Leis an gcomhaontú osclaítear an margadh le haghaidh eitiltí díreacha do gach aerlíne de chuid an Aontais Eorpaigh (AE) agus de chuid na Seoirsia idir an tAontas Eorpach agus an tSeoirsia. Foráiltear leis creat rialála freisin agus leagtar amach leis caighdeáin i gcomhair raon leathan saincheisteanna eitlíochta lena ndéanfar dlí na Seoirsia a ailíniú de réir a chéile, amhail sábháilteacht eitlíochta, cearta slándála paisinéirí, bainistíocht aerthráchta, rialáil eacnamaíoch, saincheisteanna iomaíochta agus gnéithe sóisialta.
Le Cinneadh 2012/708/AE údaraíodh síniú agus cur i bhfeidhm sealadach an chomhaontaithe.
Tugadh an comhaontú i gcrích le Cinneadh (AE) 2020/948 thar ceann an Aontais Eorpaigh.

PRÍOMHPHOINTÍ

Clúdaítear trí phríomhréimse comhair sa chomhaontú.

Rialacha eacnamaíocha
Leagtar amach leis an gcomhaontú rialacha maidir le roinnt gnéithe den chomhar eacnamaíoch idir an tAontas Eorpach agus an tSeoirsia, lena n–áirítear:
- cearta tráchta — lena n–áirítear an ceart neamhtheoranta chun eitilt idir an tAontas Eorpach agus an tSeoirsia nó thar chríoch an pháirtí eile nó stad a dhéanamh i gcríoch an pháirtí eile chun críocha neamhthráchta;
- údaruithe — d’aeriompróirí gach páirtí chun oibriú i gcríoch an pháirtí eile;
- rialacha chun iomaíocht chóir a áirithiú agus chun gníomhaíochtaí gnó a éascú;
- rialacha maidir le muirir úsáideoirí as áiseanna agus seirbhísí aerfoirt agus eitlíochta.
Comhar rialála (sábháilteacht eitlíochta, slándáil agus bainistíocht aerthráchta)
Ní mór don dá pháirtí:
- reachtaíocht áirithe sábháilteachta AE a chomhlíonadh, mar atá liostaithe san iarscríbhinn a ghabhann leis an gcomhaontú;
- deimhnithe sábháilteacha a chéile a aithint;
- comhoibriú ar shlándáil agus oibriú i gcomhair aitheantas frithpháirteach caighdeán slándála a chéile;
- comhoibriú i mbainistíocht aerthráchta d’fhonn an tAerspás Eorpach aonair a leathnú chuig an tSeoirsia agus cloí le reachtaíocht AE maidir le bainistíocht aerthráchta, mar atá liostaithe san iarscríbhinn a ghabhann leis an gcomhaontú.
Rialacha institiúideacha (riarachán agus forfheidhmiú)
- Tá gach páirtí freagrach as rialacha an chomhaontaithe ar a chríoch a fhorfheidhmiú.
- Tá comhchoiste ar a bhfuil ionadaithe ón dá pháirtí, agus a thagann le chéile uair amháin sa bhliain ar a laghad, freagrach as an gcomhaontú a riar agus as a chur chun feidhme i gceart.
- Cuimsítear sa chomhaontú sásra réitigh díospóidí agus tuartar leis an deis do gach páirtí bearta cosanta a dhéanamh i gcás nach gcomhlíonfadh an páirtí eile a oibleagáidí.

DÁTA THEACHT I BHFEIDHM

Tháinig an comhaontú i bhfeidhm ar an 2 Lúnasa 2020.

CÚLRA

Tá sé seo ar cheann de roinnt comhaontuithe déthaobhacha lena neartaítear an caidreamh aeir idir an tAontas Eorpach agus a thíortha comharsanachta san oirthear i gcomhthéacs theachtaireacht an Choimisiúin Eorpaigh maidir le forbairt an chláir oibre do bheartas eitlíochta seachtrach an Aontais Eorpaigh.

Féach chomh maith:

Beartas eitlíochta seachtrach an Aontais Eorpaigh — ag tabhairt aghaidh ar dhúshláin sa todhchaí (An Coimisiún Eorpach)
Straitéis eitlíochta don Eoraip (An Coimisiún Eorpach)
Beartas eitlíochta seachtrach (An Coimisiún Eorpach).

PRÍOMHDHOICIMÉID

Comhaontú maidir le Comhlimistéar Eitlíochta idir an tAontas Eorpach agus a Bhallstáit, de pháirt, agus an tSeoirsia, den pháirt eile (IO L 321, 20.11.2012, lgh. 3-32)

Cinneadh 2012/708/AE ón gComhairle agus ó Ionadaithe Rialtais Bhallstáit, ag teacht le chéile dóibh laistigh den Chomhairle an 15 Deireadh Fómhair 2010 maidir le síniú agus cur i bhfeidhm sealadach an Chomhaontaithe maidir le Comhlimistéar Eitlíochta idir an tAontas Eorpach agus a Bhallstáit, de pháirt, agus an tSeoirsia, den pháirt eile (IO L 321, 20.11.2012, lgh. 1-2)

Cinneadh (AE) 2020/948 ón gComhairle an 26 Meitheamh 2020 maidir le tabhairt i gcrích, thar ceann an Aontais, an Chomhaontaithe maidir le Comhlimistéar Eitlíochta idir an tAontas Eorpach agus a Bhallstáit, de pháirt, agus an tSeoirsia, den pháirt eile (IO L 212, 3.7.2020, lgh. 3-4)