(1)

Maidir leis an uasteorainn don chaiteachas faoin gCiste Eorpach um Ráthaíocht Talmhaíochta (CERT), foráiltear le hAirteagal 16 de Rialachán (AE) Uimh. 1306/2013 ó Pharlaimint na hEorpa agus ón gComhairle (3) gurb iad na huasmhéideanna atá socruithe ina leith faoi Rialachán (AE, Euratom) Uimh. 1311/2013 ón gComhairle (4) atá le bheith inti. De bhun Airteagal 26 de Rialachán (AE) Uimh. 1306/2013, tá ráta coigeartaithe don smacht airgeadais le cinneadh, nuair is gá, chun a áirithiú go n‐urramófar na huasteorainneacha a leagtar amach i Rialachán (AE, Euratom) Uimh. 1311/2013 do mhaoiniú an chaiteachais a bhaineann leis an margadh agus maidir le maoiniú na n‐íocaíochtaí díreacha don tréimhse 2014-2020. Le Rialachán (AE, Euratom) Uimh. 1311/2013, ní dhéantar foráil maidir le huasteorainneacha do na blianta airgeadais tar éis 2020. Chun a áirithiú go n‐urramófar freisin an uasteorainn do mhaoiniú an chaiteachais a bhaineann leis an margadh agus do mhaoiniú na n‐íocaíochtaí díreacha sna blianta airgeadais tar éis 2020, is gá tagairt a dhéanamh, maidir leis na blianta airgeadais sin, le hAirteagail 16 agus 26 de Rialachán (AE) Uimh. 1306/2013 do na méideanna arna socrú faoi CERT sa Rialachán a ghlacfaidh an Chomhairle de bhun Airteagal 312(2) den Chonradh ar Fheidhmiú an Aontais Eorpaigh (CFAE) do na blianta 2021 go 2027.

(2)

Is éard atá sa tsolúbthacht idir colúin cistí a aistriú ar bhealach roghnach idir íocaíochtaí díreacha agus forbairt tuaithe. Faoi Airteagal 14 de Rialachán (AE) Uimh. 1307/2013 ó Pharlaimint na hEorpa agus ón gComhairle (5), féadfaidh na Ballstáit úsáid a bhaint as an tsolúbthacht sin i leith na mblianta féilire 2014 go 2019. Chun a áirithiú gur féidir leis na Ballstáit an straitéis atá acu féin a chothabháil, le Rialachán (AE) 2019/288 ó Pharlaimint na hEorpa agus ón gComhairle (6), cuireadh síneadh leis an tsolúbthacht idir colúin go dtí an bhliain féilire 2020, is é sin le rá an bhliain airgeadais 2021. Faoi láthair, foráiltear le hAirteagal 14 de Rialachán (AE) Uimh. 1307/2013 maidir le cistí a aistriú ón bhforbairt tuaithe chuig íocaíochtaí díreacha agus sin mar chéatadán den mhéid a leithdháileadh ar thacaíocht arna maoiniú faoin gCiste Eorpach Talmhaíochta um Fhorbairt Tuaithe (CETFT) sa bhliain airgeadais 2021 le reachtaíocht de chuid an Aontais arna glacadh tar éis don Chomhairle an Rialachán ábhartha a ghlacadh de bhun Airteagal 312(2) CFAE. Ós rud é nach nglacfar an reachtaíocht ábhartha de chuid an Aontais faoin am is gá do na Ballstáit fógra a thabhairt faoina gcinneadh aistriú a dhéanamh, is iomchuí foráil a dhéanamh maidir leis an deis leanúint de bheith ag cur na solúbthachta sin i bhfeidhm agus maidir leis an uasmhéid a fhéadfar a aistriú a bhunú.

Ríomhtar an dearbhmhéid uasta in aghaidh gach Ballstáit ar bhonn na n‐uaschéatadán dá bhforáiltear in Airteagal 14(2) de Rialachán (AE) Uimh. 1307/2013 atá le cur i bhfeidhm maidir leis na méideanna atá le leithdháileadh ar an tacaíocht do chineálacha idirghabhálacha don fhorbairt tuaithe faoin togra ón gCoimisiún le haghaidh Rialachán ó Pharlaimint na hEorpa agus ón gComhairle lena mbunaítear rialacha maidir le tacaíocht do phleananna straitéiseacha a bheidh le tarraingt suas ag na Ballstáit faoin gComhbheartas Talmhaíochta (Pleananna Straitéiseacha faoi CBT) agus arna maoiniú ag an gCiste Eorpach um Ráthaíocht Talmhaíochta (CERT) agus ag an gCiste Eorpach Talmhaíochta um Fhorbairt Tuaithe (CETFT) agus lena n‐aisghairtear Rialachán (AE) Uimh. 1305/2013 ó Pharlaimint na hEorpa agus ón gComhairle agus Rialachán (AE) Uimh. 1307/2013 ó Pharlaimint na hEorpa agus ón gComhairle.

(3)

I gcomhréir le hAirteagal 53(6) de Rialachán (AE) Uimh. 1307/2013, bhí an rogha ag na Ballstáit athbhreithniú a dhéanamh, faoin 1 Lúnasa 2019, ar chéatadán a n‐uasteorann náisiúnta d’íocaíochtaí díreacha a leithdháileann siad ar an tacaíocht chúpláilte dheonach (VCS), chomh maith leis na cinntí mionsonraithe a dhéanann siad faoin tacaíocht amhail ón mbliain féilire 2020. Ní thabharfaidh na Ballstáit fógra faoina gcinneadh i leith aistriú ó íocaíochtaí díreacha chuig forbairt tuaithe, más ann dó, ach faoin 31 Nollaig 2019, agus ní thabharfaidh siad fógra faoina gcinneadh i leith aistriú ó fhorbairt tuaithe chuig íocaíochtaí díreacha, más ann dó, ach go luath ina dhiaidh sin. Mar sin féin, déanfaidh cinneadh den sórt sin difear don uasteorainn náisiúnta atá acu d’íocaíochtaí díreacha don bhliain féilire 2020. Chun comhsheasmhacht a choinneáil idir na cinntí mionsonraithe faoin tacaíocht agus uasteorainn bhuiséadach VCS, is iomchuí a cheadú do na Ballstáit athbhreithniú a dhéanamh, a mhéid is gá chun coigeartú a dhéanamh ar an gcinneadh a dhéanann siad maidir leis an tsolúbthacht idir colúin, ar an gcéatadán a leithdháiltear ar VCS, chomh maith leis na cinntí mionsonraithe faoin tacaíocht. Dá bharr sin, ba cheart sprioc-am an fhógra ábhartha a bheith go luath tar éis an 31 Nollaig 2019. Ós rud é go bhfuil an t‐athbhreithniú sin teoranta don mhéid is gá le go mbeidh na Ballstáit in ann an cinneadh a dhéanann siad maidir leis an tsolúbthacht idir colúin a choigeartú, ba cheart do na Ballstáit an nasc idir an t‐athbhreithniú agus an cinneadh sin a mhíniú ina bhfógra.

(4)

Ba cheart, dá bhrí sin, Rialacháin (AE) Uimh. 1306/2013 agus (AE) Uimh. 1307/2013 a leasú dá réir sin.

(5)

Le go bhféadfar na leasuithe dá bhforáiltear sa Rialachán seo a chur i bhfeidhm a luaithe is féidir, measadh gurbh iomchuí foráil a dhéanamh maidir le heisceacht ar an tréimhse ocht seachtaine dá dtagraítear in Airteagal 4 de Phrótacal Uimh. 1 maidir le ról na bparlaimintí náisiúnta san Aontas Eorpach, atá i gceangal leis an gConradh ar an Aontas Eorpach, le CFAE agus leis an gConradh ag bunú an Chomhphobail Eorpaigh do Fhuinneamh Adamhach.

(6)

Le go bhféadfar na leasuithe dá bhforáiltear sa Rialachán seo a chur i bhfeidhm a luaithe is féidir, ba cheart don Rialachán seo teacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh,