(1)

I gcomhréir le hAirteagal 12 de Threoir 2014/34/AE ó Pharlaimint na hEorpa agus ón gComhairle (2), táirgí atá i gcomhréir le caighdeáin chomhchuibhithe nó le codanna de chaighdeáin chomhchuibhithe, caighdeáin ar foilsíodh na tagairtí dóibh in Iris Oifigiúil an Aontais Eorpaigh, glactar leis gur táirgí iad atá i gcomhréir leis na ceanglais fhíor-riachtanacha sláinte agus sábháilteachta a leagtar amach in Iarscríbhinn II a ghabhann leis an Treoir sin, ar ceanglais fhíor-riachtanacha iad a chumhdaítear leis na caighdeáin sin nó leis na codanna díobh.

(2)

Le Cinneadh Cur Chun Feidhme C(2023) 4798 ón gCoimisiún (3), d’iarr an Coimisiún ar an gCoiste Eorpach um Chaighdeánú (CEN) agus ar Choiste Eorpach na gCaighdeán Leictriteicniúil (Cenelec) caighdeáin chomhchuibhithe a dhréachtú agus a athbhreithniú chun tacú le Treoir (AE) 2014/34 (an ‘iarraidh’). Na caighdeáin chomhchuibhithe a iarradh, bhí siad chun aghaidh a thabhairt ar na ceanglais fhíor-riachtanacha a leagtar amach in Airteagal 4 de Threoir 2014/34/AE agus in Iarscríbhinn II a ghabhann leis an Treoir sin.

(3)

Ar bhonn na hiarrata, rinne CEN athbhreithniú ar an gcaighdeán comhchuibhithe seo a leanas, caighdeán ar foilsíodh an tagairt dó le Cinneadh Cur Chun Feidhme (AE) 2022/1668 ón gCoimisiún (4): EN 13852-1:2013 – Craenacha uile-chuspóra amach ón gcósta Is é an toradh a bhí air sin gur glacadh caighdeán comhchuibhithe EN 13852-1:2025 – Craenacha uile-chuspóra amach ón gcósta.

(4)

Rinne an Coimisiún measúnú i gcomhar le CEN féachaint an gcomhlíonann caighdeán EN 13852-1:2025 an iarraidh.

(5)

Comhlíonann caighdeán EN 13852-1:2025 na ceanglais is aidhm dó a chumhdach, ceanglais a leagtar amach in Iarscríbhinn II a ghabhann le Treoir 2014/34/AE. Dá bhrí sin, is iomchuí an tagairt don chaighdeán sin a fhoilsiú in Iris Oifigiúil an Aontais Eorpaigh.

(6)

Cuirtear ar fáil le Cinneadh Cur Chun Feidhme (AE) 2022/1668, in Iarscríbhinn I a ghabhann leis, na tagairtí do na caighdeáin chomhchuibhithe lena dtugtar le fios go nglactar leis go bhfuil comhréir ann le Treoir 2014/34/AE. Chun a áirithiú gur in aon ghníomh amháin a liostófar na tagairtí do chaighdeáin chomhchuibhithe a dréachtaíodh chun tacú le Treoir 2014/34/AE, ba cheart an tagairt do chaighdeán comhchuibhithe EN 13852-1:2025 a chuimsiú san Iarscríbhinn sin.

(7)

Is gá an tagairt do chaighdeán comhchuibhithe EN 13852-1:2013 a tharraingt siar as sraith L d’Iris Oifigiúil an Aontais Eorpaigh ós rud é gur athbhreithníodh é. Is iomchuí, dá bhrí sin, an tagairt sin a scriosadh as Iarscríbhinn I a ghabhann le Cinneadh Cur Chun Feidhme (AE) 2022/1668.

(8)

Chun a ndóthain ama a thabhairt do mhonaróirí ullmhú le haghaidh caighdeán EN 13852-1:2025 a chur i bhfeidhm, is gá tarraingt siar na tagartha do chaighdeán EN 13852-1:2013 a chur siar.

(9)

Dá bhrí sin, ba cheart Cinneadh Cur Chun Feidhme (AE) 2022/1668 a leasú dá réir sin.

(10)

Ón dáta a fhoilsítear an tagairt do chaighdeán comhchuibhithe in Iris Oifigiúil an Aontais Eorpaigh, is rud é comhlíonadh an chaighdeáin sin a fhágann go nglactar leis go bhfuil comhréir ann leis na ceanglais fhíor-riachtanacha chomhfhreagracha a leagtar amach i reachtaíocht chomhchuibhithe an Aontais. Dá bhrí sin, ba cheart an Cinneadh seo a theacht i bhfeidhm ar dháta a fhoilsithe,