(1)

Le Rialachán (AE) 2017/625 ó Pharlaimint na hEorpa agus ón gComhairle (3), leagtar síos na rialacha maidir le rialuithe oifigiúla a dhéanamh chun, inter alia, comhlíonadh na rialacha maidir le sábháilteacht bia agus beatha a fhíorú.

(2)

Le Rialachán (AE) 2019/6 ó Pharlaimint na hEorpa agus ón gComhairle (4), leagtar síos rialacha maidir le, inter alia, táirgí íocshláinte tréidliachta a rialú agus a úsáid, le béim ar leith ar fhrithsheasmhacht in aghaidh ábhar frithmhiocróbach.

(3)

I gcomhréir le Rialachán (AE) 2019/6, áirithítear úsáid ábhar frithmhiocróbach níos stuama agus níos freagraí in ainmhithe, inter alia, trí bhíthin na dtoirmeasc ar úsáid ábhar frithmhiocróbacha chun fás a chur chun cinn agus an táirgeacht a mhéadú agus ar úsáid ábhar frithmhiocróbach arna bhforchoimeád chun cóir leighis a chur ar ionfhabhtuithe áirithe i ndaoine. Faoi Airteagal 118(1) de Rialachán (AE) 2019/6, ceanglaítear ar oibreoirí i dtríú tíortha na toirmisc sin a urramú agus ainmhithe agus táirgí de bhunadh ainmhíoch á n-onnmhairiú acu chuig an Aontas. Mar a aibhsítear in Aithris (49) den Rialachán sin, tá sé tábhachtach breithniú a dhéanamh ar an ngné idirnáisiúnta a bhaineann le frithsheasmhacht in aghaidh ábhair fhrithmhiocróbacha a fhorbairt trí bhearta neamh-idirdhealaitheacha agus comhréireacha a dhéanamh, agus oibleagáidí an Aontais faoi chomhaontuithe idirnáisiúnta á n-urramú ag an am céanna.

(4)

Le hAirteagal 118 de Rialachán (AE) 2019/6, cuirtear leis an teachtaireacht ón gCoimisiún an 29 Meitheamh 2017 dar teideal A European One Health Action Plan against antimicrobial resistance (“AMR”) [Plean Gníomhaíochta Eorpach “Aon Sláinte Amháin” i gcoinne na frithsheasmhachta in aghaidh ábhar frithmhiocróbach], trí chosc agus rialú ar an bhfrithsheasmhacht in aghaidh ábhar frithmhiocróbach a fheabhsú agus trí úsáid níos stuama agus níos freagraí a chur chun cinn i leith úsáid frithmhiocróbach in ainmhithe.

(5)

An toirmeasc ar úsáid frithmhiocróbach chun fás a chur chun cinn agus an táirgeacht a mhéadú agus an toirmeasc ar úsáid frithmhiocróbach atá le forchoimeád chun cóir leighis a chur ar ionfhabhtuithe áirithe i ndaoine, ar mhaithe le cur chun feidhme éifeachtach na dtoirmeasc sin a áirithiú, ba cheart rialuithe oifigiúla maidir lena fhíorú go gcomhlíontar Airteagal 118(1) de Rialachán (AE) 2019/6 le hainmhithe agus táirgí de bhunadh ainmhíoch a onnmhairítear chuig an Aontas, a áireamh faoi raon feidhme Rialachán (AE) 2017/625, agus arís oibleagáidí an Aontais faoi chomhaontuithe idirnáisiúnta á n-urramú ag an am céanna.

(6)

I gcomhréir le hAirteagal 18(7), pointe (g), de Rialachán (AE) 2017/625, tá an Coimisiún le rialacha sonracha a ghlacadh maidir le rialuithe oifigiúla a dhéanamh ar chritéir agus coinníollacha chun a chinneadh, i ndáil le Pectinidae, gastrapóid mhuirí agus Holothuroidea, i gcás nach bhfuil limistéir táirgthe ná athseachadta le haicmiú. Tá Holothuroidea in aicme an fhílim Eicínideirmeach. Ní ainmhithe scagbheathaithe iad eicínideirmigh de ghnáth. Dá bharr sin, is fánach an riosca go mbaileodh ainmhithe den sórt sin miocrórganaigh a bhaineann le héilliú faecach. Ina theannta sin, níor tuairiscíodh aon fhaisnéis eipidéimeolaíoch lena bhféadfaí rioscaí don tsláinte phoiblí a nascadh le heicínideirmigh nach scagbheathóirí iad. Ar an gcúis sin, ba cheart an fhéidearthacht a leagtar síos in Airteagal 18(7), pointe (g), de Rialachán (AE) 2017/625 chun maolú ón gceanglas maidir le limistéir táirgthe agus athseachadta a aicmiú a leathnú chuig na heicínideirmigh uile nach scagbheathóirí iad, mar shampla iad a bhaineann le haicme Echinoidea, agus gan a bheith teoranta do Holothuroidea, Ar an gcúis chéanna, ba cheart a shoiléiriú go bhfuil feidhm ag na coinníollacha le haghaidh limistéir aicmithe táirgthe agus athseachadta a aicmiú agus monatóireacht a dhéanamh orthu atá le leagan síos ag an gCoimisiún maidir le moilisc dhébhlaoscacha beo, eicínideirmigh bheo, túinicigh bheo agus gastrapóid mhuirí bheo, seachas na gastrapóid mhuirí agus eicínideirmigh sin nach scagbheathóirí iad. Ba cheart an téarmeolaíocht a úsáidtear in Airteagal 18(6), (7) agus (8) de Rialachán (AE) 2017/625 a ailíniú dá réir.

(7)

Eisiatar, maidir le Rialachán (CE) Uimh. 853/2004 ó Pharlaimint na hEorpa agus ón gComhairle (5), óna raon feidhme soláthar díreach cainníochtaí beaga feola ón táirgeoir ó éanlaith chlóis agus giorriaigh a mharaítear ar an bhfeirm don tomhaltóir deiridh nó do bhunaíochtaí miondíola áitiúla a sholáthraíonn feoil den sórt sin go díreach don tomhaltóir deiridh mar fheoil úr. Ó dháta chur i bhfeidhm an Rialacháin sin, eadhon an 1 Eanáir 2006, cuireadh síneadh roinnt uaireanta leis an eisiamh d’fheoil ó éanlaith chlóis agus ó ghiorraigh mar bheart idirthréimhseach. Bhí an síneadh deireanach ar an idirthréimhse, le Rialachán (AE) 2017/185 ón gCoimisiún (6), i bhfeidhm go dtí an 31 Nollaig 2020. Le linn na 15 bliana den idirthréimhse níor tugadh faoi deara aon ábhar imní suntasach maidir le sábháilteacht bia arbh iad na gníomhaíochtaí a rinneadh i gcomhréir leis an síneadh sin ba chúis leo. Ina theannta sin, i dteachtaireacht uaidh an 20 Bealtaine 2020 dar teideal “A Farm to Fork Strategy for a fair, healthy and environmentally-friendly food system” [Straitéis ón bhFeirm go dtí an Forc le haghaidh córas bia atá cothrom, sláintiúil agus neamhdhíobhálach don chomhshaol], leagann an Coimisiún béim ar a thábhachtaí atá slabhraí soláthair níos giorra d’fhonn feabhas a chur ar athléimneacht na gcóras bia réigiúnach agus áitiúil. Ba cheart, dá bhrí sin, an maolú a leathnú chuig gach feoil de bhunadh éanlaith chlóis agus giorriach ar bhonn buan. Ba cheart Rialachán (CE) Uimh. 853/2004 a leasú dá réir.

(8)

I gcomhréir le hAirteagal 47(1), pointe (e), de Rialachán (AE) 2017/625, tá na húdaráis inniúla le rialuithe oifigiúla a dhéanamh ag post rialaithe teorann an chéad teacht isteach san Aontas ar gach coinsíneacht ainmhithe agus earraí atá faoi réir, inter alia, na mbeart éigeandála dá bhforáiltear i ngníomhartha arna nglacadh i gcomhréir le hAirteagal 249 de Rialachán (AE) 2016/429 ó Pharlaimint na hEorpa agus ón gComhairle (7). Ní bhaineann Airteagal 249 de Rialachán (AE) 2016/429 le bearta éigeandála an Choimisiúin, áfach. Ba cheart an earráid sin a cheartú agus ba cheart tagairt a dhéanamh d’Airteagal 261 de Rialachán (AE) 2016/429.

(9)

Ós rud é nach féidir leis na Ballstáit cuspóir an Rialacháin seo, eadhon rialuithe oifigiúla a cheadú ar úsáid frithmhiocróbach in ainmhithe agus i dtáirgí de bhunadh ainmhíoch a thagann isteach san Aontas, a ghnóthú go leordhóthanach, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(10)

Dá bhrí sin, ba cheart Rialachán (AE) 2017/625 a leasú dá réir sin.

(11)

Ós rud é go bhfuil feidhm ag Rialachán (AE) 2019/6 ón 28 Eanáir 2022, ba cheart feidhm a bheith ag forálacha comhfhreagracha an Rialacháin seo ón dáta céanna,