(1)

Is bunchloch de chuid an Aontais é an margadh inmheánach. Ó bunaíodh é, tá sé tar éis cur go mór leis an bhfás, leis an iomaíochas agus leis an bhfostaíocht agus ba cheart dó leanúint de bheith ag dul chun tairbhe go cothrom do na saoránaigh agus na gnólachtaí ar fad. Leis an margadh inmheánach, cuireadh deiseanna nua agus barainneachtaí scála nua ar fáil do ghnólachtaí an Aontais, go háirithe micrifhiontair agus fiontair bheaga agus mheánmhéide (FBManna), agus neartaíodh a n-iomaíochas tionsclaíoch. Leis an margadh inmheánach, cabhraíodh poist a chruthú agus ba mhó, dá bharr, an rogha de tháirgí agus seirbhísí ardcháilíochta ar phraghsanna ní b’ísle a cuireadh ar fáil. Leanann an margadh inmheánach de bheith ina spreagadh chun margadh níos comhtháite agus geilleagar níos láidre, níos cothroime agus níos córa a chur ar bun. Is ceann de mhóréachtaí an Aontais é agus is é an tsócmhainn is láidre atá aige i ngeilleagar atá níos domhandaithe anois ná riamh, chomh maith le bheith ar cheann de na croímhíreanna chun an t-aistriú glas agus an t-aistriú digiteach chuig geilleagar inbhuanaithe a bhaint amach, ina fhreagairt freisin ar bhrú méadaitheach na hathraithe aeráide.

(2)

Ní mór don mhargadh inmheánach oiriúnú, ar bhonn leanúnach, do thimpeallacht na réabhlóide digití agus an domhandaithe atá ag athrú go tapa. I ngeall ar ré nua na nuálaíochta digití, leantar de dheiseanna a chur ar fáil do ghnólachtaí agus do dhaoine aonair agus cruthaítear táirgí, seirbhísí agus próisis nua, samhlacha nua gnó agus deiseanna le haghaidh táirgeadh éifeachtúil de staidreamh ardcháilíochta. Ar an gcuma chéanna, is dúshlán an ré nua sin ó thaobh rialála, forfheidhmithe, cosaint tomhaltóirí agus sábháilteachta.

(3)

Tá corpas substaintiúil de dlí an Aontais ina bhonn agus ina thaca ó thaobh fheidhmiú an mhargaidh inmheánaigh. Baineann sé, go háirithe, leis an iomaíochas, leis an gcaighdeánú, leis an aitheantas frithpháirteach, leis an measúnú comhréireachta, le cosaint tomhaltóirí agus le faireachas margaidh. Cuimsítear leis freisin rialacha maidir le gnó, trádáil agus idirbhearta airgeadais, maidir le réimse na bplandaí, na n-ainmhithe, an bhia agus na beatha, le táirgeadh an staidrimh Eorpaigh agus le hiomaíocht chóir a chur chun cinn. Leis an gcorpas substaintiúil de dhlí an Aontais, déantar foráil do chothrom na Féinne atá ríthábhachtach d’fheidhmiú an mhargaidh inmheánaigh chun tairbhe na dtomhaltóirí agus na ngnólachtaí.

(4)

Mar sin féin, is ann fós do bhacainní idirdhealaitheacha díréireacha gan údar cuí ar fheidhmiú an mhargaidh inmheánaigh agus tá constaicí nua ag teacht chun cinn. Níl i nglacadh rialacha ach an chéad chéim, agus tá sé chomh tábhachtach céanna iad a chur ag feidhmiú. Le dúshláin reatha a bhaineann le forfheidhmiú na rialacha atá ann cheana, na bacainní ar shaorghluaiseacht earraí agus seirbhísí, agus leibhéil ísle an tsoláthair phoiblí trasteorann, cuirtear teorainn leis na deiseanna do ghnólachtaí agus do thomhaltóirí. Sa deireadh, baineann aghaidh a thabhairt ar bhacainní den sórt sin leis an iontaoibh atá ag saoránaigh san Aontas, mar aon lena chumas beart a dhéanamh de réir a bhriathair agus lena chumas poist agus fás a chruthú agus, san am céanna, leas an phobail a chosaint.

(5)

Roimhe seo, bhí ann do chláir gníomhaíochta de chuid an Aontais in earnáil an iomaíochais i dtaca le fiontair, go háirithe FBManna, cosaint tomhaltóirí, custaiméirí agus úsáideoirí deiridh i seirbhísí airgeadais, ceapadh beartais i seirbhísí airgeadais agus i réimse na bplandaí, na n-ainmhithe, an bhia agus na beatha. Maoiníodh go díreach roinnt gníomhaíochtaí breise faoi línte buiséid an mhargaidh inmheánaigh. Is gá anois sineirgí idir na gníomhaíochtaí éagsúla a chuíchóiriú agus a shaothrú agus creat níos solúbtha, níos trédhearcaí, níos simplithe agus níos lúfaire a sholáthar chun gníomhaíochtaí a mhaoiniú arb é is aidhm dóibh margadh inmheánach dea-fheidhmiúil inbhuanaithe a bhaint amach. Dá bhrí sin, ba cheart clár nua a bhunú lena dtugtar le chéile gníomhaíochtaí a maoiníodh roimhe seo faoi na cláir eile sin agus faoi línte ábhartha eile buiséid. Chomh maith leis sin, ba cheart tionscnaimh nua a áireamh sa chlár sin arb é is aidhm dóibh feidhmiú an mhargaidh inmheánaigh a fheabhsú agus dúbláil le cláir ghaolmhara agus le gníomhaíochtaí gaolmhara de chuid an Aontais á seachaint ag an am céanna.

(6)

Bhí forbairt, táirgeadh agus scaipeadh staidrimh Eorpaigh de bhun Rialachán (CE) Uimh. 223/2009 ó Pharlaimint na hEorpa agus ón gComhairle (4) faoi réir Clár Staidrimh Eorpach ar leith arna bhunú le Rialachán (AE) Uimh. 99/2013 ó Pharlaimint na hEorpa agus ón gComhairle (5). Chun leanúnachas a sholáthar maidir leis an staidreamh Eorpach a tháirgeadh agus a scaipeadh, ba cheart a áireamh sa chlár nua freisin gníomhaíochtaí arna gcumhdach ag an gClár Staidrimh Eorpach roimhe seo trí chreat a chur ar fáil chun staidreamh Eorpach a fhorbairt, a tháirgeadh agus a scaipeadh, de bhun Rialachán (CE) Uimh. 223/2009. Leis an gclár nua, ba cheart an creat airgeadais don staidreamh Eorpach a chur ar bun chun staidreamh Eorpach ardcháilíochta, inchomparáide agus iontaofa a sholáthar chun tacú le beartais uile an Aontais a cheapadh agus a chur chun feidhme chomh maith le faireachán agus meastóireacht a dhéanamh orthu. Meastar gur réamhriachtanas é neamhspleáchas gairmiúil d’fhorbairt, táirgeadh agus scaipeadh staidrimh Eorpaigh.

(7)

Is iomchuí, dá bhrí sin, clár a bhunú chun feabhas a chur ar fheidhmiú an mhargaidh inmheánaigh, ar iomaíochas agus inbhuanaitheacht fiontar, go háirithe FBManna, ar chaighdeánú, faireachas margaidh agus cosaint tomhaltóirí, ar réimse na bplandaí, na n-ainmhithe, an bhia agus na beatha, agus ar staidreamh Eorpach (Clár an Mhargaidh Aonair) (‘an Clár’). Ba cheart an Clár a bhunú ar feadh tréimhse seacht mbliana chun a fhad a ailíniú le fad an chreata airgeadais ilbhliantúil do na bliana 2021 go 2027 a leagtar síos i Rialachán (AE, Euratom) 2020/2093 (6) ón gComhairle.

(8)

Leis an gClár, ba cheart tacú le reachtaíocht de chuid an Aontais mar bhonn taca do dhea-fheidhmiú an mhargaidh inmheánaigh, a cheapadh, a chur chun feidhme agus a fhorfheidhmiú. Leis an gClár, ba cheart tacú le coinníollacha cearta a chruthú chun gníomhaithe uile an mhargaidh inmheánaigh a chumhachtú, lena n-áirítear gnólachtaí, saoránaigh, lena n-áirítear tomhaltóirí agus fostaithe, ionadaithe na sochaí sibhialta agus údaráis phoiblí. Chuige sin, ba cheart é a bheith mar aidhm ag an gClár iomaíochas, fothú acmhainneachta agus inbhuanaitheacht fiontar a chothú, go háirithe FBManna, lena n-áirítear na cinn a bhíonn ag feidhmiú in earnáil na turasóireachta. Tá inbhuanaitheacht fiontar tábhachtach chun a n-iomaíochas fadtéarmach a choimeád agus cuidíonn sí leis an aistriú chuig Aontas a bheidh níos inbhuanaithe ó thaobh an gheilleagair, an chomhshaoil agus na sochaí de, agus ba cheart di a bheith fite fuaite le digitiú agus le rannpháirtíocht i gcleachtais ghnó inbhuanaithe. Leis an gClár, ba cheart tacú le forfheidhmiú rialacha cosanta agus sábháilteachta tomhaltóirí freisin. Ba cheart leis freisin an fheasacht a mhéadú i ndáil le gnólachtaí agus daoine aonair maidir lena gcearta trí na huirlisí cearta, an fhaisnéis agus an cúnamh iomchuí a sholáthar dóibh chun cinntí eolasacha a dhéanamh agus chun a rannpháirtíocht i bpróiseas ceaptha beartas an Aontais a neartú. Anuas air sin, ba cheart é a bheith mar aidhm ag an gClár comhar rialála agus riaracháin a fheabhsú, go háirithe trí bhíthin cláir oiliúna, an dea-chleachtais a mhalartú agus cur leis an mbonn eolais agus leis an mbonn inniúlachtaí, lena n-áirítear an úsáid a bhaintear as soláthar poiblí straitéiseach. Ba cheart freisin é a bheith mar aidhm ag an gClár tacú le caighdeáin agus ceapadh rialacha ardcháilíochta de chuid an Aontais agus idirnáisiúnta a fhorbairt, lena n-áirítear trí rannpháirtíocht leathan geallsealbhóirí, a bheadh ina mbonn taca chun reachtaíocht an Aontais a chur chun feidhme.

Leis sin, ba cheart réimse an tuairiscithe airgeadais agus iniúchóireachta a chumhdach agus, ar an dóigh sin, cur le trédhearcacht agus dea-fheidhmiú mhargaí caipitil an Aontais agus cosaint infheisteoirí a fheabhsú. Ba cheart é a bheith mar chuspóir an Chláir freisin tacú le cur chun feidhme agus forfheidhmiú reachtaíocht an Aontais chun foráil a dhéanamh le leibhéal ard sláinte do dhaoine, d’ainmhithe agus do phlandaí, le cosaint ar mhaithe le dea-bhail na ndaoine agus leas na n-ainmhithe, sábháilteacht bia agus beatha a chosaint agus ag an am céanna prionsabail na forbartha inbhuanaithe a urramú agus ardleibhéal cosanta a áirithiú do thomhaltóirí. Thairis sin, leis an gClár, ba cheart tacú le táirgeadh staidrimh Eorpaigh ardcháilíochta i gcomhréir leis na prionsabail staidrimh a leagtar amach i Rialachán (CE) Uimh. 223/2009 agus a léirmhíníodh tuilleadh i gCód Cleachtais an Staidrimh Eorpaigh.

(9)

Cuireann margadh inmheánach úrnua atá bunaithe ar phrionsabail na cothroime, na trédhearcachta agus na hiontaoibhe frithpháirtí an iomaíocht chun cinn agus téann sé chun tairbhe do thomhaltóirí, gnólachtaí agus fostaithe. De thoradh úsáid níos fearr a bhaint as an margadh inmheánach do sheirbhísí, ar margadh é a bhíonn de shíor ag forbairt, ba cheart go dtabharfaí cúnamh do ghnólachtaí an Aontais poist a chruthú agus fás thar theorainneacha, rogha níos leithne seirbhísí a sholáthar ar phraghsanna níos ísle, agus caighdeáin arda a choimeád do thomhaltóirí agus fostaithe. Chun é sin a bhaint amach, ba cheart, leis an gClár rannchuidiú le faireachán níos fearr a dhéanamh ar fhorbairtí sa mhargadh inmheánach, chomh maith le bacainní idirdhealaitheacha, gan údar nó díréireacha atá fós ann a shainaithint agus a bhaint, agus a áirithiú gur féidir leis an gcreat rialála freastal ar gach cineál nuálaíochta, lena n-áirítear forbairtí agus próisis teicneolaíochta nua, samhlacha gnó na nuálaíochta seirbhíse, samhlacha an gheilleagair chomhoibríoch agus shóisialta, nuálaíocht shóisialta agus nuálaíocht neamhtheicneolaíoch.

(10)

Baineadh constaicí rialála roimh tháirgí tionsclaíocha sa mhargadh inmheánach trí shásraí coiscthe, trí rialacha comhchoiteanna a ghlacadh agus, i gcás nach bhfuil rialacha den sórt sin ag an Aontas, trí bhíthin phrionsabail an aitheantais fhrithpháirtigh. I réimsí nach ann do reachtaíocht de chuid an Aontais, tá feidhm ag prionsabal an aitheantais fhrithpháirtigh, agus mar thoradh air sin tá ceart saorghluaiseachta ag earraí atá ar an margadh go dleathach i mBallstát amháin agus is féidir iad a dhíol i mBallstát eile. I gcás ina bhfuil forais ag an mBallstát lena mbaineann chun cur i gcoinne mhargú na n-earraí, féadfaidh sé srian a fhorchur, ar choinníoll nach bhfuil srian den sórt sin neamh-idirdhealaitheach, go bhfuil údar maith leis an srian sin le cuspóirí dlisteanacha leas an phobail, mar a leagtar amach in Airteagal 36 de Chonradh ar Fheidhmiú an Aontais Eorpaigh (CFAE) nó mar atá aitheanta le cásdlí Chúirt Bhreithiúnais an Aontais Eorpaigh mar chúis sháraitheach leasa phoiblí, agus go bhfuil sé i gcomhréir leis an aidhm atá á saothrú. Más rud é nach ndéantar prionsabal an aitheantais fhrithpháirtigh a chur i bhfeidhm go leormhaith, mar shampla trí shrianta gan údar nó srianta díréireacha a fhorchur, is deacra a bhíonn sé do chuideachtaí rochtain a bheith acu ar mhargaí i mBallstáit eile. D’ainneoin leibhéal ard an chomhtháthaithe margaidh i réimse na n-earraí, cailltear deiseanna sa gheilleagar i gcoitinne mar gheall air. Le glacadh Rialachán (AE) Uimh. 2019/515 ó Pharlaimint na hEorpa agus ón gComhairle (7), táthar ag súil go gcuirfear borradh faoi na tairbhí eacnamaíocha sa réimse sin. Ba cheart é a bheith mar aidhm ag an gClár, dá bhrí sin, feabhas a chur ar chur i bhfeidhm phrionsabal an aitheantais fhrithpháirtigh i réimse na n-earraí, lena chumas iomlán a bhaint amach. Ba cheart é a bheith mar aidhm ag an gClár freisin líon na n-earraí neamhdhleathacha agus neamhchomhlíontacha atá ag teacht isteach sa mhargadh a laghdú trí fheasacht a mhúscailt agus oiliúint spriocdhírithe a chur ar fáil, tacú le Pointí Teagmhála do Tháirgí, dá dtagraítear i Rialachán (AE) 2019/515 agus comhar níos fearr i measc údaráis inniúla le haghaidh aitheantas frithpháirteach.

(11)

Baineann dúshláin nua ó thaobh rialála agus forfheidhmithe de le timpeallacht na réabhlóide digití atá ag athrú go tapa agus le saincheisteanna amhail an cibearshlándáil, cosaint sonraí agus príobháideachas, idirlíon na rudaí nithiúla nó an intleacht shaorga agus caighdeáin eiticiúla ghaolmhara. Ní mór rialacha dochta maidir le sábháilteacht táirgí agus soiléireacht maidir le dliteanas a bheith ann chun a áirithiú go bhféadfaidh shaoránaigh an Aontais, tomhaltóirí agus gnólachtaí san áireamh, tairbhe a bhaint as cosaint iomchuí i gcás díobhála. Leis an gClár, mar sin, ba cheart rannchuidiú le córas de chuid an Aontais maidir le dliteanas i leith táirgí a ghlacadh go tapa agus a fhorfheidhmiú ar bhealach níos fearr, ar córas é lena gcothaítear an nuálaíocht agus sábháilteacht agus slándáil úsáideoirí á áirithiú ag an am céanna.

(12)

Agus táirgí nach bhfuil i gcomhréir le dlí an Aontais, lena n-áirítear táirgí a allmhairítear ó thríú tíortha, á gcur ar an margadh, cuirtear saoránaigh an Aontais, lena n-áirítear tomhaltóirí, chomh maith le húsáideoirí deiridh eile, i mbaol. Oibreoirí eacnamaíocha a dhíolann táirgí comhlíontacha ar mhodhanna traidisiúnta nó leictreonacha, bíonn orthu aghaidh a thabhairt ar iomaíocht shaofa uathu siúd nach gcomhlíonann na rialacha de bharr easpa eolais, d’aon ghnó chun buntáiste iomaíoch a fháil nó mar thoradh ar ilroinnt an fhaireachais margaidh ar fud an Aontais. Is minic nach gcuirtear go leor airgid ar fáil d’údaráis um fhaireachas margaidh agus go mbíonn siad srianta le teorainneacha náisiúnta ach, ina choinne sin, bíonn fiontraithe ag trádáil ar leibhéal an Aontais nó, fiú ar an leibhéal domhanda. Ó thaobh na ríomhthráchtála de, go háirithe, is rí-dheacair do na húdaráis um fhaireachas margaidh rianú a dhéanamh ar earraí neamh-chomhlíontacha a allmhairítear ó thríú tíortha agus na hoibreoirí eacnamaíocha atá freagrach astu laistigh dá ndlínse a shainaithint.

Is mór na deacrachtaí a bhíonn acu freisin measúnuithe riosca agus tástálacha a dhéanamh de dheasca easpa rochtana fisiciúla ar tháirgí. Dá bhrí sin, leis an gClár, ba cheart féachaint le comhlíonadh táirgí a neartú trí fheasacht a mhéadú i dtaobh rialacha infheidhme an Aontais maidir le sábháilteacht táirgí, trí sheiceálacha ar chomhlíonadh a threisiú i gcomhréir le Rialachán (AE) 2019/1020 ó Pharlaimint na hEorpa agus ón gComhairle (8) agus trí chomhar trasteorann níos dlúithe a chur chun cinn i measc na n-údarás forfheidhmiúcháin. Ina theannta sin, leis an gClár, ba cheart rannchuidiú leis an gcreat atá ann faoi láthair maidir le gníomhaíochtaí faireachais margaidh a chomhdhlúthú, gníomhaíochtaí comhpháirteacha ag údaráis faireachais margaidh ó Bhallstáit éagsúla a spreagadh, malartú faisnéise a fheabhsú agus gníomhaíochtaí faireachais margaidh a chóineasú agus a chomhtháthú ar bhealach níos dlúithe a chur chun cinn. Leis an gClár, ba cheart é sin a dhéanamh go háirithe trína áirithiú go gcuirfear i bhfeidhm go docht na ceanglais nua a tugadh isteach le Rialachán (AE) 2019/1020 chun cosc a chur ar dhíol táirgí neamhchomhlíontacha le tomhaltóirí, chomh maith le húsáideoirí deiridh eile. Dá bhrí sin, leis an gClár, ba cheart cumas na n-údarás faireachais margaidh a neartú ar fud an Aontais, rannchuidiú le haonchineálacht níos mó i bhforfheidhmiú rialacha idir Bhallstáit, agus a chur ar chumas na mBallstát tairbhe chomhionann a bhaint as an margadh inmheánach ó thaobh fás eacnamaíoch agus inbhuanaitheacht de.

(13)

Cé nach gcuimsítear sa Chlár cuspóirí agus gníomhaíochtaí a thacaíonn le cearta maoine intleachtúla a chosaint, mar sin féin, ba cheart a choimeád i gcuimhne nach gcomhlíonann táirgí góchumtha na ceanglais a leagtar amach i reachtaíocht an Aontais maidir le sábháilteacht táirgí agus cosaint tomhaltóirí go minic, agus go mbaineann baol leo do shláinte agus do shábháilteacht tomhaltóirí, go háirithe nuair a cheannaítear táirgí den sórt sin ar líne. Dá bhrí sin, ba cheart leis an gClár sineirgí le cláir eile de chuid an Aontais a mhéadú i réimse na gclár um chearta maoine intleachtúla a chosaint, go háirithe an Ionstraim um Threalamh Rialaithe Custaim arna bunú faoi Rialachán ó Pharlaimint na hEorpa agus ón gComhairle lena mbunaítear, mar chuid den Chiste um Bainistiú Comhtháite Teorainneacha, an ionstraim le haghaidh tacaíocht airgeadais do threalamh rialaithe custaim.

(14)

Chun comhlíonadh catagóirí táirgí comhchuibhithe a mbaineann riosca bunúsach níos airde leo a éascú, chuir an tAontas ar bun córas creidiúnaithe do chomhlachtaí measúnaithe comhréireachta, lena bhfíoraítear go bhfuil siad inniúil, neamhchlaonta agus neamhspleách. Tá sé riachtanach go bhfuil na comhlachtaí measúnaithe comhréireachta iontaofa agus inniúil, ós rud é go bhfíoraíonn siad an gcomhlíonann táirgí na ceanglais sábháilteachta sula gcuirtear na táirgí sin ar an margadh. Is é an dúshlán is mó atá ann anois a áirithiú go leanann an córas creidiúnaithe de bheith ar an teicneolaíocht is úrnua agus go gcuirtear i bhfeidhm é leis an dúthracht chéanna ar fud an Aontais. Dá bhrí sin, leis an gClár, ba cheart tacú le bearta chun a áirithiú go leanann comhlachtaí measúnaithe comhréireachta dá gceanglais rialála a chomhlíonadh, mar shampla neamhchlaontacht agus neamhspleáchas, go háirithe trí chreidiúnú a úsáid. Ar an dóigh chéanna, leis an gClár, ba cheart tacú freisin le bearta chun feabhas a chur ar an gcóras creidiúnaithe Eorpaigh, go háirithe i réimsí nua beartais, trí thacaíocht a thabhairt don chomhar Eorpach um chreidiúnú dá dtagraítear i Rialachán (CE) Uimh. 765/2008 ó Pharlaimint na hEorpa agus ón gComhairle (9).

(15)

Ós rud é, leis an bhforbairt ar sheirbhísí trádála agus taistil ar líne, nach ann do theorainneacha i gcás margaí tomhaltóirí, tá sé tábhachtach a áirithiú gur féidir le tomhaltóirí atá ag cur fúthu san Aontas tairbhe a bhaint as an ardleibhéal céanna cosanta nuair a bhíonn earraí agus seirbhísí á n-allmhairiú ó oibreoirí eacnamaíocha atá lonnaithe i dtríú tíortha, lena n-áirítear nuair a bhíonn siad á ndíol ar líne. Leis an gClár, ba cheart, dá bhrí sin, é a bheith indéanta, i gcás inar gá, tacú le comhar le comhlachtaí ábhartha atá lonnaithe i dtríú tíortha, mar shampla, maidir le malartú faisnéise faoi tháirgí neamhchomhlíontacha.

(16)

Baineann údaráis phoiblí úsáid as soláthar poiblí chun a áirithiú go bhfaighfear luach mar is ceart ar an airgead poiblí a chaitear agus chun rannchuidiú le go mbeidh an margadh inmheánach níos nuálaí, níos inbhuanaithe, níos cuimsithí agus níos iomaíche. Áirítear leis sin critéir mheastóireachta a chur i bhfeidhm lena sainítear ní hamháin an tairiscint is fearr praghas, ach an tairiscint is buntáistí ó thaobh fhiúntas an luacha phoiblí de nuair a bheidh tairiscintí á roghnú de réir an chóimheasa ‘praghas-cáilíochta’. I gcás ina mbeidh sé sin i gcomhréir le dlí an Aontais is infheidhme, ba cheart gnéithe comhshaoil, cóirthrádála agus sóisialta a chur san áireamh agus ba cheart tairiscintí a roinnt ina mbaisceanna arna gcur chun cinn le haghaidh mórthionscadal bonneagair. Le Treoireacha 2014/23/AE (10), 2014/24/AE (11) agus 2014/25/AE (12) ó Pharlaimint na hEorpa agus ón gComhairle, cuirtear ar fáil an creat dlíthiúil maidir le comhtháthú agus feidhmiú éifeachtach na margaí soláthair phoiblí arb iad 14 % d’olltáirgeacht intíre an Aontais iad, rud a théann chun sochair d’údaráis phoiblí, gnólachtaí agus saoránaigh, tomhaltóirí san áireamh. Is uirlis ríthábhachtach iad rialacha soláthair phoiblí arna gcur chun feidhme i gceart chun an margadh inmheánach a neartú agus chun borradh a chur faoi fhás cuideachtaí san Aontas agus faoi phoist san Aontas. Leis an gClár, mar sin, ba cheart tacú le bearta arb é is aidhm dóibh a áirithiú go mbainfí úsáid níos leithne as soláthar poiblí straitéiseach, go ndéanfaí ceannaitheoirí poiblí a ghairmiúlú, go n-éascófaí agus go bhfeabhsófaí rochtain do FBManna ar mhargaí soláthair, go háirithe trí sheirbhísí comhairleacha agus oiliúint, go gcuirfí le trédhearcacht, sláine agus sonraí feabhsaithe, go spreagfaí claochlú digiteach an tsoláthair phoiblí agus cur chun cinn an tsoláthair chomhpháirtigh trí chur chuige comhpháirtíochta leis na Ballstáit a neartú, go bhfeabhsófaí an chaoi a ndéantar sonraí a bhailiú agus a anailísiú, lena n-áirítear trí uirlisí tiomnaithe TF a fhorbairt, agus go dtacófaí le malartú taithí agus dea-chleachtas, go ndéanfaí tagairt do chaighdeáin Eorpacha agus idirnáisiúnta, go gcuirfí treoir ar fáil, go ndéanfaí comhaontuithe trádála tairbhiúla a shaothrú, go neartófaí comhar idir údaráis náisiúnta agus go seolfaí treoirthionscadail.

(17)

Chun cuspóirí an Chláir a bhaint amach agus chun an saol a éascú do shaoránaigh agus gnólachtaí, ní mór seirbhísí poiblí ardcháilíochta a chur ar bun, seirbhísí atá dírithe ar an úsáideoir agus ar seirbhísí digiteáilte, lán-inrochtana iad, níos mó agus níos mó. Ní mór dlús a chur le hiarrachtaí ríomh-riaracháin agus ríomhrialtais freisin, agus cosaint sonraí agus príobháideacht iomchuí á n-áirithiú ag an am céanna. Ciallaíonn sé sin go mbeidh ar riaracháin phoiblí páirt a ghlacadh i gcomhchruthú na seirbhísí poiblí sin le saoránaigh agus gnólachtaí. Thairis sin, i ngeall ar an méadú leanúnach agus rialta ar ghníomhaíochtaí trasteorann sa mhargadh inmheánach, is gá go mbeadh faisnéis chothrom le dáta, bheacht agus atá éasca le tuiscint ar fáil faoi chearta gnólachtaí agus saoránaigh. Ciallaíonn sé sin gur cheart faisnéis shimplithe lena mínítear na foirmiúlachtaí riaracháin a chur ar fáil. Lena chois sin, is den riachtanas é comhairle dlí a chur ar fáil agus cuidiú chun fadhbanna a bhíonn ann ar leibhéal trasnáisiúnta a réiteach. Ina theannta sin, ba cheart tacú le dua na n-údarás poiblí agus iad ag iarraidh na cuspóirí sin a bhaint amach, mar shampla trí riaracháin náisiúnta a nascadh ar bhealach simplí éifeachtúil, agus trí fhaisnéis a chur ar fáil agus trí mhalartú faisnéise a éascú lena mínítear an chaoi a bhfeidhmíonn an margadh inmheánach ar an bhfód. Tá ról tábhachtach cheana féin ag uirlisí rialachais an mhargaidh inmheánaigh i ndáil leis sin, agus ba cheart a gcáilíocht, a n-infheictheacht, a dtrédhearcacht agus a n-iontaofacht a fheabhsú níos mó fós. Leis an gClár, mar sin, ba cheart tacú le na huirlisí rialachais seo a leanas de chuid an mhargaidh inmheánaigh, atá ann cheana: an tairseach An Eoraip Agatsa, rud ar cheart a bheith ina cnámh droma don tairseach aonair dhigiteach atá ar na bacáin, An Eoraip Agatsa – Comhairle, an Gréasán um Fhadhbanna sa Mhargadh Inmheánach a Réiteach (SOLVIT), Córas Faisnéise an Mhargaidh Inmheánaigh agus Scórchlár an Mhargaidh Inmheánaigh.

(18)

Leis an gClár, ba cheart tacú le creat rialála de chuid an Aontais a fhorbairt sna réimsí maidir le dlí na gcuideachtaí agus i réimse an rialachais chorparáidigh, agus dhlí na gconarthaí, d’fhonn gnólachtaí, go háirithe FBManna, a dhéanamh níos éifeachtúla agus níos iomaíche agus, san am céanna, cosaint a chur ar fáil do gheallsealbhóirí a ndéanann oibríochtaí cuideachta difear dóibh, agus d’fhonn aghaidh a thabhairt ar dhúshláin atá ag teacht chun cinn ar cheart do bheartas dul i ngleic leo. Leis an gClár, ba cheart a áirithiú freisin go ndéanfaí meastóireacht iomchuí ar an acquis ábhartha, agus go ndéanfaí é a chur chun feidhme agus a fhorfheidhmiú ar bhealach iomchuí, go gcuirfí geallsealbhóirí ar an eolas agus go gcuideofaí leo, agus go gcuirfí malartú faisnéise chun cinn sa réimse. Ba cheart leis an gClár tuilleadh tacaíochta a thabhairt do na tionscnaimh ón gCoimisiún chun tacú le creat dlíthiúil soiléir agus oiriúnaithe maidir leis an ngeilleagar sonraíbhunaithe agus an nuálaíocht. Is gá na tionscnaimh sin chun cur leis an deimhneacht dhlíthiúil maidir le hoibleagáidí conarthacha agus neamhchonarthacha, go háirithe maidir le dliteanas, slándáil, eitic agus príobháideacht ó thaobh teicneolaíochtaí atá ag teacht chun cinn, amhail idirlíon na rudaí nithiúla, an intleacht shaorga, an róbataic agus priontáil 3T. Ba cheart é a bheith mar aidhm ag an gClár forbairt gnólachtaí sonraíbhunaithe a spreagadh, ós rud é go mbeidh gnólachtaí den sórt sin ríthábhachtach d’fheidhmíocht gheilleagar an Aontais san iomaíocht dhomhanda.

(19)

Leis an gClár freisin, ba cheart do na Ballstáit creat dlíthiúil an Aontais maidir leis an bhfrithsciúradh airgid agus maidir leis an gcomhrac i gcoinne mhaoiniú na sceimhlitheoireachta a chur chun feidhme agus a chur i bhfeidhm i gceart agus ina iomláine agus ba cheart beartais don todhchaí a cheapadh chun aghaidh a thabhairt ar dhúshláin nua sna hearnálacha sin. Ina theannta sin, leis an gClár, ba cheart tacú le gníomhaíochtaí ábhartha eagraíochtaí idirnáisiúnta a bhfuil leas Eorpach acu, amhail an Coiste Saineolaithe maidir le Meastóireacht ar Bhearta Frithsciúrtha Airgid agus ar Mhaoiniú Sceimhlitheoireachta de chuid Chomhairle na hEorpa.

(20)

Maidir le cur chun feidhme agus forbairt an mhargaidh inmheánaigh i réimse na seirbhísí airgeadais, na cobhsaíochta airgeadais agus Aontas na Margaí Caipitil, lena n-áirítear maoiniú inbhuanaithe, braitheann an cuspóir sin go mór ar bhearta beartais fianaisebhunaithe a dhéanann an tAontas. Ba cheart ról gníomhach a bheith ag an gCoimisiún chun an cuspóir sin a bhaint amach, trí fhaireachán síoraí a dhéanamh ar na margaí airgeadais agus ar an gcobhsaíocht airgeadais, measúnú a dhéanamh ar chur chun feidhme reachtaíocht an Aontais ag na Ballstáit, an reachtaíocht atá ann faoi láthair a mheas le feiceáil an bhfuil sé oiriúnach don fheidhm atá léi, agus, nuair a thagann rioscaí nua chun cinn, trí réimsí gníomhaíochta féideartha a shainaithint, agus rannpháirtíocht na ngeallsealbhóirí a áirithiú le linn an timthrialla beartais. Is ar anailísí, staidéir, ábhair oiliúna, suirbhéanna, measúnuithe comhréireachta, meastóireachtaí agus staidreamh ardcháilíochta a tháirgeadh a bhraitheann na gníomhaíochtaí sin agus tacaítear leo trí bhíthin córais teicneolaíochta faisnéise agus uirlisí cumarsáide.

(21)

Le CFAE, áirítear córas rialacha chun a áirithiú nach saobhtar iomaíocht sa mhargadh inmheánach. Leis an gClár, ba cheart rannchuidiú le beartas iomaíochta an Aontais, lena n-áirítear tríd an gcomhar le líonraí agus leis na húdaráis náisiúnta agus na cúirteanna a fheabhsú agus a threisiú agus an comhar idirnáisiúnta a neartú, trí fhor-rochtain a áirithiú freisin le grúpa níos leithne geallsealbhóirí chun cearta, tairbhí agus oibleagáidí bheartas iomaíochta an Aontais a chur in iúl agus a mhíniú. Leis an gClár, ba cheart cuidiú freisin le hanailís agus measúnú ar fhorbairtí sa mhargadh a fheabhsú, lena n-áirítear trí úsáid a bhaint as fiosrúcháin earnála agus uirlisí eile imscrúdaithe margaidh agus trí fhaisnéis agus dea-chleachtais a roinnt go córasach laistigh den Ghréasán Eorpach Iomaíochta. Leis sin, ba cheart cuidiú le hiomaíocht chóir agus leis an gcothrom iomaíochta, lena n-áirítear ar an leibhéal domhanda, agus gnólachtaí, go háirithe FBManna, agus tomhaltóirí a chumhachtú chun tairbhe a bhaint as an margadh inmheánach.

(22)

Leis an gClár, is gá, go háirithe, dul i ngleic leis na himpleachtaí radacacha atá ann don iomaíocht agus d’fheidhmiú an mhargaidh inmheánaigh de thoradh aistriú glas agus aistriú digiteach reatha an gheilleagair agus thimpeallacht an ghnó, go háirithe a bhuí leis an bhfás easpónantúil atá ag teacht ar an méid sonraí agus ar an úsáid a bhaintear astu, ag cur san áireamh gur níos mó agus níos mó atá cuideachtaí agus a gcomhairleoirí ag dul i muinín na hintleachta saorga, algartaim mórshonraí agus uirlisí agus saineolas TF eile. Tá sé ríthábhachtach freisin, leis an gClár, go dtacaítear le líonraí agus go gcothaítear comhar níos leithne agus níos doimhne leis na Ballstáit agus lena n-údaráis agus a gcúirteanna, ós rud é go bhfuil iomaíocht neamhshaofa ann agus go bhfuil feidhmiú an mhargaidh inmheánaigh ag brath go mór ar chaingean na n-eintiteas sin. I bhfianaise an róil ar leith atá ag an mbeartas iomaíochta maidir le cosc a chur le díobháil don mhargadh inmheánach de thoradh iompar frithiomaíoch lasmuigh de theorainn an Aontais, leis an gClár, ba cheart tacaíocht a thabhairt do chomhar le húdaráis tríú tíortha de réir mar is iomchuí. Ar deireadh, ní mór cur le gníomhaíochtaí cumarsáide chun gur féidir le tuilleadh saoránach agus gnólachtaí tairbhe iomlán a bhaint as iomaíocht chóir sa mhargadh inmheánach. Leis sin, ba cheart tacú le hiarrachtaí chun tairbhí bheartas iomaíochta an Aontais a léiriú níos fearr do shaoránaigh an Aontais, lena n-áirítear trí dhul i dteagmháil le hionadaithe ghrúpaí na sochaí sibhialta agus le geallsealbhóirí ábhartha. Ceaptar go mbeidh gá le solúbthacht i gcur chun feidhme na coda sin den Chlár a bhaineann le hiomaíocht chun freagairt ar riachtanais atá ag teacht chun cinn a bhfuil tionchar orthu ag forbairtí dinimiciúla tapa i ndálaí iomaíochta an mhargaidh inmheánaigh ar deacair meastachán a dhéanamh orthu ó thaobh luais agus méid. Baineann sé sin go háirithe le forbairtí maidir leis an digiteáil, an intleacht shaorga, algartaim, mórshonraí, an chibearshlándáil agus an teicneolaíocht fhóiréinseach.

(23)

Tá sé ríthábhachtach iomaíochas agus inbhuanaitheacht fhiontar an Aontais a neartú agus, san am céanna, cothrom na Féinne éifeachtach agus margadh inmheánach atá oscailte agus iomaíoch a áirithiú. Is iad FBManna bunchloch gheilleagair an Aontais. Comhdhéanann FBManna 99,8 % de na gnólachtaí uile san Aontas, a sholáthraíonn dhá thrian de phoist, agus a rannchuidíonn go mór le poist d’ardchaighdeán cáilíochta i ngach earnáil a chruthú a bhfuil gné réigiúnach agus áitiúil ag baint leo, agus dá bharr sin, le comhtháthú sóisialta a chruthú. Tá ról lárnach ag FBManna i nuachóiriú na tionsclaíochta agus in aistriú glas agus aistriú digiteach an gheilleagair, lena n-áirítear neodracht aeráide a bhaint amach. Dá bhrí sin, leis an gClár, ba cheart tacú lena n-iarrachtaí éifeachtúlacht acmhainní a mhéadú agus táirgí agus seirbhísí ardcháilíochta atá neamhdhíobhálach don chomhshaol a fhorbairt. Sa chaoi sin, leis an gClár, ba cheart rannchuidiú freisin le hiomaíochas FBManna ar an margadh domhanda a fheabhsú.

(24)

Tá dúshláin choiteanna ag FBManna nach mbíonn a oiread céanna tionchair acu ar ghnólachtaí móra. Áirítear ar na dúshláin choiteanna sin maoiniú a fháil, fórsa oibre oilte a earcú, a n-ualach riaracháin a mhaolú, an chruthaitheacht agus an nuálaíocht a ghlacadh, inter alia trí sholáthar poiblí, agus rochtain a fháil ar mhargaí domhanda agus ar shlabhraí luacha chun a gcuid gníomhaíochtaí idirnáisiúnaithe a fhorbairt. Leis an gClár, ba cheart aghaidh a thabhairt ar theipeanna margaidh den sórt sin ar bhealach comhréireach ach, san am céanna, gan an iomaíocht sa mhargadh inmheánach a shaobhadh go míchuí. Leis an gClár, ba cheart freisin na riachtanais ar leith atá ag cineálacha sonracha FBManna a chur san áireamh, amhail micrifhiontair, FBManna atá i mbun seirbhísí agus FBManna atá i mbun gníomhaíochtaí ceardaíochta, chomh maith le FBManna arb iad daoine féinfhostaithe atá iontu, na gairmeacha beatha liobrálacha agus fiontair de chuid an gheilleagair shóisialta. Áirítear ar fhiontair an gheilleagair shóisialta san Aontas cineálacha éagsúla fiontar agus eintiteas sa gheilleagar sóisialta, amhail comharchumainn, cumainn fhrithpháirteacha, comhlachais neamhbhrabúsacha, fondúireachtaí, fiontair shóisialta agus cineálacha eile fiontar. Ós rud é go bhfuil siad dírithe go príomha ar luach comhroinnte agus tionchar sóisialta a chruthú do dhaoine níos mó ná brabús a dhéanamh, tá siad in ann gníomhú mar uirlis ar mhaithe leis an nuálaíocht shóisialta, an rialachas trédhearcach agus an dlúthpháirtíocht, trí fhormhór a mbrabús nó a mbarrachas á athinfheistiú acu ina gcuspóirí. Ba cheart aird a thabhairt freisin ar na riachtanais ar leith atá ag fiontraithe ionchasacha nua, amhail fiontraithe óga agus banfhiontraithe, daoine aosta agus daoine faoi mhíchumas.

(25)

Leis an gClár seo, ba cheart FBManna a chur san áireamh, mar a shainmhínítear iad i Moladh 2003/361/CE ón gCoimisiún (13). Agus an Rialachán seo á chur i bhfeidhm maidir le FBManna, ba cheart don Choimisiún dul i gcomhairle leis na geallsealbhóirí ábhartha uile, lena n-áirítear eagraíochtaí poiblí agus príobháideacha a dhéanann ionadaíocht thar ceann FBManna agus Eagraíochtaí Cur chun cinn Trádála na mBallstát.

(26)

Leis an gClár, ba cheart tacú le cultúr nuálaíochta agus é a chur chun cinn, agus éiceachórais thionsclaíocha á bhforbairt ar féidir leis gnólachtaí nuathionscanta a spreagadh agus fás FBManna a chothú, agus aird á díriú ar na FBManna ar fad atá in ann aghaidh a thabhairt ar dhúshláin an aistrithe ghlais agus an aistrithe dhigitigh agus ar thimpeallacht atá ag éirí níos iomaíche agus ag athrú níos gasta. Leis an gClár, ba cheart iarracht a dhéanamh tacú leis an bpróiseas glactha nuálaíochta trí shamhlacha nua gnó comhoibríocha a chur chun cinn, trí líonrú agus trí eolas agus acmhainní a chomhroinnt, lena n-áiritear trí chomhpháirtíochtaí Eorpacha de bhraislí fiontar agus d’eagraíochtaí de líonraí gnó.

(27)

Agus cláir oibre á mbunú chun tacú le FBManna, ba cheart forálacha straitéiseacha straitéis FBM agus an Ghnímh um Ghnólachtaí Beaga a chur san áireamh, chomh maith leis an gcomhthéacs ina bhfeidhmíonn FBManna, mar a tuairiscíodh san athbhreithniú ar fheidhmíocht FBManna. Ba cheart aird a thabhairt ar Líonra Toscairí FBManna.

(28)

Baineann cuid mhór d’fhadhbanna iomaíochais an Aontais le deacrachtaí FBManna maidir le teacht ar mhaoiniú. Tagann na deacrachtaí sin chun cinn toisc go mbíonn FBManna ag streachailt chun a n-acmhainneacht creidmheasa a thaispeáint agus toisc nach mbíonn dóthain sócmhainní acu mar urrús d’iasachtóirí (i.e., comhthaobhacht/ráthaíochtaí) nó nach mbíonn dóthain eolais acu faoi na sásraí atá ann chun tacú lena gcuid gníomhaíochtaí atá cheana ann ar leibhéal an Aontais, an leibhéal náisiúnta nó an leibhéal áitiúil. Tagann dúshláin bhreise mhaoinithe as an ngá atá ag FBManna le leanúint de bheith iomaíoch trí inter alia páirt a ghlacadh i ngníomhaíochtaí glactha nuálaíochta agus i ngníomhaíochtaí digitithe, gníomhaíochtaí idirnáisiúnaithe agus, chomh maith le trí oiliúint bhreise agus athoiliúint a chur ar a gcuid oibrithe. De thoradh rochtain theoranta ar mhaoiniú, imrítear tionchar diúltach ar chruthú gnólachtaí, ar a bhforbairt agus ar a rátaí marthanais agus, lena chois sin, ar ullmhacht fiontraithe nua dul i mbun cuideachtaí inmharthana i gcomhthéacs comharbas gnó.

(29)

Is constaic mhór í d’fhás na bhfiontar san Aontas an easpa scileanna. Chun fiontraíocht a chothú san Aontas agus chun tacú le fás FBManna agus lena n-aistriú digiteach agus a n-aistriú glas, leis an gClár, ba cheart rochtain ar scileanna agus scéimeanna meantóireachta a chur chun cinn agus a éascú do FBManna, agus go háirithe scileanna teicneolaíochta, fiontraíochta agus bainistíochta a fhorbairt. Agus an méid sin á dhéanamh aige, ba cheart don Choimisiún comhordú a dhéanamh le tionscnaimh a dhéantar i gcláir eile de chuid an Aontais, i gcláir náisiúnta agus réigiúnacha chun sineirgí a mhéadú agus dúbláil a sheachaint.

(30)

Chun teipeanna margaidh a shárú agus chun a áirithiú go leanann FBManna, lena n-áirítear fiontair nuathionscanta agus gnólachtaí i mbun fáis, dá ról a imirt mar bhunchloch d’iomaíochas gheilleagar an Aontais, ní mór tuilleadh tacaíochta a thabhairt do FBManna i bhfoirm ionstraimí fiachais agus cothromais arna mbunú faoi ghné beartais FBM de Chiste InvestEU arna bhunú le Rialachán (AE) 2021/523 ó Pharlaimint na hEorpa agus na Comhairle (14). Tá sé cruthaithe go bhfuil breisluach ag baint leis an tSaoráid Ráthaíochta Iasachta, a cuireadh i bhfeidhm faoi Rialachán (AE) Uimh. 1287/2013 ó Pharlaimint na hEorpa agus ón gComhairle (15), agus meastar go ndéanfar leis sin rannchuidiú dearfach le 500 000 FBM ar a laghad. D’fhéadfaí níos mó airde a thabhairt ar fheasacht a mhéadú, ó thaobh tairbhithe ionchasacha de, i ndáil le Clár InvestEU a bheith ar fáil do FBManna.

(31)

Le gníomhaíochtaí faoin gClár, ba cheart iarracht a dhéanamh cuspóirí beartais an Chláir a bhaint amach ní hamháin trí dheontais ach freisin trí rochtain a éascú ar ionstraimí airgeadais agus ar ráthaíochtaí buiséadacha arna mbunú faoi ghné beartais FBM de Chiste InvestEU agus ba cheart sineirgí a fheabhsú le cláir eile de chuid an Aontais. Ba cheart breisluach soiléir an Aontais a bheith ag gabháil leis na gníomhaíochtaí uile.

(32)

Leis an gClár, ba cheart tacaíocht éifeachtach a sholáthar do FBManna le linn a saolré, cúnamh á chur ar fáil ó chuidiú le FBManna comhpháirtithe a aimsiú i gcomhair tionscadal comhpháirteach go tráchtálú agus rochtain ar an margadh, fothú acmhainneachta agus an comhar a spreagadh le braislí agus eagraíochtaí líonraí gnó. Leis sin, ba cheart tacú freisin le haistriú glas agus aistriú digiteach FBManna agus go cur leis an eolas agus leis an saineolas atá forbartha i dtaobh FBManna, chomh maith leis an taithí sheanbhunaithe ó bheith ag obair le geallsealbhóirí an Aontais, geallsealbhóirí náisiúnta agus geallsealbhóirí réigiúnacha. Leis an tacaíocht sin, ba cheart cur le taithí an Líonra Fiontar Eorpaigh (EEN) mar ionad ilfhreastail chun iomaíochas FBManna a fheabhsú agus a ngnó a fhorbairt laistigh den margadh inmheánach agus lasmuigh de. Le EEN, leantar de seirbhísí a sholáthar thar ceann cláir eile de chuid an Aontais, go háirithe an clár dar teideal Fís Eorpach arna bhunú le Rialachán (AE) 2021/695 ó Pharlaimint ha hEorpa agus ón gComhairle (16), agus úsáid á baint as acmhainní airgeadais na gclár sin. Le ENN, ba cheart freisin rannpháirtíocht fheabhsaithe FBManna a éascú i dtaobh tionscnamh a fhorbairt maidir le beartas an mhargaidh inmheánaigh, amhail soláthar poiblí agus próisis chaighdeánaithe. Le ENN, ba cheart feabhas a chur ar an gcomhar le Moil Nuálaíochta Digití Eorpacha faoin gClár don Eoraip Dhigiteach arna mbunú le Rialachán (AE) 2021/694 ó Pharlaimint ha hEorpa agus ón gComhairle (17) agus le Mol Comhairleach InvestEU. Ina theannta sin, ba cheart leanúint den scéim meantóireachta rathúil - Erasmus le haghaidh Fiontraithe Óga - chun gur féidir le fiontraithe nua nó daoine a dteastaíonn uathu a bheith ina bhfiontraithe taithí ghnó agus bhainistíochta a fháil trí iad a mheaitseáil le fiontraithe seanchleachta ó thír eile agus trí foghlaim uathu agus, ar an dóigh sin, a gcumas fiontraíochta a neartú. Ba cheart cumhdach geografach an Chláir a leathnú agus raon níos leithne féidearthachtaí meaitseála a thairiscint d’fhiontraithe i gcomhlántacht le tionscnaimh eile de chuid an Aontais i gcás inarb ábhartha.

(33)

Ba cheart iarrachtaí breise a dhéanamh chun an t-ualach riaracháin a laghdú agus chun tionscnaimh an Chláir a dhéanamh níos inrochtana trí na costais ar phróisis chasta iarratais agus ceanglais chasta rannpháirtíochta a laghdú do FBManna. Sa chomhthéacs sin, ba cheart EEN a bheith mar phríomhphointe faisnéise do FBManna ar spéis leo rochtain a bheith acu ar chistí de chuid an Aontais, agus é ag feidhmiú mar ionad ilfhreastail agus ag cur treoir shaincheaptha ar fáil dóibh. Tá sé tábhachtach go gcuirfear leis an taithí a fuarthas faoi na bearta atá ann cheana chun tacú le FBManna, ach ag an am céanna a bheith oscailte do na bearta sin a oiriúnú i bhfianaise na gcoinníollacha athraitheacha do FBManna sa mhargadh aonair, go háirithe iad sin a bhaineann le digiteáil agus leis an ualach rialála.

(34)

Ós rud é go gcruthaítear le braislí fiontar timpeallacht atá fabhrach agus athléimneach do ghnó, is uirlis straitéiseach iad chun tacú le hiomaíochas FBManna agus chun iad a chur ag gníomhú ar scála níos leithne. Féadfaidh siad aistriú glas agus aistriú digiteach na tionsclaíochta a éascú, lena n-áirítear seirbhísí, agus féadfaidh siad forbairt eacnamaíoch na réigiún a neartú trí fhás agus poist a chruthú. Tá sé tábhachtach, le Tionscnaimh Chomhpháirteacha le haghaidh Braislí Fiontar, mais chriticiúil a bhaint amach ós rud é go gcuirfear leis sin dlús le fás FBManna. De thoradh éiceachórais thionsclaíocha speisialaithe a nascadh, cruthaítear le braislí fiontar deiseanna nua gnó do FBManna agus déantar iad a chomhtháthú ar dhóigh níos fearr i slabhraí luacha straitéiseacha ar leibhéal an Aontais agus ar an leibhéal domhanda. Trí thacaíocht ón Ardán Comhair do Bhraislí Fiontar Eorpacha agus a Lárionad Eorpach um Eolas maidir le hÉifeactúlacht Acmhainní, ba cheart tacú le straitéisí comhpháirtíochta trasnáisiúnta agus idir-réigiúnacha a fhorbairt agus gníomhaíochtaí comhpháirteacha a chur chun feidhme. Leis an tacaíocht sin, ba cheart a áireamh freisin cuidiú le FBManna dul i gcomhar le FBManna ó thríú tíortha. Ba cheart comhpháirtíocht inbhuanaithe a spreagadh trí leanúint de mhaoiniú a chur ar fáil má bhaintear amach spriocanna feidhmíochta agus rannpháirtíochta. Ba cheart tacaíocht dhíreach do FBManna a threorú trí eagraíochtaí de bhraislí fiontar leis an méid a leanas: úsáid ardteicneolaíochtaí, samhlacha nua gnó, réitigh ísealcharbóin atá tíosach ar acmhainní, cruthaitheacht agus dearadh, seisiúin oiliúna, daoine inniúla a mhealladh, dlús a chur leis an bhfiontraíocht, agus an t-idirnáisiúnú. Gníomhaithe ar speisialtóirí iad i dtacaíocht a chur ar fáil do FBManna, ba cheart iad a bheith rannpháirteach sa tacaíocht dhíreach do FBManna d’fhonn athrú tionsclaíoch a éascú agus in straitéisí um speisialtóireacht chliste a chur chun feidhme. Ba cheart, dá bhrí sin, leis an gClár bonn taca a chur faoi naisc a chruthú le moil nuálaíochta an Aontais, go háirithe lena Mhoil Nuálaíochta Digití Eorpacha, agus le hinfheistíochtaí arna gcur ar bun faoi réir an Bheartais Comhtháthaithe agus an chláir Fís Eorpach. Chomh maith leis sin, d’fhéadfaí sineirgí le clár Erasmus+ arna bhunú le Rialachán (AE) XXXX/... ó Pharlaimint na hEorpa agus ón gComhairle (18) a fhiosrú.

(35)

Leis an gClár, ba cheart cuidiú leis an gcaidreamh idir gnólachtaí a neartú, go háirithe FBManna agus ollscoileanna, lárionaid taighde agus institiúidí eile atá rannpháirteach i dtáirgeadh agus scaipeadh eolais. Leis an gcaidreamh sin, d’fhéadfaí feabhas a chur ar chumas gnólachtaí maidir le dul i ngleic leis na dúshláin straitéiseacha a bhaineann leis an gcomhthéacs nua idirnáisiúnta.

(36)

Ós rud é go mbíonn FBManna níos lú ó thaobh méid de, bíonn constaicí sonracha rompu i dtéarmaí fáis. Bíonn sé thar a bheith deacair dóibh cuid dá ngníomhaíochtaí gnó a fhás agus a mhéadú. Bunaithe ar an rath a bhí ar an Ionstraim FBM agus ar thionscadail an Aontais maidir le braislí fiontar le haghaidh slabhraí luacha tionsclaíocha nua faoi chlár Fís 2020 arna bhunú le Rialachán (AE) Uimh 1291/2013 ó Pharlaimint ha hEorpa agus ón gComhairle (19), agus ar na ceachtanna a foghlaimíodh agus an taithí a fuarthas uathu sin, leis an gClár, ba cheart tacaíocht a chur ar fáil do FBManna a ngníomhaíochtaí a mhéadú ag gach céim ríthábhachtach dá bhforbairt, lena n-áirítear tacaíocht do ghníomhaíochtaí idirnáisiúnaithe, úsáide nuálaíochta agus tráchtálaithe. Chomhlánódh an tacaíocht sin tacaíocht ón gComhairle Nuálaíochta Eorpach faoi chlár Fís Eorpach, lena ndíreofar den chuid is mó ar nuálaíocht cheannródaíoch shuaiteach, agus da réir sin ar FBManna nuálacha, lena ndíreofar go háirithe ar nuálaíocht lena gcruthaítear margaí, agus lena dtacófar freisin le gach cineál nuálaíochta, an nuálaíocht incriminteach san áireamh.

(37)

Tá an chruthaitheacht agus gach cineál nuálaíochta, lena n-áirítear an nuálaíocht a bhaineann le héifeachtúlacht fheabhsaithe acmhainní agus fuinnimh, ríthábhachtach d’iomaíochas shlabhraí luacha tionsclaíocha an Aontais. Leis sin, spreagtar nuachóiriú na hearnála gnó agus na hearnála tionsclaíche agus rannchuidítear le fás atá cliste, cuimsitheach agus inbhuanaithe. Mar sin féin, tá FBManna ar gcúl go fóill i dtaca lena n-úsáid. Dá réir sin, ba cheart, leis an gClár, tacú le gníomhaíochtaí, líonraí agus comhpháirtíochtaí spriocdhírithe ar an nuálaíocht atá bunaithe ar an gcruthaitheacht chun a chur ar chumas FBManna an t-aistriú glas agus an t-aistriú digiteach a bhaint amach ar fud na slabhraí luacha agus éiceachórais tionsclaíocha.

(38)

Tá ról tábhachtach ag caighdeáin Eorpacha sa mhargadh inmheánach. Tá siad ríthábhachtach ó thaobh a iomaíche atá gnóthais, go háirithe FBManna. Is uirlis ríthábhachtach iad na caighdeáin Eorpacha freisin chun bonn taca a chur faoi reachtaíocht agus beartais an Aontais i roinnt príomhréimsí arb é is aidhm leo an t-aistriú glas agus an t-aistriú digiteach a chothú, amhail an fuinneamh, an t-athrú aeráide agus cosaint chomhshaoil, teicneolaíocht na faisnéise agus na cumarsáide, úsáid inbhuanaithe agus athchúrsáil acmhainní, an nuálaíocht, sábháilteacht táirgí, cosaint tomhaltóirí, sábháilteacht agus dálaí oibre oibrithe, agus aosú an daonra agus, ar an dóigh sin, tairbhe a dhéanamh don tsochaí i gcoitinne. Chun an tairbhe is mó is féidir a bhaint as rannchuidiú an gcaighdeáin sin, is léir ón taithí a fuarthas gur gá luas agus tráthúlacht leagan amach na gcaighdeán a fheabhsú agus gur gá tuilleadh iarrachtaí a dhéanamh chun gach geallsealbhóir ábhartha, lena n-áirítear iad siúd a dhéanann ionadaíocht ar thomhaltóirí, a bheith páirteach ar bhealach níos fearr.

(39)

Rialaítear gníomhaíochtaí caighdeánaithe Eorpacha le Rialachán (AE) Uimh. 1025/2012 ó Pharlaimint na hEorpa agus ón gComhairle (20) agus cuirtear chun feidhme na gníomhaíochtaí sin trí bhíthin comhpháirtíocht phríobháideach phoiblí sheanbhunaithe atá fíorthábhachtach chun na cuspóirí a leagtar síos sa Rialachán sin, agus chun na cuspóirí atá i mbeartais ghinearálta agus beartais earnálacha de chuid an Aontais i dtaca le caighdeánú, a bhaint amach.

(40)

Tá creat coiteann tuairiscithe airgeadais agus neamhairgeadais a fheidhmíonn go cuí ríthábhachtach don mhargadh inmheánach, d’fheidhmiú éifeachtach na margaí airgeadais agus chun margadh comhtháite a thabhairt i gcrích do sheirbhísí airgeadais i gcomhthéacs an Aontais Bhaincéireachta agus Aontas na Margaí Caipitil.

(41)

I gcomhréir le Rialachán (CE) Uimh. 1606/2002 ó Pharlaimint na hEorpa agus ón gComhairle (21), maidir le Caighdeáin Idirnáisiúnta um Thuairisciú Airgeadais (IFRS) arna nglacadh ag Bord na gCaighdeán Idirnáisiúnta Cuntasaíochta, agus léirmhínithe lena mbaineann ó Choiste Léirmhíniúcháin na gCaighdeán Idirnáisiúnta um Thuairisciú Airgeadais, níor cheart iad a ionchorprú i ndlí an Aontais chun a bheith curtha i bhfeidhm ag comhlachtaí le hurrúis atá liostaithe ar mhargadh rialaithe san Aontas, ach amháin má chomhlíonann IFRS na ceanglais a leagtar amach sa Rialachán sin, lena n-áirítear an ceanglas go dtugtar sna cuntais “léargas fíor agus cothrom” dá bhforáiltear i dTreoir 2013/34/AE ó Pharlaimint na hEorpa agus ón gComhairle (22) agus go mbeidh siad ina gcuidiú don leas poiblí Eorpach. Ní foláir caighdeáin idirnáisiúnta chuntasaíochta den sórt sin a fhorbairt ar bhealach trédhearcach atá freagrach go daonlathach. Dá bhrí sin, tá príomhról ag IFRS i bhfeidhmiú an mhargaidh inmheánaigh agus, dá bhrí sin, tá leas díreach ag an Aontas a áirithiú go soláthraítear leis an bpróiseas lena ndéantar IFRS a fhorbairt agus a fhormheas, caighdeáin atá ag teacht le ceanglais chreat dlíthiúil an mhargaidh inmheánaigh. Tá sé tábhachtach, dá bhrí sin, socruithe iomchuí cistiúcháin a bhunú d’Fhondúireacht IFRS sa Chlár.

(42)

Agus ról an Ghrúpa Chomhairligh Eorpaigh um Thuairisciú Airgeadais (EFRAG) á chur san áireamh maidir le measúnú a dhéanamh an gcomhlíonann IFRS ceanglas dlí agus beartais an Aontais, mar a leagtar amach i Rialachán (CE) Uimh. 1606/2002, is gá don Aontas freisin maoiniú cobhsaí EFRAG a áirithiú agus, dá bhrí sin, rannchuidiú lena chistiú tríd an gClár. Ba cheart obair theicniúil EFRAG a dhíriú ar chomhairle theicniúil a sholáthar don Choimisiún maidir le formhuiniú IFRS chomh maith le leibhéal iomchuí de rannpháirtíocht an Aontais i bpróiseas forbartha IFRS, sin agus ba cheart a áirithiú go gcuirfear leasanna an Aontais san áireamh go leordhóthanach sa phróiseas bunaithe caighdeán idirnáisiúnta. Ba cheart a áireamh ar na leasanna sin coincheap na “stuamachta”, an ceanglas a choimeád maidir le “léargas fíor agus cothrom”, arna leagan síos i dTreoir 2013/34/AE, agus an leas poiblí Eorpach, arna leagan síos i Rialachán (CE) Uimh. 1606/2002, tionchar IFRS ar an gcobhsaíocht airgeadais agus ar an ngeilleagar á chur san áireamh. Bunaíodh an tsaotharlann Eorpach maidir le tuairisciú corparáideach mar chuid de EFRAG, chun an nuálaíocht a chur chun cinn agus chun dea-chleachtais i dtuairisciú corparáideach a fhorbairt. Is fóram é trínar féidir le cuideachtaí agus infheisteoirí dea-chleachtais a chomhroinnt, go háirithe sa réimse maidir leis an tuairisciú neamhairgeadais agus i dtaobh na hinbhuanaitheachta. Ag cur leis an obair sin, ba cheart do EFRAG rannchuidiú freisin le caighdeáin tuairiscithe neamhairgeadais a fhorbairt.

(43)

In earnáil na hiniúchóireachta reachtúla, in 2005 bhunaigh an Grúpa Faireacháin, eagraíocht idirnáisiúnta atá freagrach as faireachán a dhéanamh ar an athchóiriú rialachais ar Chónaidhm Idirnáisiúnta na gCuntasóirí (IFAC), an Bord Maoirseachta um Leas an Phobail (PIOB). Is é ról PIOB maoirseacht a dhéanamh ar an bpróiseas is bunús le glacadh na gCaighdeán Idirnáisiúnta Iniúchóireachta (ISAnna) agus ar ghníomhaíochtaí eile IFAC maidir le leas an phobail. Is féidir ISAnna a ghlacadh lena gcur i bhfeidhm san Aontas ar chuntar, go háirithe, gur forbraíodh iad faoi phróiseas cuí, faoi mhaoirseacht phoiblí agus go trédhearcach faoi mar a cheanglaítear faoi Airteagal 26 de Threoir 2006/43/CE ó Pharlaimint na hEorpa agus ón gComhairle (23). Ag cur san áireamh tabhairt isteach ISAnna san Aontas agus ról ríthábhachtach PIOB maidir le deimhin a dhéanamh de go gcomhlíontar leis na ISAnna sin na ceanglais a leagtar síos i dTreoir 2006/43/CE, tá sé tábhachtach, dá bhrí sin, socruithe iomchuí cistiúcháin do PIOB a bhunú sa Chlár.

(44)

Trí thacaíocht a thabhairt do bheartas na mBallstát lena ndéantar iarracht a áirithiú gur féidir le saoránaigh, agus iad ag gníomhú mar thomhaltóirí, tairbhe iomlán a bhaint as an margadh inmheánach agus trí na bearta sin a chomhlánú, bíonn an tAontas ina chuidiú leibhéal ard cosanta a áirithiú do thomhaltóirí, cumhacht a thabhairt dóibh agus iad a chur i gcroílár an mhargaidh inmheánaigh agus, ar an dóigh sin, déantar a sábháilteacht agus a leasanna dlí agus eacnamaíocha a chosaint go cuí trí bhíthin gníomhaíochtaí nithiúla. Is gá freisin don Aontas deimhin a dhéanamh de go bhforfheidhmítear ar an talamh dlíthe maidir le sábháilteacht tomhaltóirí agus táirgí i gceart agus go cothrom agus gur féidir le gnólachtaí tairbhe a bhaint as cothrom na Féinne agus mar sin d’iomaíocht chóir sa mhargadh inmheánach. Anuas air sin, is gá tomhaltóirí a chumhachtú, a spreagadh agus is gá cuidiú leo chun roghanna inbhuanaithe agus eolasacha a dhéanamh agus, ar an dóigh sin, tacú le geilleagar ciorclach atá inbhuanaithe, éifeachtúil ó thaobh an fhuinnimh agus na n-acmhainní de.

(45)

Ba cheart é a bheith mar aidhm ag an gClár feasacht a ardú, ar thaobh na dtomhaltóirí, na ngnólachtaí, ionadaithe na sochaí sibhialta agus na n-údarás, maidir le dlíthe tomhaltóirí agus sábháilteachta an Aontais. Ba cheart leis freisin tomhaltóirí agus a n-eagraíochtaí ionadaíocha a chumhachtú ar an leibhéal náisiúnta agus ar leibhéal an Aontais. Ba cheart leis é sin a dhéanamh go háirithe trí thacú leis an eagraíocht tomhaltóirí Eorpach BEUC (Biúró Eorpach na gCumann Tomhaltóirí), ar eagraíocht neamhrialtasach í atá seanbhunaithe agus aitheanta go maith agus a dhéanann ionadaíocht ar leasanna tomhaltóirí i ndáil le beartais ábhartha uile an Aontais, agus ar an gcaoi sin ag cur ar chumas na heagraíochta sin sineirgí feabhsaithe a thógáil chun abhcóideacht tomhaltóirí a neartú. Ba cheart leis freisin é sin a dhéanamh trí thacú leis an gComhlachas Eorpach um Chomhordú Ionadaíochta Tomhaltóirí maidir le Caighdeánú (ANEC), a dhéanann ionadaíocht ar leas tomhaltóirí i ndáil le saincheisteanna caighdeánaithe. Agus an méid sin á dhéanamh, ba cheart aird ar leith a thabhairt ar riachtanais mhargaidh nua maidir le tomhaltas inbhuanaithe a chur chun cinn trí dhíriú go háirithe ar ghníomhaíochtaí lena ndéantar na cleachtais dhífheidhmeachta phleanáilte sin atá míthreorach agus cleachtais mhíthreoracha eile amhail éilimh bhréagacha chomhshaoil a chomhrac, trí thomhaltóirí a chur ar an eolas ar bhealach níos fearr faoi mharthanacht agus faoi dheisiú táirgí. Ba cheart aird ar leith a thabhairt ar leochaileachtaí a chosc chomh maith le dúshláin a eascraíonn as digitiú an gheilleagair a chosc, i ndáil le, mar shampla, táirgí bainteacha, idirlíon na rudaí nithiúla, an intleacht shaorga agus úsáid a bhaint as algartaim, agus maidir le patrúin tomhaltais agus samhlacha gnó nua a fhorbairt. Leis an gClár, ba cheart tacú le gníomhaíochtaí chun forbairt a dhéanamh ar fhaisnéis ábhartha i dtaca le margaí, lena n-áirítear foilsiú scórchlár tomhaltóirí an Aontais.

(46)

Leis an gClár, ba cheart tacú le húdaráis inniúla náisiúnta, lena n-áirítear na húdaráis sin atá freagrach as faireachán a dhéanamh ar shábháilteacht táirgí, a chomhoibríonn go háirithe trí bhíthin chóras mear-rabhaidh an Aontais do tháirgí contúirteacha. Ina theannta sin, ba cheart leis tacú le forfheidhmiú Threoir 2001/95/CE ó Pharlaimint na hEorpa agus ón gComhairle (24) agus Rialachán (CE) Uimh. 765/2008 maidir le cosaint tomhaltóirí agus sábháilteacht táirgí, agus leis an nGréasán um Chomhar ar mhaithe le Cosaint Tomhaltóirí agus le comhar idirnáisiúnta idir na húdaráis ábhartha i dtríú tíortha agus san Aontas. Ba cheart é a bheith mar aidhm leis an gClár freisin rochtain ar sheirbhísí ardchaighdeáin réitithe díospóide lasmuigh den chúirt agus ar líne a áirithiú do thomhaltóirí agus trádálaithe uile, mar aon le faisnéis maidir leis an bpróiseas chun páirt a ghlacadh i ngníomhaíochtaí a lorgaíonn sásaimh.

(47)

Leis an gClár, ba cheart tacú freisin le Líonra na Lárionad Eorpach do Thomhaltóirí, a thugann cabhair do thomhaltóirí na cearta atá acu ina gcáil mar shaoránaigh de chuid an Aontais a chur chun sochair nuair a cheannaíonn siad earraí agus seirbhísí trasteorann sa mhargadh inmheánach agus sa Limistéar Eorpach Eacnamaíoch (LEE), bíodh sé ar líne nó le linn dóibh a bheith ag taisteal. Tá sé cruthaithe ag an líonra sin, a bhfuil 29 lárionad aige agus atá cistithe go comhpháirteach le breis is 15 bliana anuas ag cláir tomhaltóirí an Aontais, go bhfuil breisluach ag baint leis maidir le hiontaoibh tomhaltóirí agus trádálaithe as an margadh inmheánach a neartú. Déileálann sé le breis agus 120 000 iarraidh ó thomhaltóirí in aghaidh na bliana agus bíonn teagmháil aige leis na milliúin saoránach trína ghníomhaíochtaí faisnéise preasa agus ar líne. Tá sé ar cheann de na líonraí cúnaimh do shaoránaigh de chuid an Aontais is mó a bhfuil meas air agus tá pointí teagmhála lonnaithe i bhformhór d’ionaid an líonra agus cuirtear comhairle ar fáil iontu maidir le gnéithe de dhlí an mhargaidh inmheánaigh amhail Treoir 2006/123/CE ó Pharlaimint na hEorpa agus ón gComhairle (25). De thoradh na meastóireachta a rinneadh air, leagtar béim ar a thábhachtaí atá sé go leanfaidh ionadaí dá chuid oibríochtaí. Féadfaidh Líonra na Lárionad Eorpach do Thomhaltóirí a bheith ina fhoinse faisnéise freisin i dtaca leis na dúshláin agus na fadhbanna a thagann roimh thomhaltóirí ar an leibhéal áitiúil, atá ábhartha do cheapadh beartas an Aontais agus do leasanna tomhaltóirí a chosaint. Tá pleananna ann freisin don líonra socruithe cómhalartachta le comhlachtaí comhchosúla i dtríú tíortha a fhorbairt.

(48)

Glacadh Treoracha 98/6/CE (26), 2005/29/CE (27), 2011/83/AE (28), (AE) 2019/2161 (29) agus (AE) 2020/1828 (30) ó Pharlaimint na hEorpa agus ón gComhairle chun a áirithiú, inter alia, go gcaitear go cothrom le tomhaltóirí ar fud an mhargaidh inmheánaigh i ndáil le saincheisteanna trasteorann, amhail táirgí neamhchomhlíontacha a dhíol in earnáil na mótarfheithiclí, caighdeáin décháilíochta do tháirgí, nó na fadhbanna a bhí ag paisinéirí i gcás cealuithe eitiltí nó moilleanna fada eitiltí. Tá sé mar aidhm leo freisin cumas forfheidhmithe na mBallstát a neartú, sábháilteacht táirgí a fheabhsú agus comhar idirnáisiúnta agus deiseanna nua maidir le sásamh a mhéadú, go háirithe trí chaingne ionadaíocha ó eintitis cháilithe. I mí na Bealtaine 2017, rinne an Coimisiún seiceála oiriúnachta ar dhlí tomhaltóirí agus margaíochta an Aontais,, a léiríodh gur ghá rialacha a fhorfheidhmiú ar dhóigh níos fearr agus sásamh a éascú nuair a dhéantar díobháil do thomhaltóirí de dheasca sáruithe ar dhlíthe tomhaltóirí. I bhfianaise na seiceála oiriúnachta sin, ba cheart é a bheith ina thosaíocht tacú leis na Treoracha agus na caingne sin a chur chun feidhme ina n-iomláine agus a bhforfheidhmiú trasteorann a chur chun cinn.

(49)

Imríonn feidhmiú na margaí airgeadais tionchar mór ar shaoránaigh agus dá bhrí sin, ba cheart go gcuirfí ar an eolas tuilleadh iad maidir le cearta, rioscaí agus tairbhí ábhartha. Is dlúthchuid den mhargadh inmheánach iad margaí airgeadais agus ní mór creat stóinseach rialála agus maoirseachta a bheith ann lena n-áirithítear ní hamháin cobhsaíocht airgeadais agus geilleagar inbhuanaithe ach, lena chois sin, lena soláthraítear leibhéal ard cosanta do thomhaltóirí agus d’úsáideoirí deiridh eile seirbhísí airgeadais, lena n-áirítear infheisteoirí miondíola, coigilteoirí, sealbhóirí polasaí árachais, comhaltaí agus tairbhithe cistí pinsin, scairshealbhóirí aonair, iasachtaithe agus FBManna. Ba cheart don Chlár rannchuidiú le hacmhainneacht tomhaltóirí agus úsáideoirí deiridh eile seirbhísí airgeadais a fheabhsú chun páirt a ghlacadh i gceapadh beartais, lena n-áirítear trí fhaisnéis shoiléir, iomlán agus soláimhsithe don úsáideoir a tháirgeadh agus a scaipeadh maidir le táirgí a chuirtear ar fáil sna margaí airgeadais.

(50)

Leis an gClár, mar sin, ba cheart leanúint de bheith ag tacú le gníomhaíochtaí sonracha a chumhdaítear le Clár Fothaithe Acmhainneachta 2017–2020 lena bhfeabhsaítear rannpháirtíocht tomhaltóirí agus úsáideoirí deiridh eile seirbhísí airgeadais i bpróiseas ceaptha beartas an Aontais, mar a leagtar amach i Rialachán (AE) 2017/826 ó Pharlaimint na hEorpa agus ón gComhairle (31), lena leantar de threoirthionscadal agus réamhbheart na mblianta 2012–2017. Is gá sin chun a áirithiú go mbeidh lucht ceaptha beartas ar an eolas faoi thuairimí geallsealbhóirí nach gairmithe de chuid na hearnála airgeadais iad agus chun a áirithiú gur fearr an ionadaíocht a dhéantar ar leasanna tomhaltóirí agus úsáideoirí deiridh eile seirbhísí airgeadais. Ba cheart modheolaíocht agus dea-chleachtais an Chláir a fhorbairt go leanúnach maidir le conas rannpháirtíocht tomhaltóirí agus úsáideoirí deiridh seirbhísí airgeadais a mhéadú chun na saincheisteanna atá ábhartha do cheapadh beartais an Aontais a shainaithint agus chun cosaint leasanna tomhaltóirí i réimse na seirbhísí airgeadais a áirithiú. Leis sin ba cheart feabhas a chur ar bheartais i leith seirbhísí airgeadais, go háirithe iad siúd a bhfuil sé mar aidhm leo tuiscint níos fearr a chothú i measc an phobail ar na saincheisteanna i gceist i dtaca le rialáil airgeadais agus tuiscint fheabhsaithe airgeadais.

(51)

I gcomhthéacs an treoirthionscadail agus an réamhbhirt do na bliana 2012–2017 agus, bhronn an Coimisiún deontais ar dhá eagraíocht tar éis glao oscailte bliantúil ar thograí. Is iad Finance Watch, a cuireadh ar bun le deontais ón Aontas in 2011 mar chomhlachas idirnáisiúnta neamhbhrabúis faoi dhlí na Beilge, agus Better Finance, a tháinig as cónaidhmeanna Eorpacha infheisteoirí agus scairshealbhóirí a bhí ann cheana agus a atheagraíodh agus a athbhrandáladh roinnt uaireanta ó bhí 2009 ann. Leis an gClár Fothaithe Acmhainneachta a cuireadh ar bun le Rialachán (AE) 2017/826, sainaithnítear an dá eagraíocht sin mar thairbhithe aonair. Is gá, mar sin, leanúint de bheith ag cómhaoiniú na n-eagraíochtaí sin i gcomhthéacs an Chláir. Mar sin féin, ba cheart an maoiniú sin a bheith faoi réir meastóireacht chríochnúil ar éifeachtacht agus ar thionchar a bhfuil bainte amach i dtreo na gcuspóirí atá á saothrú. I ndáil leis sin, má thagann tairbhithe féideartha eile chun cinn, a bhfuil acu mar chuid dá bpríomhchuspóirí agus dá bpríomhghníomhaíochtaí ionadaíocht a dhéanamh ar leasanna tomhaltóirí agus úsáideoirí deiridh ar leibhéal an Aontais, mar aon le clúdach geografach leathan agus raon leathan leasanna a ghlacadh trí bhíthin a mballraíocht, ba cheart glao ar thograí ó iarratasóirí a bheith ar oscailt dóibh.

(52)

Chun tomhaltóirí a chosaint agus chun gur féidir leis an margadh inmheánach oibriú go héifeachtúil, caithfidh leibhéal ard cosanta sláinte a bheith ann i réimse na bplandaí, na n-ainmhithe, an bhia agus na beatha. Ar mhaithe le feidhmiú na sochaí agus an mhargaidh inmheánaigh, is réamhriachtanas é slabhra soláthair bia atá sábháilte agus inbhuanaithe. Tá sé fíorthábhachtach go ndéantar géarchéimeanna sláinte trasteorann agus údair faitís i dtaca le bia a chosc, ós rud é go cuireann siad as d’fheidhmiú an mhargaidh inmheánaigh trí theorainn a chur le gluaiseachtaí daoine agus earraí agus trí chur as don táirgeadh agus don tomhaltas. Leis an gclár, dá bhrí sin, ba cheart tacú le gníomhaíochtaí nithiúla, amhail bearta éigeandála a bhunú i gcás géarchéime a dhéanfadh difear do shláinte ainmhithe agus plandaí.

(53)

Is é cuspóir ginearálta dhlí an Aontais i réimse na bplandaí, na n-ainmhithe, an bhia agus na beatha ardleibhéal sláinte do dhaoine, ainmhithe agus plandaí ag gach céim den bhiashlabhra a choimirciú, tacú le leas ainmhithe a fheabhsú, cur le hardleibhéal cosanta agus faisnéise do thomhaltóirí agus leibhéal ard cosanta don chomhshaol, lena n-áirítear an bhithéagsúlacht a chaomhnú, agus cásanna arb é tionchar an athraithe aeráide a d’fhéadfadh a bheith sna Ballstáit is cúis leo á gcur san áireamh, agus, san am céanna, inbhuanaitheacht na táirgeachta bia agus beatha a fheabhsú agus ag cur le slándáil bia agus praghsanna réasúnta, cur amú bia a ghearradh, cur le caighdeáin cháilíochta na dtáirgí ar fud an Aontais, agus iomaíochas thionscal bia agus beatha an Aontais a fheabhsú agus poist a chruthú, lena n-áirítear trí thaighde agus nuálaíocht a spreagadh.

(54)

I bhfianaise gur gníomhaíochtaí sonracha iad na gníomhaíochtaí lena mbaineann leibhéal ard sláinte do dhaoine, ainmhithe agus plandaí, is gá critéir speisialta incháilitheachta a bhaineann le cur ar fáil deontas agus úsáid soláthair phoiblí a leagan síos sa Rialachán seo. Mar eisceacht ar phrionsabal na neamh-aisghníomhaíochta, go háirithe, i Rialachán (AE, Euratom) 2018/1046 ó Pharlaimint na hEorpa agus ón gComhairle (32) (an “Rialachán Airgeadais”), ba cheart costais na mbeart éigeandála, i ngeall ar chineál práinneach agus neamh-intuartha na mbeart sin, a bheith incháilithe, lena n-áirítear na costais a tabhaíodh de dheasca amhrais faoi ghalar nó lotnaid, ar choinníoll go ndearbhaítear tar éis sin an galar nó an lotnaid a bheith ann agus go gcuirtear sin in iúl don Choimisiún. Ba cheart don Choimisiún na gealltanais bhuiséadacha chomhfhreagracha agus íocaíocht caiteachais incháilithe a dhéanamh, tar éis na gealltanais dhlíthiúla a shíniú agus tar éis na hiarratais ar íocaíocht arna gcur isteach ag na Ballstáit a mheasúnú. Ba cheart costais a bheith incháilithe freisin i dtaca le bearta faireachais, coisctheacha agus cosanta arna ndéanamh i gcás ina mbeadh baol díreach ann do stádas sláinte an Aontais de dheasca galair agus zónóisí áirithe ainmhithe a bheith ann nó a bheith ag forbairt ar chríoch tríú tír nó i mBallstát nó a tíortha nó ar a chríocha thar lear agus i dtaca le bearta cosanta, nó gníomhaíochtaí ábhartha eile, arna ndéanamh chun tacú le stádas sláinte plandaí san Aontas.

(55)

I bhfianaise domhandú a bheith ag dul i méid i réimse na bplandaí, na n-ainmhithe, an bhia agus na beatha, is uirlis ríthábhachtach iad rialuithe oifigiúla arna ndéanamh ag na Ballstáit chun a fhíorú go bhfuil ceanglais ábhartha an Aontais á gcur chun feidhme, á gcomhlíonadh agus á bhforfheidhmiú, lena n-áirítear ceanglais i ndáil le hallmhairí, agus chun faireachán a dhéanamh air sin. Tá éifeachtacht agus éifeachtúlacht córas rialaithe oifigiúil ríthábhachtach chun leibhéal ard sábháilteachta ag gach céim den bhiashlabhra agus muinín na dtomhaltóirí a chaomhnú agus, ag an am céanna, leibhéal ard cosanta don chomhshaol agus do leas na n-ainmhithe a áirithiú. Ba cheart tacaíocht airgeadais ón Aontas a chur ar fáil do na bearta rialaithe sin. Ba cheart, go háirithe, ranníocaíocht airgeadais a bheith ar fáil do shaotharlanna tagartha an Aontais Eorpaigh chun cuidiú leo na costais a sheasamh a eascraíonn as cláir oibre atá formheasta ag an gCoimisiún a chur chun feidhme, agus d’fhéadfadh sé a bheith ar fáil do shaotharlanna tagartha náisiúnta sláinte plandaí agus ainmhithe, saotharlanna a bhainfidh tairbhe, i gcomhréir le Rialachán (AE) 2017/625 ó Pharlaimint na hEorpa agus ón gComhairle (33), as acmhainní airgeadais leordhóthanacha arna gcur ar fáil ag na Ballstáit, ar choinníoll gur féidir a léiriú go soiléir gurb ionann na gníomhaíochtaí a dhéantar agus breisluach an Aontais agus go bhfuil maoiniú leordhóthanach ar fáil faoin gClár chun tacú leis na gníomhaíochtaí sin. Thairis sin, ós rud é freisin go mbraitheann éifeachtacht rialuithe oifigiúla ar bhaill foirne dhea-oilte, a bhfuil eolas iomchuí acu ar dhlí an Aontais, a bheith ar fáil do na húdaráis rialaithe, ba cheart don Aontas a bheith in ann rannchuidiú lena n-oiliúint agus leis na cláir mhalartacha ábhartha arna n-eagrú ag údaráis inniúla.

(56)

Is fadhb mhéadaitheach san Aontas agus ar fud an domhain í frithsheasmhacht in aghaidh ábhar frithmhiocróbach. Ba cheart, dá bhrí sin, é a bheith indéanta bearta a chómhaoiniú chun tacú leis an gcomhrac i gcoinne na frithsheasmhachta in aghaidh ábhar frithmhiocróbach faoin gClár.

(57)

Tá staidreamh ardcháilíochta Eorpach arna fhorbairt, arna tháirgeadh agus arna scaipeadh faoin gclár de bhun Rialachán (CE) Uimh. 223/2009 riachtanach le haghaidh cinnteoireacht ar bhonn fianaise. Ba cheart an staidreamh Eorpach a bheith ar fáil go tráthúil agus ba cheart go gcuirfeadh sé le cur chun feidhme bheartais an Aontais dá dtagraítear in CFAE, go háirithe an rialachas eacnamaíoch neartaithe agus comhtháthaithe, an comhtháthú eacnamaíoch, sóisialta agus críochach, an fhorbairt inbhuanaithe, an beartas talmhaíochta, gné shóisialta na hEorpa agus an domhandú.

(58)

Tá an staidreamh Eorpach riachtanach le haghaidh chinnteoireacht an Aontais agus chun feidhmíocht agus tionchar thionscnaimh an Aontais a thomhas. Dá bhrí sin, tá sé tábhachtach a áirithiú go leanfaí den staidreamh Eorpach a sholáthar agus a fhorbairt, bunaithe ar chur chuige uile-Aontais agus peirspictíocht níos leithne aige ná peirspictíocht an mhargaidh inmheánaigh amháin, chun gníomhaíochtaí agus réimsí beartais uile an Aontais a chumhdach, lena n-áirítear gnólachtaí agus saoránaigh a chumhachtú chun cinntí eolacha a dhéanamh.

(59)

I bhfianaise a ghné cothrománaí, tá an creat chun staidreamh Eorpach a fhorbairt, a tháirgeadh agus a scaipeadh de réir bhrí Rialachán (CE) Uimh. 223/2009 faoi réir ceanglas sonrach, agus go háirithe na ceanglais a leagtar síos sa Rialachán sin, a mhéid a bhaineann leis na prionsabail staidrimh a urramú, mar aon le feidhmiú an Chórais Staidrimh Eorpaigh agus a rialachais, lena n-áirítear an ról agus na cúraimí arna sannadh do Choiste an Chórais Staidrimh Eorpaigh agus don Choimisiún (Eurostat), bunú agus cur chun feidhme chlárú na ngníomhaíochtaí staidrimh.

(60)

Cuireadh an dréacht-chuid den Chlár maidir leis an gcreat chun staidreamh Eorpach a fhorbairt, a tháirgeadh agus a scaipeadh faoi bhráid an Choiste um an gCóras Staidrimh Eorpach lena scrúdú roimh ré i gcomhréir le Rialachán (CE) Uimh. 223/2009.

(61)

Tá an tAontas agus na Ballstáit tiomanta do bheith ar thús cadhnaíochta i gcur chun feidhme Chlár Oibre 2030 na Náisiún Aontaithe don Fhorbairt Inbhuanaithe. Le rannpháirtíocht an Aontais agus na mBallstát i gClár Oibre 2030 a bhaint amach, beidh an Eoraip á cothú ar bhealach a fhágfaidh níos láidre, níos inbhuanaithe, níos cuimsithí, níos sláine agus níos rathúla í. Leis an gClár, ba cheart rannchuidiú le cur chun feidhme Chlár Oibre 2030, lena n-áirítear trí na gnéithe eacnamaíocha, sóisialta agus comhshaoil den fhorbairt inbhuanaithe a chothromú, agus, chuige sin, trí ghealltanais shoiléire agus infheicthe a thabhairt maidir leis na Spriocanna Forbartha Inbhuanaithe na Náisiún Aontaithe a phríomhshruthú.

(62)

Mar léiriú ar a thábhachtaí atá sé dul i ngleic leis an athrú aeráide i gcomhréir le gealltanais an Aontais Comhaontú Pháras, arna ghlacadh faoi Chreat-Choinbhinsiún na Náisiún Aontaithe ar Athrú Aeráide agus Spriocanna Forbartha Inbhuanaithe na Náisiún Aontaithe a chur chun feidhme, is é is aidhm don Chlár seo cuidiú chun an ghníomhaíocht ar son na haeráide a phríomhshruthú agus chun an sprioc fhoriomlán 30 % de chaiteachas buiséadach an Aontais a bhaint amach maidir leis an tacaíocht do chuspóirí aeráide. Sainaithneofar gníomhaíochtaí ábhartha le linn ullmhú agus chur chun feidhme an Chláir, agus déanfar athmheasúnú ar na gníomhaíochtaí sin mar chuid de na meastóireachtaí agus na próisis athbhreithnithe ábhartha. Sa chomhthéacs sin, leis an gClár, ba cheart tacú le gníomhaíochtaí lena n-urramaítear na caighdeáin aeráide agus chomhshaoil agus tosaíochtaí an Aontais, agus nach ndéantar dochar suntasach do chuspóirí comhshaoil de réir bhrí Rialachán (AE) 2020/852 ó Pharlaimint na hEorpa agus ón gComhairle (34).

(63)

Leagtar síos leis an Rialachán seo imchlúdach airgeadais don Chlár arb éard a bheidh ann an príomh-mhéid tagartha, de réir bhrí phointe 18 de Chomhaontú Idirinstitiúideach an 16 Nollaig 2020 idir Parlaimint na hEorpa, an Chomhairle agus an Coimisiún maidir leis an smacht buiséadach, le comhar in ábhair bhuiséadacha agus le bainistíocht fhónta airgeadais, mar aon le hacmhainní dílse nua, lena n-áirítear treochlár chun acmhainní dílse nua a thabhairt isteach (35)), do Pharlaimint na hEorpa agus don Chomhairle le linn an nós imeachta bhuiséadaigh bhliantúil.

(64)

Leis an gComhaontú maidir leis an Limistéar Eorpach Eacnamaíoch (36) déantar foráil do chomhar sna réimsí is ábhar don Chlár idir an tAontas agus a Bhallstáit ar thaobh amháin, agus tíortha Chomhlachas Saorthrádála na hEorpa atá rannpháirteach sa Limistéar Eacnamaíoch Eorpach (LEE), ar an taobh eile. Ba cheart é a bheith indéanta, freisin, an Clár a oscailt do rannpháirtíocht tíortha aontacha, tíortha is iarrthóirí agus tíortha is iarrthóirí ionchasacha, tíortha Bheartas Comharsanachta na hEorpa agus tríú tíortha eile. Ina theannta sin, i réimse an staidrimh Eorpaigh, ba cheart an Clár a bheith oscailte don Eilvéis i gcomhréir leis an gComhaontú idir an Comhphobal Eorpach agus Cónaidhm na hEilvéise maidir le comhar i réimse an staidrimh (37).

(65)

Féadfaidh tríú tíortha ar comhaltaí iad de LEE a bheith rannpháirteach i gcláir de chuid an Aontais faoi chuimsiú an chomhair arna bhunú faoin gComhaontú ar an Limistéar Eorpach Eacnamaíoch, ina ndéantar foráil maidir le cur chun feidhme na gclár ar bhonn cinneadh arna ghlacadh faoin gComhaontú sin. Féadfaidh tríú tíortha a bheith rannpháirteach freisin ar bhonn ionstraimí dlí eile. Ba cheart foráil ar leith a thabhairt isteach leis an Rialachán seo lena gcuirfear de cheangal ar thríú tíortha na cearta agus an rochtain is gá a thabhairt don oifigeach údarúcháin freagrach, don Oifig Eorpach Frith-Chalaoise (OLAF) agus don Chúirt Iniúchóirí chun go bhféadfaidh gach ceann díobh a gcuid inniúlachtaí féin a fheidhmiú go cuimsitheach.

(66)

Tá feidhm ag an Rialachán Airgeadais maidir leis an gClár seo. Leis an Rialachán Airgeadais, leagtar síos rialacha maidir le cur chun feidhme bhuiséad an Aontais, lena n-áirítear rialacha maidir le deontais, duaiseanna, soláthar, bainistíocht indíreach, ionstraimí airgeadais, ráthaíochtaí buiséadacha, cúnamh airgeadais agus aisíocaíocht a dhéanamh le saineolaithe seachtracha.

(67)

Léiríodh gur leor na gníomhaíochtaí arna gcur chun feidhme faoi na cláir agus na línte buiséid a tháinig roimhe agus ba cheart iad a choinneáil. Tá sé mar aidhm leis na gníomhaíochtaí nua arna dtabhairt isteach faoin gClár, go háirithe, an margadh inmheánach dea-fheidhmiúil a threisiú go háirithe. Chun tuilleadh simplíochta agus solúbthachta a chur ar fáil i gcur i gcrích an Chláir agus ar an mbealach sin lena chuspóirí a bhaint amach ar shlí níos fearr, níor cheart na gníomhaíochtaí a shainiú ach amháin i gcatagóirí ginearálta foriomlána. Ba cheart liostaí de ghníomhaíochtaí táscacha a bhaineann le cuspóirí sonracha i réimse an iomaíochais, cosaint tomhaltóirí, nó gníomhaíochtaí sonracha a eascraíonn as ceanglais rialála, amhail gníomhaíochtaí sonracha i réimsí an caighdeánaithe, an fhaireachais margaidh, réimse na bplandaí, na n-ainmhithe, an bhia agus na beatha agus staidreamh Eorpach a chur san áireamh leis an gClár freisin.

(68)

Is gá catagóirí ar leith a shonrú d’eintitis atá incháilithe chun cistiú a fháil, chomh maith leis na heintitis sin ar cheart a bheith incháilithe chun cistiú a fháil gan ghlao ar thograí.

(69)

Agus idirnascacht agus digitiú an gheilleagair dhomhanda atá ag dul i méid á meas, ba cheart go leanfar leis an gClár an deis a thairiscint maidir le saineolaithe seachtracha a bheith páirteach freisin, saineolaithe amhail oifigigh de chuid tríú tíortha, ionadaithe eagraíochtaí idirnáisiúnta nó oibreoirí eacnamaíocha i gcás gníomhaíochtaí áirithe.

(70)

Is gá critéir shonracha a bhaineann le rialacha cómhaoinithe agus costais incháilithe a chur in iúl. Ós rud é, i gcás roinnt de na cuspóirí sonracha, d’fhéadfadh sé bheith riachtanach costais incháilithe a mhaoiniú ina n-iomláine, ba cheart é a bheith indéanta maolú ar Airteagal 190 den Rialachán Airgeadais.

(71)

De bhun Airteagal 193(2), an dara fomhír, pointe (a) den Rialachán Airgeadais, féadfar deontas a dhámhachtain do ghníomhaíocht dar cuireadh tús cheana féin, ar choinníoll gur féidir leis an iarratasóir a thaispeáint gur gá tús a chur leis an ngníomhaíocht sula síníodh an comhaontú deontais. Cé nach mbeadh, i gcásanna den sórt sin, na costais arna dtabhú roimh an dáta a thíolacfar an t-iarratas ar dheontas incháilithe i bprionsabal, ba cheart é sin a bheith indéanta, go heisceachtúil, á cur san áireamh an mhoill ar theacht i bhfeidhm an Rialacháin seo agus chun aon chur isteach ar sholáthar tacaíochta ón Aontas a d’fhéadfadh dochar a dhéanamh do leasanna an Aontais a sheachtaint. Dá bhrí sin, i gcás inar gá sin chun leanúnachas a áirithiú agus ar feadh tréimhse teoranta ama ag tús chreat airgeadais ilbhliantúil 2021-2027, ba cheart na costais i ndáil le gníomhaíocht dar cuireadh tús leo cheana féin a bheith incháilithe ón 1 Eanáir 2021, fiú amháin má tabhaíodh na costais sin roimh an dáta a tíolacadh an t-iarratas ar dheontas. Ar na cúiseanna céanna agus faoi na coinníollacha céanna agus de mhaolú ar Airteagal 193(4) den Rialachán Airgeadais, ba cheart na costais arna dtabhú roimh an dáta a thíolacfar an t-iarratas ar dheontas a bheith incháilithe i gcás deontas oibriúcháin.

(72)

I gcomhréir le gealltanas an Choimisiúin a leagadh amach ina Theachtaireacht an 19 Deireadh Fómhair 2010 dar teideal ‘Athbhreithniú Bhuiséad AE’, agus chun foráil a dhéanamh maidir le cláir mhaoiniúcháin a dhéanamh níos comhleanúnaí agus níos simplí, ba cheart acmhainní a roinnt le hionstraimí eile maoiniúcháin de chuid an Aontais más ionann na spriocanna atá á saothrú ag gníomhaíochtaí an Chláir atá beartaithe agus spriocanna roinnt ionstraimí maoiniúcháin eile, gan maoiniú dúbailte a chur san áireamh.

(73)

Ba cheart an Clár a bheith ina chuidiú don tacaíocht iomlán lena dtabharfar aghaidh ar riachtanais shonracha na réigiún is forimeallaí agus ar a gcomhtháthú sa mhargadh inmheánach, de réir mar a athdheimhníodh le déanaí sa Teachtaireacht ón gCoimisiún A stronger and renewed strategic partnership with the EU’s outermost regions (Comhpháirtíocht straitéiseach neartaithe athnuaite leis na réigiúin is forimeallaí san Aontas).

(74)

Leis an gClár, ba cheart sineirgí a chur chun cinn agus dúbláil le cláir ghaolmhara agus gníomhaíochtaí gaolmhara de chuid an Aontais á seachaint aige. Ba cheart na gníomhaíochtaí faoin gClár seo a bheith ina gcomhlánú ar ghníomhaíochtaí na gClár Custaim agus Fiscalis arna mbunú le Rialachán (AE) 2021/444 ó Pharlaimint na hEorpa agus ón gComhairle (38) agus Rialachán ó Pharlaimint na hEorpa agus ón gComhairle lena mbunaítear an clár ‘Fiscalis’ chun comhar a dhéanamh i réimse an chánachais faoi seach, a dhírítear freisin ar thacaíocht a thabhairt d’fheidhmiú an mhargaidh inmheánaigh agus é a fheabhsú.

(75)

Leis an gClár, ba cheart sineirgí agus comhlántacht a chur chun cinn i leith FBManna agus sa bhreis air sin, agus i leith na tacaíochta fiontraíochta faoi Chiste Forbraíochta Réigiúnaí na hEorpa arna bhunú le Rialachán ó Pharlaimint na hEorpa agus ón gComhairle maidir le Ciste Forbraíochta Réigiúnaí na hEorpa agus an Ciste Comhtháthaithe. Thairis sin, leis an ngné beartais sin de chiste InvestEU, a bhaineann le FBManna áiritheofar tacaíocht d’fhiachas agus do chothromas chun rochtain agus fáil ar mhaoiniú a fheabhsú do FBManna. Leis an gClár, ba cheart sineirgí a lorg freisin leis an gClár Spáis arna bhunú le Rialachán (AE) 2021/696 ó Pharlaimint na hEorpa agus ón gComhairle (39) i ndáil le FBManna a spreagadh chun tairbhe a bhaint as nuálaíocht cheannródaíoch agus réitigh eile arna bhforbairt faoin gclár sin.

(76)

Leis an gClár, ba cheart sineirgí a chur chun cinn le Fís Eorpach, a bhfuil sé mar aidhm leis taighde agus nuálaíocht a chur chun cinn. Ba cheart é sin a bheith bainteach go háirithe le comhlántacht le gníomhaíochtaí Chomhairle Nuálaíochta Eorpach na todhchaí ar mhaithe le comhlachtaí nuálacha, chomh maith le tacaíocht do sheirbhísí le haghaidh FBManna, go háirithe trí EEN.

(77)

Leis an gClár, ba cheart sineirgí agus comhlántacht a chur chun cinn i ndáil leis an gClár don Eoraip Dhigiteach, a bhfuil sé mar aidhm leis digitiú gheilleagar an Aontais agus na hearnála poiblí a chur chun cinn, agus cibearshlándáil a mhéadú ag an am céanna.

(78)

Ina theannta sin, leis an gClár, ba cheart sineirgí a lorg leis an gClár Ceartais arna bhunú le Rialachán (AE) 2021/693 ó Pharlaimint na hEorpa agus ón gComhairle (40) , a bhfuil sé mar aidhm leis tacú le forbairt bhreise ar limistéar Eorpach ceartais ar mhaithe le héifeachtúlacht chórais cheartais náisiúnta, ós rud é go bhfuil sé seo ríthábhachtach chun cruthú geilleagar cothrom costéifeachtach a chumasú san Aontas.

(79)

Leis an gClár, ba cheart sineirgí a chur chun cinn le clár Erasmus+, le Clár an Chóir Dlúthpháirtíochta Eorpaigh arna bhunú le Rialachán (AE) 2021/XXX ó Pharlaimint na hEorpa agus ón gComhairle (41) agus le Ciste Sóisialta na hEorpa Plus arna bhunú le Rialachán 2021/… ó Pharlaimint na hEorpa agus ón gComhairle maidir le Ciste Sóisialta na hEorpa Plus (CSE+) i réimse na soghluaisteachta saothair agus shoghluaisteacht na hóige, atá riachtanach don mhargadh inmheánach dea-fheidhmiúil.

(80)

Ar deireadh, d’fhéadfaí gníomhaíochtaí amhail bearta tréidliachta agus fiteasláintíochta i gcás géarchéime sláinte ainmhithe agus plandaí, a chomhlánú le hidirghabhálacha margadhbhunaithe ó chlársceidealú Chomhbheartas Talmhaíochta an Aontais.

(81)

Ba cheart breisluach soiléir an Aontais a léiriú le gníomhaíochtaí arna gcur chun feidhme faoin gClár agus ba cheart iad a úsáid chun aghaidh a thabhairt ar theipeanna margaidh, nó le cásanna infheistíochta fo-optamacha, ar bhealach comhréireach, gan maoiniú príobháideach a dhúbláil ná a phlódú.

(82)

Chun coinníollacha aonfhoirmeacha a áirithiú i dtaca leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (42). Ba cheart an nós imeachta comhairleach a úsáid ar mhaithe le glacadh clár oibre lena ndéantar na gníomhaíochtaí a rannchuidíonn le cumhachtú tomhaltóirí a chur chun feidhme. Ba cheart an nós imeachta scrúdúcháin a úsáid faoi seach do ghlacadh gníomhartha cur chun feidhme a bhaineann leis na gníomhaíochtaí a rannchuidíonn le hiomaíochas FBManna agus do ghlacadh gníomhartha cur chun feidhme a bhaineann leis na cláir oibre lena ndéantar na gníomhaíochtaí a rannchuidíonn le hardleibhéal sláinte do dhaoine, d’ainmhithe, agus do phlandaí agus chun rátaí cómhaoinithe níos ísle a bhunú i gcás inar gá maidir le gníomhaíochtaí a bhaineann le bearta éigeandála tréidliachta agus fiteashláintíochta agus chun cláir náisiúnta thréidliachta agus fíteashláintíochta bhliantúla agus ilbhliantúla a bhunú mar aon le glacadh gníomhartha cur chun feidhme a bhaineann leis na cláir oibre lena ndéantar na gníomhaíochtaí a rannchuidíonn le sábháilteacht bia agus beatha a chur chun feidhme.

(83)

I gcás ina bhféadfar sineirgí idir cuspóirí sonracha an Chláir a bhaint amach, is féidir na forálacha is gá a chur chun feidhme i gclár oibre comhpháirteach.

(84)

Na foirmeacha cistiúcháin ón Aontas agus modhanna chur chun feidhme an Chláir, is ar bhonn a fhónta atá siad ó thaobh cuspóirí sainiúla na mbeart a bhaint amach agus torthaí a thabhairt, ba cheart iad a roghnú, agus aird á tabhairt, go háirithe, breisluach an Aontais, ar na costais a bhaineann le rialuithe, ar an ualach riaracháin, agus ar an riosca neamh-chomhlíontachta a mheastar a bheith ann. Ba cheart a chur san áireamh leis sin féachaint le húsáid a bhaint as cnapshuimeanna, as rátaí comhréidhe agus costais aonaid, agus as maoiniú nach mbaineann le costais dá dtagraítear in Airteagal 125(1) den Rialachán Airgeadais.

(85)

Chun faireachán agus tuairisciú rialta maidir leis an dul chun cinn atá bainte amach agus maidir le héifeachtacht agus éifeachtúlacht an Chláir a áirithiú, ba cheart creat iomchuí a bheith curtha i bhfeidhm ón tús le faireachán a dhéanamh ar ghníomhaíochtaí agus torthaí an Chláir. Ba cheart faireachán agus tuairisciú den sórt sin a bheith bunaithe ar tháscairí, lena dtomhaisfear éifeachtaí na ngníomhaíochtaí faoin Chlár i gcomparáid le bonnlínte réamhshainithe.

(86)

De bhun mhíreanna 22 agus 23 de Chomhaontú Idirinstitiúideach an 13 Aibreán 2016 maidir le Reachtóireacht Níos Fearr (43), ba cheart meastóireacht a dhéanamh ar an gClár seo ar bhonn na faisnéise arna bailiú i gcomhréir le ceanglais faireacháin shonracha, agus ag an am céanna ualach riaracháin, go háirithe ar na Ballstáit, agus ró-rialáil, á seachaint. Ar na ceanglais sin ba cheart a áireamh, i gcás inarb iomchuí, táscairí intomhaiste mar bhonn chun meastóireacht a dhéanamh ar éifeachtaí iarbhír an Chláir. Ba cheart don Choimisiún tuarascáil eatramhach mheastóireachta a tharraingt suas maidir le gnóthú chuspóirí na ngníomhaíochtaí a thugtar dóibh faoin gClár, maidir leis na torthaí agus an tionchair, maidir le héifeachtúlacht úsáid na n-acmhainní agus maidir lena bhreisluach Aontais, chomh maith le tuarascáil chríochnaitheach mheastóireachta maidir lena thionchar go fadtéarmach, le torthaí agus le hinbhuanaitheacht na ngníomhaíochtaí, agus na sineirgí le Cláir eile.

(87)

Chun faireachán a dhéanamh ar an tacaíocht a thugtar do FBManna, leis an gClár, ba cheart úsáid a bhaint as táscairí feidhmíochta intomhaiste. Faoi réir infhaighteacht faisnéise agus i gcás inarb ábhartha, leis na táscáirí sin, ba cheart torthaí agus tionchar a baineadh amach leis an gClár i leith a chuspóirí sonracha agus i leith spriocghrúpaí sonracha a thomhas (mar shampla mná, daoine óga agus seanóirí). Go háirithe, agus faireachán á dhéanamh, tá sé tábhachtach an tacaíocht arna tabhairt don aistriú glas agus don aistriú digiteach, don idirnáisiúnú agus don nuálaíocht a thomhas. Ina theannta sin, ba cheart táscairí comhthéacsúla a áireamh san fhaireachán, ar táscairí iad nach ndéantar feidhmíocht an Chláir a thomhas leo, ach lena dtugtar forléargas ar an timpeallacht ina n-oibríonn FBManna.

(88)

Ba cheart liosta neamh-uileghabhálach na ngalar ainmhithe agus na zónóisí atá incháilithe chun cistiú a fháil faoi bhearta éigeandála agus chun cistiú a fháil faoi na cláir díothaithe, rialaithe agus faireachais a bhunú ar bhonn na ngalar ainmhithe dá dtagraítear i gCaibidil 2 de Rialachán (CE) Uimh 999/2001 ó Pharlaimint na hEorpa agus ón gComhairle (44), Rialachán (CE) Uimh 2160/2003 ó Pharlaimint na hEorpa agus ón gComhairle (45), Treoir 2003/99/CE ó Pharlaimint na hEorpa agus ón gComhairle (46) agus Rialachán (AE) 2016/429 ó Pharlaimint na hEorpa agus ón gComhairle (47).

(89)

Chun cúinsí a spreagtar ag na galair ainmhithe sin a bhfuil tionchar suntasach acu ar tháirgeadh beostoic nó ar thrádáil, forbairt zónóisí a bheidh ina mbaol don duine, nó forbairt eolaíoch nó eipidéimeolaíoch nua a chur i gcuntas, chomh maith leis na galair ar dócha go mbeidh siad ina bhaol nua don Aontas, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún maidir le liosta na ngalar ainmhithe agus zónóisí a leasú. Chun forbairtí sa todhchaí a chur san áireamh maidir leis na heintitis a bhféadfar deontas a dhámhachtain dóibh faoin gClár i ndáil le hionadaíocht do leas tomhaltóirí ar leibhéal an Aontais, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i dtaca le liosta na n-eintiteas sin a leasú. Chun a áirithiú go measfar go héifeachtach dul chun cinn an Chláir i dtreo ghnóthú a chuspóirí, ba cheart an chumhacht a tharmligean chuig an gCoimisiún gníomhartha tarmligthe a ghlacadh, i gcomhréir le hAirteagal 290 CFAE, i ndáil le leasú a dhéanamh, i gcás inar gá, ar liosta na dtáscairí a úsáideadh chun gnóthú na gcuspóirí sonracha a thomhas, chomh maith leis an Rialachán seo a fhorlíonadh trí chreat faireacháin agus meastóireachta a bhunú. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach maidir le Reachtóireacht Níos Fearr an 13 Aibreán 2016. Ba cheart dul i gcomhairle le geallsealbhóirí agus le comhlachais tomhaltóirí freisin. Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, gheobhaidh Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus beidh rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bheidh ag déileáil le hullmhú na ngníomhartha tarmligthe.

(90)

De bhun Chinneadh 2013/755/AE ón gComhairle (48), tá daoine agus eintitis atá lonnaithe i dtíortha nó críocha thar lear incháilithe chun cistiú a fháil faoi réir rialacha agus chuspóirí an Chláir agus faoi réir aon socrú féideartha is infheidhme maidir leis an mBallstát lena mbaineann an tír nó an chríoch ábhartha thar lear.

(91)

I gcomhréir leis an Rialachán Airgeadais, Rialachán (AE, Euratom) Uimh. 883/2013 ó Pharlaimint na hEorpa agus ón gComhairle (49), agus Rialacháin (CE, Euratom) Uimh. 2988/95 (50), (Euratom, CE) Uimh. 2185/96 (51) agus (AE) 2017/1939 (52) ón gComhairle, táthar chun leasanna airgeadais an Aontais a chosaint trí bhíthin bearta comhréireacha, lena n-áirítear bearta a bhaineann le neamhrialtachtaí a chosc, a bhrath, a cheartú agus a imscrúdú, lena n-áirítear calaois, le cistí a cailleadh, a íocadh go mícheart nó a úsáideadh go mícheart a ghnóthú agus, i gcás inarb iomchuí, le pionóis riaracháin a fhorchur. Go háirithe, i gcomhréir le Rialacháin (Euratom, CE) Uimh. 2185/96 agus (AE, Euratom) Uimh. 883/2013, tá an chumhacht ag OLAF imscrúduithe riaracháin a dhéanamh, lena n-áirítear seiceálacha agus cigireachtaí ar an láthair, d’fhonn a shuí ar tharla calaois, éilliú nó aon ghníomhaíocht neamhdhleathach eile a dhéanann difear do leasanna airgeadais an Aontais. Tugtar de chumhacht d’Oifig an Ionchúisitheora Phoiblí Eorpaigh (OIPE), i gcomhréir le Rialachán (AE) 2017/1939 cionta coiriúla a dhéanann difear do leasanna airgeadais an Aontais, dá bhforáiltear i dTreoir (AE) 2017/1371 ó Pharlaimint na hEorpa agus ón gComhairle, a imscrúdú agus a ionchúiseamh (53). I gcomhréir leis an Rialachán Airgeadais, tá ar aon duine nó aon eintiteas a fhaigheann cistiú ón Aontas comhoibriú go hiomlán maidir le cosaint leasanna airgeadais an Aontais, na cearta agus an rochtain is gá a thabhairt don Choimisiún, do OLAF, don Chúirt Iniúchóirí agus, i leith na mBallstát sin atá rannpháirteach sa chomhar feabhsaithe de bhun Rialachán (AE) 2017/1939, do OIPE, agus a áirithiú go dtabharfaidh aon tríú páirtithe a bheidh páirteach i gcur chun feidhme cistí de chuid an Aontais cearta coibhéiseacha.

(92)

Tá feidhm ag rialacha cothrománacha airgeadais arna nglacadh ag Parlaimint na hEorpa agus ag an Chomhairle ar bhonn Airteagal 322 CFAE. Leagtar síos na rialacha sin sa Rialachán Airgeadais agus cinntear leo, go háirithe, an nós imeachta maidir leis an mbuiséad a bhunú agus a chur chun feidhme trí dheontais, duaiseanna, bainistíocht indíreach, ionstraimí airgeadais, ráthaíochtaí buiséadacha, cúnamh airgeadais agus aisíocaíocht a dhéanamh le saineolaithe seachtracha, agus foráiltear leo do sheiceálacha ar fhreagracht na ngníomhaithe airgeadais. Áirítear freisin leis na rialacha arna nglacadh ar bhonn Airteagal 322 CFAE córas ginearálta coinníollachta chun buiséad an Aontais a chosaint.

(93)

Le Rialachán (AE) 2016/679 ó Pharlaimint na hEorpa agus ón gComhairle (54) rialaítear próiseáil sonraí pearsanta a dhéantar sna Ballstáit i gcomhthéacs an Rialacháin seo agus faoi mhaoirseacht údaráis inniúla na mBallstát. Le Rialachán (AE) 2018/1725 ó Pharlaimint na hEorpa agus ón gComhairle (55) rialaítear próiseáil sonraí pearsanta arna dhéanamh ag an gCoimisiún faoi chuimsiú an Rialacháin seo agus faoi mhaoirseacht an Mhaoirseora Eorpaigh ar Chosaint Sonraí. Beidh aon mhalartú nó tarchur faisnéise a dhéanann na húdaráis inniúla i gcomhréir leis na rialacha maidir le haistriú sonraí pearsanta mar a leagtar síos i Rialachán (AE) 2016/679, beidh aon mhalartú nó tarchur faisnéise a dhéanann an Coimisiún i gcomhréir leis na rialacha ar aistriú sonraí pearsanta mar a leagtar síos i Rialachán (AE) 2018/1725.

(94)

Le Rialachán (CE) Uimh. 223/2009 bunaítear na rialacha maidir le staidreamh a tháirgeadh i gcomhréir le prionsabail rúndachta staidrimh agus déantar coinníoll go ndéanfaidh na hinstitiúidí náisiúnta staidrimh, na húdaráis náisiúnta eile agus an Coimisiún (Eurostat) gach beart riachtanach chun a áirithiú go ndéanfar na prionsabail agus na treoirlínte a ailíniú i ndáil le cosaint fhisiciúil agus loighciúil na sonraí rúndachta.

(95)

Ós rud é nach féidir leis na Ballstáit cuspóirí an Rialacháin seo, eadhon Clár don Mhargadh Aonair a bhunú chun feabhas a chur ar fheidhmiú an mhargaidh inmheánaigh agus ar iomaíochas agus inbhuanaitheacht fiontar, go háirithe FBManna, agus cosaint tomhaltóirí, do réimse na bplandaí, na n-ainmhithe, an bhia agus na beatha, agus an creat clársceidealaithe agus maoiniúcháin chun staidreamh Eorpach a fhorbairt, a tháirgeadh agus a scaipeadh, don tréimhse 2021-2027,.a ghnóthú go leordhóthanach de bharr chineál trasteorann na saincheisteanna lena mbaineann, ach gur féidir, de bharr an phoitéinsil níos fearr atá ann i ngníomhaíocht an Aontais, iad a ghnóthú níos fearr ar leibhéal an Aontais, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(96)

Leis an gClár, ba cheart níos mó infheictheachta agus comhsheasmhachta a áirithiú freisin i dtaca le margadh inmheánach an Aontais, chomh maith le hiomaíochas agus inbhuanaitheacht fiontar, go háirithe FBManna, agus gníomhaíochtaí staidrimh Eorpaigh i dtreo saoránaigh, gnólachtaí agus rialtais an Aontais.

(97)

Ós rud é go bhfuil éifeachtaí forálacha leasaitheacha gníomhartha dlíthiúla ídithe tráth a dteacht i bhfeidhm agus go bhfuil na leasuithe a tugadh isteach leo tagtha chun bheith ina gcuid de na gníomhartha dlíthiúla sin ag an am céanna, ní bheidh aon éifeacht ag aisghairm Rialachán (AE) Uimh. 652/2014 ó Pharlaimint na hEorpa agus ón gComhairle (56) ar na leasuithe a tugadh isteach cheana féin i ngníomhartha dlíthiúla eile le agus go háirithe i Rialachán (CE) Uimh 178/2002 ó Pharlaimint na hEorpa agus ón gComhairle (57) agus Treoir 2008/90/CÉ ón gComhairle (58) maidir le bunú an Bhuanchoiste um Plandaí, Ainmhithe, Bia agus Beatha, atá fós i bhfeidhm d’ainneoin aisghairm Rialachán (AE) Uimh. 652/2014.

(98)

Chun leanúnachas a áirithiú maidir le tacaíocht a sholáthar idir na cláir ó 2014 go 2020 i réimsí iomaíochas agus inbhuanaitheacht fiontar, go háirithe FBManna, cosaint tomhaltóirí, custaiméirí agus úsáideoirí deiridh i seirbhísí airgeadais, ceapadh beartais i seirbhísí airgeadais, plandaí, ainmhithe, bia agus an beatha, agus staidreamh Eorpach, arna bhunú le Rialachán (AE) 1287/2013, Rialachán (AE) Uimh. 254/2014 ó Pharlaimint na hEorpa agus ón gComhairle (59), Rialachán (AE) 2017/826, Rialachán (AE) Uimh. 258/2014 ó Pharlaimint na hEorpa agus ón gComhairle (60), Rialachán (AE) Uimh. 652/2014, Rialachán (AE) Uimh. 99/2013, agus an Clár seo, go háirithe maidir le leanúint le hidirbhearta ilbhliantúla agus leis an meastóireacht ar an rath a bhí ar na gcláir roimhe sin, agus ionas gur féidir tús a chur le cur chun feidhme ó thus chreat ilbhliantúil 2021-2027, ba cheart don Rialachán seo teacht i bhfeidhm mar ábhar práinne agus ba cheart go mbeadh feidhm aige, le héifeacht chúlghabhálach, amhail ón 1 Eanáir 2021. Amhail ón 1 Eanáir 2028, ba cheart, más gá, an caiteachas a bhaineann le bainistiú na ngníomhaíochtaí nach mbeidh curtha i gcrích faoi dheireadh an Chláir a chumhdach le leithreasuithe cúnaimh theicniúil agus riaracháin.

(99)

Mar thoradh ar an moill ar theacht i bhfeidhm an Rialacháin seo, ní féidir na sprioc-amanna a chomhlíonadh le haghaidh ghlacadh na gclár oibre i réimse na bplandaí, na n-ainmhithe, an bhia agus na beatha agus le haghaidh thíolacadh chláir thréidliachta agus fíteashláintíochta na mBallstát do 2021 agus 2022, ná ní féidir leis an gCoimisiún na sprioc-amanna a chomhlíonadh maidir leis na cláir sin a fhormheas a. Chun a áirithiú go gcuirfear na gníomhaíochtaí i réimse na bplandaí, na n-ainmhithe, an bhia agus na beatha chun feidhme go cuí in 2021 agus 2022, níor cheart feidhm a bheith ag na sprioc-amanna sin maidir leis na blianta 2021 agus 2022.

(100)

Ba cheart, dá bhrí sin, Rialacháin (AE) Uimh. 99/2013, (AE) Uimh. 1287/2013,(AE) Uimh. 254/2014 agus (AE) Uimh. 652/2014 a aisghairm le héifeacht ón 1 Eanáir 2021,