(1)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jidentifikaw swaps tar-rati tal-imgħax OTC u swaps ta’ inadempjenza ta’ kreditu OTC għall-finijiet tar-rekwiżiti ta’ trasparenza stabbiliti fl-Artikolu 8a(2), u fl-Artikoli 10 u 21 tar-Regolament (UE) Nru 600/2014.

(2)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddistingwu d-derivattivi OTC f’termini ta’ klassi tal-assi, billi tindika jekk derivattiv OTC huwiex qiegħed jagħmel referenza għal rata, kreditu, rati tal-kambju, ekwitajiet, komoditajiet, jew klassijiet tal-assi mhux standard oħrajn.

(3)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddistingwu d-derivattivi OTC f’termini ta’ tip ta’ strument billi tindika jekk derivattiv OTC huwiex swap, opzjoni, jew forward.

(4)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddistingwu l-iswaps tar-rati tal-imgħax OTC f’termini ta’ tip ta’ assi sottostanti, billi tindika, abbażi tal-ISO 10962 (CFI) 2021, jekk derivattiv tar-rata tal-imgħax OTC huwiex swap fiss għal varjabbli, fiss għal fiss jew varjabbli għal varjabbli (bażi).

(5)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddistingwu l-iswaps tar-rati tal-imgħax OTC f’termini ta’ munita nozzjonali, billi tindika jekk swap tar-rati tal-imgħax OTC huwiex iddenominat fi kwalunkwe waħda mill-erba’ muniti msemmija fl-Artikolu 8a(2) tar-Regolament (UE) Nru 600/2014 u, jekk iva, billi tidentifika l-munita rilevanti b’referenza għall-kodiċi tal-munita bi tliet karattri ISO 4217.

(6)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddistingwu l-iswaps tar-rati tal-imgħax OTC f’termini tat-tip ta’ konsenja, billi jintuża l-ISO 10962 (CFI) 2021 biex jiġi ddeterminat jekk swap tar-rati tal-imgħax OTC huwiex konsenjabbli (fiżiku) jew mhux konsenjabbli (flus kontanti).

(7)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jidentifikaw l-iskeda nozzjonali għal swaps tar-rati tal-imgħax OTC, billi jintuża l-ISO 10962 (CFI) 2021 biex jiġi indikat jekk l-iswap għandux skeda nozzjonali kostanti, akkreditanti, amortizzanti jew personalizzata.

(8)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddistingwu l-iswaps tar-rati tal-imgħax OTC f’termini tar-rati ta’ referenza sottostanti tagħhom.

(9)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiġu infurmati b’ċerti termini standard tan-negozju assoċjati mar-rata ta’ referenza sottostanti. Il-konvenzjonijiet standard tan-negozju rilevanti jenħtieġ li jirriflettu l-elementi kritiċi tad-data (CDE) definiti fil-gwida teknika riveduta tas-CDE tal-Kumitat tas-Sorveljanza Regolatorja (ROC) minħabba li dawk l-attributi huma standardizzati, appoġġjati fil-livell internazzjonali u miżmuma mill-ROC. L-erba’ CDE huma: (i) il-konvenzjoni applikabbli dwar l-għadd ta’ jiem fissi, (ii) il-frekwenza ta’ pagament fiss, (iii) il-konvenzjoni dwar l-għadd ta’ jiem varjabbli, (iv) il-frekwenza ta’ pagament varjabbli.

(10)

Sabiex jiġu identifikati swaps tar-rati tal-imgħax OTC li ma jikkonformawx mat-termini standard tan-negozju assoċjati mar-rati ta’ referenza sottostanti tagħhom, jenħtieġ li d-data ta’ referenza ta’ identifikazzjoni tippermetti wkoll determinazzjoni tal-konvenzjoni ta’ aġġustament tal-jiem ta’ negozju, id-dewmien tal-iffissar, il-kalendarju tal-pagament u li l-kuntratt ma jinkludi l-ebda pagament addizzjonali.

(11)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddistingwu l-iswaps tar-rati tal-imgħax OTC fir-rigward tat-terminu tar-rati ta’ referenza sottostanti, billi tidentifika t-terminu tar-rata ta’ referenza sottostanti f’jiem, ġimgħat, xhur, jew snin, kif applikabbli.

(12)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddistingwu l-iswaps tar-rati tal-imgħax OTC bit-termini standard tar-rati ta’ referenza sottostanti, billi tindika t-termini standard applikabbli għal kull waħda mir-rati ta’ referenza sottostanti.

(13)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddeterminaw jekk swap tar-rati tal-imgħax OTC huwiex konkluż għal wieħed mit-termini sħaħ tas-sena kollha fil-kamp ta’ applikazzjoni tal-Artikolu 8a(2) tar-Regolament (UE) Nru 600/2014. F’każ li jiġi konkluż swap tar-rati tal-imgħax OTC għal terminu sħiħ tas-sena kollha, jenħtieġ li d-data ta’ referenza ta’ identifikazzjoni tidentifika t-terminu tal-kuntratt espress bħala numru sħiħ u tindika l-unità tal-perjodu ta’ żmien applikabbli.

(14)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddeterminaw jekk swap tar-rati tal-imgħax OTC huwiex b’bidu spot, jiġifieri, isir effettiv wara normalment jumejn ta’ negozju wara l-konklużjoni tal-kuntratt, jew huwiex b’bidu forward, li jfisser li l-kuntratt ta’ swap tar-rati tal-imgħax OTC isir effettiv fi kwalunkwe data tal-bidu li jintlaħaq qbil dwarha fil-livell kuntrattwali.

(15)

Id-data ta’ referenza ta’ identifikazzjoni jenħtieġ li tippermetti lill-parteċipanti fis-suq u lill-awtoritajiet kompetenti jiddeterminaw jekk swap tal-imgħax OTC jużax il-kalendarju, is-Suq Monetarju Internazzjonali jew kwalunkwe konvenzjoni oħra (mhux standard) tar-riskedar.

(16)

Id-data ta’ referenza ta’ identifikazzjoni għal swaps tar-rati tal-imgħax OTC jenħtieġ li ma tinkludix id-data ta’ skadenza ta’ kuljum jew id-data effettiva ta’ swap tar-rati tal-imgħax peress li tali attributi jipprevjenu tqabbil sinifikanti tal-prezzijiet għal swaps tar-rati tal-imgħax OTC.

(17)

L-Identifikatur Uniku tal-Prodott (UPI) ISO 4914 huwa identifikatur uniku tal-prodott li ntlaħaq qbil fuqu fil-livell globali żviluppat bħala għodda ta’ identifikazzjoni għar-rata tal-imgħax OTC u għall-iswaps ta’ inadempjenza ta’ kreditu, bl-intenzjoni li tiġi ffaċilitata l-aggregazzjoni tar-riskju tad-data minn repożitorji kummerċjali fi swieq globali tad-derviattivi OTC. Madankollu, l-ISO 4914 (UPI) għal swaps tar-rati tal-imgħax OTC ma fihx id-data ta’ referenza ta’ identifikazzjoni l-oħra li hija meħtieġa biex jiġu identifikati kif xieraq l-iswaps tar-rati tal-imgħax OTC għall-finijiet tar-rekwiżiti ta’ trasparenza stabbiliti fl-Artikolu 8a(2), u fl-Artikoli 10 u 21 tar-Regolament (UE) Nru 600/2014. Għalhekk, l-ISO 4914 (UPI) jenħtieġ li jiġi kkomplementat minn dik id-data ta’ referenza ta’ identifikazzjoni l-oħra. Għal dak il-fini, l-Artikolu 27(3) tar-Regolament (UE) Nru 600/2014 jagħti s-setgħa lill-Awtorità Ewropea tat-Titoli u s-Swieq (“ESMA”) li tiżviluppa abbozzi ta’ standards tekniċi regolatorji biex tispeċifika, fost l-oħrajn, l-istandards u l-formati tad-data għad-data ta’ referenza tal-istrumenti finanzjarji, inklużi l-metodi u l-arranġamenti għall-forniment tad-data u kwalunkwe aġġornament tagħha lill-ESMA u t-trażmissjoni tagħha lill-awtoritajiet kompetenti, u l-forma u l-kontenut ta’ tali data. Il-metodi u l-arranġamenti għall-forniment tad-data ta’ referenza ta’ identifikazzjoni jinkludu l-għażla li jkun meħtieġ li d-data ta’ referenza ta’ identifikazzjoni kollha stabbilita f’dan ir-Regolament tiġi rrapportata bħala parti minn identifikatur uniku.

(18)

Sabiex ikun hemm allinjament bejn dan ir-Regolament u r-Regolament Delegat adottat skont l-Artikolu 27(3) tar-Regolament (UE) Nru 600/2014 u sabiex il-parteċipanti fis-suq u l-awtoritajiet kompetenti jingħataw biżżejjed żmien biex jistabbilixxu l-miżuri meħtieġa għall-konformità mar-rekwiżiti dwar id-data ta’ referenza, jenħtieġ li mill-1 ta’ Settembru 2026, l-iswaps tar-rati tal-imgħax OTC u l-iswaps ta’ inadempjenza ta’ kreditu OTC jiġu identifikati bid-data ta’ referenza ta’ identifikazzjoni stabbilita f’dan ir-Regolament.

(19)

Ir-raba’ subparagrafu tal-Artikolu 27da(1) tar-Regolament (UE) Nru 600/2014 jirrikjedi li l-ESMA tibda l-proċedura tal-għażla għall-ħatra ta’ fornitur uniku ta’ tape konsolidat għad-derivattivi OTC jew għas-subklassijiet rilevanti ta’ derivattivi OTC fi żmien 3 xhur mid-data tal-applikazzjoni ta’ dan ir-Regolament u mhux qabel 6 xhur mill-bidu tal-proċedura tal-għażla għall-ħatra ta’ fornitur uniku ta’ tape konsolidat għall-ishma u għall-fondi negozjati fil-borża. Sabiex tiġi żgurata t-tnedija f’waqtha tal-proċedura tal-għażla għall-ħatra ta’ fornitur uniku ta’ tape konsolidat għad-derivattivi OTC jew għas-subklassijiet rilevanti ta’ derivattivi OTC, dan ir-Regolament jenħtieġ li jibda japplika mid-data tad-dħul fis-seħħ tiegħu,