(1)

De bhun Airteagal 22(3), pointe (d)(viii) de Rialachán (AE) 2021/1060, maidir le gach clár a fhaigheann tacaíocht ó Chiste Forbraíochta Réigiúnaí na hEorpa (CFRE), ó Chiste Sóisialta na hEorpa Plus (CSE+), ón gCiste Comhtháthaithe agus ón gCiste um Aistriú Cóir (CUAC), tá siad leis na cineálacha idirghabhála a leagan amach le haghaidh gach cuspóra shonraigh a áirítear sa chlár. Déantar é sin chun é a chur ar a gcumas do na Ballstáit faisnéis chomhsheasmhach a chur faoi bhráid an Choimisiúin maidir le húsáid chlársceidealaithe, leithdháileadh carnach agus caiteachas carnach na gCistí sin de réir an chineáil idirghabhála agus líon na n-oibríochtaí le linn na clárthréimhse. Is é is cuspóir leis sin a chur ar a chumas don Choimisiún institiúidí eile an Aontais agus saoránaigh an Aontais a chur ar an eolas ar bhealach iomchuí faoi úsáid na gCistí.

(2)

I gcomhréir le hAirteagal 22(5) de Rialachán (AE) 2021/1060, leagtar amach in Iarscríbhinn I a ghabhann leis an Rialachán sin an ainmníocht le haghaidh na gcineálacha idirghabhála arna ndéanamh ag CFRE, CSE+, ag an gCiste Comhtháthaithe agus ag CUAC.

(3)

Le Rialachán (AE) 2025/1914 ó Pharlaimint na hEorpa agus ón gComhairle (2) tugadh isteach cuspóirí sonracha breise maidir le tacaíocht ó CFRE, ón gCiste Comhtháthaithe agus ó CUAC.

(4)

Leis na cuspóirí sonracha nua a tugadh isteach le Rialachán (AE) 2025/1914 cumhdaítear infheistíochtaí arb é is aidhm dóibh borradh a chur faoi iomaíochas, neamhspleáchas straitéiseach, comhtháthú críochach agus sóisialta, athléimneacht agus ullmhacht an Aontais. Go sonrach, leis na cuspóirí sonracha nua, tugtar an deis tacú le hinfheistíochtaí lena bhfeabhsaítear cumais dé-úsáide agus chosanta an Aontais chun aghaidh a thabhairt ar dhúshláin gheopholaitiúla agus chomh maith leis sin tacú le hinfheistíochtaí in idirnascairí fuinnimh agus i gcosaint an bhonneagair chriticiúil fuinnimh, agus é d’aidhm aige sin athléimneacht agus ullmhacht an Aontais a mhéadú i gcás aon teagmhais dhíobhálacha a d’fhéadfadh a bheith ann, idir theagmhais a bhaineann leis an aeráid agus teagmhais nach mbaineann leis an aeráid.

(5)

Mar thoradh ar na cuspóirí sonracha nua a cuireadh isteach agus chun é a chur ar a gcumas do na Ballstáit faisnéis chomhsheasmhach a chur faoi bhráid an Choimisiúin maidir le húsáid chlársceidealaithe na gCistí faoi na cuspóirí sonracha nua sin, tá liosta na gcineálacha idirghabhála atá ann cheana le comhlánú le líon teoranta de réimsí idirghabhála ábhartha breise.

(6)

Dá bhrí sin, ba cheart Iarscríbhinn I a ghabhann le Rialachán (AE) 2021/1060 a leasú dá réir sin,