(1)

Ceanglaítear ar na Ballstáit neamhrialtachtaí a bhaineann leis an gCiste Eorpach um Ráthaíocht Talmhaíochta agus leis an gCiste Eorpach Talmhaíochta um Fhorbairt Tuaithe a thuairisciú de bhun Airteagal 50(3) de Rialachán (AE) 2021/2116, agus i gcomhréir le Rialachán Tarmligthe (AE) 2024/205 ón gCoimisiún (2).

(2)

Ba cheart leasanna airgeadais an Aontais a chosaint ar an mbealach céanna, gan beann ar na cistí a úsáidtear chun na cuspóirí a bhaint amach ar bunaíodh na cistí ina leith. Chuige sin, le hAirteagal 52(2) de Rialachán (AE) 2021/2116 cumhachtaítear an Coimisiún rialacha cur chun feidhme a ghlacadh maidir leis na nósanna imeachta a bhaineann le hoibleagáidí comhair atá le comhlíonadh ag na Ballstáit maidir le cur chun feidhme oibleagáid na mBallstát neamhrialtachtaí a thuairisciú a bhaineann le maoiniú an chomhbheartais talmhaíochta. Ba cheart do na rialacha sin a bheith coibhéiseach leis na rialacha mionsonraithe maidir le tuairisciú neamhrialtachtaí a leagtar amach in Iarscríbhinn XII a ghabhann le Rialachán (AE) 2021/1060 ó Pharlaimint na hEorpa agus ón gComhairle (3), agus i gcomhréir leis na rialacha a leagtar amach i Rialachán Cur Chun Feidhme (AE) 2024/203 ón gCoimisiún (4).

(3)

Chun anailís agus bainistíocht fhoriomlán éifeachtúil a áirithiú ar chásanna neamhrialtachtaí de réir bhrí Airteagal 1(2) de Rialachán (CE, Euratom) Uimh. 2988/95 ón gComhairle (5), agus ar chásanna eile de neamh-chomhlíonadh na gcoinníollacha arna leagan amach ag na Ballstáit i bpleananna straitéiseacha an chomhbheartais talmhaíochta sa chomhthéacs sin, ba cheart do na Ballstáit an fhaisnéis ábhartha ar fad maidir leis na neamhrialtachtaí atá le tuairisciú de bhun Airteagal 50(3) de Rialachán (AE) 2021/2116 agus i gcomhréir le Rialachán Tarmligthe (AE) 2024/205 a chur faoi bhráid an Choimisiúin ar bhonn tráthrialta agus tráthúil. Chun leasanna airgeadais an Aontais a chosaint, is gá coinníollacha aonfhoirmeacha a leagan síos maidir leis an bhfaisnéis sin a chur isteach, go háirithe a minicíocht agus a formáid.

(4)

Chun an tairbhe is mó is féidir a bhaint as modhanna leictreonacha a úsáid chun faisnéis a mhalartú agus slándáil na malartuithe sin á gcaomhnú acu, ba cheart do na Ballstáit an Córas Bainistíochta Neamhrialtachta tiomnaithe (CBNR) a úsáid chun neamhrialtachtaí a fhógairt.

(5)

Ba cheart do na Ballstáit agus don Choimisiún a áirithiú go ndéanfar sonraí a aistriú trí CBNR ar bhealach slán lena gcuirtear san áireamh infhaighteacht, sláine, barántúlacht agus rúndacht na faisnéise.

(6)

Chun cuidiú le neamhrialtacht a chosc ó iarmhairtí breise a bheith aici lasmuigh de chríoch an Bhallstáit tuairiscithe, ba cheart do na Ballstáit aon neamhrialtacht den sórt sin a thuairisciú don Choimisiún gan mhoill.

(7)

Is gá an euro a úsáid mar an t-aon airgeadra amháin chun neamhrialtachtaí a thuairisciú chun inchomparáideacht na faisnéise arna tuairisciú a áirithiú. Maidir le Ballstáit nach bhfuil an euro glactha mar airgeadra acu, is gá an ráta malairte a chinneadh a bheidh le húsáid chun na méideanna lena mbaineann a chomhshó go euro, chomh maith leis an ráta malairte chun caiteachas nár cláraíodh i gcuntais na gníomhaireachta íocaíochta a chomhshó.

(8)

Ba cheart Rialachán Cur Chun Feidhme (AE) 2015/1975 ón gCoimisiún (6), lenar leagadh amach an mhinicíocht agus an fhormáid maidir le tuairisciú neamhrialtachtaí sa chlárthréimhse 2014-2020, a aisghairm. Ba cheart feidhm a bheith aige fós, áfach, maidir le tuairisciú neamhrialtachtaí i leith cúnaimh arna dheonú faoi Rialachán (AE) Uimh. 1306/2013 ó Pharlaimint na hEorpa agus ón gComhairle (7).

(9)

Ós rud é go ndearnadh íocaíochtaí cheana féin ar na cistí lena mbaineann agus ós rud é go bhféadfadh neamhrialtachtaí a bheith ann, ba cheart don Rialachán seo a bheith infheidhme láithreach. Dá bhrí sin, ba cheart dó teacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

(10)

Chuathas i gcomhairle leis an Maoirseoir Eorpach ar Chosaint Sonraí maidir leis an Rialachán seo i gcomhréir le hAirteagal 42(1) de Rialachán (AE) 2018/1725.

(11)

Tá na bearta dá bhforáiltear sa Rialachán seo i gcomhréir le tuairim an Choiste um na Cistí Talmhaíochta,