(1)

Féachann tionscnamh Aontas na Margaí Caipitil leis an spleáchas ar iasachtaí ón mbanc a laghdú, le foinsí margadhbhunaithe maoinithe a éagsúlú do na fiontair bheaga agus mheánmhéide (“FBManna”) ar fad agus le heisiúint bannaí agus scaireanna ar mhargaí poiblí ag FBManna a chur chun cinn. Cuideachtaí atá bunaithe san Aontas agus a bhíonn ag iarraidh caipiteal a chruinniú ar ionaid trádála, bíonn costais nochta agus chomhlíonta aonuaire agus leanúnacha orthu a fhéadann iad a dhíspreagadh óna iarraidh choíche go ligfí isteach ar ionaid trádála an Aontais iad. Chomh maith leis sin, bíonn leibhéil níos ísle leachtachta agus luaineacht níos airde ag baint le scaireanna arna n‐eisiúint ag FBManna ar ionaid trádála an Aontais de ghnáth, rud a chuireann le costas an chaipitil agus a chiallaíonn go mbíonn ualach rómhór ag baint leis an bhfoinse chistiúcháin seo. Tá sé ríthábhachtach dá bhrí sin go mbeadh beartas cothrománach ag an Aontas maidir leis sin do FBManna. Is gá don bheartas den chineál sin a bheith cuimsitheach, comhleanúnach agus éifeachtach agus ní mór éagsúlacht na FBManna a chur san áireamh leis mar aon leis na riachtanais éagsúla atá acu.

(2)

Cruthaíodh cineál nua ionad trádála le Treoir 2014/65/AE ó Pharlaimint na hEorpa agus ón gComhairle (3), is é sin margadh fáis FBManna, fochatagóir de na saoráidí trádála iltaobhacha (“MTFanna”), chun rochtain ar chaipiteal a éascú do FBManna agus cur ar a gcumas fás agus chun forbairt sainmhargaí a fhreastalaíonn ar riachtanais eisitheoirí FBManna a bhfuil acmhainneacht fáis iontu a éascú a thuilleadh freisin. Réamh-mheasadh le Treoir 2014/65/AE chomh maith gur cheart gur cheart aird a dhíriú ar conas is féidir le rialáil as seo amach úsáid an mhargaidh sin a chothú agus a chur chun cinn a thuilleadh chun é a dhéanamh níos tarraingtí d’infheisteoirí, agus laghdú ualach riaracháin agus dreasachtaí eile a sholáthar do FBManna chun rochtain a fháil ar mhargaí caipitil trí mhargaí fáis FBManna. Sa tuairim uaidh ar an togra ón gCoimisiún maidir leis an Rialachán leasaitheach seo d’athdhearbhaigh Coiste Eacnamaíoch agus Sóisialta na hEorpa gur bacainní suntasacha iad an leibhéal íseal cumarsáide agus cuir chuige mhaorlathacha agus nach mór iarracht i bhfad níos mó a dhéanamh na constaicí sin a shárú. Ina theannta sin, dúirt sé gur cheart díriú ar bhun an tslabhra, na FBManna iad féin, trí rannpháirt a thabhairt do chumainn FBM, do chomhpháirtithe sóisialta agus do chomhlachais tráchtála, i measc cásanna eile.

(3)

Tugadh faoi deara, áfach, go mbaineann eisitheoirí ionstraimí airgeadais a ligeadh isteach chun a dtrádála ar mhargadh fáis FBManna tairbhe as líon níos lú laghduithe rialála i gcomparáid le heisitheoirí ionstraimí airgeadais a ligeadh isteach chun trádála ar MTFanna eile nó ar mhargaí rialáilte. Tá feidhm ag tromlach na n‐oibleagáidí a leagtar amach i Rialachán (AE) Uimh. 596/2014 ó Pharlaimint na hEorpa agus ón gComhairle (4) maidir leis na heisitheoirí uile ar an modh céanna, gan beann ar a méid nó ar an ionad trádála ina ligtear a gcuid ionstraimí isteach chun a dtrádála. Tá an leibhéal íseal sin idirdhealaithe idir eisitheoirí ionstraimí airgeadais a ligtear isteach chun trádáil ar mhargaí fáis FBManna agus iadsan atá ar MTFanna ina dhíspreagadh do MTFanna i ndáil le clárú mar mhargadh fáis FBManna, agus léiriú air sin is ea an glacadh íseal le stádas mar mhargadh fáis FBManna go dtí seo. Dá bhrí sin, is gá tuilleadh laghduithe comhréireacha a thabhairt isteach chun úsáid margaí fáis FBManna a chothú go leordhóthanach. Ba cheart úsáid margaí fáis FBManna a chur chun cinn go gníomhach. Níl mórán FBManna ar an eolas fós go bhfuil margaí fáis FBManna mar chineál nua ionad trádála.

(4)

Ba cheart mealltacht margaí fáis FBManna a threisiú trí na costais chomhlíonta agus na hualaí riaracháin a bhíonn i gceist d’eisitheoirí ionstraimí airgeadais arna ligean isteach chun a dtrádála ar mhargaí fáis FBManna a laghdú a thuilleadh. Chun na caighdeáin is airde comhlíontachta a choimeád ar mhargaí rialáilte, ba cheart na bearta dá bhforáiltear sa Rialachán seo a theorannú do chuideachtaí atá liostaithe ar mhargaí fáis FMBanna, cé nach bhfuil na FBManna uile liostaithe ar mhargaí fáis FMBanna agus nach FBManna iad na cuideachtaí ar fad atá liostaithe ar mhargaí fáis FMBanna. De bhun Threoir 2014/65/AE, is féidir suas le 50 % d’eisitheoirí ionstraimí airgeadais arna ligean isteach chun a dtrádála ar mhargaí fáis FBManna nach FBManna iad chun múnla gnó na margaí fáis FBManna a choinneáil brabúsach, trí bhíthin, inter alia, leachtacht in urrúis neamh-FBManna. I bhfianaise na rioscaí a bhaineann le sraitheanna éagsúla rialacha a chur i bhfeidhm i leith eisitheoirí atá liostaithe ar an gcatagóir chéanna ionad, eadhon margaí fáis FBManna, níor cheart na bearta dá bhforáiltear sa Rialachán seo a theorannú d’eisitheoirí FBManna amháin. Ar mhaithe le comhsheasmhacht d’eisitheoirí agus soiléire d’infheisteoirí, ba cheart feidhm a bheith ag an laghdú ar chostais chomhlíonta agus ar ualaí riaracháin maidir leis na heisitheoirí uile ionstraimí airgeadais arna ligean isteach chun a dtrádála ar mhargaí fáis FBManna, gan beann ar a gcaipitliú margaidh.

(5)

Níor cheart an rath atá ar mhargadh fáis FBManna a thomhais bunaithe ar líon na gcuideachtaí liostáilte ann amháin ach ar an ráta fáis a bhain na cuideachtaí sin amach. Tá gá le fócas níos géire ar FBManna - tairbhithe deiridh an Rialacháin seo - agus ar a gcuid riachtanas. Cuid ríthábhachtach den phróiseas sin is ea rómhaorlathas a ghearradh, ach ní mór céimeanna eile a ghlacadh freisin. Ní mór iarrachtaí a dhéanamh chun feabhas a chur ar an bhfaisnéis atá ar fáil go díreach do FBManna faoi na roghanna maoinithe atá ar fáil dóibh, d’fhonn a bhforbairt a chothú. Ba cheart gur chun leas na gcuideachtaí beaga sin ag a bhfuil acmhainneacht fáis a bheadh an laghdú rialála.

(6)

De réir Airteagal 10(1) de Rialachán (AE) Uimh. 596/2014, tagann nochtadh neamhdhleathach faisnéise ón taobh istigh chun cinn i gcás ina nochtann duine a shealbhaíonn faisnéis ón taobh istigh an fhaisnéis sin d’aon duine eile, ach amháin i gcás ina ndéantar an nochtadh i ngnáthfheidhmiú post, gairm nó dualgas. De bhun Airteagal 11(4) den Rialachán sin, aon nochtadh ar fhaisnéis ón taobh istigh a dhéantar le linn sondáil margaidh, measfar gur nochtadh é a rinneadh i ngnáthfheidhmiú fostaíocht, gairm nó dualgais duine, ar an gcoinníoll go gcomhlíontar nósanna imeachta ar leith arna mbunú ag an gcóras sondála margaidh. Is ionann sondáil margaidh agus faisnéis a bheith curtha in iúl, sula bhfógrófar idirbheart, d’fhonn leas infheisteoirí ionchasacha in idirbheart féideartha a thomhas agus na coinníollacha a bhaineann leis amhail a mhéid ionchasach nó a phraghsáil, d’infheisteoir ionchasach amháin nó níos mó. Le linn chéim na hidirbheartaíochta maidir le hurrúis a thairiscint d’infheisteoirí cáilithe (láithriú príobháideach), bíonn eisitheoirí ag plé le líon teoranta infheisteoirí cáilithe féideartha (mar a shainítear i Rialachán (AE) 2017/1129 ó Pharlaimint na hEorpa agus ón gComhairle (5)), agus déanann siad idirbheartaíocht ar théarmaí agus coinníollacha conarthacha uile an idirbhirt leis na hinfheisteoirí cáilithe sin.

Má chuirtear faisnéis in iúl le linn chéim na hidirbheartaíochta, bíonn sé d’aidhm aige sin an t‐idirbheart ina iomláine a mhúnlú agus a chur i gcrích, seachas spéis infheisteoirí féideartha a thomhas a mhéid a bhaineann le hidirbheart réamhshainithe. Uaireanta, féadann an córas sondála margaidh ualach trom a chruthú maidir le láithriú príobháideach bannaí agus díspreagann sin eisitheoirí agus infheisteoirí araon ó dhul i mbun cainteanna maidir le hidirbhearta den sórt sin. D’fhonn cur leis an tóir ar láithriú príobháideach bannaí, ba cheart a mheas gur nochtadh a rinneadh i ngnáthfheidhmiú fostaíochta, gairme nó dualgas duine an nochtadh faisnéise ón taobh istigh d’infheistitheoirí cáilithe chun críche na n‐idirbheart sin agus ba cheart sin a eisiamh ó raon feidhme an chórais sondála margaidh, ar an gcoinníoll go bhfuil comhaontú leordhóthanach neamhnochta i bhfeidhm.

(7)

Is féidir leachtacht áirithe i scaireanna eisitheora a bhaint amach trí shásraí leachtachta amhail socruithe um chruthú margaidh nó conarthaí leachtachta. Is é atá i gceist le socrú um chruthú margaidh conradh idir oibreoir an mhargaidh agus tríú páirtí a gheallann go gcoinneoidh sé an leachtacht i scaireanna áirithe agus a bhaineann leas as lacáistí ar tháillí trádála i gcomaoin air sin. Tugtar conradh leachtachta ar chonradh idir eisitheoir agus tríú páirtí a gheallann go soláthróidh sé leachtacht i scaireanna an eisitheora, agus thar ceann an eisitheora. Lena áirithiú go ndéanfar iomláine an mhargaidh a chaomhnú go hiomlán, ba cheart conarthaí leachtachta a bheith ar fáil do na heisitheoirí ionstraimí airgeadais ar fad arna ligean isteach chun a dtrádála ar mhargaí fáis FBManna ar fud an Aontais, faoi réir roinnt coinníollacha.

Níl na húdaráis inniúla uile tar éis cleachtais mhargaidh a bhfuil glacadh leo a chur ar bun i gcomhréir le Rialachán (AE) Uimh. 596/2014 maidir le conarthaí leachtachta, rud a chiallaíonn nach bhfuil rochtain ag na heisitheoirí ionstraimí airgeadais ar fad arna ligean isteach chun a dtrádála ar mhargaí fáis FBManna ar scéimeanna leachtachta ar fud an Aontais faoi láthair. D’fhéadfadh an easpa scéimeanna leachtachta sin a bheith ina bac ar fhorbairt éifeachtach na margaí fáis FBManna. Dá bhrí sin, tá sé riachtanach go ndéanfaí creat Aontais a chruthú lena gcumasófaí d’eisitheoirí ionstraimí airgeadais arna ligean isteach chun a dtrádála ar mhargaí fáis FBManna conradh leachtachta a dhéanamh le soláthraí leachtachta, mura bhfuil cleachtas margaidh a bhfuil glacadh leis curtha ar bun ar leibhéal náisiúnta. Faoi chreat Aontais den chineál sin, ní mheasfaí dá bhrí sin go raibh duine a rinne conradh leachtachta le soláthraí leachtachta i mbun cúbláil margaidh. Tá sé riachtanach, áfach, nach dtiocfadh an creat Aontais molta maidir le conarthaí leachtachta do mhargaí fáis FBManna in ionad na gcleachtas aitheanta margaidh náisiúnta atá nó a bheidh ann, ach go ndéanfadh sé iad a chomhlánú. Tá sé riachtanach freisin go gcoimeádfadh údaráis inniúla an fhéidearthacht cleachtais mhargaidh a bhfuil glacadh leo a chur ar bun maidir le conarthaí leachtachta, d’fhonn a gcoinníollacha a chur in oiriúint do shonraíochtaí áitiúla nó chun comhaontuithe den sórt sin a shíneadh go dtí urrúis neamhleachtacha seachas scaireanna arna ligean isteach chun a dtrádála ar ionaid trádála.

(8)

D’fhonn comhchuibhiú comhsheasmhach chreat an Aontais maidir le conarthaí leachtachta arna moladh a áirithiú, ba cheart don Choimisiún caighdeáin theicniúla rialála a ghlacadh lena leagtar amach teimpléad le húsáid chun críocha na gconarthaí sin, arna bhforbairt ag an Údarás Maoirseachta Eorpach (Údarás Eorpach um Urrúis agus Margaí) (ESMA), arna bhunú le Rialachán (AE) Uimh. 1095/2010 ó Pharlaimint na hEorpa agus ón gComhairle (6), trí bhíthin gníomhartha tarmligthe de bhun Airteagal 290 den Chonradh ar Fheidhmiú an Aontais Eorpaigh agus i gcomhréir le hAirteagail 10 go 14 de Rialachán (AE) Uimh. 1095/2010.

(9)

De réir Airteagal 17(4) de Rialachán (AE) Uimh. 596/2014, is féidir le heisitheoirí a chinneadh moill a chur ar nochtadh faisnéise ón taobh istigh don phobal más dóchúil go ndéanfaí dochar do leasanna dlisteanacha na n‐eisitheoirí, mura dócha go gcuirfeadh an mhoill an pobal amú, agus má tá eisitheoirí in ann rúndacht na faisnéise a chinntiú. Ceanglaítear ar eisitheoirí, áfach, fógra a thabhairt don údarás inniúil agus míniú i scríbhinn a sholáthar ar an réasúnú is cúis leis an gcinneadh sin. Is féidir ualach a bheith ag baint leis an oibleagáid nochta a fhorchur ar eisitheoirí, nach ligtear a n‐ionstraimí airgeadais isteach chun a dtrádála ach ar mhargadh fáis FBManna. Dá mbeadh ceanglas níos éadroime ar na heisitheoirí sin, lena gcuirtear ceanglas orthu gan na cúiseanna leis an moill a mhíniú ach amháin ar iarraidh ón údarás inniúil, meastar go laghdófaí an t‐ualach riaracháin orthu gan aon iarmhairt shuntasach a bheith aige sin ar chumas an údaráis inniúil faireachán a dhéanamh ar nochtadh faisnéise ón taobh istigh, ar an gcoinníoll go dtabharfaí fógra fós don údarás inniúil faoin gcinneadh chun moillithe agus go mbeidh sé in ann fós imscrúdú a thosú dá mbeadh amhrais air maidir leis an gcinneadh sin.

(10)

An ceanglas reatha nach bhfuil chomh dian sin atá ar eisitheoirí a bhfuil a n‐ionstraimí airgeadais á ligean isteach chun a dtrádála ar mhargadh fáis FBManna, gan liosta de dhaoine ar an taobh istigh a sholáthar ach ar iarraidh ón údarás inniúil, i gcomhréir le hAirteagal 18(6) de Rialachán (AE) Uimh. 596/2014, níl ach éifeacht phraiticiúil theoranta acu mar bíonn na heisitheoirí sin fós faoi réir ceanglais maidir le faireachán leanúnach ar na daoine atá cáilithe mar dhaoine ar an taobh istigh i gcomhthéacs na dtionscadal leanúnach. In ionad an ceanglas atá ann cheana, ba cheart dá bhrí sin an fhéidearthacht a bheith ann d’eisitheoirí a bhfuil a n‐ionstraimí airgeadais á ligean isteach chun a dtrádála ar mhargadh fáis FBManna gan a choinneáil ach liosta de na daoine sin a bhfuil rochtain rialta acu ar fhaisnéis ón taobh istigh i ngnáthfheidhmiú a ndualgas, amhail stiúrthóirí, comhaltaí comhlachtaí bainistíochta nó comhairleoirí dlí intí. Chuirfeadh sé ualach freisin ar eisitheoirí a bhfuil a n‐ionstraimí airgeadais á ligean isteach chun a dtrádála ar mhargadh fáis FBManna liostaí iomlána de dhaoine ar an taobh istigh sa chaoi a leagtar amach é i Rialachán Cur Chun Feidhme (AE) 2016/347 (7) ón gCoimisiún a nuashonrú go pras. Mar sin féin, ós rud é go measann roinnt Ballstát go bhfuil na liostaí de dhaoine ar an taobh istigh tábhachtach d’fhonn leibhéal is airde iomláine a áirithiú don mhargadh, ba cheart an rogha a sholáthar do na Ballstáit ceanglas a thabhairt isteach do na heisitheoirí a bhfuil a n‐ionstraimí airgeadais á ligean isteach chun a dtrádála ar mhargadh fáis FBManna liostaí níos fairsinge a sholáthar de na daoine ar an taobh istigh a d’áireodh na daoine ar fad a bhfuil rochtain acu ar fhaisnéis ón taobh istigh san áireamh ann. Agus é á chur san áireamh gur gá ualach riaracháin comhréireach a áirithiú do FBManna, ba cheart gur ualach riaracháin níos éadroime a bheadh i gceist leis na liostaí níos fairsinge sin i gcomparáid le liostaí iomlána de dhaoine ar an taobh istigh.

(11)

Tá sé riachtanach a shoiléiriú gur ar na heisitheoirí agus ar aon daoine a ghníomhaíonn thar a gceann nó chun a gcuntais araon a thiteann an oibleagáid liostaí de dhaoine ar an taobh istigh a tharraingt suas. Ba cheart soiléiriú a dhéanamh ar fhreagrachtaí aon daoine a ghníomhaíonn thar ceann nó chun cuntas na n‐eisitheoirí maidir le tarraingt suas na liostaí de dhaoine ar an taobh istigh d’fhonn léirithe agus cleachtais éagsúla ar fud an Aontais a sheachaint. Ba cheart forálacha ábhartha Rialachán (AE) Uimh. 596/2014 a leasú dá réir sin.

(12)

De bhun Airteagal 19(3) de Rialachán (AE) Uimh. 596/2014, ceanglaítear ar eisitheoirí agus rannpháirtithe sa mhargadh lamháltas astaíochtaí faisnéis faoi idirbhearta arna ndéanamh ag daoine a chomhlíonann freagrachtaí bainistíochta (“PDMRanna”) agus ag daoine a bhfuil dlúthbhaint acu leo (“PCAnna”) a chur ar fáil go poiblí laistigh de thrí lá gnó tar éis an idirbhirt. Tá an sprioc-am céanna infheidhme maidir le PDMRanna agus PCAnna a mhéid a bhaineann leis an dualgas atá orthu a gcuid idirbheart a thuairisciú don eisitheoir nó don rannpháirtí sa mhargadh lamháltas astaíochtaí. I gcás ina dtugann PDMRanna agus PCAnna fógra faoina gcuid idirbheart d’eisitheoir nó do rannpháirtí sa mhargadh lamháltas astaíochtaí go déanach, cruthaítear dúshlán teicniúil do na heisitheoirí sin agus do na rannpháirtithe sa mhargadh lamháltas astaíochtaí an sprioc-am trí lá a chomhlíonadh, rud a d’fhéadfadh a bheith ina chúis le saincheisteanna dliteanais. Dá bhrí sin, ba cheart go ligfí d’eisitheoirí agus do rannpháirtithe sa mhargadh lamháltas astaíochtaí idirbhearta a nochtadh laistigh de dhá lá gnó tar éis do na PDMRanna nó na PCAnna fógra a fháil faoi na hidirbhearta sin.

(13)

Faoi Rialachán (AE) 2017/1129, ní cheanglaítear ar eisitheoir, faoi choinníollacha áirithe, réamheolaire a fhoilsiú, i gcás urrús a thairgtear i ndáil le táthcheangal trí thairiscint mhalartaithe, agus i gcás urrús a thairgtear, a leithroinntear nó atá le leithroinnt i ndáil le cumasc nó le deighilt. In ionad sin, tá doiciméad le cur ar fáil don phobal, ina bhfuil íosmhéid faisnéise lena dtugtar tuairisc ar an idirbheart agus a iarmhairt ar an eisitheoir. Faoi dhlí an Aontais, níl aon cheanglas ar údarás inniúil náisiúnta athbhreithniú ná formheas a dhéanamh ar dhoiciméad den sórt sin sula bhfoilsítear é, agus bíonn a inneachar níos éadroime i gcomparáid le réamheolaire. Iarmhairt neamhbheartaithe amháin ar mhaolú den sórt sin is ea gur féidir le heisitheoir ar cuideachta neamhliostaithe é, in imthosca áirithe, a scaireanna a ligean isteach chun a dtrádála ar mhargadh rialáilte gan réamheolaire a thairgeadh. Leis sin déantar an fhaisnéis úsáideach a bhíonn i réamheolaire a choinneáil ó infheisteoirí agus ag an am céanna seachnaítear aon athbhreithniú a dhéanfadh údarás inniúil náisiúnta ar an bhfaisnéis a tugadh don mhargadh. Is cuí, dá bhrí sin, ceanglas a thabhairt isteach go mbeadh ar eisitheoir ar cuideachta neamh-liostaithe é agus atá ag iarraidh go ligfí isteach chun trádála ar mhargadh rialáilte é tar éis tairiscint mhalartaithe, cumaisc nó deighilte, go mbeadh air réamheolaire a fhoilsiú.

(14)

Faoi láthair, ní cheadaítear le hAirteagal 14 de Rialachán (AE) 2017/1129 réamheolaire simplithe a úsáid i gcás na n‐eisitheoirí sin ar ligeadh a n‐urrúis chothromais isteach chun a dtrádála ar mhargadh rialaithe nó ar mhargadh fáis FBManna go leanúnach ar feadh ar a laghad 18 mí agus a bheadh ag féachaint le hurrúis a eisiúint lena dtabharfaí rochtain ar urrúis chothromais a bheadh idirmhalartach le hurrúis chothromais a eisíodh roimhe sin. Dá bhrí sin, ba cheart Airteagal 14 den Rialachán sin a leasú chun ligean d’eisitheoirí den sórt sin an réamheolaire simplithe a úsáid.

(15)

Níor cheart breathnú ar mhargaí fáis FBManna mar chéim dheiridh i méadú ó scála eisitheoirí agus ba cheart go gcumasófaí do chuideachtaí rathúla leo fás agus aistriú lá éigin go margaí rialáilte, d’fhonn leas a bhaint as leachtacht níos mó agus as comhthiomsú níos mó d’infheisteoirí. D’fhonn an t‐aistriú ó mhargadh fáis FBManna go margadh rialáilte a éascú, ba cheart cuideachtaí atá ag fás a bheith in ann an córas nochta simplithe a úsáid, de réir mar a leagtar amach in Airteagal 14 de Rialachán (AE) 2017/1129, chun go ligfí isteach chun a dtrádála ar mhargadh rialáilte na hurrúis sin atá idirmhalartach le hurrúis a eisíodh cheana, ar an gcoinníoll go bhfuil urrúis tairgthe ag na cuideachtaí sin don phobal a bhí á ligean isteach chun a dtrádála ar mhargadh fáis FBManna go leanúnach ar feadh dhá bhliain ar a laghad agus gur chomhlíon siad go hiomlán na hoibleagáidí tuairiscithe agus nochta le linn na tréimhse sin. Ba cheart go gcuirfeadh tréimhse dhá bhliain ar chumas eisitheoirí cuntas teiste imleor a bheith acu agus faisnéis a sholáthar don mhargadh maidir lena bhfeidhmíocht airgeadais agus na ceanglais tuairiscithe faoi Threoir 2014/65/AE.

(16)

De réir Rialachán (CE) Uimh. 1606/2002 ó Pharlaimint na hEorpa agus ón gComhairle (8), níl cheanglaítear ar eisitheoirí ionstraimí airgeadais arna ligean isteach chun a dtrádála ar mhargaí fáis FBManna a gcuid ráiteas airgeadais a fhoilsiú i gcomhréir leis na Caighdeáin Idirnáisiúnta um Thuairisciú Airgeadais. D’fhonn imeacht ó chaighdeáin an mhargaidh rialáilte a sheachaint, áfach, ba cheart mar sin féin d’eisitheoirí ionstraimí airgeadais arna ligean isteach chun a dtrádála ar mhargaí fáis FBManna ar mian leo an córas nochta simplithe a úsáid a leagtar amach in Airteagal 14 de Rialachán (AE) 2017/1129 maidir le haistriú a n‐urrús chun trádála ar mhargadh rialáilte na ráitis airgeadais dheireanacha dá gcuid a ullmhú i gcomhréir le Rialachán (CE) Uimh. 1606/2002, lena n‐áirítear faisnéis chomparáideach le haghaidh na bliana roimhe sin, ar an gcoinníoll go gcuirfí ceangal orthu cuntais chomhdhlúite a ullmhú mar thoradh ar chur i bhfeidhm Threoir 2013/34/AE ó Pharlaimint na hEorpa agus ón gComhairle (9) tar éis dóibh a n‐ionstraimí airgeadais a ligean isteach chun a dtrádála ar mhargadh rialáilte. I gcás nach n‐éileodh cur i bhfeidhm na Treorach sin ar eisitheoirí cuntais den sórt sin a ullmhú, ba cheart dóibh dlí náisiúnta an Bhallstáit ina bhfuil siad ionchorpraithe a chomhlíonadh.

(17)

Tá cuspóir an Rialacháin seo comhsheasmhach le cuspóirí réamheolaire Fáis an Aontais, mar a leagtar amach iad in Airteagal 15 de Rialachán (AE) 2017/1129. Tá réamheolaire Fáis an Aontais gearr agus dá bhrí sin is beag costas atá ag baint lena tháirgeadh, rud a íslíonn na costais do FBManna. Ba cheart an rogha a bheith ag FBManna réamheolaire Fáis an Aontais a úsáid. Is féidir leis na sainmhínithe reatha ar FBManna i Rialachán (AE) 2017/1129 a bheith róshriantach, go háirithe do na heisitheoirí sin atá ag iarraidh go ligfí isteach chun trádála ar mhargadh fáis FBM iad, eisitheoirí a bhíonn níos mó ná gnáth-FBManna den chuid is mó. Mar thoradh air sin, a mhéid a bhaineann le tairiscintí poiblí, díreach tar éis a ligin isteach chun trádála ar dtús ar mhargadh fáis FBManna, ní bheadh eisitheoirí níos lú in ann réamheolaire Fáis an Aontais a úsáid, fiú dá mbeadh a gcaipitliú margaidh níos ísle ná EUR 200 000 000 tar éis a ligin isteach chun trádála ar dtús. Mar thoradh air sin, ba cheart Rialachán (AE) 2017/1129 a leasú chun a cheadú d’eisitheoirí atá ag lorg tairiscint tosaigh don phobal le caipitliú margaidh trialach de níos lú ná EUR 200 000 000 réamheolaire Fáis an Aontais a tharraingt suas.

(18)

I bhfianaise thábhacht FBManna d’fheidhmiú gheilleagar an Aontais, ba cheart aird ar leith a thabhairt ar an tionchar a bhíonn ag dlí an Aontais a bhaineann le seirbhísí airgeadais ar mhaoiniú FBManna. Chuige sin, ba cheart don Choimisiún, agus é i mbun athbhreithniú ar gníomhartha dlíthiúla a dhéanann difear do mhaoiniú na FBManna liostaithe agus neamhliostaithe, anailís a dhéanamh ar bhacainní rialála agus riaracháin, lena n‐áirítear maidir le taighde a chuireann bacainní ar an infheistíocht sin nó a dhéanann an infheistíocht sin a chosc. Agus é sin á dhéanamh aige, ba cheart don Choimisiún measúnú a dhéanamh ar éabhlóid na sreafaí caipitil chuig FBManna agus ba cheart dó féachaint le timpeallacht rialála fhabhrach a chruthú chun maoiniú FBManna a chothú.

(19)

Dá bhrí sin, ba cheart Treoir 2014/65/AE agus Rialacháin (AE) Uimh. 596/2014 agus (AE) 2017/1129 a leasú dá réir sin.

(20)

Ba cheart feidhm a bheith ag an Rialachán seo ó 31 Nollaig 2019. Ba cheart feidhm a bheith ag Airteagal 1, áfach, ó 1 Eanáir 2021,