Standards minimi ta’ saħħa u ta’ sikurezza meta jintuża t-tagħmir tax-xogħol

PUNTI EWLENIN

L-impjegaturi għandhom jieħdu kull miżura biex jiżguraw is-sikurezza tat-tagħmir tax-xogħol magħmul disponibbli għall-ħaddiema.

Meta jagħżlu t-tagħmir tax-xogħol, l-impjegaturi għandhom jagħtu attenzjoni lill-kundizzjonijiet tax-xogħol speċifiċi li jeżistu fuq il-post tax-xogħol filwaqt li jqisu s-sikurezza u s-saħħa tal-ħaddiema. Meta r-riskji ma jkunux jistgħu jiġu eliminati kompletament waqt it-tħaddim tat-tagħmir tax-xogħol, l-impjegaturi għandhom jieħdu miżuri xierqa biex inaqqsuhom. Meta tkun teżisti leġiżlazzjoni tal-UE li tirregola t-tagħmir tax-xogħol, l-impjegaturi għandhom jiżguraw li t-tagħmir jissodisfa r-rekwiżiti tiegħu jew ir-rekwiżiti stabbiliti fl-Anness I ta’ din id-direttiva.

L-impjegaturi huma responsabbli biex jiżguraw li t-tagħmir tax-xogħol:

• jingħata manutenzjoni b’mod regolari biex jibqa’ konformi mar-rekwiżiti legali;
• jiġi installat b’mod korrett u qed jaħdem kif suppost billi jiġi żgurat li jsiru spezzjoni/ttestjar tat-tagħmir tax-xogħol minn persuni bi kwalifiki xierqa. Ir-riżultati tal-ispezzjonijiet għandhom jiġu rreġistrati u jinżammu.

Meta t-tagħmir tax-xogħol x’aktarx ikun jinvolvi riskju speċifiku għas-saħħa u s-sikurezza tal-ħaddiem, l-impjegaturi għandhom jiżguraw li l-aċċess għalih ikun ristrett biss għal dawk li jingħataw il-kompitu li jużawh. L-impjegaturi għandhom jiżguraw ukoll li ħaddiema magħżula speċifikament biss iwettqu xogħol ta’ tiswija, modifika, manutenzjoni jew servizz.

L-impjegaturi għandhom iqisu wkoll bis-sħiħ il-prinċipji ergonomiċi u l-aspetti professjonali tas-saħħa fir-rigward tal-ħaddiema meta jużaw it-tagħmir tax-xogħol.

L-impjegaturi għandhom jipprovdu lill-ħaddiema informazzjoni adegwata u ċara (fejn xieraq bil-miktub) dwar it-tagħmir tax-xogħol, dwar:

• il-kundizzjonijiet tal-użu,
• is-sitwazzjonijiet anormali li jistgħu jiġu previsti,
• il-konklużjonijiet misluta mill-esperjenza.

L-impjegaturi għandhom jiżguraw li l-ħaddiema huma mħarrġa kif xieraq, speċjalment fir-rigward ta’ tagħmir b’riskji speċifiċi, u jkunu konxji ta’ kwalunkwe riskju li jista’ jinvolvi l-użu tat-tagħmir.