Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Summaries of EU Legislation

Vetturi sikuri għall-agrikoltura u għall-forestrija

 

SOMMARJU TA’:

Ir-Regolament (UE) Nru 167/2013 dwar l-approvazzjoni u s-sorveljanza tas-suq ta’ vetturi għall-agrikoltura u għall-forestrija

X’INHU L-GĦAN TAR-REGOLAMENT?

Ir-regolament jistabbilixxi regoli dwar is-sikurezza u l-ħarsien tal-ambjent kif ukoll proċeduri amministrattivi għall-approvazzjoni tat-tip* ta’ tratturi* u vetturi oħra għall-agrikoltura u għall-forestrija.

Il-kategoriji speċifiċi tal-vetturi (R = karrijiet, S = tagħmir irmunkat interkambjabbli, T = tratturi bir-roti, u C = tratturi biċ-ċineg) u s-subkategoriji (R1, R2, eċċ.) huma elenkati fl-Artikolu 4 tar-regolament.

Ir-regolament ġie emendat u aġġornat diversi drabi:

  • li jemenda r-Regolament (UE) 2016/1628 (ara s-sommarju) jallinja l-leġiżlazzjoni dwar il-vetturi għall-agrikoltura u għall-forestrija għal makkinarju mobbli mhux tat-triq (NRE) fir-rigward tal-valuri ta’ limitu speċifiċi, il-proċeduri tat-testijiet u r-rekwiżiti għall-emissjonijiet li jniġġsu li għandhom jiġu ssodisfati.
  • li jemenda r-Regolament (UE) 2019/519 jiċċara d-deskrizzjonijiet tat-tratturi bir-roti għall-agrikoltura T1 u T2 fir-Regolament (UE) Nru 167/2013.

PUNTI EWLENIN

Kamp ta’ applikazzjoni

Ir-regolament japplika għall-approvazzjoni tat-tip tal-UE ta’ tratturi għall-agrikoltura u għall-forestrija, karrijiet* u tagħmir irmunkat interkambjabbli*. Madankollu, il-manifatturi jistgħu jagħżlu li minflok jikkonformaw mar-rekwiżiti nazzjonali fil-każ ta’ tratturi biċ-ċineg, bi clearance għolja jew wesgħin ħafna, kif ukoll karrijiet u tagħmir irmunkat interkambjabbli.

Fil-każ tat-tratturi, dan ir-regolament ikopri r-rekwiżiti rilevanti kollha tas-sikurezza, filwaqt li għall-karrijiet, tagħmir irmunkat interkambjabbli jew kull makkinarju installat fuq it-tratturi, id-Direttiva 2006/42/KE (ara s-sommarju) tapplika għal dawk ir-riskji mhux koperti minn dan ir-regolament.

Il-manifatturi huma responsabbli għall-vetturi u l-komponenti li jikkonformaw mar-regolament f’termini ta’ sikurezza u minimizzazzjoni tal-impatt fuq l-ambjent, inkluż, iżda mhux limitat għal:

  • l-integrità strutturali;
  • il-protezzjoni u l-istrutturi kontra l-qlib;
  • l-ispazju għall-immanuvrar u l-aċċess għall-pożizzjoni tas-sewqan;
  • il-viżibilità u l-kontrolli, inkluż il-waqfien tal-emerġenza;
  • dawl, disinn estern, tajers, brejkijiet u aċċessorji;
  • il-ħoss estern u intern;
  • l-emissjonijiet li jniġġsu.

Il-manifatturi għandhom jipprovdu wkoll lin-negozjanti u lil dawk li jsewwu aċċess faċli għal siti web b’informazzjoni dwar it-tiswija u l-manutenzjoni, materjal ta’ taħriġ u għodod tax-xogħol.

Proċedura għall-approvazzjoni tat-tip

  • L-applikazzjoni tista’ ssir fi stadji jew għall-komponenti individwali. Fajl ta’ informazzjoni, b’data, disinni u ritratti, huwa sottomess lill-awtorità tal-approvazzjoni* tal-pajjiż tal-UE, segwit mill-ittestjar tal-konformità u l-ħruġ ta’ ċertifikat.
  • L-awtoritajiet tal-approvazzjoni ta’ pajjiżi oħra tal-UE jiġu nnotifikati bl-approvazzjonijiet li kellhom suċċess fi żmien xahar, filwaqt li n-notifika ta’ falliment jew ta’ rtirar tal-approvazzjoni għandha tiġi kkomunikata mingħajr dewmien, jekk xi sejba titqies bħala riskju għas-sigurtà.

Kontrolli u penali

Il-manifatturi jiġu kkontrollati b’mod regolari minn awtorità kompetenti jew servizz tekniku maħtur. Il-pajjiżi tal-UE jwettqu sorveljanza tas-suq u kontrolli tal-vetturi, sistemi u komponenti li jidħlu fis-suq u japplikaw penali jekk jiġu miksura r-regolamenti.

Atti delegati u implimentati

Il-Kummissjoni Ewropea adottat l-atti delegati u ta’ implimentazzjoni li ġejjin.

  • Ir-Regolament Delegat (UE) Nru 1322/2014 li jissupplementa u jemenda r-Regolament (UE) Nru 167/2013 jistabbilixxi r-rekwiżiti tekniċi u l-metodi tal-ittestjar meħtieġa għall-kostruzzjoni ta’ vetturi għall-agrikoltura u għall-forestrija biex jitnaqqas ir-riskju ta’ korriment għal persuni li jaħdmu fuq il-vettura jew magħha.
  • Ir-Regolament Delegat (UE) 2015/68 li jissupplementa r-Regolament (UE) Nru 167/2013 fir-rigward tar-rekwiżiti tal-ibbrejkjar tal-vettura li jistabbilixxi r-rekwiżiti tekniċi u l-proċeduri tal-ittestjar fir-rigward tas-sikurezza funzjonali fir-rigward tal-prestazzjoni tal-ibbrejkjar ta’ vetturi għall-agrikoltura u għall-forestrija, u sistemi, komponenti u unitajiet tekniċi separati maħsuba għal dawn il-vetturi.
  • Ir-Regolament Delegat (UE) 2015/208 li jissupplimenta r-Regolament (UE) Nru 167/2013 fir-rigward tar-rekwiżiti tas-sikurezza funzjonali tal-vetturi jistabbilixxi r-rekwiżiti tekniċi u l-proċeduri tat-testijiet fir-rigward tas-sikurezza funzjonali, għajr fir-rigward tar-rendiment tal-brejkijiet, għall-approvazzjoni u s-sorveljanza tas-suq ta’ vetturi għall-agrikoltura u għall-forestrija u s-sistemi, komponenti u unitajiet tekniċi separati maħsuba għal dawn il-vetturi.
  • Ir-Regolament ta’ Implimentazzjoni (UE) 2015/504 li jimplimenta r-Regolament (UE) Nru 167/2013 jistabbilixxi kundizzjonijiet uniformi għall-implimentazzjoni tar-rekwiżiti amministrattivi għall-approvazzjoni ta’ vetturi ġodda għall-agrikoltura u għall-forestrija, kif ukoll ta’ sistemi, komponenti u unitajiet tekniċi separati mfasslin u mibnija għat-tali vetturi u għat-tqegħid fis-suq u d-dħul fis-servizz ta’ parts jew tagħmir li jistgħu joħolqu riskju serju għall-funzjonament tajjeb tas-sistemi li huma essenzjali għas-sikurezza tal-vettura jew għall-prestazzjoni ambjentali tagħha.
  • Ir-Regolament Delegat (UE) 2018/985 jissupplimenta r-Regolament (UE) Nru 167/2013 fir-rigward tar-rekwiżiti tal-prestazzjoni ambjentali u tal-unità tal-propulsjoni tal-vetturi għall-agrikoltura u għall-forestrija u l-magni tagħhom. Sabiex jiġi indirizzat l-impatt tal-kriżi tal-COVID-19, ir-Regolament Delegat (UE) 2020/1564 jemenda r-Regolament (UE) 2018/985 li jestendi l-perjodi ta’ tranżizzjoni tiegħu:
    • għal magni tas-subkategoriji fi ħdan il-kategorija NRE li għalihom id-data obbligatorja tal-applikazzjoni stabbilita fl-Anness III tar-Regolament (UE) 2016/1628 fir-rigward tat-tqegħid fis-suq hija l-1 ta’ Jannar 2020, il-pajjiżi tal-UE għandhom jawtorizzaw l-estensjoni tal-perjodu ta’ 24 xahar ta’ tqegħid fis-suq u tal-perjodu ta’ 18-il xahar ta’ manifattura bi 12-il xahar addizzjonali għall-manifatturi tal-vetturi bi produzzjoni annwali totali ta’ inqas minn 100 unità ta’ vetturi għall-agrikoltura u għall-forestrija mgħammra b’magna;
    • għal magni tas-subkategoriji kollha li għalihom id-data obbligatorja ta’ applikazzjoni stabbilita fl-Anness III tar-Regolament (UE) 2016/1628 fir-rigward tat-tqegħid fis-suq hija l-1 ta’ Jannar 2019, il-perjodu ta’ 24 xahar ta’ tqegħid fis-suq u l-perjodu ta’ 18-il xahar ta’ manifattura se jiġu estiżi bi 12-il xahar.

Reviżjoni

Sal-aħħar tal-2019, il-pajjiżi tal-UE kellhom jirrapportaw lill-Kummissjoni dwar it-tħaddim tar-regolament li, min-naħa tagħha, għandha tippreżenta rapport sal-31 ta’ Diċembru 2022 bi proposti għal leġiżlazzjoni, jekk xieraq.

MINN META JAPPLIKA R-REGOLAMENT?

  • Ir-Regolament (UE) Nru 167/2013 ilu japplika mill-1 ta’ Jannar 2016.
  • Ir-Regolament Emendatorju (UE) 2016/1628 ilu japplika mill-1 ta’ Jannar 2017.
  • Ir-Regolament Emendatorju (UE) 2019/519 ilu japplika mit-18 ta’ April 2019.

SFOND

Għal aktar informazzjoni, ara:

TERMINI EWLENIN

Approvazzjoni tat-tip: il-proċedura li biha awtorità tal-approvazzjoni tiċċertifika li tip ta’ vettura, sistema, komponent jew unità teknika separata jissodisfa ċerti rekwiżiti leġiżlattivi preskritti.
Trattur: vettura bil-mutur, bir-roti jew bil-katina għall-agrikoltura jew għall-forestrija li tista’ tivvjaġġa aktar minn 6 km/h, iddisinjata biex tiġbed, timbotta, iġġorr u tattiva tagħmir jew biex tirmonka karrijiet.
Karru: kwalunkwe vettura agrikola jew forestali maħsuba l-aktar biex tiġi rmunkata minn trattur u maħsuba l-aktar biex iġġorr tagħbijiet jew biex tipproċessa materjali.
Tagħmir irmunkat interkambjabbli: kull vettura użata fl-agrikoltura jew fil-forestrija ddisinjata biex tiġi rmunkata minn trattur, li tinkorpora għodda u tagħmir li jibdlu jew iżidu mal-funzjonijiet tat-trattur u li jaħżnu temporanjament kull materjal prodott jew meħtieġ matul ix-xogħol.
Awtorità tal-approvazzjoni: l-awtorità stabbilita minn pajjiż tal-UE b’kompetenza għall-aspetti kollha tal-approvazzjoni tat-tip ta’ vettura.

DOKUMENT EWLIENI

Ir-Regolament (UE) Nru 167/2013 tal-Parlament Ewropew u tal-Kunsill tal-5 ta’ Frar 2013 dwar l-approvazzjoni u s-sorveljanza tas-suq ta’ vetturi għall-agrikoltura u għall-forestrija (ĠU L 60, 2.3.2013, pp. 1-51)

L-emendi suċċessivi għar-Regolament (UE) Nru 167/2013 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament Delegat tal-Kummissjoni (UE) 2018/985 tat-12 ta’ Frar 2018 li jissupplimenta r-Regolament (UE) Nru 167/2013 tal-Parlament Ewropew u tal-Kunsill fir-rigward tar-rekwiżiti tal-prestazzjoni ambjentali u tal-unità tal-propulsjoni tal-vetturi għall-agrikoltura u għall-forestrija u l-magni tagħhom u li jħassar ir-Regolament Delegat tal-Kummissjoni (UE) 2015/96 (ĠU L 182, 18.7.2018, pp. 1-15)

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2015/504 tal-11 ta’ Marzu 2015 li jimplimenta r-Regolament (UE) Nru 167/2013 tal-Parlament Ewropew u tal-Kunsill f’dak li għandu x’jaqsam mar-rekwiżiti amministrattivi għall-approvazzjoni u s-sorveljanza tas-suq tal-vetturi għall-agrikoltura u għall-forestrija (ĠU L 85, 28.3.2015, pp. 1-197)

Ara l-verżjoni konsolidata.

Ir-Regolament Delegat tal-Kummissjoni (UE) 2015/208 tat-8 ta’ Diċembru 2014 li jissupplimenta r-Regolament (UE) Nru 167/2013 tal-Parlament Ewropew u tal-Kunsill fir-rigward tar-rekwiżiti tas-sikurezza funzjonali tal-vetturi għall-approvazzjoni ta’ vetturi għall-agrikoltura u l-forestrija (ĠU L 42, 17.2.2015, pp. 1-175)

Ara l-verżjoni konsolidata.

Ir-Regolament Delegat tal-Kummissjoni (UE) 2015/68 tal-15 ta’ Ottubru 2014 li jissupplementa r-Regolament (UE) Nru 167/2013 tal-Parlament Ewropew u tal-Kunsill fir-rigward tar-rekwiżiti tal-ibbrejkjar tal-vettura għall-approvazzjoni tal-vetturi għall-agrikoltura u għall-forestrija (ĠU L 17, 23.1.2015, pp. 1-139)

Ara l-verżjoni konsolidata.

l-aħħar aġġornament 17.12.2020

Top