Ħidma ma’ pajjiżi terzi fuq kwistjonijiet ta’ interess globali

L-Istrument ta’ Sħubija (Partnership Instrument - PI) jipprovdi għall-perjodu 2014-2020 appoġġ ġdid u kumplimentari għall-politiki esterni tal-Unjoni Ewropea, li jestendi s-sħubiji ta’ kooperazzjoni u d-djalogi politiċi għal oqsma u suġġetti ’lil hinn mill-kooperazzjoni għall-iżvilupp.

ATT

Regolament (UE) Nru 234/2014 tal-Parlament Ewropew u tal-Kunsill li jistabbilixxi Strument ta' Sħubija għal kooperazzjoni ma' pajjiżi terzi

SOMMARJU

L-għan ewlieni ta’ dan l-istrument huwa li jappoġġja miżuri li jwieġbu għall-għanijiet li jirriżultaw mir-relazzjonijiet bilaterali, reġjonali jew multilaterali tal-UE mal-pajjiżi terzi u li jindirizza l-isfidi ta’ tħassib globali (bħall-enerġija, is-sigurtà u l-ambjent).

APPOĠĠ

Il-PI jappoġġja miżuri maħsuba sabiex:

• itejbu l-aċċess għas-swieq mhux tal-UE billi jagħtu spinta lill-opportunitajiet ta’ kummerċ, investiment u negozju għall-kumpaniji Ewropej - inkluża l-internazzjonalizzazzjoni ta’ impriżi żgħar u ta’ daqs medju (SMEs);
• jinkoraġġixxu d-diplomazija pubblika, il-kuntatti bejn in-nies, il-kooperazzjoni akkademika u l-attivitajiet ta’ sensibilizzazzjoni maħsuba biex jippromwovu l-valuri u l-interessi tal-UE;
• jippromwovu għanijiet relatati ma’ kwistjonijiet globali bħat-tibdil fil-klima, l-ekonomija aktar ekoloġika, l-immigrazzjoni, ix-xjenza u l-innovazzjoni, il-mobbiltà, il-kummerċ u l-investiment.

Għalhekk, il-PI jservi bħala sostenn għall-implimentazzjoni tad-dimensjoni internazzjonali tal-Istrateġija Ewropa 2020.

BENEFIĊJARJI

Il-pajjiżi msieħba huma l-pajjiżi bi dħul medju jew għoli industrijalizzati u oħrajn madwar id-dinja, fosthom il-pajjiżi li għadhom qegħdin jiżviluppaw bi rwol dejjem akbar fl-affarijiet dinjija (bħall-pajjiżi G20).

Il-PI sejjer isaħħaħ ukoll relazzjonijiet ġodda ma’ pajjiżi li b’mod gradwali qegħdin jimxu ’lil hinn mill-għajnuna għall-iżvilupp bilaterali.

APPROĊĊ FLESSIBBLI

L-istrument huwa maħsub biex ikun flessibbli sabiex b’hekk jippermetti lill-Unjoni Ewropea (UE) tirreaġixxi għas-sitwazzjoni li qiegħda tinbidel b’mod mgħaġġel tal-pajjiżi msieħba. Il-PI sejjer jiddifferenzja wkoll l-għajnuna pprovduta lill-pajjiżi msieħba b’kunsiderazzjoni tal-kuntesti ekonomiċi, soċjali u politiċi tagħhom.

BAĠIT U IMPLIMENTAZZJONI

Il-baġit tal-PI għall-perjodu 2014-2020 huwa ta’ EUR954 765 000 . Ħafna mir-regoli u l-proċeduri għall-implimentazzjoni ta' dan il-programm jinsabu fir-Regolament (UE) Nru 236/2014, regolament trasversali li jallinja u jissimplifika l-implimentazzjoni tal-istrumenti esterni kollha tal-UE.

Aktar informazzjoni tista' tinstab minn hawn 'il quddiem:

• L-Istrument ta’ Sħubija tal-UE

12.09.2014