(1)

Ar an 5 Meitheamh 2003 thug an Chomhairle údarú don Choimisiún tús a chur le caibidlíocht le tríú tíortha maidir le comhaontú ar leibhéal an Aontais a chur in ionad forálacha áirithe i gcomhaontuithe déthaobhacha atá ann cheana.

(2)

Rinne an Coimisiún, thar ceann an Aontais, Comhaontú a chaibidil idir an tAontas Eorpach agus Poblacht na Cóiré maidir le gnéithe áirithe d’aersheirbhísí (an “Comhaontú”). Tugadh an chaibidlíocht i gcrích go rathúil trí inisealú an Chomhaontaithe ar an 12 Samhain 2008.

(3)

Ar an 31 Márta 2009 ghlac an Chomhairle cinneadh maidir le síniú an Chomhaontaithe (“cinneadh 2009”). Toisc drogall a bheith ar Phoblacht na Cóiré, áfach, níor síníodh an Comhaontú.

(4)

In 2018 chuir Poblacht na Cóiré in iúl an athuair go raibh suim aici an Comhaontú a shíniú agus a thabhairt i gcrích. Ós rud é go ndearnadh roinnt comhaontuithe déthaobhacha nua maidir le haersheirbhísí idir Ballstáit agus Poblacht na Cóiré a inisealú nó a shíniú ón tráth a glacadh cinneadh 2009, rinneadh an Comhaontú a nuashonrú. Tá gá, dá bhrí sin, le cinneadh nua ón gComhairle maidir le síniú an Chomhaontaithe.

(5)

Is é is cuspóir leis an gComhaontú comhaontuithe déthaobhacha maidir le haersheirbhísí idir 22 Bhallstát agus Poblacht na Cóiré a chur i gcomhréir le dlí an Aontais.

(6)

Ba cheart an Comhaontú a shíniú,