire, an Ballstát is rapóirtéir, agus faoi bhráid na hIodáile, an Ballstát is comhrapóirtéir, chun formheas na substainte gníomhaí foilpéad a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) laistigh den tréimhse ama dá bhforáiltear san Airteagal sin.

(5)

Chuir an t-iarratasóir na sainchomhaid fhorlíontacha is gá faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’) i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith comhlánaithe.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 14 Márta 2018. Sa dréacht-tuarascáil uaidh maidir le measúnú ar athnuachan, mhol an Ballstát is rapóirtéir go ndéanfaí an formheas maidir le foilpéad a athnuachan.

(7)

Sheol an tÚdarás an dréacht-tuarascáil maidir le measúnú ar athnuachan chuig an iarratasóir agus chuig na Ballstáit freisin chun barúlacha a fháil uathu agus chuir sé na barúlacha a fuair sé ar aghaidh chuig an gCoimisiún. Chuir an tÚdarás an sainchomhad achomair forlíontach ar fáil don phobal freisin.

(8)

An 10 Deireadh Fómhair 2019 d’iarr an tÚdarás faisnéis bhreise ar an iarratasóir maidir le hairíonna réabtha iontálaigh foilpéid de bhun Airteagal 13(3a), an chéad fhomhír, de Rialachán Cur Chun Feidhme (AE) Uimh. 844/2012. Chuir an t-iarratasóir faisnéis isteach chun go ndéanfadh an tÚdarás measúnú ar cé acu ar comhlíonadh nó nár comhlíonadh na critéir eolaíocha le haghaidh chinneadh na n-airíonna réabtha iontálaigh a leagtar amach i bpointí 3.6.5 agus 3.8.2 d’Iarscríbhinn II a ghabhann le Rialachán (CE) Uimh. 1107/2009, mar a tugadh isteach le Rialachán (AE) 2018/605 ón gCoimisiún (6).

(9)

I mí na Bealtaine 2022 rinne an Ballstát is rapóirtéir dréacht-tuarascáil cothrom le dáta maidir le measúnú ar athnuachan a chur ar fáil don Údarás, do na Ballstáit agus don Choimisiún. Sa dréacht-tuarascáil cothrom le dáta uaidh maidir le measúnú ar athnuachan, phléigh an Ballstát is rapóirtéir an fhaisnéis bhreise maidir leis na critéir chun airíonna réabtha iontálaigh a shainaithint agus mhol sé an formheas maidir le foilpéad a athnuachan.

(10)

An 12 Iúil 2023 chuir an tÚdarás an chonclúid uaidh (7) in iúl don Choimisiún maidir le cé acu is féidir nó nach féidir coinne a bheith leis go gcomhlíonfadh foilpéad na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(11)

Chuir an Coimisiún tuarascáil athnuachana faoi bhráid an Bhuanchoiste um Plandaí, Ainmhithe, Bia agus Beatha an 20 Márta 2024, agus chuir sé dréacht den Rialachán seo faoina bhráid an 22 Bealtaine 2024.

(12)

D’iarr an Coimisiún ar an iarratasóir a bharúlacha a chur isteach maidir leis an gconclúid ón Údarás agus, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, a bharúlacha maidir leis an tuarascáil athnuachana. Chuir an t-iarratasóir a bharúlacha isteach, rinneadh scrúdú cúramach orthu agus tugadh aird chuí orthu.

(13)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach foilpéad, suíodh go gcomhlíontar na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(14)

Maidir leis an measúnú riosca maidir le formheas na substainte gníomhaí foilpéad a athnuachan, cé go bhfuil sé bunaithe ar líon teoranta úsáidí ionadaíocha, níl srian ar na húsáidí lena bhféadfar táirgí cosanta plandaí a bhfuil foilpéad iontu a údarú mar gheall ar sin. Dá bhrí sin, is iomchuí gan an srian a choinneáil ar bun maidir le húsáid a bhaint as foilpéad mar fhuingicíd.

(15)

Dá bhrí sin, is iomchuí an formheas maidir le foilpéad a athnuachan.

(16)

Mar sin féin, is gá foráil a dhéanamh maidir le coinníollacha áirithe i gcomhréir le hAirteagal 14(1) de Rialachán (CE) Uimh. 1107/2009, i gcomhar le hAirteagal 6 de, agus i bhfianaise an eolais eolaíoch agus theicniúil atá ann faoi láthair agus i bhfianaise thoradh an mheasúnaithe riosca. I bhfianaise an riosca fhíorghéir d’éisc agus d’inveirteabraigh uisceacha a sainaithníodh sa mheasúnú riosca, is iomchuí bearta maolaithe riosca íosta a cheangal chun na horgánaigh uisceacha sin a chosaint ón nochtadh d’fhoilpéad mura gcuirtear in iúl i dtorthaí an mheasúnaithe riosca ar úsáidí sonracha táirge cosanta plandaí nach bhfuil gá leis na bearta maolaithe riosca sin nó gur féidir iad a laghdú. Thairis sin, chun an measúnú ar nochtadh an tomhaltóra a thabhairt chun críche, is iomchuí go háirithe faisnéis dhaingnitheach a iarraidh chun leibhéil an aigéid thalaigh a eascraíonn ó úsáid foilpéid a chinneadh, agus leibhéil chúlra an aigéid thalaigh atá i láthair i gcruithneacht agus in eorna le linn trialacha allamuigh ar iarmhair á gcur san áireamh le haghaidh na n-úsáidí a liostaítear i bhFoscríbhinn II den tuarascáil athnuachana, agus lena n-aghaidh sin amháin.

(17)

Dá bhrí sin, ba cheart Rialachán Cur Chun Feidhme (AE) Uimh. 540/2011 a leasú dá réir sin.

(18)

Le Rialachán Cur Chun Feidhme (AE) 2023/918 ón gCoimisiún (8) cuireadh síneadh le tréimhse formheasa foilpéid go dtí an 15 Feabhra 2025 chun go bhféadfar an próiseas athnuachana a thabhairt chun críche sula rachaidh tréimhse formheasa na substainte gníomhaí sin in éag. Mar sin féin, ós rud é go ndearnadh cinneadh maidir leis an athnuachan roimh dhul in éag na tréimhse formheasa sin ar cuireadh síneadh léi, ba cheart feidhm a bheith ag an Rialachán seo tráth is luaithe ná an dáta sin.

(19)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,