(1)

De bhun Airteagal 5a(1) agus (2) de Rialachán (CE) Uimh. 767/2008, an liosta de dhoiciméid taistil a thugann teideal don sealbhóir na teorainneacha seachtracha a thrasnú agus ar doiciméid iad a fhéadfar a fhormhuiniú le víosa, mar a leagtar amach i gCinneadh Uimh. 1105/2011/AE ó Pharlaimint na hEorpa agus ón gComhairle (2) (an ‘liosta de dhoiciméid taistil’), in éineacht leis an bhfógra faoi na doiciméid taistil atá liostaithe a bheith aitheanta nó gan a bheith aitheanta (an ‘tábla de dhoiciméid taistil’), táthar lena gcomhtháthú i gCóras Faisnéise Víosaí (VIS).

(2)

De bhun na forála céanna tá VIS leis an bhfeidhmiúlacht a chur ar fáil chun bainistiú lárnach a dhéanamh ar an tábla d’fhógraí faoi na doiciméid taistil atá liostaithe a bheith aitheanta nó gan a bheith aitheanta de bhun Airteagal 4 de Chinneadh Uimh. 1105/2011/AE.

(3)

Ceadú an liosta de dhoiciméid taistil, i gcomhar leis na fógraí faoi na doiciméid taistil atá liostaithe a bheith aitheanta nó gan a bheith aitheanta, is gné éigeantach den nós imeachta um víosaí gearrfhanachta a scrúdú é sin. Le ceadú den sórt sin trí VIS, beifear in ann aitheantas dhoiciméad taistil an iarratasóra a fhíorú go huathoibríoch.

(4)

I gcomhréir le hAirteagal 1(3) de Chinneadh Uimh. 1105/2011/AE, tá na Ballstáit fós inniúil ar dhoiciméid taistil a aithint chun víosa a eisiúint agus chun a cheadú don sealbhóir na teorainneacha seachtracha a thrasnú.

(5)

De bhun Airteagal 5 de Chinneadh Uimh. 1105/2011/AE, tá an Coimisiún le bheith freagrach fós as an liosta de dhoiciméid taistil a thabhairt cothrom le dáta. Tá na Ballstáit le bheith freagrach fós as fógra a thabhairt faoin seasamh atá acu maidir le haitheantas a thabhairt do na doiciméid sin nó gan é a thabhairt. Dá bhrí sin, is gá é a chur ar a gcumas do na Ballstáit fógra a thabhairt faoin seasamh nua atá acu maidir leis an stádas aitheantais atá ag doiciméid taistil roghnaithe agus an seasamh sin a thabhairt cothrom le dáta go díreach, sin agus eagar a chur ar an tábla d’fhógraí faoi na doiciméid taistil atá liostaithe a bheith aitheanta nó gan a bheith aitheanta, mar a comhtháthaíodh in VIS, ar tábla é ba cheart a bheith ar fáil do na Ballstáit trí fhoilseachán leictreonach a thugtar cothrom le dáta go tráthrialta dá réir sin.

(6)

Chun an Coimisiún a thabhairt cothrom le dáta maidir le haon fhógra ó na Ballstáit faoin tábla de dhoiciméid taistil, ba cheart do Ghníomhaireacht an Aontais Eorpaigh chun Bainistiú Oibríochtúil a dhéanamh ar Chórais Mhórscála TF sa Limistéar Saoirse, Slándála agus Ceartais (eu-LISA) an tábla de dhoiciméid taistil a asbhaint ó VIS agus é a chur ar fáil don Choimisiún i bhformáid leictreonach.

(7)

Tríd an liosta de dhoiciméid taistil agus na fógraí faoi na doiciméid taistil atá liostaithe a bheith aitheanta nó gan a bheith aitheanta a chomhtháthú in VIS, áiritheofar, tar éis na comhaid iarratais a uathphróiseáil i gcomhréir le hAirteagal 9a de Rialachán (CE) Uimh 767/2008, go mbeidh toradh ann go huathoibríoch in VIS maidir le stádas aitheantais an doiciméid taistil, rud a fhágann go n-éascófar an scrúdú a dhéanfaí ar iarratas [agus an cinneadh a dhéanfar ina leith]. Cuirfear feabhas ar an nós imeachta víosa mar seachnófar an cás go n-eiseodh Ballstát víosa aonfhoirmeach gearrfhanachta le haghaidh doiciméad taistil nach bhfuil aitheanta agus go mbeadh castacht ann do thaistealaí atá ag teacht isteach i mBallstát eile nach n-aithníonn an doiciméad taistil i gceist dá réir sin.

(8)

Éascófar an obair sna consalachtaí nó sna húdaráis lárnacha agus sna húdaráis teorann mar léireofar go huathoibríoch é ar an leibhéal lárnach má tá doiciméad taistil roghnaithe aitheanta, neamhaitheanta nó má tá feidhm ag coinníollacha a bhaineann leis an aitheantas, tar éis comhaid iarratais a uathphróiseáil trí VIS.

(9)

Chun an scrúdú a dhéanfadh údaráis rialaithe teorann agus an fhoireann chonsalachta a éascú, ba cheart do eu-LISA agus don Ghníomhaireacht Eorpach um an nGarda Teorann agus Cósta nasc a bhunú idir an tábla d’fhógraí faoi na doiciméid taistil atá liostaithe a bheith aitheanta nó gan a bheith aitheanta, mar a comhtháthaíodh in VIS, agus an córas nua do Dhoiciméid Bhréagacha agus Doiciméid Bharántúla ar Líne (FADO) arna bhunú le Rialachán (AE) 2020/493 ó Pharlaimint na hEorpa agus ón gComhairle (3), nuair a bheidh sé i bhfeidhm agus nuair a bheidh íomhánna agus faisnéis eile faoi dhoiciméid bhréagacha agus doiciméid bharántúla ann. Níor cheart sonraí pearsanta oibríochtúla a phróiseáil i gcóras FADO.

(10)

Ós rud é go gcuireann Rialachán (AE) 2021/1134 ó Pharlaimint na hEorpa agus ón gComhairle (4) le acquis Schengen, i gcomhréir le hAirteagal 4 de Phrótacal Uimh. 22 maidir le Seasamh na Danmhairge, prótacal atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, thug an Danmhairg fógra faoi chur chun feidhme Rialachán (AE) 2021/1134 ina dlí náisiúnta. Dá bhrí sin, tá an Cinneadh seo ina cheangal ar an Danmhairg.

(11)

Is é atá sa Chinneadh seo forbairt ar fhorálacha acquis Schengen nach bhfuil Éire rannpháirteach iontu (5). Dá bhrí sin, níl Éire rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(12)

Maidir leis an Íoslainn agus leis an Iorua, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá thír sin le acquis (6) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe B, de Chinneadh 1999/437/CE ón gComhairle (7).

(13)

Maidir leis an Eilvéis, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis (8) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe B de Chinneadh 1999/437/CE arna léamh i gcomhar le hAirteagal 3 de Chinneadh 2008/146/CE ón gComhairle (9).

(14)

Maidir le Lichtinstéin, is é atá sa Chinneadh seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis (10) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe B de Chinneadh 1999/437/CE arna léamh i gcomhar le hAirteagal 3 de Chinneadh 2011/350/AE ón gComhairle (11).

(15)

Is é atá sa Chinneadh seo gníomh atá ag cur le acquis Schengen nó atá gaolmhar leis ar dhóigh eile, de réir bhrí Airteagal 3(2) d’Ionstraim Aontachais 2003 agus Airteagal 4(2) d’Ionstraim Aontachais 2005 faoi seach.

(16)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (12) agus thug sé tuairim uaidh an 9 Márta 2022.

(17)

Tá na bearta dá bhforáiltear sa Chinneadh seo i gcomhréir leis an tuairim ón gCoiste um Theorainneacha Cliste,