Formalitajiet ta’ rappurtar għal bastimenti

PUNTI EWLENIN

Ambitu

Din id-direttiva tapplika għall-formalitajiet ta’ rappurtar applikabbli għat-trasport marittimu għal bastimenti li jaslu fi u bastimenti li jitilqu minn portijiet f’pajjiżi tal-UE.

Pajjiżi tal-UE jridu jiżguraw li l-formalitajiet ta’ rappurtar fil-portijiet tagħhom jintalbu b’mod armonizzat u koordinat. Il-kaptan, jew xi persuna oħra debitament awtorizzata mill-operatur tal-bastiment, għandu jipprovdi notifika lill-awtorità nazzjonali kompetenti, qabel jasal f’port tal-UE, tal-informazzjoni meħtieġa taħt il-formalitajiet ta’ rappurtar.

Trażmissjoni elettronika tad-data

Il-pajjiżi tal-UE:

• kellhom jaċċettaw is-sottomissjoni elettronika tal-formalitajiet ta’ rappurtar permezz ta’ single window sa mhux aktar tard mill-1 ta’ Ġunju 2015; din is-single window nazzjonali hija l-post fejn l-informazzjoni kollha tiġi rappurtata darba u ssir disponibbli għal diversi awtoritajiet kompetenti u l-pajjiżi tal-UE;
• għandhom jiżguraw li l-informazzjoni riċevuta skont il-formalitajiet ta’ rappurtar issir disponibbli għas-sistemi nazzjonali SafeSeaNet tagħhom u jagħmlu disponibbli partijiet minn tali informazzjoni lill-pajjiżi oħra tal-UE permezz tas-sistema SafeSeaNet;
• għandhom jaċċettaw formoli FAL (formoli speċjali żviluppati mill-Organizzazzjoni Marittima Internazzjonali għall-iffaċilitar tat-traffiku marittimu internazzjonali) għat-twettiq tal-formalitajiet ta’ rappurtar u xorta setgħu jaċċettaw informazzjoni pprovduta fil-format stampata sal-1 ta’ Ġunju 2015.

Eżenzjonijiet

Bastimenti li jinstabu fl-ambitu tad-Direttiva 2002/59/KE (ara s-sommarju) u li joperaw bejn portijiet li jinsabu fit-territorju doganali tal-UE, mingħajr ma jkunu ġejjin minn, jidħlu fi jew sejrin lejn port barra l-UE, huma eżenti mill-obbligu li jipprovdu l-informazzjoni.

Emendi

• Id-Direttiva ta’ Emenda (UE) 2017/2109 introduċiet regoli ġodda li għandhom l-għan li jiddiġitilizzaw ir-reġistrazzjoni ta’ persuni li jbaħħru abbord vapuri tal-passiġġieri Hija tfittex li tiżgura d-disponibilità immedjata tal-għadd eżatt ta’ passiġġieri u informazzjoni oħra għall-użu tas-servizzi tat-tiftix u s-salvataġġ (SAR) f’każ ta’ inċident. Taħt ir-rekwiżiti l-ġodda, l-għadd ta’ persuni abbord irid jiġi kkomunikat permezz tas-single windows nazzjonali jew, fejn pajjiżi tal-UE jagħżel hekk, lill-awtoritajiet nominati permezz tas-sistema ta’ identifikazzjoni awtomatika¹ qabel it-tluq tal-vapur.
• Id-Direttiva (UE) 2019/883 dwar il-faċilitajiet tal-akkoljenza fil-portijiet għall-konsenja ta’ skart minn bastimenti li temenda l-anness mad-Direttiva 2010/65/UE dwar l-informazzjoni li għandha tiġi pprovduta lill-awtoritajiet rigward l-iskart minn bastimenti, inkluż il-fdalijiet.

Revoka

Id-Direttiva 2010/65/UE hija revokata mir-Regolament (UE) 2019/1239 f’ambjent ta’ Single Window Marittima Ewropea sa mill-15 ta’ Awwissu 2025. Ir-regolament il-ġdid jistabbilixxi qafas għal ambjent ta’ Single Window Marittima Ewropea (EMSWe) teknoloġikament newtrali u interoperabbli b’interfaċċi armonizzati biex jiffaċilitaw it-trażmissjoni elettronika tal-informazzjoni relatata mal-obbligi tar-rappurtar għall-bastimenti li jaslu, joqogħdu fi u jitilqu minn portijiet tal-UE.