52012DC0603

2010/0197 (COD)

TEACHTAIREACHT ÓN gCOIMISIÚN CHUIG PARLAIMINT NA hEORPA de bhun Airteagal 294(6) den Chonradh ar Fheidhmiú an Aontais Eorpaigh maidir leis

an seasamh ón gComhairle maidir le glacadh Rialacháin ó Pharlaimint na hEorpa agus ón gComhairle lena mbunaítear socruithe idirthréimhseacha le haghaidh comhaontuithe déthaobhacha infheistíochta idir Ballstáit agus tríú tíortha

1.           Cúlra

An dáta a seoladh an togra chuig Parlaimint na hEorpa agus chuig an gComhairle (doiciméad COM(2010)344final – 2010/0197 COD): || 7/07/2010

Dáta an tseasaimh ó Pharlaimint na hEorpa, an chéad léamh: || 10/05/2011

An dáta a glacadh seasamh na Comhairle || 4/10/2012

2.           Cuspóir an togra ón gCoimisiún

Le Conradh Liospóin tugadh inniúlacht eisiach don Aontas maidir le hinfheistíocht dhíreach choigríche, mar chuid den chomhbheartas tráchtála. I gcomhréir le hAirteagal 2 den Chonradh ar Fheidhmiú an Aontais Eorpaigh (CFAE), i réimse ina bhfuil inniúlacht eisiach tugtha don Aontas is é an tAontas amháin a fhéadfaidh reachtú agus gníomhartha a ghlacadh a bheidh ceangailteach ó thaobh dlí. In éagmais córais idirthréimhsigh shonraigh sa CFAE lena soiléirítear stádas chomhaontuithe déthaobhacha infheistíochta na mBallstát, féachann an togra ón gCoimisiún le haghaidh Rialacháin le deimhneacht dhlíthiúil a bhunú d'infheisteoirí a thairbhíonn de na comhaontuithe sin, trí údarú a thabhairt na comhaontuithe infheistíochta ar fad arna síniú idir Ballstáit agus tríú tíortha leanúint de bheith ann, agus le sásra a chruthú lena dtabharfar de chumhacht do na Ballstáit – faoi choinníollacha áirithe – comhaontuithe den sórt sin a chaibidliú agus a thabhairt i gcrích sa todhchaí.

3.           Tráchtaí maidir leis an seasamh ón gComhairle

Léiríonn seasamh na Comhairle arna ghlacadh ag an gcéad léamh an comhaontú ar thángthas air sna pléití trípháirteacha idir an Chomhairle, Parlaimint na hEorpa agus an Coimisiún, a tugadh i gcrích an 29 Bealtaine 2012. Is iad seo a leanas príomhphointí an chomhaontaithe sin:

– soiléiriú a dhéanamh ar an stádas, faoi dhlí an Aontais, atá ag comhaontuithe déthaobhacha infheistíochta na mBallstát a síníodh roimh theacht i bhfeidhm Chonradh Liospóin, trína dhearbhú go bhféadfar na comhaontuithe sin a choinneáil i bhfeidhm (nó go bhféadfaidh siad teacht i bhfeidhm) go dtí go gcuirfear comhaontú infheistíochta de chuid an Aontais ina n‑ionad;

– na coinníollacha a bhunú faoina bhféadfar a thabhairt de chumhacht do na Ballstáit comhaontuithe déthaobhacha infheistíochta, arna síniú idir teacht i bhfeidhm Chonradh Liospóin agus teacht i bhfeidhm an Rialacháin seo, a thabhairt i gcrích agus/nó a choinneáil i bhfeidhm;

– cuíchóiriú a dhéanamh ar na coinníollacha agus na nósanna imeachta faoina bhféadfar a thabhairt de chumhacht do na Ballstáit comhaontuithe déthaobhacha infheistíochta a leasú nó a thabhairt i gcrích le tríú tíortha tar éis theacht i bhfeidhm an Rialacháin;

– féachaint chuige, i gcás ina gcoinnítear comhaontuithe infheistíochta na mBallstát i bhfeidhm nó ina n‑údaraítear caibidlíochtaí a thosú nó comhaontuithe déthaobhacha infheistíochta a thabhairt i gcrích le tríú tíortha, nach gcuirfidh sin cosc ar an Aontas comhaontuithe infheistíochta a chaibidliú nó a thabhairt i gcrích sa todhchaí;

– cumhachtaí cur chun feidhme a thabhairt don Choimisiún – d'fhonn an Rialachán a chur i bhfeidhm – i gcomhréir le Rialachán (AE) Uimh. 182/2011, agus an nós imeachta comhairleach a chur i bhfeidhm maidir le glacadh cinntí údarúcháin de bhun an Rialacháin.

Thacaigh an Coimisiún go hiomlán leis an gcomhaontú ar thángthas air sna pléití trípháirteacha.

4.           Dearbhuithe

Ghlac an Coimisiún leis an dearbhú comhpháirteach ón gComhairle, ón bParlaimint agus ón gCoimisiún agus d’aontaigh sé leis nár cheart úsáid an nós imeachta coiste sa Rialachán a bheith ina fasach ag gníomhartha sa todhchaí maidir le cumhachtaí a thabhairt do na Ballstáit faoi inniúlachtaí eisiacha an AE, agus nár cheart roghnú an nós imeachta comhairleach a bheith ina fasach ag gníomhartha cur chun feidhme sa todhchaí faoin gComhbheartas Tráchtála.

5.           Conclúid

Glacann an Coimisiún leis an seasamh ón gComhairle.