(1)

Skont il-Ftehim ta’ Pariġi adottat fl-ambitu tal-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCCC) (“il-Ftehim ta’ Pariġi”) li ġie approvat permezz tad-Deċiżjoni tal-Kunsill (UE) 2016/1841 (4), il-komunità internazzjonali qablet li żżomm iż-żieda fit-temperatura medja globali ferm inqas minn 2 oC ’il fuq mil-livelli preindustrijali u li ssegwi sforzi biex tillimita ż-żieda fit-temperatura għal 1,5 oC ogħla mil-livelli preindustrijali. Fit-13 ta’ Novembru 2021, il-Konferenza tal-Partijiet għall-UNFCCC adottat ukoll il-Patt Klimatiku ta’ Glasgow, li jirrikonoxxi li l-impatt tat-tibdil fil-klima ser ikun ħafna aktar baxx b’żieda fit-temperatura ta’ 1,5 oC, meta mqabbla ma’ 2 oC, u tiddeċiedi li tkompli bl-isforzi biex tillimita ż-żieda fit-temperatura għal 1,5 oC. L-Unjoni u l-Istati Membri tagħha huma Partijiet għall-Ftehim ta’ Pariġi u ħadu impenji qawwija għall-implimentazzjoni tiegħu permezz tat-tnaqqis tal-emissjonijiet tal-gassijiet serra u permezz taż-żieda fl-assorbiment tal-karbonju.

(2)

Fuq skala globali, ir-rapporti tal-Grupp Intergovernattiv ta’ Esperti dwar it-Tibdil fil-Klima (IPCC) jindikaw probabbiltà dejjem tonqos li t-tisħin globali jiġi limitat għal 1,5 oC sakemm ma jseħħx tnaqqis rapidu u kbir fl-emissjonijiet globali tal-gassijiet serra għall-bqija ta’ dan id-deċennju u fid-deċennji li ġejjin. Ir-rapporti tal-IPCC jiddikjaraw ukoll b’mod ċar li l-użu tal-assorbiment tad-diossidu tal-karbonju (CO2) bħala kontrobilanċ għall-emissjonijiet residwi li diffiċli jitrażżnu huwa inevitabbli jekk għandhom jinkisbu emissjonijiet tas CO2 jew tal-gassijiet serra żero netti. Dan ser jirrikjedi l-użu fuq skala kbira ta’ attivitajiet sostenibbli għall-qbid tas-CO2 mill-atmosfera u l-ħżin fit-tul tiegħu f’riżervi ġeoloġiċi, fuq l-art jew fil-baħar, inkluż l-oċeani, jew fi prodotti li jservu fit-tul. Illum, u bil-politiki attwali, l-Unjoni mhix fit-triq li twassal għall-assorbiment tal-karbonju meħtieġ: l-assorbiment tal-karbonju fl-ekosistemi terrestri fl-aħħar snin kien qed jonqos, u attwalment mhu qed iseħħ l-ebda assorbiment industrijali sinifikanti tal-karbonju fl-Unjoni.

(3)

L-għan ta’ dan ir-Regolament huwa li jiġi żviluppat qafas ta’ ċertifikazzjoni volontarja tal-Unjoni għal assorbimenti permanenti tal-karbonju, il-kultivazzjoni karbonika u l-ħżin tal-karbonju fil-prodotti (il-“qafas ta’ ċertifikazzjoni tal-Unjoni”), bil-ħsieb li jiġu ffaċilitati u mħeġġa l-adozzjoni ta’ assorbiment tal-karbonju ta’ kwalità għolja u tat-tnaqqis fl-emissjonijiet mill-ħamrija ta’ kwalità għolja, b’rispett sħiħ tal-objettivi dwar il-bijodiversità tal-Unjoni u t-tniġġis żero, biex jikkomplementa t-tnaqqis bla heda fl-emissjonijiet mis-setturi kollha. Għaldaqstant, il-qafas ta’ ċertifikazzjoni tal-Unjoni ser ikun għodda li tappoġġa l-ilħuq tal-objettivi tal-Unjoni skont il-Ftehim ta’ Pariġi, b’mod partikolari l-ilħuq kollettiv sal-2050 tal-objettiv tan-newtralità klimatika stabbilit fir-Regolament (UE) 2021/1119 tal-Parlament Ewropew u tal-Kunsill (5). Jenħtieġ li kull assorbiment tal-karbonju u tnaqqis fl-emissjonijiet mill-ħamrija ċċertifikati skont il-qafas ta’ ċertifikazzjoni tal-Unjoni jikkontribwixxu għall-ilħuq tal-kontribut stabbilit fil-livell nazzjonali (NDC) tal-Unjoni u tal-objettivi klimatiċi tagħha. Għalhekk, sabiex jiġi evitat l-għadd doppju, jenħtieġ li dak l-assorbiment tal-karbonju u dak it-tnaqqis tal-emissjonijiet mill-ħamrija ma jikkontribwux għal NDCs ta’ partijiet terzi jew għal skemi internazzjonali ta’ konformità. L-Unjoni ntrabtet ukoll li tiġġenera emissjonijiet negattivi wara l-2050. Strument importanti biex jiżdied l-assorbiment tal-karbonju fl-ekosistemi terrestri huwa r-Regolament (UE) 2018/841 tal-Parlament Ewropew u tal-Kunsill (6) dwar l-inklużjoni tal-emissjonijiet u l-assorbimenti ta’ gassijiet serra minn użu tal-art, tibdil fl-użu tal-art u l-forestrija (LULUCF) fil-qafas ta’ politika għall-klima u l-enerġija għall-2030, li jistabbilixxi mira tal-Unjoni ta’ assorbiment nett ta’ 310 miljun tunnellata ekwivalenti ta’ CO2 sal-2030 u jalloka l-miri lil kull Stat Membru.

(4)

Fil-komunikazzjoni tagħha tas-6 ta’ Frar 2024 intitolata “Lejn Ġestjoni Industrijali tal-Karbonju ambizzjuża għall-UE”, il-Kummissjoni tipprevedi l-valutazzjoni tal-objettivi ġenerali għall-ħtiġijiet tal-assorbiment tal-karbonju skont l-ambizzjoni klimatika tal-Unjoni għall-2040 u l-għan li tintlaħaq in-newtralità klimatika sal-2050 u l-emissjonijiet negattivi minn hemm ’il quddiem; tiżviluppa għażliet ta’ politika u mekkaniżmi ta’ appoġġ għall-assorbiment industrijali tal-karbonju, inkluż jekk għandhomx jitqiesu fis-sistema tal-Unjoni għall-iskambju tal-kwoti tal-emissjonijiet u, jekk iva, kif; u b’mod parallel, tagħti spinta lir-riċerka, lill-innovazzjoni u lid-dimostrazzjoni bikrija tal-Unjoni għat-teknoloġiji industrijali ġodda għall-assorbiment tas-CO2 taħt Orizzont Ewropa, il-programm qafas għar-riċerka u l-innovazzjoni stabbilit bir-Regolament (UE) 2021/695 tal-Parlament Ewropew u tal-Kunsill (7), u l-Fond għall-Innovazzjoni stabbilit bid-Direttiva 2003/87/KE tal-Parlament Ewropew u tal-Kunsill (8). Barra minn hekk, huwa xieraq li l-Kummissjoni tivvaluta l-għażliet għall-miri tal-Unjoni għall-assorbiment tal-karbonju, inkluż l-istabbiliment b’mod ċar ta’ mira separata għall-assorbiment permanenti tal-karbonju.

(5)

Qafas ta’ ċertifikazzjoni armonizzat tal-Unjoni mistenni jsaħħaħ l-integrità ambjentali u t-trasparenza tal-assorbiment permanenti tal-karbonju, il-kultivazzjoni karbonika u l-ħżin fi prodotti u jippromwovi l-fiduċja fiċ-ċertifikazzjoni tagħhom, waqt li jnaqqas il-kostijiet amministrattivi assoċjati. In-natura volontarja tal-qafas ta’ ċertifikazzjoni tal-Unjoni tfisser li skemi pubbliċi u privati eżistenti u ġodda ta’ ċertifikazzjoni ser ikunu jistgħu japplikaw għar-rikonoxximent mill-Kummissjoni skont dan ir-Regolament iżda mhux ser ikunu obbligati jagħmlu dan sabiex joperaw fl-Unjoni.

(6)

Ir-Regolament (UE) 2021/1119 jistabbilixxi wkoll mira klimatika vinkolanti tal-Unjoni ta’ tnaqqis domestiku tal-emissjonijiet netti ta’ gassijiet serra b’mill-inqas 55 % meta mqabbla mal-livelli tal-1990 sal-2030. Sabiex jiġi żgurat li jitwettqu biżżejjed sforzi ta’ mitigazzjoni sal-2030, il-kontribut tal-assorbiment nett għall-mira klimatika tal-Unjoni għall-2030 huwa limitat għal 225 miljun tunnellata ta’ ekwivalenti ta’ CO2.

(7)

Il-qafas ta’ ċertifikazzjoni tal-Unjoni ser jappoġġa l-iżvilupp tal-assorbimenti permanenti tal-karbonju, il-kultivazzjoni karbonika u l-ħżin tal-karbonju fil-prodotti fl-Unjoni li jirriżultaw f’impatt klimatiku pożittiv mingħajr ambigwità, waqt li jevita l-greenwashing. Fil-każ tal-agrikoltura karbonika, jenħtieġ li l-qafas ta’ ċertifikazzjoni tal-Unjoni jippromwovi wkoll l-adozzjoni ta’ attivitajiet li jiġġeneraw kobenefiċċji għall-bijodiversità, u b’hekk jikkontribwixxu għall-miri tar-restawr tan-natura stabbiliti fil-liġi tal-Unjoni.

(8)

Huwa xieraq li l-qafas ta’ ċertifikazzjoni tal-Unjoni jinkoraġġixxi wkoll ir-riċerka u l-innovazzjoni, inkluż billi jenfasizza r-rwol tal-programmi ta’ riċerka rilevanti, bl-għan li jiġi ffaċilitat l-aċċess għas-suq għal teknoloġiji ġodda. F’dan ir-rigward, jenħtieġ li l-Kummissjoni u l-Istati Membri jiġu mħeġġa jidħlu fi djalogu ta’ kooperazzjoni interdixxiplinari, bl-involviment tal-istituzzjonijiet ta’ riċerka nazzjonali u reġjonali, xjenzjati, bdiewa u intrapriżi żgħar u ta’ daqs medju.

(9)

Sabiex jiġu appoġġati l-operaturi li jkunu lesti jagħmlu sforzi addizzjonali biex b’mod sostenibbli jżidu l-assorbiment tal-karbonju jew inaqqsu l-emissjonijiet mill-ħamrija, il-qafas ta’ ċertifikazzjoni tal-Unjoni jenħtieġ li jqis it-tipi differenti ta’ attivitajiet, l-ispeċifiċitajiet tagħhom u l-impatt ambjentali relatat. Għalhekk, dan ir-Regolament jenħtieġ li jipprovdi definizzjonijiet ċari tal-assorbiment permanenti tal-karbonju, il-kultivazzjoni karbonika u l-ħżin tal-karbonju fil-prodotti, u ta’ elementi oħra tal-qafas ta’ ċertifikazzjoni tal-Unjoni. Il-kamp ta’ applikazzjoni tiegħu jenħtieġ li jinkludi attivitajiet li jtejbu l-ħżin tal-karbonju f’riżervi ġeoloġiċi, fuq l-art jew fil-baħar, inkluż l-oċeani, u fi prodotti li jservu fit-tul. Jenħtieġ li l-attivitajiet jinkludu prattika jew proċess wieħed jew aktar li jassorbu l-karbonju mill-atmosfera. Ċerti attivitajiet, bħal dawk ibbażati fuq l-użu tal-faħam bijoloġiku, jistgħu jirriżultaw f’tipi differenti ta’ benefiċċji netti tal-assorbiment tal-karbonju u d-durati tal-ħżin tal-karbonju, skont il-kundizzjonijiet speċifiċi li taħthom iseħħu l-attivitajiet. Għaldaqstant, jenħtieġ li jiġu stabbiliti regoli xierqa ta’ monitoraġġ u responsabbiltà fil-metodoloġiji ta’ ċertifikazzjoni applikabbli li għandhom jiġu stabbiliti fil-livell tal-Unjoni skont dan ir-Regolament.

(10)

Fil-każ tal-kultivazzjoni karbonika, l-attivitajiet rilevanti jistgħu jinkludu prattiki u proċessi mwettqa fl-ekosistemi tal-baħar u tal-kosta. L-attivitajiet rilevanti jistgħu jinkludu wkoll prattiki jew proċessi li jnaqqsu l-emissjonijiet tal-gassijiet serra mill-ħamrija jew li jirriżultaw fit-tnaqqis tar-rilaxx tal-karbonju fl-atmosfera minn raggruppamenti tal-karbonju fil-ħamrija, kif elenkati fit-Taqsima B, il-punti (e) u (f), tal-Anness I tar-Regolament (UE) 2018/841, kif inhu l-każ, pereżempju, għal attivitajiet li jtejbu l-ġestjoni tal-ħamrija jew li jirrestawraw torbieri degradati. Barra minn hekk, ittnaqqis tal-emissjonijiet mill-ħamrija agrikola, li jikkorrispondi għall-emissjonijiet mill-kategorija tas-sorsi tal-IPCC tal-agrikoltura, sottokategorija tal-ħamrija agrikola, kif irrapportat fit-tabella 3.D tat-tabelli tal-format tar-rapportar komuni skont il-linji gwida ta’ rapportar tal-UNFCCC dwar l-inventarji annwali għall-Partijiet inklużi fl-Anness I ta’ dik il-Konvenzjoni, jenħtieġ li jiġi inkluż ukoll fil-kwantifikazzjoni tal-attivitajiet tal-kultivazzjoni karbonika dment li dak it-tnaqqis tal-emissjonijiet jirriżulta minn attività li, b’mod ġenerali, tnaqqas l-emissjonijiet tal-karbonju mir-raggruppamenti tal-karbonju fil-ħamrija jew iżżid l-assorbiment tal-karbonju f’raggruppamenti tal-karbonju bijoġeniku. Għall-kuntrarju, jenħtieġ li attivitajiet, li la jirriżultaw f’assorbiment tal-karbonju u lanqas fi tnaqqis tal-emissjonijiet mill-ħamrija, bħal proġetti ta’ deforestazzjoni evitati jew proġetti tal-enerġija rinnovabbli, ma jiġux inklużi fil-kamp ta’ applikazzjoni tal-qafas ta’ ċertifikazzjoni tal-Unjoni.

(11)

Dan ir-Regolament jenħtieġ li jistabbilixxi r-rekwiżiti li permezz tagħhom l-assorbiment tal-karbonju u t-tnaqqis tal-emissjonijiet mill-ħamrija jkunu eliġibbli għaċ-ċertifikazzjoni skont il-qafas ta’ ċertifikazzjoni tal-Unjoni. Għal dak il-għan, jenħtieġ li l-assorbimenti tal-karbonju u t-tnaqqis tal-emissjonijiet mill-ħamrija jiġu kkwantifikati b’mod preċiż u robust, u jenħtieġ li jiġu ġġenerati biss minn attivitajiet li jiġġeneraw benefiċċju ta’ assorbiment nett tal-karbonju jew benefiċċju nett ta’ tnaqqis tal-emissjonijiet mill-ħamrija, ikunu addizzjonali u jkollhom l-għan li jiżguraw il-ħżin fit-tul tal-karbonju. Jenħtieġ li ma jagħmlu l-ebda ħsara sinifikanti lill-ambjent u jenħtieġ li jkunu jistgħu jirriżultaw f’kobenefiċċju fir-rigward tal-objettivi ta’ sostenibbiltà. Jenħtieġ li l-assorbiment tal-karbonju u t-tnaqqis tal-emissjonijiet mill-ħamrija jkunu soġġetti għal awditjar ta’ parti terza indipendenti mwettaq minn korpi ta’ ċertifikazzjoni sabiex jiġu żgurati l-kredibbiltà u l-affidabbiltà tal-proċess ta’ ċertifikazzjoni. Barra minn hekk, jenħtieġ li dan ir-Regolament jistabbilixxi regoli dwar il-ħruġ u l-użu ta’ unitajiet iċċertifikati.

(12)

Regoli obbligatorji tal-Unjoni dwar l-ipprezzar tal-karbonju stabbiliti permezz tad-Direttiva 2003/87/KE jirregolaw it-trattament tal-emissjonijiet minn attivitajiet koperti minn dik id-Direttiva. Jenħtieġ li dan ir-Regolament ikun mingħajr preġudizzju għad-Direttiva 2003/87/KE, ħlief fir-rigward taċ-ċertifikazzjoni tal-qbid u l-ħżin tal-emissjonijiet tas-CO2 minn bijofjuwils, bijolikwidi u fjuwils tal-bijomassa li jissodisfaw il-kriterji tas-sostenibbiltà u tal-iffrankar tal-emissjonijiet tal-gassijiet serra stabbiliti skont id-Direttiva (UE) 2018/2001 tal-Parlament Ewropew u tal-Kunsill (9), bi kwalunkwe aġġustament meħtieġ għall-applikazzjoni skont id-Direttiva 2003/87/KE, kif stabbilit fl-atti ta’ implimentazzjoni msemmija fl-Artikolu 14 tad-Direttiva 2003/87/KE, f’konformità mal-Anness IV tad-Direttiva 2003/87/KE.

(13)

Jenħtieġ li attività tirriżulta f’benefiċċju nett ta’ assorbiment ta’ karbonju jew f’benefiċċju nett ta’ tnaqqis ta’ emissjonijiet mill-ħamrija, b’hekk turi li qed tħalli impatt klimatiku pożittiv. Jenħtieġ li l-benefiċċju tal-assorbiment nett tal-karbonju jew il-benefiċċju nett tat-tnaqqis tal-emissjonijiet tal-karbonju tal-ħamrija jiġu kwantifikati wara żewġ passi.

(14)

Fl-ewwel pass għall-kwantifikazzjoni tal-benefiċċju nett tal-assorbiment tal-karbonju jew tal-benefiċċju nett tat-tnaqqis tal-emissjonijiet mill-ħamrija, jenħtieġ li l-operaturi jikkwantifikaw l-ammont ta’ assorbiment addizzjonali tal-karbonju jew it-tnaqqis tal-emissjonijiet mill-ħamrija li attività tkun iġġenerat meta mqabbla ma’ linja bażi. Fil-każ tal-kultivazzjoni karbonika, il-mod ta’ kwantifikazzjoni tal-assorbiment tal-karbonju jew it-tnaqqis tal-emissjonijiet mill-ħamrija jenħtieġ li jiżguraw li kwalunkwe rilaxx tal-karbonju li jseħħ f’raggruppament tal-karbonju jitqies b’mod xieraq fil-kwantifikazzjoni tal-benefiċċju nett tal-attività. Jenħtieġ li l-metodoloġiji ta’ ċertifikazzjoni jistabbilixxu linji bażi standardizzati li jenħtieġ li jkunu rappreżentattivi ħafna tal-prestazzjoni standard ta’ prattiki u proċessi komparabbli f’ċirkostanzi soċjali, ekonomiċi, ambjentali, regolatorji u teknoloġiċi simili u tqis il-kuntest ġeografiku, inkluż il-kundizzjonijiet pedoklimatiċi u regolatorji lokali. Dan l-approċċ għall-istabbiliment tal-linji bażi standardizzati jenħtieġ li jiġi ppreferut għaliex jiżgura l-oġġettività, jimminimizza l-kostijiet tal-konformità u kostijiet amministrattivi oħra, u jirrikonoxxi b’mod pożittiv l-azzjoni ta’ dawk li daħlu l-ewwel li diġà kienu involuti f’attivitajiet eliġibbli. Fil-kuntest tal-kultivazzjoni karbonika, jenħtieġ li jiġu ċċertifikati biss il-prattiki u l-proċessi li jmorru lil hinn mill-prattika komuni. Għalhekk, jenħtieġ li attività speċifika tal-kultivazzjoni karbonika ma tiġix ippremjata jekk tkun diġà adottata b’mod wiesa’ f’reġjun b’kundizzjonijiet pedoklimatiċi u regolatorji simili. Il-linji bażi standardizzata jenħtieġ li jiżguraw li, ladarba attività ssir il-prassi komuni, tali attività ma tkunx tista’ tiġi ċċertifikata aktar. Għal dak l-għan, jenħtieġ li l-Kummissjoni tirrieżamina mill-inqas kull ħames snin u taġġorna, fejn xieraq, il-linji bażi standardizzati fid-dawl taċ-ċirkostanzi regolatorji li qed jevolvu u tal-aħħar evidenza xjentifika disponibbli, biex tirriflettiżviluppi soċjali, ekonomiċi, ambjentali, regolatorji u teknoloġiċi u biex tħeġġeġ ambizzjoni akbar maż-żmien f’konformità mal-Ftehim ta’ Pariġi. Barra minn hekk, jenħtieġ li jiġi promoss l-użu ta’ teknoloġiji diġitali disponibbli, inkluż il-bażijiet tad-data elettroniċi u s-sistemi ta’ informazzjoni ġeografika, it-telerilevament, is-sistemi l-ġodda ta’ kwantifikazzjoni tal-karbonju fuq il-post, l-intelliġenza artifiċjali u l-apprendiment awtomatiku, u l-użu ta’ mapep elettroniċi biex jitnaqqsu l-kostijiet li jirriżultaw mill-istabbiliment ta’ linji bażi standardizzati u biex tiġi żgurata r-robustezza tal-monitoraġġ tal-attivitajiet. Madankollu, meta ma jkunx possibbli li jiġu stabbiliti tali linji bażi standardizzati, jenħtieġ li tintuża linja bażi speċifika għall-attività bbażata fuq il-prestazzjoni individwali tal-operatur. Jenħtieġ li l-linji bażi speċifiċi għall-attività jiġu aġġornati mill-operatur fil-bidu ta’ kull perjodu ta’ attività, sakemm ma jkunx iddikjarat mod ieħor fil-metodoloġiji ta’ ċertifikazzjoni applikabbli.

(15)

It-tieni pass għall-kwantifikazzjoni tal-benefiċċju nett jenħtieġ li jikkonsisti fit-tnaqqis ta’ kwalunkwe emissjoni ta’ gassijiet serra assoċjata li sseħħ matul iċ-ċiklu tal-ħajja tal-attività u relatata mal-implimentazzjoni tal-attività. L-emissjonijiet rilevanti ta’ gassijiet serra li jenħtieġ li jitqiesu jinkludu l-emissjonijiet diretti, bħal dawk li jirriżultaw mill-użu ta’ fertilizzanti, sustanzi kimiċi, fjuwil jew enerġija, inputs oħra ta’ materjal u trasportazzjoni, jew emissjonijiet indiretti, bħal dawk li jirriżultaw mit-tibdil fl-użu tal-art, b’riskji konsegwenti għas-sigurtà tal-ikel minħabba l-ispostament tal-produzzjoni agrikola, jew effetti ta’ spostament minħabba domanda konkorrenti għall-enerġija jew għas-sħana mormija. Jenħtieġ li kwalunkwe żieda fl-emissjonijiet ta’ gassijiet serra attribwita għall-implimentazzjoni tal-attività titnaqqas b’mod xieraq mill-benefiċċju nett ta’ assorbiment tal-karbonju jew mill-benefiċċju nett tat-tnaqqis tal-emissjonijiet mill-ħamrija, f’konformità mar-regoli tekniċi stabbiliti fil-metodoloġija ta’ ċertifikazzjoni applikabbli. Tnaqqis fl-emissjonijiet ta’ gassijiet serra li jirriżulta mill-implimentazzjoni tal-attività, bl-eċċezzjoni tat-tnaqqis tal-emissjonijiet mill-ħamrija agrikola, jenħtieġ li ma jitqiesx biex jiġi kkwantifikat il-benefiċċju nett tal-assorbiment tal-karbonju jew il-benefiċċju nett tat-tnaqqis tal-emissjonijiet mill-ħamrija, iżda jenħtieġ li jitqies li huwa jipprovdi kobenefiċċju lejn l-objettiv tas-sostenibbiltà tal-mitigazzjoni tat-tibdil fil-klima u jiġi rrapportat fuq iċ-ċertifikati tal-konformità. Tali tnaqqis fl-emissjonijiet ta’ gassijiet serra, bħall-kobenefiċċji l-oħra tas-sostenibbiltà, jista’ jżid il-valur tal-assorbiment tal-karbonju ċċertifikat jew tat-tnaqqis tal-emissjonijiet mill-ħamrija.

(16)

Operaturi li jwettqu attivitajiet koperti minn dan ir-Regolament jenħtieġ li jinkludu kwalunkwe persuna fiżika jew ġuridika jew entità pubblika li topera jew li tikkontrolla attività, jew li lilha tkun ġiet delegata setgħa ekonomika deċiżiva fuq il-funzjonament tekniku tal-attività. Fil-każ tal-kultivazzjoni karbonika, jenħtieġ li d-definizzjoni ta’ “operatur” tapplika għal “bidwi” kif definit fl-Artikolu 3, il-punt (1), tar-Regolament (UE) 2021/2115 tal-Parlament Ewropew u tal-Kunsill (10), għal kwalunkwe persuna oħra li timmaniġġa attività f’ambjent terrestri jew kostali, għal sid jew maniġer ta’ foresta kif definit mil-liġi nazzjonali, jew għal entità pubblika kompetenti. Jenħtieġ li “grupp ta’ operaturi” tkopri kwalunkwe entità ġuridika li tirrappreżenta mill-inqas żewġ operaturi, inkluż kooperattivi jew organizzazzjonijiet tal-produtturi jew gruppi tal-produtturi, u jiżgura li dawk l-operaturi jikkonformaw ma’ dan ir-Regolament.

(17)

Attività tirriżulta f’benefiċċju nett ta’ assorbiment tal-karbonju meta l-assorbiment tal-karbonju li jaqbeż il-linja bażi jegħleb kwalunkwe żieda fl-emissjonijiet ta’ gassijiet serra assoċjati mal-implimentazzjoni ta’ dik l-attività. Pereżempju, fil-każ tal-assorbiment permanenti tal-karbonju li jinjetta l-karbonju taħt l-art, l-ammont ta’ karbonju maħżun b’mod permanenti jenħtieġ li jaqbeż l-emissjonijiet tal-gassijiet serra relatati mal-enerġija mill-proċess industrijali. Bl-istess mod, fil-każ tat-tnaqqis tal-emissjonijiet permezz ta’ ħamrija mill-kultivazzjoni karbonika, il-benefiċċju nett tat-tnaqqis tal-emissjonijiet mill-ħamrija huwa pożittiv jekk it-tnaqqis fl-emissjonijiet mill-ħamrija meta mqabbel mal-linji bażi jaqbeż kwalunkwe żieda fil-gassijiet serra assoċjati mal-implimentazzjoni tal-attività. L-attivitajiet tal-kultivazzjoni karbonika ġeneralment itejbu l-kwalità tal-ħamrija, li għandha impatt pożittiv fuq ir-reżiljenza u l-produttività tal-ħamrija, iżda f’xi ċirkostanzi, jistgħu jiġġeneraw ukoll tnaqqis fil-produzzjoni tal-ikel u għalhekk iwasslu għal effett ta’ rilokazzjoni tal-emissjonijiet tal-karbonju minn tibdil indirett fl-użu tal-art, u għaldaqstant l-emissjonijiet indiretti relatati jenħtieġ li jitqiesu. Kwalunkwe karbonju maqbud u maħżun mill-afforestazzjoni jew mit-tnaqqis tal-emissjonijiet mill-ħamrija permezz tat-tixrib mill-ġdid tat-torbieri jenħtieġ li jaqbeż l-emissjonijiet mill-makkinarju li jintuża biex titwettaq l-attività jew mill-emissjonijiet tat-tibdil indirett fl-użu tal-art li jistgħu jiġu kkawżati mir-rilokazzjoni tal-emissjonijiet tal-karbonju.

(18)

Jenħtieġ li l-assorbiment tal-karbonju u t-tnaqqis tal-emissjonijiet mill-ħamrija, kif ukoll l-emissjonijiet diretti u indiretti korrispondenti ta’ gassijiet serra assoċjati, jiġu kkwantifikati b’mod rilevanti, konservattiv, preċiż, sħiħ, konsistenti, trasparenti u komparabbli. Jenħtieġ li l-inċertezzi fil-kwantifikazzjoni jiġu rrappurtati u kkalkulati għalihom kif dovut b’mod konservattiv sabiex jiġi limitat ir-riskju ta’ sopravalutazzjoni tal-kwantità ta’ CO2 assorbit mill-atmosfera jew ta’ sottovalutazzjoni tal-kwantità ta’ emissjonijiet diretti u indiretti ta’ gassijiet serra ġġenerati minn attività. L-assorbiment tal-karbonju u t-tnaqqis mill-emissjonijiet tal-ħamrija temporanji ġġenerati mill-kultivazzjoni karbonika jenħtieġ li jiġu kkwantifikati b’livell għoli ta’ akkuratezza biex tiġi żgurata l-ogħla kwalità u jixxejnu l-inċertezzi; u jenħtieġ li jkunu bbażati, fejn fattibbli, fuq l-użu ta’ metodoloġiji tas-saff 3 f’konformità mal-Linji Gwida 2006 tal-IPCC għall-Inventarji Nazzjonali tal-Gassijiet Serra u kwalunkwe rfinar ulterjuri għal dawn il-Linji Gwida 2006 tal-IPCC. Barra minn hekk, sabiex jiġu inċentivati s-sinerġiji bejn l-objettivi tal-Unjoni dwar il-klima u l-bijodiversità, jeħtieġ li jkun meħtieġ monitoraġġ imtejjeb tal-art, u b’hekk tingħata għajnuna għall-protezzjoni u għat-tisħiħ tar-reżiljenza tal-assorbimenti tal-karbonju bbażati fuq in-natura madwar l-Unjoni. Il-monitoraġġ tal-emissjonijiet u tal-assorbiment jeħtieġ li jirrifletti mill-qrib dawk is-sinerġiji, jenħtieġ li jkun ibbażat fuq taħlita xierqa ta’ kejl fuq il-post b’telerilevament jew mudellar f’konformità mar-regoli li jinsabu fil-metodoloġija taċ-ċertifikazzjoni applikabbli, jenħtieġ li jagħmel l-aħjar użu mit-teknoloġiji avvanzati disponibbli fil-programmi tal-Unjoni, bħall-komponent Copernicus tal-Programm Spazjali tal-Unjoni stabbilit bir-Regolament (UE) 2021/696 tal-Parlament Ewropew u tal-Kunsill (11), jenħtieġ li jagħmel użu sħiħ tal-għodod diġà eżistenti, u jenħtieġ li jiżgura l-konsistenza mal-inventarji nazzjonali tal-gassijiet serra.

(19)

Fl-għażla tal-metodi rilevanti għall-kalkolu tal-emissjonijiet u tal-assorbiment tal-gassijiet serra, jenħtieġ li jiġi applikat approċċ konservattiv fuq l-istimi skont il-Linji Gwida tal-IPCC 2006 tal-Inventarju Nazzjonali tal-Gassijiet Serra, fejn applikabbli. Dan ifisser li l-metodi użati jenħtieġ li jirriżultaw fi stimi konservattivi tal-emissjonijiet jew tal-assorbiment sabiex l-emissjonijiet ma jiġux sottovalutati u l-assorbiment ma jiġix sopravalutat.

(20)

Il-qafas ta’ ċertifikazzjoni tal-Unjoni jenħtieġ li jinċentiva l-attivitajiet li huma addizzjonali, jiġifieri dawk li jmorru lil hinn mill-prattika standard. Għalhekk, dawk l-attivitajiet jenħtieġ li jmorru lil hinn mir-rekwiżiti statutorji fil-livell ta’ operatur individwali, jiġifieri, jenħtieġ li l-operaturi jwettqu attivitajiet li ma humiex diġà imposti fuqhom mil-liġi applikabbli. Barra minn hekk, l-attivitajiet jenħtieġ li jsiru vijabbli finanzjarjament minħabba l-effett ta’ inċentiv taċ-ċertifikazzjoni. Tali effett huwa preżenti meta l-inċentiv li jinħoloq mid-dħul potenzjali li jirriżulta miċ-ċertifikazzjoni jibdel l-imġiba tal-operaturi b’tali mod li jinvolvu ruħhom fl-attività addizzjonali biex jiksbu assorbiment addizzjonali tal-karbonju jew tnaqqis addizzjonali tal-emissjonijiet tmill-ħamrija.

(21)

Linja bażi standardizzata jenħtieġ li tirrifletti l-kundizzjonijiet statutorji u tas-suq li fihom isseħħ l-attività. Jekk attività tiġi imposta fuq l-operaturi mil-liġi applikabbli, jew ma jkollha bżonn l-ebda inċentiv biex isseħħ, il-prestazzjoni tagħha tiġi riflessa f’tali linji bażi standardizzati. Għal din ir-raġuni, attività li tiġġenera assorbiment tal-karbonju jew tnaqqis tal-emissjonijiet mill-ħamrija li jaqbżu tali linja bażi jenħtieġ li tiġi preżunta li hija addizzjonali. Għalhekk, l-użu ta’ linja bażi standardizzata jissimplifika d-dimostrazzjoni tal-addizzjonalità għall-operaturi u jnaqqas il-piż amministrattiv tal-proċess ta’ ċertifikazzjoni, li huwa partikolarment importanti fil-każ ta’ operaturi fuq skala żgħira.

(22)

Hemm ir-riskju li l-karbonju atmosferiku jew bijoġeniku li jinqabad uli jinħażen permezz ta’ assorbiment permanenti tal-karbonju, il-kultivazzjoni karbonika jew il-ħżin tal-karbonju fi prodotti jista’ jiġi rilaxxat fl-atmosfera minħabba kawżi naturali jew antropoġeniċi. Għalhekk, jenħtieġ li l-operaturi jieħdu l-miżuri preventivi rilevanti kollha biex jimmitigaw dawk ir-riskji u jimmonitorjaw kif xieraq jekk il-karbonju jkunx għadu qed jinħażen matul il-perjodu ta’ monitoraġġ stabbilit għall-attività rilevanti Il-validità tal-unità ċċertifikata jenħtieġ li tiddependi fuq id-durata mistennija tal-ħżin u r-riskji differenti tat-treġġigħ lura assoċjati mal-attività partikolari. L-assorbiment permanenti tal-karbonju jagħti biżżejjed ċertezza dwar il-ħżin ta’ durata twila ħafna, jiġifieri, ta’ diversi sekli. Il-prodotti b’karbonju magħqud kimikament b’mod permanenti jippreżentaw riskju baxx ħafna jew l-ebda riskju ta’ rilaxx tal-karbonju. Il-kultivazzjoni karbonika u l-ħżin tal-karbonju fil-prodotti huma aktar esposti għar-riskju ta’ rilaxx volontarju jew involontarju tal-karbonju fl-atmosfera. Sabiex jittieħed kont ta’ dak ir-riskju, il-validità tal-unità tas-sekwestru tal-kultivazzjoni karbonika u l-unità tal-ħżin tal-karbonju fil-prodott jenħtieġ li tkun soġġetta għal data ta’ skadenza li tikkoinċidi ma’ tmiem il-perjodu ta’ monitoraġġ rilevanti, li jenħtieġ li jkopri mill-anqas 35 sena ta’ ħżin tal-karbonju fil-prodotti. Minn hemm ’il quddiem, il-karbonju maqbud u maħżun jenħtieġ li jitqies rilaxxat fl-atmosfera, sakemm l-operatur jew il-grupp ta’ operaturi ma jikkommettux ruħhom li jestendu l-perjodu ta’ monitoraġġ. Jenħtieġ li l-metodoloġiji ta’ ċertifikazzjoni jippromwovu l-estensjoni tal-perjodu tal-monitoraġġ tal-attivitajiet rilevanti tal-kultivazzjoni karbonika, bl-għan li jiżguraw li s-CO2 maqbud jinħażen fit-tul fil-ħamrija jew fil-bijomassa u li jipprovdu inċentivi finanzjarji lill-operaturi tal-kultivazzjoni karbonika fuq terminu twil. Għal dak il-għan, huwa xieraq li l-metodoloġiji ta’ ċertifikazzjoni jinċentivaw lill-operaturi li jestendu l-perjodu tal-monitoraġġ għal diversi drabi, bil-għan li jaħżnu l-karbonju maqbud għal mill-anqas diversi deċennji.

(23)

Minbarra l-miżuri li jittieħdu biex jiġi mminimizzat ir-riskju ta’ rilaxx tal-karbonju fl-atmosfera matul il-perjodu ta’ monitoraġġ, jenħtieġ li l-metodoloġiji ta’ ċertifikazzjoni jinkludu mekkaniżmi ta’ responsabbiltà xierqa biex jiġu indirizzati każijiet ta’ treġġigħ lura. Il-metodoloġiji ta’ ċertifikazzjoni jenħtieġ li jinkludu wkoll regoli li jindirizzaw ir-riskju ta’ falliment tal-mekkaniżmi ta’ responsabbiltà. Mekkaniżmi bħal dawn jistgħu jinkludu riżervi kollettivi u mekkaniżmi ta’ assigurazzjoni bil-quddiem. Sabiex tiġi evitata r-regolamentazzjoni doppja, jenħtieġ li japplikaw mekkaniżmi ta’ responsabbiltà fir-rigward tal-ħżin ġeoloġiku u r-rilokazzjoni tal-emissjonijiet tas-CO2, u l-miżuri korrettivi rilevanti, stabbiliti bid-Direttiva 2003/87/KE u bid-Direttiva 2009/31/KE tal-Parlament Ewropew u tal-Kunsill (12). Barra minn hekk, sabiex tiġi żgurata l-konsistenza regolatorja, jenħtieġ li l-metodoloġiji ta’ ċertifikazzjoni applikabbli jinkludu regoli ta’ monitoraġġ u mekkaniżmi ta’ responsabbiltà li huma konsistenti mar-regoli li jikkonċernaw il-karbonju magħqud kimikament b’mod permanenti fil-prodotti stabbiliti f’atti delegati adottati skont id-Direttiva 2003/87/KE.

(24)

L-attivitajiet tal-assorbiment tal-karbonju permanenti, tal-kultivazzjoni karbonika u tal-ħżin tal-karbonju fil-prodotti għandhom potenzjal qawwi li jwasslu soluzzjonijiet ta’ benefiċċju reċiproku għas-sostenibbiltà, anki jekk il-kompromessi ma jistgħux jiġu esklużi. Għalhekk, huwa xieraq li jiġu stabbiliti rekwiżiti minimi ta’ sostenibbiltà sabiex jiżguraw li dawk l-attivitajiet ma jagħmlux ħsara sinifikanti lill-ambjent u jkunu jistgħu jiġġeneraw kobenefiċċji għall-objettivi: tat-tibdil fil-klima u l-adattament għalih; il-protezzjoni u r-restawr tal-bijodiversità u tal-ekosistemi, inkluż is-saħħa tal-ħamrija u l-evitar tad-degradazzjoni tal-art; l-użu sostenibbli u l-protezzjoni tar-riżorsi tal-ilma u tal-baħar; it-tranżizzjoni lejn ekonomija ċirkolari, inkluż l-użu effiċjenti ta’ materjali b’bażi bijoloġika miksuba b’mod sostenibbli; u l-prevenzjoni u l-kontroll tat-tniġġis. Jenħtieġ li l-attivitajiet tal-kultivazzjoni karbonika jiġġeneraw mill-inqas kobenefiċċji għall-objettiv tal-protezzjoni u r-restawr tal-bijodiversità u tal-ekosistemi, inkluż is-saħħa tal-ħamrija kif ukoll l-evitar tad-degradazzjoni tal-art. Jenħtieġ li dawk ir-rekwiżiti minimi ta’ sostenibbiltà jqisu l-impatt tal-attività fl-Unjoni u barra minnha kif ukoll il-kundizzjonijiet lokali, u fejn xieraq, ikunu konsistenti mal-kriterji tekniċi tal-iskrinjar għall-prinċipju “la tagħmilx ħsara sinifikanti”, u li jkunu konsistenti mal-kriterji tas-sostenibbiltà u tal-iffrankar tal-emissjonijiet ta’ gassijiet serra għall-materja prima mill-foresti u mill-bijomassa tal-agrikoltura stabbiliti fid-Direttiva (UE) 2018/2001. Il-prattiki li jipproduċu effetti dannużi fuq il-bijodiversità, bħall-monokulturi tal-foresti li jipproduċu effetti dannużi fuq il-bijodiversità, jenħtieġ li ma jkunux eliġibbli għaċ-ċertifikazzjoni.

(25)

Il-prattiki tal-biedja u tal-forestrija li jassorbu s-CO2 mill-atmosfera jew li jnaqqsu l-emissjonijiet mill-ħamrija jikkontribwixxu għall-objettiv tan-newtralità klimatika u jenħtieġ li jiġu ppremjati, permezz tal-politika agrikola komuni jew permezz ta’ inizjattivi pubbliċi jew privati oħra. B’mod speċifiku, dan ir-Regolament jenħtieġ li jqis il-prattiki tal-biedja u tal-forestrija kif imsemmija fil-komunikazzjoni tal-Kummissjoni tal-15 ta’ Diċembru 2021 dwar iċ-Ċikli tal-Karbonju Sostenibbli, inkluż l-afforestazzjoni, ir-riforestazzjoni u l-attivitajiet relatati mal-ġestjoni sostenibbli tal-foresti; l-agroforestrija u forom oħra ta’ biedja mħallta; l-użu ta’ għelejjel tat-titwiq, ħdim ta’ konservazzjoni tal-għelejjel ta’ kopertura u żieda fil-karatteristiċi tal-pajsaġġ; il-konverżjoni ta’ raba’ maħdum għal raba’ mistrieħ jew żoni ta’ serħan tal-art għal art bil-ħaxix permanenti; u r-restawr tat-torbiera u tal-artijiet mistagħdra. Meta tiżviluppa metodoloġiji ta’ ċertifikazzjoni fil-kuntest tal-kultivazzjoni karbonika, jenħtieġ li l-Kummissjoni tqis il-ħtieġa li tikkontribwixxi għall-iżgurar tas-sigurtà tal-ikel, il-ħtieġa li tippromwovi l-protezzjoni u r-restawr tal-bijodiversità u l-ekosistemi, u l-ħtieġa li tevita l-akkwist tal-art għal skopijiet spekulattivi li jirriżultaw f’effetti negattivi fuq il-komunitajiet rurali, kif ukoll il-ħtieġa li tirrispetta d-drittijiet tal-komunitajiet lokali u tal-popli indiġeni affettwati minn dawk l-attivitajiet, fejn rilevanti f’konformità mal-liġi nazzjonali, kemm fl-Unjoni kif ukoll barra minnha. Jenħtieġ li tippromwovi dawk l-attivitajiet li għandhom l-akbar potenzjal li jipprovdu kobenefiċċji pożittivi għall-bijodiversità, kif ukoll tqis l-istruttura tal-foresti fit-tul, l-istabbiltà fit-tul tar-raggruppamenti tal-karbonju, is-saħħa tal-ekosistema, ir-reżiljenza u r-riskju ta’ disturbi naturali.

(26)

L-operaturi jew il-gruppi ta’ operaturi jenħtieġ li jkunu jistgħu jirrapportaw il-kobenefiċċji li jikkontribwixxu għall-objettivi ta’ sostenibbiltà lil hinn mir-rekwiżiti minimi ta’ sostenibbiltà. Għal dak il-għan, ir-rapportar tagħhom jenħtieġ li jikkonforma mal-metodoloġiji ta’ ċertifikazzjoni mfassla apposta għall-attivitajiet differenti tal-assorbiment tal-karbonju, żviluppati mill-Kummissjoni. Il-metodoloġiji ta’ ċertifikazzjoni jenħtieġ li, kemm jista’ jkun, jinċentivaw il-ġenerazzjoni ta’ kobenefiċċji għall-bijodiversità li jmorru lil hinn mir-rekwiżiti minimi ta’ sostenibbiltà, bil-ħsieb li jiġi ġġenerat primjum tas-suq għall-unitajiet iċċertifikati, billi jiġu inklużi, pereżempju, listi pożittivi ta’ attivitajiet meqjusa li jiġġeneraw kobenefiċċji. Dawk il-kobenefiċċji addizzjonali jagħtu aktar valur ekonomiku lill-unitajiet iċċertifikati u jirriżultaw fi dħul ogħla għall-operaturi. Fid-dawl ta’ dawk il-kunsiderazzjonijiet, huwa xieraq li l-Kummissjoni tagħti prijorità lill-iżvilupp ta’ metodoloġiji ta’ ċertifikazzjoni mfassla apposta dwar l-attivitajiet tal-kultivazzjoni karbonika li jipprovdu kobenefiċċji sinifikanti għall-bijodiversità, u jikkontribwixxu għall-ġestjoni sostenibbli tal-art agrikola u tal-foresti.

(27)

Jenħtieġ li l-Kummissjoni tistabbilixxi, permezz ta’ atti delegati, metodoloġiji ta’ ċertifikazzjoni dettaljati għat-tipi differenti ta’ attivitajiet previsti f’dan ir-Regolament filwaqt li tqis il-karatteristiċi speċifiċi tagħhom sabiex l-operaturi jkunu jistgħu japplikaw, b’mod standardizzat, verifikabbli, kosteffettiv u komparabbli, il-kriterji tal-kwalità stabbiliti f’dan ir-Regolament. Dawk il-metodoloġiji jenħtieġ li jiżguraw iċ-ċertifikazzjoni robusta u trasparenti tal-benefiċċju nett tal-assorbiment tal-karbonju jew tal-benefiċċju nett tat-tnaqqis tal-emissjonijiet mill-ħamrija ġġenerat mill-attività, filwaqt li jevitaw piż amministrattiv sproporzjonat fuq l-operaturi jew għall-grupp ta’ operaturi, b’mod partikolari fuq bdiewa b’azjenda agrikola żgħira u għas-sidien u l-maniġers tal-foresti żgħar, b’mod partikolari billi jippermettu l-użu ta’ regoli simplifikati ta’ ċertifikazzjoni u tal-awditjar bħall-awditjar ta’ grupp. Dawk il-metodoloġiji jenħtieġ li jiġu żviluppati f’konsultazzjoni mill-qrib mal-Grupp ta’ Esperti dwar l-Assorbiment tal-Karbonju stabbilit mill-Kummissjoni u mal-atturi interessati l-oħra kollha.. Jenħtieġ li l-metodoloġiji jkunu bbażati fuq l-aħjar evidenza xjentifika disponibbli, jibnu fuq skemi u metodoloġiji pubbliċi u privati eżistenti għaċ-ċertifikazzjoni tal-assorbiment tal-karbonju jew tat-tnaqqis tal-emissjonijiet mill-ħamrija, u jqisu kwalunkwe standard u regola rilevanti adottati fil-livell tal-Unjoni u f’dak nazzjonali.

(28)

Minħabba l-ħtieġa li l-assorbiment tal-karbonju jiżdied rapidament fl-Unjoni, jenħtieġ li l-Kummissjoni, fl-ewwel stadju tal-iżvilupp tal-metodoloġiji ta’ ċertifikazzjoni, tipprijoritizza l-attivitajiet li ġejjin: l-attivitajiet li huma l-aktar maturi, li jistgħu jagħtu kobenefiċċji ta’ sostenibbiltà jew li fir-rigward tagħhom il-liġi tal-Unjoni rilevanti għall-iżvilupp ta’ dawk il-metodoloġiji tkun diġà ġiet adottata; attivitajiet tal-kultivazzjoni karbonika li jikkontribwixxu għall-ġestjoni sostenibbli tal-art agrikola, il-foresti, u l-ambjent tal-baħar, kif ukoll attivitajiet li jaħżnu l-karbonju fi prodotti tal-kostruzzjoni bbażati fuq l-injam u b’bażi bijoloġika. Il-Fond għall-Innovazzjoni jistabbilixxi regoli rilevanti għall-iżvilupp ta’ metodoloġiji ta’ ċertifikazzjoni għall-bijoenerġija bil-qbid u l-ħżin tal-karbonju u bil-qbid dirett mill-arja. Sabiex tiġi evitata domanda mhux sostenibbli għall-materja prima tal-bijomassa, il-benefiċċji finanzjarji relatati maċ-ċertifikazzjoni jenħtieġ li ma jwasslux għal żieda fil-kapaċità ta’ impjant tal-bijoenerġija lil hinn minn dak li huwa meħtieġ għat-tħaddim tal-qbid u l-ħżin tal-karbonju. Huwa xieraq li l-metodoloġiji ta’ ċertifikazzjoni relatati mal-attivitajiet li jaħżnu l-karbonju fl-ambjent marittimu, inkluż l-oċeani, iqisu l-progress internazzjonali fir-rapportar dwar l-assorbiment tal-karbonju u l-aħħar informazzjoni xjentifika disponibbli u, meta disponibbli, is-sejbiet tar-rapport tal-Kummissjoni mħejji skont l-Artikolu 17(2) tar-Regolament (UE) 2018/841. Barra minn hekk, sabiex jiġi promoss l-użu sostenibbli u effiċjenti tar-riżorsi limitati tal-bijomassa, huwa xieraq li l-metodoloġiji ta’ ċertifikazzjoni relatati mal-attivitajiet li jużaw il-bijomassa jiżguraw li jiġi applikat il-prinċipju tal-użu kaskata tal-bijomassa kif stabbilit fl-Artikolu 3(3) tad-Direttiva (UE) 2018/2001, filwaqt li jiddependu fuq ir-regoli u l-proċeduri eżistenti u l-evitar tad-duplikazzjoni. Ir-regoli għall-implimentazzjoni mill-awtoritajiet nazzjonali ta’ dak il-prinċipju huma stabbiliti fl-Artikolu 3(3), (3a) u (3b) ta’ dik id-Direttiva.

(29)

Sabiex jiġi żgurat li l-proċess ta’ ċertifikazzjoni jkun kredibbli u affidabbli, jenħtieġ li l-attivitajiet ikunu soġġetti għal awditu indipendenti minn parti terza, imwettaq minn korpi ta’ ċertifikazzjoni. B’mod partikolari, l-attivitajiet kollha jenħtieġ li jkunu soġġetti għal awditu ta’ ċertifikazzjoni inizjali qabel l-implimentazzjoni tagħhom, li jivverifika l-konformità tagħhom mal-kriterji ta’ kwalità stabbiliti f’dan ir-Regolament, inkluż il-kwantifikazzjoni korretta tal-benefiċċji netti mistennija. L-attivitajiet kollha jenħtieġ li jkunu soġġetti wkoll għal awditi perjodiċi ta’ ċertifikazzjoni mill-ġdid mill-inqas kull ħames snin, jew inkella aktar ta’ spiss kif speċifikat fil-metodoloġija ta’ ċertifikazzjoni applikabbli abbażi tal-karatteristiċi tal-attività rilevanti. Jenħtieġ li l-awditi taċ-ċertifikazzjoni mill-ġdid jivverifikaw il-konformità tal-attività mal-kriterji tal-kwalità ta’ dan ir-Regolament u l-benefiċċju nett tal-assorbiment tal-karbonju jew il-benefiċċju nett tat-tnaqqis tal-emissjonijiet mill-ħamrija ġġenerat mill-attività. Bħala riżultat ta’ awditu ta’ ċertifikazzjoni mill-ġdid, jenħtieġ li l-korp ta’ ċertifikazzjoni joħroġ rapport tal-awditu ta’ ċertifikazzjoni mill-ġdid li jinkludi sommarju u fejn xieraq, ċertifikat aġġornat ta’ konformità. Jenħtieġ li jkun possibbli li jitwettqu awditi ta’ ċertifikazzjoni mill-ġdid aktar frekwenti, inkluż kull sena, għall-attivitajiet kollha, b’mod partikolari l-attivitajiet tal-kultivazzjoni karbonika. Sabiex jitnaqqsu l-kostijiet amministrattivi taċ-ċertifikazzjoni u taċ-ċertifikazzjoni mill-ġdid, jenħtieġ li l-operaturi jkunu jistgħu jużaw informazzjoni ġeografika affidabbli pprovduta mill-aġenziji tal-pagamenti permezz tas-sistema ta’ identifikazzjoni għall-bċejjeċ tar-raba’ kif jinsab fir-Regolament (UE) 2021/2116 tal-Parlament Ewropew u tal-Kunsill (13). Għal dak il-għan, il-Kummissjoni jenħtieġ li tadotta atti ta’ implimentazzjoni biex tistabbilixxi l-istruttura, il-format u d-dettalji tekniċi ta’ pjan ta’ attività u ta’ pjan ta’ monitoraġġ, u tar-rapporti tal-awditu ta’ ċertifikazzjoni u ta’ ċertifikazzjoni mill-ġdid.

(30)

Huwa essenzjali li l-operaturi tal-kultivazzjoni karbonika jingħataw għarfien, għodod u metodi mtejba għal valutazzjoni u l-ottimizzazzjoni aħjar ta’ assorbiment iċċertifikat tal-karbonju u ta’ tnaqqis tal-emissjonijiet mill-ħamrija għall-implimentazzjoni kosteffiċjenti tal-azzjonijiet ta’ mitigazzjoni u biex jiġi żgurat l-involviment tal-operaturi fil-kultivazzjoni karbonika. Dan huwa partikolarment rilevanti għall-bdiewa tal-Unjoni b’azjenda agrikola żgħira jew għas-sidien u l-maniġers tal-foresti żgħar li spiss ma jkollhomx l-għarfien u l-għarfien espert meħtieġ biex jimplimentaw l-attivitajiet tal-kultivazzjoni karbonika u biex jikkonformaw mal-kriterji ta’ kwalità meħtieġa u mal-metodoloġiji ta’ ċertifikazzjoni relatati. Għalhekk, huwa xieraq li l-organizzazzjonijiet tal-produtturi jintalbu jiffaċilitaw il-forniment ta’ servizzi konsultattivi rilevanti lill-membri tagħhom. Il-politika agrikola komuni u l-għajnuna nazzjonali mill-Istat jistgħu, fost l-oħrajn, ikunu mezz sabiex jipprovdu appoġġ finanzjarju għal proġetti interattivi ta’ innovazzjoni li jinvolvu lill-bdiewa u lis-sidien u lill-maniġers tal-foresti, u għall-forniment ta’ servizzi ta’ konsulenza, l-iskambju tal-għarfien, it-taħriġ, u l-azzjonijiet ta’ informazzjoni.

(31)

Fil-komunikazzjoni tagħha tas-6 ta’ Frar 2024 bl-isem “Securing our future – Europe’s 2040 climate target and path to climate neutrality by 2050 building a sustainable, just and prosperous society” (Niżguraw il-futur tagħna – il-mira klimatika Ewropea għall-2040 u l-perkors għan-newtralità klimatika sal-2050 aħna u nibnu soċjetà sostenibbli, prospera u ġusta), il-Kummissjoni turi li l-ħolqien ta’ aktar opportunitajiet ta’ negozju għall-katina tal-valur agroalimentari sostenibbli u l-ingranaġġ ta’ fondi privati f’sinerġija mal-fondi pubbliċi huma kruċjali. Dan jista’ jsir b’mekkaniżmi ġodda bbażati fuq is-suq biex tingħata spinta lill-ikel sostenibbli, billi dan jista’ jirriżulta kemm fi prezzi tal-ikel aħjar biex jirrifletti s-sostenibbiltà, kif ukoll fi gwadann ġust għall-bdiewa u sors ġdid ta’ finanzjament għall-investimenti. Huma biss il-koordinazzjoni soda mal-atturi industrijali kollha fil-katina tal-valur tal-ikel kollha u enfasi fuq il-prattiki leali tan-negozju tul dik il-katina kollha li jistgħu jippermettu l-inċentivi t-tajba għal prattiki ta’ biedja sostenibbli, jiżguraw dħul diċenti u sostenibbli għall-bdiewa u jiġġeneraw introjtu biex jappoġġaw it-tranżizzjoni.

(32)

Sabiex jiġi żgurat li l-verifika tkun akkurata, robusta u trasparenti, il-korpi ta’ ċertifikazzjoni responsabbli għat-twettiq tal-proċess taċ-ċertifikazzjoni jenħtieġ li jkollhom il-kompetenzi u l-ħiliet meħtieġa u jenħtieġ li jiġu akkreditati minn korp nazzjonali ta’ akkreditazzjoni skont ir-Regolament (KE) Nru 765/2008 tal-Parlament Ewropew u tal-Kunsill (14) jew ikunu rikonoxxuti minn awtorità nazzjonali kompetenti. Sabiex jiġu evitati kunflitti ta’ interess possibbli, il-korpi ta’ ċertifikazzjoni jenħtieġ li jkunu kompletament indipendenti mill-operatur jew mill-grupp ta’ operaturi li jwettqu l-attività soġġetta għaċ-ċertifikazzjoni. Barra minn hekk, l-Istati Membri jenħtieġ li jikkontribwixxu biex jiżguraw l-implimentazzjoni korretta tal-proċess ta’ ċertifikazzjoni billi jissorveljaw t-tħaddim tal-korpi ta’ ċertifikazzjoni li huma akkreditati mill-awtoritajiet nazzjonali ta’ akkreditazzjoni, u billi jinformaw lill-korpi ta’ ċertifikazzjoni u l-iskemi ta’ ċertifikazzjoni rilevanti dwar is-sejbiet rilevanti ta’ nuqqas ta’ konformità.

(33)

L-iskemi ta’ ċertifikazzjoni jenħtieġ li jintużaw mill-operaturi biex juru l-konformità ma’ dan ir-Regolament. Għalhekk, l-iskemi ta’ ċertifikazzjoni jenħtieġ li joperaw abbażi ta’ regoli u proċeduri affidabbli u trasparenti u jenħtieġ li jiżguraw in-nonripudju tal-oriġini, u l-protezzjoni kontra l-frodi marbuta mal-informazzjoni u mad-data sottomessa mill-operaturi, kif ukoll l-akkuratezza, l-affidabbiltà, l-integrità ta’ tali informazzjoni u data. Jenħtieġ li jiżguraw ukoll li jkun hemm kontabbiltà korretta tal-unitajiet iċċertifikati tal-assorbiment tal-karbonju jew tat-tnaqqis tal-emissjonijiet mill-ħamrija, b’mod partikolari billi jiġi evitat l-għadd doppju. Għal dak il-għan, il-Kummissjoni jenħtieġ li tadotta atti ta’ implimentazzjoni li jistabbilixxu regoli tekniċi armonizzati dwar iċ-ċertifikazzjoni, inkluż standards adegwati ta’ affidabbiltà, trasparenza u kontabbiltà u ta’ awditjar indipendenti li għandhom jiġu applikati minn skemi ta’ ċertifikazzjoni, sabiex tiġi żgurata ċ-ċertezza legali meħtieġa fir-rigward tar-regoli applikabbli għall-operaturi u għall-iskemi ta’ ċertifikazzjoni. Sabiex jiġi żgurat proċess ta’ ċertifikazzjoni kosteffettiv, dawk ir-regoli tekniċi armonizzati dwar iċ-ċertifikazzjoni jenħtieġ li jkollhom ukoll l-objettiv li jnaqqsu piż amministrattiv mhux meħtieġ minn fuq l-operaturi, jew gruppi ta’ operaturi, b’mod partikolari minn fuq l-intrapriżi żgħar u ta’ daqs medju, inklużi l-bdiewa b’azjenda agrikola żgħira u s-sidien u l-maniġers tal-foresti żgħar.

(34)

Sabiex jiġi żgurat li l-kontroll taċ-ċertifikazzjoni jkun affidabbli u armonizzat, jenħtieġ li l-Kummissjoni tkun tista’ tadotta deċiżjonijiet li jirrikonoxxu skemi ta’ ċertifikazzjoni li jissodisfaw ir-rekwiżiti stabbiliti f’dan ir-Regolament, inkluż fir-rigward tal-kompetenza teknika, l-affidabbiltà, it-trasparenza u l-awditjar indipendenti. Tali deċiżjonijiet ta’ rikonoxximent jenħtieġ li jkunu limitati fiż-żmien u jenħtieġ li jsiru disponibbli għall-pubbliku. Għal dak l-għan, il-Kummissjoni jenħtieġ li tadotta atti ta’ implimentazzjoni dwar il-kontenut u l-proċessi tar-rikonoxximent tal-iskemi ta’ ċertifikazzjoni mill-Unjoni.

(35)

Id-dispożizzjonijiet tal-Konvenzjoni dwar l-Aċċess għall-Informazzjoni, il-Parteċipazzjoni tal-Pubbliku fit-Teħid ta’ Deċiżjonijiet u l-Aċċess għall-Ġustizzja fi Kwistjonijiet Ambjentali (il-“Konvenzjoni ta’ Aarhus”) tal-Kummissjoni Ekonomika għall-Ewropa tan-Nazzjonijiet Uniti, approvata permezz tad-Deċiżjoni tal-Kunsill 2005/370/KE (15), relatati mal-parteċipazzjoni pubblika u mal-aċċess għall-ġustizzja huma applikabbli, fejn rilevanti.

(36)

Sabiex jiġu żgurati t-trasparenza u t-traċċabbiltà sħiħa tal-unitajiet iċċertifikati, u sabiex jiġi evitat ir-riskju ta’ frodi u għadd doppju, il-Kummissjoni jenħtieġ li tistabbilixxi sa erba’ snin mid-data tad-dħul fis-seħħ ta’ dan ir-Regolament u minn hemm ’il quddiem iżżomm reġistru tal-Unjoni tal-assorbiment permanenti tal-karbonju, tal-kultivazzjoni karbonika u tal-ħżin tal-karbonju fil-prodotti (ir-“reġistru tal-Unjoni”). Jenħtieġ li l-Kummissjoni tqis ir-rapporti msemmija fl-Artikolu 30(5), il-punt (a), tad-Direttiva 2003/87/KE u l-Artikolu 17(3) tar-Regolament (UE) 2018/841. Fejn titqajjem kwistjoni marbuta ma’ frodi, jenħtieġ li l-Kummissjoni tinvestigaha u tieħu azzjoni xierqa, inkluż billi tħassar id-deċiżjonijiet rilevanti jew tikkanċella l-unitajiet affettwati. Pereżempju, jista’ jitqies li tkun twettqet frodi jekk jinħareġ aktar minn ċertifikat wieħed ta’ konformita’ għall-istess attività għaliex l-attività tkun ġiet irreġistrata taħt żewġ skemi differenti ta’ ċertifikazzjoni jew tkun ġiet irreġistrata darbtejn taħt l-istess skema. Jista’ jitqies li tkun twettqet frodi wkoll meta l-istess ċertifikat ta’ konformita’ jintuża diversi drabi biex issir l-istess talba bbażata fuq attività jew unità ċċertifikata. Jenħtieġ li r-reġistru tal-Unjoni juża sistemi awtomatizzati, inkluż mudelli elettroniċi, biex jagħmel aċċessibbli għall-pubbliku, bħala minimu, l-informazzjoni li tinsab fl-Anness ta’ dan ir-Regolament. Jenħtieġ li l-operazzjoni tar-reġistru tal-Unjoni tiġi ffinanzjata minn tariffi fissi annwali li jitħallsu mill-utenti, proporzjonati għall-użu tagħhom tar-reġistru tal-Unjoni, u suffiċjenti sabiex jikkontribwixxu għall-kopertura tal-kostijiet tal-istabbiliment tiegħu u tal-kostijiet operatorji annwalitiegħu, bħal dawk għall-persunal jew l-għodod tal-IT. Jenħtieġ li r-riżorsi minn dawn it-tariffi jikkostitwixxu dħul assenjat estern għall-fini tar-Regolament (UE, Euratom) 2018/1046 tal-Parlament Ewropew u tal-Kunsill (16). B’mod partikolari, jenħtieġ li jkopri l-kostijiet tal-għodod, is-servizzi u s-sigurtà tal-IT, inkluż is-sistemi ta’ operazzjoni u ta’ liċenzjar, u l-kostijiet tal-persunal li jaħdem fuq il-ġestjoni tar-reġistru tal-Unjoni. Jenħtieġ li l-Kummissjoni, permezz ta’ atti delegati, tistabbilixxi r-rekwiżiti meħtieġa dwar ir-reġistru tal-Unjoni u l-fatturi li għandhom jiġu kkunsidrati għad-determinazzjoni tal-livell tat-tariffi tal-utent u l-irkupru tagħhom. Meta tistabbilixxi dawk ir-rekwiżiti, jenħtieġ li l-Kummissjoni tqis ukoll il-ħtieġa li tiżgura sorveljanza suffiċjenti tan-negozjar ta’ unitajiet iċċertifikati. Jenħtieġ li matul kull l-aħħar trimestru tas-sena ta’ qabel is-sena kalendarja tal-applikazzjoni, il-Kummissjoni tadotta att ta’ implimentazzjoni wieħed jew aktar biex tistabbilixxi jew tirrevedi l-ammonti individwali ta’ tariffi tal-utent li għandhom jiġu applikati għal dik is-sena kalendarja. Sakemm jiġi stabbilit ir-reġistru tal-Unjoni, jenħtieġ li l-iskemi ta’ ċertifikazzjoni rikonoxxuti mill-Kummissjoni jistabbilixxu u jżommu r-reġistri ta’ ċertifikazzjoni interoperabbli. Sabiex jiġi żgurat li jkun hemm trasparenza u traċċabbiltà sħiħa fir-rigward tal-unitajiet iċċertifikati, u sabiex jiġi evitat ir-riskju ta’ frodi u ta’ għadd doppju, jenħtieġ li l-iskemi ta’ ċertifikazzjoni jużaw ukoll sistemi awtomatizzati, inkluż mudelli elettroniċi, sabiex, bħala minimu, jagħmlu l-informazzjoni li tinsab fl-Anness ta’ dan ir-Regolament disponibbli għall-pubbliku. Sabiex jiġu żgurati kundizzjonijiet ekwi fis-suq intern, jenħtieġ li l-Kummissjoni tadotta atti ta’ implimentazzjoni li jistabbilixxu standards u regoli tekniċi dwar il-funzjonament u l-interoperabbiltà ta’ dawk ir-reġistri ta’ ċertifikazzjoni. Jenħtieġ li unitajiet iċċertifikati jinħarġu biss mir-reġistri ta’ ċertifikazzjoni jew, ladarba jiġi stabbilit, mir-reġistru tal-Unjoni, wara l-ġenerazzjoni ta’ benefiċċju nett tal-assorbiment tal-karbonju jew benefiċċju nett tat-tnaqqis tal-emissjonijiet mill-ħamrija, abbażi ta’ ċertifikat validu tal-konformità li jirriżulta minn awditu ta’ ċertifikazzjoni mill-ġdid. Sabiex jiġu evitati l-ħruġ doppju u l-użu doppju, jenħtieġ li ebda unità ċċertifikata ma tinħareġ aktar minn darba, u jenħtieġ li ma tintużax minn aktar minn persuna fiżika jew ġuridika waħda fi kwalunkwe ħin. Jenħtieġ li l-unitajiet tal-assorbiment permanenti tal-karbonju, l-unitajiet tas-sekwestru fil-kuntest tal-kultivazzjoni karbonika, l-unitajiet tal-ħżin tal-karbonju fil-prodott u l-unitajiet tat-tnaqqis tal-emissjonijiet mill-ħamrija jibqgħu distinti minn xulxin. Sabiex jitqies r-riskju inerenti li l-karbonju assorbit jitreġġa’ lura, jenħtieġ li l-unitajiet tas-sekwestru fil-kuntest tal-kultivazzjoni karbonika u l-unitajiet tal-ħżin tal-karbonju fil-prodotti jiskadu fi tmiem il-perjodu ta’ monitoraġġ għall-attività rilevanti, u li jiġu kkanċellati fir-reġistru taċ-ċertifikazzjoni jew, ladarba jiġi stabbilit, fir-reġistru tal-Unjoni, sakemm l-operatur jew il-grupp ta’ operaturi ma jintrabtux li jestendu l-perjodu ta’ monitoraġġ, f’konformità mar-regoli stabbiliti fil-metodoloġija ta’ ċertifikazzjoni applikabbli.

(37)

L-iskemi ta’ ċertifikazzjoni jaqdu rwol importanti biex juru l-konformità ma’ dan ir-Regolament. Għalhekk, l-iskemi ta’ ċertifikazzjoni jenħtieġ li regolarment jagħtu rapport lill-Kummissjoni dwar l-attività tagħhom. Tali rapporti jenħtieġ li jsiru disponibbli għall-pubbliku, sħaħ jew, fejn xieraq, f’forma aggregata, sabiex tiżdied it-trasparenza u tittejjeb is-superviżjoni mill-Kummissjoni. Barra minn hekk, tali rappurtar ikun jipprovdi l-informazzjoni neċessarja sabiex il-Kummissjoni tirrapporta dwar t-tħaddim tal-iskemi ta’ ċertifikazzjoni bil-ħsieb li jiġu identifikati l-aħjar prattiki u biex tiġi ppreżentata proposta leġiżlattiva, jekk ikun xieraq, sabiex tali prattiki tajbin jiġu promossi ulterjorment. Sabiex jiġi żgurat rapportar komparabbli u konsistenti, il-Kummissjoni jenħtieġ li tadotta atti ta’ implimentazzjoni li jistabbilixxu d-dettalji tekniċi dwar il-kontenut u l-format tar-rapporti mfassla mill-iskemi ta’ ċertifikazzjoni.

(38)

Sabiex l-elementi mhux essenzjali jiġu emendati jew issupplimentati f’dan ir-Regolament, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea fir-rigward tal-istabbiliment ta’ metodoloġiji dettaljati ta’ ċertifikazzjoni għat-tipi differenti ta’ attivitajiet, sabiex tistabbilixxi standards u regoli tekniċi dwar il-funzjonament tar-reġistru tal-Unjoni, u temenda l-Annessi I u II. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (17). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(39)

Sabiex ikunu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (18). Sabiex teżerċita s-setgħa ta’ implimentazzjoni stabbilita f’dan ir-Regolament, jenħtieġ li l-Kummissjoni tiġi megħjuna fil-kompiti tagħha skont dan ir-Regolament mill-Kumitat dwar it-Tibdil fil-Klima stabbilit mir-Regolament (UE) 2018/1999 tal-Parlament Ewropew u tal-Kunsill (19).

(40)

Jenħtieġ li l-Kummissjoni tirrieżamina l-applikazzjoni ta’ dan ir-Regolament sas-27 ta’ Diċembru 2027, u sussegwentement fi żmien sitt xhur mir-riżultat ta’ kull rendikont globali miftiehem skont l-Artikolu 14 tal-Ftehim ta’ Pariġi. Dan ir-Regolament jenħtieġ li jinżamm taħt rieżami fl-aspetti kollha, b’kont meħud: tal-iżviluppi rilevanti li jikkonċernaw il-leġiżlazzjoni tal-Unjoni, inkluż il-konsistenza mar-Regolament (UE) 2018/841, ir-Regolament (UE) 2018/842 tal-Parlament Ewropew u tal-Kunsill (20) u r-Regolament (UE) 2021/1119, kif ukoll id-Direttivi 2003/87/KE u (UE) 2018/2001; l-iżviluppi rilevanti li jikkonċernaw il-UNFCCC u l-Ftehim ta’ Pariġi, inkluż ir-regoli u l-linji gwida relatati mal-implimentazzjoni tal-Artikolu 6 ta’ dak il-Ftehim; il-progress teknoloġiku u xjentifiku, l-aħjar prattiki u l-iżviluppi tas-suq fil-qasam tal-assorbiment tal-karbonju; il-potenzjal għall-ħżin permanenti tal-karbonju f’pajjiżi terzi, soġġett għall-eżistenza ta’ftehimiet internazzjonali msemmija fil-Kapitolu III ta’ tar-Regolament (UE) 2024/1735 tal-Parlament Ewopew u tal-Kunsill (21), filwaqt li jiġu previsti kundizzjonijiet ekwivalenti għal dawk stabbiliti fid-Direttiva 2009/31/KE biex jiġi żgurat li ħżin ġeoloġiku tas-CO2 li huwa maqbud ikun sigur b’mod permanenti u li ma jagħmilx ħsara lill-ambjent; l-impatt ambjentali taż-żieda fl-użu tal-bijomassa li jirriżulta mill-applikazzjoni ta’ dan ir-Regolament, inkluż l-impatt fuq id-degradazzjoni tal-art u r-restawr tal-ekosistema; l-impatt fuq is-sigurtà tal-ikel tal-Unjoni u l-ispekulazzjoni tal-art; u l-kost tal-proċess taċ-ċertifikazzjoni.

(41)

Jenħtieġ li sal-31 ta’ Lulju 2026, il-Kummissjoni tirrieżamina l-inklużjoni tal-agrikoltura fil-kategorija ta’ sorsi tal-IPCC, is-sottokategoriji 3.A fermentazzjoni enterika u 3.B ġestjoni tad-demel, kif iddeterminat skont ir-Regolament (UE) 2018/1999 u l-atti ta’ implimentazzjoni adottati skont dak ir-Regolament, fit-tnaqqis tal-emissjonijiet kopert minn dan ir-Regolament, filwaqt li tqis il-kostijiet tal-għażla, l-evoluzzjoni tal-qafas regolatorju, l-effetti negattivi possibbli li jwasslu għal żieda fl-emissjonijiet tal-gassijiet serra, u l-mira klimatika tal-Unjoni għall-2040 kif proposta f’konformità mar-Regolament (UE) 2021/1119, jenħtieġ li tressaq rapport lill-Parlament Ewropew u lill-Kunsill u, fejn xieraq, jenħtieġ li tressaq proposta leġiżlattiva. Fil-kuntest ta’ dak ir-rieżami, huwa xieraq li jiġi kkunsidrat kif l-unitajiet potenzjali ġġenerati minn tali attivitajiet jenħtieġ li jiġu kkategorizzati. Huwa xieraq ukoll li jitħaffef l-iżvilupp ta’ metodoloġija ta’ ċertifikazzjoni pilota għal attivitajiet li jnaqqsu l-emissjonijiet agrikoli mill-fermentazzjoni enterika u l-ġestjoni tad-demel, bi tħejjija għar-rieżami tal-2026 mill-Kummissjoni.

(42)

Huwa xieraq li ċ-ċertifikati ta’ konformità u l-unitajiet iċċertifikati jsostnu użi finali differenti, bħall-prova ta’ asserzjonijiet korporattivi marbuta mal-klima jew oħrajn marbuta mal-ambjent, inkluż fir-rigward tal-bijodiversità, jew l-iskambju ta’ unitajiet iċċertifikati permezz ta’ swieq volontarji tal-karbonju. Għal dak l-għan, jenħtieġ li l-Kummissjoni tivvaluta u, fejn xieraq, tippreżenta proposta leġiżlattiva dwar il-ħtieġa għal rekwiżiti addizzjonali biex dan ir-Regolament jiġi allinjat mar-regoli u l-gwida fl-Artikolu 6(2) u (4) tal-Ftehim ta’ Pariġi u mal-aħjar prattiki fis-swieq volontarji tal-karbonju. Dik il-valutazzjoni jenħtieġ li tqabbel ir-rekwiżiti metodoloġiċi, inkluż il-linji bażi, il-perjodi ta’ monitoraġġ, il-perjodi ta’ attività, l-addizzjonalità, it-tnixxija, in-nonpermanenza u r-responsabbiltà, kif ukoll tindirizza r-rekwiżiti relatati mal-awtorizzazzjoni u l-aġġustamenti korrispondenti. Jenħtieġ li tidentifika wkoll jekk huwiex xieraq li ssir distinzjoni bejn l-użi finali għal kull tip ta’ unità, kif ukoll ir-rekwiżiti korrispondenti għall-użu ta’ unitajiet minn atturi privati jew partijiet terzi, inkluż għas-swieq volontarji tal-karbonju u l-iskemi ta’ konformità internazzjonali, filwaqt li tiġi żgurata l-konsistenza mal-atti legali rilevanti tal-Unjoni bħar-Regolamenti (UE) 2018/1999 u (UE) 2021/1119, u d-Direttiva (UE) 2022/2464 tal-Parlament Ewropew u tal-Kunsill (22), ir-reġistru għall-eżiti ta’ mitigazzjoni ttrasferiti internazzjonalment skont l-Artikolu 6 tal-Ftehim ta’ Pariġi msemmi fl-Artikolu 40 tar-Regolament (UE) 2018/1999 u direttiva fil-futur dwar is-sostanzjar u l-komunikazzjoni ta’ asserzjonijiet ambjentali espliċiti.

(43)

Minħabba li l-objettiv ta’ dan ir-Regolament, jiġifieri l-promozzjoni tal-użu ta’ assorbiment tal-karbonju ta’ kwalità għolja u tat-tnaqqis tal-emissjonijiet mill-ħamrija ta’ kwalità għolja waqt li jiġu minimizzati r-riskji tal-greenwashing, ma jistax jinkiseb b’mod suffiċjenti mill-Istati Membri, iżda jista’ pjuttost, minħabba l-iskala u l-effetti tal-azzjoni, jinkiseb aħjar fil-livell tal-Unjoni, l-Unjoni tista’ tadotta miżuri f’konformità mal-prinċipju ta’ sussidjarjetà kif stipulat fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv,