(1)

Is galar víreasach tógálach é an bholgach caorach agus an bholgach gabhar a bhíonn ar ainmhithe den chineál caorach agus den chineál gabhair agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar aistriú coinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

I gcás ráig den bholgach caorach agus den bholgach gabhar in ainmhithe den chineál caorach nó den chineál gabhair, tá riosca tromchúiseach ann go leathfadh an galar sin go bunaíochtaí eile ainmhithe den chineál gabhair nó den chineál caorach.

(3)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c), de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, foráiltear le hAirteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar de chatagóir A, lena n-áirítear an bholgach caorach agus an bholgach gabhar, agus maidir le bearta áirithe a bheidh le cur i bhfeidhm ann. Ina theannta sin, foráiltear le hAirteagal 21(1) den Rialachán Tarmligthe sin go gcuimseofar leis an gcrios srianta crios cosanta, crios faireachais, agus, más gá, criosanna srianta breise timpeall na gcriosanna cosanta agus faireachais nó cóngarach dóibh.

(4)

Glacadh Cinneadh Cur Chun Feidhme (AE) 2024/2778 ón gCoimisiún (4) faoi chuimsiú Rialachán (AE) 2016/429 agus leagtar síos leis bearta éigeandála eatramhacha áirithe a bhaineann le hionfhabhtú leis an mbolgach caorach agus leis an mbolgach gabhar sa Bhulgáir.

(5)

Go sonrach, maidir leis na criosanna cosanta, criosanna faireachais agus criosanna srianta breise atá le bunú ag an mBallstát, tar éis ráig d’ionfhabhtú leis an mbolgach caorach agus leis an mbolgach gabhar, i gcomhréir le Rialachán Tarmligthe (AE) 2020/687, foráiltear le Cinneadh Cur Chun Feidhme (AE) 2024/2778 go gcuimseoidh na criosanna sin ar a laghad na limistéir a liostaítear san Iarscríbhinn a ghabhann leis an gCinneadh Cur Chun Feidhme sin.

(6)

Ó bhí dáta glactha Chinneadh Cur Chun Feidhme (AE) 2024/2778 ann, thug an Bhulgáir fógra don Choimisiún faoi ráig eile den bholgach caorach agus den bholgach gabhar i mbunaíocht ina gcoimeádtar ainmhithe den chineál caorach agus/nó den chineál gabhair, bunaíocht atá lonnaithe in aonad réigiúnach Haskovo.

(7)

Dá bhrí sin, na limistéir a liostaítear mar chriosanna cosanta, criosanna faireachais agus criosanna srianta breise sa Bhulgáir san Iarscríbhinn a ghabhann le Cinneadh Cur Chun Feidhme (AE) 2024/2778, ba cheart iad a choigeartú a thuilleadh, ó thaobh spáis agus/nó ama de, chun leathadh breise an ghalair sa Bhulgáir agus sa chuid eile den Aontas a chosc.

(8)

Ba cheart méid na gcriosanna cosanta agus faireachais, méid na gcriosanna srianta breise agus fad na mbeart atá le cur i bhfeidhm sna criosanna sin a bheith bunaithe ar na critéir a leagtar amach in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687, lena n-áirítear an staid eipidéimeolaíoch a mhéid a bhaineann leis an mbolgach caorach agus leis an mbolgach gabhar sna limistéir atá buailte ag an ngalar sin, agus staid eipidéimeolaíoch fhoriomlán na bolgaí caorach agus na bolgaí gabhar sa Bhallstát lena mbaineann an galar sin, mar aon leis an leibhéal riosca maidir le leathadh breise an ghalair. Ba cheart caighdeáin idirnáisiúnta an Chód um Shláinte na nAinmhithe Talún ón Eagraíocht Dhomhanda um Shláinte Ainmhithe a chur san áireamh freisin agus fad na mbeart á chinneadh.

(9)

I ngeall ar dhéine agus phráinn na staide agus chun teorainn a chur le leathadh an ghalair láithreach tar éis don ghalar teacht chun cinn arís sa Bhulgáir, is gá a áirithiú nach n-aistreofar ainmhithe ó na criosanna cosanta, na criosanna faireachais agus na criosanna srianta breise go cinn scríbe atá lasmuigh d’imlíne sheachtrach na gcriosanna srianta breise uile, agus go ndéanfar deonú maoluithe a d’fhéadfadh a bheith ann ar an toirmeasc ar aistriú ainmhithe a eisiamh mar a fhoráiltear i Rialachán Tarmligthe (AE) 2020/687, ar feadh tréimhse áirithe ama, chun leathadh fad-achair an ghalair a chosc. Chun leathadh an ghalair chuig limistéir na mBallstát a chosc, tá sé tábhachtach nach n-aistreofar aon ainmhí ó na criosanna srianta.

(10)

Dá bhrí sin, ba cheart an Cinneadh seo a chur in ionad Chinneadh Cur Chun Feidhme (AE) 2024/2778.

(11)

Agus an staid eipidéimeolaíoch atá ann faoi láthair san Aontas a mhéid a bhaineann leis an mbolgach caorach agus leis an mbolgach gabhar á cur san áireamh, ba cheart feidhm a bheith ag an gCinneadh seo go dtí an 31 Eanáir 2025.

(12)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha.

(a)

go mbunóidh údarás inniúil an Bhallstáit sin láithreach criosanna srianta, lena gcuimseofar criosanna cosanta, criosanna faireachais agus criosanna srianta breise, i gcomhréir le hAirteagal 21 de Rialachán Tarmligthe (AE) 2020/687 agus faoi na coinníollacha a leagtar síos san Airteagal sin;

(b)

go gcuimseofar leis na criosanna cosanta, criosanna faireachais agus criosanna srianta breise dá dtagraítear i bpointe (a) ar a laghad na limistéir a liostaítear san Iarscríbhinn a ghabhann leis an gCinneadh seo;

(c)

maidir leis na bearta is gá a chur i bhfeidhm sna criosanna cosanta, sna criosanna faireachais agus sna criosanna srianta breise, go gcuirfear i bhfeidhm iad ar a laghad go dtí na dátaí a liostaítear san Iarscríbhinn a ghabhann leis an gCinneadh seo.