Cúrsaí dlí teaghlaigh — comhaontuithe idir tíortha AE agus neamh-AE a chaibidliú

 

ACHOIMRE AR:

Rialachán (CE) Uimh. 664/2009 lena mbunaítear nós imeachta maidir le comhaontuithe idir tíortha AE agus tíortha neamh-AE maidir le cúrsaí teaghlaigh

CAD IS AIDHM LEIS AN RIALACHÁN?

Leagtar amach ann nós imeachta docht faoi theorainn ama faoina bhfuil údarás aonair ag tíortha AE chun leasú a dhéanamh ar chomhaontuithe atá ann cheana le tíortha neamh-AE, nó comhaontuithe nua a chaibidliú ina gcumhdaítear dlínse, aithint agus forfheidhmiú breithiúnas agus cinntí i réimsí áirithe den dlí teaghlaigh, amhail freagracht tuismitheora agus oibleagáidí cothabhála. Tagann comhaontaithe dá leithéid faoi inniúlacht eisiach AE de ghnáth.

PRÍOMHPHOINTÍ

Leis an rialachán seo cumhdaítear dlínse, aithint agus forfheidhmiú breithiúnas agus cinntí maidir le:

• cúrsaí in ábhair maidir le pósadh agus le freagracht tuismitheora; mar aon le
• hoibleagáidí cothabhála

laistigh de raon feidhme Rialachán (CE) Uimh. 2201/2003 agus Rialachán (CE) Uimh. 4/2009. I rialachán gaolmhar cumhdaítear na hoibleagáidí conarthacha agus neamhchonarthacha.

Sular ghlac AE ceannas ar an inniúlacht eisiach maidir leis na réimsí sin um dhlí sibhialta, chuir na tíortha aonair AE comhaontuithe i gcrích iad féin le tíortha neamh-AE. Soláthraítear nós imeachta sa rialachán seo do thíortha AE chun comhaontuithe idirnáisiúnta a dhéanamh i gcásanna eisceachtúla.

Níl feidhm ag an rialachán má tá comhaontú curtha i gcrích cheana ag AE leis na tíortha lena mbaineann ar an ábhar céanna.

Fógra: i gcás go bhfuil sé beartaithe ag tír AE dul isteach i gcaibidlí chun comhaontú atá ann cheana a leasú nó comhaontú nua a thagann faoi raon feidhme an rialacháin a thabhairt i gcrích, ní mór di fógra a thabhairt don Choimisiún Eorpach i scríbhinn maidir lena rún a luaithe is féidir roimh oscailt bheartaithe caibidlí foirmiúla.

Rúndacht: ní mór don Choimisiún déileáil leis an bhfaisnéis a chuireann tír AE ar fáil mar fhaisnéis rúnda, má iarrtar é sin.

Measúnú

Ní mór don Choimisiún an méid seo a leanas a dhéanamh:

• a sheiceáil nach bhfuil comhaontú ar leibhéal AE leis an tír neamh-AE lena mbaineann beartaithe cheana laistigh den 24 mhí ina dhiaidh sin;
• mura bhfuil, a fhíorú go bhfuil leas sonrach na tíre AE ann don chomhaontú agus nach mbainfí an bonn ó éifeachtúlacht dhlí AE agus ó aidhm agus ó chuspóir bheartas caidrimh sheachtraigh AE leis an gcomhaontú beartaithe; agus
• más gá, tuilleadh faisnéise a iarraidh.

Údarú na gcaibidlí

Má chomhlíontar na coinníollacha, tugann an Coimisiún údarú don tír AE chun caibidlí foirmiúla maidir leis an gcomhaontú a oscailt. Féadfaidh an Coimisiún treoirlínte caibidlíochta chomh maith le cuimsiú na gclásal sonrach sa chomhaontú beartaithe a bheartú.

Rannpháirtíocht

Féadfaidh an Coimisiún páirt a ghlacadh mar bhreathnóir sna caibidlí, agus seachas sin ba cheart é a choinneáil ar an eolas faoin dul chun cinn agus faoi na torthaí.

Clásail sa chomhaontú

I gcás go bhfuil sé údaraithe, ní mór an méid seo a leanas a shainiú sa chomhaontú in aon chás:

• go dtiocfaidh deireadh go hiomlán nó i bpáirt leis an gcomhaontú i gcás comhaontaithe ina dhiaidh sin idir AE agus an tír neamh-AE chéanna ar an ábhar céanna; agus
• go gcuirfear comhaontú ina dhiaidh sin idir AE agus an tír neamh-AE maidir leis an ábhar céanna go díreach in ionad chlásail ábhartha an chomhaontaithe.

Údarú um thabhairt i gcrích

Sular síneofar an comhaontú, ní mór don tír AE toradh na gcaibidlí a chur in iúl agus téacs an chomhaontaithe a chur faoi bhráid an Choimisiúin, chun tabhairt i gcrích a údarú i ndiaidh dó a fhíorú gur comhlíonadh na coinníollacha.

Diúltú

Leagtar amach sa rialachán an nós imeachta maidir le diúltú an Choimisiúin agus iarmhairtí dhiúltú an Choimisiúin do chaibidlí maidir le tabhairt i gcrích an chomhaontaithe a údarú.

Athbhreithniú

Tráth nach déanaí ná an 7 Iúil 2017, ní mór don Choimisiún tuarascáil maidir le cur i bhfeidhm an rialacháin a chur faoi bráid Pharlaimint na hEorpa, na Comhairle agus Choiste Eacnamaíoch agus Sóisialta na hEorpa. Maidir leis an tuarascáil, ní mór:

• a dhearbhú inti go bhfuil sé oiriúnach go n–éagfaidh an rialachán seo ar an dáta atá socraithe i gcomhréir leis na téarmaí thíos; nó
• a mholadh inti nach mór rialachán nua a chur in ionad an rialacháin seo ón dáta sin i leith.

Éag

Éagann an rialachán 3 bliana i ndiaidh don Choimisiún an tuarascáil dá dtagraítear thuas a chur isteach. Féadfar leanúint le caibidlíocht ar bith a bheadh ar siúl ar an dáta sin, áfach.

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 20 Lúnasa 2009 i leith.

PRÍOMHDHOICIMÉAD

Rialachán (CE) Uimh. 664/2009 ón gComhairle an 7 Iúil 2009 lena mbunaítear nós imeachta maidir le comhaontuithe idir Ballstáit agus tríú tíortha a chaibidliú agus a thabhairt i gcrích a bhaineann le dlínse, aithint agus forfheidhmiú breithiúnas agus cinntí in ábhair a bhaineann le cúrsaí pósta, freagrachtaí tuismitheoirí agus oibleagáidí cothabhála, agus an dlí is infheidhme in ábhair a bhaineann le hoibleagáidí cothabhála (IO L 200, 31.7.2009, lgh. 46-51)

Rinneadh leasuithe comhleanúnacha ar Rialachán (CE) Uimh. 664/2009 a chorprú sa bhuntéacs. Níl sa leagan comhdhlúite sin ach luach doiciméadach amháin.

DOICIMÉID GHAOLMHARA

Rialachán (CE) Uimh. 662/2009 ó Pharlaimint na hEorpa agus ón gComhairle an 13 Iúil 2009 lena mbunaítear nós imeachta maidir le comhaontuithe idir Ballstáit agus tríú tíortha a chaibidliú agus a thabhairt i gcrích ar ábhair áirithe a bhaineann leis an dlí is infheidhme ar oibleagáidí conarthacha agus neamhchonarthacha (IO L 200, 31.7.2009, lgh. 25-30)

Féach leagan comhdhlúite.

Rialachán (CE) Uimh. 4/2009 ón gComhairle an 18 Nollaig 2008 maidir le dlínse, leis an dlí is infheidhme, le haithint agus forghníomhú cinntí agus le comhar in ábhair a bhaineann le hoibleagáidí cothabhála (IO L 7, 10.1.2009, lgh. 1-79)

Féach leagan comhdhlúite.

Rialachán (CE) Uimh. 2201/2003 ón gComhairle an 27 Samhain 2003 maidir le dlínse agus maidir le haithint agus forghníomhú breithiúnas in ábhair maidir le pósadh agus le freagracht tuismitheora, lena n–aisghairtear Rialachán (CE) Uimh. 1347/2000 (IO L 338, 23.12.2003, lgh. 1-29)

Féach leagan comhdhlúite.

Nuashonraithe 06.12.2017