(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le húdarú ullmhóide d’ion-1,4-béite-xiolanáis, ion-1,4-béite-ghlúcanáis agus ion-béite-1,4-glúcanáis xileaglúcan-sonrach arna táirgeadh le Trichoderma citrinoviride DSM 33578. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú ullmhóide d’ion-1,4-béite-xiolanáis, ion-1,4-béite-ghlúcanáis agus ion-béite-1,4-glúcanáis xileaglúcan-sonrach arna táirgeadh le Trichoderma citrinoviride DSM 33578 mar bhreiseán beathaithe le haghaidh béaróg nó cearca goir, bainbh (scoite agus diúil) agus Suidae lena ramhrú, agus iarrtar ann go n-aicmeofaí an breiseán sin sa chatagóir ‘breiseáin zóiteicniúla’ agus san fheidhmghrúpa ‘feabhsaitheoirí díleáiteachta’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 23 Samhain 2022 (2) agus an 1 Feabhra 2024 (3) go bhfuil an ullmhóid d’ion-1,4-béite-xiolanáis, ion-1,4-béite-ghlúcanáis agus in-béite-1,4-glúcanáis xileaglúcan-sonrach arna táirgeadh le Trichoderma citrinoviride DSM 33578 sábháilte don spriocspeiceas, do thomhaltóirí agus don chomhshaol faoi na coinníollacha úsáide atá beartaithe. Tháinig an tÚdarás ar an gconclúid freisin nach greannaitheoir craicinn ná súl í an ullmhóid san fhoirmliú gránaithe ach ba cheart a mheas gur íogróir craicinn atá inti. Thairis sin, tháinig sé ar an gconclúid go meastar nach greannaitheoir craicinn ná súl é foirmliú leachtach na hullmhóide, agus nach íogróir craicinn atá ann. Mar sin féin, meastar gur íogróirí riospráide iad an dá fhoirmliú den ullmhóid. Tar éis don iarratasóir measúnú a dhéanamh ar na sonraí a cuireadh isteach le déanaí, tháinig an tÚdarás ar an gconclúid sa tuairim uaidh an 6 Bealtaine 2025 (4) go bhféadfadh an ullmhóid a bheith éifeachtúil i ngach speiceas éanlaithe clóis agus mucúil ar an leibhéal úsáide atá beartaithe, is é sin 1 500 EPU, 100 CU agus 100 XGU/kg de bheatha. Níor mheas sé go raibh gá le ceanglais shonracha maidir le faireachán iarmhargaidh.

(5)

Maidir leis na conclúidí agus na moltaí ar ar thángthas i measúnú roimhe seo i ndáil le hiarratas eile ar údarú an bhreiseáin chéanna, conclúidí agus moltaí a d’fhíoraigh an tÚdarás sa tuairim uaidh an 23 Samhain 2022, mheas an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. I gcomhréir le hAirteagal 5(4), pointe (a), de Rialachán (CE) Uimh. 378/2005 ón gCoimisiún (5), ní raibh gá le tuarascáil mheastóireachta ón tSaotharlann Tagartha dá bhrí sin..

(6)

I bhfianaise an mhéid thuas, measann an Coimisiún go gcomhlíonann an ullmhóid d’ion-1,4-béite-xiolanáis, ion-1,4-béite-ghlúcanáis agus ion-béite-1,4-glúcanáis xileaglúcan-sonrach arna táirgeadh le Trichoderma citrinoviride DSM 33578 na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh éanlaith chlóis seachas éanlaith chlóis lena ramhrú, éanlaith chlóis a thógtar le bheith ina mbéaróga agus a thógtar le haghaidh pórúcháin agus speicis mhucúla seachas cránacha de gach speiceas Suidae. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,