(1)

Le hAirteagal 11(3) de Rialachán (AE) 2019/787 leagtar síos rialacha maidir le tuairisc, cur i láthair agus lipéadú deochanna alcólacha a fhaightear ó theaglaim de chatagóir dí biotáillí nó tásc geografach le haghaidh deoch bhiotáilleach agus táirgí eile bia. Tugtar tuairisc ar dheochanna alcólacha den sórt sin le comhthéarmaí ina gcuirtear le chéile ainm dlíthiúil dá bhforáiltear i gcatagóirí na ndeochanna biotáilleacha a leagtar amach in Iarscríbhinn I a ghabhann leis an Rialachán sin nó an tásc geografach le haghaidh deoch bhiotáilleach agus ainm táirgí eile bia.

(2)

Ní cheanglaítear le hAirteagal 11(3) de Rialachán (AE) 2019/787 go dtaispeánfar ainm na dí alcólaí a eascraíonn as sin sa réimse céanna radhairc leis an gcomhthéarma. D’fhéadfadh sé sin a chur ina luí ar thomhaltóirí gurb é an comhthéarma ainm iarbhír na dí biotáillí trí dhochar a dhéanamh go míchuí do cháil catagóirí dí biotáillí nó tásc geografach, go háirithe i gcásanna inar deoch bhiotáilleach í an deoch alcólach a eascraíonn as sin.

(3)

Ceanglaítear le pointe (a) d’Airteagal 7(1) de Rialachán (AE) Uimh. 1169/2011 ó Pharlaimint na hEorpa agus ón gComhairle (2) nach mbeidh faisnéis faoi bhia míthreorach, go háirithe maidir le cineál agus céannacht an bhia. Foráiltear le hAirteagal 9 den Rialachán sin go gcuirfear faisnéis shainordaitheach faoi bhia ar fáil, lena n-áirítear ainm an táirge bia, agus ceanglaítear le hAirteagal 13 den Rialachán sin go marcálfar faisnéis shainordaitheach in áit fheiceálach sa chaoi go mbeidh sí sofheicthe gan dua, inléite go soiléir agus, i gcás inarb iomchuí, doscriosta.

(4)

I gcomhréir le hAirteagal 9 de Rialachán (AE) 2019/787, tá feidhm ag na ceanglais maidir le cur i láthair agus lipéadú a leagtar amach i Rialachán (AE) Uimh. 1169/2011 maidir le deochanna alcólacha a eascraíonn as teaglaim de dheochanna biotáilleacha agus táirgí eile bia. Chun a áirithiú go gcomhlíonfar na ceanglais sin ar an mbealach is fearr, go háirithe maidir le deochanna biotáilleacha a eascraíonn as teaglaim den sórt sin, is iomchuí é a bheith den riachtanas go dtaispeánfar ainm dlíthiúil na dí biotáillí a eascraíonn as sin sa réimse céanna radhairc leis an gcomhthéarma lena dtugtar tuairisc ar an teaglaim sin. Ba cheart é sin a dhéanamh gach uair a léirítear an comhthéarma i dtuairisc, cur i láthair nó lipéadú dí biotáillí. Cuirfidh sé sin cosc ar chleachtais mhíthreoracha agus áiritheofar go gcuirfear tomhaltóirí ar an eolas mar is ceart maidir le cineál iarbhír na ndeochanna biotáilleacha a eascraíonn as teaglaim de dheochanna biotáilleacha agus táirgí eile bia.

(5)

Níor cheart feidhm a bheith ag an oibleagáid sin, áfach, i gcomhréir le pointe (b) d’Airteagal 10(5) de Rialachán (AE) 2019/787, nuair a chuirtear comhthéarma lena n-áirítear an téarma “licéar” nó “uachtar” in ionad ainm dlíthiúil na dí biotáillí, ar choinníoll go gcomhlíonann an táirge deiridh ceanglais chatagóir 33 d’Iarscríbhinn I a ghabhann leis an Rialachán sin.

(6)

Dá bhrí sin, ba cheart Rialachán (AE) 2019/787 a leasú dá réir.

(7)

Ba cheart idirthréimhse a chur ar fáil chun na forálacha maidir le lipéadú a leagtar síos leis an Rialachán seo a chur i bhfeidhm ionas gur féidir leanúint de ligean do dheochanna biotáilleacha a lipéadaíodh roimh an 31 Nollaig 2022, i gcomhréir le forálacha Rialachán (CE) Uimh. 110/2008 ó Pharlaimint na hEorpa agus ón gComhairle (3), a chur ar an margadh gan gá lena n-athlipéadú.

(8)

I gcomhréir le hAirteagal 51(3) de Rialachán (AE) 2019/787 agus chun folús rialála d’aon sórt a sheachaint, ba cheart feidhm chúlghabhálach a bheith ag an Rialachán seo ón 25 Bealtaine 2021,