(1)

Ó thosaigh ráig phaindéim COVID-19, d’fhág na bearta urghnácha coisctheacha agus srianta a rinne na Ballstáit – coraintín, beartais cianoibre a chur chun feidhme, agus srianta nó toirmisc ghluaiseachta agus taistil – go raibh sé dodhéanta nó fíordheacair ag comhaltaí Choiste Eacnamaíoch agus Sóisialta na hEorpa (“an Coiste”) agus ag a gcomhaltaí malartacha (dá ngairtear “na tairbhithe” i dteannta a chéile) taisteal le freastal ar chruinnithe go fisiciúil.

(2)

I bhfianaise na n-imthosca eisceachtúla sin, agus chun a ráthú go bhféadfar gníomhaíochtaí an Choiste a dhéanamh go hiomchuí agus go hinbhuanaithe gach tráth ar mhaithe leis an leanúnachas institiúideach a áirithiú, ní mór maolú sealadach a dhéanamh ar Airteagail 2, 3 agus 4 de Chinneadh 2013/471/AE ón gComhairle (1) a mhéid a bhaineann le liúntais laethúla a íoc, agus speansais taistil a aisíoc, leis na tairbhithe. Níor cheart feidhm a bheith ag an maolú seo ach ar feadh na tréimhse a mbeidh deacrachtaí leanúnacha taistil nó srianta sláintíochta i gceist i dtaca le cruinnithe fisiciúla i ngeall ar phaindéim COVID-19 san Aontas.

(3)

Is ísle na costais riaracháin iarbhír a thabhaíonn tairbhí a dhéanann cianfhreastal trí mheán leictreonach ar chruinniú ná ráta an liúntais laethúil is infheidhme faoi láthair maidir le freastal go fisiciúil ar chruinnithe, bíodh is gur mar a chéile an t-achar ama a chaitheann tairbhí ag an gcruinniú. Ós mar sin atá, is iomchuí go n-oiriúnófaí dá réir an liúntas laethúil a íoctar leis na tairbhithe a dhéanann cianfhreastal ar chruinnithe.

(4)

I gcás inarb iomchuí, ba cheart don Choiste rialacha mionsonraithe a leagan síos maidir le deonú an liúntais laethúil i gcomhair cianfhreastail. Ba cheart a shainaithint go háirithe sna rialacha sin cásanna ina gcuirtear i mbaol an fhéidearthacht cruinnithe a eagrú nó freastal orthu i ngeall ar dheacrachtaí taistil a bhaineann le COVID-19 nó ar bhearta sriantacha gaolmhara.

(5)

Ba cheart don Choiste tuarascálacha rialta a thíolacadh chuig an gComhairle maidir le cur i bhfeidhm an Chinnidh seo ionas gur féidir leis an gComhairle meastóireacht a dhéanamh ar a thionchar sin agus ar na coinníollacha atá fós ann a thugann bonn cirt don mhaolú a bheith i bhfeidhm. Ar bhonn na dtuarascálacha sin, ba cheart don Chomhairle breithniú a dhéanamh ar bhearta iomchuí a ghlacadh roimh dheireadh théarma oifige reatha an Choiste, go háirithe faoi chuimsiú athbhreithniú cuimsitheach arna dhéanamh amach anseo ar Chinneadh 2013/471/AE,