(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

Le Rialachán Cur Chun Feidhme (AE) Uimh. 2020/149 ón gCoimisiún (2), údaraíodh ullmhóid arb é atá inti Saccharomyces cerevisiae CNCM I-1077 ar feadh tréimhse 10 mbliana mar bhreiseán beathaithe le haghaidh uan agus capall.

(3)

I gcomhréir le hAirteagal 7 de Rialachán (CE) Uimh. 1831/2003 cuireadh isteach iarratas maidir le húdarú ullmhóide arb é atá inti Saccharomyces cerevisiae CNCM I-1077. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(4)

Baineann an t-iarratas le húdarú na hullmhóide arb é atá inti Saccharomyces cerevisiae CNCM I-1077 mar bhreiseán beathaithe le haghaidh athchogantach (seachas uain) agus ainmhithe de chineál camaill a thógtar le haghaidh táirgeadh bainne nó a thógtar le haghaidh atáirgthe, athchogantaigh óga lena ramhrú seachas laonna agus uain, laonna de chineál camaill lena ramhrú, agus eachainmhithe seachas capaill, iarratas inar iarradh go n-aicmeofaí an breiseán sin sa chatagóir ‘breiseáin zóiteicniúla’ agus sna feidhmghrúpaí ‘feabhsaitheoirí díleáiteachta’ agus ‘cobhsaitheoirí fhlóra na stéige’.

(5)

I gcomhréir le hAirteagal 13(3) de Rialachán (CE) Uimh. 1831/2003, cuireadh isteach iarratas chun modhnú a dhéanamh ar théarmaí údaraithe na hullmhóide arb é atá inti Saccharomyces cerevisiae CNCM I-1077 a leagtar síos i Rialachán Cur Chun Feidhme (AE) 2020/149 a mhéid a bhaineann lena húsáid le haghaidh uan. Bhain an t-iarratas sin le hiarraidh ar íosleibhéal cuimsithe i mbeatha le haghaidh uan a ísliú ó 3 × 109 go 1 × 109 ADC/kg d’ábhar beatha iomlán ina bhfuil cion taise 12 %.

(6)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 15 Deireadh Fómhair 2024 (3) go bhfuil an ullmhóid arb á atá inti Saccharomyces cerevisiae CNCM I-1077 sábháilte don spriocspeiceas, do thomhaltóirí agus don chomhshaol faoi na coinníollacha úsáide atá beartaithe. Tháinig an tÚdarás ar an gconclúid freisin maidir leis an ullmhóid arb é atá inti Saccharomyces cerevisiae CNCM I-1077, sa dá fhoirmliú, gur cheart a mheas gur íogróir craicinn agus riospráide í agus go meastar gur riosca é aon nochtadh tríd an gcraiceann nó tríd an gconair riospráide. Ní greannaitheoir craicinn ná súl í foirm neamhbhrataithe an bhreiseáin. De bharr easpa sonraí ní féidir teacht ar chonclúid maidir leis an ngreannú súl a d’fhéadfadh foirm bhrataithe an bhreiseáin a dhéanamh. Tháinig an tÚdarás ar an gconclúid thairis sin go bhféadfadh an ullmhóid arb é atá inti Saccharomyces cerevisiae CNCM I-1077 a bheith éifeachtúil i ngach athchogantach agus gach ainmhí de chineál camaill a thógtar le haghaidh táirgeadh bainne nó le haghaidh diúil nó le haghaidh atáirgeadh ag íosleibhéal úsáide beartaithe 5 × 108 ADC/kg d’ábhar beatha iomlán, i ngach mionspeiceas athchogantach (óg) agus gach mionspeiceas de chineál camaill lena ramhrú agus in uain ag 1 × 109 ADC/kg d’ábhar beatha iomlán, agus i ngach speiceas eachainmhithe seachas capaill ag 3 × 109 ADC/kg d’ábhar beatha iomlán. Níor mheas sé go bhfuil gá le ceanglais shonracha maidir le faireachán iarmhargaidh.

(7)

I gcomhréir le hAirteagal 5(4), pointe (a), de Rialachán (CE) Uimh. 378/2005 ón gCoimisiún (4), mheas an tSaotharlann Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí ar ar thángthas i measúnú roimhe seo i ndáil leis an mbreiseán céanna bailí agus infheidhme maidir leis an iarratas atá ann faoi láthair.

(8)

I bhfianaise an mhéid thuas, measann an Coimisiún go gcomhlíonann an ullmhóid arb é atá inti Saccharomyces cerevisiae CNCM I-1077 na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá bhrí sin, ba cheart úsáid na ullmhóide sin a údarú le haghaidh athchogantach (seachas uain) agus ainmhithe de chineál camaill a thógtar le haghaidh táirgeadh bainne nó a thógtar le haghaidh atáirgthe, athchogantaigh óga lena ramhrú seachas laonna agus uain, laonna de chineál camaill lena ramhrú, agus eachainmhithe seachas capaill. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(9)

Ina theannta sin, i bhfianaise an mhéid thuas, measann an Coimisiún go gcomhlíonann údarú na hullmhóide arb é atá inti Saccharomyces cerevisiae CNCM I-1077 fós na coinníollacha dá bhforáiltear in Airteagal 5 de Rialachán (CE) Uimh. 1831/2003 agus na téarmaí sin maidir le húdarú á modhnú a mhéid a bhaineanna lena húsáid le haghaidh uan, tríd an íoschion breiseáin a laghdú go 1 × 109 ADC/kg d’ábhar beatha iomlán. Dá bhrí sin, ba cheart Rialachán Cur Chun Feidhme (AE) 2020/149 a leasú dá réir sin.

(10)

Ós rud é nach gá na modhnuithe ar choinníollacha údaraithe na hullmhóide arb é atá inti Saccharomyces cerevisiae CNCM I-1077 le haghaidh uan a chur i bhfeidhm láithreach ar chúiseanna sábháilteachta, is iomchuí foráil a dhéanamh maidir le hidirthréimhse le haghaidh páirtithe leasmhara ionas gur féidir leo iad féin a ullmhú chun na ceanglais nua a eascraíonn as modhnú an údaraithe lena mbaineann a chomhlíonadh.

(11)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,